Chapter
၇
ႁေႃႈၵူၼ်းမဵဝ်းၼမ်ၼႃႇဢွၵ်ႇပႅတ်ႈ
၁ မိူဝ်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူဢဝ်သူသႂၢင်းသႂ်ႇၵႃႈၼႂ်းမိူင်းဢၼ်သူတၵ်းၵႂႃႇလႄႈၶဝ်ႈၸၢမ်ႇၸႃးၼၼ်ႉသေလႄႈႁေႃႈၵူၼ်းမဵဝ်းၼမ်ၼႃႇဢၼ်ပဵၼ်ၵူၼ်းႁိတ်ႉတိၵူၼ်းၵိရၵႃႇသိၵူၼ်းဢႃႇမေႃးရိၵူၼ်းၶႃႇၼၼိ၊ၵူၼ်းၽေႇရၸိ၊ၵူၼ်းႁိဝိ၊ၵူၼ်းယေႇပုတိ၊ၵူၼ်းမဵဝ်းဢၼ်ယိင်ႈၶႅၼ်းယႂ်ႇသုင်ၼႃႇၼမ်ၵိုၼ်းၼႃႇသေၸဵတ်းမဵဝ်းၼၼ်ႉဢွၵ်ႇပႅတ်ႈသေၵႃႈတီႈၽၢႆႇၼႃႈသူ
၂ မိူဝ်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းသူၼၼ်ႉၸိုင်သူတၵ်းလႆႈတိုၵ်းတေႃးယႃႉပႅတ်ႈၶဝ်လႄႈပေႇၽဵဝ်ႈၶဝ်ပႅတ်ႈမူတ်းမူတ်းသဵင်ႈသဵင်ႈဢေႃႈ။ဢမ်ႇလႆႈႁဵတ်းပတိၺိၼ်ႇလူၺ်ႈၵၼ်တင်းၶဝ်လႃးလႃး။
၃ ဢမ်ႇလႆႈၼႄပျႃးၵရူႉၼႃႇတီႈၶဝ်။ဢမ်ႇလႆႈႁဵတ်းတၢင်းဢၼ်ပဵၼ်ၵူပ်းပဵၼ်ၵူႈလူၺ်ႈၵၼႅတင်းၶဝ်။ဢမ်ႇလႆႈဢဝ်လုၵ်ႈယိင်းသူပၼ်တီႈလုၵ်ႈၸၢႆးၶဝ်။
၄ လွင်ႈမၼ်းၸမ်းၶဝ်တၵ်းႁဵတ်းႁႂ်ႈလုၵ်ႈၸၢႆးသူဢမ်ႇၸွမ်းလင်ၵဝ်လႄႈဝႄႈပိူင်ႈၵႂႃႇႁႂ်ႈလႆႈႁဵတ်းဝူတ်ႈတီႈၽြႃးတၢင်ႇသူႇတၢင်ႇပႃးၼၼ်ႉဢေႃႈ။မိူဝ်ႈၼၼ်ႉတင်းၸႂ်မႆႈၶႆႈၸႃႉထႃႇဝရႃႉၽြႃးတၵ်းဢွၵ်ႇလႄႈမၼ်းၸဝ်ႈတၵ်းယႃႉၽဵဝ်ႈသူပႅတ်ႈၵမ်းလဵဝ်ဢေႃႈ။
၅ ပိူဝ်ႈၼႆလႄႈသူတၵ်းလႆႈႁဵတ်းတီႈၶဝ်ၼၼ်ႉၸိူဝ်ႉၼင်ႇႁိုဝ်ၸမ်းသူတၵ်းလႆႈၵိူၼ်ႇယႃႉယဵၸ်ႉပလၢင်ႇၶဝ်ပႅတ်ႈဢေႃႈ။တၵ်းလႆႈပေႃႉထုပ်ႉသဝ်တီႈၵူဝ်းၵွႆႇၶဝ်လႅဝ်ပႅတ်ႈဢေႃႈ။တၵ်းလႆႈၽၼ်းတူၼ်ႈဢႃႇသရၶဝ်လူမ်ႉပႅတ်ႈဢေႃႈ။တၵ်းလႆႈဢဝ်ရူၵ်ႉထူႉသင်းထူႉၶဝ်ဢၼ်တွင်ႈႁဵတ်းၼၼ်ႉၸုတ်ႇၽႆးပႅတ်ႈဢေႃႈ။
၆ လွင်ႈမၼ်းၸမ်းသူပဵၼ်ၵူၼ်းမဵဝ်းဢၼ်မူတ်းၸၢင်ႇပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈဢေႃႈ။ထႃႇဝရႃႉၽြႃးၽြႃးပဵၼ်ၸဝ်ႈသူလိူၵ်ႈၵဵပ်းဢဝ်သူႁႂ်ႈသူလႆႈပဵၼ်ၵူၼ်းမဵဝ်းဢၼ်မၼ်းၸဝ်ႈထိူၵ်ႈပိူင်ႇသေၵူၼ်းမဵဝ်းၵႃႈဢၼ်မီးၵႃႈၼိူဝ်လိၼ်မိူင်းၼႆႉယဝ်ႉ။
၇ ထႃႇဝရႃႉၽြႃးႁၵ်ႉသူၵွပ်ႈပိူဝ်ႈဢၼ်သူယိင်ႈၶႅၼ်းၼမ်ၼႃႇသေၵူၼ်းတၢင်ႇၸိူဝ်ႉတၢင်ႇမဵဝ်းတင်းသဵင်ႈတင်းလူင်လႄႈလိူၵ်ႈၵဵပ်းဢဝ်ဢမ်ႇၸႂ်ႈ။သူယိင်ႈၶႅၼ်းၵေႇၼႃႇသေၵူၼ်းတၢင်ႇၸိူဝ်ႉတၢင်ႇမဵဝ်းတင်းသဵင်ႈတင်းလူင်ဢေႃႈ။
၈ ၵွပ်ႈပိူဝ်ႈထႃႇဝရႃႉၽြႃးႁၵ်ႉသူဢိၵ်ႇတင်းၵွပ်ႈပိူဝ်ႈမၼ်းၸဝ်ႈမီးဢလူဝ်ႇၶႂ်ႈႁႂ်ႈတၢင်းဢၼ်တိူင်ႇဝႃႈဢၼ်မၼ်းၸဝ်ႈတိူင်ႇဝႃႈဝႆႉတီႈပူႇမွၼ်ႇသူၼၼ်ႉတေႇပဵၼ်လႄႈထႃႇဝရႃႉၽြႃးၸင်ႇဢဝ်တင်းမိုဝ်းဢၼ်ႁႅင်းယႂ်ႇၼႃႇၼုၵ်ႈဢဝ်သူလႄႈၵႄႇသႄႇဢဝ်သူလွတ်ႈသေၵႃႈၼႂ်းတီႈဢၼ်သူၶၢမ်ႇႁဵတ်းၶႃႈၵႃႈၼႂ်းမိူင်းၶုၼ်ႁေႃၶမ်းၽႃႇရေႃးဢၼ်ဢုပ်ႉပိူင်ႇမိူင်းဢေႇၵႅပ်ႉတုၼၼ်ႉမႃးယဝ်ႉ။
၉ ပိူဝ်ႈၼႆလႄႈႁူႉမၢတ်ႈလွင်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပဵၼ်ၽြႃးဢမၢၼ်ႇၶၼ်ပဵၼ်ၽြႃးဢၼ်ပႂ်ႉသႅတ်ႈၸႃႇဢၼ်ႁႂ်ႈၵႂၢမ်းပတိၺိၼ်ႇဢိၵ်ႇတင်းၵရုၼႃႇၸဝ်ႈတေႇယူႇတီႈၶဝ်ၸိူဝ်းဢၼ်ႁၵ်ႉမၼ်းၸဝ်ႈလႄႈပႂ်ႉၵမ်ပႂ်ႉၸွမ်းပိင်းၺၢပ်ႈၸဝ်ႈယူႇသိုပ်ႇသိုပ်ႇတမ်ႈတမ်ႈ
၁၀ တေႃႇထိုင်ႁွတ်ႈႁဵင်သိုပ်ႇမိုၼ်ႇသိုပ်ႇဢၼ်တွပ်ႇတႅၼ်းပၼ်ဢပျႅတ်ႈတီႈၶဝ်ၸိူဝ်းဢၼ်ၸင်းမၼ်းၸဝ်ႈသိုဝ်ႈၼႃႈတႂ်ႈတႃၶဝ်ႁႂ်ႈလႆႈယႃႉၶဝ်ပႅတ်ႈၼၼ်ႉတႃႉ။မၼ်းၸဝ်ႈယင်းဢမ်ႇႁဵတ်းၵူၺ်ႈႁဵတ်းထိူင်းတီႈၶဝ်ၸိူဝ်းဢၼ်ၸင်းမၼ်းၸဝ်ႈၼၼ်ႉလႄႈတၵ်းတွပ်ႇတႅၼ်းပၼ်ဢပျႅတ်ႈၶဝ်သိုဝ်ႈၼႃႈတႂ်ႈတႃၶဝ်ဢေႃႈ။
၁၁ ပိူဝ်ႈၼႆလႄႈသူတၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈတြႃးဢိၵ်ႇတင်းထုင်းၽိင်ႈတြႃးတင်းလွင်ႈတၢင်းဢၼ်ၸီႇယင်ႇဝႆႉတင်းလၢႆဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၼၼ်ႉဢေႃႈ။
၁၂ ပေႃးသူထွမ်ႇဢဝ်လွင်ႈတၢင်းဢၼ်ၸီႇယၢင်ႇဝႆႉၸိူဝ်းၼႆႉႁႂ်ႈလႆႈပႂ်ႉၵမ်ပႂ်ႉၸွမ်းၸိုင်ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းႁႂ်ႈပတိၺိၼ်ႇၸဝ်ႈဢိၵ်ႇတင်းၵရူႉၼႃႇၸဝ်ႈဢၼ်မၼ်းၸဝ်ႈတိူင်ႇဝႆႉတီႈပူႇမွၼ်ႇသူၸိူဝ်းၼၼ်ႉတေႇပဵၼ်ဢေႃႈ။မၼ်းၸဝ်ႈတၵ်းႁၵ်ႉသူဢေႃႈ။
၁၃ တၵ်းပၼ်တၢင်းလီတီႈသူလႄႈႁႂ်ႈသူယႂ်ႇၽေၼမ်ၵိုၼ်းမႃးဢေႃႈ။တၵ်းပၼ်တၢင်းလီတီႈမၢၵ်ႇတွင်သူမၢၵ်ႇလိၼ်ႁူင်းလိၼ်သူၶဝ်ႈပိူၵ်ႇၶဝ်ႈသၢၼ်သူၼမ်ႉၸပိတ်ႉသူၼမ်ႉမၼ်းသူတၢင်းဢၼ်ဝူဝ်းသူယႂ်ႇၽေၼမ်ၵိုၼ်းမႃးသူဝ်းဢွၼ်ႇပေႉဢွၼ်ႇၵႃႈၼႂ်းၽုင်သူဝ်းၽုင်ပေႉသူၸိူဝ်းၼၼ်ႉၵႃႈၼႂ်းမိူင်းဢၼ်မၼ်းၸဝ်ႈတိူင်ႇဝႃႈဝႆႉဝႃႈတၵ်းပၼ်ၵႃႈတီႈပူႇမွၼ်ႇသူၼၼ်ႉဢေႃႈ။
၁၄ သူတၵ်းလႆႈပဵၼ်ၵေႃႉဢၼ်လႆႈၶၢမ်ႇတၢင်းလီၼႃႇသေၵူၼ်းတၢင်ႇၸိူဝ်ႉတၢင်ႇမဵဝ်းတင်းသဵင်ႈတင်းလူင်လႄႈၵႃႈတီႈသူၼၼ်ႉတၵ်းဢမ်ႇလႆႈမီႈၵူၼ်းၸၢႆးၵူၼ်းယိင်းဢၼ်ဢမ်ႇမီးလုၵ်ႈသေၵေႃႉသေၵူၼ်းတၵ်းဢမ်ႇလႆႈမီးတရိၵ်ႉသၢၼ်ႇတူဝ်ပေႃႈတူဝ်မေႈဢၼ်မၼ်းဢမ်ႇမီးလုၵ်ႈသတေူဝ်ၼၼ်ႉ။
၁၅ ထႃႇဝရႃႉၽြႃးတၵ်းဢဝ်တၢင်းၶႆႈတၢင်းပဵၼ်ၵူႈၸိူဝ်ႉၵူႈပိူင်ဢွၵ်ႇပႅတ်ႈသေၵႃႈတီႈသူလႄႈဢမ်ႇႁႂ်ႈတၢင်းၶႆႈတၢင်းပဵၼ်ဢၼ်ႁၢႆႉဢၼ်ယၢပ်ႇတီႈမိူင်းဢေႇၵႅပ်ႉတုဢၼ်သူႁူႉယူႇၸိူဝ်းၼၼ်ႉၸပ်းၸွႆးတီႈသူ။တၵ်းဢဝ်ႁႂ်ႈၸပ်းၸွႆးတီႈၶဝ်ၸိူဝ်းဢၼ်ၸင်းသူၵႃႈမီးၼၼ်ႉၵူၺ်းဢေႃႈ။
၁၆ သူတၵ်းလႆႈယႃႉၽဵဝ်ႈပႅတ်ႈၵူၼ်းမဵဝ်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူဢၢပ်ႈပၼ်တီႈသူၼၼ်ႉတင်းသဵင်ႈတင်းလူင်ဢေႃႈ။မၢၵ်ႇတႃသူဢမ်ႇလႆႈဢိတ်းလူၶဝ်။သူဢမ်ႇလႆႈႁဵတ်းဝၢတ်ႈတီႈၽြႃးၶဝ်။
၁၇ ပေႃးႁဵတ်းဝၢတ်ႈၸိုင်ဢၼ်ၼၼ်ႉတၵ်းပဵၼ်တူင်ႇႁဵဝ်ႉတူင်ႇၶိုမ်းတီႈသူဢေႃႈ။ပေႃးသူထၢင်ႇၼႂ်းၸႂ်လႄႈဝႃႈ၊ၵူၼ်းမဵဝ်းၸိူဝ်းၼၼ်ႉယိင်ႈၶႅၼ်းၼမ်ၵိုတ်းၼႃႇသေႁဝ်း။ႁဝ်းတၵ်းႁဵတ်းၸိူဝ်ႉၼင်ႇႁိုဝ်လႄႈႁေႃႈၶဝ်ဢွၵ်ႇပႅတ်ႈလႆႈ၊ဝႃႈၼင်ႇၼႆၸိုင်သူဢမ်ႇလႆႈၵူဝ်လႆႈႁေၶဝ်။
၁၈ သူတၵ်းလႆႈၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူႁဵတ်းတီႈၶုၼ်ၽႃႇရေႃးတင်းမိူင်းဢေႇၵႅပ်ႉတုတင်းမိူင်းဢိၵ်ႇတင်းတၢင်းဢၼ်ၸၢမ်းတူၺ်းဢၼ်ယႂ်ႇၼႃႇဢၼ်မၢၵ်ႇတႃသူႁၼ်ၸိူဝ်းၼၼ်ႉ
၁၉ တင်းၼီႉမိၵ်ႈလၢၵ်ႈၶၼႃႇလွင်ႈတၢင်းဢၼ်လီဢၢမ်းတင်းဢၼ်ဢဝ်တၢင်းမိုဝ်ႈၸဝ်ႈဢၼ်ႁႅင်းၼႃႇႁဵတ်းတင်းဢၼ်ယဵတ်ႇၶႅၼ်ၸဝ်ႈတင်းဢၼ်မၼ်းၸဝ်ႈၼေႇပျႃးၼႂ်းၶိင်ႇမိူဝ်ႈဢၼ်မၼ်းၸဝ်ႈၼုၵ်ႈဢဝ်သူသူမႃးၼၼ်ႉလီလီငၢမ်းငၢမ်းဢေႃႈ။
၂၀ လိူဝ်သေၼၼ်ႉထႃႇဝရႃႉၽြႃးၽြႃးပဵၼ်ၸဝ်ႈသူတၵ်းပွႆႇၸႂ်ႉတေႃႇလႂ်တႅၼ်လႂ်ၵႂႃႇၵႃႈတီႈၶဝ်တေႃႇႁွတ်ႈထိုင်ၶဝ်ၸိူဝ်းဢၼ်ၵိုတ်းၵျၼ်ႇဝႆႉလႄႈပႆႇတၼ်းပၢႆႈမႅပ်းယူႇၼၼ်ႉလူႉလႅဝ်သေၵႃႈတီႈၽၢႆႇၼႃႈသူၼၼ်ႉဢေႃႈ။
၂၁ သူဢမ်ႇလႆႈမီးတၢင်းဢၼ်တူၵ်းၸႂ်ၵွပ်ႈပိူဝ်ႈၶဝ်ၼၼ်ႉ။လွင်ႈမၼ်းၸမ်းထႃႇဝရႃႉၽြႃးၽြႃးပဵၼ်ၸဝ်ႈသူဢၼ်ပဵၼ်ၽြႃးဢၼ်တၼ်းၶူဝ်းယႂ်ႇၼႃႇလႄႈလီၵူဝ်လီႁေၼၼ်ႉမီးယူႇၵႃႈၼႂ်းၵၢင်သူဢေႃႈ။
၂၂ ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းႁေႃႈၵူၼ်းမဵဝ်းၸိူဝ်ႉၼၼ်ႉဢွၵ်ႇပႅတ်ႈသေၵႃႈတီႈၽၢႆႇၼႃႈသူၵႂႃႇယေႈဢိတ်းယေႈဢိတ်းဢေႃႈ။ၵွပ်ႈပိူဝ်ႈဢၼ်ၵူဝ်တူဝ်ထိူၼ်ႇႁၢႆႉတၵ်းယႂ်ႇၽေၼမ်ၵိုၼ်းမႃးယူႇၽၢႆႇၼိုင်ႈတင်းသူလႄႈသူဢမ်ႇလႆႈပေႇၽဵဝ်ႈၶဝ်ပႅတ်ႈၵမ်းလဵဝ်။
၂၃ ၵူၺ်းၵႃႈထႃႇဝရႃႉၽြႃးၽြႃးပဵၼ်ၸဝ်ႈသူတၵ်းဢဝ်ၶဝ်ဢၢပ်ႈပၼ်တီႈသူလႄႈဢဝ်တင်းတၢင်းဢၼ်ယႃႉၶဝ်ပႅတ်ႈဢၼ်ယႂ်ႇၼႃႇလူင်လၢင်ယႃႉၽဵဝ်ႈၶဝ်ပႅတ်ႈတေႃႇထိုင်ႁွတ်ႈၶဝ်လႆႈလူႉလႆႈလႅဝ်ၼၼ်ႉဢေႃႈ။
၂၄ ၶုၼ်ႁေႃၶမ်းၶဝ်တင်းလၢႆၵေႃႈမၼ်းၸဝ်ႈတၵ်းဢဝ်ဢၢပ်ႈပၼ်ၵႃႈၼႂ်းမိုဝ်းသူလႄႈတၵ်းႁႂ်ႈၼႃႇမႃႉၸိုဝ်သဵင်ၶဝ်ႁၢႆပႅတ်ႈသေၵႃႈတႂႃ်ႈႉၵၢင်ႁၢဝ်ဢေႃႈ။ၽူႈလႂ်ဢမ်ႇၸုၵ်းၶၢမ်ႇယူႇၵႃႈတီႈၽၢႆႇၼႃႈသူလႆႈသေၵေႃႉသေၵူၼ်း။
၂၅ သူတၵ်းလႆႈဢဝ်ရူၵ်ႉထူႉသၢင်းထူႉၽြႃးၶဝ်ဢၼ်တွင်ႈႁဵတ်းၸိူဝ်းၼၼ်ႉၸုတ်ႇၽႆးပႅတ်ႈဢေႃႈ။ဢမ်ႇလႆႈၸႂ်ၸပ်းၸႂ်ၸွႆးငိုၼ်းၶမ်းဢၼ်ပႃႈၵႃႈတီႈရူၵ်ႉထူႉသၢင်းထူႉၸိူဝ်းၼၼ်ႉ။ဢမ်ႇလႆႈသိမ်းလႆႈဢဝ်။ပေႃးဢဝ်ၸိုင်ၵူဝ်သူတၵ်းထုၵ်ႇတူင်ႇႁဵဝ်ႉတူင်ႇၶိုမ်းၼၼ်ႉဢေႃႈ။ပဵၼ်ဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူလီႁင်ႈဢဵတ်ႇသဵတ်ႇဢေႃႈ။
၂၆ သူဢမ်ႇလႆႈဢဝ်လွင်ႈတၢင်းဢၼ်လီႁင်ႈဢဵတ်ႇသဵတ်ႇသႂၢင်းၶဝ်ႈၵႃႈၼႂ်းႁိူၼ်းသူႁႂ်ႈသူပဵၼ်လွင်ႈတၢင်းဢၼ်ထုၵ်ႇလီၵိၼ်ႇလီဝႃႈမိူၼ်ၸိူဝ်ႉၼင်လွင်ႈတၢင်းၼၼ်ႉ။လွင်ႈတၢင်းၸိူဝ်းၼၼ်ႉၸမ်းသူတၵ်းလႆႈလီႁင်ႈတင်းမူတ်းတင်းသဵင်ႈဢေႃႈ။သူတၵ်းလႆႈဢဵတ်ႇသဵတ်ႇမူတ်းမူတ်းသဵင်ႈသဵင်ႈဢေႃႈ။ပဵၼ်လွင်ႈတၢင်းဢၼ်ထုၵ်ႇလီၵိၼ်ႇလီႈဝႃႈဢေႃႈ။