Chapter
၆
၁ ထႃႇဝရႃႉၽြႃးၵေႃႈလၢတ်ႈတီႈမုဝ်းသေႇလႄႈဝႃႈ၊-လွင်ႈဢၼ်ၵဝ်တၵ်းႁဵတ်းတီႈၶုၼ်ႁေႃၶမ်းၽႃႇရေႃးၸိူဝ်ႉၼင်ႇႁိုဝ်ၼၼ်ႉၸိုင်တေႃႈလဵဝ်ၼႆႉမႂ်းတၵ်းႁူႉဢေႃႈ။မၼ်းတၵ်းဢဝ်တင်းမိုဝ်းမၼ်းဢၼ်ႁႅင်းယႂ်ႇၼႃႇလႄႈပွႆႇၵူၼ်းၵဝ်တင်းလၢႆဢေႃႈ။မၼ်းတၵ်းဢဝ်တင်းမိုဝ်းမၼ်းဢၼ်ႁႅင်းယႂ်ႇၼႃႇလႄႈႁေႃႈၶဝ်ဢွၵ်ႇသေၵႃႈၼႂ်းမိူင်းမၼ်းဢေႃႈ၊ဝႃႈၼင်ႇၼႆဢေႃႈ။
၂ ၵမ်းၼၼ်ႉၽြႃးပဵၼ်ၸဝ်ႈသမ်ႉဝႆႉပျႃႇတိၵ်ႈတီႈမုဝ်းသေႇလႄႈဝႃႈ၊-ၵဝ်ပဵၼ်ထႃႇဝရႃႉၽြႃးဢေႃႈ။ၵဝ်ဢဝ်တင်းၼႃႇမႃႉၸိုဝ်သဵင်ၽြႃးပဵၼ်ၸဝ်ႈၸဝ်ႈဢၼၼ်ႇတႃႉတၼ်းၶူဝ်းၵူၺ်းလႄႈပေႃႇမႃးတီႈဢႃႇပႁမ်ႇ၊ဢိၸၢၵ်ႉတင်းယႃႇၵုပ်ႉဢေႃႈ။
၃ ၵူၺ်းၵႃႈဢဝ်တင်းၼႃႇမႃႉၸိုဝ်ႈသဵင်ထႃႇဝရႃႉၽြႃးလႄႈၶဝ်ဢမ်ႇႁူႉၸၵ်းၵဝ်ဢေႃႈ။
၄ လွင်ႈၼင်ႇႁိုဝ်တၵ်းလႆႈဢဝ်မိူင်းၶႃႇၼၢၼ်ႇ၊မိူင်းဢၼ်ၶဝ်သွၼ်ႈပိုင်ႈလႄႈပဵၼ်ၶႅၵ်ႇယူႇၼၼ်ႉပၼ်တီႈၶဝ်ၸိုင်ၵဝ်ႁႂ်ႈပတိၺိၼ်ႇဢၼ်ၵဝ်ႁဵတ်းလူၺ်ႈၵၼ်တင်းၶဝ်ဝႆႉၼၼ်ႉတႄႇဝႆႉယူႇယဝ်ႉ။
၅ ၵဝ်လႆႈငိၼ်းသဵင်ပွင်ႉသဵင်ၶင်းၵူၼ်းမဵဝ်းဢိသရေႇလဢၼ်ၵူၼ်းဢေႇၵႅပ်ႉတုတင်းလၢႆႁႂ်ႈၶၢမ်ႇႁဵတ်းၶႃႈၼၼ်ႉယဝ်ႉ။ပတိၺိၼ်ၵဝ်ၵေႃႈၵဝ်ၶုၵ်းၸႂ်လႆႈၶႆႈၸႂ်ထူပ်းယဝ်ႉ။
၆ ပိူဝ်ႈၼႆလႄႈၵႂၢမ်းဢၼ်မႂ်းတၵ်းလႆႈလၢတ်ႈတီႈၵူၼ်းမဵဝ်းဢိသရေႇလၸမ်း၊-ၵဝ်ပဵၼ်ထႃႇဝရႃႉၽြႃးဢေႃႈ။ၵဝ်တၵ်းပွႆႇသူလွတ်ႈသေၵႃႈၼႂ်းတၢင်းႁဵတ်းၵူၼ်းဢေႇၵႅပ်ႉတုဢၼ်ယၢပ်ႇၼႃႇၽိုတ်ႇၼႃႇလႄႈၼုၵ်ႈဢဝ်သူၵႃႈၼႂ်းတၢင်းဢၼ်ၶဝ်ၼိၵ်ႈၸၢၵ်ႈငႅၼ်းသေးၼၼ်ႉဢေႃႈ။ၵဝ်တၵ်းဢဝ်တင်းတၢင်းဢၼ်ယိုၼ်ႈၶႅၼ်ယိုၼ်ႈမိုဝ်းဢိၵ်ႇတင်းတၢင်းဢၼ်ပၼ်တၢမ်ႇဢၼ်ယႂ်ႇၼႃႇၼၼ်ႉလႄႈထုတ်ႇဢဝ်သူဢေႃႈ။
၇ ၵဝ်တၵ်းသိမ်းဢဝ်သူႁႂ်ႈသူလႆႈပဵၼ်မဵဝ်းၵူၼ်းၵဝ်ဢေႃႈ။ၵဝ်တၵ်းပဵၼ်ၽြႃးပဵၼ်ၸဝ်ႈသူဢေႃႈ။သူတၵ်းလႆႈႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃး၊ၽြႃးပဵၼ်ၸဝ်ႈသူဢၼ်ပွႆႇသူလွတ်ႈသေၵႃႈၼႂ်းၵၢင်တၢင်းႁဵတ်းၵူၼ်းဢေႇၵႅပ်ႉတုဢၼ်ယၢပ်ႇၼႃႇၽိုတ်ႇၼႃႇၼၼ်ႉဢေႃႈ။
၈ ၵဝ်တၵ်းဢဝ်သူၵႂႃႇသူင်ၵႃႈတီႈမိူင်းဢၼ်ၵဝ်ယုၵ်ႉမိုဝ်းလႄႈဝႃႈတၵ်းပၼ်တီႈဢႃႇပႁမ်ႇဢိၸၢၵ်ႉတင်းယႃႇၵုပ်ႉၼၼ်ႉဢေႃႈ၊ဝႃႈၼင်ႇၼႆဝႆႉၼၼ်ႉလႄႈပၼ်ပုၼ်ႈဢၼ်သူတၵ်းၶၢမ်ႇဢမူၺ်ႇဢေႃႈ။ၵဝ်ပဵၼ်ထႃႇဝရႃႉၽြႃးယဝ်ႉ၊ဝႃႈၼင်ႇၼႆဢေႃႈ။
၉ ပိၵ်ႉသမ်ႉမုဝ်းသေႇၶိုၼ်းလၢတ်ႈတီႈၵူၼ်းမဵဝ်းဢိသရေႇလၸိူဝ်ႉၼင်ႇၼၼ်သေၵေႃႈၵွပ်ႈပိူဝ်ႈဢၼ်ၶဝ်လႆႈၶၢမ်ႇတၢင်းဢၼ်ယၢပ်ႇၸႂ်ၽိုတ်ႇၸႂ်ဢိၵ်ႇတင်းတၢင်းဢၼ်ၼိၵ်ႈၸၢၵ်ႈငႅၼ်းသေးဢၼ်ၵျၢမ်းၼႃႇၼၼ်ႉလႄႈၶဝ်ယင်းဢမ်ႇထွမ်ႇဢမ်ႇၵႂၢမ်းမုဝ်းသေႇလႄႈယူႇဢေႃႈ။
၁၀ ထႃႇဝရႃႉၽြႃးၵေႃႈမီးဢမိင်ႉတီႈမုဝ်းသေႇလႄႈဝႃႈ၊-မႂ်းၶဝ်ႈၸူးၵႃႈတီႈၶုၼ်ႁေႃၶမ်းမိူင်းဢေႇၵႅပ်ႉတုၼၼ်ႉလႄႈ
၁၁ လဝ်ႈလၢတ်ႈလွင်ႈဢၼ်မၼ်းတၵ်းလႆႈပွႆႇၵူၼ်းမဵဝ်းဢိသရေႇလလွတ်ႈသေၵႃႈၼႂ်းမိူင်းမၼ်းၼၼ်ႉတႃႉ၊ဝႃႈၼင်ႇၼႆဢေႃႈ။
၁၂ မုဝ်းသေႇၵေႃႈလဝ်ႈလၢတ်ႈၵႃႈတီႈၽၢႆႇၼႃႈထႃႇဝရႃႉၽြႃးလႄႈဝႃႈ၊-ၵူၼ်းမဵဝ်းဢိသရေႇလဢမ်ႇထွမ်ႇဢမ်ႇဢဝ်ၵႂၢမ်းၶႃႈၸဝ်ႈလၢတ်ႈၼၼ်ႉတီႈၶႃႈ။ပိူဝ်ႈၼႆလႄႈၶုၼ်ႁေႃၶမ်းၽႃႇရေႃးတၵ်းထွမ်ႇဢဝ်ၵႂၢမ်းၶႃႈၸဝ်ႈဢၼ်ၸၢင်ႊဢဝ်သူပ်းဢၼ်ဢမ်ႇမီးတၢင်းဢၼ်ထိူဝ်ႁိမ်းလၢတ်ႈၼႆႉၸိူဝ်ႉၼင်ႇႁိုဝ်ၶႃႈ၊ဝႃႈၼင်ႇၼႆဢေႃႈ။
ၸိူဝ်ႉၶိူဝ်းမုဝ်းသေႇတင်းဢႃႇရုၼ်ႇ
၁၃ ၵူၺ်းၵႃႈထႃႇဝရႃႉၽြႃးသင်ႇလၢတ်ႈတီႈမုဝ်းသေႇတင်းဢႃႇရုၼ်ႇလွင်ႈဢၼ်ၶဝ်တၵ်းလႆႈၼုၵ်ႈဢဝ်ၵူၼ်းမဵဝ်းဢိသရေႇလတင်းလၢႆဢွၵ်ႇသေၵႃႈၼႂ်းမိူင်းဢေႇၵႅပ်ႉတုၼၼ်ႉသေလႄႈပွႆႇၸႂ်ႉသွင်ၶႃၵႂႃႇၸူးၵႃႈတီႈၵူၼ်းမဵဝ်းဢိသရေႇလၸိူဝ်းၼၼ်ႉဢိၵ်ႇတင်းၶုၼ်ႁေႃၶမ်းၽႃႇရေႃးဢေႃႈ။
၁၄ ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းပီႈၼွင်ႉၸိူဝ်ႉၶိူဝ်းဢိသရေႇလၸိူဝ်းၼၼ်ႉၸမ်း၊ပဵၼ်လုၵ်ႈၸၢႆးရုပိၼ်ႇတင်းလၢႆဢၼ်ပဵၼ်လုၵ်ႈတူၼ်ႈဢိသရေႇလၼၼ်ႉၸမ်းပဵၼ်ႁႃႇၼုတ်ႉ၊ၽႃႇလု၊ႁေႇၸရုၼ်ႇတင်းၵႃႇမိဢေႃႈ။ၶဝ်ၸိူဝ်းၼႆႉပဵၼ်မဵဝ်းၸိူဝ်ႉၶိူဝ်းရုပိၼ်ႇၶေႃၶေႃႁင်းၽႂ်ႁင်းမၼ်းဢေႃႈ။
၁၅ လုၵ်ႈၸၢႆးသိမုၼ်ႇၸိူဝ်းၼၼ်ႉၸမ်းပဵၼ်ယမူၺ်ႇလ၊ယႃႇမိၼ်ႇ၊ဢေႃႇႁတ်ႉ၊ယႃႇၶိၼ်ႇ၊ၸေႃႇႁႃႇတင်းသေႃႇလဢၼ်ပဵၼ်လုၵ်ႈၸၢႆးမေႈယိင်းမဵဝ်းၶႃႇၼၢၼ်ႇၼၼ်ႉဢေႃႈ။ၶဝ်ၸိူဝ်းၼႆႉပဵၼ်မဵဝ်းၸိူဝ်းၶိူဝ်းသိမုၼ်ႇၶေႃၶေႃႁင်းၽႂ်ႁင်းမၼ်းဢေႃႈ။
၁၆ လုၵ်ႈၸၢႆးလေႇဝိဢၼ်ၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းၸိူဝ်းၼၼ်ႉၸမ်းပဵၼ်ၵေႇရသုၼ်ႇ၊ၵေႃႇႁတ်ႉတင်းမေႇရႃႇရိဢေႃႈ။လေႇဝိဢသၢၵ်ႈလိပ်းပၢၵ်ႇသၢမ်သိပ်းပၢႆၸဵတ်းပီႊဢေႃႈ။
၁၇ လုၵ်ႈၸၢႆးၵေႇရသုၼ်ႇဢၼ်ၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းၼၼ်ႉၸမ်းပဵၼ်လိပၼိတင်းသိမိဢေႃႈ။
၁၈ လုၵ်ႈၸၢႆးၵေႃႇႁတ်ႉၸမ်းပဵၼ်ဢႃႇမရမ်ႇ၊ဢိသႁႃႇ၊ႁေႇပုၼ်ႇတင်းဢေႃႇၸေႇလဢေႃႈ။ၵေႃႇႁတ်ႉဢသၢၵ်ႈလိပ်းပၢၵ်ႇပၢႆသၢမ်သိပ်းပၢႆသၢမ်ပီႊဢေႃႈ။
၁၉ လုၵ်ႈၸၢႆးမေႇရႃႇရိၸမ်းပဵၼ်မႁႃႇလိတင်းမုသိဢေႃႈ။ၶဝ်ၸိူဝ်းၼႆႉပဵၼ်ၸိူဝ်ႉၶိူဝ်းလေႇဝိၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းၼၼ်ႉဢေႃႈ။
၂၀ ဢႃႇမရမ်ႇပဵၼ်ႁိူၼ်းပဵၼ်ယေးလူၺ်ႈၵၼ်တင်းတေႃႇၶေႇပိတ်ႉဢၼ်ပဵၼ််ၼွင်ႉယိင်းပေႃႈမၼ်းၼၼ်ႉလႄႈၵိူတ်ႇလဵင်ႉမႃးဢႃႇရုၼ်ႇတင်းမုဝ်းသေႇဢေႃႈ။
၂၁ ဢႃႇမရမ်ႇဢသၢၵ်ႈလိပ်းပၢၵ်ႇပၢႆသၢမ်သိပ်းပၢႆၸဵတ်းပီႊဢေႃႈ။
၂၂ လုၵ်ႈၸၢႆးဢိသႁႃႇၸမ်းပဵၼ်ၵေႃႇရ၊ၼေႇၽိတ်ႉတင်းၸိၶရိဢေႃႈ။လုၵ်ႈၸၢႆးဢေႃႇၸေႇလၸမ်းပဵၼ်မိသေႇလ၊ဢေႇလၸႃႇၽၢၼ်ႇတင်းသိသရိဢေႃႈ။
၂၃ ဢႃႇရုၼ်ႇၼၼ်ႉပဵၼ်ႁိူၼ်းပဵၼ်ယေးလူၺ်ႈၵၼ်တင်းဢေႇလိသၽလုၵ်ႈယိင်းဢမိၼတပ်ႉ၊ၼွင်ႉယိင်းၼႃႇသုၼ်ႇလႄႈမၼ်းၼၼ်ႉၵိူတ်ႇလဵင်ႉၼႃႇတၢပ်ႉဢၽိရု၊ဢေႇလႃႇၸႃႇတင်းဢိသမႃႇၸိူဝ်းၼၼ်ႉမႃးဢေႃႈ။
၂၄ လုၵ်ႈၸၢႆးၵေႃႇရၸမ်းပဵၼ်ဢတ်ႉသိရ၊ဢေႇလၵႃႇၼတင်းဢပျႃႇသပ်ႉဢေႃႈ။ၶဝ်ၸိူဝ်းၼႆႉၸမ်းပဵၼ်မဵဝ်းၸိူဝ်ႉၶိူဝ်းၵေႃႇရၶေႃၶေႃႁင်းၽႂ်ႁင်းမၼ်းဢေႃႈ။
ဢေႇလႃႇၸႃႇလုၵ်ႈၸၢႆးဢႃႇရုၼ်ႇၼၼ်ႉပဵၼ်ႁိူၼ်းပဵၼ်ယေးလူၺ်ႈၵၼ်တင်းလုၵ်ႈယိင်းပုတေႇလၵေႃႉၼိုင်ႈလႄႈၵိူတ်ႇလဵင်ႉမႃးၽိၼႁတ်ႉဢေႃႈ။ၶဝ်ၸိူဝ်းၼႆႉပဵၼ်ၵူၼ်းဢၼ်ႁဵတ်းၵႄႇႁဵတ်းႁူဝ်ၼႂ်းၸိူဝ်ႉၶိူဝ်းလေႇဝိၸွမ်းလူၺ်ႈၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်းၼၼ်ႉဢေႃႈ။
၂၆ ၶဝ်ၸိူဝ်းဢၼ်ၶၢမ်ႇဢဝ်ၵႂၢမ်းဢၼ်ထႃႇဝရႃႉၽြႃးမီးဢမိင်ႉဝႃႈ၊-ၼုၵ်ႈဢဝ်ၵူၼ်းမဵဝ်းဢိသရေႇလတင်းလၢႆဢွၵ်ႇသေၵႃႈၼႂ်းမိူင်းဢေႇၵႅပ်ႉတုတႃႉ၊ဝႃႈၼင်ႇၼႆၼၼ်ႉပဵၼ်ဢႃႇရုၼ်ႇတင်းမုဝ်းသေႇဢေႃႈ။
၂၇ ၶဝ်ၸိူဝ်းဢၼ်လႆႈလဝ်ႈလၢတ်ႈတီႈၽႃႇရေႃး၊ၶုၼ်ႁေႃၶမ်းမိူင်းဢေႇၵႅပ်ႉတုႁႂ်ႈလႆႈၼုၵ်ႈဢဝ်ၵူၼ်းမဵဝ်းဢိသရေႇလတင်းလၢႆဢွၵ်ႇသေၵႃႈၼႂ်းမိူင်းဢေႇၵႅပ်ႉတုၼၼ်ႉၸမ်းပဵၼ်မုဝ်းသေႇတင်းဢႃႇရုၼ်ႇဢေႃႈ။
ဢႃႇရုၼ်ႇတလေၢတ်ႈတေႃႇမုဝ်းသေႇ
၂၈ ၼႂ်းဝၼ်းဢၼ်ထႃႇဝရႃႉၽြႃးဝႆႉပျႃႇတိၵ်ႈတီႈမုဝ်းသေႇၵႃႈၼႂ်းမိူင်းဢေႇၵႅပ်ႉတုၼၼ်ႉၸမ်း၊ထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈ၊-ၵဝ်ပဵၼ်ထႃႇဝရႃႉၽြႃးဢေႃႈ။
၂၉ ၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈမႂ်းၼႆႉၼၼ်ႉၸိုင်မႂ်းတၵ်းလႆႈၶိုၼ်းလၢတ်ႈတီႈၶုၼ်ႁေႃၶမ်းၽႃႇရေႃးဢေႃႈ၊ဝႃႈၼင်ႇၼႆဢေႃႈ။
၃၀ မုဝ်းသေႇၵေႃႈလဝ်ႈလၢတ်ႈၵႃႈတီႈၽၢႆႇၼႃႈထႃႇဝရႃႉၽြႃးလႄႈဝႃႈ၊-တူၺ်းတီႈၶႃႈလူႊ။ၶႃႈၸဝ်ႈမီးသူပ်းဢၼ်ဢမ်ႇမီးတၢင်းဢၼ်ထိူဝ်ႁိမ်းလႄႈၶုၼ်ႁေႃၶမ်းၽႃႇရေႃးတၵ်းထွမ်ႇဢဝ်ၵႂၢမ်းၶႃႈၸဝ်ႈၸိူဝ်ႉၼင်ႇႁိုဝ်ၶႃႈ၊ဝႃႈၼင်ႇၼႆဢေႃႈ။