Chapter
၅
ႁဵတ်းဢုတ်ႈဢမ်ႇမီးၽိူင်း
၁ လိုၼ်းၼၼ်ႉမုဝ်းသေႇတင်းဢႃႇရုၼ်ႇဢွၼ်ၵၼ်ၶဝ်ႈလႄႈလဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊-ထႃႇဝရႃႉၽြႃး၊ၽြႃးပဵၼ်ၸဝ်ႈၵူၼ်းမဵဝ်းဢိသရေႇလၼၼ်ႉမီးဢမိင်ႉဝႆႉလႄႈဝႃႈၸမ်း၊-ပွႆႇၵူၼ်းၵဝ်တင်းလၢႆၵႂႃႇႁႂ်ႈၶဝ်လႆႈၶၢမ်ႇပွႆးပုၼ်ႈၵဝ်ၵႃႈတီႈၼႂ်းထိူၼ်ႇပုၼ်ႉတႃႉ၊ဝႃႈၼင်ႇၼႆဢေႃႈ။
၂ ၶုၼ်ႁေႃၶမ်းၽႃႇရေႃးၵေႃႈလၢတ်ႈလႄႈဝႃႈ၊-လွင်ႈၼင်ႇႁိုဝ်ၵဝ်တၵ်းလႆႈထွမ်ႇဢဝ်ၵႂၢမ်းထႃႇဝရႃႉၽြႃးလႄႈပွႆႇၵူၼ်းမဵဝ်းဢိသရေႇလတင်းလၢႆၵႂႃႇၼၼ်ႉၽြႃးၼၼ်ႉပဵၼ်ၽူႈလႂ်။ၵဝ်ဢမ်ႇႁူႉၽြႃးၼၼ်ႉ။ၵူၼ်းမဵဝ်းဢိသရေႇလၸိူဝ်းၼၼ်ႉၵေႃႈၵဝ်တၵ်းဢမ်ႇပွႆႇၵႂႃႇၵူၺ်း၊ဝႃႈၼင်ႇၼႆဢေႃႈ။
၃ သွင်ၶႃၵေႃႈလဝ်ႈလၢတ်ႈလႄႈဝႃႈ၊-ၽြႃးပဵၼ်ၸဝ်ႈၵူၼ်းမဵဝ်းႁေႇပႄးၼၼ်ႉႁူပ်ႉထူပ်းၵၼ်တင်းၶႃႈၸဝ်ႈႁဝ်းၸိူဝ်းၼႆႉတီႈၶႃႈယဝ်ႉ။ၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈႁဝ်းၶဝ်လႆႈၵႂႃႇၵႃႈတီႈထိူၼ်ႇပုၼ်ႉၶၢဝ်းတၢင်းသၢမ်ဝၼ်းၼိုင်ႈလႄႈပုၵ်ႉၸေႃႇယိၸ်ႉတီႈထႃႇဝရႃႉၽြႃး၊ၽြႃးပဵၼ်ၸဝ်ႈၶႃႈႁဝ်းၼၼ်ႉသေၵမ်းတီႈၶႃႈ။ပေႃးဢမ်ႇၼၼ်ၵူၼ်းမၼ်းၸဝ်ႈတၵ်းဢဝ်တင်းၽေးဢၼ်ပဵၼ်ၵႃႇလႃႉႁႃႇလႅင်ႉမိူင်း၊ၽေးလၢပ်ႇၽေးလႅဝ်းပၼ်တၢမ်ႇတီႈၶႃႈၸဝ်ႈႁဝ်းၶဝ်တီႈၶႃႈဢေႃႈ၊ဝႃႈၼင်ႇၼႆဢေႃႈ။
၄ ၶုၼ်ႁေႃၶမ်းဢေႇၵႅပ်ႉတုၵေႃႈလၢတ်ႈတီႈၶဝ်လႄႈဝႃႈ၊-မုဝ်းသေႇတင်းဢႃႇရုၼ်ႇဢိူၺ်း၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူႁဵတ်းႁႂ်ႈတၢင်းႁဵတ်းၵူၼ်းၸိူဝ်းၼႆႉထၢတ်ႇၵႂႃႇ။ဢွၼ်ၵၼ်ၵႂႃႇလႄႈသၢင်ႈႁဵတ်းၵၢၼ်တၢင်းႁဵတ်းသူဢၼ်ယၢပ်ႇၼႃႇၽိုတ်ႇၼႃႇၼၼ်ႉယူႇတႃႉ၊ဝႃႈၼင်ႇၼႆဢေႃႈ။ၵမ်းၼၼ်ႉၶုၼ်ႁေႃၶမ်းၽႃႇရေႃးသမ်ႉလၢတ်ႈထႅင်ႈလႄႈဝႃႈ၊-တူၺ်းလူႊ။ၵႃႈၼႂ်းမိူင်းၸဝ်ႈၼႆႉမီးၵူၼ်းမဵဝ်းၼၼ်ႉၼမ်ၼႃႇဢေႃႈ။
၆ သူႁဵတ်းႁႂ်ႈၶဝ်ဢမ်ႇၵိုတ်းႁၢပ်ႇၵၢၼ်တၢင်းႁဵတ်းၶဝ်ဢၼ်ယၢပ်ႇၼႃႇၽိုတ်ႇၼႃႇၼၼ်ႉလူင်ပေႇ၊ဝႃႈၼင်ႇၼႆလႄႈၼႂ်းဝၼ်းၼၼ်ႉမီးဢမိင်ႉတီႈၵူၼ်းဢၼ်ဢုပ်ႉဢၼ်ထိင်းဢိၵ်ႇတင်းၵူၼ်းဢၼ်သေႃႇဢၼ်ၵျၢပ်ႈတင်းလၢႆလႄႈဝႃႈ၊-
၇ ယႃႇပေမႅင်ႇပေပၼ်ၽိူင်းပုၼ်ႈဢၼ်ၶဝ်တၵ်းႁဵတ်းဢုတ်ႇၵႃႈၼင်ႇဢၼ်ပၼ်တီႈၶဝ်မိူဝ်ႈဢွၼ်တၢင်းၼၼ်ႉ။ႁႂ်ႈၶဝ်ၵႂႃႇႁႃဢဝ်ၽိူင်းပုၼ်ႈၶဝ်ၵူၺ်းတႃႉ။
၈ တၢင်းဢၼ်ၼပ်ႉဢၢၼ်ႇၶႅပ်းဢုတ်ႇၸမ်းတၵ်းလႆႈၸႂ်ႉၶဝ်မိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉဢေႃႈ။ယႃႇပေႁႂ်ႈယွမ်းသေဢိတ်း။ၶဝ်ၶၢၼ်ႉၶဝ်ဢိူၼ်ၼႃႇလူင်လၢင်ဢေႃႈ။ၵွပ်ႈႁွႆႈၼႆႉလႄႈၶဝ်ၸၢင်ႊႁွင်ႉသႅၼ်ႇလႄႈဝႃႈ၊-ဢွၼ်ၵၼ်ၵႂႃႇလႄႈပုၵ်ႉၸေႃႇယိၸ်ႉတီႈၽြႃးပဵၼ်ၸဝ်ႈတႃႉႁဝ်း၊ဝႃႈၼင်ႇၼႆဢေႃႈ။
၉ ပိူဝ်ႈၼႆလႄႈၵျၢပ်ႈထၢပ်ႈႁႂ်ႈၶဝ်ႁဵတ်းတႃႉ။ႁႂ်ႈၶဝ်ႁဵတ်းယၢပ်ႇယၢပ်ႇၽိုတ်ႇၽိုတ်ႇတႃႉ။ယႃႇပေႁႂ်ႈထွမ်ႇဢဝ်ၵႂၢမ်းဢၼ်ပႅတ်ႉဢၼ်လႅၼ်ၼႆႉဝႃႈၼင်ႇၼႆဢေႃႈ။
၁၀ ၵူၼ်းဢၼ်ဢုပ်ႉဢၼ်ထိင်းဢိၵ်ႇတင်းၵူၼ်းဢၼ်သေႃႇဢၼ်ၵျၢပ်ႈၸိူဝ်းၼၼ်ႉၵေႃႈဢွၼ်ၵၼ်ဢွၵ်ႇၵႂႃႇလႄႈလၢတ်ႈတီႈၵူၼ်းတင်းလၢႆလႄႈဝႃႈ၊-
၁၁ ၶုၼ်ႁေႃၶမ်းၽႃႇရေႃးမီးဢမိင်ႉဝႃႈ၊-ၵဝ်ဢမ်ႇပၼ်ၽိူင်းတီႈသူယဝ်ႉ။ဢွၼ်ၵၼ်ၵႂႃႇႁႃဢဝ်ၽိူင်းၵႃႈတီႈဢၼ်သူတၵ်းလႆႈထူပ်းၼၼ်ႉတႃႉ။ၼႂ်းဝႃႈၼၼ်သေၵေႃႈတၢင်းႁဵတ်းဢၼ်တၵ်းလႆႈႁဵတ်းၼႆႉၸိုင်ဢမ်ႇလႆႈယွမ်းသေဢိတ်းဝႃႈၼင်ႇၼႆမႃးယဝ်ႉ၊ဝႃႈၼင်ႇၼႆဢေႃႈ။
၁၂ ပိူဝ်ႈၼႆလႄႈၵူၼ်းၸိူဝ်းၼၼ်ႉၽၢတ်ႇၽေၵၼ်ၵႂႃႇၵႃႈၼႂ်းမိူင်းဢေႇၵႅပ်ႉတုၼၼ်ႉၵူႈတီႈၵူႈလႅၼ်ႁႂ်ႈလႆႈႁႃမုၼ်ႈပုၼ်ႈၽိူင်းဢေႃႈ။
၁၃ ၵူၼ်းဢၼ်ဢုပ်ႉဢၼ်ထိင်းတင်းလၢႆၵေႃႈတိုၵ်းယူင်းၶဝ်လႄႈဝႃႈ၊-ဢွၼ်ၵၼ်ႁဵတ်းႁႂ်ႈယဝ်ႉႁႂ်ႈတူဝ်ႈၸွမ်းၵႃႈၼင်ႇဢၼ်သူလႆႈႁဵတ်းၵူႈဝၼ်းၼႂ်းၶိင်ႇၵႃႇလႃႉဢၼ်လႆႈၽိူင်းၼၼ်ႉတႃႉ၊ဝႃႈၼင်ႇၼႆဢေႃႈ။
၁၄ မိူဝ်ႈၼၼ်ႉပိူၼ်ႈပေႃႉယႅၼ်ႉၵူၼ်းမဵဝ်းဢိသရေႇလဢၼ်ပဵၼ်ၵူၼ်းဢၼ်သေႃႇဢၼ်ၵျၢပ်ႈ၊ၵူၼ်းဢၼ်ဢုပ်ႉဢၼ်ထိင်းၶုၼ်ႁေႃၶမ်းၽႃႇရေႃးၶၢၼ်းဝႆႉၸိူဝ်းၼၼ်ႉလႄႈၸႅတ်ႈထၢမ်ဝႃႈ၊-ၵွပ်ႈပိဝ်ႈၸိူဝ်ႉၼင်ႇႁိုဝ်လႄႈသူဢမ်ႇႁႂ်ႈၵၢၼ်တၢင်းႁဵတ်းယဝ်ႉတူဝ်ႈဝၼ်းမိူဝ်ႈဝႃးတင်းဝၼ်းမိူဝ်ႈၼႆႉၸွမ်းၵႃႈၼင်ႇဢၼ်ႁဵတ်းမိူဝ်ႈဢွၼ်တၢင်းၼၼ်ႉဝႃႈၼင်ႇၼႆဢေႃႈ။
၁၅ မိူဝ်ႈၼၼ်ႉၵူၼ်းမဵဝ်းဢိသရေႇလဢၼ်ပဵၼ်ၵူၼ်းဢၼ်သေႃႇဢၼ်ၵျၢပ်ႈၸိူဝ်းၼၼ်ႉဢွၼ်ၵၼ်ၵႂႃႇလႄႈႁွင်ႉသႅၼ်ႇတီႈၶုၼ်ႁေႃၶမ်းၽႃႇရေႃးလႄႈဝႃႈ၊-ႁဵတ်းသင်လႄႈၸဝ်ႈႁဝ်းၸီႇယၢင်ႇတီႈၶႃႈၸဝ်ႈႁဝ်းၶဝ်ၸိူဝ်းၼႆႉၸိူဝ်ႉၼင်ႇၼႆၶႃႈ။
၁၆ ယင်းဢမ်ပၼ်ၽိူင်းတီႈၶႃႈၸဝ်ႈႁဝ်းၸိူဝ်းၼႆႉ။ၵူၼ်းဢၼ်ဢုပ်ႉဢၼ်ထိင်းတင်းလၢႆလၢတ်ႈတီႈၶႃႈၸဝ်ႈႁဝ်းၸိူဝ်းၼႆႉလႄႈဝႃႈ၊-ဢွၼ်ၵၼ်ႁဵတ်းဢုတ်ႇတႃႉ၊ဝႃႈၼင်ႇၼႆယူႇလႄႈၶႃႈၸဝ်ႈႁဝ်းၶဝ်ၸိူဝ်းၼႆႉလႆႈၶၢမ်ႇတၢင်းဢၼ်ပေႃႉဢၼ်ယႅၼ်ႉတီႈၶႃႈဢေႃႈ။ဢပျႅတ်ႈမီးယူႇၵႃႈတီႈၵူၼ်းၸဝ်ႈႁဝ်းၸိူဝ်းၼၼ်ႉၵူၺ်းတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၇ မၼ်းၸဝ်ႈၵေႃႈလၢတ်ႈလႄႈဝႃႈ၊-သူၶၢၼ်ႉသူဢိူၼ်ဢေႃႈ။ၶၢၼ်ႉဢိူၼ်ၼႃႇဢေႃႈ။ၵွပ်ႈႁွႆႈၼႆႉလႄႈသူၸင်ႇဝႃႈ၊-ဢွၼ်ၵၼ်ၵႂႃႇလႄႈပုၵ်ႉၸေႃႇယိၸ်ႉတီႈထႃႇဝရႃႉၽြႃးတႃႉႁဝ်း၊ဝႃႈၼင်ႇၼႆဢေႃႈ။
၁၈ ၵွပ်ႈပိူဝ်ႈလွင်ႈၼႆႉလႄႈတေႃႈလဵဝ်ၼႆႉဢွၼ်ၵၼ်ၵႂႃႇလႄႈႁဵတ်းတႃႉ။ဢမ်ႇလႆႈပၼ်ၽိူင်းတီႈသူယဝ်ႉ။ၵူၺ်းၵႃႈပုၼ်ႈတႃႇမၢၵ်ႇဢုတ်ႇၸိုင်သူတၵ်းလႆႈပၼ်မိူၼ်ၸိူဝ်ႉၼင်ႇၵူႈပွၵ်ႈဢေႃႈ၊ဝႃႈၼင်ႇၼႆဢေႃႈ။
၁၉ ပိူဝ်ႈဢၼ်ဢမိင်ႉၸဝ်ႈမီးလႄႈဝႃႈ၊-ပုၼ်ႈတႃႇမၢၵ်ႇဢုတ်ႇဢၼ်တၵ်းလႆႈႁဵတ်းၵူႈဝၼ်းၼၼ်ႉဢမ်ႇလႆႈယွမ်းသေဢိတ်း၊ဝႃႈၼင်ႇၼႆၼၼ်ႉလႄႈၵူၼ်းမဵဝ်းဢိသရေႇလဢၼ်ပဵၼ်ၵူၼ်းဢၼ်သေႃႇဢၼ်ၵျၢပ်ႈၸိူဝ်းၼၼ်ႉႁူႉႁၼ်လွင်ႈဢၼ်ဢမူႉၼၼ်ႉၼၵ်းၼႃႇႁွတ်ႈမႃးၵႃႈၼိူဝ်ၶဝ်ယဝ်ႉၼၼ်ႉဢေႃႈ။
၂၀ ၼႂ်းမိူဝ်ႈဢၼ်ၶဝ်ဢွၵ်ႇသေၵႃႈတီႈၶုၼ်ႁေႃၶမ်းၽႃႇရေႃးၵႂႃႇယူႇၼၼ်ႉၸိုင်ၶဝ်ထူပ်းႁၼ်မုဝ်းသေႇတင်းဢႃႇရုၼ်ႇဢၼ်ၸုၵ်းထႃႈယူႇၵႃႈတီႈသဵၼ်ႈတၢင်းၼၼ်ႉလႄႈၶဝ်လၢတ်ႈတီႈသွင်ၶႃႈလႄႈဝႃႈ၊-
၂၁ ႁႂ်ႈထႃႇဝရႃႉၽြႃးတူၺ်းသွင်ၶိူဝ်လႄႈၸီႇယၢင်ႇသေၵမ်းလူၺ်ႈ။လွင်ႈမၼ်းၸမ်းသူႁဵတ်းႁႂ်ႈၶုၼ်ႁေႃၶမ်းၽႃႇရေႃးဢိၵ်ႇတင်းၶႃႈမၼ်းၵူၼ်းမၼ်းတင်းလၢႆလီႁင်ႈႁဝ်းဢိၵ်ႇတင်းႁႂ်ႈလႆႈဢဝ်လၢပ်ႇဢဝ်လႅဝ်းသႂ်ႇဝႆႉၼႂ်းမိုဝ်းၶဝ်ႁႂ်ႈၶဝ်လႆႈဢဝ်ႁဝ်းတၢႆယဝ်ႉလူင်ပေႇ၊ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈဝႆႉၵတိတေၵႄႇၶျွတ်ႈ
၂၂ မုဝ်းသေႇၵေႃႈၶိုၼ်းၵႂႃႇၵႃႈတီႈထႃႇဝရႃႉၽြႃးလႄႈလဝ်ႈလၢတ်ႈဝႃႈ၊-ဢူဝ်းၸဝ်ႈႁဝ်း၊ႁဵတ်းႁိုဝ်လႄႈၸဝ်ႈႁဝ်းၼိၵ်ႈၸၢၵ်ႈငႅၼ်းသေးၵူၼ်းမဵဝ်းဢိသရေႇလၼႆႉၼင်ႇႁိုဝ်တီႈၶႃႈ။ႁဵတ်းႁိုဝ်လႄႈၸဝ်ႈႁဝ်းပွႆႇၸႂ်ႉၶႃႈၸဝ်ႈမႃးၼင်ႇႁိုဝ်တီႈၶႃႈ။
၂၃ ၸႃႉၸဵမ်ဝၼ်းဢၼ်ၶႃႈၸဝ်ႈၶဝ်ႈၸူးၵႃႈတီႈၶုၼ်ႁေႃၶမ်းၽႃႇရေႃးႁႂ်ႈလႆႈဢိင်ၼႃႇမႃႉၸိုဝ်သဵင်ၸဝ်ႈႁဝ်းသေလႄႈလဝ်ႈလၢတ်ႈၼၼ်ႉမၼ်းၼိၵ်ႈၸၢၵ်ႈငႅၼ်းသေးၵူၼ်းမဵဝ်းႁဝ်းတီႈၶႃႈယဝ်ႉ။ၸဝ်ႈႁဝ်းဢမ်ႇၵႄႇၶျွတ်ႈဢဝ်ၵူၼ်းၸဝ်ႈႁဝ်းတင်းလၢႆလႃးလႃးတီႈၶႃႈ၊ဝႃႈၼင်ႇၼႆဢေႃႈ။