Chapter
၁၁
ႁၵ်ႉလႄႈထွမ်ႇၵႂၢမ်းၽြႃးပဵၼ်ၸဝ်ႈ
၁ ပိူဝ်ႈၼႆလႄႈသူတၵ်းလႆႈႁၵ်ႉထႃႇဝရႃႉၽြႃးၽြႃးပဵၼ်ၸဝ်ႈသူလႄႈပႂ်ႉၵမ်ပႂ်ႉၸွမ်းတၢင်းဢၼ်သၢင်ႈႁဵတ်းဢမူႉမၼ်းၸဝ်ႈထုငိ်းင်းတြႃးမၼ်းၸဝ်ႈလွင်ႈတၢင်းဢၼ်မၼ်းၸဝ်ႈၸီႇယင်ႇဝႆႉဢိၵ်ႇတင်းပိင်းၺၢပ်ႈမၼ်းၸဝ်ႈတင်းလၢႆၼၼ်ႉသေႇသေႇဢေႃႈ။
၂ ဝၼ်းမိူဝ်ႈၼႆႉဢွၼ်ၵၼ်ၶုၵ်းၸႂ်လႆႈလွင်ႈဢၼ်ဝႃႈလုၵ်ႈလၢင်းသူဢမ်ႇၸႂ်ႈၶဝ်ၸိူဝ်းဢၼ်လႆႈႁၼ်တၢင်းဢၼ်ၽြႃးပဵၼ်ၸဝ်ႈသင်ႇသွၼ်သုင်းမႃႉပၼ်မုၼ်ၽုင်းဢႃႇၼူႉၽေႃႇမၼ်းၸဝ်ႈ
၃ တၢင်းဢၼ်မၼ်းၸဝ်ႈဢဝ်တင်းမိုဝ်းၸဝ်ႈဢၼ်ႁႅင်းယႂ်ႇၼႃႇႁဵတ်းတၢင်းဢၼ်ယဵတ်ႇၶႅၼ်မိုဝ်းမၼ်းၸဝ်ႈၼီႉမိၵ်ႈလၢၵ်ႈၶၼႃႇတင်းလၢႆလွင်ႈတၢင်းဢၼ်မၼ်းၸဝ်ႈႁဵတ်းဢၼ်မၼ်းၸဝ်ႈႁႂ်ႈပဵၼ်ၵႃႈၼႂ်းမိူင်းဢေႇၵႅပ်ႉတုတီႈၶုၼ်ႁေႃၶမ်းၽႃႇရေႃးဢိၵ်ႇတင်း
၄ သိုင်ႇၸိုင်ႈဝၢၼ်ႈမိူင်းမၼ်းတင်းသဵင်ႈတင်းလူင်လွင်ႈတၢင်းဢၼ်မၼ်းၸဝ်ႈႁဵတ်းတီႈမုၵ်ႉၸိူဝ်းပူဝ်ႇပႃႇၵူၼ်းသိုၵ်းဢေႇၵႅပ်ႉတုဢၼ်ပဵၼ်တပ်ႉမႃႉၶဝ်ဢိၵ်ႇတင်းလေႃႉရထႃးၶဝ်လွင်ႈတၢင်းဢၼ်ထႃႇဝရႃႉၽြႃးႁႂ်ႈၼမ်ႉပၢင်ႇလၢႆႇဢေႇတုမ်ႇထူမ်ႈႁူမ်ႇၶဝ်ၼႂ်းမိူဝ်ႈဢၼ်ၶဝ်လိုပ်ႉလမ်းၸွမ်းသူ
၅ လွင်ႈတၢင်းဢၼ်ထႃႇဝရႃႉၽြႃးယႃႉၽဵဝ်ႈၶဝ်ပႅတ်ႈတေႃႇထိုင်ႁွတ်ႈဝၼ်းမိူဝ်ႈၼႆႉလွင်ႈတၢင်းဢၼ်မၼ်းၸဝ်ႈႁဵတ်းတီႈသူၵႃႈၼႂ်းထိူၼ်ႇတေႃႇထိုင်ႁွတ်ႈထၢၼ်ႈပေႃးႁွတ်ႈၽႅဝ်မႃးၵႃႈတီႈၼႆႉ
၆ လွင်ႈတၢင်းဢၼ်မၼ်းၸဝ်ႈႁဵတ်းတီႈတႃႇသၼ်ႇတင်းဢၽိရၢမ်ႇလုၵ်ႈၸၢႆးဢေႇလျႃႇၵူၼ်းမဵဝ်းရူႇပိၼ်ႇလွင်ႈတၢင်းဢၼ်လိၼ်မိူင်းတႅၵ်ႇဢႃႈသူပ်းသေလႄႈဢိုၼ်ၶဝ်ဢိၵ်ႇပႃးၵႃႈဢၼ်ဢသၢၵ်ႈလိပ်းယူႇဢၼ်ပဵၼ်ၶွင်ၶဝ်ၸိူဝ်းၼၼ်ႉၵႃႈၼႂ်းၵေႈဝူင်ႈၵၢင်ၵူၼ်းမဵဝ်းဢိသရေႇလတင်းလၢႆၸိူဝ်းၼၼ်ႉတႃႉ။
၇ မၢၵ်ႇတႃသူလႆႈႁၼ်လွင်ႈတၢင်းဢၼ်ယႂ်ႇၼႃႇဢၼ်ထႃႇဝရႃႉၽြႃးႁဵတ်းၵႃႈမီးတင်းသဵင်ႈတင်းလူင်ၼၼ်ႉမႃးယဝ်ႉ။
၈ ပိူဝ်ႈၼႆလႄႈသူတၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈၵႃႈဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉႁႂ်ႈသူလႆႈမီးႁႅင်းဢၼ်ယႂ်ႇၼႃႇလႄႈၵႂႃႇၶဝ်ႈၸၢမ်ႇၸႃးမိူင်းဢၼ်သူတၵ်းၵႂႃႇၸၢမ်ႇၸႃးၼၼ်ႉ
၉ ဢိၵ်ႇတင်းႁႂ်ႈဢသၢၵ်ႈသူလႆႈယိုၼ်းယၢဝ်းၵႃႈတီႈမိူင်းဢၼ်ထႃႇဝရႃႉၽြႃးတိူင်ႇဝႃႈဝႆႉတီႈပူႇမွၼ်ႇသူႁႂ်ႈလႆႈပၼ်တီႈၶဝ်ဢိၵ်ႇတင်းမဵဝ်းၸိူဝ်ႉၶိူဝ်းၶဝ်မိူင်းဢၼ်ၼမ်ႉၼူမ်းတင်းၼမ်ႉၽိုင်ႈလႆႈယူႇၼၼ်ႉဢေႃႈ။
၁၀ မိူင်းဢၼ်သူတၵ်းၵႂႃႇလႄႈၶဝ်ႈၸၢမ်ႇၸႃးၼၼ်ႉၸမ်းဢမ်ႇမိူၼ်ၸိူဝ်ႉၼင်ႇမိူင်းဢေႇၵႅပ်ႉတုတီႈဢၼ်သူဢွၵ်ႇမႃးဢၼ်ဝႃႈမိူင်းဢၼ်သူဝၢၼ်ႇၸိူဝ်ႉဝၢၼ်ႇၽၼ်းသေလႄႈလႆႈဢဝ်တိၼ်သူႁူတ်းၼမ်ႉၸိူဝ်ႉၼင်ႇဢၼ်ႁဵတ်းႁႆႈၼၼ်ႉ။
၁၁ မိူင်းဢၼ်သူတၵ်းၵႂႃႇလႄႈၶဝ်ႈၸၢမ်ႇၸႃးၼၼ်ႉပဵၼ်မိူင်းဢၼ်ပဵၼ်ႁူၺ်ႈပဵၼ်လွႆလႄႈလႆႈၵိၼ်ၼမ်ႉၽႃႉၼမ်ႉၽူၼ်မိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူလုမ်းလႃးလႄႈ
၁၂ မၢၵ်ႇတႃထႃႇဝရႃႉၽြႃးၽြႃးပဵၼ်ၸဝ်ႈသူလူတူၺ်းယူႇၸႃႉၸဵမ်ႁူဝ်ပီႊတေႃႇထိုင်ႁၢင်ပီႊၼၼ်ႉဢေႃႈ။
၁၃ ပေႃးသူထွမ်ႇဢဝ်ပိင်းၺၢပ်ႈၵဝ်ဢၼ်ၵဝ်သင်ႇလၢတ်ႈဝႆႉဝၼ်းမိူဝ်ႈၼႆႉၸိူဝ်းၼၼ်ႉၸေးၸေးၸွတ်ႇၸွတ်ႇပႃးတင်းၸႂ်သဵင်ႈသဵင်ႈႁူဝ်ၸႂ်သဵင်ႈသဵင်ႈလႄႈႁၵ်ႉထႃႇဝရႃႉၽြႃးၽြႃးပဵၼ်ၸဝ်ႈသူလႄႈပွင်ႁဵတ်းဢမူႉမၼ်းၸဝ်ႈၸိုင်ႈ
၁၄ ၵဝ်တၵ်းပၼ်ၼမ်ႉၽူၼ်ဢၼ်ၸၢပ်ႈသႅင်ႇၵၼ်တင်းမိူင်းသူဢၼ်ဝႃႈၽူၼ်ဢွၼ်တၢင်းၽူၼ်ၵမ်းလိုၼ်းၼၼ်ႉႁႂ်ႈသူလႆႈသိမ်းဢဝ်ၶဝ်ႈပိူၵ်ႇသူၼမ်ႉၸပိတ်ႉသူဢိၵ်ႇတင်းၼမ်ႉမၼ်းသူဢေႃႈ။
၁၅ ၵဝ်တၵ်းႁႂ်ႈတူၼ်ႈယိူဝ်ႈတူၼ်ႈယႃႈဢွၵ်ႇၵႃႈတီႈပၢင်ႇတီႈပဵင်းပုၼ်ႈတရိၵ်ႈသၢၼ်ႇသူႁႂ်ႈသူလႆႈၵိၼ်ဢိမ်ႇၵိၼ်တဵမ်ဢေႃႈ။
၁၆ တူဝ်သူဝႆႉသတိတီႈတူဝ်သူႁႂ်ႈႁူဝ်ၸႂ်သူဢမ်ႇလႆႈၶၢမ်ႇတၢင်းဢၼ်ပႅတ်ႉဢၼ်လႅၼ်လႄႈၽိတ်းတၢင်းပိူင်ႈတၢင်းၵႂႃႇသေလႄႈႁဵတ်းဝၢတ်ႈၵူဝ်းၵွႆႇၽြႃးတၢင်ႇသူႇတၢင်ႇပႃးၸိူဝ်းၼၼ်ႉတႃႉ။
၁၇ ပေႃးဢမ်ႇၼၼ်တင်းၸႂ်မႆႈၶႂ်ႈၸႃႉထႃႇဝႃႉရၽြႃးတၵ်းဢွၵ်ႇလႄႈမၼ်းၸဝ်းတၵ်းဢိုတ်းၽႃႉၵၢင်ႁၢဝ်ႁႂ်ႈၽူၼ်ဢမ်ႇလႆႈတူၵ်းလႄႈလိၼ်ဢမ်ႇပၼ်မၢၵ်ႇမၼ်းႁူင်းမၼ်းဢေႃႈ။သူတၵ်းလူႉလႅဝ်ပႅတ်ႈသေၵႃႈၼႂ်းမိူင်းဢၼ်လီဢၼ်ငၢမ်းဢၼ်ထႃႇဝရႃႉၽြႃးပၼ်ၼၼ်ႉၶၼ်ၶၼ်ၽႂ်းၽႂ်းဢေႃႈ။
၁၈ ပိူဝ်ႈၼႆလႄႈသူတၵ်းလႆႈဢဝ်ၵႂၢမ်းၵဝ်ၼႆႉသႂၢင်းသႂ်ႇဝႆႉၵႃႈၼႂ်းႁူဝ်ၸႂ်သူလႄႈဢဝ်မတ်ႉၸပ်းသႂ်ႇဝႆႉၵႃႈၼိူဝ်မိုဝ်းသူပုၼ်ႈလၢၵ်ႈၶၼႃႇသၢၵ်ႈသေႇလႄႈပဵၼ်ပုၼ်ႈၶိူင်ႈဢၼ်ဝႆႉၵႃႈတီႈၵႄႈဝူင်ႈၵၢင်မၢၵ်ႇတႃသူဢေႃႈ။
၁၉ သူတၵ်းလႆႈဢဝ်ၵႂၢမ်းၼၼ်ႉသင်ႇသွၼ်ပၼ်တီႈလုၵ်ႈတီႈလၢင်းသူလႄႈၼင်ႈယူႇၵႃႈတီႈႁိူၼ်းသေဢမ်ႇဝႃႈပႆတၢင်းယူႇသေဢမ်ႇဝႃႈတၵ်းလႆႈလၢတ်ႈလွင်ႈၵႂၢမ်းၼၼ်ႉယူႇဢေႃႈ။
၂၀ သူတၵ်းလႆႈဢဝ်ၵႂၢမ်းၼၼ်ႉတႅမ်ႈသႂ်ႇဝႆႉၵႃႈတီႈသဝ်ၽၵ်းတူႁိူၼ်းသူဢိၵ်ႇတင်းၽၵ်းတူဝဵင်းသူၸိူဝ်းၼၼ်ႉဢေႃႈ။
၂၁ ပေႃးႁဵတ်းၸိူဝ်ႉၼင်ႇၼၼ်ၸိုင်ၸူဝ်ႈဢသၢၵ်ႈသူၸူဝ်ႈဢသၢၵ်ႈလုၵ်ႈလၢင်းသူတၵ်းလႆႈယိုၼ်းယၢဝ်းၵႃႈၼႂ်းမိူင်းဢၼ်ထႃႇဝရႃႉၽြႃးတိူင်ႇဝႃႈဝႆႉတီႈပူႇမွၼ်ႇသူႁႂ်ႈလႆႈပၼ်တီႈၶဝ်ၼၼ်ႉမိူၼ်ၸိူဝ်ႉၼင်ႇၸူဝ်ႈဢသၢၵ်ႈၽႃႉၵၢင်ႁၢဝ်ယိုၼ်းယၢဝ်းယူႇၵႃႈတီႈၼိူဝ်လိၼ်မိူင်းၼၼ်ႉဢေႃႈ။
၂၂ ပေႃးသူႁဵတ်းသတိသေလႄႈပႂ်ႉၸွမ်းပိင်းၺၢပ်ႈဢၼ်ၵဝ်သင်ႇလၢတ်ႈဝႆႉၼႆႉတင်းသဵင်ႈတင်းမူတ်းလႄႈၵမ်ၵျၢင်ႉႁႂ်ႈလႆႈႁၵ်ႉထႃႇဝရႃႉၽြႃးၽြႃးပဵၼ်ၸဝ်ႈသူလႄႈၸွမ်းသဵၼ်ႈတၢင်းမၼ်းၸဝ်ႈတင်းသဵင်ႈတင်းလူင်လႄႈဢိင်ပိုင်ႈမၼ်းၸဝ်ႈယူႇၸိုင်
၂၃ ထႃႇဝရႃႉၽြႃးတၵ်းႁေႃႈၵူၼ်းၵူႈၸိူဝ်ႉၵူႈမဵဝ်းၸိူဝ်းၼႆႉဢွၵ်ႇပႅတ်ႈသေၵႃႈတီႈၽၢႆႇၼႃႈသူလႄႈသူတၵ်းလႆႈဢုပ်ႉပိူင်ႇၵူၼ်းမဵဝ်းဢၼ်ႁႅင်းယႂ်ႇၼႃႇလႄႈၼမ်ၵိုၼ်းၼႃႇသေသူၸိုဝ်းၼၼ်ႉဢေႃႈ။
၂၄ သူတၵ်းလႆႈပိူင်ႇဢဝ်ၵႃႈဢၼ်တိၼ်သူယဵပ်ႇၼၼ်ႉလႄႈဢဝ်ၵႃႈတီႈၸႃႉၸဵမ်ထိူၼ်ႇတေႃႇထိုင်ႁွတ်ႈလေႇပၼုၼ်ႇဢဝ်ၵႃႈတီႈၸႃႉၸဵမ်ၼမ်ႉႁွင်ႊဢုၽရိတ်ႉတေႃႇထိုင်ႁွတ်ႈပၢင်ႇလၢႆႇတၢင်းဝၼ်းတူၵ်းတၵ်းလႆႈၶဝ်ႈၼႂ်းလႅၼ်လိၼ်သူဢေႃႈ။
၂၅ ၽူႈလႂ်ဢမ်ႇၸုၵ်းၶၢမ်ႇလႆႈၵႃႈတီႈၽၢႆႇၼႃႈသူသေၵေႃႉသေၵူၼ်း။ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းႁဵတ်းႁႂ်ႈတၢင်းဢၼ်ၵူဝ်ႁေတၢင်းဢၼ်တိုၼ်ႇတူၵ်းၸႂ်ၵွပ်ႈပိူဝ်ႈသူၼၼ်ႉႁွတ်ႈထိုင်ၵႃႈၼိူဝ်မိူင်းၵႃႈဢၼ်သူဢဝ်တိၼ်ယဵပ်ႇၼၼ်ႉၸွမ်းၵႃႈၼင်ႇဢၼ်မၼ်းၸဝ်ႈမီႈဢမိင်ႉဝႆႉတီႈသူၼၼ်ႉဢေႃႈ။
၂၆ တူၺ်းလူ။ၵဝ်ဢဝ်တၢင်းလီဢိၵ်ႇတင်းတၢင်းဢၼ်ၵိၼ်ႇဝႃႈသွင်ပႃးဝႆႉတီႈသူဢေႃႈ။ပေႃးသူထွမ်ႇဢဝ်ပိင်းၺၢပ်ႈထႃႇဝရႃႉၽြႃးၽြႃးပဵၼ်ၸဝ်ႈသူဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၸိူဝ်းၼၼ်ႉၸိုင်တၵ်းလႆႈတၢင်းလီဢေႃႈ။
၂၇ ပေႃးသူဢမ်ႇထွမ်ႇဢဝ်ပိင်းၺၢပ်ႈထႃႇဝရႃႉၽြႃးၽြႃးပဵၼ်ၸဝ်ႈသူၸိူဝ်းၼၼ်ႉလႄႈဝေႈပိူင်ႈသဵၼ်ႈတၢင်းဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၼၼ်ႉသေယဝ်ႉ
၂၈ ၸွမ်းလင်ၽြႃးတၢင်ႇသူႇတၢင်ႇပႃးဢၼ်သူဢမ်ႇတွၼ်ႉႁူႉၸိူဝ်းၼၼ်ႉၸိုင်တၵ်းလႆႈၶၢမ်ႇတၢင်းဢၼ်ၵိၼ်ႇဢၼ်ဝႃႈဢေႃႈ။
၂၉ မိူဝ်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူဢဝ်သူသူင်ႇႁွတ်ႈထိုင်ၵႃႈၼႂ်းမိူင်းဢၼ်သူတၵ်းၵႂႃႇလႄႈၶဝ်ႈၸၢမ်ႇၸႃးၼၼ်ႉၸိုင်သူတၵ်းလႆႈဢဝ်တၢင်းလီမၢင်ႇၵလႃႇတၢင်ႇဝႆႉၵႃႈၼိူဝ်လွႆၵေႇရၸဵမ်ႇလႄႈဢဝ်တၢင်းဢၼ်ၵိၼ်ႇဢၼ်ဝႃႈတၢင်ႇဝႆႉၵႃႈၼိူဝ်လွႆဢေႇပလဢေႃႈ။
၃၀ လွႆၸိူဝ်းၼၼ်ႉမီးၽၢႆႇပုၼ်ႉၼမ်ႉႁွင်ႊယေႃးတၢၼ်ႇၽၢႆႇလင်သဵၼ်ႈတၢင်းဢၼ်မီးၽၢႆႇတၢင်းဢၼ်ၵၢင်ဝၼ်းတူၵ်းၵႃႈၼႂ်းမိူင်းၵူၼ်းၶႃႇၼၢၼ်ႇဢၼ်ယူႇၵႃႈၼႂ်းပၢင်ႇပဵင်းဢႃႇရၽႃႇသိုဝ်ႈဝဵင်းၵိလၵႃႇၵႃႈႁိမ်းတူၼ်ႈမႆႉၼမ်ႉမေႃႇရေးၸိူဝ်းၼၼ်ႉဢေႃႈ။
၃၁ သူတၵ်းလႆႈၶၢမ်းၵႂႃႇၵႃႈတီႈၽၢႆႇပုၼ်ႉၼမ်ႉႁွင်ႊယေႃးတၢၼ်ႇႁႂ်ႈလႆႈၶဝ်ႈၸၢမ်ႇၸႃးမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူၼၼ်ႉလႄႈယူႇၵႃႈၼႂ်းမၼ်းဢေႃႈ။
၃၂ သူတၵ်းလႆႈဢွၼ်ၵၼ်ပႂ်ႉၸွမ်းႁႂ်ႈလႆႈၵမ်ၵျၢင်ႉထုင်းၽိင်ႈတြႃးဢိၵ်ႇတင်းလွင်ႈတၢင်းဢၼ်ၸီႇယၢင်ႇဝႆႉၵႃႈတီႈၽၢႆႇၼႃႈသူမိူဝ်ႈဝၼ်းၼႆႉၸိူဝ်းၼၼ်ႉဢေႃႈ။