Chapter
၁၇
ၼမ်ႉမၢၵ်ႇႁိၼ်
၁ ပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ဢွၵ်ႇသေၵႃႈတီႈထိူၼ်ႇသိၼ်ႇၼၼ်ႉၵႃႇသေယဝ်ႉၸွမ်းတၢင်းၵႂႃႇၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉၼၼ်ႉလႄႈၶျႃးပၢင်ၵႃႈတီႈရေႇၽိတိမ်ႇဢေႃႈ။ၵႃႈတီႈၼၼ်ႉဢမ်ႇမီးၼမ်ႉပုၼ်ႈဢၼ်ၵူၼ်းတင်းလၢႆတၵ်းၵိၼ်။ပိူဝ်ႈၼႆလႄႈၵူၼ်းတင်းလၢႆၽိတ်းမုဝ်းသေႇလႄႈဝႃႈ၊-
၂ ပၼ်ၼမ်ႉပုၼ်ႈဢၼ်ႁဝ်းတၵ်းၵိၼ်သေၵမ်း၊ဝႃႈၼင်ႇၼႆဢေႃႈ။မုဝ်းသေႇၵေႃႈလၢတ်ႈလႄႈဝႃႈ၊-ႁဵတ်းသင်လႄႈသူၽိတ်းၵဝ်ၸိူဝ်ႉၼႆ။ႁဵတ်းသင်လႄႈသူၸၢမ်းတူၺ်းထႃႇဝရႃႉၽြႃးၸိူဝ်ႉၼႆ၊ဝႃႈၼင်ႇၼႆဢေႃႈ။
၃ ၵူၼ်းတၢင်းလၢႆၼၼ်ႉယၢၵ်ႈၼမ်ႉလႄႈဢွၼ်ၵၼ်တၢင်ႇဢပျႅတ်ႈပွင်ႉၶင်းပွင်ႉမိူၼ်ႇတီႈမုဝ်းသေႇလႄႈဝႃႈ၊-ႁဵတ်းသင်လႄႈဢဝ်ႁဝ်းဢွၵ်ႇသေၵႃႈၼႂ်းမိူင်းဢႇၵႅပ်ႉတုမႃးႁႂ်ႈလႆႈဢဝ်ၸႃႉၸဵမ်ႁဝ်းလႄႈလုၵ်ႈလၢင်းႁဝ်းဢိၵ်ႇတင်းတရိၵ်ႈသၢၼ်ႇႁဝ်းလႆႈမႃးယၢၵ်ႈၼမ်ႉတၢႆ၊ဝႃႈၼင်ႇၼႆဢေႃႈ။
၄ မိူဝ်ႈၼၼ်ႉမုဝ်းသေႇႁွင်ႉသႅၼ်ႇတီႈထႃႇဝရႃႉၽြႃးလႄႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈတၵ်းလႆႈႁဵတ်းတီႈၵူၼ်းၸိူဝ်းၼႆႉၸိူဝ်ႉၼင်ႇႁိုဝ်ၶႃႈ။ၶဝ်တၵ်းဢဝ်မၢၵ်ႇႁိၼ်ထႅမ်ႈၶႃႈၸဝ်ႈတီႈၶႃႈယဝ်ႉ၊ဝႃႈၼင်ႇၼႆဢေႃႈ။
၅ ထႃႇဝရႃႉၽြႃးၵေႃႈမီးဢမိင်ႉတီႈမုဝ်းသေႇလႄႈဝႃႈ၊-ၵႂႃႇဢွၼ်တၢင်းၵူၼ်းတင်းလၢႆလႄႈႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢိသရေႇလၸိူဝ်းၼၼ်ႉၸွမ်းတႃႉ။ယိပ်းၵမ်ဢဝ်ၶွၼ်ႉတဝ်ႉမႂ်းဢၼ်မႂ်းဢဝ်ပေႃႉယႅၼ်ႉၼမ်ႉႁွင်ႊၼၼ်ႉလႄႈၵႂႃႇတႃႉ။
၆ တူၺ်းလူႊ၊ၵဝ်တၵ်းၸုၵ်းယူႇၵႃႈတီႈၽၢႆႇၼႃႈမႂ်းၵႃႈၼိူဝ်မၢၵ်ႇႁိၼ်ဢၼ်မီးၵႃႈတီႈႁေႃႇရၢပ်ႉၼၼ်ႉလႄႈမႂ်းတၵ်းလႆႈပေႃႉယႅၼ်ႉမၢၵ်ႇႁိၼ်ၼၼ်ႉဢေႃႈ။ၼမ်ႉတၵ်းဢွၵ်ႇၵႃႈၼႂ်းမၢၵ်ႇႁိၼ်ၼၼ်ႉမႃးပုၼ်ႈဢၼ်ၵူၼ်းတင်းလၢႆတၵ်းၵိၼ်ဢေႃႈ၊ဝႃႈၼင်ႇၼႆဢေႃႈ။
၇ မုဝ်းသေႇၵေႃႈႁဵတ်းၸိူဝ်ႉၼင်ႇၼၼ်ၵႃႈတီႈၽၢႆႇၼႃႈၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢိသရေႇလၸိူဝ်းၼၼ်ႉဢေႃႈ။မၼ်းႁွင်ႉႁိၵ်ႈၸိုဝ်တီႈၼၼ်ႉဝႃႈမတ်ႉသတင်းမေႇရိပဝႃႈၼႆၵွပ်ႈပိူဝ်ႈလွင်ႈဢၼ်ၵူၼ်းမဵဝ်းဢိသရေႇလႁဵတ်းတၢင်းၽိတ်းဢိၵ်ႇတင်းၵွပ်ႈပိူဝ်ႈလွင်ႈဢၼ်ၶဝ်ၸၢမ်းတူၺ်းထႃႇဝရႃႉၽြႃးလႄႈဝႃႈ၊-ၵႃႈၼႂ်းႁဝ်းၼႆႉၸွင်ႇမီးထႃႇဝရႃႉၽြႃး၊ဝႃႈၼင်ႇၼႆၼၼ်ႉဢေႃႈ။
ပႄႉၼႅင်ႇဢႃႇမလိၵ်ႉ
၈ မိူဝ်ႈၼၼ်ႉၵူၼ်းဢႃႇမလိၵ်ႉတင်းလၢႆဢွၼ်ၵၼ်မႃးလႄႈတိုၵ်းတေႃးၵူၼ်းမဵဝ်းဢိသရေႇလၶဝ်ၵႃႈတီႈရေႇၽိတိမ်ႇဢေႃႈ။
၉ မုဝ်းသေႇလၢတ်ႈတီႈယေႃးသုလႄႈဝႃႈ၊-လိူၵ်ႈၵဵပ်းဢဝ်ၵူၼ်းလႄႈၵႂႃႇႁႂ်ႈလႆႈတိုၵ်းတေႃးၵူၼ်းဢႃႇမလိၵ်ႉၸိူဝ်းၼၼ်ႉတႃႉ။ဝၼ်းမိူဝ်ႈၽုၵ်ႈၵဝ်တၵ်းယိပ်းၵမ်ဢဝ်ၶွၼ်ႉတဝ်ႉၽြႃးပဵၼ်ၸဝ်ႈသေလႄႈၸုၵ်းယူႇၵႃႈၼိူဝ်ပၢႆလွႆဢေႃႈ၊ဝႃႈၼင်ႇၼႆဢေႃႈ။
၁၀ ယေႃးသုၵေႃႈႁဵတ်းၸွမ်းၵႃႈၼင်ႇဢၼ်မုဝ်းသေႇသင်ႇလၢတ်ႈဝႆႉၼၼ်ႉလႄႈတိုၵ်းတေႃးၵူၼ်းဢႃႇမလိၵ်ႉၸိူဝ်းၼၼ်ႉဢေႃႈ။မုဝ်းသေႇ၊ဢႃႇရုၼ်ႇတင်းႁူႉရၶိုၼ်ႈၵႂႃႇၵႃႈတီႈၼိူဝ်ပၢႆလွႆဢေႃႈ။
၁၁ မိူဝ်ႈဢၼ်မုဝ်းသေႇယုၵ်ႉမိုဝ်းမၼ်းၼၼ်ႉၸိုင်ၵူၼ်းမဵဝ်းဢိသရေႇလၶဝ်ပႄႉဢေႃႈ။မိူဝ်ႈဢၼ်မၼ်းၶျႃးမိုဝ်းမၼ်းၼၼ်ႉၸိုင်ၵူၼ်းဢႃႇမလိၵ်ႉၶဝ်ပႄႉဢေႃႈ။
၁၂ မိူဝ်ႈဢၼ်မုဝ်းသေႇၵူၼ်ႉၼႃႇၼၼ်ႉၸိုင်ၶဝ်ဢဝ်မၢၵ်ႇႁိၼ်မွၼ်ၵႃႈတီႈတႂ်ႈမၼ်းဝႆႉလႄႈမၼ်းၼင်ႈသေယဝ်ႉဢႃႇရုၼ်ႇတင်းႁူႉရယူႇယေႈၵေႃႉယေႈၽၢႆႇသေလႄႈၵမ်ႉထွၵ်ႈမိုဝ်းမၼ်းဝႆႉဢေႃႈ။ၼင်ႇၼၼ်လႄႈမိုဝ်းမၼ်းၼၼ်ႉၼိမ်ယူႇတေႃႇထိုင်ႁွတ်ႈၵၢင်ဝၼ်းပေႃးတူၵ်းဢေႃႈ။
၁၃ ယေႃးသုၵေႃႈဢဝ်တင်းလၢပ်ႇတင်းလႅဝ်းသေလႄႈပႄႉၼႅင်ႇၶုၼ်ဢႃႇမလိၵ်ႉဢိၵ်ႇတင်းၵူၼ်းမၼ်းၸိူဝ်းၼၼ်ႉဢေႃႈ။
၁၄ ထႃႇဝရႃႉၽြႃးၵေႃႈမီးဢမိင်ႉတီႈမုဝ်းသေႇလႄႈဝႃႈ၊-တႅမ်ႈလိၵ်ႈပုၼ်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းၼႆႉဝႆႉလႄႈၽတ်းရွတ်ႈထိုင်ႁူယေႃးသုတႃႉ။လွင်ႈမၼ်းၸမ်းၵဝ်းတၵ်းၽဵဝ်ႈတီႈမၢတ်ႈတီႈတွင်းဢႃႇမလိၵ်ႉၶဝ်ပႅတ်ႈသေၵႃႈတႂႃ်ႈႉၵၢင်ႁၢဝ်မူတ်းမူတ်းသဵင်ႈသဵင်ႈဢေႃႈ၊ဝႃႈၼင်ႇၼႆဢေႃႈ။
၁၅ မုဝ်းသေႇၵေႃႈႁဵတ်းယိၸ်ႉပလၢင်ႇသေလႄႈႁွင်ႉႁိၵ်ႈၸိုဝ်ဝႃႈယေႇႁေႃႇဝႃႇၼိတ်ႉသိဢေႃႈ။
၁၆ လွင်ႈမၼ်းၸမ်းမၼ်းဝႃႈ၊-ယုၵ်ႉယွင်ႈမိုဝ်းဝႆႉၵႃႈၼိူဝ်ရႃႇၸႃႉပလၢင်ႇထႃႇဝရႃႉၽြႃးလႄႈထႃႇဝရႃႉၽြႃးတၵ်းတိုၵ်းတေႃးၵူၼ်းဢႃႇမလိၵ်ႉတင်းလၢႆယူႇၶိင်ႇၵႃႇလႃႉသိုပ်ႇသိုပ်ႇတၢမ်ႈတၢမ်ႈဢေႃႈ၊ဝႃႈၼင်ႇၼႆဢေႃႈ။