Chapter
၂၅
တၢင်းဢၼ်သၢၵ်ႈၵၢပ်ႈပုၼ်ႈသုမ်ႉထဵင်ၸဝ်ႈ
၁ ထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈၸမ်း၊-
သင်ႇလၢတ်ႈတီႈၵူၼ်းမဵဝ်းဢိသရေႇလတင်းလၢႆႁႂ်ႈၶဝ်ဢဝ်တၢင်းလူႇတၢင်းတၢၼ်းမႃးတီႈၵဝ်တႃႉ။
၂ မႂ်းတၵ်းလႆႈၶၢမ်ႇဢဝ်တၢင်းလူႇတၢင်းတၢၼ်းပုၼ်ႈၵဝ်ၼၼ်ႉတီႈၶဝ်ၸိူဝ်းဢၼ်ပႃးတင်းၸႂ်ၸေႇတၼႃႇလူႇတၢၼ်းတီႈၵဝ်ၵႃႈမီးတင်းသဵင်ႈတင်းလူင်ၼၼ်ႉဢေႃႈ။တၢင်းလူႇတၢင်းတၢၼ်းဢၼ်မႂ်းတၵ်းလႆႈၶၢမ်ႇဢဝ်ၼၼ်ႉၸမ်း
၄ ပဵၼ်ၶမ်း၊ငိုၼ်း၊တွင်းလိူင်၊ၶူဝ်းဢၼ်သွမ်ႇ၊ၶူဝ်းဢၼ်ၵမ်ႇ၊ၶူဝ်းဢၼ်လႅင်ႊ၊ပိၵ်ႈၶျေႃး၊ၶူၼ်ပႄႉ၊ၼင်သူဝ်းဢၼ်ယွမ်ႉလႅင်ႊ၊
၅ ၼင်တႁႃႇယႃႉ၊မႆႉဢၵႃႇသႃႉ၊ၼမ်ႉမၼ်းပုၼ်ႈဢၼ်တၵ်းတႆႈ၊ၼၢမ်ႇသႃႇပုၼ်ႈဢၼ်တၵ်းၽေႃႇၼမ်ႉမၼ်းဢၼ်တႃးၼၢမ်ႇသႃႇ
၆ ပုၼ်ႈဢၼ်တၵ်းၽေႃႇဢၼ်ႁွမ်ဢၼ်ႁူၺ်းပုၼ်ႈဢၼ်တၵ်းတုတ်ႇၽႆး၊သႅင်ၸၢႆးၶႃႈယွတ်ႇ
၇ ဢိၵ်ႇတင်းသႅင်လီပုၼ်ႈဢၼ်တၵ်းၶပ်ႉၸီႇၵႃႈတီႈၶိူင်ႈဝႆႉၼႃႈဢူၵ်းတင်းသိူဝ်ႈသုပ်းယိတ်ႉပရေႃးႁိၵ်ႈၸိူဝ်းၼၼ်ႉဢေႃႈ။
၈ ႁႂ်ႈၶဝ်ႁဵတ်းထႃႇၼႃႉတီႈမူတ်ႈၸၢင်ႇပုၼ်ႈတီႈဢၼ်ၵဝ်တၵ်းၵိင်းဝပ်ႈယူႇၼႂ်းၶဝ်ၼၼ်ႉတႃႉ။
၉ သူတၵ်းလႆႈႁဵတ်းၸွမ်းၵႃႈၼင်ႇဢၼ်ၵဝ်တၵ်းၼႄပျႃးတီႈမႂ်းဢၼ်ဝႃႈပုင်ႇႁၢင်ႊသုမ်ႉထဵင်ၸဝ်ႈဢိၵ်ႇတင်းပုင်ႇႁၢင်ႊၶိူင်ႈပိူင်ၵႃႈၼႂ်းသုမ်ႉထဵင်ၸဝ်ႈၸိူဝ်းၼၼ်ႉမိူၼ်မိူၼ်ဢေႃႈ။
တိူၵ်ႈၶမ်း
၁၀ ၶဝ်တၵ်းလႆႈဢဝ်မႆႉဢၵႃႇသႃႉႁဵတ်းတိူၵ်ႈဢၼ်ၼႃႈယၢဝ်းမၼ်းမီးသွင်သွၵ်ႇၶိုပ်ႈ၊ၼႃႈပွတ်းမၼ်းသွၵ်ႇၶိုပ်ႈ၊ၼႃႈသုင်မၼ်းသွၵ်ႇၶိုပ်ႈၼၼ်ႉဢေႃႈ။
၁၁ မႂ်းတၵ်းလႆႈဢဝ်ၶမ်းလွတ်ႈငၢၼ်ႇဢုမ်ႇႁေႃႇသေဢေႃႈ။တၵ်းလႆႈဢုမ်ႇႁေႃႇၽၢႆႇတၢင်းၼွၵ်ႈမၼ်းၽၢႆႇတၢင်းၼႂ်းမၼ်းၼၼ်ႉသေလႄႈႁဵတ်းၶိူင်ႈၶႅပ်းၶမ်းဢၼ်တၵ်းလႆႈလဵပ်ႈႁွပ်ႈၵႃႈတီႈၼိူဝ်ႁိမ်းမၼ်းသေဢေႃႈ။
၁၂ မႂ်းတၵ်းလႆႈလေႃႇႁဵတ်းၶူၺ်ႇၶမ်းသီႇၶူၺ်ႇပုၼ်ႈမၼ်းလႄႈသႂ်ႇဝႆႉၵႃႈတီႈသီႇၸဵင်ႇမၼ်းၼၼ်ႉဢေႃႈ။
၁၃ ၶူၺ်ႇသွင်ၶူၺ်ႇတၵ်းလႆႈမီးတီႈၼႃႈမၼ်းၼႃႈၼိုင်ႈလႄႈၶူၺ်ႇသွင်ၶူၺ်ႇတၵ်းလႆႈမီးတီႈၼႃႈမၼ်းၼႃႈၼိုင်ႈဢေႃႈ။
၁၄ မႂ်းတၵ်းလႆႈဢဝ်မႆႉဢၵႃႇသႁဵတ်းၵၢၼ်းႁၢပ်ႇလႄႈဢဝ်ၶမ်းဢုမ်ႇႁေႃႇသေယဝ်ႉဢဝ်ၵၢၼ်းႁၢပ်ႇၸိူဝ်းၼၼ်ႉသွတ်ႇသႂ်ႇၵႃႈၼႂ်းၶူၺ်ႇၶမ်းဢၼ်မီးၵႃႈတီႈၼႃႈတိူၵ်ႈၸိူဝ်းၼၼ်ႉဝႆႉပုၼ်ႈဢၼ်တၵ်းလႆႈႁၢပ်ႇတိူၵ်ႈၼၼ်ႉဢေႃႈ။
၁၅ ၵၢၼ်းႁၢပ်ႇၸိူဝ်းၼၼ်ႉတၵ်းလႆႈမီးယူႇၵႃႈၼႂ်းၶူၺ်ႇၶမ်းတိူၵ်ႈၼၼ်ႉသေႇသေႇဢေႃႈ။
၁၆ ဢမ်ႇလႆႈဢဝ်ၽၢတ်ႇသေၵႃႈတီႈမၼ်း။မႂ်းတၵ်းလႆဢဝ်ၶိူင်ႈဢၼ်ၶၢမ်ႇသၢၵ်ႈသေႇဢၼ်ၵဝ်တၵ်းပၼ်ၼၼ်ႉဝႆႉၵႃႈၼႂ်းတိူၵ်ႈၼၼ်ႉဢေႃႈ။
၁၇ မႂ်းတၵ်းလႆႈဢဝ်ၶမ်းလွတ်ႈငၢၼ်ႇႁဵတ်းပလၢင်ႇတီႈၽေႇဢပျႅတ်ႈဢၼ်ၼႃႈယၢဝ်းမၼ်းမီးသွင်သွၵ်ႇၶိုပ်ႈ၊ၼႃႈပွတ်ႈမၼ်းမီးသွၵ်ႇၶိုပ်ႈၼၼ်ႉဢေႃႈ။
၁၈ မႂ်းတၵ်းလႆႈဢဝ်ၶမ်းႁဵတ်းၶေႇရူႉၽိမ်ႇသွင်ပႃးဢေႃႈ။တၵ်းလႆႈတွင်ႈႁဵတ်းလႄႈဝႆႉၵႃႈၼိူဝ်ပလၢင်ႇတီႈၽေႇဢပျႅတ်ႈၵႃႈတီႈၼႃႈပွတ်းမၼ်းၼၼ်ႉယေႈၽၢႆႇယေႈပႃးဢေႃႈ။
၁၉ ႁဵတ်းၶေႇရူႉၽိမ်ႇပႃးၼိုင်ႈၵႃႈတီႈၼႃႈပွတ်းမၼ်းၽၢႆႇၼိုင်ႈဢိၵ်ႇတင်းၶေႇရူႉၽိမ်ႇပႃးၼိုင်ႈၵႃႈတီႈၼႃႈပွတ်းမၼ်းၽၢႆႇၼိုင်ႈတႃႉ။သူတၵ်းလႆႈႁဵတ်းၵႃႈၼႂ်းတူဝ်ပလၢင်ႇတီႈၽေႇဢပျႅတ်ႈၼၼ်ႉဢွၵ်ႇပဵၼ်ၶေႇရူႉၽိမ်ႇသွင်ပႃးယေႈၽၢႆႇယေႈပႃးဢေႃႈ။
၂၀ ၶေႇရူႉၽိမ်ႇသွင်ပႃးၼၼ်ႉတၵ်းလႆႈၵီႈပိၵ်ႇၶဝ်ၶိုၼ်ႈၼိူဝ်လႄႈဢဝ်ပိၵ်ႇၶဝ်မုင်းႁူမ်ႇပလၢင်ႇတီႈၽေႇဢပျႅတ်ႈၼၼ်ႉယူႇ၊ဝၢႆႇၼႃႈတေႃႇၵၼ်ယူႇသေလႄႈတူၺ်းပလၢင်ႇတီႈၽေႇဢပျႅတ်ႈၼၼ်ႉယူႇဢေႃႈ။
၂၁ မႂ်းတၵ်းလႆႈဢဝ်ပလၢင်ႇတီႈၽေႇဢပျႅတ်ႈၼၼ်ႉတၢင်ႇဝႆႉၵႃႈၼိူဝ်တိူၵ်ႈဢေႃႈ။ၶိူင်ႈဢၼ်ၶၢမ်ႇသၢၵ်ႈသေႇဢၼ်ၵဝ်တၵ်းပၼ်ၼၼ်ႉၵေႃႈမႂ်းတၵ်းလႆႈဢဝ်ဝႆႉၵႃႈၼႂ်းတိူၵ်ႈၼၼ်ႉဢေႃႈ။
၂၂ ၵဝ်တၵ်းထူပ်းၵၼ်တင်းမႂ်းၵႃႈတီႈၼၼ်ႉလႄႈယူႇၵႃႈၼိူဝ်ပလၢင်ႇတီႈၽေႇဢပျႅတ်ႈၵႃႈတီႈၵႄႈဝူင်ႈၵၢင်ၶေႇရူႉၽိမ်ႇသွင်ပႃးဢၼ်မီးၵႃႈၼိူဝ်တိူၵ်ႈတီႈဢၼ်ဝႆႉၶိူင်ႈဢၼ်ၶၢမ်ႇသၢၵ်ႈသေႇၼၼ်ႉသေလႄႈလၢတ်ႈတေႃႇမႂ်းလွင်ႈၵႃႈဢၼ်ၵဝ်တၵ်းသင်ႇလၢတ်ႈဝႆႉတီႈမႂ်းပုၼ်ႈၵူၼ်းမဵဝ်းဢိသရေႇလတင်းလၢႆၼၼ်ႉဢေႃႈ။
ၶူင်ႇတီႈၵိၼ်
၂၃ မႂ်းတၵ်းလႆႈဢဝ်မႆႉဢၵႃႇသႁဵတ်းၶူင်ႇတီႈၵိၼ်ဢၼ်ၼႃႈယၢဝ်းမီးသွင်သွၵ်ႇ၊ၼႃႈပွတ်းသွၵ်ႇၼိုင်ႈ၊ဢၼ်သုင်မၼ်းသွၵ်ႇၶိုပ်ႈဢေႃႈ။
၂၄ မႂ်းတၵ်းလႆႈဢဝ်ၶမ်းလွတ်ႈငၢၼ်ႇဢုမ်ႇႁေႃႇမၼ်းလႄႈႁဵတ်းၶိူင်ႈၶႅမ်းၶမ်းဢၼ်တၵ်းလႆႈလဵပ်ႈႁွပ်ႈၵႃႈတီႈၼိူဝ်ႁိမ်းမၼ်းသေဢေႃႈ။
၂၅ မႂ်းတၵ်းလႆႈႁဵတ်းၶႃႇပၢၼ်းဢၼ်ၼႃႈပွတ်းမၼ်းမီးၽႃႇမိုဝ်းၼိုင်ႈဢိၵ်ႇတင်းၶိူင်ႈၶဵပ်းၶမ်းဢၼ်တၵ်းလႆႈလဵပ်ႈႁွပ်ႈၵႃႈတီႈၼိူဝ်ႁိမ်းမၼ်းၼၼ်ႉဢေႃႈ။
၂၆ ၶူၺ်ႇၶမ်းသီႇၶူၺ်ႇၵေႃႈမႂ်းတၵ်းလႆႈႁဵတ်းပုၼ်ႈမၼ်းလႄႈဢဝ်ၶူၺ်ႇၸိူဝ်းၼၼ်ႉသႂ်ႇဝႆႉၵႃႈတီႈသီႇၸဵင်ႇမၼ်းဢၼ်မီးၵႃႈၼိူဝ်တိၼ်မၼ်းသီႇၶွၼ်ၼၼ်ႉဢေႃႈ။
၂၇ ၶူၺ်ႇၶမ်းၸိူဝ်းၼၼ်ႉတၵ်းလႆႈမီးၵႃႈတီႈႁိမ်းၶႃႇပၢၼ်းလႄႈပဵၼ်တီႈယူႇၵၢၼ်းႁၢပ်ႇဢၼ်တၵ်းႁၢပ်ႇၶူင်ႇတီႈၵိၼ်ၼၼ်ႉဢေႃႈ။
၂၈ ပုၼ်ႈဢၼ်တၵ်းလႆႈဢဝ်ႁၢပ်ႇၶူင်ႇတီႈၵိၼ်ၼၼ်ႉၸိုင်မႂ်းတၵ်းလႆႈဢဝ်မႆႉဢၵႃႇသႁဵတ်းၵၢၼ်းႁၢပ်ႇလႄႈဢဝ်ၶမ်းလွတ်ႈငၢၼ်ႇဢုမ်ႇႁေႃႇသေဢေႃႈ။
၂၉ မႂ်းတၵ်းလႆႈႁဵတ်းမေႃႈဢႅင်ႇလႂ်၊ၸေႃႉလႂ်၊ၵွၵ်းလႂ်၊ၵွၵ်းဢႅင်ႇပုၼ်ႈဢၼ်တၵ်းထွၵ်ႇတၵ်းႁိုဝ်ႈလႂ်ဢၼ်ၸၢပ်ႈသႅင်ႇၵၼ်တင်းမၼ်းလႄႈဢဝ်ၶမ်းလွတ်ႈငၢၼ်ႇႁဵတ်းဢေႃႈ။
၃၀ မႂ်းတၵ်းလႆႈဢဝ်ၶဝ်ႈမုၼ်းၽၢႆႇၼႃႈၸဝ်ႈတၢင်ႇဝႆႉၵႃႈၼိူဝ်ၶူင်ႇတီႈၵိၼ်ၵႃႈတီႈၽၢႆႇၼႃႈၵဝ်သေႇသေႇဢေႃႈ။
ၶူင်ႇတီႈတႆႈၽႆး
၃၁ ၶူင်ႇတီႈတႆႈၽႆးၵေႃႈမႂ်းတၵ်းလႆႈဢဝ်ၶမ်းလွတ်ႈငၢၼ်ႇႁဵတ်းဢေႃႈ။တၵ်းလႆႈတွင်ႈႁဵတ်းၶူင်ႇတီႈတႆႈၽႆးၼၼ်ႉၸႃႉၸဵမ်တိၼ်မၼ်းတင်းသဝ်မၼ်းဢေႃႈ။ၵွၵ်းမၼ်း၊ပူမ်မၼ်း၊တင်းမွၵ်ႇမူဝ်မၼ်းၸိူဝ်းၼၼ်ႉတၵ်းလႆႈဢွၵ်ႇၵႃႈၼႂ်းတူဝ်မၼ်းလႄႈပဵၼ်ၼိူဝ်ႉလဵဝ်ၵၼ်တင်းမၼ်းဢေႃႈ။
၃၂ ၵိင်ႇႁူၵ်းၵိင်ႇတၵ်းလႆႈတႅၵ်ႇဢွၵ်ႇၵႃႈတီႈသွင်ၽၢၵ်ႇၶၢင်ႈမၼ်းဢေႃႈ။ၽၢႆၼိုင်ႈၵိင်ႇၶူင်ႇတီႈတႆႈၽႆးသၢမ်ၵိင်ႇ၊ၽၢႆႇၼိုင်ႈၵိၼ်ႇၶူင်ႇတီႈတႆႈၽႆးသၢမ်ၵိင်ႇဢေႃႈ။
၃၃ ၽၢႆႇၼိုင်ႈၵႃႈတီႈၵိင်ႇမၼ်းၵိင်ႇၼိုင်ႈတၵ်းလႆႈမီးၵွၵ်းသၢမ်လုၵ်ႈဢၼ်မိူၼ်ၸိူဝ်ႉၼင်ႇမၢၵ်ႇပႃႇတမ်ႇၼၼ်ႉဢိၵ်ႇတင်းပူမ်မၼ်းတင်းမွၵ်ႇမူဝ်မၼ်းလႄႈၽၢႆႇၼိုင်ႈၵႃႈတီႈၵိင်ႇမၼ်းၵိင်ႇၼိုင်ႈတၵ်းလႆႈမီးၵွၵ်းသၢမ်လုၵ်ႈဢၼ်မိူၼ်ၸိူဝ်ႉၼင်ႇမၢၵ်ႇပႃႇတမ်ႇၼၼ်ႉဢိၵ်ႇတင်းပူမ်မၼ်းတင်းမွၵ်ႇမူဝ်မၼ်းဢေႃႈ။
၃၄ ၼင်ႇၼၼ်လႄႈတၵ်းလႆႈပဵၼ်တီႈၵိင်ႇႁူၵ်းၵိင်ႇဢၼ်တႅၵ်ႇဢွၵ်ႇၵႃႈတီႈၶူင်ႇတီႈတႆႈၽႆးၼၼ်ႉဢေႃႈ။ၵႃႈတီႈတူဝ်သဝ်ၶူင်ႇတီႈတႆႈၽႆးၼၼ်ႉၵေႃႈတၵ်းလႆႈမီးၵွၵ်းသီႇလုၵ်ႈဢၼ်မိူၼ်ၸိူဝ်ႉၼင်ႇမၢၵ်ႇပႃႇတမ်ႇၼၼ်ႉဢိၵ်ႇတင်းပူမ်မၼ်းမွၵ်ႇမူဝ်မၼ်းၸိူဝ်းၼၼ်ႉဢေႃႈ။
၃၅ ပုၼ်ႈၵိင်ႇႁူၵ်းၵိင်ႇဢၼ်တႅၵ်ႇဢွၵ်ႇၵႃႈတီႈသဝ်ၶူင်ႇတီႈတႆႈၽႆးၼၼ်ႉတၵ်းလႆႈမီးပူမ်ၵႃႈတႂ်ႈငၢမ်ႈသွင်ၵိင်ႇဢၼ်ဢွၵ်ႇၵႃႈၼႂ်းတူဝ်မၼ်းလႄႈပဵၼ်ၼိူဝ်ႉလဵဝ်ၵၼ်တင်းမၼ်းၼၼ်ႉပူမ်ၼိုင်ႈ၊ၵႃႈတႂ်ႈငၢမ်ႊသွင်ၵိင်ႇဢၼ်ဢွၵ်ႇၵႃႈၼႂ်းတူဝ်မၼ်းလႄႈပဵၼ်ၼိူဝ်ႉလဵဝ်ၵၼ်တင်းမၼ်းၼၼ်ႉပူမ်ၼိုင်ႈ၊ၵႃႈတႂ်ႈငၢမ်ႊသွင်ၵိင်ႇဢၼ်ဢွၵ်ႇၵႃႈၼႂ်းတူဝ်မၼ်းလႄႈပဵၼ်ၼိူဝ်ႉလဵဝ်ၵၼ်တင်းမၼ်းၼၼ်ႉပူမ်ၼိုင်ႈဢေႃႈ။
၃၆ ပူမ်မၼ်းဢိၵ်ႇတင်းၵိင်ႇမၼ်းတင်းလၢႆတၵ်းလႆႈပဵၼ်ၼိူဝ်ႉလဵဝ်ၵၼ်တင်းမၼ်းလႄႈၶူင်ႇတီႈတႆႈၽႆးၼၼ်ႉတင်းသဵင်ႈတင်းမူတ်းတၵ်းလႆႈဢဝ်ၶမ်းလွတ်ႈငၢၼ်ႇတွင်ႈႁဵတ်းဢေႃႈ။
၃၇ ၵွၵ်းတႆႈၽႆးၸဵတ်းၵွၵ်းၵေႃႈမႂ်းတၵ်းလႆႈႁဵတ်းဢေႃႈ။တၵ်းလႆႈတႆႈၵွၵ်းၽႆးၸိူဝ်းၼၼ်ႉႁႂ်ႈဢၼ်လႅင်းထွင်ႇၵႂႃႇသိုဝ်ႈၽၢႆႇၼႃႈမၼ်းဢေႃႈ။
၃၈ ၵိမ်းၺၢပ်ႈၽႆးဢိၵ်ႇတင်းပုၼ်ႈဢၼ်တၵ်းၶၢမ်ႇဢဝ်ဢၼ်ၺၢပ်ႈၽႆးပႅတ်ႈၼၼ်ႉၵေႃႈတၵ်းလႆႈပဵၼ်ၶမ်းလွတ်ႈငၢၼ်ႇဢေႃႈ။
၃၉ မႂ်းတၵ်းလႆႈဢဝ်ၶမ်းလွတ်ႈငၢၼ်ႇတလၢၼ်ႇတၢၼ်ႇၼိုင်ႈႁဵတ်းၶူင်ႇတီႈတႆႈၽႆးဢိၵ်ႇတင်းၶိူင်ႈမၼ်းၵႃႈမီးတင်းသဵင်ႈတင်းလူင်ဢေႃႈ။
၄၀ လွင်ႈၼင်ႇႁိုဝ်တၵ်းလႆႈႁဵတ်းၸွမ်းၼင်ႇပုင်ႇႁၢင်ႊဢၼ်ၵဝ်ၼႄပျႃးတီႈမႂ်းၵႃႈၼိူဝ်လွႆမႃးယဝ်ႉၼၼ်ႉၸိုင်ႁဵတ်းသတိတႃႉ။