Chapter
၁၅
ၵႂၢမ်းမုဝ်းသေႇႁွင်ႉ
၁ မိူဝ်ႈၼၼ်ႉမုဝ်းသေႇဢိၵ်ႇတင်းၵူၼ်းမဵဝ်းဢိသရေႇလတင်းလၢႆဢွၼ်ၵၼ်ႁဵတ်းၵႂၢမ်းတီႈထႃႇဝရႃႉၽြႃးလႄႈဝႃႈၸမ်း၊-ပိူဝ်ႈဢၼ်ထႃႇဝရႃႉၽြႃးမီးတၢင်းဢၼ်မုၼ်ယႂ်ႇမုၼ်သုင်လႄႈၵဝ်ၶႃႈတၵ်းႁဵတ်းၵႂၢမ်းတီႈထႃႇဝရႃႉၽြႃးတီႈၶႃႈဢေႃႈ။မၼ်းၸဝ်ႈဢဝ်မႃႉဢိၵ်ႇတင်းၵူၼ်းဢၼ်ၶီႇမႃႉၸိူဝ်းၼၼ်ႉလူမ်ႉၶျႃးပႅတ်ႈၵႃႈၼႂ်းပၢင်ႇလၢႆႇယဝ်ႉတီႈၶႃႈယဝ်ႉ။
၂ ထႃႇဝရႃႉၽြႃးပဵၼ်ႁႅင်းတၼ်းၶူဝ်းၵဝ်ဢိၵ်ႇတင်းတီႈဢၼ်ၵဝ်ႁဵတ်းၵႂၢမ်းဢေႃႈ။ပဵၼ်ၸဝ်ႈဢၼ်ၵႄႇသေႇၶျွတ်ႈဢဝ်ၵဝ်ဢေႃႈ။မၼ်းၸဝ်ႈပဵၼ်ၽြႃးပဵၼ်ၸဝ်ႈၵဝ်လႄႈၵဝ်တၵ်းႁဵတ်းပထၼႃႇတီႈမၼ်းၸဝ်ႈဢေႃႈ။မၼ်းၸဝ်ႈပဵၼ်ၽြႃးပဵၼ်ၸဝ်ႈပူႇမွၼ်ႇၵဝ်လႄႈၵဝ်တၵ်းယွင်ႈယေႃးမၼ်းၸဝ်ႈဢေႃႈ။
၃ ထႃႇဝရႃႉၽြႃးပဵၼ်ႁူဝ်ႁၢၼ်တိုၵ်းသိုၵ်းဢေႃႈ။ၼႃႇမႃႉၸိုဝ်ႈသဵင်မၼ်းၸဝ်ႈပဵၼ်ထႃႇဝရႃႉၽြႃးဢေႃႈ။
၄ လေႃႉရထႃးၶုၼ်ႁေႃၶမ်းၽႃႇရေႃးဢိၵ်ႇတင်းပူဝ်ႇပႃႇမၼ်းၸိူဝ်းၼၼ်ႉမၼ်းၸဝ်ႈဢဝ်လူမ်ႉၶျႃးပႅတ်ႈၵႃႈၼႂ်းပၢင်ႇလၢႆႇယဝ်ႉယဝ်ႉ။ၶုၼ်ပူဝ်ႇဢၼ်လိူၵ်ႈၵဵပ်းဢဝ်ၸိူဝ်းၼၼ်ႉၸူမ်ပႅတ်ႈၵႃႈၼႂ်းပၢင်ႇလၢႆႇဢေႇတုင်ႇယဝ်ႉယဝ်ႉ။
၅ တီႈဢၼ်လိုၵ်ႉဢၼ်လမ်ႇၼႃႇၸိူဝ်းၼၼ်ႉထုမ်ႈၶဝ်ပႅတ်ႈယဝ်ႉယဝ်ႉ။ၶဝ်လႆႈလူင်းၵႂႃႇၵႃႈတႂ်ႈမိူၼ်ၸိူဝ်ႉၼင်ႇမၢၵ်ႇႁိၼ်ယဝ်ႉယဝ်ႉ။
၆ ဢူဝ်းထႃႇဝရႃႉၽြႃး။မိုဝ်းၶွၼ်ၶႂႃၸဝ်ႈႁဝ်းၼၼ်ႉၵွပ်ႈပိူဝ်ႈႁႅင်းတၼ်းၶူဝ်းလႄႈမုၼ်ၽုင်းယႂ်ႇၼႃႇလူင်လၢင်တီႈၶႃႈဢေႃႈ။ဢူဝ်းထႃႇဝရႃႉၽြႃး။မိုဝ်းၶွၼ်ၶႂႃၸဝ်ႈႁဝ်းၼၼ်ႉဢဝ်ရၢၼ်ႇသူႇတင်းလၢႆႁၵ်းႁိၵ်းယႃႉလႅဝ်ပႅတ်ႈတီႈၶႃႈဢေႃႈ။
၇ ၸဝ်ႈႁဝ်းဢဝ်တင်းမုၼ်တၼ်းၶူဝ်းဢႃႇၼူႉၽေႃႇၸဝ်ႈႁဝ်းဢဝ်ၶဝ်ၸိူဝ်းဢၼ်ယူႇၽၢႆႇၼိုင်ႈတင်းၸဝ်ႈႁဝ်းလႄႈၶတ်းၶဵင်ႇႁႅင်းတႃႉၸဝ်ႈႁဝ်းယူႇၸိူဝ်းၼၼ်ႉလူမ်ႉပႅတ်ႈတီႈၶႃႈဢေႃႈ။ၸဝ်ႈႁဝ်းပွႆႇတၢင်းၸႂ်မႆႈၶႂ်ႈၸႃႉၸဝ်ႈႁဝ်းလႄႈႁႂ်ႈၽႆးမႆႈၶဝ်ၼၼ်ႉသုတ်းပႅတ်ႈမိူၼ်ၸိူဝ်ႉၼင်ႇၽိူင်းၼၼ်ႉတီႈၶႃႈဢေႃႈ။
၈ ၼမ်ႉၸိူဝ်းၼၼ်ႉၸူႉတုမ်ၵွင်ၵၼ်ၵွပ်ႈပိူဝ်ႈလူမ်းၶူႈလင်ၸဝ်ႈႁဝ်းလႄႈၼမ်ႉဢၼ်လႆၵႂႃႇယူႇၸိူဝ်းၼၼ်ႉသုတ်ႉၶိုၼ်းႁူၼ်ၶိုၼ်းပဵၼ်ၸွၼ်ပဵၼ်ၸႅၼ်ဝႆႉလႄႈၼမ်ႉဢၼ်လိုၵ်ႉဢၼ်လမ်ႇၼႃႇၸိူဝ်းၼၼ်ႉၵႅၼ်ႇမႃးၶႅင်မႃးၵႃႈၼႂ်းပၢင်ႇလၢႆႇတီႈၶႃႈဢေႃႈ။
၉ ရၢၼ်ႇသူႇဝႃႈ၊-ၵဝ်တၵ်းလိုပ်ႈၸွမ်းလမ်းၸွမ်းဢေႃႈ။ၵဝ်တၵ်းလမ်းတၵ်းၶိုတ်းဢေႃႈ။ၵဝ်တၵ်းဢဝ်ဢုၵ်ႉၸႃႇဢၼ်ႁိမ်ႁုင်ႈဢဝ်လႄႈလႆႈၼၼ်ႉၽမေႅင်ႇလႄႈႁႂ်ႈႁူဝ်ၸႂ်ၵဝ်ပျေႉၸုမ်ႇဢိမ်ႇၸႂ်ၵႃႈတီႈၶဝ်ၼၼ်ႉဢေႃႈ။ၵဝ်တၵ်းၸၵ်ႉထွတ်ႇဢဝ်လၢပ်ႇဢွၵ်ႇသေၵႃႈတီႈၵပ်လႄႈဢဝ်တင်းမိုဝ်းၵဝ်ယႃႉၽဵဝ်ႈၶဝ်ပႅတ်ႈဢေႃႈ၊ဝႃႈၼင်ႇၼႆတီႈၶႃႈဢေႃႈ။
၁၀ ပိူဝ်ႈဢၼ်ၸဝ်ႈႁဝ်းဢဝ်လူမ်းပဝ်ႇၼၼ်ႉလႄႈၼမ်ႉပၢင်ႇလၢႆႇၼၼ်ႉထုမ်ႈၶဝ်ပႅတ်ႈလႄႈၶဝ်လူင်းၵႂႃႇၵႃႈတႂ်ႈမိူၼ်ၸိူဝ်ႉၼင်ႇၸိုၼ်းၵႃႈၼႂ်းၼမ်ႉဢၼ်ႁႅင်းယႂ်ႇၼႃႇၼၼ်ႉတီႈၶႃႈဢေႃႈ။
၁၁ ဢူဝ်းထႃႇဝရႃႉၽြႃး။ၼႂ်းၽြႃးတင်းလၢႆၽြႃးဢၼ်လႂ်တၵ်းမိူၼ်ၸိူဝ်ႉၼင်ႇၸဝ်ႈႁဝ်းတီႈၶႃႈ။ၽြႃးဢၼ်လႂ်တၵ်းမိူၼ်ၸိူဝ်ႉၼင်ႇၸဝ်ႈႁဝ်းဢၼ်ပဵၼ်ၸဝ်ႈဢၼ်မုၼ်ယႂ်ႇၼႃႇၵွပ်ႈပိူဝ်ႈတၢင်းဢၼ်မူတ်းၸၢင်ႇဢၼ်ပဵၼ်ၸဝ်ႈဢၼ်လီၵူဝ်ၼႂ်းမိူဝ်ႈဢၼ်ၶၢမ်ႇတၢင်းဢၼ်ယွင်ႈယေႃးယူႇၼၼ်ႉဢၼ်ပဵၼ်ၸဝ်ႈဢၼ်ၸၢင်ႊႁဵတ်းလွင်ႈတၢင်းဢၼ်လီဢၢမ်းတင်းလၢႆၼၼ်ႉတီႈၶႃႈ။
၁၂ ၸဝ်ႈႁဝ်းယိုၼ်းမိုဝ်းၶွၼ်ၶႂႃၸဝ်ႈႁဝ်းလႄႈလိၼ်မိူင်းဢိုၼ်ၶဝ်ပႅတ်ႈတီႈၶႃႈဢေႃႈ။
၁၃ ၸဝ်ႈႁဝ်းဢဝ်တင်းၵရူႉၼႃႇၸဝ်ႈႁဝ်းသေလႄႈဢဝ်ၵူၼ်းမဵဝ်းဢၼ်ၸဝ်ႈႁဝ်းထုတ်ႇဢဝ်ၼၼ်ႉၵႂႃႇသူင်ႇပၼ်တီႈၶႃႈဢေႃႈ။ၸဝ်ႈႁဝ်းဢဝ်တင်းတၼ်းၶူဝ်းၸဝ်ႈႁဝ်းသေလႄႈဢဝ်ၶဝ်ၼႄပၼ်သဵၼ်ႈတၢင်းဢၼ်ၵႂႃႇၸူးၵႃႈတီႈၸဝ်ႈႁဝ်းယူႇလႄႈမူတ်းၸၢင်ႇၼၼ်ႉတီႈၶႃႈဢေႃႈ။
၁၄ ၵူၼ်းမဵဝ်းတင်းလၢႆငိၼ်းသတၢင်းသဵင်ၶၢဝ်ႇလႄႈတူၵ်းၸႂ်တီႈၶႃႈဢေႃႈ။တၢင်းဢၼ်ၵူဝ်ဢၼ်သၼ်ႇတၵ်းတီႉၵမ်ဢဝ်ၵူၼ်းမိူင်းၽိလိတ်ႉတိတင်းလၢႆတီႈၶႃႈဢေႃႈ။
၁၅ ပူဝ်ႇဢေႇတုင်ႇတင်းလၢႆႁွတ်ႈထိုင်တၢင်းဢၼ်ၵႂင်ၸႂ်ယုင်ႈၸႂ်လႄႈတၢင်းဢၼ်ၵူဝ်ဢၼ်သၼ်ႇတီႉၵမ်ႈဢဝ်ႁူဝ်ႁၢၼ်ၵူၼ်းသိုၵ်းမေႃႇၽႃႉတင်းလၢႆတီႈၶႃႈဢေႃႈ။ၵူၼ်းမိူင်းၶႃႇၼၢၼ်ႇတင်းသဵင်ႈတင်းလူင်ႁွတ်ႈထိုင်တၢင်းဢၼ်ၸိူမ်ႈယၢႆႈၵႂႃႇတီႈၶႃႈဢေႃႈ။
၁၆ တၢင်းဢၼ်ၵူဝ်ဢၼ်ႁႄ၊တၢင်းဢၼ်တူၵ်းၸႂ်လႂ်တိုၼ်းတူၵ်းႁွတ်ႈၵႃႈၼိူဝ်ၶဝ်လႄႈၵွပ်ႈပိူဝ်ႈႁႅင်းတၼ်းၶူဝ်းၸဝ်ႈႁဝ်းၼၼ်ႉလႄႈၶဝ်ဢွၼ်ၵၼ်ယူႇၼိမ်ၼိမ်မိူၼ်ၸိူဝ်ႉၼင်ႇမၢၵ်ႇႁိၼ်ၼၼ်ႉယူႇတေႃႇထိုင်ႁွတ်ႈၸူဝ်ႈဢၼ်ၵူၼ်းၸဝ်ႈႁဝ်းၸိူဝ်းၼႆႉဢမ်ႇပႆႇပူၼ်ႉၵႂႃႇၼၼ်ႉ၊ဢူဝ်းထႃႇဝရႃႉၽြႃး။တေႃႇထိုင်ႁွတ်ႈၸူဝ်ႈဢၼ်ၵူၼ်းဢၼ်ၸဝ်ႈႁဝ်းသိုဝ်ႉဢဝ်ၸိူဝ်းၼႆႉဢမ်ႇပႆႇပူၼ်ႉၵႂႃႇၼၼ်ႉတီႈၶႃႈဢေႃႈ။
၁၇ ဢူဝ်းထႃႇဝရႃႉၽြႃးတီႈၶႃႈ။ၸဝ်ႈႁဝ်းတၵ်းဢဝ်ၵူၼ်းၸဝ်ႈႁဝ်းတင်းလၢႆသႂၢင်းသႂ်ႇဝႆႉလႄႈၶျႃးတီႈယူႇပၼ်ၵႃႈၼႂ်းလွႆတီႈဢၼ်ၸဝ်ႈႁဝ်းၶၢမ်ႇဢမူၺ်ႇၸဝ်ႈတီႈဢၼ်ၸဝ်ႈႁဝ်းမႄးႁဵတ်းဝႆႉပုၼ်ႈဢၼ်ၸဝ်ႈႁဝ်းတၵ်းၵိင်းဝပ်ႈယူႇ။ဢူဝ်းထႃႇဝရႃႉၽြႃးတီႈၶႃႈ။ထႃႇၼႃႉတီႈဢၼ်မူတ်းၸၢင်ႇဢၼ်ၸဝ်ႈႁဝ်းဢဝ်မိုဝ်းၸဝ်ႈႁဝ်းတႄႇဝႆႉၼၼ်ႉတီႈၶႃႈဢေႃႈ။
၁၈ ထႃႇဝရႃႉၽြႃးတၵ်းလႆႈဢုပ်ႉပိူင်ႇၸၢမ်ႇၸႃးၶိင်ႇၵႃႇလႃႉယူႇတႃႇသေႇဢမ်ႇထၢတ်ႈဢေႃႈ၊ဝႃႈၼင်ႇၼႆဢေႃႈ။
၁၉ လွင်ႈမၼ်းၸမ်းမႃႉၶုၼ်ႁေႃၶမ်းၽႃႇရေႃးဢိၵ်ႇတင်းလေႃႉရထႃးမၼ်းတင်းၵူၼ်းသိုၵ်းၶီႇမႃႉမၼ်းၸိူဝ်းၼၼ်ႉၶဝ်ႈၵႂႃႇၵႃႈၼႂ်းပၢင်ႇလၢႆႇလႄႈထႃႇဝရႃႉၽြႃးႁႂ်ႈၼမ်ႉပၢင်ႇလၢႆႇထုမ်ႈႁူမ်ႇၵႃႈၼိူဝ်ၶဝ်ပႅတ်ႈသေဢေႃႈ။ၵူၼ်းမဵဝ်းဢိသရေႇလတင်းလၢႆၸမ်းပႆၵႂႃႇၵႃႈၼိူဝ်လိၼ်ၵႃႈၼႂ်းၵႄႈဝူင်ႈၵၢင်ၼမ်ႉပၢင်ႇလၢႆႇဢေႃႈ။
၂၀ မိရိဢမ်ႇပရေႃးၽႅတ်ႈမေႈယိင်းဢၼ်ပဵၼ်ပီႈၼၢင်းဢႃႇရုၼ်ႇၼၼ်ႉယိပ်းၵမ်ဢဝ်ၵွင်ၶဵတ်ႇလႄႈမေႈယိင်းတင်းသဵင်ႈတင်းလူင်ၵေႃႈႁႆႇၵွင်ၶဵတ်ႇယူႇ၊ၵႃႈယူႇသေလႄႈဢွၼ်ၵၼ်ၸွမ်းမၼ်းၵႂႃႇဢေႃႈ။
၂၁ မိရိဢမ်ႇၼၼ်ႉၶႄႉသဵင်ၵၼ်တင်းၶဝ်လႄႈဝႃႈ၊-ပိူဝ်ႈဢၼ်ထႃႇဝရႃႉၽြႃးမီးတၢင်းဢၼ်မုၼ်ယႂ်ႇမုၼ်သုင်လႄႈၵဝ်ၶႃႈတၵ်းႁဵတ်းၵႂၢမ်းတီႈထႃႇဝရႃႉၽြႃးတီႈၶႃႈဢေႃႈ။မၼ်းၸဝ်ႈဢဝ်မႃႉဢိၵ်ႇတင်းၵူၼ်းဢၼ်ၶီႇမႃႉၸိူဝ်းၼၼ်ႉလူမ်ႉၶျႃးပႅတ်ႈၵႃႈၼႂ်းပၢင်ႇလၢႆႇယဝ်ႉတီႈၶႃႈယဝ်ႉ၊ဝႃႈၼင်ႇၼႆဢေႃႈ။
ၼမ်ႉတီႈမႃႇရတင်းဢေႇလိမ်ႇ
၂၂ လိုၼ်းၼၼ်ႉမုဝ်းသေႇဢဝ်ၵူၼ်းမဵဝ်းဢိသရေႇလၸိူဝ်းၼၼ်ႉဢွၵ်ႇသေၵႃႈတီႈပၢင်ႇလၢႆႇဢေႇတုင်ႇၵႂႃႇလႄႈၶဝ်ဢွၼ်ၵၼ်ၵႂႃႇႁွတ်ႈၵႂႃႇထိုင်ၵႃႈတီႈထိူၼ်ႇသုရဢေႃႈ။ၶဝ်ၵႂႃႇၵႃႈၼႂ်းထိူၼ်ၼၼ်ႉၶၢဝ်းတၢင်းသၢမ်ဝၼ်းလႄႈဢမ်ႇထူပ်းဢမ်ႇႁၼ်ၼမ်ႉ။
၂၃ မိူဝ်ႈဢၼ်ႁွတ်ႈထိုင်ၵႃႈတီႈမႃႇရၼၼ်ႉၸိုင်ပိူဝ်ႈဢၼ်ၼမ်ႉတီႈမႃႇရၼၼ်ႉၶူမ်ၼႃႇလႄႈၶဝ်ဢမ်ႇၵိၼ်လႆႈ။ပိူဝ်ႈၼႆလႄႈၶဝ်ႁွင်ႉႁိၵ်ႈၸိုဝ်တီႈၼၼ်ႉဝႃႈမႃႇရဢေႃႈ။
၂၄ ၵူၼ်းတင်းလၢႆၼၼ်ႉဢွၼ်ၵၼ်တၢင်ႇဢပျႅတ်ႈတီႈမုဝ်းသေႇလႄႈပွင်ႉၶင်းပွင်ႉမိူၼ်ႇလႄႈဝႃႈ၊-ႁဝ်းတၵ်းလႆႈၵိၼ်ၵႃႈသင်၊ဝႃႈၼင်ႇၼႆဢေႃႈ။
၂၅ မၼ်းၵေႃႈႁွင်ႉသႅၼ်ႇတီႈထႃႇဝရႃႉၽြႃးလႄႈထႃႇဝရႃႉၽြႃးၼႄပျႃးတူၼ်ႈမႆႉတူၼ်ႈၼိုင်ႈတီႈမၼ်းဢေႃႈ။မၼ်းဢဝ်တူၼ်ႈမႆႉၼၼ်ႉၶျႃးတူၵ်းသႂ်ႇၵႃႈၼႂ်းၼမ်ႉသေယဝ်ႉၼမ်ႉၼၼ်ႉဝၢၼ်မႃးဢေႃႈ။ၵႃႈတီႈၼၼ်ႉမၼ်းၸဝ်ႈၸီႇယၢင်ႇႁဵတ်းႁႂ်ႈပဵၼ်ထုင်းပဵၼ်ၾိင်ႈတီႈၶဝ်ဢေႃႈ။
၂၆ မၼ်းၸဝ်ႈၸၢမ်းတူၺ်းၶဝ်လႄႈဝႃႈ၊-ပေႃးသူတၵ်းထွမ်ႇဢဝ်ၵႂၢမ်းထႃႇဝရႃႉၽြႃးၽြႃးပဵၼ်ၸဝ်ႈသူၸေးၸေးၸွတ်ႇၸွတ်ႇလႄႈၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ထုၵ်ႇတႃမၼ်းၸဝ်ႈ၊ပေႃးသူတၵ်းထွမ်ႇဢဝ်ပိင်းၺၢပ်ႈၸဝ်ႈလႄႈပႂ်ႉၵမ်ပႂ်ႉၵျၢင်ႉထုင်းၾိင်ႈတြႃးမၼ်းၸဝ်ႈတင်းသဵင်ႈတင်းလူင်ၼၼ်ႉၸိုင်ၵဝ်တၵ်းဢမ်ႇႁႂ်ႈတၢင်းၶႆႈတၢင်းပဵၼ်ဢၼ်ၵဝ်ႁႂ်ႈၸပ်းတီႈၵူၼ်းဢေႇၵိပ်ႉတုၸိူဝ်းၼၼ်ႉလႆႈၸပ်းတီႈသူသေၸိူဝ်ႉသေပိူင်။ၵဝ်ၼႆႉပဵၼ်ထႃႇဝရႃႉၽြႃးဢၼ်ႁႂ်ႈတၢင်းၶႆႈတၢင်းပဵၼ်သူႁၢႆၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၇ လိုၼ်းၼၼ်ႉၶဝ်ႁွတ်ႈထိုင်ၵႃႈတီႈဢေႇလိမ်ႇဢၼ်မီးၼမ်ႉမေႃႇသိပ်းသွင်ၶုမ်ဢိၵ်ႇတင်းတူၼ်ႈထၢၼ်းၸဵတ်းသိပ်းတူၼ်ႈၼၼ်ႉလႄႈၶဝ်ၶျႃးတပ်ႉတီႈၼၼ်ႉၵႃႈတီႈႁိမ်းဢၼ်မီးၼမ်ႉၼၼ်ႉဢေႃႈ။