Chapter
၃၂
ဝူဝ်းၶမ်း
၁ မိူဝ်ႈဢၼ်ၵူၼ်းတင်းလၢႆႁူႉႁၼ်လွင်ႈဢၼ်မုဝ်းသေႇၼၼ်ႉဢမ်ႇလုၵ်ႉသေၵႃႈၼိူဝ်လွႆလူင်းမႃးႁိုင်ၼႃႇၼၼ်ႉၸိုင်ၶဝ်ဢွၼ်ၵၼ်ၸူႉတုမ်ၵႃႈတီႈဢႃႇရုၼ်ႇလႄႈလၢတ်ႈတီႈမၼ်းဝႃႈ၊-လုၵ်ႉသေၵမ်း။ႁဵတ်းၽြႃးပုၼ်ႈႁဝ်းဢၼ်တၵ်းဢွၼ်ႁူဝ်ႁဝ်းၵႂႃႇၼၼ်ႉသေၵမ်း။မုဝ်းသေႇၵေႃႉဢၼ်ၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉႁဝ်းဢမ်ႇႁူႉမၼ်းပဵၼ်ၸိူဝ်ႉၼင်ႇႁိုဝ်ယူႇယဝ်ႉ၊ဝႃႈၼင်ႇၼႆဢေႃႈ။
၂ ဢႃႇရုၼ်ႇၵေႃႈလၢတ်ႈတီႈၶဝ်လႄႈဝႃႈ၊-ဢွၼ်ၵၼ်ထွတ်ႇဢဝ်ပေႇႁူၶမ်းဢၼ်မီးၵႃႈၼႂ်းႁူမေးသူဢိၵ်ႇတင်းလုၵ်ႈၸၢႆးသူတင်းလုၵ်ႈယိင်းသူၸိူဝ်းၼၼ်ႉသေယဝ်ႉဢဝ်မႃးၵႃႈတီႈၵဝ်တႃႉ၊ဝႃႈၼင်ႇၼႆလႄႈ၊
၃ ၵူၼ်းတင်းသဵင်ႈတင်းလူင်ၵေႃႈဢွၼ်ၵၼ်ထွတ်ႇဢဝ်ပေႇႁူၶမ်းဢၼ်မီးၵႃႈၼႂ်းႁူၶဝ်ၼၼ်ႉသေလႄႈဢဝ်မႃးတီႈဢႃႇရုၼ်ႇဢေႃႈ။
၄ မၼ်းၵေႃႈႁပ်ႉၶၢမ်ႇဢဝ်ၶိူင်ႈပိူင်ၸိူဝ်းၼၼ်ႉၵႃႈတီႈမိုဝ်းၶဝ်သေယဝ်ႉဢဝ်တင်းလဵၵ်းတွင်ႈမႄးႁဵတ်းသေယဝ်ႉႁႂ်ႈပဵၼ်ႁၢင်ႊဝူဝ်းဢွၼ်ႇဢၼ်လေႃႇႁဵတ်းၼၼ်ႉဢေႃႈ။ၶဝ်ၼၼ်ႉၵေႃႈဢွၼ်ၵၼ်လၢတ်ႈလႄႈဝႃႈ၊-ၵူၼ်းမဵဝ်းဢိသရေႇလၶဝ်ဢိူၺ်း၊ဢၼ်ၼႆႉပဵၼ်ၽြႃးသူဢၼ်ၼုၵ်ႈဢဝ်ႈသူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉယဝ်ႉဝႃႈၼင်ႇၼႆဢေႃႈ။
၅ ဢႃႇရုၼ်ႇႁူႉႁၼ်လွင်ႈတၢင်းၼၼ်ႉသေယဝ်ႉတႄႇႁဵတ်းယိၸ်ႉပလၢင်ႇၵႃႈတီႈၽၢႆႇၼႃႈရုၵ်ႉထူႉၼၼ်ႉသေလႄႈႁႂ်ႈႁွင်ႉပၢဝ်ႇႁွင်ႉသေႃႇလႄႈဝႃႈ၊-ၼႂ်းမိူဝ်ႈၽုၵ်ႈပဵၼ်ဝၼ်းဢၼ်တၵ်းလႆႈၶၢမ်ႇပွႆးပုၼ်ႈထႃႇဝရႃႉၽြႃးဢေႃႈ၊ဝႃႈၼင်ႇၼႆဢေႃႈ။
၆ ဝၼ်းမိူဝ်ႈၽုၵ်ႈၼၼ်ႉၶဝ်ဢွၼ်ၵၼ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉသေလႄႈပုၵ်ႉၸေႃႇယိၸ်ႉဢၼ်တုတ်ႇၽႆးလႄႈဢဝ်ယိၸ်ႉမိၵ်ႉသႁႃႇယႃႉမႃးသေယဝ်ႉဢွၼ်ၵၼ်ၼင်ႈယူႇႁႂ်ႈလႆႈၵိၼ်လႆႈၶူပ်းဢေႃႈ။လိုၼ်းၼၼ်ႉဢွၼ်ၵၼ်လုၵ်ႉႁႂ်ႈလႆႈၵႃႈလႆႈဝႅၼ်ဢေႃႈ။
၇ ထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈ၊-မႂ်းလူင်းၵႂႃႇတႃႉ။ၵူၼ်းဢၼ်မႂ်းၼုၵ်ႈဢဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၸိူဝ်းၼၼ်ႉဢွၼ်ၵၼ်ၽွၵ်ႈပျၢၼ်ႇၶိုၼ်းၵႂႃႇယဝ်ႉ။
၈ ၶဝ်ပိူင်ႈသေၵႃႈၼႂ်းသဵၼ်ႈတၢင်းဢၼ်ၵဝ်သင်ႇလၢတ်ႈဝႆႉၼၼ်ႉၵႂႃႇၶၼ်ၶၼ်ၽႂ်းၽႂ်းလႄႈဢွၼ်ၵၼ်လေႃႇႁဵတ်းႁၢင်ႊဝူဝ်းဢွၼ်ႇသေယဝ်ႉၵူဝ်းၵႂၢႆႇလႄႈပုၵ်ႉၸေႃႇယိၸ်ႉၵႃႈတီႈၽၢႆႇၼႃႈမၼ်းလႄႈဝႃႈ၊-မဵဝ်းဢိသရေႇလၶဝ်ဢိူၺ်း၊ဢၼ်ၼႆႉပဵၼ်ၽြႃးဢၼ်ၼုၵ်ႈဢဝ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉယဝ်ႉဝႃႈၸိူဝ်ႉၼင်ႇၼႆယူႇယဝ်ႉ၊ဝႃႈၼင်ႇၼႆဢေႃႈ။
၉ ထႃႇဝရႃႉၽြႃးသမ်ႉလၢတ်ႈတီႈမုဝ်းသေႇထႅင်ႈလႄႈဝႃႈ၊-ၵဝ်လႆႈႁၼ်ၵူၼ်းမဵဝ်းၼႆႉယဝ်ႉ။တူၺ်းလူႊ၊ပဵၼ်ၵူၼ်းမဵဝ်းဢၼ်လမ်းၶေႃးၵႅၼ်ႇၶႅင်ဢေႃႈ။
၁၀ ပိူဝ်ႈၼႆလႄႈယႃႇၵဝ်တႃႉ။ၵဝ်တၵ်းၸႂ်မႆႈၶႂ်ႈၸႃႉၼႃႇလူင်လၢင်တေႃႇၶဝ်လႄႈယႃႉၽဵဝ်ႈၶဝ်ပႅတ်ႈဢေႃႈ။မႂ်းၸမ်းၵဝ်တၵ်းႁႂ်ႈပဵၼ်မဵဝ်းၵူၼ်းဢၼ်ယႂ်ႇၼႃႇလူင်လၢင်ဢေႃႈ၊ဝႃႈၼင်ႇၼႆဢေႃႈ။
၁၁ မုဝ်းသေႇၵေႃႈတွင်းပၢၼ်ႇတီႈထႃႇဝရႃႉၽြႃးၽြႃးပဵၼ်ၸဝ်ႈမၼ်းလႄႈဝႃႈ၊-ထႃႇဝရႃႉၽြႃးတီႈၶႃႈၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းၸႂ်မႆႈၶႂ်ႈၸႃႉၼႃႇလူင်လၢင်တေႃႇၵူၼ်းၸဝ်ႈႁဝ်းဢၼ်ၸဝ်ႈႁဝ်းဢဝ်တင်းမႁႃႇတၼ်းၶူဝ်းဢိၵ်ႇတင်းမိုဝ်းဢၼ်ႁႅင်းယႂ်ႇၼႃႇၼုၵ်ႈဢဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉတီႈၶႃႈ။
၁၂ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵူၼ်းဢေႇၵႅပ်ႉတုတင်းလၢႆတၵ်းလႆႈမီးလွင်ႈဢၼ်တၵ်းလၢတ်ႈဝႃႈ၊-မၼ်းၸဝ်ႈၼုၵ်ႈဢဝ်ၶဝ်ဢွၵ်ႇၵႂႃႇပုၼ်ႈလွင်ႈတၢင်းဢၼ်ဢမ်ႇလီႁႂ်ႈလႆႈဢဝ်ၶဝ်တၢႆၵႃႈတီႈၼႂ်းလွႆလႄႈပႄႇၽဵဝ်ႈၶဝ်ပႅတ်ႈသေၵႃႈၼိူဝ်ၼႃႈလိၼ်မိူင်းၼႆႉၵူၺ်းယဝ်ႉ၊ဝႃႈၼင်ႇၼႆၼင်ႇႁိုဝ်တီႈၶႃႈ။ၶႅၼ်းတေႃႈဝႆႉသေဝၢင်းသေတၢင်းဢၼ်ၸႂ်မႆႈၶႂ်ႈၸႃႉၸဝ်ႈႁဝ်းဢၼ်ယႂ်ႇၼႃႇလူင်လၢင်ၼႆႉသေၵမ်းတီႈၶႃႈ။ၶႅၼ်းတေႃႈပႄႇပႅတ်ႈတၢင်းဢၼ်ဢမ်ႇလီဢၼ်တၵ်းပၼ်တီႈၵူၼ်းၸဝ်ႈႁဝ်းတင်းလၢႆၼၼ်ႉသေၵမ်းတီႈၶႃႈ။
၁၃ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈႁဝ်းဢႃႇပႁမ်ႇ၊ဢိၸၢၵ်ႉ၊ဢိသရေႇလ၊ဢၼ်လႆႈၶၢမ်ႇဢဝ်ၵႂၢမ်းဢၼ်ၸဝ်ႈႁဝ်းတိူင်ႇတူဝ်ၸဝ်ႈၵဝ်ႇလႄႈဝႃႈ၊-ၵဝ်တၵ်းႁႂ်ႈၸိူဝ်ႉၶိူဝ်းသူယႂ်ႇၽေႈၼမ်ၵိုၼ်းမႃးမိူၼ်ၸိူဝ်ႉၼင်ႇလၢဝ်ၵၢင်ႁၢဝ်ဢေႃႈ။
၁၄ ၵဝ်တၵ်းဢဝ်လိၼ်ဢၼ်ၵဝ်လၢတ်ႈဝႆႉၵႃႈမီးတင်းသဵင်ႈတင်းလူင်ၼႆႉပၼ်တီႈၸိူဝ်ႉၶိူဝ်းသူၼၼ်ႉလႄႈၶဝ်တၵ်းလႆႈၶၢမ်ႇဢမူၺ်ႇယူႇသေႇသေႇဢေႃႈ၊ဝႃႈၼင်ႇၼႆမႃးယဝ်ႉၸိူဝ်းၼၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။ထႃႇဝရႃႉၽြႃးၵေႃႈၶုၵ်းၸႂ်လႆႈလူၺ်ႈလွင်ႈတၢင်းဢၼ်ဢမ်ႇလီဢၼ်တၵ်းပၼ်တီႈၵူၼ်းမၼ်းၸဝ်ႈတင်းလၢႆၼၼ်ႉလႄႈဢမ်ႇပၼ်ဢေႃႈ။
၁၅ မုဝ်းသေႇဝၢႆႇၶိုၼ်းလႄႈဢဝ်မိုဝ်းမၼ်းယိပ်းၵမ်ဢဝ်ၶႅပ်းမၢၵ်ႇႁိၼ်ၶိူင်ႈဢၼ်ၶၢမ်ႇသၢၵ်ႈသေႇသွင်ၽႅၼ်ႇၼၼ်ႉသေလႄႈလုၵ်ႉသေၵႃႈၼိူဝ်လွႆလူင်းမႃးဢေႃႈ။ၵႃႈတီႈၼႃႈမၼ်းသွင်ၼႃႈၼၼ်ႉမီးတူဝ်လိၵ်ႈဢႅၵ်ႉၶရႃႇတၢင်ႇသႂ်ႇဝႆႉဢေႃႈ။
၁၆ ၶႅပ်းမၢၵ်ႇႁိၼ်ၸိူဝ်းၼၼ်ႉပဵၼ်မၢၵ်ႇႁိၼ်ဢၼ်ၽြႃးပဵၼ်ၸဝ်ႈႁဵတ်းပဵၼ်ဢေႃႈ။လိၵ်ႈၼၼ်ႉၵေႃႈပဵၼ်လိၵ်ႈၽြႃးပဵၼ်ၸဝ်ႈဢၼ်ဢဝ်တူဝ်လိၵ်ႈဢႅၵ်ႉၶရႃႇတၢင်ႇသႂ်ႇဝႆႉၵႃႈၼိူဝ်ၶႅပ်းမၢၵ်ႇႁိၼ်ၼၼ်ႉဢေႃႈ။
၁၇ ယေႃးသုလႆႈငိၼ်းသဵင်ဢၼ်ၵူၼ်းတင်းလၢႆႁုၼ်ႉမေႃးၵၼ်ယူႇၼၼ်ႉသေယဝ်ႉလၢတ်ႈတီႈမုဝ်းသေႇလႄႈဝႃႈ၊-ပဵၼ်သဵင်ဢၼ်တိုၵ်းၵၼ်ယူႇၵႃႈတီႈတပ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၁၈ မုဝ်းသေႇၵေႃႈၶိုၼ်းလၢတ်ႈလႄႈဝႃႈ၊-သဵင်ဢၼ်ၵဝ်လႆႈငိၼ်းၼၼ်ႉပဵၼ်သဵင်ၶဝ်ၸိူဝ်းဢၼ်ပႄႉၼႅင်ႇလႄႈႁုၼ်ႉမေႃးၵၼ်ယူႇၼၼ်ႉဢမ်ႇၸႂ်ႈ။ပဵၼ်သဵင်ၶဝ်ၸိူဝ်းဢၼ်သုမ်းလႄႈဢွၼ်ၵၼ်ႁွင်ႉႁႆႈၵေႃႈဢမ်ႇၸႂ်ႈ။ပဵၼ်သဵင်ၶဝ်ၸိူဝ်းဢၼ်ႁဵတ်းၵႂၢမ်းဢေႃႈ၊ဝႃႈၼင်ႇၼႆဢေႃႈ။
၁၉ မိူဝ်ႈဢၼ်ႁွတ်ႈထိုင်ၵႃႈတီႈဢၼ်ၸမ်ႁိမ်းတပ်ႉလႄႈႁၼ်ဝူဝ်းဢွၼ်ႇဢိၵ်ႇတင်းဢၼ်ၵႃႈဢၼ်ဝႅၼ်ၼၼ်ႉၸိုင်မုဝ်းသေႇၸႂ်မႆႈၼႃႇလူင်လၢင်လႄႈဢဝ်ၶႅပ်းမၢၵ်ႇႁိၼ်ၸိူဝ်းၼၼ်ႉထႅမ်ႈဢွၵ်ႇပႅတ်ႈသေၵႃႈၼႂ်းမိုဝ်းမၼ်းလႄႈႁႂ်ႈတႅၵ်ႇပႅတ်ႈသေၵႃႈတီႈတိၼ်လွႆၼၼ်ႉဢေႃႈ။
၂၀ ဝူဝ်းဢွၼ်ႇဢၼ်ၶဝ်ႁဵတ်းၼၼ်ႉၵေႃႈမၼ်ဢဝ်ၽႆးတုတ်ႇပႅတ်ႈသေဢေႃႈ။မၼ်းႁဵတ်းႁႂ်ႈပဵၼ်မုၼ်ႈသေယဝ်ႉဢဝ်ၽၢဝ်ႇၵႃႈၼိူဝ်ၼမ်ႉလႄႈႁႂ်ႈၵူၼ်းမဵဝ်းဢိသရေႇလတင်းလၢႆၵိၼ်ၼမ်ႉၼၼ်ႉဢေႃႈ။မုဝ်းသေႇသမ်ႉထၢမ်တီႈဢႃႇရုၼ်ႇလႄႈဝႃႈ၊-
၂၁ ၶဝ်ၸိူဝ်းၼႆႉဢွၼ်ၵၼ်ႁဵတ်းၸိူဝ်ႉၼင်ႇႁိုဝ်တီႈမႂ်းႁႂ်ႈမႂ်းလႆႈႁဵတ်းႁႂ်ႈဢပျႅတ်ႈဢၼ်ယႂ်ႇၼႃႇထၢၼ်ႇၼႆႉႁွတ်ႈထိုင်ၵႃႈၼိူဝ်ၶဝ်၊မိူဝ်ႈဢၼ်ဝႃႈၼင်ႇၼႆၸိုင်ဢႃႇရုၼ်ႇၵေႃႈၶိုၼ်းလၢတ်ႈလႄႈဝႃႈ၊-ၸဝ်ႈႁဝ်းယႃႇပေၸႂ်မႆႈၶႂ်ႈၸႃႉၼႃႇလူင်လၢင်သေၵမ်း။
၂၂ ၸဝ်ႈႁဝ်းႁူႉလွင်ႈဢၼ်ၵူၼ်းၸိူဝ်းၼႆႉမီးၼႂ်းတၢင်းဢၼ်ဢမ်ႇလီၼၼ်ႉယူႇၶႃႈဢေႃႈ။
၂၃ ၶဝ်ဢွၼ်ၵၼ်လၢတ်ႈတီႈၵဝ်ၶႃႈလႄႈဝႃႈ၊-ႁဵတ်းၽြႃးပုၼ်ႈႁဝ်းဢၼ်တၵ်းဢွၼ်ႁူဝ်ႁဝ်းၵႂႃႇၼၼ်ႉသေၵမ်း။မုဝ်းသေႇၵေႃႈဢၼ်ၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉဢမ်ႇႁူႉလွင်ႈဢၼ်မၼ်းပဵၼ်ၸိူဝ်ႉၼင်ႇႁိုဝ်ယူယဝ်ႉ၊ဝႃႈၼင်ႇၼႆလႄႈၵဝ်ၶႃႈၵေႃႈလၢတ်ႈတီႈၶဝ်ဝႃႈ၊-ၵေႃႉဢၼ်မီးၶမ်းႁႂ်ႈမၼ်းထွတ်ႇဢွၵ်ႇတႃႉ၊ဝႃႈၼင်ႇၼႆဢေႃႈ။
၂၄ ၼင်ႇၼၼ်လႄႈၶဝ်ဢွၼ်ၵၼ်ဢဝ်ၶမ်းပၼ်တီႈၵဝ်ၶႃႈလႄႈၵဝ်ၶႃႈဢဝ်သႂ်ႇၵႃႈၼႂ်းၽႆးလႄႈႁဵတ်းဢွၵ်ႇဝူဝ်းဢွၼ်ႇၼႆႉမႃးၶႃႈဢေႃႈ၊ဝႃႈၼင်ႇၼႆဢေႃႈ။
၂၅ မိူဝ်ႈဢၼ်မုဝ်းသေႇႁၼ်ၵူၼ်းတင်းလၢႆယူႇတူဝ်လွတ်ႈတူဝ်ပူၺ်ၵွပ်ႈပိူဝ်ႈဢႃႇရုၼ်ႇႁဵတ်းႁႂ်ႈၶဝ်ယူႇတူဝ်လွတ်ႈတူဝ်ပူၺ်ႁႂ်ႈၶဝ်ပဵၼ်တၢင်းဢၼ်ရၢၼ်ႇသူႇၶဝ်တၵ်းႁဵတ်းပျၢၵ်ႈတီႈၶဝ်ၼၼ်ႉၸိုင်
၂၆ မုဝ်းသေႇၸုၵ်းယူႇၵႃႈတီႈၽၵ်းတူတပ်ႉသေလႄႈလၢတ်ႈဝႃႈ၊-ၽူႈလႂ်ယူႇၽၢႆႇထႃႇဝရႃႉၽြႃးၵေႃႈႁႂ်ႈမၼ်းမႃးတီႈၵဝ်ၼႆႉတႃႉ၊ဝႃႈၼင်ႇၼႆလႄႈၵူၼ်းမဵဝ်းလေႇဝိတင်းသဵင်ႈတင်းလူင်ဢွၼ်ၵၼ်မႃးၸူႉမႃးတုမ်ၵႃႈတီႈမၼ်းဢေႃႈ။
၂၇ မၼ်းၵေႃႈလၢတ်ႈတီႈၶဝ်လႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈၵူၼ်းမဵဝ်းဢိသရေႇလၼၼ်ႉမီးဢမိင်ႉလႄႈဝႃႈၸမ်း၊-ႁႂ်ႈၵူၼ်းၵူႈၵေႃႉဢဝ်လၢပ်ႇဢဝ်လႅဝ်းပႃးသႂ်ႇၵႃႈတီႈဢႅဝ်ၶဝ်သေလႄႈၵႂႃႇၵႂႃႇမႃးမႃးဢဝ်ၸႃႉၸဵမ်ၽၵ်းတူၼႃႈတပ်ႉၽၢႆႇၼိုင်ႈတေႃႇထိုင်ႁွတ်ႈၽၵ်းတူၼႃႈတပ်ႉၽၢႆႇၼိုင်ႈႁႂ်ႈသုတ်းႁႂ်ႈတိူၵ်ႈလႄႈၵူႈၵေႃႉဢွၼ်ၵၼ်ဢဝ်ပီႈၼွင်ႉၶဝ်ၵူႈၵေႃႉဢွၼ်ၵၼ်ဢဝ်ၵေႃႉသေႈၶဝ်ၵူႈၵေႃႉဢွၼ်ၵၼ်ဢဝ်ၵူၼ်းႁိူၼ်းၸမ်ၵၼ်တင်းၶဝ်လႄႈဢဝ်တၢႆတႃႉ၊ဝႃႈၼင်ႇၼႆယဝ်ႉ၊ဝႃႈၼင်ႇၼႆဢေႃႈ။
၂၈ ၵူၼ်းမဵဝ်းလေႇဝိၸိူဝ်းၼၼ်ႉၵေႃႈဢွၼ်ၵၼ်ႁဵတ်းၸွမ်းၵႃႈၼင်ႇဢၼ်မုဝ်းသေႇၸီႇယၢင်ႇၼၼ်ႉလႄႈၼႂ်းဝၼ်းၼၼ်ႉၵူၼ်းသၢမ်ႁဵင်ၸမ်ၸမ်တၢႆဢေႃႈ။
၂၉ ၵမ်းၼၼ်ႉမုဝ်းသေႇသမ်ႉလၢတ်ႈလႄႈဝႃႈ၊-မိူဝ်ႈၼႆႉၸိုင်ၽြႃးပဵၼ်ၸဝ်ႈလိူၵ်ႈၵဵပ်းဢဝ်သူလႄႈပဵၼ်မင်ႇၵလႃႇတီႈသူၵွပ်ႈပိူဝ်ႈဢၼ်သူယူႇၽၢႆႇၼိုင်ႈၵၼ်တင်းလုၵ်ႈလၢင်းတူဝ်ၸဝ်ႈၵဝ်ႇဢိၵ်ႇတင်းပီႈၼွင်ႉတူဝ်ၸဝ်ႈၵဝ်ႁင်းၽႂ်ႁင်းမၼ်းၼၼ်ႉယဝ်ႉ၊ဝႃႈၼင်ႇၼႆဢေႃႈ။
၃၀ ဝၼ်းမိူဝ်ႈၽုၵ်ႈၵေႃႈမုဝ်းသေႇလၢတ်ႈတီႈၵူၼ်းတင်းလၢႆလႄႈဝႃႈ၊-ဢပျႅတ်ႈဢၼ်သူၽိတ်းပိူင်ႈၼႆႉယႂ်ႇၼႃႇလူင်လၢင်ဢေႃႈ။တေႃႈလဵဝ်ၵဝ်တၵ်းၶိုၼ်ႈၸူးၵႃႈတီႈထႃႇဝရႃႉၽြႃးလႄႈၵဝ်ၸၢင်ႊၶေးႁဵတ်းလႆႈႁႂ်ႈၽြႃးပဵၼ်ၸဝ်ႈပွႆႇလွတ်ႈဢပျႅတ်ႈသူဢေႃႈ၊ဝႃႈၼင်ႇၼႆသေယဝ်ႉ၊
၃၁ မုဝ်းသေႇသမ်ႉၶိုၼ်းၶိုၼ်ႈၸူးၵႃႈတီႈထႃႇဝရႃႉၽြႃးလႄႈလဝ်ႈလၢတ်ႈဝႃႈ၊-ဢူဝ်းၸဝ်ႈႁဝ်း၊ဢပျႅတ်ႈဢၼ်ၵူၼ်းၸိူဝ်းၼႆႉၽိတ်းပိူင်ႈၼၼ်ႉယႂ်ႇၼႃႇလူင်လၢင်တီႈၶႃႈဢေႃႈ။ၶဝ်ဢွၼ်ၵၼ်ႁဵတ်းၽြႃးၶမ်းပုၼ်ႈၶဝ်တီႈၶႃႈယဝ်ႉ။
၃၂ ၵူၺ်းၵႃႈပေႃးၸဝ်ႈႁဝ်းမီးဢလူဝ်ႇၶႂ်ႈပွႆႇလွတ်ႈဢပျႅတ်ႈၶဝ်ၸိုင်ပွႆႇလွတ်ႈပၼ်သေၵမ်းတီႈၶႃႈ။ပေႃးဢမ်ႇၼၼ်ၶႅၼ်းတေႃႈမွတ်ႇပႅတ်ႈၸိုဝ်သဵင်ၶႃႈၸဝ်ႈသေၵႃႈၼႂ်းၸႃႈရၢင်းဢၼ်ၸဝ်ႈႁဝ်းၸီႇယၢင်ႇတႅမ်ႈဝႆႉၼၼ်ႉသေၵမ်းတီႈၶႃႈ၊ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊ဝႃႈၼင်ႇၼႆဢေႃႈ။
၃၃ ထႃႇဝရႃႉၽြႃးၵေႃႈလၢတ်ႈတီႈမုဝ်းသေႇလႄႈဝႃႈ၊-ၽူႈလႂ်သေဢမ်ႇဝႃႈၵေႃႉဢၼ်ၽိတ်းပိူင်ႈၵဝ်ၼႆႉၼၼ်ႉၸိုင်ၵဝ်တၵ်းမွတ်ႇပႅတ်ႈၸိုဝ်ႈသဵင်ၵေႃႉၼၼ်ႉသေၵႃႈၼႂ်းၸႃႈရၢင်းၵဝ်ဢေႃႈ။တေႃႈလဵဝ်ၼႆႉမႂ်းၵႂႃႇလႄႈဢဝ်ၵူၼ်းတင်းလၢႆသူင်ႇၵႃႈတီႈဢၼ်ၵဝ်သင်ႇလၢတ်ႈဝႆႉၼၼ်ႉတႃႉ။တမၢၼ်ႇၵၢင်ႁၢဝ်တၵ်းဢွၼ်ႁူဝ်မႂ်းၵႂႃႇဢေႃႈ။
၃၄ ၼႂ်းဝႃႈၼၼ်သေၵေႃႈၼႂ်းမိူဝ်ႈဝၼ်းဢၼ်ၵဝ်မႃးလူမႃးတူၺ်းၼၼ်ႉၵဝ်တၵ်းမႃးလႄႈပၼ်တၢမ်ႇတီႈၶဝ်ဢေႃႈ၊ဝႃႈၼင်ႇၼႆဢေႃႈ။
၃၅ ထႃႇဝရႃႉၽြႃးပၼ်တၢမ်ႇတီႈၵူၼ်းတင်းလၢႆၵွပ်ႈပိူဝ်ႈလွင်ႈတၢင်းဢၼ်ၶဝ်ႁဵတ်းတီႈဝူဝ်းဢွၼ်ႇဢၼ်ဢႃႇရုၼ်ႇႁဵတ်းၼၼ်ႉဢေႃႈ။