Chapter
၃၉
ၶူဝ်းၼုင်ႈပုၼ်ႈၵူၼ်းမူတ်းၸၢင်ႇ
၁ ၶဝ်ဢဝ်ၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊႁဵတ်းၶူဝ်းၼုင်ႈၶူဝ်းမႆႊပုၼ်ႈဢၼ်တၵ်းၵိုတ်းႁၢပ်ႇဢမူႉၸဝ်ႈၵႃႈတီႈထႃႇၼႃႉတီႈမူတ်းၸၢင်ႇဢိၵ်ႇတင်းၶူဝ်းၼုင်ႈၶူဝ်းမႆႊဢၼ်မူတ်းၸၢင်ႇပုၼ်ႈဢႃႇရုၼ်ႇၼၼ်ႉၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇၼၼ်ႉဢေႃႈ။
၂ ၶဝ်ဢဝ်ၶမ်း၊ၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊတင်းပိၵ်ႈၶျေႃးႁဵတ်းသိူဝ်ႈသုပ်းဢေႃႈ။
၃ ၶဝ်ၶဵၼ်ႇပျႃးၶမ်းလႄႈထႅၵ်ႇထိူဝ်ႁဵတ်းၸိူၵ်ႈၶမ်းသေယဝ်ႉတမ်ႇၵၢမ်းၵၼ်တေႃးႁဵတ်းၵႃႈၼႂ်းၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊဢိၵ်ႇတင်းပိၵ်ႈၶျေႃးၼၼ်ႉဢေႃႈ။
၄ ၶဝ်ႁဵတ်းသၢႆတွႆးသွင်သဵၼ်ႈဢၼ်ႁႂ်ႈမၼ်းႁွႆႈၸပ်းၵၼ်လႄႈၵႃႈတီႈႁိမ်းသုတ်းမၼ်းသွင်ၽၢႆႇၼၼ်ႉႁွႆႈၸပ်းၵၼ်ယူႇဢေႃႈ။
၅ သၢႆႁတ်ႉဢႅဝ်ဢၼ်ႁၢင်ႈၶိူင်ႈဢၼ်ၸၢပ်ႈသႅင်ႇၵၼ်တင်းတၢင်းဢၼ်ၼုင်ႈသိူဝ်ႈသုပ်းဢၼ်မီးၵႃႈတီႈမၼ်းၼၼ်ႉပဵၼ်ၼိူဝ်ႉလဵဝ်ၵၼ်တင်းသိူဝ်ႈသုပ်းၼၼ်ႉလႄႈပဵၼ်မိူၼ်ၸိူဝ်ႉၼင်ႇတူဝ်မၼ်းဢေႃႈ။ဢဝ်ၶမ်းဢိၵ်ႇတင်းၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊ၊ပိၵ်ႈၶျေႃးႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးၸီႇယၢင်ႇဝႆႉတီႈမုဝ်းသေႇၼၼ်ႉဢေႃႈ။
၆ ၶဝ်သူၺ်းသႅင်ၸၢႆးၶႃးယွတ်ႇသွင်လုၵ်ႈလႄႈဢဝ်ဢႅၵ်ႉၶရႃႇတူဝ်လိၵ်ႈၸွမ်းလူၺ်ႈၼႃႇမႃႉၸိုဝ်ႈသဵင်ၵူၼ်းမဵဝ်းဢိသရေႇလတင်းလၢႆတၢင်ႇသႂ်ႇမိူၼ်ၸိူဝ်ႉၼင်ႇဢၼ်ဢဝ်တၢင်ႇသႂ်ႇဝႆႉၵႃႈၼိူဝ်တၼ်းသိၵ်ႈၼၼ်ႉသေယဝ်ႉဢဝ်သႂ်ႇဝႆႉၵႃႈၼႂ်းႁိူၼ်းၶမ်းမၼ်းဢေႃႈ။
၇ ၸွမ်းၼင်ႇထႃႇဝရႃႉၽြႃးသင်ႇလၢတ်ႈဝႆႉၵႃႈတီႈမုဝ်းသေႇၼၼ်ႉလႄႈမၼ်းဢဝ်သႅင်ၼၼ်ႉသႂ်ႇဝႆႉၵႃႈၼိူဝ်သၢႆတွႆးသိူဝ်ႈသုပ်းၼၼ်ႉႁႂ်ႈပဵၼ်သႅင်ပုၼ်ႈဢၼ်မၼ်းၸဝ်ႈတၵ်းၶုၵ်းၸႂ်လႆႈၶႆႈၸႂ်ထူပ်းၵူၼ်းမဵဝ်းဢိသရေႇလၸိူဝ်းၼၼ်ႉဢေႃႈ။
ၶိူင်ႈဝႆႉၼႃႈဢူၵ်း
၈ မၼ်းဢဝ်ၶမ်းတင်းၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊ၊ပိၵ်ႈၶျေႃးတမ်ႇၵၢမ်းၵၼ်တေႃးႁဵတ်းသိူဝ်ႈသုပ်းၼၼ်ႉဢေႃႈ။
၉ တူပ်ႉႁဵတ်းသွင်ထၢပ်ႈလႄႈၼႃႈယၢဝ်းမၼ်းၶိုပ်ႈၼိုင်ႈၼႃႈပွတ်းမၼ်းၶိုပ်ႈၼိုင်ႈပဵၼ်သီႇၸဵင်ႇၶိုင်ႈဝႆႉဢေႃႈ။
၁၀ ၵႃႈတီႈၶိူင်ႈဝႆႉၼႃႈဢူၵ်းၼၼ်ႉမၼ်းၸီႇသႅင်ဢၼ်မျၢတ်ႈသီႇထႅဝ်ဢေႃႈ။ထႅဝ်ပထမၸမ်းပဵၼ်သႅင်လႅင်ႊဢုၵ်ႉသၽူႈရႃးတင်းမျႃႉဢေႃႈ။
၁၁ ထႅဝ်တုတိယၸမ်းပဵၼ်ပတ်ႉတမျႃးၼီႇလႃႇတင်းၸိင်ႇဢေႃႈ။
၁၂ ထႅဝ်တတိယၸမ်းပဵၼ်ဝႃႇၵိၼ်ႇသူႉမႁူႇရႃႇတင်းၵေႃႇမုၵ်ႉဢေႃႈ။
၁၃ ထႅဝ်ၸတုၵ်ႉထၸမ်းပဵၼ်သႅင်မျၢၵ်ႈရွႆး၊ၸၢႆးၶႃးယွတ်ႇတင်းၼၵႃးသွႆႇဢေႃႈ။သႅင်ႁင်းၽႂ်ႁင်းမၼ်းၸိူဝ်းၼၼ်ႉဢဝ်ၸီႇသႂ်ႇၵႃႈၼႂ်းႁိူၼ်းၶမ်းမၼ်းဢေႃႈ။
၁၄ သႅင်ၸိူဝ်းၼၼ်ႉၸွမ်းၵႃႈၼင်ႇၼႃႇမႃႉၸိုဝ်သဵင်ၵူၼ်းမဵဝ်းဢိသရေႇလၼၼ်ႉသေလႄႈမီးသိပ်းသွင်လုၵ်ႈၸွမ်းၵႃႈၼင်ႇၼႃႇမႃႉၸိုဝ်ႈသဵင်ၶဝ်မီးၼၼ်ႉဢေႃႈ။ပဵၼ်မိူၼ်ၸိူဝ်ႉၼင်ႇဢၼ်ဢဝ်ဢႅၵ်ႉၶရႃႇတူဝ်လိၵ်ႈတၢင်ႇသႂ်ႇဝႆႉၵႃႈၼိူဝ်တၼ်းသိၵ်ႈၼၼ်ႉလႄႈပဵၼ်ပုၼ်ႈမဵဝ်းသိပ်းသွင်ပႃးႁင်းၽႂ်ႁင်းမၼ်းၵႃႈၼင်ႇၼႃႇမႃႉၸိုဝ်သဵင်ၶဝ်မီးၼၼ်ႉဢေႃႈ။
၁၅ ၵႃႈတီႈၽၢႆႇၼိူဝ်ၶိူင်ႈဝႆႉၼႃႈဢူၵ်းၼၼ်ႉၶဝ်ဢဝ်ၶမ်းလွတ်ႈငၢၼ်ႇႁဵတ်းသၢႆလိမ်ႇၵဵဝ်ႈဢၼ်ၽၼ်ႈႁဵတ်းၼၼ်ႉသႂ်ႇဢေႃႈ။
၁၆ ၶဝ်ႁဵတ်းၶူၺ်ႇၶမ်းသွင်ဢၼ်ဢိၵ်ႇတင်းလူင်ႇမွၵ်ႇၶမ်းသွင်လူင်ႇလႄႈဢဝ်ၶူၺ်ႇသွင်ဢၼ်ၼၼ်ႉသႂ်ႇဝႆႉၵႃႈတီႈၸဵင်ႇၶိူင်ႈဝႆႉၼႃႈဢူၵ်းၼၼ်ႉသွင်ၸဵင်ႇဢေႃႈ။ၶဝ်ဢဝ်သၢႆၶမ်းဢၼ်ၽၼ်ႈဝႆႉသွင်သဵၼ်ႈၼၼ်ႉသွတ်ႇသႂ်ႇၵႃႈၼႂ်းၶူၺ်ႇသွင်ၶူၺ်ႇဢၼ်မီးၵႃႈတီႈၸဵင်ႇၶိူင်ႈဝႆႉၼႃႈဢူၵ်းၼၼ်ႉဢေႃႈ။
၁၈ ပၢႆသၢႆဢၼ်ၽၼ်ႈဝႆႉသွင်သဵၼ်ႈၼၼ်ႉၽၢႆႇၼိုင်ႈၸိုင်ၶဝ်မတ်ႉၸပ်းၵႃႈတီႈလူင်ႇမွၵ်ႇၶမ်းသွင်ဢၼ်ၼၼ်ႉဝႆႉလႄႈဢဝ်သႂ်ႇၵႃႈၼိူဝ်သၢႆတွႆးသိူဝ်ႈသုပ်းၵႃႈတီႈၽၢႆႇၼႃႈမၼ်းဢေႃႈ။
၁၉ ၶဝ်သမ်ႉႁဵတ်းၶူၺ်ႇၶမ်းသွင်ဢၼ်လႄႈဢဝ်သႂ်ႇဝႆႉၵႃႈတီႈၸဵင်ႇၶိူင်ႈဝႆႉၼႃႈဢူၵ်းၼၼ်ႉသွင်ၸဵင်ႇၵႃႈတီႈႁိမ်းမၼ်းဢၼ်မီးၽၢႆႇတၢမ်းၼႂ်းလႄႈတေႃႇၸၢပ်ႈၵၼ်တင်းၼႃႈသိူဝ်ႈသုပ်းၼၼ်ႉဢေႃႈ။
၂၀ ၶူၺ်ႇၶမ်းတၢင်ႇဢၼ်ၵေႃႈၶဝ်ႁဵတ်းထႅင်ႈသွင်ဢၼ်လႄႈဢဝ်သႂ်ႇဝႆႉၵႃႈတီႈသၢႆတွႆးသိူဝ်ႈသုပ်းၵႃႈႁိမ်းတႂ်ႈမၼ်းၵႃႈတီႈၼႃႈမၼ်းၼၼ်ႉၵႃႈၼိူဝ်တီႈဢၼ်သိူဝ်ႈသုပ်းတင်းသၢႆႁတ်ႉဢႅဝ်ဢၼ်ႁၢင်ႈၶိူင်ႈၼၼ်ႉသိုပ်ႇၵၢမ်းၵၼ်ၼၼ်ႉဢေႃႈ။
၂၁ ၶဝ်ဢဝ်မႆဢၼ်သွမ်ႇမတ်ႉတွႆးၶူၺ်ႇၶမ်းၶိူင်ႈဝႆႉၼႃႈဢူၵ်းသွင်ဢၼ်ဢိၵ်ႇတင်းၶူၺ်ႇၶမ်းသိူဝ်ႈသုပ်းသွင်ဢၼ်ၼၼ်ႉၸပ်းၵၼ်ဝႆႉဢေႃႈ။ၼင်ႇၼၼ်လႄႈၶိူင်ႈဝႆႉၼႃႈဢူၵ်းၼၼ်ႉႁွႆႈဝႆႈၵႃႈတီႈၽၢႆႇၼိူဝ်သၢႆႁတ်ႉဢႅဝ်ဢၼ်ႁၢင်ႈၶိူင်ႈၵႃႈတီႈသိူဝ်ႈသုပ်းၼၼ်ႉလႄႈယင်းဢမ်ႇၽၢတ်ႇဢမ်ႇယၢၼ်ၵၼ်တင်းသိူဝ်ႈသုပ်းလႄႈမီးယူႇသေႇသေႇၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇၼၼ်ႉဢေႃႈ။
ၶူဝ်းၼုင်ႈဢၼ်မူတ်းၸၢင်ႇတၢင်ႇမဵဝ်း
၂၂ မၼ်းဢဝ်ၶူဝ်းဢၼ်သွမ်ႇၵူၺ်းၵူၺ်းတေႃးႁဵတ်းသိူဝ်ႈယၢဝ်းဢၼ်ၸၢပ်ႈသႅင်ႇၵၼ်တင်းသိူဝ်ႈသုပ်းၼၼ်ႉဢေႃႈ။
၂၃ ၵႃႈတီႈသိူဝ်ႈယၢဝ်းၼၼ်ႉမီးႁူးၶေႃးသိူဝ်ႈၵႃႈၼႂ်းၶိုင်ႈၵၢင်ၽၢႆႇတၢင်းၼိူဝ်မၼ်းမိူၼ်ၸိူဝ်ႉၼင်ႇဢၼ်ပဵၼ်ၵႃႈတီႈႁူးၶေႃးသိူဝ်ႈဢၼ်ဢဝ်လဵၵ်းႁဵတ်းၼၼ်ႉလႄႈသႂ်ႇၵူပ်ႉၶေႃၶမ်းၵႃႈတီႈႁူးၶေႃမၼ်းႁႂ်ႈဢမ်ႇလႆႈသိၵ်ႇလႆႈၶၢတ်ႇဢေႃႈ။
၂၄ ၵႃႈတီႈဢၼ်လဵပ်ႈႁွပ်ႈၸွမ်းႁိမ်းၽၢႆႇတႂ်ႈသိူဝ်ႈယၢဝ်းၼၼ်ႉၶဝ်ဢဝ်ၶူဝ်းဢၼ်သွမ်ႇၶူဝ်းဢၼ်ၵမ်ႇ၊ၶူဝ်းဢၼ်လႅင်ႊတင်းပိၵ်ႈၶျေႃးႁဵတ်းမၢၵ်ႇၸင်ႊသႂ်ႇဢေႃႈ။
၂၅ ၶဝ်ဢဝ်ၶမ်းလွတ်ႈငၢၼ်ႇႁဵတ်းႁိင်ႇဢဝ်ႁိင်ႇၸိူဝ်းၼၼ်ႉသႂ်ႇတီႈဝူင်ႈၵၢင်မၢၵ်ႇၸင်ႈႁူၺ်ႇၼိုင်ႈလႄႈႁူၺ်ႇၼိုင်ႈၵႃႈတီႈဢၼ်လဵပ်ႈႁွပ်ႈၸွမ်းႁိမ်းၽၢႆႇတႂ်ႈသိူဝ်ႈယၢဝ်းၼၼ်ႉဢေႃႈ။
၂၆ မၢၵ်ႇၸင်ႊလုၵ်ႈၼိုင်ႈႁိင်ႇလုၵ်ႈၼိုင်ႇ၊မၢၵ်ႇၸင်ႊလုၵ်ႈၼိုင်ႈႁိင်ႇလုၵ်ႈၼိုင်ႈဢဝ်ၶၼ်ႈၵၼ်ၶႅၼ်ႈၵၼ်သေလႄႈၸွမ်းႁိမ်းမၼ်းလႄႈႁဵတ်းသိူဝ်ႈယၢဝ်းၸိူဝ်ႉၼင်ႇၼၼ်ပုၼ်ႈဢၼ်တၵ်းဢဝ်ႁဵတ်းဢဝ်ပွင်ဢမူႉၸဝ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇၼၼ်ႉဢေႃႈ။
၂၇ ၶဝ်တေႃးႁဵတ်းသိူဝ်ႈပုတ်းပိၵ်ႈၶျေႃးပုၼ်ႈဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉဢိၵ်ႇတင်းၶဵၼ်းႁူဝ်ပိၵ်ႈၶျေႃးတင်းမွၵ်ႇႁူဝ်ပိၵ်ႈၶျေႃးဢၼ်သၢင်ႇထုၵ်ႇတင်းၵူၼ်ပိၵ်ႈၶျေႃး
၂၈ တင်းသၢႆႁတ်ႉဢႅဝ်ဢၼ်ဢဝ်ပိၵ်ႈၶျေႃး၊ၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊတမ်ႇၵၢမ်းၵၼ်တေႃးႁဵတ်းၼၼ်ႉၸိူဝ်းၼၼ်ႉ
၂၉ ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇၼၼ်ႉဢေႃႈ။
၃၀ ၵမ်းၼၼ်ႉၶိူင်ႈပျႃးၶမ်းလွတ်ႈငၢၼ်ႇၵေႃႈၶဝ်ႁဵတ်းလႄႈဢဝ်ဢႅၵ်ႉၶရႃႇတူဝ်လိၵ်ႈဢၼ်ဝႃႈတၢင်းဢၼ်မူတ်းၸၢင်ႇတီႈထႃႇဝရႃႉၽြႃးဢေႃႈ၊ဝႃႈၼင်ႇၼႆၼၼ်ႉ
၃၁ တၢင်ႇသႂ်ႇဝႆႉမိူၼ်ၸိူဝ်ႉၼင်ႇဢၼ်တၢင်ႇသႂ်ႇဝႆႉၵႃႈၼိူဝ်တၼ်းသိၵ်ႈၼၼ်ႉလႄႈဢဝ်သၢႆဢၼ်သွမ်ႇမတ်ႉသႂ်ႇဝႆႉၵႃႈၼိူဝ်ၽၢႆႇၼႃႈၶဵၼ်းႁူဝ်ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇၼၼ်ႉဢေႃႈ။
မုဝ်းသေႇၸႅတ်ႈတူၺ်းသုမ်ႉထဵင်ၸဝ်ႈ
၃၂ ၼင်ႇၼၼ်လႄႈတၢင်းဢၼ်ႁဵတ်းဢၼ်သၢင်ႈသုမ်ႉထဵင်ၸဝ်ႈဢၼ်ဝႃႈသုမ်ႉထဵင်တီႈၸူႉတီႈတုမ်ပရိၵ်ႈသၢတ်ႈၵႃႈမီးတင်းသဵင်ႈတင်းလူင်ယဝ်ႉၸွတ်ႇတူဝ်ႈဢေႃႈ။ၵူၼ်းမဵဝ်းဢိသရေႇလတင်းလၢႆႁဵတ်းၸိူဝ်ႉၼင်ႇၼၼ်ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇၼၼ်ႉဢေႃႈ။
၃၃ မိူဝ်ႈၼၼ်ႉၶဝ်ၼၼ်ႉဢွၼ်ၵၼ်ဢဝ်သုမ်ႉထဵင်ၸဝ်ႈဢၼ်ဝႃႈၸႃႉၸဵမ်သုမ်ႉထဵင်မၼ်းၶိူင်ႈပိူင်မၼ်းတင်းသဵင်ႈတင်းလူင်ဢၼ်ဝႃႈၶေႃၶမ်မၼ်းပႅၼ်ႈမၼ်းသေႈမၼ်းသဝ်မၼ်းတီႈသုပ်းတိၼ်မၼ်းလႄႈ
၃၄ ၼင်သူဝ်းဢၼ်ယွမ်ႉလႅင်ႊပုၼ်ႈဢၼ်တၵ်မုင်းႁူမ်ႇၼင်တႁႃႇသပုၼ်ႈဢၼ်တၵ်းမုင်းႁူမ်ႇၽႃၵင်ႈဢၼ်တၵ်းၵင်ႈတၢင်းၼႂ်းမၼ်း၊
၃၅ ဢိၵ်ႇတင်းတိူၵ်ႈၶိူင်ႈဢၼ်ၶၢမ်ႇသၢၵ်ႈသေႇတင်းၵၢၼ်းႁၢပ်ႇမၼ်းတင်းပလၢင်ႇတီႈၽေႇဢပျႅတ်ႈ
၃၆ ဢိၵ်ႇတင်းၶူင်ႇတီႈၵိၼ်မၼ်းတင်းၶိူင်ႈမၼ်းတင်းၶဝ်ႈမုၼ်းၽၢႆႇၼႃႈၸဝ်ႈဢိၵ်ႇတင်း
၃၇ ၶူင်ႇတီႈတႆႈၽႆးဢၼ်ၶဝ်သႂ်ႇတင်းၵွၵ်းတႆႈၽႆးဢၼ်လႆႈမႄးႁႅၼ်းဝႆႉတင်းၶိူင်ႈၵွၵ်းတႆႈၽႆးၵႃႈမီးတင်းသဵင်ႈတင်းလူင်တင်းၼမ်ႉမၼ်းပုၼ်ႈဢၼ်တၵ်းတႆႈၽႆး
၃၈ ဢိၵ်ႇတင်းယိၸ်ႉပလၢင်ႇၶမ်းတင်းၼမ်ႉမၼ်းပုၼ်ႈဢၼ်တၵ်းတႃးတင်းၼၢမ်ႇသႃႇဢၼ်ႁွမ်ဢၼ်ႁူၺ်းပုၼ်ႈဢၼ်တၵ်းတုတ်ႇၽႆး၊တင်းၽႃႈၵင်ႈ
၃၉ ဢၼ်တၵ်ၵင်ႈၽၵ်းတူသုမ်ႉထဵင်ၸဝ်ႈယိၸ်ႉပလၢင်ႇတွင်းလိူင်တင်းတႃၶႃႇတွင်းလိူင်ၵႃႈတီႈမၼ်းတင်းၵၢၼ်းႁၢပ်ႇမၼ်းတင်းၶိူင်ႈမၼ်းၵႃႈမီးတင်းသဵင်ႈတင်းလူင်
၄၀ ၵွၵ်းလူင်တင်းတိၼ်မၼ်းၽႃႈၵင်ႈႁူဝ်ႉဝၢင်းတင်းသဝ်မၼ်းတင်းတီႈသုပ်းတိၼ်မၼ်းၽႃႈၵင်ႈပုၼ်ႈဢၼ်တၵ်းၵင်ႈၽၵ်းတူႁူဝ်ႉဝၢင်းတင်းၸိူၵ်ႈမၼ်းတင်းလၵ်းမၼ်းတင်းၶိူင်ႈပုၼ်ႈဢၼ်တၵ်းပွင်ႁဵတ်းဢမူႉၸဝ်ႈၵႃႈၼႂ်းသုမ်ႉထဵင်ၸဝ်ႈၶိူင်ႈသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈ
၄၁ ၵႃႈမီးတင်းသဵင်ႈတင်းလူင်ၶူဝ်းၼုင်ႈၶူဝ်းမႆႊဢၼ်တၵ်းလႆႈၼုင်ႈလႆႈမႆႊၼႂ်းမိူဝ်ႈဢၼ်ပွင်ႁဵတ်းဢမူႉၸဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇၶူဝ်းၼုင်ႈၶူဝ်းမႆႊဢၼ်မူတ်းၸၢင်ႇပုၼ်ႈဢၼ်ယိတ်ႉပရေႃးႁိၵ်ႈဢႃႇရုၼ်ႇတၵ်းလႆႈၼုင်ႈလႆႈမႆႊၶူဝ်းၼုင်ႈၶူဝ်းမႆႊပုၼ်ႈဢၼ်လုၵ်ႈၸၢႆးမၼ်းၸိူဝ်းၼၼ်ႉတၵ်းလႆႈၼုင်ႈလႆႈမႆႊႁႂ်ႈလႆႈပွင်ႈႁဵတ်းဢမူႉယိတ်ႉပရေႃးႁိၵ်ႈၼၼ်ႉၸိူဝ်းၼၼ်ႉမႃးၵႃႈတီႈမုဝ်းသေႇဢေႃႈ။
၄၂ ၼင်ႇၼၼ်လႄႈၵူၼ်းမဵဝ်းဢိသရေႇလတင်းလၢႆႁဵတ်းႁႂ်ႈတင်းသဵင်ႈတင်းလူင်ယဝ်ႉတူဝ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇတင်းသဵင်ႈတင်းလူင်ၼၼ်ႉဢေႃႈ။
၄၃ မုဝ်းသေႇလူႈတူၺ်းၵႃႈဢၼ်ၶဝ်ႁဵတ်းတင်းသဵင်ႈတင်းလူင်ၼၼ်ႉလႄႈႁူႉႁၼ်လွင်ႈဢၼ်ၶဝ်ႁဵတ်းႁႂ်ႈယဝ်ႉႁႂ်ႈတူဝ်ႈၼၼ်ႉဢိၵ်ႇတင်းလွင်ႈဢၼ်ၶဝ်ႁဵတ်းၸိူဝ်ႉၼင်ႇၼၼ်ၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၼၼ်ႉသေယဝ်ႉပၼ်တၢင်းလီမင်ႇၵလႃႇတီႈၶဝ်ဢေႃႈ။