Chapter
၁၃
တၢင်းဢၼ်သၢၵ်ႈၵၢပ်ႈလုၵ်ႈတူၼ်ႈ
၁ -၂ ထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈ၊-ၼႂ်းၵူၼ်းမဵဝ်းဢိသရေႇလၸိူဝ်းၼၼ်ႉႁႂ်ႈၵႃႈဢၼ်ၵိူတ်ႇလဵင်ႉမႃးဢွၼ်တၢင်းပဵၼ်ၵူၼ်းသေဢမ်ႇဝႃႈပဵၼ်တရိၵ်ႈသၢၼ်ႇသေဢမ်ႇဝႃႈ၊လုၵ်ႈတူၼ်ႈၵႃႈမီးတင်းသဵင်ႈတင်းလူင်ၸိူဝ်းၼၼ်ႉႁႂ်ႈမူတ်းၸၢင်ႇပုၼ်ႈၵဝ်တႃႉ။ပဵၼ်ဢုၵ်ႉၸႃႇၵဝ်ဢေႃႈ၊ဝႃႈၼင်ႇၼႆဢေႃႈ။
၃ မုဝ်းသေႇလၢတ်ႈတီႈၵူၼ်းတင်းလၢႆလႄႈဝႃႈ၊-ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းဝၼ်းဢၼ်သူလႆႈဢွၵ်ႇသေၵႃႈၼႂ်းမိူင်းဢေႇၵႅပ်ႉတုတီႈဢၼ်သူလႆႈၶၢမ်ႇႁဵတ်းၶႃႈမႃးၼၼ်ႉတႃႉ။ထႃႇဝရႃႉၽြႃးဢဝ်တင်းမိုဝ်းဢၼ်ႁႅင်းယႂ်ႇၼႃႇၼုၵ်ႈဢဝ်သူဢွၵ်ႇသေၵႃႈၼႂ်းမိူင်းၼၼ်ႉမႃးယဝ်ႉ။
၄ သူဢမ်ႇလႆႈၵိၼ်ၶဝ်ႈမုၼ်းဢၼ်ပႃးၸိူဝ်ႉပႅင်ႈ။သူဢွၵ်ႇမႃးၼႂ်းလိူၼ်ဢပိပဝၼ်းၼႆႉယဝ်ႉ။
၅ မိူဝ်ႈဢၼ်ထႃႇဝရႃႉၽြႃးဢဝ်မႂ်းၵႂႃႇသူင်ႇၵႃႈတီႈမိူင်းတီႈယူႇၵူၼ်းၶႃႇၼၢၼ်ႇ၊ၵူၼ်းႁိတ်ႉတိ၊ၵူၼ်းဢႃႇမေႃးရိ၊ၵူၼ်းႁိဝိ၊ၵူၼ်းယေႇပုသိ၊မိူင်းဢၼ်မၼ်းၸဝ်ႈတိူင်ႇဝႆႉတီႈပူမွၼ်ႇမႂ်းဝႃႈတၵ်းပၼ်တီႈမႂ်း၊မိူင်းဢၼ်ၼမ်ႉၼူမ်းတင်းၼမ်ႉၽိုင်ႈၸၢင်ႊလႆယူႇၼၼ်ႉၸိုင်မႂ်းတၵ်းလႆႈႁဵတ်းဝၢတ်ႈဢၼ်ၼႆႉၼႂ်းလိူၼ်ၼႆႉဢေႃႈ။
၆ ၸဵတ်းဝၼ်းတဵမ်တဵမ်မႂ်းတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈလႄႈၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉမႂ်းတၵ်းလႆႈၶၢမ်ႇပွႆးပုၼ်ႈထႃႇဝရႃႉၽြႃးဢေႃႈ။
၇ တၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉၸဵတ်းဝၼ်းဢေႃႈ။တၵ်းဢမ်ႇလႆႈထူပ်းလႆႈႁၼ်ၶဝ်ႈမုၼ်းဢၼ်ပႃးၸိူဝ်ႉပႅင်ႈၼၼ်ႉလႃးလႃးၵႃႈတီႈမႂ်း။ၵႃႈတီႈဢၼ်မႂ်းယူႇၵူႈတီႈၵူႈလႅၼ်ၼၼ်ႉၵေႃႈတၵ်းဢမ်ႇလႆႈထူပ်းလႆႈႁၼ်ၸိူဝ်ႉပႅင်ႈလႃးလႃး။
၈ ၼႂ်းဝၼ်းၼၼ်ႉမႂ်းတၵ်းလႆႈမွၵ်ႇလၢတ်ႈတီႈလုၵ်ႈတီႈလၢၼ်မႂ်းလႄႈဝႃႈ၊-ဢၼ်ၼႆႉၸမ်းပဵၼ်ၵွပ်ႈပိူဝ်ႈၵျေးၸူးဢၼ်ထႃႇဝရႃႉၽြႃးႁဵတ်းၼႂ်းၶိင်ႇၵႃႇလႃႉမိူဝ်ႈဢၼ်ႁဝ်းဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉဢေႃႈ။
၉ ဢၼ်ၼႆႉတၵ်းလႆႈပဵၼ်လၢၵ်ႈၶၼႃႇသၢၵ်ႈသေႇၵႃႈတီႈမိုဝ်းမႂ်းတင်းဢၼ်ပုၼ်ႈဢၼ်တၵ်းၶုၵ်ႈၸႂ်လႆႈၶႆႈထူပ်းၼႂ်းၵႄႈဝူင်ႈၵၢင်မၢၵ်ႇတႃမႂ်းႁႂ်ႈတြႃးထႃႇဝရႃႉၽြႃးလႆႈတႄႇယူႇၵႃႈၼႂ်းသူပ်းမႂ်းဢေႃႈ။လွင်ႈမၼ်းၸမ်းထႃႇဝရႃႉၽြႃးဢဝ်တင်းမိုဝ်းမၼ်းၸဝ်ႈဢၼ်ႁႅင်းယႂ်ႇၼႃႇၼၼ်ႉလႄႈၼုၵ်ႈဢဝ်မႂ်းဢွၵ်ႇသေၵႃႈၼႂ်းမိူင်းဢေႇၵႅပ်ႉတုၼၼ်ႉယဝ်ႉ။
၁၀ ပိူဝ်ႈၼႆလႄႈပေႃးထိုင်ႁွတ်ႈၶိင်ႇမၼ်းၸိုင်မႂ်းတၵ်းလႆႈပႂ်ႉၵမ်ပႂ်ႉၸွမ်းထုင်းၾိင်ႈတြႃးၼႆႉၵူႈပီႊတႃႇသေႇဢမ်ႇထၢတ်ႇဢေႃႈ။
၁၁ မိူဝ်ႈဢၼ်ထႃႇဝရႃႉၽြႃးဢဝ်မႂ်းသူင်ႇမိူင်းၵူၼ်းၶႃႇၼၢၼ်ႇၸွမ်းၵႃႈၼင်ႇဢၼ်မၼ်းၸဝ်ႈတိူင်ႇဝႃႈဝႆႉတီႈမႂ်းဢိၵ်ႇတင်းပူႇမွၼ်ႇမႂ်းၼၼ်ႉလႄႈဢဝ်မိူင်းၼၼ်ႉပၼ်တီႈမႂ်းယဝ်ႉၼၼ်ႉၸိုင်၊
၁၂ မႂ်းတၵ်းလႆႈၽႄဢဝ်လုၵ်ႈၸၢႆးၵႃႈဢၼ်ၵိူတ်ႇလဵင်ႉမႃးဢွၼ်တၢင်းတီႈမႂ်းတင်းသဵင်ႈတင်းလူင်ဢိၵ်ႇတင်းလုၵ်ႈတူၼ်ႈတရိၵ်ႇသၢၼ်ႇဢၼ်မီးတီႈမႂ်းတင်းသဵင်ႈတင်းလူင်ၼၼ်ႉဝႆႉၶေႃၶေႃပုၼ်ႈထႃႇဝရႃႉၽြႃးဢေႃႈ။ၵႃႈဢၼ်ပဵၼ်တူဝ်ပေႃႈတၵ်းလႆႈပဵၼ်ဢုၵ်ႉၸႃႇထႃႇဝရႃႉၽြႃးဢေႃႈ။
၁၃ လုၵ်ႈတူၼ်ႈဢၼ်ၵိူတ်ႇလဵင်ႉမႃးဢွၼ်တၢင်းတီႈမႃႉလီႈမေႈၼၼ်ႉၸိုင်မႂ်းတၵ်းလႆႈဢဝ်တင်းသူဝ်းဢွၼ်ႇလႄႈထုတ်ႇဢဝ်ဢေႃႈ။ပေႃးဢမ်ႇၶႂ်ႈထုတ်ႇဢဝ်ၸိုင်မႂ်းတၵ်းလႆႈႁၵ်းၶေႃးမႃႉလီႈဢွၼ်ႇၼၼ်ႉပႅတ်ႈဢေႃႈ။ၵႃႈၼႂ်းလုၵ်ႈၸၢႆးၵူၼ်းတင်းလၢႆၸမ်းမႂ်းတၵ်းလႆႈထုတ်ႇဢဝ်လုၵ်ႈၸၢႆးတူၼ်ႈတင်းသဵင်ႈတင်းလူင်ဢေႃႈ။
၁၄ ၶိင်ႇၵႃႇလႃႉၵမ်းလိုၼ်းပေႃးလုၵ်ႈၸၢႆးမႂ်းထၢမ်လႄႈဝႃႈ၊-ဢၼ်ၼႆႉပဵၼ်လွင်ႈၸိူဝ်ႉၼင်ႇႁိုဝ်၊ဝႃႈၼင်ႇၼႆၸိုင်မႂ်းၶိုၼ်းလၢတ်ႈတီႈမၼ်းလႄႈဝႃႈ၊-ထႃႇဝရႃႉၽြႃးဢဝ်တင်းမိုဝ်းဢၼ်ႁႅင်းယႂ်ႇၼႃႇၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိူင်းဢေႇၵႅပ်ႉတုႉတီႈဢၼ်ႁဝ်းလႆႈၶၢမ်ႇႁဵတ်းၶႃႈၼၼ်ႉမႃးဢေႃႈ။
၁၅ မိူဝ်ႈဢၼ်ၶုၼ်ႁေႃၶမ်းၽႃႇရေႃးဢမ်ႇပွႆႇႁဝ်းငၢႆႈငၢႆႈလႄႈယူႇၼၼ်ႉၸိုင်ထႃႇဝရႃႉၽြႃးဢဝ်လုၵ်ႈၸၢႆးတူၼ်ႈတင်းသဵင်ႈတင်းလူင်ဢၼ်ဝႃႈလုၵ်ႈတူၼ်ႈၵူၼ်းဢိၵ်ႇတင်းလုၵ်ႈတူၼ်ႈတရိၵ်ႈသၢၼ်ႇၸိူဝ်းၼၼ်ႉတၢႆပႅတ်ႈၵႃႈၼႂ်းမိူင်းဢေႇၵႅပ်ႉတုဢေႃႈ။ပိူဝ်ႈၼႆလႄႈၵဝ်တၵ်းလႆႈဢဝ်တူဝ်ပေႃႈတရိၵ်ႈသၢၼ်ႇဢၼ်ၵိူတ်ႇလဵင်ႉမႃးဢွၼ်တၢင်းၵႃႈမီးတင်းသဵင်ႈတင်းလူင်ၼၼ်ႉပုၵ်ႉၸေႃႇတီႈထႃႇဝရႃႉၽြႃးဢေႃႈ။ၵႃႈၼႂ်းလုၵ်ႈလၢင်းတူဝ်ၸဝ်ႈၵဝ်ႇတင်းလၢႆၼၼ်ႉၸမ်းၵဝ်တၵ်းလႆႈထုတ်ႇဢဝ်လုၵ်ႈၸၢႆးတူၼ်ႈဢေႃႈ၊ဝႃႈၼင်ႇၼႆတႃႉ။
၁၆ ဢၼ်ၼႆႉၵေႃႈတၵ်းလႆႈပဵၼ်လၢၵ်ႈၶၼႃႇသၢၵ်ႈသေႇၵႃႈတီႈမိူင်းမႂ်း၊ၶိူင်ႈဢၼ်ဝႆႉၵႃႈတီႈၵႄႈဝူင်ႈၵၢင်မၢၵ်ႇတႃမႂ်းဢေႃႈ။လွင်ႈမၼ်းၸမ်းထႃႇဝရႃႉၽြႃးဢဝ်တင်းမိုဝ်းဢၼ်ႁႅင်းယႂ်ႇၼႃႇလႄႈၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိူင်းဢေႇၵႅပ်ႉတုၼၼ်ႉယဝ်ႉ၊ဝႃႈၼင်ႇၼႆဢေႃႈ။
ၶၢမ်ႈပၢင်ႇလၢႆႇ
၁၇ ဝၢႆးသေၶုၼ်ႁေႃၶမ်းၽႃႇရေႃးပွႆႇၵူၼ်းၸိူဝ်းၼၼ်ႉၵႂႃႇယဝ်ႉၼၼ်ႉပိၵ်ႉသမ်ႉသဵၼ်ႈတၢင်းဢၼ်ၽႃႇလတ်းၵႃႈၼႂ်းမိူင်းၽိလိတ်ႉတိၵႂႃႇၼၼ်ႉသိုဝ်ႈလီသေၵေႃႈၽြႃးပဵၼ်ၸဝ်ႈဢမ်ႇဢဝ်ၶဝ်ၵႂႃႇသဵၼ်ႈတၢင်းၼၼ်ႉ။လွင်ႈမၼ်းၸမ်းၽြႃးပဵၼ်ၸဝ်ႈဝႃႈၵူဝ်ၵူၼ်းတင်းလၢႆၸႂ်တၵ်းလူႉၼႂ်းမိူဝ်ႈဢၼ်ၶဝ်ထူပ်းႁၼ်ဢမူႉသိုၵ်းၼၼ်ႉလႄႈၶဝ်တၵ်းၶိုၼ်းမိူဝ်းၵႂႃႇၸူးၵႃႈတီႈမိူင်းဢေႇၵႅပ်ႉတုဢေႃႈ၊ဝႃႈၼင်ႇၼႆဢေႃႈ။
၁၈ ပိူဝ်ႈၼႆလႄႈၽြႃးပဵၼ်ၸဝ်ႈဢဝ်ၶဝ်လဵပ်ႈၵႂႃႇသဵၼ်ႈတၢင်းထိူၼ်ႇၵႃႈႁိမ်းပၢင်ႇလၢႆႇဢေႇတုင်ႇၼၼ်ႉဢေႃႈ။ၵူၼ်းမဵဝ်းဢိသရေႇလၸိူဝ်းၼၼ်ႉမႄးႁႅၼ်းၶၢင်ႈတပ်ႉၶၢင်ႈငႃးသေလႄႈဢွၼ်ၵၼ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုၼၼ်ႉၵႂႃႇဢေႃႈ။
၁၉ မိူဝ်ႈၶိင်ႇၵႃႇလႃႉဢွၼ်တၢင်းၼၼ်ႉပိူဝ်ႈဢၼ်ယုဝ်းသႅပ်ႉႁႂ်ႈၵူၼ်းမဵဝ်းဢိသရေႇလၵိၼ်ႇဝႃႈၼႃႇလူင်လၢင်လႄႈဝႃႈ၊-ၽြႃးပဵၼ်ၸဝ်ႈတၵ်းမႃးလူႈမႃးတူၺ်းသူဢမၢၼ်ႇၶၢၼ်ပဵၼ်ဢေႃႈ။သူတၵ်းလႆႈဢဝ်လုပ်ႇၵဝ်ဢွၵ်ႇသေၵႃႈတီႈမိူင်းၼႆႉၵႂႃႇဢေႃႈ၊ဝႃႈၼင်ႇၼႆလႄႈမုဝ်းသေႇဢဝ်လုပ်ႇမၼ်းၸိူဝ်းၼၼ်ႉပႃးၵႂႃႇလူၺ်ႈၵၼ်တင်းမၼ်းဢေႃႈ။
၂၀ ၵမ်းၼၼ်ႉၶဝ်ဢွၵ်ႇသေၵႃႈတီႈသုၵုတ်ႉၵႂႃႇလႄႈၶျႃးပၢင်ၵႃႈတီႈဝဵင်းဢေႇသမ်ႇၵႃႈႁိမ်းထိူၼ်ႇဢေႃႈ။
၂၁ ၶိင်ႇၵၢင်ဝၼ်းထႃႇဝရႃႉၽြႃးဢဝ်တင်းသဝ်မွၵ်ႇၵုမ်ႈၼႄတၢင်းၶဝ်လႄႈ၊ၶိင်ႇၵၢင်ၶိုၼ်းဢဝ်တင်းသဝ်ၽႆးဢၼ်တၵ်းပၼ်ဢၼ်လႅင်းတီႈၶဝ်ၼၼ်ႉသေလႄႈၵႂႃႇဢွၼ်တၢင်းၶဝ်ႁႂ်ႈၶဝ်လႆႈၵႂႃႇလႆႈၵႃႈၼႂ်းၶိင်ႇၵႃႈဝၼ်းဢိၵ်ႇတင်းၶိင်ႇၵႃႈၶိုၼ်းဢေႃႈ။
၂၂ မၼ်းၸဝ်ႈဢမ်ႇသိပ်းဢဝ်သဝ်မွၵ်ႇၵုမ်ႈၶိင်ႇၵၢင်ဝၼ်း၊သဝ်ၽႆးၶိင်ႇၵၢင်ၶိုၼ်းၼၼ်ႉသေၵႃႈတီႈၶဝ်။