Chapter
၁၂
ပွႆးပၢတ်ႈသၶႃႇ
၁ ထႃႇဝရႃႉၽြႃးမီးဢမိင်ႉတီႈမုဝ်းသေႇတင်းဢႃႇရုၼ်ႇၵႃႈၼႂ်းမိူင်းဢေႇၵႅပ်ႉတုၼၼ်ႉလႄႈဝႃႈၸမ်း၊-
၂ လိူၼ်ၼႆႉတၵ်းလႆႈပဵၼ်လိူၼ်ငဝ်ႈတီႈသူဢၼ်ဝႃႈလိူၼ်ပထမၼႂ်းၵူႈပီႊတႃႇသေႇဢေႃႈ။
၃ သွင်ၶိူဝ်တၵ်းလႆသင်ႇလၢတ်ႈဝႆႉတီႈပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်လႄႈဝႃႈၸမ်း၊-ၼႂ်းဝၼ်းဢၼ်လိူၼ်ၼႆႉလႆႈသိပ်းဝၼ်းၼၼ်ႉၶဝ်ၵႃႈမီးတင်းသဵင်ႈတင်းလူင်ၸွမ်းလူၺ်ႈၼႃႈႁိူၼ်းၽႂ်ၼႃႈႁိူၼ်းမၼ်းယေႈႁိူၼ်းတၵ်းလႆႈဢဝ်သူဝ်းဢွၼ်ႇယေႈတူဝ်ဢေႃႈ။
၄ ပေႃးၼႃႈႁိူၼ်းလဵၵ်ႉၼႃႇပုၼ်ႈသူဝ်းဢွၼ်ႇတူဝ်ၼိုင်ႈၸိုင်ႁႂ်ႈမၼ်းဢိၵ်ႇတင်းၵူၼ်းႁိူၼ်းၸမ်ၵၼ်တင်းမၼ်းပွင်းၵၼ်ဢဝ်ၸွမ်းလူၺ်ႈတၢင်းဢၼ်ၼပ်ႉဢၢၼ်ႇၵူၼ်းမီးလၢႆၵေႃႉၼၼ်ႉသေယဝ်ႉတွၵ်ႈတူၺ်းၵူၼ်းဢၼ်တၵ်းၵုမ်ႇၵိၼ်တူဝ်ႈၼိုင်ႈၼၼ်ႉသေလႄႈဢဝ်သူဝ်းဢွၼ်ႇတူဝ်ၼိုင်ႈတႃႉ။
၅ သူဝ်းဢွၼ်ႇသေဢမ်ႇဝႃႈ၊ပႄႉဢွၼ်ႇသေဢမ်ႇဝႃႈတူဝ်ဢွၼ်ႇဢၼ်သူဢဝ်ၼၼ်ႉတၵ်းလႆႈပဵၼ်တူဝ်ပေႃႈဢၼ်ဢမ်ႇပႆႇၶွပ်ႈၶူပ်ႇၼၼ်ႉယင်းဢမ်ႇမီးဢင်ႇၵႃႇဢၼ်လူႉသေဢိတ်းၼၼ်ႉဢေႃႈ။
၆ ဢဝ်သူဝ်းဢွၼ်ႇၼၼ်ႉဝႆႉတေႃႇထိုင်ႁွတ်ႈလိူၼ်ၼၼ်ႉလႆႈသိပ်းသီႇဝၼ်းလႄႈႁႂ်ႈမုၵ်ႉၵူၼ်းၸိူဝ်းၵူၼ်းပရိၵ်ႈသၢတ်ႈၵူၼ်းမဵဝ်းဢိသရေႇလၶဝ်တင်းသဵင်ႈတင်းလူင်ၼၼ်ႉတၵ်းလႆႈဢဝ်သူဝ်းဢွၼ်ႇၸိူဝ်းၼၼ်ႉတၢႆၼႂ်းၶိင်ႇႁူဝ်ၶမ်ႈဢေႃႈ။
၇ ၶဝ်တၵ်းလႆႈဢဝ်လိူတ်ႈသူဝ်းဢွၼ်ႇၼၼ်ႉၸမ်ႈသႂ်ႇၵႃႈတီႈၽၵ်းတူၼိူဝ်မၼ်းႁိမ်းမၼ်းတီႈႁိူၼ်းဢၼ်ၶဝ်ၵိၼ်ၼိူဝ်ႉသူဝ်းၼၼ်ႉဢေႃႈ။
၈ ၼႂ်းၶိုၼ်းၼၼ်ႉၶဝ်တၵ်းလႆႈဢဝ်ၼိူဝ်ႉမၼ်းပိင်ႈၽႆးႁၢင်းၽႆးသေယဝ်ႉၵိၼ်လူၺ်ႈတင်းၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈတင်းၽၵ်းၶဵဝ်ဢၼ်ၶူမ်ၼၼ်ႉဢေႃႈ။
၉ ၼိူဝ်ႉဢၼ်လိပ်းသေဢမ်ႇဝႃႈ၊ဢၼ်ဢဝ်ၼမ်ႉတူမ်ႈၼၼ်ႉသေဢမ်ႇဝႃႈ၊တၵ်းဢမ်ႇလႆႈၵိၼ်။တၵ်းလႆႈဢဝ်ၸႃႉၸဵမ်ႁူဝ်၊တိၼ်၊တပ်း၊ပွတ်ႇ၊ႁူဝ်ၸႂ်ၸိူဝ်းၼၼ်ႉပိင်ႈၽႆးႁၢင်းၽႆးသေလႄႈၵိၼ်ဢေႃႈ။
၁၀ ၼိူဝ်ႉၼၼ်ႉၸိုင်၊သူဢမ်ႇလႆႈဝႆႉၵိုတ်းဝႆႉၵျၢၼ်ႇတေႃႇထိုင်ႁွတ်ႈၶိင်ႇၵၢင်ၼႂ်။ၵႃႈဢၼ်ၵိုတ်းၵျၢၼ်ႇတေႃႇထိုင်ႁွတ်ႈၶိင်ႇၵၢင်ၼႂ်ၼၼ်ႉသူတၵ်းလႆႈဢဝ်တုတ်ႇၽႆးပႅတ်ႈဢေႃႈ။
၁၁ သူတၵ်းလႆႈၵိၼ်ၸိူဝ်ႉၼင်ႇႁိုဝ်ဝႃႈၼႆၸမ်းသူတၵ်းလႆႈႁတ်ႉသၢႆဢႅဝ်၊တိုဝ်းသွၵ်းတိၼ်၊ယိပ်းၵမ်ၶွၼ်ႉတဝ်ႉသေလႄႈၵိၼ်ၶၼ်ၶၼ်ၽႂ်းၽႂ်းဢေႃႈ။
၁၂ ပဵၼ်ပႃသၶႃႇထႃႇဝရႃႉၽြႃးဢေႃႈ။လွင်ႈမၼ်းၸမ်းၼႂ်းၶိုၼ်းၼၼ်ႉၵဝ်တၵ်းၵႂႃႇၵႃႈၼႂ်းမိူင်းဢေႇၵႅပ်ႉတုႁႂ်ႈသုတ်းႁႂ်ႈတိူၵ်ႈလႄႈပၢၼ်တၢမ်ႇတီႈလုၵ်ႈတူၼ်ႈၵူၼ်းဢိၵ်ႇတင်းလုၵ်ႈတူၼ်ႈတရိၵ်ႈသၢၼ်ႇၵႃႈဢၼ်မီးၵႃႈၼႂ်းမိူင်းဢေႇၵႅပ်ႉတုတင်းသဵင်ႈတင်းလူင်ၼၼ်ႉလႄႈၸီႇယၢင်ႇတြႃးတီႈၽြႃးမိူင်းဢေႇၵႅပ်ႉတုတင်းလၢႆၼၼ်ႉဢေႃႈ။
၁၃ ၵဝ်ပဵၼ်ထႃႇဝရႃႉၽြႃးဢေႃႈ။လိူတ်ႈၼၼ်ႉတၵ်းလႆႈပဵၼ်လၢၵ်ႈၶၼႃႇသၢၵ်ႈသေႇသူၵႃႈတီႈႁိူၼ်းဢၼ်သူယူႇၼၼ်ႉလႄႈမိူဝ်ႈဢၼ်ၵဝ်ႁၼ်လိူတ်ႈၼၼ်ႉၸိုင်ၵဝ်တၵ်းပူၼ်ႉသူၵႂႃႇဢေႃႈ။ၼင်ႇၼၼ်လႄႈမိူဝ်ႈဢၼ်ၵဝ်ပၼ်တၢမ်ႇတီႈမိူင်းဢေႇၵႅပ်တုၼၼ်ႉၽေးဢူးပၢတ်ႈတၢင်းဢၼ်လူႉလႅဝ်တၵ်းဢမ်ႇလႆႈတိူဝ်ႉလႆႈထုၵ်ႇသူ။
၁၄ ဝၼ်းမိူဝ်ႈၼႆႉၵေႃႈတၵ်းလႆႈပဵၼ်ဝၼ်းဢၼ်သူတၵ်းလႆႈၶုၵ်းၸႂ်လႆႈၶႆႈၸႂ်ထူပ်းလႄႈႁဵတ်းပွႆးတီႈထႃႇဝရႃႉၽြႃးၼၼ်ႉဢေႃႈ။ၼႆႉပဵၼ်ပိင်းၺၢပ်ႈပုၼ်ႈၸိူဝ်ႉၶိူဝ်းသူသိုပ်ႇသိုပ်ႇတၢမ်ႈတၢမ်ႈတႃႇသေႇၼၼ်ႉဢေႃႈ။
၁၅ ၸဵတ်းဝၼ်းတဵမ်တဵမ်သူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉဢေႃႈ။ဝၼ်းပထမၼၼ်ႉသူတၵ်းလႆႈပႄႇပႅတ်ႈၸိူဝ်ႉပႅင်ႈသေၵႃႈၼႂ်းႁိူၼ်းသူဢေႃႈ။ၸႃႉၸဵမ်ဝၼ်းပထမတေႃႇထိုင်ႁွတ်ႈဝၼ်းဢၼ်ထူၼ်ႈထိုင်ၸဵတ်းဝၼ်းၵေႃႉဢၼ်ၵိၼ်ၶဝ်ႈမုၼ်းဢၼ်ပႃးၸိူဝ်ႉပႅင်ႈၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းမဵဝ်းၸိူဝ်ႉၶိူဝ်းဢိသရေႇလဢေႃႈ။
၁၆ ၼႂ်းဝၼ်းပထမၼၼ်ႉသူတၵ်းလႆႈႁဵတ်းတၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။ၼႂ်းဝၼ်းၸဵတ်းၼၼ်ႉၵေႃႈသူတၵ်းလႆႈႁဵတ်းတၢင်းဢၼ်ၸူႉတုမ်ထမ်ႇမႃႉၵၼ်ထႅင်ႈဢေႃႈ။ၼႂ်းမိူဝ်ႈဝၼ်းၼၼ်ႉလိူဝ်သေတၢင်းႁဵတ်းတၢင်းဢၼ်မႄးႁႅၼ်းတၢင်းၵိၼ်တၢင်းၶူပ်းပုၼ်ႈၵူၼ်းၵူႈၵေႃႉၼၼ်ႉတၵ်းဢမ်ႇလႆႈႁဵတ်းၵၢၼ်တၢင်းႁဵတ်းတၢင်ႇၸိူဝ်ႉတၢင်ႇပိူင်။မီးဢၶႂၢင်ႉဢၼ်လႆႈႁဵတ်းလွင်ႈၼၼ်ႉၵူၺ်းဢေႃႈ။
၁၇ လွင်ႈတၢင်းဢၼ်သူတၵ်းလႆႈၶၢမ်ႇပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉၸမ်း၊ဝၼ်းၼၼ်ႉပဵၼ်ဝၼ်းဢၼ်ၵဝ်ၼုၵ်ႈဢဝ်ပူဝ်ႇပႃႇသူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉဢေႃႈ။ၵွပ်ႈပိူဝ်ႈလွင်ႈၼၼ်ႉပဵၼ်ပိင်းၺၢပ်ႈထႃႇဝရႃႉလႄႈၸိူဝ်ႉၶိူဝ်းသူသိုပ်ႇသိုပ်ႇတၢမ်ႈတၢမ်ႈတၵ်းလႆႈဢွၼ်ၵၼ်ပႂ်ႉဝၼ်းၼၼ်ႉယူႇဢေႃႈ။
၁၈ ၸႃႉၸဵမ်ႁူဝ်ၶမ်ႈဝၼ်းသိပ်းတေႃႇႁွတ်ႈႁူဝ်ၶမ်ႈသၢဝ်းဢဵတ်းဝၼ်းၼႂ်းလိူၼ်ပထမၼၼ်ႉသူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉၵူၺ်းဢေႃႈ။
၁၉ ၼႂ်းၸဵတ်းဝၼ်းတဵမ်တဵမ်ဢမ်လႆႈဝႆႉၸိူဝ်ႉပႅင်ႈၵႃႈၼႂ်းႁိူၼ်းသူလႃးလႃး။ၵေႃႉဢၼ်ၵိၼ်ၶဝ်ႈမုၼ်းဢၼ်ပႃးၸိူဝ်ႉပႅင်ႈၼၼ်ႉၸမ်းပဵၼ်ၵူၼ်းတၢင်ႇဝၢၼ်ႈတၢင်ႇမိူင်းသေဢမ်ႇဝႃႈ၊ပဵၼ်ၵူၼ်းၼႂ်းဝၢၼ်ႈၼႂ်းမိူင်းသေဢမ်ႇဝႃႈတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းပရိၵ်ႈသၢတ်ႈၵူၼ်းမဵဝ်းဢိသရေႇလဢေႃႈ။
၂၀ သူယူႇတီႈလႂ်သေဢမ်ႇဝႃႈတၵ်းဢမ်ႇလႆႈၵိၼ်ၶဝ်ႈမုၼ်းဢၼ်ပႃးၸိူဝ်ႉပႅင်ႈလႃးလႃး။သူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉၵူၺ်းဢေႃႈ၊ဝႃႈၼင်ႇၼႆဢေႃႈ။
၂၁ မိူဝ်ႈၼၼ်ႉမုဝ်းသေႇႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၵူၼ်းမဵဝ်းဢိသရေႇလတင်းသဵင်ႈတင်းလူင်လႄႈလၢတ်ႈတီႈၶဝ်လႄႈဝႃႈ၊-သူၸွမ်းလူၺ်ႈၼႃႈႁိူၼ်းၽႂ်ၼႃႈႁိူၼ်းမၼ်းတီႈလႂ်တီႈၼၼ်ႉသေလႄႈဢွၼ်ၵၼ်ဢဝ်သူဝ်းဢွၼ်ဢွၵ်ႇလႄႈဢဝ်တၢႆပုၼ်ႈပွႆးပႃႇသၶႃႇတႃႉ။
၂၂ သူတၵ်းလႆႈဢဝ်ယွတ်ႈတူၼ်ႈႁုတ်ႉသူပ်ႇမတ်ႉၼိုင်ႈၸုမ်ႇသႂ်ႇၵႃႈၼႂ်းလိူတ်ႈဢၼ်မီးၵႃႈၼႂ်းမေႃႈမႅၼ်ၼၼ်ႉသေယဝ်ႉၸမ်ႈသႂ်ႇၵႃႈၼိူဝ်ၽၵ်းတူၵႃႈႁိမ်းၽၵ်းတူသွင်ၽၢႆႇဢေႃႈ။တေႃႇထိုင်ႁွတ်ႈၶိင်ႇၵၢင်ၼႂ်ၽူႈလႂ်ၵေႃႈတၵ်းဢမ်ႇလႆႈဢွၵ်ႇသေၵႃႈတီႈၽၵ်းတူႁိူၼ်းမၼ်း။
၂၃ လွင်ႈမၼ်းၸမ်းထႃႇဝရႃႉၽြႃးတၵ်းၵႂႃႇႁႂ်ႈသုတ်းႁႂ်ႈတိူၵ်ႉႁႂ်ႈလႆႈပၼ်တၢမ်ႇတီႈၵူၼ်းဢေႇၵႅပ်ႉတုတင်းလၢႆဢေႃႈ။မိူဝ်ႈဢၼ်ထႃႇဝရႃႉၽြႃးႁၼ်လိူတ်ႈဢၼ်မီးၵႃႈၼိူဝ်ၽၵ်းတူႁိမ်းထၵ်းတူသွင်ႇၽၢႆႇၼၼ်ႉမၼ်းၸဝ်ႈတၵ်းပူၼ်ႉၽၵ်းတူၼၼ်ႉၵႂႃႇသေဢေႃႈ။တီႈၵေႃႉဢၼ်တၵ်းယႃႉပႅတ်ႈၼၼ်ႉၵေႃႈမၼ်းၸဝ်ႈတၵ်းဢမ်ႇပၼ်ဢၶႂၢင်ႉဢၼ်လႆႈၶဝ်ႈၵႃႈၼႂ်းႁိူၼ်းသူလႄႈလႆႈပၼ်တၢမ်ႇတီႈသူ။
၂၄ သူတၵ်းလႆႈပႂ်ႉၵမ်ပႂ်ႉၸွမ်းလွင်ႈတၢင်းၼႆႉလႄႈႁႂ်ႈပဵၼ်ထုင်းၾိင်ႈတြႃးတီႈသူႇဢိၵ်ႇတင်းတီႈလုၵ်ႈတီႈလၢင်းသူတင်းလၢႆတႃႇသေႇဢေႃႈ။
၂၅ မိူဝ်ႈဢၼ်သူႁွတ်ႈထိုင်ၵႃႈတီႈမိူင်းဢၼ်ထႃႇဝရႃႉၽြႃးတၵ်းပၼ်မႅၼ်ႈၸွမ်းၵႃႈၼင်ႇဢၼ်ၵတိၸဝ်ႈမီးၼၼ်ႉၸိုင်သူတၵ်းလႆႈႁဵတ်းဝၢတ်ႈဢေႃႈ။
၂၆ မိူဝ်ႈဢၼ်လုၵ်ႈလၢင်းသူထၢမ်တီႈသူလႄႈဝႃႈ၊-လွင်ႈဢၼ်ႁဵတ်းဝၢတ်ႈၼႆႉပဵၼ်လွင်ႈၸိူဝ်ႉၼင်ႇႁိုဝ်၊ဝႃႈၼင်ႇၼႆၸိုင်၊သူတၵ်းလႆႈၶိုၼ်းလၢတ်ႈလႄႈဝႃႈ၊-
၂၇ ပဵၼ်ယိၸ်ႉပႃသၶႃႇပုၼ်ႈထႃႇဝရႃႉၽြႃးဢၼ်ပူၼ်ႉသေႁိူၼ်းၵူၼ်းမဵဝ်းဢိသရေႇလၼႂ်းမိူင်းဢေႇၵႅပ်ႉတုၼႂ်းမိူဝ်ႈဢၼ်မၼ်းၸဝ်ႈပၼ်တၢမ်ႇတီႈၵူၼ်းဢေႇၵႅပ်ႉတုတင်းလၢႆလႄႈပၼ်ၵတ်းယဵၼ်ၶျၢမ်းသႃႇတီႈႁိူၼ်းႁဝ်းၼၼ်ႉဢေႃႈ၊ဝႃႈၼင်ႇၼႆဢေႃႈ၊ဝႃႈၼင်ႇၼႆသေယဝ်ႉၶဝ်ၼၼ်ႉဢွၼ်ၵၼ်ၵူမ်ႈၵွမ်းႁူဝ်လႄႈၵူဝ်းၵႂၢႆႇဢေႃႈ။
၂၈ ၼင်ႇၼၼ်လႄႈၵူၼ်းမဵဝ်းဢိသရေႇလတင်းလၢႆၵေႃႈဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇတင်းဢႃႇရုၼ်ႇၼၼ်ႉဢေႃႈ။
၂၉ ၶိင်ႇတဵင်ႈၶိုၼ်းထႃႇဝရႃႉၽြႃးပၼ်တၢမ်ႇတီႈလုၵ်ႈတူၼ်ႈၵႃႈဢၼ်မီးၵႃႈၼႂ်းမိူင်းဢေႇၵႅပ်ႉတုတင်းသဵင်ႈတင်းလူင်ၸႃႉၸဵမ်လုၵ်ႈတူၼ်ႈၶုၼ်ႁေႃၶမ်းၽႃႇရေႃးဢၼ်ၼင်ႈယူႇၵႃႈၼိူဝ်ႁေႃတေႃႇထိုင်ႁွတ်ႈလုၵ်ႈတူၼ်ႈၵေႃႉဢၼ်လႆႈၶၢမ်ႇတၢင်းဢၼ်ၶင်ဝႆႉၵႃႈၼႂ်းထွင်ႇလုၵ်ႈတူၼ်ႈတရိၵ်ႈသၢၼ်ႇၵႃႈမီးတင်းသဵင်ႈတင်းလူင်ၼၼ်ႉဢေႃႈ။
၃၀ ၼႂ်းၶိုၼ်းၼၼ်ႉၵွပ်ႈပိူဝ်ႈဢၼ်ႁိူၼ်းဢၼ်ၵၢင်းလွတ်ႈတင်းတူဝ်တၢႆဢမ်ႇမီးသေႁိူၼ်းၼၼ်ႉလႄႈပဵၼ်တၢင်းဢၼ်ႁွင်ႉဢၼ်ႁႆႈဢၼ်ယႂ်ႇၼႃႇလူင်လၢင်ၵႃႈၼႂ်းမိူင်းဢေႇၵႅပ်ႉတုၼၼ်ႉလႄႈၶုၼ်ႁေႃၶမ်းၽႃႇရေႃးဢိၵ်ႇတင်းၶႃႈၵူၼ်းမၼ်းတင်းသဵင်ႈတင်းလူင်တင်းၵူၼ်းဢေႇၵႅပ်ႉတုတင်းသဵင်ႈတင်းလူင်ဢွၼ်ၵၼ်တိုၼ်ႇဢေႃႈ။
တၢင်းဢၼ်ဢွၵ်ႇၵႂႃႇ
၃၁ ၼႂ်းၶိုၼ်းၼၼ်ႉၶုၼ်ႁေႃၶမ်းၽႃႇရေႃးႁွင်ႉဢဝ်မုဝ်းသေႇတင်းဢႃႇရုၼ်ႇလႄႈလၢတ်ႈလႄႈဝႃႈ၊-ၸႃႉၸဵမ်သွင်ၶိူဝ်တင်းၵူၼ်းမဵဝ်းဢိသရေႇလတင်းလၢႆဢွၼ်ၵၼ်လုၵ်ႉလႄႈဢွၵ်ႇၵႂႃႇသေၵႃႈၼႂ်းၵူၼ်းၵဝ်ၸိူဝ်းၼႆႉတႃႉ။ဢွၼ်ၵၼ်ၵႂႃႇႁဵတ်းဝၢတ်ႈတီႈထႃႇဝရႃႉၽြႃးၸွမ်းၵႃႈၼင်ႇဢၼ်သူယွၼ်းၼၼ်ႉတႃႉ။
၃၂ ဢွၼ်ၵၼ်ဢဝ်ၽုင်သူဝ်းၽုင်ဝူဝ်းသူလႄႈၵႂႃႇၸွမ်းၵႃႈၼင်ႇဢၼ်သူယွၼ်းၼၼ်ႉတႃႉ။တီႈၵဝ်ၵေႃႈပၼ်တၢင်းလီမင်ႇၵလႃႇသေၵမ်း၊ဝႃႈၼင်ႇၼႆဢေႃႈ။
၃၃ ၵူၼ်းဢေႇၵႅပ်ႉတုတင်းလၢႆၵေႃႈၵွပ်ႈပိူဝ်ႈဢၼ်လၢတ်ႈလႄႈဝႃႈ၊-ႁဝ်းၵႃႈမီးၸိူဝ်းၼႆႉတၵ်းပဵၼ်တူဝ်တၢႆယဝ်ႉ၊ဝႃႈၼင်ႇၼႆလႄႈဢွၼ်ၵၼ်ႁိပ်ႈၼႅတ်ႈတိုၵ်းယူင်းႁႂ်ႈပွႆႇၵူၼ်းမဵဝ်းဢိသရေႇလတင်းလၢႆဢွၵ်ႇၵႂႃႇသေၵႃႈၼႂ်းမိူင်းဢေႇၵႅပ်ႉတုၶၼ်ၶၼ်ၽႂ်းၽႂ်းဢေႃႈ။
၃၄ ၵူၼ်းတင်းလၢႆၵေႃႈဢွၼ်ၵၼ်ဢဝ်ၶဝ်မုၼ်းလိပ်းဢၼ်ဢမ်ႇပႃးၸိူဝ်ႉပႅင်ႈၵွၵ်းဝၢၼ်ႇဢၼ်ၼူတ်ႈၶဝ်ႈမုၼ်းၶဝ်ၵေႃႈဢွၼ်ၵၼ်ဢဝ်တင်းၶူဝ်းၼုင်ႈပူၵ်ႉႁေႃႇသေလႄႈႁၢပ်ႇတၢင်ႇၵႃႈၼိူဝ်ႁူဝ်မႃႇၶဝ်ဢေႃႈ။
၃၅ ၵူၼ်းမဵဝ်းဢိသရေႇလၸိူဝ်းၼၼ်ႉၵေႃႈႁဵတ်းၸွမ်းၵႃႈၼင်ႇဢၼ်မုဝ်းသေႇၸီႇယၢင်ႇဝႆႉၼၼ်ႉလႄႈၶဝ်ဢွၼ်ၵၼ်ယွၼ်းဢဝ်ၶိူင်ႈငိုၼ်းၶမ်းၶူဝ်းၼုင်ႈတၢင်းမႆႊတီႈၵူၼ်းဢေႇၵႅပ်ႉတုၶဝ်ဢေႃႈ။
၃၆ ထႃႇဝရႃႉၽြႃးႁႂ်ႈၶဝ်ထူပ်းၵျေးၸူးသိုဝ်ႈၼႃႈတႂ်ႈတႃၵူၼ်းဢေႇၵႅပ်ႉတုတင်းလၢႆလႄႈၶဝ်ၵေႃႈဢွၼ်ၵၼ်ပၼ်ၶဝ်ဢေႃႈ။ၼင်ႇၼၼ်လႄႈၶဝ်လႆႈဢုၵ်ႉၸႃႇၵူၼ်းဢေႇၵႅပ်ႉတုၸိူဝ်းၼၼ်ႉဢေႃႈ။
၃၇ ၵူၼ်းမဵဝ်းဢိသရေႇလၸိူဝ်းၼၼ်ႉယင်းဢမ်ႇၼပ်ႉဢၢၼ်ႇပႃးလုၵ်ႈလုၵ်ႈဢွၼ်ႇၽူႈၸၢႆးၵူၺ်းၵူၺ်းမီးႁူၵ်းသႅၼ်ၸမ်ၸမ်လႄႈဢွၼ်ၵၼ်ဢွၵ်ႇသေၵႃႈတီႈဝဵင်းရႃႇမသိတ်ႉလႄႈပႆတိၼ်ၸွမ်းတၢင်းၵႂႃႇၸူးၵႃႈတီႈသုၵုတ်ႉဢေႃႈ။
၃၈ ၵူၼ်းမဵဝ်းၼမ်ၼႃႇဢိၵ်ႇတင်းၸႃႉၸဵမ်ၽုင်သူဝ်းၽုင်ဝူဝ်းတရိၵ်ႈသၢၼ်ႇၼမ်ၼႃႇၸွမ်းၵၼ်တင်းၶဝ်ၵႂႃႇဢေႃႈ။
၃၉ ၶဝ်လႆႈဢဝ်ၶဝ်ႈမုၼ်းလိပ်းဢၼ်ဢဝ်ၵႃႈတီႈမိူင်းဢေႇၵႅပ်ႉတုမႃးၼၼ်ႉၽဝ်ႁဵတ်းၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၵွပ်ႈပိူဝ်ႈဢၼ်ၸိူဝ်ႉပႅင်ႈဢမ်ႇပႆႇလႆႈလေႃးၼၼ်ႉဢေႃႈ။လွင်ႈမၼ်းၸမ်းၵွပ်ႈပိူဝ်ႈလႆႈႁဵတ်းမၢင်ႉႁဵတ်းၽႂ်းလႆႈၶၢမ်ႇတၢင်းဢၼ်ႁေႃႈဢွၵ်ႇသေၵႃႈၼႂ်းမိူင်းဢေႇၵႅပ်ႉတုၼၼ်ႉလႄႈၶဝ်ဢမ်ႇတၼ်းမႄးႁႅၼ်းဝႆႉပုၼ်ႈဢၼ်ၶဝ်တၵ်းၵိၼ်တၵ်းၶူပ်းၼၼ်ႉဢေႃႈ။
၄၀ ပီႊမိူင်းဢၼ်ၵူၼ်းမဵဝ်းဢိသရေႇလတင်းလၢႆပဵၼ်ၶႅၵ်ႇလႄႈသွၼ်ႈပိူၼ်ႈယူႇၵႃႈၼႂ်းမိူင်းဢေႇၵႅပ်ႉတုၼၼ်ႉၸမ်းပဵၼ်သီႇပၢၵ်ႇပၢႆသၢမ်သိပ်းပီႊဢေႃႈ။
၄၁ ၼႂ်းဝၼ်းဢၼ်ပဵၼ်တီႈသုတ်ႈပီႊမိူင်းသီႇပၢၵ်ႇပၢႆသၢမ်သိပ်းၼၼ်ႉပူဝ်ႇပႃႇထႃႇဝရႃႉၽြႃးတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုၼၼ်ႉၵႂႃႇဢေႃႈ။
၄၂ ၵွပ်ႈပိူဝ်ႈမၼ်းၸဝ်ႈၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမိူဝ်ႈၶိုၼ်းၼၼ်ႉလႄႈၵူၼ်းမဵဝ်းဢိသရေႇလသိုပ်ႇသိုပ်ႇတၢမ်ႈတၢမ်ႈဢမ်ႇထၢတ်ႇတၵ်းလႆႈပႂ်ႉၶိုၼ်းၼၼ်ႉဢေႃႈ။
ၾိင်ႈပွႆးပႃသၶႃႇ
၄၃ ထႃႇဝရႃႉၽြႃးဝႆႉပိင်းၺၢပ်ႈတီႈမုဝ်းသေႇတင်းဢႃႇရုၼ်ႇလႄႈဝႃႈ၊-ၾိင်ႈပွႆးပႃသၶႃႇၸမ်းၵူၼ်းတၢင်ႇၸိူဝ်ႉတၢင်ႇၶိူဝ်းတၵ်းဢမ်ႇလႆႈၵိၼ်ပွႆးၼၼ်ႉ။
၄၄ ၵူၺ်းၵႃႈၶႃႈၵူၼ်းဢၼ်ဢဝ်ငိုၼ်းသိုဝ်ႉဢဝ်ၼၼ်ႉပေႃးၶဝ်ၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းယဝ်ႉၸိုင်တၵ်းလႆႈၵိၼ်ယူႇဢေႃႈ။
၄၅ ပဵၼ်ၵူၼ်းတၢင်ႇဝၢၼ်ႈတၢင်ႇမိူင်းလႄႈသင်ပဵၼ်ၵူၼ်းၵိၼ်ၸၢင်ႈၵိၼ်ငႃးလႄႈသင်တၵ်းဢမ်ႇလႆႈၵိၼ်။တၵ်းလႆႈၵိၼ်ၵႃႈတီႈၼ်းႁိူၼ်းဢေႃႈ။
၄၆ တၵ်းဢမ်ႇလႆႈဢဝ်ၼိူဝ်ႉမၼ်းဢွၵ်ႇၵႃႈၼွၵ်ႈႁိူၼ်း။လုပ်ႇမၼ်းၵေႃႈသူဢမ်ႇလႆႈဢဝ်ႁၵ်း။
၄၇ ပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်တၵ်းလႆႈၶၢမ်ႇပွႆးၼၼ်ႉဢေႃႈ။
၄၈ ပေႃးၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၵႃႈတီႈသူၼၼ်ႉမီးဢလူဝ်ႇၶႂ်ႈၶၢမ်ႇပွႆးပႃႇသၶႃႇပုၼ်ႈထႃႇဝရႃႉၽြႃးၸိုင်ႁႂ်ႈၵူၼ်းၸၢႆးၵႃႈဢၼ်မီးတီႈမၼ်းၼၼ်ႉတင်းသဵင်ႈတင်းလူင်ၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းတႃႉ။ဝၢႆးၼၼ်ႉယဝ်ႉၸင်ႇႁႂ်ႈၵေႃႉၼၼ်ႉသုတ်ႉၶဝ်ႈသုတ်ႉၸူးလႄႈၶၢမ်ႇပွႆးၼၼ်ႉတႃႉ။မၼ်းပဵၼ်ၸိူဝ်ႉၼင်ႇၵူၼ်းဝၢၼ်ႈၵူၼ်းမိူင်းယဝ်ႉ။ၵေႃႉဢၼ်ဢမ်ႇၶၢမ်ႇမင်ႇၵလႃႇတၢင်းဢၼ်ထိူဝ်ႁႅမ်ၼၼ်ႉဢမ်ႇလႆႈၵိၼ်ပွႆးၼၼ်ႉ။
၄၉ ၵေႃႉဢၼ်ပဵၼ်ၸိူဝ်ႉၶိူဝ်းဢၼ်လဵဝ်ၵၼ်ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၵႃႈတီႈသူၼၼ်ႉတၵ်းလႆႈမီးထုင်းၾိင်ႈဢၼ်လဵဝ်ၵၼ်ဢေႃႈ၊ဝႃႈၼင်ႇၼႆဢေႃႈ။
၅၀ ၼင်ႇၼၼ်လႄႈၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးဝႆႉပိင်းၺၢပ်ႈတီႈမုဝ်းသေႇတင်းဢႃႇရုၼ်ႇၼၼ်ႉဢေႃႈ။ၼႂ်းဝၼ်းၼၼ်ႉၵမ်းလဵဝ်ထႃႇဝရႃႉၽြႃးဢဝ်ပူဝ်ႇပႃႇၵူၼ်းမဵဝ်းဢိသရေႇလတင်းလၢႆဢွၵ်ႇသေၵႃႈၼႂ်းမိူင်းဢေႇၵႅပ်ႉတုၼၼ်ႉၵႂႃႇသေဢေႃႈ။