Chapter
၁၆
ပွႆးပႃသၶႃႇ
၁မၢတ်ႈတွင်ႈဝႆႉလိူၼ်ဢပိပသေလႄႈၶၢမ်ႇပွႆးပႃသၶႃႇတီႈထႃႇဝရႃႉၽြႃးၽြႃပဵၼ်ၸဝ်ႈသူတႃႉ။လွင်ႈမၼ်းၸမ်းထႃႇဝရႃႉၽြႃးၽြႃးပဵၼ်ၸဝ်ႈသူၼုၵ်ႈဢဝ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၶိင်ႇၵၢင်ၶိုၼ်းၼႂ်းလိူၼ်ဢပိပၼၼ်ႉဢေႃႈ။
၂သူတၵ်းလႆႈဢဝ်တူဝ်ၵႃႈၼႂ်းၽုင်ဝူဝ်းၽုင်သူဝ်းသူသေလႄႈပုၵ်ႉၸေႃႇယိၸ်ႉပႃသၶႃႇတီႈထႃႇဝရႃႉၽြႃးၽြႃးပဵၼ်ၸဝ်ႈသူၵႃႈတီႈဢၼ်ထႃႇဝရႃႉၽြႃးလိူၵ်ႈၵဵပ်းဝႆႉပုၼ်ႈဢၼ်တၵ်းႁႂ်ႈၼႃႇမႃႉၸိုဝ်သဵင်မၼ်းၸဝ်ႈတႄႇယူႇၼၼ်ႉဢေႃႈ။
၃လွင်ႈၼင်ႇႁိုဝ်တၵ်းၶုပ်းၸႂ်လႆႈၶႆႈၸႂ်ထူပ်းမိူဝ်ႈဝၼ်းဢၼ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၸူဝ်ႈဢသၢၵ်ႈသူၸိုင်ယႃႇပေၵိၼ်ၵပ်းၶဝ်ႈမုၼ်းဢၼ်ပႃးၸိူဝ်ႉပႅင်ႈၼၼ်ႉလႄႈတၵ်းလႆႈၵိၼ်ၵပ်းၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈဢၼ်ပဵၼ်ၶဝ်ႈမုၼ်းတုၵ်ႉၶႃႉၼၼ်ႉၸဵတ်းဝၼ်းတဵမ်တဵမ်ဢေႃႈ။လွင်ႈမၼ်းၸမ်းသူလႆႈႁိပ်ႈၼႅတ်ႈဢွၵ်ႇသေၵႃႈၼႂ်းမိူင်းဢေႇၵႅပ်ႉတုၼၼ်ႉမႃးဢေႃႈ။
၄ၸဵတ်းဝၼ်းတဵမ်တဵမ်ယႃႇႁႂ်ႈလႆႈထူပ်းလႆႈႁၼ်ၶဝ်ႈမုၼ်းဢၼ်ပႃးၸိူဝ်ႉပႅင်ႈၼၼ်ႉၵႃႈတီႈၼႂ်းလႅၼ်လိၼ်မိူင်းသူလႃးလႃး။ၼိူဝ်ယိၸ်ႉဢၼ်သူပုၵ်ႉၸေႃႇၶိင်ႇႁူဝ်ၶမ်ႈဝၼ်းပထမၼၼ်ႉယႃႇႁႂ်ႈလႆႈၵိုတ်းလႆႈၵျၢၼ်ႇဝႆႉတင်းၶိုၼ်းတေႃႇထိုင်ႁွတ်ႈၶိင်ႇၵၢင်ၼႂ်။
၅သူဢမ်ႇလႆႈႁဵတ်းတၢင်းဢၼ်ပုၵ်ႉၸေႃႇယိၸ်ႉပႃသၶႃႇၵႃႈၼႂ်းဝဵင်းသူၵူႈဝဵင်းၼၼ်ႉ။
၆သူတၵ်းလႆႈပုၵ်ႉၸေႃႇယိၸ်ႉပႃသၶႃႇၵႃႈၼႂ်းတီႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူလိူၵ်ႈၵဵပ်းဢဝ်ဝႆႉပုၼ်ႈဢၼ်တၵ်းႁႂ်ႈၼႃႇမႃႉၸိုဝ်သဵင်မၼ်းၸဝ်ႈတႄႇယူႇၼၼ်ႉမိူဝ်ႈၶိင်ႇႁူဝ်ၶမ်ႈမိူဝ်ႈဢၼ်ၵၢင်ဝၼ်းတူၵ်းၶိင်ႇဢၼ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉဢေႃႈ။
၇သူတၵ်းလႆႈဢဝ်ပိငႆ်ႈးလႄႈၵိၼ်ၵႃႈၼႂ်းတီႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူလိူၵ်ႈၵဵပ်းဢဝ်ၼၼ်ႉသေယဝ်ႉၶိုၼ်းမိူဝ်းၸူးၵႃႈတီႈသုမ်ႉထဵင်သူၶိင်ႇၵၢင်ၼႂ်ဢေႃႈ။
၈ႁူၵ်းဝၼ်းတဵမ်တဵမ်သူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉဢေႃႈ။ဝၼ်းသတ်ႉထမၼၼ်ႉသူတၵ်းလႆႈႁဵတ်းတင်းဢၼ်ၸူႉတုမ်ထမ်ႇမႃႉၵၼ်ပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။ၼႂ်းဝၼ်းၼၼ်ႉသူဢမ်ႇလႆႈႁဵတ်းၵၢၼ်ႁဵတ်းငၢၼ်း။
ပွႆးၸဵတ်းသတၢင်း
၉ၸႃႉၸဵမ်မိူဝ်ႈဢၼ်ဢဝ်ၶဵဝ်းပၢတ်ႇၶဝ်ၼၼ်ႉလႄႈတၵ်းလႆႈၼပ်ႉဢၢၼ်ႇၸဵတ်းသတၢင်းဢေႃႈ။
၁၀ ဝၢႆးသေၼၼ်ႉသူတၵ်းလႆႈၶၢမ်ႇပွႆးသတၢင်းပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈသူၸွမ်ႈၵႃႈၼင်ႇဢၼ်ၶိူင်ႈပုၵ်ႉၸေႃႇဢၼ်သူလူႇၸွမ်းၼင်ႇၸႂ်ၸေႇတၼႃႇဢၼ်သူပုၵ်ႉၸေႃႇၸွမ်းၵႃႈၼင်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တၢင်းလီတီႈသူၼမ်ၼမ်ၵႄႇၵႄႇၼၼ်ႉဢေႃႈ။
၁၁ သူဢိၵ်ႇတင်းလုၵ်ႈၸၢႆးသူလုၵ်ႈယိင်းသူၶႃႈၵူၼ်းၸၢႆးသူၶႃႈၵူၼ်းယိင်းသူၵူၼ်းမဵဝ်းလေႇဝိဢၼ်သွၼ်ႈပိုင်ႈယူႇၵႃႈၼႂ်းဝဵင်းသူၶႅၵ်ႇဢႃႇၵၼ်ႇတုလုၵ်ႈဢမ်ႇမီးပေႃႈမီးမေႈမေႈမုၵ်ႉမေႈမၢႆႈဢၼ်မီးယူႇၵႃႈၼႂ်းသူၸိူဝ်းၼၼ်ႉတၵ်းလႆႈဢွၼ်ၵၼ်သႂၢင်ႇသိူဝ်းမူၼ်ႈပျေႃႇၵႃႈတီႈၽၢႆႇၼႃႈထႃႇဝႃႉရၽြႃးၽြႃးပဵၼ်ၸဝ်ႈသူၵႃႈတီႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူလိူၵ်ႈၵဵပ်းဝႆႉပုၼ်ႈဢၼ်တၵ်းႁႂ်ႈၼႃႇမႃႉၸိုဝ်သဵင်မၼ်းၸဝ်ႈတေႇၼၼ်ႉဢေႃႈ။
၁၂ သူတၵ်းလႆႈၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်သူယၢမ်ႈလႆႈၶၢမ်ႇႁဵတ်းၶႃႈၵႃႈၼႂ်းမိူင်းဢေႇၵႅပ်ႉတုမႃးၼၼ်ႉလႄႈပႂ်ႉၸွမ်းပႂ်ႉၵျၢင်ႉပိင်းၺၢပ်းတြႃးၸိူဝ်းၼႆႉဢေႃႈ။
၁၃ လိုၼ်းသသေူသိမ်းဢဝ်ၵႃႈၼႂ်းတလၢင်းယဵပ်ႇၶဝ်ႈဢိၵ်ႇတင်းၶိူင်ႈတီႈဢၼ်ယဵပ်ႇမၢၵ်ႇၸပိတ်ႉၼၼ်ႉယဝ်ႉၼၼ်ႉသူတၵ်းလႆႈၶၢမ်ႇပွႆႇႁဵတ်းသုမ်ႉထဵင်ၸဝ်ႈၸဵတ်းဝၼ်းတဵမ်တဵမ်ဢေႃႈ။
၁၄ သူဢိၵ်ႇတင်းလုၵ်ႈၸၢႆးလုၵ်ႈယိင်းသူၶႃႈၵူၼ်းၸၢႆးၶႃႈၵူၼ်းယိင်းသူၵူၼ်းမဵဝ်းလေႇဝိၶႅၵ်ႇဢႃႇၵၼ်ႇတုၵေႃႉဢၼ်ဢမ်ႇမီးပေႃႈမီးမေႈမေႈမုၵ်ႉမေႈမၢႆႈဢၼ်မီးၵႃႈၼႂ်းဝဵင်းသူၸိူဝ်းၼၼ်ႉတၵ်းလႆႈဢွၼ်ၵၼ်ႁဵတ်းတၢင်းဢၼ်သႂၢင်ႇသိူဝ်းမူၼ်ႈပျေႃႇၼႂ်းပွႆးဢေႃႈ။
ပွႆးသုမ်ႉထဵင်ၸဝ်ႈ
၁၅ ၸဵတ်းဝၼ်းတဵမ်တဵမ်သူတၵ်းလႆႈၶၢမ်ႇပွႆးပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈသူၵႃႈၼႂ်းတီႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူလိူၵ်ႈၵဵပ်းဢဝ်ၼၼ်ႉဢေႃႈ။ၵွပ်ႈပိူဝ်ဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တၢင်းလီတီႈသူၼႂ်းၵႃႈဢၼ်ယႂ်ႇၽတေူဝ်းတွၼ်းမႃးဢိၵ်ႇတင်းၼႂ်းၵႃႈဢၼ်သူဢဝ်မိုဝ်းသူပွင်ႁဵတ်းၼၼ်ႉလႄႈသူတၵ်းလႆႈႁဵတ်းတၢင်းဢၼ်သႂၢင်ႇသိူဝ်းမူၼ်ႈပျေႃႇဢမၢၼ်ႇၶၼ်ပဵၼ်ဢေႃႈ။
၁၆ သၢမ်ပီႊၼိုင်ႈပွၵ်ႈၵႃႈပဵၼ်ၵူၼ်းၸၢႆးတင်းသဵင်ႈတင်းလူင်ၵႃႈၼႂ်းသူၼၼ်ႉတၵ်းလႆႈၼႄပႃႈၼႃႈၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈသူၼႂ်းတီႈဢၼ်မၼ်းၸဝ်ႈလိူၵ်ႈၵဵပ်းဢဝ်ဝႆႉၼၼ်ႉၼႂ်းၶိင်ႇဢၼ်ၶၢမ်ႇပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၶိင်ႇဢၼ်ၶၢမ်ႇပွႆးၸဵတ်းသတၢင်းၶိင်ႇဢၼ်ၶၢမ်ႇပွႆးသုမ်ႉထဵင်ၸဝ်ႈၼၼ်ႉဢေႃႈ။
၁၇ မိူဝ်ႈၼၼ်ႉၶဝ်ဢမ်ႇလႆႈမႃးၵႃႈတီႈၽၢႆႇၼႃႈထႃႇဝရႃႉၽြႃးတိၼ်လၢႆမိုဝ်းပဝ်ႇ။ၵူၼ်းၵူႈၵေႃႉတၵ်းလႆႈသၢၵ်ႈၵၢပ်ႈၵႃႈၼင်ႇဢၼ်တတ်ႈၼိုင်ႇလႆႈၸွမ်ႈၵႃႈၼင်ႇတၢင်းလီဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူၼၼ်ႉဢေႃႈ။
ၵူၼ်းလူင်ဢၼ်ၸီႇယၢင်ႇတြႃး
၁၈ သူတၵ်းလႆႈၶၢၼ်းၵူၼ်းလူင်ဢၼ်ၸီႇယၢင်ႇတြႃးဢိၵ်ႇတင်းၽူႈမီးဢယႃႇတင်းလၢႆၵႃႈၼႂ်းဝဵင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူၸွမ်းလူၺ်ႈမဵဝ်းသူၸိူဝ်းၼၼ်ႉလႄႈၶဝ်တၵ်းလႆႈၸွမ်းၼင်ႇတြႃးသေလႄႈၸီႇယၢင်ႇတြႃးတီႈၵူၼ်းတင်းလၢႆဢေႃႈ။
၁၉ သူဢမ်ႇလႆႈဝႄႈပိူင်ႈသဵၼ်ႈတၢင်းတြႃးသေလႄႈၸီႇယၢင်ႇ။ဢမ်ႇလႆႈထွၵ်ႈၼႃႈၵူၼ်း။ဢမ်ႇလႆႈၵိၼ်လၢပ်ႈလၢၵ်ႈသွင်ႇ။လၢပ်ႈလၢၵ်ႈသွင်ႇၸိူဝ်းၼၼ်ႉၸၢင်ႊႁႂ်ႈတႃၵူၼ်းမီးပိင်ႇၺႃႇလပ်းၵႂႃႇမွတ်ႇၵႂႃႇလႄႈၸၢင်ႊႁႂ်ႈၵႂၢမ်းၸိူဝ်းဢၼ်သိုဝ်ႈတေႃႇၼၼ်ႉပိူင်ႈၵႂႃႇၽိတ်းၵႂႃႇဢေႃႈ။
၂၀ လွင်ႈၼင်ႇႁိုဝ်သူတၵ်းဢသၢၵ်ႈလိပ်းယူႇလႄႈၶၢမ်ႇဢမူၺ်ႇမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူၼၼ်ႉၸိုင်သူတၵ်းလႆႈၸွမ်းသဵၼ်ႈတၢင်းတြႃးဢၼ်သိုဝ်ႈဢၼ်တေႃႇၼၼ်ႉၵူၺ်းဢေႃႈ။
တၢင်းဢၼ်ႁဵတ်းဝၢတ်ႈၵူဝ်းၵႂၢႆႇၽြႃးတၢင်ႇသူႇတၢင်ႇပႃး
၂၁ သူဢမ်ႇလႆႈဢဝ်တူၼ်ႈမႆႉသေၸိူဝ်ႉသေမဵဝ်းပုၵ်းတင်ႈပုၼ်ႈဢႃႇသႃႇရၵႃႈတီႈႁိမ်းယိၸ်ႉပလၢင်ႇဢၼ်သူတႄႇႁဵတ်းပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈသူၼၼ်ႉ။ဢမ်ႇလႆႈဢဝ်မၢၵ်ႇႁိၼ်ၵွင်ႊပုၼ်ႈႁဵတ်းဝၢတ်ႈ။ထႃႇဝရႃႉၽြႃးၽြႃးပဵၼ်ၸဝ်ႈသူၸင်းၸိူဝ်းၼၼ်ႉ။