Chapter
၃
မုဝ်းသေႇတင်းယုမ်းမႆႈၽႆး
၁ မုဝ်းသေႇၼၼ်ႉၼႂ်းမိူဝ်ႈဢၼ်မၼ်းလဵင်ႉထိင်းၽုင်သူဝ်းၽုင်ပႄႉပူႇၼၢႆးမၼ်းယေႇသရေႃႇယိတ်ႉပရေႃးႁိၵ်ႈမိူင်းမိတျၢၼ်ႇယူႇၼၼ်ႉၸိုင်မၼ်းႁေႃႈၽုင်သူဝ်းၵႂႃႇၵႃႈတီႈၽၢႆႇတၢင်းလင်ထိူၼ်ႇလႄႈႁွတ်ႈထိုင်ၵႃႈတီႈလွႆၽြႃးပဵၼ်ၸဝ်ႈဢၼ်လႆႈၸိုဝ်ႈႁေႃႇရၢပ်ႉၼၼ်ႉဢေႃႈ။
၂ မိူဝ်ႈၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးတီႈမၼ်းၵႃႈၼႂ်းပဵဝ်ၽႆးဢၼ်ဢွၵ်ႇၵႃႈၼႂ်းယုမ်းမႆႉၼၼ်ႉဢေႃႈ။
၃ မုဝ်းသေႇမုင်တူၺ်းလႄႈႁၼ်ယုမ်းမႆႉမႆႈၽႆးယူႇလႄႈယုမ်းမႆႉၼၼ်ႉဢမ်ႇမႆႈဢမ်ႇၶႅမ်ႈၼၼ်ႉၸိုင်မၼ်းလၢတ်ႈဝႃႈ၊-ၵဝ်တၵ်းဝေႈၵႂႃႇလူႈတူၺ်းရူႇပႃႇရူင်ႇဢၼ်လၢၵ်ႇလၢႆးၼႆႉ၊ဢၼ်ယုမ်းမႆႉဢမ်ႇမႆႈၶႅမ်ႈၵွပ်ႈပိူဝ်ႈၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။
၄ ထႃႇဝရႃႉၽြႃးႁၼ်လွင်ႈဢၼ်မၼ်းဝေႈၵႂႃႇလူႈတူၺ်းၼၼ်ႉၸိုင်ၽြႃးပဵၼ်ၸဝ်ႈယူႇၵႃႈၼႂ်းယုမ်းမႆႉၼၼ်ႉႁွင်ႉတီႈမၼ်းလႄႈဝႃႈ၊-မုဝ်းသေႇဢိူၺ်း၊မုဝ်းသေႇဢိူၺ်း၊ဝႃႈၼင်ႇၼႆဢေႃႈ။မၼ်းၵေႃႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈမီးယူႇတီႈၶႃႈဢေႃႈ၊ဝႃႈၼင်ႇၼႆဢေႃႈ။
၅ မၼ်းၸဝ်ႈၵေႃႈလၢတ်ႈလႄႈဝႃႈ၊-ယႃႇပေသုတ်ႉမႃးၸမ်။ထွတ်ႇၶႅပ်းတိၼ်မႂ်းတႃႉ။တီႈဢၼ်မႂ်းယဵပ်ႇယူႇၼႆႉပဵၼ်လိၼ်ဢၼ်မူတ်းၸၢင်ႇဢေႃႈ၊ဝႃႈၼင်ႇၼႆဢေႃႈ။
၆ မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊-ၵဝ်ပဵၼ်ၽြႃးပေႃႈမႂ်း၊ၽြႃးဢႃႇပႁမ်ႇ၊ၽြႃးဢိၸၢၵ်ႉ၊ၽြႃးယႃႇၵုပ်ႉ၊ၸိူဝ်းၼၼ်ႉဢေႃႈ၊ဝႃႈၼင်ႇၼႆဢေႃႈ။မုဝ်းသေႇၼၼ်ႉပိူဝ်ႈဢၼ်ဢမ်ႇႁတ်းလူႈတူၺ်းၽြႃးပဵၼ်ၸဝ်ႈလႄႈမၼ်းႁူမ်ႇၼႃႈမၼ်းဝႆႉဢေႃႈ။
၇ ထႃႇဝရႃႉၽြႃးၵေႃႈလၢတ်ႈလႄႈဝႃႈ၊-ၵဝ်လႆႈႁၼ်တၢင်းဢၼ်ၼိၵ်ႈၸၢၵ်ႈငႅၼ်းသေးဢၼ်ၵူၼ်းၵဝ်တင်းလၢႆဢၼ်မီးယူႇၵႃႈတီႈမိူင်းဢေႇၵႅပ်ႉတုလႆႈၶၢမ်ႇၼၼ်ႉလႄႈလႆႈငိၼ်းသဵင်ဢၼ်ၶဝ်ပွင်ႉၶင်းပွင်ႉမိုၼ်ႇၵွပ်ႈပိူဝ်ႈၵူၼ်းဢၼ်ဢုပ်ႉဢၼ်ထိင်းၶဝ်ၸိူဝ်းၼၼ်ႉယဝ်ႉ။လွင်ႈမၼ်းၸမ်းၵဝ်ႁူႉဝူၺ်ႇတၼႃႇတၢင်းဢၼ်ၶဝ်ၸဵပ်းၸႂ်ၼၼ်ႉယူႇဢေႃႈ။
၈ ၵဝ်လူင်းမႃးႁႂ်ႈလႆႈၵႄႇၶျွတ်ႈဢဝ်ၶဝ်သေၵႃႈၼႂ်းမိုဝ်းၵူၼ်းဢေႇၵႅပ်ႉတုတင်းလၢႆလႄႈဢဝ်ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုၵႂႃႇသူင်ႇၵႃႈတီႈမိူင်းဢၼ်လီဢၼ်ငၢမ်းဢၼ်ယႂ်ႇဢၼ်ၵႂၢင်ႈ၊ဢၼ်ၼမ်ႉၼူမ်းတင်းၼမ်ႉၽိုင်ႈၸၢင်ႊလႆယူႇတီႈၵူၼ်းၶႃႇၼၼိၵူၼ်းႁိတ်ႉတိ၊ၵူၼ်းဢႃႇမေႃးရိ၊ၵူၼ်းၽေႇရၸိ၊ၵူၼ်းႁိဝိ၊ၵူၼ်းယေႇပုသိၸိူဝ်းၼၼ်ႉယဝ်ႉ။
၉ တေႃႈလဵဝ်ၼႆႉၵေႃႈသဵင်ဢၼ်ၵူၼ်းမဵဝ်းဢိသရေႇလတင်းလၢႆႁွင်ႉသႅၼ်ႇႁွင်ႉႁႆႈၼၼ်ႉၶိုၼ်ႈႁွတ်ႈၶိုၼ်ႈထိုင်ၵႃႈတီႈၵဝ်လႄႈၵဝ်လႆႈႁၼ်လွင်ႈတၢင်းဢၼ်ၵူၼ်းဢေႇၵႅပ်ႉတုတင်းလၢႆၼိၵ်ႈၸၢၵ်ႈငႅၼ်းသေးၶဝ်ၼၼ်ႉယဝ်ႉ။
၁၀ ပိူဝ်ႈၼႆလႄႈတေႃႈလဵဝ်ၼႆႉမႂ်းၵႂႃႇတႃႉ။ၵဝ်တၵ်းပွႆႇၸႂ်ႉမႂ်းၵႂႃႇၵႃႈတီႈၶုၼ်ႁေႃၶမ်းၽႃႇရေႃးႁႂ်ႈမႂ်းလႆႈၼုၵ်ႈဢဝ်ၵူၼ်းၵဝ်ဢၼ်ပဵၼ်မဵဝ်းဢိသရေႇလၸိူဝ်းၼၼ်ႉဢွၵ်ႇသေၵႃႈၼႂ်းမိူင်းဢေႇၵႅပ်ႉတုဢေႃႈ၊ဝႃႈၼင်ႇၼႆဢေႃႈ။
၁၁ မုဝ်းသေႇၵေႃႈလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊-လွင်ႈၼင်ႇႁိုဝ်ၶႃႈၸဝ်ႈတၵ်းလႆႈၶဝ်ႈၸူးၵႃႈတီႈၶုၼ်ႁေႃၶမ်းၽႃႇရေႃးဢိၵ်ႇတင်းလွင်ႈၼင်ႇႁိုဝ်ၶႃႈၸဝ်ႈတၵ်းလႆႈၼုၵ်ႈဢဝ်ၵူၼ်းမဵဝ်းဢိသရေႇလတင်းလၢႆဢွၵ်ႇသေၵႃႈၼႂ်းမိူင်းဢေႇၵႅပ်ႉတုၼၼ်ႉၸိုင်ၶႃႈၸဝ်ႈၼႆႉပဵၼ်ၵူၼ်းၸိူဝ်ႉၼင်ႇႁိုဝ်တီႈၶႃႈ၊ဝႃႈၼင်ႇၼႆဢေႃႈ။
၁၂ မၼ်းၸဝ်ႈၵေႃႈလၢတ်ႈလႄႈဝႃႈ၊-ၵဝ်တၵ်းမီးယူႇလူၺ်ႈၵၼ်တင်းမႂ်းဢမၢၼ်ႇၶၢၼ်ပဵၼ်ဢေႃႈ။လၢၵ်ႈၶၼႃႇသၢၵ်ႈသေႇဢၼ်ၵဝ်ပွႆႇၸႂ်ႉမႂ်းၵႂႃႇၼႆႉၸမ်းမႂ်းၼုၵ်ႈဢဝ်ၵူၼ်းၸိူဝ်းၼၼ်ႉဢွၵ်ႇသေၵႃႈၼႂ်းမိူင်းဢေႇၵႅပ်ႉတုသေယဝ်ႉမႂ်းတၵ်းလႆႈႁဵတ်းဝၢတ်ႈတီႈၽြႃးပဵၼ်ၸဝ်ႈၵႃႈၼိူဝ်လွႆၼႆႉဢေႃႈ၊ဝႃႈၼင်ႇၼႆဢေႃႈ။
၁၃ မုဝ်းသေႇၵေႃႈထၢမ်တီႈၽြႃးပဵၼ်ၸဝ်ႈလႄႈဝႃႈ၊-မိူဝ်ႈဢၼ်ၶႃႈၸဝ်ႈႁွတ်ႈထိုင်ၵႃႈတီႈမဵဝ်းၵူၼ်းဢိသရေႇလတင်းလၢႆလႄႈလၢတ်ႈတီႈၶဝ်ဝႃႈ၊-ၽြႃးပဵၼ်ၸဝ်ႈပူႇမွၼ်ႇသူၼၼ်ႉပွႆႇၸႂ်ႉၵဝ်မႃးၵႃႈတီႈဢၼ်သူမီးၼႆႉယဝ်ႉ၊ဝႃႈၼင်ႇၼႆၸိုင်ၶဝ်သမ်ႉၶိုၼ်းတၵ်းထၢမ်တီႈၶႃႈလႄႈဝႃႈ၊-ၼႃႇမႃႉၸိုဝ်သဵင်မၼ်းၸဝ်ႈၼၼ်ႉပဵၼ်ၸိူဝ်ႉၼင်ႇႁိုဝ်၊ဝႃႈၼင်ႇၼႆၼၼ်ႉၸိုင်၊ၶႃႈၸဝ်ႈတၵ်းလႆႈၶိုုၼ်းလၢတ်ႈတီႈၶဝ်ၸိူဝ်ႉၼင်ႇႁိုဝ်ၶႃႈ၊ဝႃႈၼင်ႇၼႆလႄႈၽြႃးပဵၼ်ၸဝ်ႈၵေႃႈလၢတ်ႈတီႈမုဝ်းသေႇလႄႈဝႃႈ၊-
၁၄ ၵဝ်ပဵၼ်ယူႇၵႃႈၼင်ႇဢၼ်ၵဝ်ပဵၼ်ၼႆႉဢေႃႈ၊ဝႃႈၼင်ႇၼႆဢေႃႈ။မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊-ၶိုၼ်းလၢတ်ႈတီႈၵူၼ်းမဵဝ်းဢိသရေႇလၸိူဝ်းၼၼ်ႉလႄႈဝႃႈ၊-ၸဝ်ႈဢၼ်လႆႈၸိုဝ်ၵဝ်ပဵၼ်ယူႇၼၼ်ႉပွႆႇၸႂ်ႉၵဝ်မႃးၵႃႈတီႈသူၼႆႉယဝ်ႉ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၁၅ ၵမ်းၼၼ်ႉၽြႃးပဵၼ်ၸဝ်ႈသမ်ႉလၢတ်ႈတီႈမုဝ်းသေႇထႅင်ႈလႄႈဝႃႈ၊-မႂ်းတၵ်းလႆႈလၢတ်ႈတီႈၵူၼ်းမဵဝ်းဢိသရေႇလတင်းလၢႆလႄႈဝႃႈ၊-ထႃႇဝရႃႉၽြႃး၊ၽြႃးပဵၼ်ၸဝ်ႈပူႇမွၼ်ႇသူ၊ၽြႃးဢႃႇပႁမ်ႇ၊ၽြႃးဢိၸၢၵ်ႉ၊ၽြႃးယႃႇၵုပ်ႉၼၼ်ႉပွႆႇၸႂ်ႉၵဝ်မႃးတီႈဢၼ်သူမီးၼႆႉယဝ်ႉ၊ဝႃႈၼင်ႇၼႆဢေႃႈ။ဢၼ်ၼႆႉပဵၼ်လၢၵ်ႈၶၼႃႇသၢၵ်ႈသေႇၵဝ်ၵႃႈတီႈမဵဝ်းၵူၼ်းသိုပ်ႇသိုပ်ႇတၢမ်ႈတၢမ်ႈတႃႇသေႇဢမ်ႇထၢတ်ႇယဝ်ႉဢေႃႈ။
၁၆ ၵႂႃႇလႄႈႁႂ်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢိသရေႇလတင်းလၢႆၸူႉၵၼ်တုမ်ၵၼ်သေယဝ်ႉလၢတ်ႈတီႈၶဝ်လႄႈဝႃႈ၊-ထႃႇဝရႃႉၽြႃး၊ၽြႃးပဵၼ်ၸဝ်ႈပူမွၼ်ႇသူ၊ၽြႃးဢႃႇပႁမ်ႇ၊ၽြႃးဢိၸၢၵ်ႉ၊ၽြႃးယႃႇၵုပ်ႉၼၼ်ႉပေႃႇမႃးတီႈၵဝ်လႄႈလၢတ်ႈဝႃႈ၊-ၵဝ်မႃးလူႈမႃးတူၺ်းသူဢမၢၼ်ႇၶၢၼ်ပဵၼ်လႄႈႁၼ်လွင်ႈဢၼ်ၶဝ်ႁဵတ်းတီႈသူၵႃႈၼႂ်းမိူင်းဢေႇၵႅပ်ႉတုၼၼ်ႉယဝ်ႉ။
၁၇ ၵဝ်လႆႈမီးၵတိဝႃႈၵဝ်တၵ်းၼုၵ်ႈဢဝ်သူဢွၵ်ႇသေၵႃႈၼႂ်းတုၵ်ႉၶႃႉဢၼ်လႆႈၶၢမ်ႇၵႃႈတီႈမိူင်းဢေႇၵႅပ်ႉတုလႄႈဢဝ်သူၵႂႃႇသူင်ႇၵႃႈတီႈမိူင်းဢၼ်ၼမ်ႉၼူမ်းတင်းၼမ်ႉၽိုင်ႈၸၢင်ႊလႆယူႇ၊တီႈယူႇၵူၼ်းၶႃႇၼႃႉၼိ၊ၵူၼ်းႁိတ်ႉတိ၊ၵူၼ်းဢႃႇမေႃးရိ၊ၵူၼ်းၽေႇရၸိ၊ၵူၼ်းႁိဝိ၊ၵူၼ်းယေႇပုသိၸိူဝ်းၼၼ်ႉဢေႃႈ၊ဝႃႈၼင်ႇၼႆတႃႉ။
၁၈ ၶဝ်တၵ်းထွမ်ႇဢဝ်ၵႂၢမ်းမႂ်းလႄႈမႂ်းၵေႃႈတၵ်းလႆႈပႃးဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢိသရေႇလၸိူဝ်းၼၼ်ႉၶဝ်ႈၸူးၵႃႈတီႈၶုၼ်ႁေႃၶမ်းဢေႇၵႅပ်ႉတုလႄႈလဝ်ႈလၢတ်ႈလႄႈဝႃႈ၊-ထႃႇဝရႃႉၽြႃး၊ၽြႃးပဵၼ်ၸဝ်ႈၵူၼ်းမဵဝ်းႁေႇပႄးလႆႈႁူပ်ႉထူပ်းၵၼ်တင်းၶႃႈၸဝ်ႈၸိူဝ်းၼႆႉတီႈၶႃႈယဝ်ႉ။ၶႅၼ်းတေႃႈႁႂ်ႈၶႃႈၸဝ်ႈၸိူဝ်းၼႆႉလႆႈၵႂႃႇၵႃႈၼႂ်းထိူၼ်ႇပုၼ်ႉၶၢဝ်းတၢင်းသၢမ်ဝၼ်းၼိုင်ႈႁႂ်ႈလႆႈပုၵ်ႉၸေႃႇယိၸ်ႉတီႈထႃႇဝရႃႉၽြႃး၊ၽြႃးပဵၼ်ၸဝ်ႈၶႃႈၸဝ်ႈႁဝ်းၼႆႉၼၼ်ႉသေၵမ်းတီႈၶႃႈ၊ဝႃႈၼင်ႇၼႆတႃႉ။
၁၉ ၵူၺ်းၵႃႈၵဝ်ႁူႉလွင်ႈဢၼ်ပိၵ်ႉသမ်ႉၶုၼ်ႁေႃၶမ်းဢေႇၵႅပ်ႉတုလႆႈထူပ်းလႆႈႁၼ်တၼ်းၶူဝ်းဢၼ်ယႂ်ႇၼႃသေၵေႃႈမၼ်းတၵ်းဢမ်ႇပၼ်ဢၶႂၢင်ႉႁႂ်ႈသူလႆႈၵႂႃႇၼၼ်ႉ။
၂၀ ၵဝ်တၵ်းယိုၼ်းမိုဝ်းၵဝ်သေလႄႈဢဝ်တင်းလွင်ႈတၢင်းဢၼ်လီဢၢမ်းတင်းလၢႆၵႃႈဢၼ်ၵဝ်တၵ်းႁဵတ်းၵႃႈၼႂ်းမိူင်းၼၼ်ႉၵူႈၸိူဝ်ႉၵူႈပိူင်ၼၼ်ႉလႄႈပၼ်တၢမ်ႇတီႈမိူင်းဢေႇၵႅပ်ႉတုၼၼ်ႉဢေႃႈ။
၂၁ ဝၢႆးၼၼ်ႉၸင်ႇမၼ်းတၵ်းပွႆႇသူဢေႃႈ။ၵဝ်တၵ်းႁႂ်ႈၵူၼ်းမဵဝ်းၼၼ်ႉလႆႈၼႃႈလႆႈတႃၵႃႈတီႈၵူၼ်းဢေႇၵႅပ်ႉတုတင်းလၢႆလႄႈမိူဝ်ႈဢၼ်သူဢွၵ်ႇၵႂႃႇၼၼ်ႉၸိုင်သူဢမ်ႇလႆႈဢွၵ်ႇၵႂႃႇတိၼ်လၢႆမိုဝ်းပဝ်ႇ။
၂၂ လွင်ႈမၼ်းၸမ်းၽူႈယိင်းၵူႈၵေႃႉတၵ်းလႆႈယွၼ်းဢဝ်ၶိူင်ႈငိုၼ်းၶိူင်ႈၶမ်းတင်းၶိူင်ႈၼုင်ႈတၢင်းမႆႊၵႃႈတီႈၵူၼ်းႁိူၼ်းၸမ်ၵၼ်ဢိၵ်ႇတင်းၵႃႈတီႈၵေႃႉဢၼ်သွၼ်ႈပိုင်ႈႁိူၼ်းမၼ်းယူႇၼၼ်ႉလႄႈႁၢင်ႈၶိူင်ႈပၼ်တီႈလုၵ်ႈၸၢႆးသူလုၵ်ႈယိင်းသူတင်းလၢႆသေယဝ်ႉႁိမ်ႁုင်ဢဝ်ဢုၵ်ႉၸႃႇၶူဝ်းလဵင်းၵူၼ်းဢေႇၵႅပ်ႉတုတင်းလၢႆဢေႃႈ၊ဝႃႈၼင်ႇၼႆဢေႃႈ။