Chapter
၃၅
ၾိင်ႈဝၼ်းၵမ်သိၼ်
၁ မုဝ်းသေႇႁႂ်ႈပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ၸူႉၵၼ်တုမ်ၵၼ်သေလႄႈမွၵ်ႇလၢတ်ႈတီႈၶဝ်လႄႈဝႃႈ၊-ၵႂၢမ်းဢၼ်ထႃႇဝရႃႉၽြႃးမီးဢမိင်ႉဝႆႉတီႈသူႁႂ်ႈသူလႆႈၵမ်လႆႈၵျၢင်ႉၸမ်း၊-
၂ ႁူၵ်းဝၼ်းတဵမ်တဵမ်တၵ်းလႆႈဢွၼ်ၵၼ်ႁဵတ်းတၢင်းႁဵတ်းဢေႃႈ။ဝၼ်းသတ်ႉတမၸမ်းတၵ်းလႆႈပဵၼ်ဝၼ်းဢၼ်မူတ်းၸၢင်ႇတီႈသူဝၼ်းၵမ်သိၼ်ဢၼ်တၵ်းလႆႈယူႇၼိမ်ၼိမ်ပုၼ်ႈထႃႇဝရႃႉၽြႃးဢေႃႈ။ၵေႃႉဢၼ်ႁဵတ်းတၢင်းႁဵတ်းၼႂ်းဝၼ်းၼၼ်ႉတၵ်းလႆႈၶၢမ်ႇတၢင်းတၢႆဢေႃႈ။
၃ ၼႂ်းဝၼ်းၵမ်သိၼ်သူဢမ်ႇလႆသႂ်ႇၽႆးၵႃႈၼႂ်းတီႈဢၼ်သူယူႇၵူႈတီႈၵူႈလႅၼ်ၼၼ်ႉ၊ဝႃႈၼင်ႇၼႆဢေႃႈ။
ၶိူင်ႈပိူင်သုမ်ႉထဵင်ၸဝ်ႈ
၄ ၵမ်းၼၼ်ႉမုဝ်းသေႇသမ်ႉမွၵ်ႇလၢတ်ႈတီႈပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်လႄႈဝႃႈ၊-
၅ ဢၼ်ထႃႇဝရႃႉၽြႃးမီးဢမိင်ႉၸဝ်ႈဝႆႉၸမ်း၊-ၼႂ်းသူၼႆႉဢွၼ်ၵၼ်မႄးႁႅၼ်းတၢင်းလူႇတၢင်းတၢၼ်းပုၼ်ႈထႃႇဝရႃႉၽြႃးဝႆႉတႃႉ။
၆ ႁႂ်ႈၶဝ်ၵႃႈဢၼ်မီးၸေႇတၼႃႇတင်းသဵင်ႈတင်းလူင်ၼၼ်ႉဢွၼ်ၵၼ်ဢဝ်တၢင်းလူႇတၢင်းတၢၼ်းပုၼ်ႈထႃႇဝရႃႉၽြႃးဢၼ်ဝႃႈၶမ်း၊ငိုၼ်း၊တွင်းလိူင်၊
၇ ၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊ၊ပိၵ်ႈၶျေႃး၊ၶူၼ်ပႄႉ၊ၼင်ႇသူဝ်းဢၼ်ယွမ်ႉလႅင်ႊ၊ၼင်တႁႃႇယ၊မႆႉဢၵႃႇသ၊ၼမ်ႉမၼ်းပုၼ်ႈဢၼ်တၵ်းတႆႈ၊
၈ ၼၢမ်ႇသႃႇပုၼ်ႈဢၼ်တၵ်းၽေႃႇႁဵတ်းၼမ်ႉမၼ်းဢၼ်တႃး၊ၼၢမ်ႇသႃႇပုၼ်ႈဢၼ်တၵ်းၽေႃႇႁဵတ်းဢၼ်ႁွမ်ဢၼ်ႁူၺ်းပုၼ်ႈဢၼ်တၵ်းတုတ်ႇၽႆး၊
၉ သႅင်ၸၢႆးၶႃးယွတ်ႇဢိၵ်ႇတင်းသႅင်မျၢတ်ႈပုၼ်ႈဢၼ်တၵ်းၶပ်ႉၸီႇၵႃႈတီႈသိူဝ်ႈသုပ်းတင်းၶိူင်ႈဝႆႉၼႃႈဢူၵ်းၼၼ်ႉမႃးတႃႉ။
၁၀ ၼႂ်းသူၼႆႉႁႂ်ႈၶဝ်ၵႃႈဢၼ်ၸႂ်လၵ်းၸႂ်လႅမ်တင်းသဵင်ႈတင်းလူင်မႃးလႄႈဢွၼ်ၵၼ်ႁဵတ်းၵႃႈဢၼ်ထႃႇဝရႃႉၽြႃးသင်ႇလၢတ်ႈဝႆႉဢၼ်ဝႃႈ၊-
၁၁ သုမ်ႉထဵင်ၸဝ်ႈတင်းသုမ်ႉထဵင်မၼ်း၊ဢၼ်ႁူမ်ႇမၼ်း၊ၶေႃမၼ်း၊ပႅၼ်ႈမၼ်း၊သေႊမၼ်း၊သဝ်မၼ်း၊တီႈသုပ်းတိၼ်မၼ်းလႂ်ၸိူဝ်းၼၼ်ႉဢိၵ်ႇတင်းတိူၵ်ႈၸဝ်ႈတင်းၵၢၼ်းႁၢပ်ႇမၼ်းလႂ်၊ပလၢင်ႇတီႈၽေႇဢပျႅတ်ႈၸဝ်ႈ
၁၂ ၽႃႈၵင်ႈဢၼ်တၵ်းလႆႈၵင်ႈၼၼ်ႉ၊ဢိၵ်ႇတင်း
၁၃ ၶူင်ႇတီႈၵိၼ်တင်းၵၢၼ်းႁၢပ်ႇမၼ်းလႂ်၊ၶိူင်ႈမၼ်းၵႃႈမီးတင်းသဵင်ႈတင်းလူင်
၁၄ တင်းၶဝ်ႈမုၼ်းၽၢႆႇၸဝ်ႈဢိၵ်ႇတင်းၶူင်ႇတီႈတႆႈၽႆးပုၼ်ႈဢၼ်တၵ်းတႆႈၽႆးတင်းၶိူင်ႈမၼ်းလႂ်ၵွၵ်းတႆႈၽႆးမၼ်းလႂ်၊
၁၅ ၼမ်ႉမၼ်းပုၼ်ႈဢၼ်တၵ်းတႆႈဢိၵ်ႇတင်းယိၸ်ႉပလၢင်ႇတီႈဢၼ်တၵ်းတုတ်ႇၽႆးၼၢမ်ႇသႃႇတင်းၵၢၼ်းႁၢပ်ႇမၼ်းလႂ်၊ၼမ်ႉမၼ်းပုၼ်ႈဢၼ်တၵ်းတႃး၊ၼၢမ်ႇသႃႇဢၼ်ႁွမ်ဢၼ်ႁူၺ်း၊ၽႃႈၵင်ႈပုၼ်ႈဢၼ်တၵ်းၵင်ႈၵႃႈတီႈၽၵ်းတူသုမ်ႉထဵင်ၸဝ်ႈ၊
၁၆ ဢိၵ်ႇတင်းယိၸ်ႉပလၢင်ႇတီႈဢၼ်တုတ်ႇၽႆးတူဝ်ယိၸ်ႉတင်းတႃႇၶႃႇတွင်းလိူင်မၼ်း၊ၵၢၼ်းႁၢပ်ႇမၼ်းလႂ်၊ၶိူင်ႈမၼ်းၵႃႈမီးတင်းသဵင်ႈတင်းလူင်၊
၁၇ ၵွၵ်းလူင်တင်းတိၼ်မၼ်း၊ဢိၵ်ႇတင်းၽႃႈၵင်ႈဝၢင်းသုမ်ႉထဵင်ၸဝ်ႈလႂ်၊သဝ်မၼ်းလႂ်၊တီႈသုပ်းတိၼ်မၼ်းလႂ်၊ၽႃႈၵင်ႈပုၼ်ႈဢၼ်တၵ်းၵင်ႈၽၵ်းတူဝၢင်း၊
၁၈ ဢိၵ်ႇတင်းလၵ်းသုမ်ႉထဵင်ၸဝ်ႈလႂ်၊လၵ်းဢၼ်ၸၢပ်ႈသႅင်ႇၵၼ်တင်းဝၢင်းမၼ်းလႂ်၊
၁၉ ၸိူၵ်ႈမၼ်းလႂ်၊ဢိၵ်ႇတင်းၶူဝ်းၼုင်ႈၶူဝ်းမႆႊပုၼ်ႈဢၼ်တၵ်းၵိုတ်းႁၢပ်ႇဢမူႉၸဝ်ႈၵႃႈတီႈထႃႇၼႃႉတီႈမူတ်းၸၢင်ႇၶူဝ်းၼုင်ႈၶူဝ်းမႆႊဢၼ်မူတ်းၸၢင်ႇပုၼ်ႈဢၼ်ယိတ်ႉပရေႃးႁိၵ်ႈဢႃႇရုၼ်ႇတင်းလုၵ်ႈၸၢႆးမၼ်းတင်းလၢႆတၵ်းၼုင်ႈတၵ်းမႆႊၼႂ်းမိူဝ်ႈဢၼ်ၶဝ်ပွင်ႁဵတ်းဢမူႉယိတ်ႉပရေႃးႁိၵ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၀ ပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ဢွၵ်ႇသေၵႃႈတီႈမုဝ်းသေႇလႄႈၵေႃႉဢၼ်ႁူဝ်ၸႂ်မၼ်းတိုၵ်းယူင်း
၂၁ ၵေႃႉဢၼ်မီးၸႂ်ၸေႇတၼႃႇၵႃႈမီးတင်းသဵင်ႈတင်းလူင်ဢွၼ်ၵၼ်ပႃးဢဝ်တၢင်းလူႇတၢင်းတၢၼ်းပုၼ်ႈထႃႇဝရႃႉၽြႃး၊ပုၼ်ႈဢၼ်တၵ်းႁဵတ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈ၊ပုၼ်ႈဢၼ်တၵ်းၵိုတ်းႁၢပ်ႇဢမူႉၸဝ်ႈ၊ပုၼ်ႈၶူဝ်းၼုင်ႈၶူဝ်းမႆႊဢၼ်မူတ်းၸၢင်ႇလႄႈမႃးဢေႃႈ။
၂၂ ၵူၼ်းၸၢႆးၵူၼ်းယိင်းၶဝ်ၸိူဝ်းဢၼ်မီးၸႂ်ၸေႇတၼႃႇၼၼ်ႉဢွၼ်ၵၼ်ပႃးဢဝ်ဝႅၼ်၊သွႆႈၶမ်းႁွႆႈၶူႈလင်၊မွင်းၵူၺ်း၊ၶိူဝ်းမၢၵ်ႇပူးတီး၊ၶိူင်ႈၶမ်းၵႃႈမီးတင်းသဵင်ႈတင်းလူင်မႃးလႄႈၶဝ်ၸိူဝ်းဢၼ်လူႇဢၼ်တၢၼ်းၼၼ်ႉႁင်းၽႂ်ႁင်းမၼ်းလူႇတၢၼ်းၶမ်းတီႈထႃႇဝရႃႉၽြႃးဢေႃႈ။
၂၃ ၶဝ်ၸိူဝ်းဢၼ်မီးၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊ၊ပိၵ်ႈၶျေႃး၊ၶူၼ်သူဝ်း၊ၼင်သူဝ်းပေႃႈဢၼ်ယွမ်ႉလႅင်ႊ၊ၼင်တႁႃႇယၼၼ်ႉၵေႃႈပႃးဢဝ်မႃးၵူႈၵေႃႉၵူႈၵူၼ်းဢေႃႈ။
၂၄ ၶဝ်ၸိူဝ်းဢၼ်လူႇငိုၼ်း၊တွင်းလိူင်ၼၼ်ႉၵေႃႈၵူႈၵေႃႉၵူႈၵူၼ်းဢွၼ်ၵၼ်လူႇတၢၼ်းတီႈထႃႇဝရႃႉၽြႃးဢေႃႈ။ၶဝ်ၸိူဝ်းဢၼ်မီးမႆႉဢၵႃႇသပုၼ်ႈဢၼ်တၵ်းႁဵတ်းတၢင်းႁဵတ်းဢၼ်ၸၢပ်ႈသႅင်ႇၵၼ်တင်းဢမူႉၸဝ်ႈၼၼ်ႉၵေႃႈဢွၼ်ၵၼ်ပႃးဢဝ်မႃးၵူႈၵေႃႉၵူႈၵူၼ်းဢေႃႈ။
၂၅ မေႈယိင်းဢၼ်မေႃတေႃးႁုၵ်တင်းသဵင်ႈတင်းလူင်ၵေႃႈဢွၼ်ၵၼ်ဢဝ်မိုဝ်းတူဝ်ၸဝ်ႈၵဝ်ႇတေႃးလႄႈပႃးဢဝ်ၵႃႈဢၼ်ၶဝ်တေႃးတင်းသဵင်ႈတင်းလူင်ဢၼ်ဝႃႈၶူဝ်းဢၼ်သွမ်ႇၶူဝ်းဢၼ်ၵမ်ႇၶူဝ်းဢၼ်လႅင်ႊ၊ပိၵ်ႈၶျေႃးၼၼ်ႉမႃးဢေႃႈ။
၂၆ မေႈယိင်းဢၼ်ၺၢၼ်ႇႁူဝ်ၸႂ်တိုၵ်းယူင်းၼၼ်ႉတင်းသဵင်တင်းလူင်ဢွၼ်ၵၼ်တေႃးၶူၼ်ပႄႉဢေႃႈ။
၂၇ ၵူၼ်းယႂ်ႇၵူၼ်းလူင်ၵေႃႈဢွၼ်ၵၼ်ပႃးဢဝ်သႅင်ၸၢႆးၶႃးယွတ်ႇတင်းသႅင်ပုၼ်ႈတၵ်းၶပ်ႉၸီႇၵႃႈတီႈသိူဝ်ႈသုပ်းတင်းၶိူင်ႈဝႆႉၼႃႈဢူၵ်း
၂၈ ဢိၵ်ႇတင်းၼမ်ႉမၼ်းပုၼ်ႈဢၼ်တၵ်းတႆႈၼၢမ်ႇသႃႇပုၼ်ႈဢၼ်တၵ်းၽေႃႇႁဵတ်းၼမ်ႉမၼ်းဢၼ်တႃး၊ၼၢမ်ႇသႃႇပုၼ်ႈဢၼ်တၵ်းၽေႃႇႁဵတ်းဢၼ်ႁွမ်ဢၼ်ႁူၺ်းပုၼ်ႈဢၼ်တၵ်းတုတ်ႇၽႆးၼၼ်ႉမႃးဢေႃႈ။
၂၉ ၼင်ႇၼၼ်လႄႈၵူၼ်းယိင်းၵူၼ်းၸၢႆးၼႂ်းၵူၼ်းမဵဝ်းဢိသရေႇလတင်းလၢႆၼၼ်ႉၶဝ်ၸိူဝ်းဢၼ်ၸႂ်ၸေႇတၼႃႇတိုၵ်းယူင်းႁႂ်ႈလႆႈပႃးဢဝ်ပုၼ်ႈတၢင်းႁဵတ်းတၢင်းသၢင်ႈၵူႈၸိူဝ်ႉၵူႈပိူင်ၵႃႈဢၼ်ထႃႇဝရႃႉၽြႃးသင်ႇလၢတ်ႈဝႆႉမႃးတီႈမိုဝ်းမုဝ်းသေႇၼၼ်ႉၵႃႈမီးတင်းသဵင်ႈတင်းလူင်ၼၼ်ႉၶဝ်မီးတင်းၸႂ်ၸေႇတၼႃႇလူႇတၢၼ်းတီႈထႃႇဝရႃႉၽြႃးဢေႃႈ။
ပေႇၸၸေႇလတင်းဢႁေႃႇလျႃႇၽ
၃၀ ၵမ်းၼၼ်ႉမုဝ်းသေႇသမ်ႉလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-ထွမ်ႇလူ၊ထႃႇဝရႃႉၽြႃးႁွင်ႉဢဝ်ၸိုဝ်ဢဝ်သဵင်ပေႇၸလေႇလလုၵ်ႈၸၢႆးဢုရိဢၼ်ပဵၼ်လုၵ်ႈၸၢႆးႁုရၵႃႈၼႂ်းၸိူဝ်ႉၶိူဝ်းယုတၼၼ်ႉဝႆႉဢေႃႈ။
၃၁ မၼ်းၸဝ်ႈႁႂ်ႈမၼ်းတဵမ်ဝႆႉတင်းဝိၺိၺ်ႇၽြႃးပဵၼ်ၸဝ်ႈၼႂ်းၺၢၼ်ႇၼႂ်းပိင်ႇၺႃႇၼႂ်းဢတၢတ်ႈဢၼ်ၸၢင်ႊဢၼ်မေႃၼႂ်းတၢင်းႁဵတ်းဢၼ်ၸၢင်ႊႁဵတ်းၵူႈၸိူဝ်ႉၵူႈပိူင်ႁႂ်ႈမၼ်းလႆႈမီးတၢင်းဢၼ်ၸၢင်ႊၵျၢမ်ႇၸၢင်ႊပွင်
၃၂ လွင်ႈတၢင်းဢၼ်လၢၵ်ႇလၢၵ်ႇလၢႆးလၢႆးၵူႈၸိူဝ်ႉၵူႈမဵဝ်းဢတၢတ်ႈဢၼ်ႁဵတ်းလူၺ်ႈၶမ်းႁဵတ်းလူၺ်ႈငိုၼ်းႁဵတ်းလူၺ်ႈတွင်းလိူင်ဢတၢတ်ႈဢၼ်သူၺ်းသႅင်လႄႈ
၃၃ ၸီႇဢတၢတ်ႈဢၼ်မေႃတွင်ႈမေႃၶႅၵ်းၵႃႈတီႈမႆႉ၊ဢတၢတ်ႈဢၼ်ၸၢင်ႊႁဵတ်းလွင်ႈတၢင်းဢၼ်လၢၵ်ႇလၢၵ်ႇလၢႆးလၢႆးၵူႈၸိူဝ်ႉၵူႈပိူင်ၼၼ်ႉယဝ်ႉ။
၃၄ မၼ်းၸဝ်ႈပၼ်ၺၢၼ်ႇတီႈမၼ်းႁႂ်ႈမၼ်းဢိၵ်ႇလူၺ်ႈၵၼ်တင်းဢႁေႃႇလျႃႉၽလုၵ်ႈၸၢႆးဢႁိသမၢၵ်ႉၼႂ်းၸိူဝ်ႉၶိူဝ်းတၼ်ႇၼၼ်ႉလႆႈႁဵတ်းသြႃႇသွၼ်ပၼ်တီႈပိူၼ်ႈယဝ်ႉ။
၃၅ မၼ်းၸဝ်ႈႁႂ်ႈၶဝ်တဵမ်ဝွႆတင်းၺၢၼ်ႇပိင်ႇၺႃႇႁႂ်ႈမေႃႁဵတ်းတၢင်းႁဵတ်းၵူၼ်းဢၼ်မေႃတွင်ႈမေႃၶႅၵ်း၊တၢင်းႁဵတ်းလၢၵ်ႈသမႃးဢၼ်လၢၵ်ႇလၢၵ်ႇလၢႆးလၢႆးတၢင်းႁဵတ်းၵေႃႉဢၼ်မေႃဢဝ်တင်းၶူဝ်းဢၼ်သွမ်ႇၶူဝ်းဢၼ်ၵမ်ႇၶူဝ်းဢၼ်လႅင်ႊပိၵ်ႈၶျေႃးႁၢင်ႈၶိူင်ႈႁဵတ်းတၢင်းႁဵတ်းၵေႃႉဢၼ်မေႃတေႃးႁုၵ်တၢင်းႁဵတ်းၵေႃႉဢၼ်ၸၢင်ႊမေႃၵူႈၸိူဝ်ႉၵူႈပိူင်တၢင်းႁဵတ်းၵေႃႉဢၼ်ၸၢင်ႊၵျၢမ်ႇၸၢင်ႊပွင်လွင်ႈတၢင်းဢၼ်လၢၵ်ႇလၢၵ်ႇလၢႆးလၢႆးၸိူဝ်းၼၼ်ႉၵူႈၸိူဝ်ႉၵူႈမဵဝ်းဢေႃႈ။