Chapter
၂၃
ပိင်းၺၢပ်ႈတြႃးသိုဝ်ႈတေႃႇတင်းၵရုၼႃႇ
၁ မႂ်းဢမ်ႇလႆႈမွၵ်ႇလႆႈလၢတ်ႈသတၢင်းသဵင်ၶၢဝ်ႇဢၼ်ၽိတ်းဢၼ်ပိူင်ႈၼၼ်ႉ။မႂ်းဢမ်ႇလႆႈတူပ်းမိုဝ်းၵၼ်တင်းၶဝ်ၸိူဝ်းဢၼ်ဢမ်ႇတြႃးလႄႈၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။
၂ လမႂ်းဢမ်ႇလႆႈၸွမ်းလင်ၽုင်ၵူၼ်းလႄႈႁဵတ်းဢၼ်ဢမ်ႇတြႃးၼၼ်ႉ။ၼႂ်းလွင်ႈဢၼ်လၢတ်ႈဢမူႉၼၼ်ႉမႂ်းဢမ်ႇလႆႈယူႇၽၢႆႇၵူၼ်းယႂ်ႇၵူၼ်းၼမ်သေလႄႈလၢတ်ႈႁႂ်ႈပိူင်ႈသဵၼ်ႈတၢင်းတြႃး။
၃ ၽၢႆႇၵူၼ်းဢၼ်ယၢၵ်ႈဢၼ်ၽၢၼ်ၵေႃႈမႂ်းဢမ်ႇလႆႈတူၺ်းၼႃႈ။
၄ ပေႃးမႂ်းထူပ်းႁၼ်ဝူဝ်း၊မႃႉလီႈရၢၼ်ႇသူႇမႂ်းၽိတ်းတၢင်းပိူင်ႈတၢင်းၵႂႃႇၸိုင်မႂ်းတၵ်းလႆႈဢဝ်ၶိုၼ်းသူင်ႇပၼ်တီႈမၼ်းၼၼ်ႉဢမၢၼ်ႇၶၢၼ်ပဵၼ်ဢေႃႈ။
၅ ပေႃးမႂ်းထူပ်းႁၼ်မႃႉလီႈၵေႃႉဢၼ်ၸင်းမႂ်းၼၼ်ႉလူမ်ႉယူႇၵႃႈတႂ်ႈၶူဝ်းဢၼ်တၢင်ႇဝႆႉၼၼ်ႉၸိုင်ပိၵ်ႉသမ်ႉမႂ်းဢမ်ႇမီးဢလူဝ်ႇၶႂ်ႈၸွႆႈၶႂ်ႈထႅမ်သေၵေႃႈမႂ်းတၵ်းလႆႈၽွမ်ႉလူၺ်ႈၵၼ်တင်းမၼ်းလႄႈၸွႆႈထႅမ်ဢေႃႈ။
၆ ၼႂ်းမိူဝ်ႈဢၼ်ၵူၼ်းယၢၵ်ႈၵူၼ်းၽၢၼ်လၢတ်ႈဢမူႉတြႃးတီႈမႂ်းၼၼ်ႉၸိုင်မႂ်းဢမ်ႇလႆႈဝေႈပိူင်ႈသဵၼ်ႈတၢင်းတြႃးသေလႄႈၸီႇယၢင်ႇ။
၇ မႂ်းတၵ်းလႆႈဝေႈပႅတ်ႈဢမူႉဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉဢေႃႈ။မႂ်းဢမ်ႇလႆႈဢဝ်ၵေႃႉဢၼ်ဢမ်ႇမီးဢပျႅတ်ႈၵေႃႉဢၼ်သိုဝ်ႈတေႃႇၼၼ်ႉတၢႆ။လွင်ႈမၼ်းၸမ်းၵဝ်တၵ်းဢမ်ႇပွႆႇၶဝ်ၸိူဝ်းဢၼ်ဢမ်ႇတြႃးၼၼ်ႉလွတ်ႈဢပျႅတ်ႈလႃးလႃးၵူၺ်း။
၈ မႂ်းဢမ်ႇလႆႈၵိၼ်လၢပ်ႈလၢၵ်ႈသွင်ႇ။လၢပ်ႈလၢၵ်ႈသွင်ႇၸိုင်ၸၢင်ႊႁႂ်ႈတႃၶဝ်ၸိူဝ်းဢၼ်မီးပိင်ႇၺႃႇၼၼ်ႉလပ်းၵႂႃႇမွတ်ႇၵႂႃႇလႄႈၸၢင်ႊႁႂ်ႈၵႂၢမ်းၶဝ်ၸိူဝ်းဢၼ်သိုဝ်ႈတေႃႇၼၼ်ႉပိူင်ႈၵႂႃႇၽိတ်းၵႂႃႇဢေႃႈ။
၉ မႂ်းဢမ်ႇလႆႈၼိၵ်ႈၸၢၵ်ႈငႅၼ်းသေးၶႅၵ်ႇဢၼ်ပဵၼ်ၵူၼ်းတၢင်ႇဝၢၼ်ႈတၢင်ႇမိူင်းၼၼ်ႉ။ပိူဝ်ႈဢၼ်သူယၢမ်ႈလႆႈပဵၼ်ၶႅၵ်ႇၵႃႈၼႂ်းမိူင်းဢေႇၵႅပ်ႉတုမႃးယဝ်ႉလႄႈသူႁူႉၸႂ်သၽေႃးၶႅၵ်ႇယူႇဢေႃႈ။
ပိင်းၺၢပ်ႈဝၼ်းၵမ်သိၼ်
၁၀ ႁူၵ်းပီႊတဵမ်တဵမ်မႂ်းတၵ်းလႆႈႁဵတ်းႁႆႊႁဵတ်းၼႃးလႄႈသိမ်းဢဝ်မၢၵ်ႇဢဝ်ႁူင်းဢေႃႈ။
၁၁ ပီႊသတ်ႉတမၸိုင်မႂ်းဢမ်ႇလႆႈႁဵတ်းၼႃးလႄႈတၵ်းလႆႈပွႆႇဝႆႉၽႃႈဝႆႉဢေႃႈ။ပေႃးႁဵတ်းၸိူဝ်ႉၼင်ၼၼ်ၸိုင်ၶဝ်ၸိူဝ်းဢၼ်ယၢၵ်ႈႁူႉဢၼ်ၽၢၼ်ၼႂ်းၸိူဝ်ႉၶိူဝ်းမႂ်းၼၼ်ႉတၵ်းမီးဢၶႂၢင်ႉဢၼ်လႆႈၵိၼ်ဢေႃႈ။ဢၼ်ၶဝ်ဝႆႉၵိုတ်းဝႆႉၵျၢၼ်ႇၼၼ်ႉၵေႃႈတရိၵ်ႈသၢၼ်ႇဢၼ်မီးၵႃႈၼိူဝ်လိၼ်တၵ်းလႆႈၵိၼ်ဢေႃႈ။မိူၼ်ၼင်ႇၼၼ်တီႈသူၼ်ဢူးယဵၼ်ႇမၢၵ်ႇၸပိတ်ႉတင်းသူၼ်ဢူးယဵၼ်ႇသၢၼ်ႇလုၼ်ႇၵေႃႈမႂ်းတၵ်းလႆႈႁဵတ်းၸိူဝ်ႉၼၼ်ဢေႃႈ။
၁၂ ႁူၵ်းဝၼ်းတဵမ်တဵမ်မႂ်းတၵ်းလႆႈႁဵတ်းတၢင်းႁဵတ်းဢေႃႈ။ဝၼ်းသတ်ႉတမၸိုင်တၵ်းလႆႈယူႇၼိမ်ၼိမ်လီလီဢေႃႈ။ပေႃးႁဵတ်းၸိူဝ်ႉၼင်ႇၼၼ်ၸိုင်ဝူဝ်းမႂ်း၊မႃႉလီႈမႂ်းၼၼ်ႉတၵ်းမီးဢၶႂၢင်ႉဢၼ်လႆႈယူႇၼိမ်ၼိမ်လီလီလႄႈလုၵ်ႈၸၢႆးၶႃႈၵူၼ်းယိင်းမႂ်းတင်းလၢႆဢိၵ်ႇတင်းၶႅၵ်ႇတင်းလၢႆၵေႃႈတၵ်းလႆႈတၢင်းဢၼ်သၢၵ်ႈသႃႇဢေႃႈ။
၁၃ ၼႂ်းၵႃႈဢၼ်ၵဝ်ပိင်းၺၢပ်ႈဝႆႉၼႆႉႁဵတ်းသတိတႃႉ။ယႃႇပလေၢတ်ႈပဝေႃႈၼႃႇမႃႉၸိုဝ်ႈသဵင်ၽြႃးတၢင်ႇသူႇတၢင်ႇပႃး။ယႃႇပေႁႂ်ႈပိူၼ်ႈတၢင်ႇၵေႃႉလႆႈငိၼ်းၵႃႈတီႈသူပ်းမႂ်း။
ပွႆးလူမ်ႈပီႊသၢမ်ပွႆး
၁၄ ၼႂ်းယေႈပီႊတၵ်းလႆႈၶၢမ်ႇပွႆးပုၼ်ႈၵဝ်သၢမ်ပွၵ်ႈဢေႃႈ။
၁၅ တၵ်းလႆႈၶၢမ်ႇပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈလႄႈၵိၼ်ၶဝ်မုၼ်းဢၼ်ဢမ်ႇပႃးၸိူဝ်ႉပႅင်ႈၸဵတ်းဝၼ်းတဵမ်တဵမ်ၼႂ်းၶိင်ႇဝၼ်းဢၼ်မၵ်းၶၢၼ်းဝႆႉလိူၼ်ဢပီႉပၼၼ်ႉၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉယဝ်ႉၼၼ်ႉဢေႃႈ။လွင်ႈမၼ်းၸမ်းၼႂ်းလိူၼ်ၼၼ်ႉမႂ်းလႆႈဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉဢေႃႈ။ၼႂ်းမိူဝ်ႈဢၼ်ၶၢမ်ႇပွႆးၼၼ်ႉၽူႈလႂ်ဢမ်ႇလႆႈမႃးၵႃႈတီႈၽၢႆႇၼႃႈထႃႇဝရႃႉၽြႃးတိၼ်လၢႆမိုဝ်းပဝ်ႇ။
၁၆ တၵ်းလႆႈၶၢမ်ႇပွႆးဢၼ်သိမ်းမၢၵ်ႇသိမ်းႁူင်းဢၼ်ပဵၼ်မၢၵ်ႇပဵၼ်ႁူင်းဢွၼ်တၢင်းပိူၼ်ႈၵႃႈၼႂ်းႁႆႊၼႂ်းၼႃးဢၼ်မႂ်းၽုၵ်ႇသွမ်ႈၼၼ်ႉဢိၵ်ႇတင်းပွႆးဢၼ်သိမ်းဢဝ်မၢၵ်ႇဢဝ်ႁူင်းဝႆႉမိူဝ်ႈဢၼ်ပီႊပုတ်ႈပီႊလၢႆမိူဝ်ႈဢၼ်မႂ်းသိမ်းဢဝ်မၢၵ်ႇဢဝ်ႁူင်းဢွၵ်ႇသေၵႃႈၼႂ်းႁႆႊၼႂ်းၼႃးမႂ်းဝႆႉယဝ်ႉၼၼ်ႉဢေႃႈ။
၁၇ ၼႂ်းသူၵႃႈပဵၼ်ၽူႈၸၢႆးတင်းသဵင်ႈတင်းလူင်တၵ်းလႆႈၼႄပျႃးတူဝ်ၸဝ်ႈၵဝ်ႇၵႃႈတီႈၽၢႆႇၼႃႈၸဝ်ႈထႃႇဝရႃႉၽြႃးပဵၼ်ၸဝ်ႈယေႈပီႊသၢမ်ပွၵ်ႈဢေႃႈ။
၁၈ မႂ်းတၵ်းဢမ်ႇလႆႈဢဝ်လိူတ်ႈတူဝ်ယိၸ်ႉပႃးလူၺ်ႈၵၼ်တင်းၶဝ်မုၼ်းဢၼ်ပႃးၸိူဝ်ႉပႅင်ႈၼၼ်ႉလႄႈပုၵ်ႉၸေႃႇၵဝ်။ၵွၼ်ႈၶႆၵွၼ်ႈမၼ်းတူဝ်ယိၸ်ႉၵေႃႈဢမ်ႇလႆႈဝႆႉၵိုတ်းဝႆႉၵျၢၼ်ႇတင်းၶိုၼ်းတေႃႇထိုင်ႁွတ်ႈၶိင်ႇၵၢင်ၼႂ်။
၁၉ မႂ်းတၵ်းလႆႈဢဝ်ဢၼ်မၢၵ်ႇဢွၼ်တၢင်းပိူၼ်ႈသုတ်းၵႃႈၼႂ်းမၢၵ်ႇၼႂ်းႁူင်းၵႃႈတီႈလိၼ်မႂ်းၼၼ်ႉမႃးသႂၢင်းၵႃႈၼႂ်းႁိူၼ်းထႃႇဝရႃႉၽြႃး၊ၽြႃးပဵၼ်ၸဝ်ႈမႂ်းဢေႃႈ။မႂ်းတၵ်းဢမ်ႇလႆႈဢဝ်ပေႉဢွၼ်ႇတူမ်ႈႁုင်ၼႂ်းၼမ်ႉၼူမ်းမေႈမၼ်း။
တမၢၼ်ႇၵၢင်ႁၢဝ်တၵ်းမႄးႁႅၼ်းသဵၼ်တၢင်း
၂၀ တူၺ်းလူႊ၊ၵဝ်တၵ်းပွႆႇၸႂ်ႉတမၢၼ်ႇၵၢင်ႁၢဝ်ဢွၼ်ႁူဝ်မႂ်းၵႂႃႇႁႂ်ႈလႆႈပႂ်ႉလူပႂ်ႉတူၺ်းမႂ်းၵႃႈတႃႈၵႃႈတၢင်းလႄႈဢဝ်မႂ်းသူင်ႇၵႃႈတီႈဢၼ်ၵဝ်မႄးႁႅၼ်းဝႆႉၼၼ်ႉဢေႃႈ။ႁဵတ်းသတိတီႈမၼ်းလႄႈထွမ်ႇဢဝ်ၵႂၢမ်းမၼ်းတႃႉ။
၂၁ ယႃႇပေၵၢတ်ႈပေႁႄႉဢလူဝ်ႇမၼ်း။မၼ်းတၵ်းဢမ်ႇပွႆႇလွတ်ႈဢပျႅတ်ႈဢၼ်သူၽိတ်းပိူင်ႈၼၼ်ႉၵူၺ်း။
၂၂ ၼႃႇမႃႉၸိုဝ်သဵင်ၵဝ်မီးယူႇၵႃႈၼႂ်းမၼ်းၼၼ်ႉဢေႃႈ။ပေႃးမႂ်းထွမ်ႇဢဝ်ၵႂၢမ်းမၼ်းဢမၢၼ်ႇၶၢၼ်ပဵၼ်လႄႈႁဵတ်းၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉၼၼ်ႉၸိုင်ၵဝ်တၵ်းပဵၼ်ရၢၼ်ႇသူႇတီႈရၢၼ်ႇသူႇမႂ်းတင်းလၢႆၼၼ်ႉလႄႈတီႈၶဝ်ၸိူဝ်းဢၼ်ႁႄႉၶႅၼ်မႂ်းၼၼ်ႉၵေႃႈၵဝ်တၵ်းပဵၼ်ၵေႃႉဢၼ်ႁႄႉဢၼ်ၶႅၼ်ၶဝ်ဢေႃႈ။
၂၃ တမၢၼ်ႇၵဝ်တၵ်းဢွၼ်ႁူဝ်မႂ်းၵႂႃႇလႄႈဢဝ်မႂ်းသႂၢင်းၶဝ်ႈၵႃႈတီႈၼႂ်းၵူၼ်းဢႃႇမေႃးရိၵူၼ်းႁိတ်ႉတိ၊ၵူၼ်းၽေႇရၸိ၊ၵူၼ်းၶႃႇၼၼိ၊ၵူၼ်းႁိဝိ၊ၵူၼ်းယေႇပုသိၸိူဝ်းၼၼ်ႉလႄႈၵဝ်ၵေႃႈတၵ်းပႄႇၽဵဝ်ႈၶဝ်ၼၼ်ႉပႅတ်ႈဢေႃႈ။
၂၄ တီႈၽြႃးၶဝ်ၸိူဝ်းၼၼ်ႉၵေႃႈမႂ်းဢမ်ႇလႆႈၵူမ်ႈႁူဝ်ၵွမ်းႁူဝ်။ဢမ်ႇလႆႈႁဵတ်းဝူတ်ႈႁဵတ်းဝၢတ်ႈ။ဢမ်ႇလႆႈၵမ်လႆႈၵျၢင်ႉၸွမ်းၼင်ႇၽႃႇသႃႇၶဝ်ၼၼ်ႉ။မႂ်းတၵ်းလႆႈဢဝ်ၶဝ်ၶႂၢမ်ႈပိၼ်ႈပႅတ်ႈတင်းသဵင်ႈတင်းမူတ်းလႄႈႁၵ်းႁိၵ်းသဝ်တီႈၵူဝ်းၵႂၢႆႇၶဝ်ၼၼ်ႉပႅတ်ႈမူတ်းမူတ်းသဵင်ႈသဵင်ႈဢေႃႈ။
၂၅ သူတၵ်းလႆႈႁဵတ်းဝူတ်ႈႁဵတ်းဝၢတ်ႈတီႈထႃႇဝရႃႉၽြႃး၊ၽြႃးပဵၼ်ၸဝ်ႈသူၵူၺ်းဢေႃႈ။မၼ်းၸဝ်ႈတၵ်းပၼ်တၢင်းလီတီႈၶဝ်ႈမုၼ်းမႂ်းဢိၵ်ႇတင်းတီႈၼမ်ႉမႂ်းဢေႃႈ။ၵဝ်တၵ်းဢဝ်တၢင်းၶႆႈတၢင်းပဵၼ်ဢွၵ်ႇပႅတ်ႈသေၵႃႈၼႂ်းမႂ်းဢေႃႈ။
၂၆ ၵႃႈၼႂ်းမိူင်းတၵ်းၵၢင်းလွတ်ႈတင်းသတ်ႉတဝႃႇဢၼ်ပတိၵ်ႈသတ်ႇထေႇလူႉယွတ်ႇဢိၵ်ႇတင်းသတ်ႉတဝႃႇဢၼ်မၼ်ဢၼ်ဢမ်ႇမီးလုၵ်ႈၼၼ်ႉဢေႃႈ။ၵဝ်တၵ်းႁႂ်ႈၸူဝ်ႈပၢၼ်ဢသၢၵ်ႈမႂ်းၸေးၸုမ်ႇတဵမ်ထူၼ်ႈဢေႃႈ။
၂၇ ၵဝ်တၵ်းပွႆႇၸႂ်ႉတၢင်းဢၼ်ၸၢင်ႊၵူဝ်ၸၢင်ႊႁႄၵဝ်ၼၼ်ႉၵႂႃႇဢွၼ်တၢင်းမႂ်းလႄႈယႃႉယူၵ်ႉၵူၼ်းမဵဝ်းတင်းသဵင်ႈတင်းလူင်ၵႃႈတီႈဢၼ်မႂ်းတၵ်းႁွတ်ႈထိုင်ၼၼ်ႉဢေႃႈ။ၵဝ်တၵ်းႁႂ်ႈရၢၼ်ႇသူႇမႂ်းတင်းသဵင်ႈတင်းလူင်ဝၢႆႇလင်ပၼ်တီႈမႂ်းဢေႃႈ။
၂၈ ၵဝ်တၵ်းပွႆႇၸႂ်ႉတေႃႇလႂ်တႅၼ်လႂ်ၵႂႃႇဢွၼ်တၢင်းမႂ်းလႄႈၶဝ်တၵ်းႁေႃႈၵူၼ်းႁိဝိၵူၼ်းၶႃႇၼၼိတင်းၵူၼ်းႁိတ်ႉတိၸိူဝ်းၼၼ်ႉဢွၵ်ႇသေၵႃႈတီႈၽၢႆႇၼႃႈမႂ်းဢေႃႈ။
၂၉ ၵဝ်တၵ်းဢမ်ႇႁေႃႈၵူၼ်းၸိူဝ်းၼၼ်ႉဢွၵ်ႇၼႂ်းပီႊၼိုင်ႈၵူၺ်း။ပေႃးဢမ်ႇၼၼ်မိူင်းတၵ်းပဵၼ်ဢၼ်သိတ်ႇဢၼ်ယဵၼ်လႄႈတူဝ်ထိူၼ်ႇႁၢႆႉတၵ်းယႂ်ႇၽႄႈၼမ်ၵိုၼ်းမႃးၼႃႇပုၼ်ႈမႂ်းဢေႃႈ။
၃၀ ၵဝ်တၵ်းႁေႃႈၶဝ်ဢွၵ်ႇသေၵႃႈတီႈၽၢႆႇၼႃႈမႂ်းၵႂႃႇလွႆးလွႆးတေႃႇထိုင်ႁွတ်ႈထၼ်ႈပေႃးမႂ်းယႂ်ႇၽေႈၼမ်ၵိုၼ်းမႃးလႄႈလႆႈၸၢမ်ႇၸႃးမိူင်းတင်းမိူင်းဢေႃႈ။
၃၁ ၵဝ်တၵ်းမၢတ်ႈမၢႆလႅၼ်လိၼ်တီႈဢၼ်မႂ်းတၵ်းယူႇၼၼ်ႉဝႆႉဢဝ်ၵႃႈတီႈၸႃႉၸဵမ်ပၢင်ႇလၢႆႇဢေႇတုင်ႇတေႃႇထိုင်ႁွတ်ႈပၢင်ႇလၢႆႇၽိလိတ်ႉတိဢိၵ်ႇတင်းဢဝ်ၵႃႈတီႈၸႃႉၸဵမ်ထိူၼ်ႇတေႃႇထိုင်ႁွတ်ႈၼမ်ႉႁွင်ႊဢေႃႈ။ၵဝ်တၵ်းဢဝ်ၵူၼ်းၵႃႈတီႈၼၼ်ႉဢၢပ်ႈပၼ်ၵႃႈၼႂ်းမိုဝ်းမႂ်းလႄႈမႂ်းတၵ်းလႆႈႁေႃႈၶဝ်ဢွၵ်ႇသေၵႃႈတီႈၽၢႆႇၼႃႈမႂ်းဢေႃႈ။
၃၂ မႂ်းဢမ်ႇလႆႈႁဵတ်းမိၵ်ႉသႁႃႇယႃႉတၢင်းဢၼ်ထုၵ်ႇၵၼ်တင်းၶဝ်ဢိၵ်ႇတင်းၽြႃးၶဝ်တင်းလၢႆၸိူဝ်းၼၼ်ႉ။ပိူဝ်ႈဢၼ်ၵူဝ်ၶဝ်တၵ်းႁဵတ်းႁႂ်ႈမႂ်းလႆႈၽိတ်းပိူင်ႈၵဝ်လႄႈၶဝ်ၼၼ်ႉဢမ်ႇလႆႈယူႇၵႃႈၼႂ်းမိူင်းမႂ်း။
၃၃ ပေႃးမႂ်းႁဵတ်းဝူတ်ႈႁဵတ်းဝၢတ်ႈတီႈၽြႃးၶဝ်ၸိူဝ်းၼၼ်ႉၸိုင်တၵ်းပဵၼ်တူင်ႇႁဵဝ်ႉတူင်ႇၶိုမ်းတီႈမႂ်းဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆဢေႃႈ။