၁
ဢဵၼ်းဢၢၼ်းလႄႈႁူဝ်ၵႂၢမ်း
၁ ၵႂၢမ်းသုၵ်ႉတၢမ်ႇဢၼ်သေႃးလမုၼ်ႇ ဢၼ်ပဵၼ်လုၵ်ႈၸၢႆးတႃႇဝိတ်ႉ ဢၼ်ပဵၼ်ၶုၼ်ႁေႃၶမ်းယေႇရုသလႅမ်ႇ
၂ ၸီႇယၢင်ႇဝႆႉႁႂ်ႈႁူႉပိင်ႇၺႃႇတြႃး ဢိၵ်ႇတင်းၼႄးဢူႉပတေႇတြႃး၊ႁႂ်ႈႁူႉၸႅင်ႈၵႂၢမ်းၺၢၼ်ႇ၊ ႁႂ်ႈၶၢမ်ႇဢဝ်တၢင်း ဢၼ်သင်ႇသွၼ်ႇဢဝ်ပိင်ႇၺႃႇ
၃ ႁႂ်ႈတၢင်းဢၼ်ၵမ်ၵျၢင်ႉသိုဝ်ႈသိုဝ်ႈတေႃႇတေႃႇ၊ ႁႂ်ႈတၢင်းဢၼ်ၸီႇယၢင်ႇၸွမ်း ၼင်ႇတြႃးဢိၵ်ႇတင်း
၄ တၢင်းဢၼ်သိုဝ်ႈလီရူဝ်းလီႁႂ်ႈပၼ်တၢင်းဢၼ်လၵ်း ဢၼ်လႅမ်တီႈၶဝ်ၸိူဝ်းဢၼ် ငိူဝ်ႈဢၼ်ငႃႉ
၅ ႁႂ်ႈတၢင်းဢၼ်ႁူႉဢၼ်ၸႅင်ႈတင်းသတိတီႈၶဝ်ၸိူဝ်းဢၼ်ၼုမ်ႇဢၼ်ၵမ်၊ ႁႂ်ႈလွင်ႈၼင်ႇႁိုဝ်ၵေႃႉ ဢၼ်မီးပိင်ႇၺႃႇၼၼ်ႉ
၆ တၵ်းထွမ်ႇငိၼ်းလႄႈဢတၢတ်ႈပိင်ႇၺႃႇမၼ်း တၵ်းမေႃၸၢင်ႊတၢင်းဢၼ်ၸီႇယၢင်ႇႁၢင်ႈပွင် ႁႂ်ႈလႆႈႁွတ်ႈထိုင်တၢင်းဢၼ်ႁူႉၸႅင်ႈဢၼၢၵ်ႈဢထိၵ်ႈပႄႇၵႂၢမ်းသုၵ်ႉတၢမ်ႇ တင်းၵႂၢမ်းဢၼ်ငမ်းငဝ်းဝႆႉဢိၵ်ႇတင်းၵႂၢမ်းၵူၼ်းပိင်ႇၺႃႇသိ တင်းတၢင်းဢၼ် လိုၵ်ႉဢၼ်လမ်ႇ
၇ ၸိူဝ်းၼၼ်ႉၸမ်းသၽေႃးတၢင်းဢၼ်ၵူဝ်ႁႄထႃႇဝရႃႉၽြႃးၼၼ်ႉ ပဵၼ်ၵေႃႇၸႃႉႁူဝ်ပိုင်းပိင်ႇၺႃႇလႄႈ ၶဝ်ၸိူဝ်းဢၼ်မိူၵ်ႈၼၼ်ႉၸၢင်ႊႁဵတ်းဢမ်ႇပေႃးၼင်ႇႁိုဝ်တီႈၺၢၼ်ႇ ဢိၵ်ႇတင်းတၢင်းဢၼ်သင်ႇသွၼ်သုင်းမႃႉၼၼ်ႉဢေႃႈ။
ပၼ်သတိလွင်ႈတၢင်းဢၼ်ၸူဝ်းဢဝ်
၈ လုၵ်ႈၸၢႆးၵဝ်ဢိူၺ်း။ထွမ်ႇဢဝ်တၢင်းဢၼ်ပေႃႈမႂ်းသင်ႇသွၼ်ႇပၼ်ၼၼ်ႉလႄႈ ယႃႇပေၸုၼ်ႉပႅတ်ႈတြႃး မေႈမႂ်း။
၉ ၸိူဝ်းၼၼ်ႉတၵ်းပဵၼ်ပၢၼ်းၵုမ်းဢၼ်ႁၢင်ႊလီၵႃႈတီႈႁူဝ်မႂ်းလႄႈ ပဵၼ်တၢင်းဢၼ်ႁွႆႈၶေႃးၵႃႈတီႈၶေႃးမႂ်းဢေႃႈ။
၁၀ လုၵ်ႈၸၢႆးၵဝ်ဢိူၺ်း။ပေႃးၶဝ်ၸိူဝ်းဢၼ်ႁုၵ်ႉဢၼ်ႁၢႆႉၼၼ်ႉၸူဝ်းဢၼ်မႂ်းၸိုင်ယႃႇပေႁပ်ႉတုင်းဢဝ်။
၁၁ ပေႃးၶဝ်လၢတ်ႈလႄႈဝႃႈ၊- ၸွမ်းလူၺ်ႈၵၼ်တင်းႁဝ်းတႃႉ။ဢွၼ်ၵၼ်ပႂ်ႉထႃႈယူႇ ႁႂ်ႈလႆႈထွၵ်ႇလိူတ်ႈပိူၼ်ႈပႅတ်ႈတႃႉႁဝ်း။ႁဝ်းဢွၼ်ၵၼ်ပႂ်ႉလွမ်ပႂ်ႉတူၺ်းၶဝ်ၸိူဝ်းဢၼ်ဢမ်ႇ မီးဢပျႅတ်ႈၼၼ်ႉတႃႉႁဝ်း။
၁၂ ႁဝ်းဢွၼ်ၵၼ်ဢိုၼ်ၵိၼ်ၶဝ်ၸိူဝ်းဢၼ်ဢသၢၵ်ႈလိပ်းၼၼ်ႉ မိူၼ်ၸိူဝ်ႉၼင်ႇမိူင်းမရၼႃႉဢုၼ်ၶဝ်၊ မိူၼ်ၸိူဝ်ႉၼင်ႇၶဝ်တူၵ်းလူင်းၵႂႃႇၵႃႈၼႂ်း ၶုမ်ပႃႇႁဵဝ်ႈၼၼ်ႉတႃႉႁဝ်း။
၁၃ ႁဝ်းတၵ်းထူပ်းႁၼ်ၽၼ်ႇတႃႇဢၼ်ထိူၵ်ႈၵႃႈထိူၵ်ႈၶၼ်ၵူႈၸိူဝ်ႉၵူႈပိူင်လႄႈ တၵ်းႁႂ်ႈႁိူၼ်းႁဝ်းၼမ်ၵိုၼ်းတဵမ်ဝႆႉတင်းၶွင်ၶူဝ်းဢၼ်ႁိမ်ႁူင်ႇဢဝ်လႆႈၼၼ်ႉတႃႉႁဝ်း။
၁၄ ႁဵတ်းၵေႃႉႁဵတ်းသေႈႁူမ်ႈလူၺ်ႈၵၼ်တင်းႁဝ်းတႃႉ။ႁဝ်းတင်းသဵင်ႈတင်းလူင်တၵ်းလႆႈႁူမ်ႈၵၼ်မီးထူင်ငိုၼ်း လုၵ်ႈလဵဝ်ၵၼ်ဢေႃႈ၊ဝႃႈၼင်ႇၼႆၸိုင်၊လုၵ်ႈၸၢႆးၵဝ်ဢိူၺ်း၊ ယႃႇပေၸွမ်း သဵၼ်ႈတၢင်းလူၺ်ႈၵၼ်တင်းၶဝ်ၼၼ်ႉ။
၁၅ ယႃႇပေပၼ်ဢၶႂၢင်ႉႁႂ်ႈတိၼ်မႂ်း လႆႈၸွမ်းသဵၼ်ႈတၢင်းဢၼ်ၶဝ်ၵႂႃႇ ၼၼ်ႉ။
၁၆ လွင်ႈမၼ်းၸမ်းတိၼ်ၶဝ်ၼၼ်ႉၶုၼ်ႇလႅၼ်ႈၸူးတူႉၸရိူၵ်ႈလႄႈ ၶၼ်ၽႂ်းႁႂ်ႈလႆႈထွၵ်ႇလိူတ်ႈပိူၼ်ႈပႅတ်ႈဢေႃႈ။
၁၇ တၢင်းဢၼ်ၶဝ်ၵီႈၽႄၶေၶဝ်ဝႆႉၵႃႈတီႈသိုဝ်ႈၼႃႈတႂ်ႈတႃၼူၵ်ႉတင်းလၢႆလႄႈ ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢမၢၼ်ႇၶၢၼ်ပဵၼ်ဢေႃႈ။
၁၈ ၶဝ်ၼၼ်ႉ ဢွၼ်ၵၼ်ပႂ်ႉထႃႈယူႇႁႂ်ႈလႆႈထွၵ်ႇလိူတ်ႈတူဝ်ၸဝ်ႈၵဝ်ႇပႅတ်ႈၵူၺ်းလႄႈ ပႂ်ႉလွမ်ပႂ်ႉတူၺ်းယူႇႁႂ်ႈလႆႈ ဢဝ်ဢသၢၵ်ႈတူဝ်ၸဝ်ႈၵဝ်ႇတၢႆၵူၺ်းဢေႃႈ။
၁၉ ဢၵျူဝ်းၶဝ်ၸိူဝ်းဢၼ်ႁႃဢဝ်ၸီးပွႃး ဢၼ်ဢမ်ႇတြႃးတင်းသဵင်ႈတင်းလူင်ၼၼ်ႉပဵၼ်ၸိူဝ်ႉၼင်ႇၼၼ်လႄႈၸီးပွႃးၼၼ်ႉ ၸၢင်ႊသိမ်းဢဝ်ဢသၢၵ်ႈၸဝ်ႈမၼ်းဢေႃႈ။
ပၼ်သတိလွင်ႈတၢင်းဢၼ်ထဵင်ပႅတ်ႈၺၢၼ်ႇ
၂၀ ၺၢၼ်ႇ ႁွင်ႉပၢဝ်ႇယူႇၵႃႈတီႈၼွၵ်ႈတီႈပၢင်ႇလႄႈ ႁွင်ႉၵိဝ်သဵင်ၵႂၢမ်းမၼ်းယူႇ ၵႃႈၼႂ်းသဵၼ်ႈတၢင်းတင်းလၢႆဢေႃႈ။
၂၁ မၼ်းႁွင်ႉပၢဝ်ႇယူႇ ၵႃႈၼႂ်းတီႈဢၼ်ၵူၼ်းတင်းလၢႆၸူႉၵၼ်တုမ်ၵၼ် လႂ် ၵႃႈတီႈႁူးၽၵ်းတူဝဵင်း လႂ်မွၵ်ႇလၢတ်ႈယူႇၵႃႈတီႈၼႂ်းၶူးၼႂ်းဝဵင်း လႂ်ၼၼ်ႉလႄႈဝႃႈၸမ်း၊-
၂၂ သူၸိူဝ်းဢၼ်ဢမ်ႇႁူႉၵႃႈသင်ၶဝ်ဢိူၺ်း။သူတၵ်းထုၵ်ႇၸႂ်ၵျိူၵ်ႈၸႂ် ၼႂ်းတၢင်းဢၼ်ဢမ်ႇႁူႉၵႃႈသင်ၼၼ်ႉႁိုင်ၵႃႈႁိုဝ်။ၶဝ်ၸိူဝ်းဢၼ်ၸၢင်ႊသေႉသွမ်းၼၼ်ႉတၵ်းမူၼ်ႈပျေႃႇယူႇၼႂ်းတၢင်းဢၼ်သေႉသွမ်းၼၼ်ႉႁိုင်ၵႃႈႁိုဝ်။ၶဝ်ၸိူဝ်းဢၼ်မိူၵ်ႈၼၼ်ႉ တၵ်းငိၼ်းၸင်းဢတၢတ်ႈ ပိင်ႇၺႃႇယူႇႁိုင်ၵႃႈႁိုဝ်။
၂၃ ထွမ်ႇဢဝ်ၵႂၢမ်းဢၼ်ၵဝ်သင်ႇသွၼ်သုင်းမႃႉၼႆႉသေလႄႈ ဢွၼ်ၵၼ်ၶၢႆႉပုတ်ႉတႃႉ။တူၺ်းလူ။ၵဝ်တၵ်းဢဝ်ဝိၺိၺ်ႇၵဝ်သွၼ်းလေႃႇၵႃႈၼိူဝ်သူလႄႈ ႁႂ်ႈသူႁူႉ ဢၼၢၵ်ႈဢထိၵ်ႈပႄႇၵႂၢမ်းၵဝ် ဢေႃႈ။
၂၄ ၵွပ်ႈပိူဝ်ႈဢၼ်သူထဵင်ပႅတ်ႈၵဝ်မိူဝ်ႈဢၼ်ၵဝ်ႁွင်ႉသူ၊ၵဝ်ယဵတ်ႇယိုၼ်းမိုဝ်းၵဝ်ၸူးႁူၵေႃႈ ၽူႈ လႂ်ဢမ်ႇဝႆႉဢမူႉၵဝ်သူပႄႇပႅတ်ႈၵႃႈဢၼ်ၵဝ်ပၼ်သတိၼၼ်ႉ လႄႈ
၂၅ ယင်းဢမ်ႇၶႂ်ႈထွမ်ႇၶႂ်ႈဢဝ် ၵႂၢမ်းဢၼ်ၵဝ်သင်ႇသွၼ်ႇသုင်းမႃႉပၼ်ၼၼ်ႉသေၶေႃႈသေၵမ်းလႄႈ၊မိူဝ်ႈဢၼ်သူထူပ်းၺႃး ၽေးဢူးပၢတ်ႈၼၼ်ႉၸိုင်ၵဝ်တၵ်းၶူဝ်ဢေႃႈ။
၂၆ မိူဝ်ႈဢၼ်သူႁွတ်ႈထိုင်တၢင်းဢၼ်လီၵူဝ်လီႁႄၼၼ်ႉၸိုင် ၵဝ်တၵ်းႁဵတ်းပျၢၵ်ႈႁဵတ်းၶူဝ် ဢေႃႈ။
၂၇ မိူဝ်ႈဢၼ်တၢင်းဢၼ်သူၵူဝ်ႁႄၼၼ်ႉႁွတ်ႈမႃးမိူၼ်ၸိူဝ်ႉၼင်ႇလုမ်းၽိဝ်ႁုင်လႄႈ တၢင်းဢၼ်သူလူႉလႅဝ်ၼၼ်ႉသုတ်ႉမႃးမိူၼ်ၸိူဝ်ႉၼင်ႇလူမ်းလႅင်ႉ မိူဝ်ႈဢၼ်တုၵ်ႉၶႃႉတၢင်းၽၢၼ်ဢိၵ်ႇတင်း တၢင်းဢၼ်ယၢပ်ႇၸႂ်ၶၢၼ်ၸႂ် ႁွတ်ႈထိုင်ၵႃႈၼိူဝ်သူၼၼ်ႉၸိုင် ပိၵ်ႉသမ်ႉၶဝ်ႁွင်ႉ ႁႃၵဝ်သေၵေႃႈၵဝ်တင်းဢမ်ႇဢိူဝ်ႉ။
၂၈ ပိၵ်ႉသမ်ႉၶဝ်ၶတ်းၸႂ်ႁႃၵဝ်သေၵေႃႈ ၶဝ်တၵ်းဢမ်ႇလႆႈထူပ်းလႆႈႁၼ်ၵဝ်။
၂၉ လွင်ႈမၼ်းၸမ်းၶဝ်ငိၼ်းၸင်းဢတၢတ်ႈပိင်ႇၺႃႇ လႄႈဢမ်ႇမီးဢလူဝ်ႇၶႂ်ႈၵူဝ်ႁႄထႃႇဝရႃႉၽြႃး။
၃၀ ၶဝ်ဢမ်ႇႁပ်ႉတုင်းဢဝ် တၢင်းဢၼ်ၵဝ်ပၼ်သတိၼၼ်ႉ လႃး လႃးလႄႈ ႁဵတ်းဢမ်ႇပေႃးၼင်ႇႁိုဝ်တီႈတၢင်းဢၼ် ၵဝ်သင်ႇသွၼ်သုင်းမႃႉၵႃႈမီးၼၼ်ႉ။
၃၁ ပိူဝ်ႈၼႆလႄႈၶဝ်တၵ်းလႆႈၵိၼ်မၢၵ်ႇ တၢင်းၵမ်တၢင်းၵျၢင်ႉၶဝ်ၼၼ်ႉလႄႈဢိမ်ႇတဵမ်ဝႆႉတင်း တၢင်းဢၼ်ၶဝ်ၵျၢမ်ႇပွင်ၸိူဝ်းၼၼ်ႉ ဢေႃႈ။
၃၂ တၢင်းဢၼ်ၶဝ်ၸိူဝ်းဢၼ်ငိူဝ်ႈငႃႉပိူင်ႈသဵၼ်ႈတၢင်းၵႂႃႇၼၼ်ႉ ၸၢင်ႊႁႂ်ႈၶဝ်သုမ်းဢသၢၵ်ႈလႄႈတၢင်းဢၼ်ၶဝ်ၸိူဝ်းဢၼ်မိူၵ်ႈ ဢမ်ႇမီးသတိလႄႈယူႇၼၼ်ႉ ၸၢင်ႊႁႂ်ႈၶဝ်ႁွတ်ႈထိုင်တၢင်းလူႉတၢင်းလႅဝ်ဢေႃႈ။
၃၃ ၵေႃႉဢၼ်ထွမ်ႇဢဝ်ၵႂၢမ်းၵဝ်ၼၼ်ႉၸမ်း တၵ်းလႆႈယူႇလူင်ႈလူင်ႈလွတ်ႈလွတ်ႈလႄႈယင်းဢမ်ႇမီးတၢင်းဢၼ်လႆႈၵူဝ်ႁႄၽေးၼၼ်ႉလႄႈ တၵ်းလႆႈတဵတ်ႇလီၼိမ်လီယူႇဢေႃႈ။