Chapter
၁၅
ပီႊဢၼ်ပွႆႇလွတ်ႈၼီႈ
၁ ၼႂ်းတီႈၶွႆႈပီႊၸဵတ်းပီႊယေႈပွၵ်ႈတၵ်းလႆႈႁဵတ်းတၢင်းဢၼ်ၶၢင်းၼီႈဢေႃႈ။ၼႄးလၢႆးတၢင်းဢၼ်ၶၢင်းၼီႈၸမ်းၸဝ်ႈၼီႈၼၼ်ႉတၵ်းလႆႈၶၢင်းပၼ်ၵႃႈဢၼ်မၼ်းပၼ်ၵူႈပၼ်ယိမ်တီႈၵူၼ်းမဵဝ်းဢိသရေႇလၼင်ႇၵၼ်ၼၼ်ႉဢေႃႈ။
၂ ၵွပ်ႈပိူဝ်ႈၶိင်ႇၵႃႇလႃႉၽြႃးပဵၼ်ၸဝ်ႈဢၼ်တၵ်းလႆႈၶၢင်းၼီႈၼၼ်ႉလႆႈပၢဝ်ႇသေႃႇယဝ်ႉလႄႈသူတၵ်းဢမ်ႇလႆႈယွၼ်းၼီႈၵႃႈတီႈၵူၼ်းမဵဝ်းဢိသရေႇလၼင်ႇၵၼ်ဢိၵ်ႇတင်းပီႈၼွင်ႉသူၸိူဝ်းၼၼ်ႉ။
၃ သူမီးဢၶႂၢင်ႉဢၼ်လႆႈယွၼ်းဢဝ်ၼီႈတီႈၵူၼ်းတၢင်ႇဝၢၼ်ႈတၢင်ႇမိူင်းဢေႃႈ။ၵူၺ်းၵႃႈၼီႈတီႈပီႈၼွင်ႉသူၼၼ်ႉၸိုင်သူဢမ်ႇလႆႈယွၼ်းဢဝ်။တၵ်းလႆႈၶၢင်းပၼ်ဢေႃႈ။
၄ ၼင်ႇႁိုဝ်ၵူၼ်းယၢၵ်းၵူၼ်းၽၢၼ်တၵ်းဢမ်ႇလႆႈမီးၵႃႈၼႂ်းသူၸိုင်ႈထႃႇဝရႃႉၽြႃးတၵ်းပၼ်တၢင်းလီယႂ်ႇၼႃႇလူင်လၢင်တီႈသူၵႃႈၼႂ်းမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူပုၼ်ႈဢၼ်သူတၵ်းၶၢမ်ႇဢမူၺ်ႇလႄႈပိူင်ႇၼၼ်ႉၸိုင်ႈ
၅ ထွမ်ႇဢဝ်ၵႂၢမ်းထႃႇဝရႃႉၽြႃးၽြႃးပဵၼ်ၸဝ်ႈသူၸေးၸေးၸွတ်ႇၸွတ်ႇႁႂ်ႈလႆႈပႂ်ႉၵမ်ပႂ်ႉၸွမ်းပိင်းၺၢပ်ႈၵႃႈဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၼၼ်ႉတႃႉ။
၆ ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းပၼ်တၢင်းလီတီႈသူၸွမ်းၼင်ႇၵႃႈၼင်ႇဢၼ်မၼ်းၸဝ်ႈဝႆႉၵတိတီႈသူၼၼ်ႉလႄႈသူတၵ်းပၼ်ၵူႈပၼ်ယိမ်တီႈၵူၼ်းမဵဝ်းၼမ်ၼႃႇဢေႃႈ။သူတၵ်းဢမ်ႇလူဝ်ႇၵူႈလူဝ်ႇယိမ်ဢဝ်တီႈၽႂ်။သူတၵ်းဢုပ်ႉပိူင်ႇၵူၼ်းမဵဝ်းၼမ်ၼႃႇဢေႃႈ။ပိူၼ်ႈတၵ်းဢမ်ႇလႆႈဢုပ်ႉပိူင်ႇသူ။
၇ ၼႂ်းပီႈၼႂ်းၼွင်ႉသူပေႃးမီးၵေႃႉဢၼ်ယၢၵ်ႈၽၢၼ်ၵႃႈတီႈၼႂ်းဝဵင်းသေဝဵင်းဝဵင်း၊ၵႃႈၼႂ်းမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူၼၼ်ႉၸိုင်သူဢမ်ႇလႆႈၶျူၵ်ႈႁူဝ်ၸႂ်သူဝႆႉ။မိုဝ်းသူၵေႃႈဢမ်ႇလႆႈဢိုတ်းႁပ်းဝႆႉပုၼ်ႈပီႈၼွင်ႉသူဢၼ်ယၢၵ်ႈၽၢၼ်ၼၼ်ႉ။
၈ သူတၵ်းလႆႈၽူၺ်ႇမိုဝ်းသူၵႂၢင်ႈၵႂၢင်ႈပုၼ်ႈမၼ်းလႄႈပၼ်ၵူႈပၼ်ယိမ်ႁႂ်ႈတင်းဢၼ်မၼ်းလူဝ်ႇၼႂ်းလွင်ႈတၢင်းဢၼ်မၼ်းယၢၵ်ႈၽၢၼ်ၼၼ်ႉထၢၼ်ႈပေႃးၵုမ်ႇဢေႃႈ။
၉ ႁဵတ်းသတိယႃႇႁႂ်ႈလႆႈမီးၸႂ်သၽေႃးဢၼ်ၵူဝ်ႈၵိူၵ်ႇၼႂ်းႁူဝ်ၸႂ်သူလႄႈဝႃႈ၊-ပီႊသတ်ႉထမပီႊဢၼ်တၵ်းလႆႈၶၢင်းၼီႈၼၼ်ႉၸမ်တၵ်းႁွတ်ႈမႃးယဝ်ႉ၊ဝႃႈၼင်ႇၼႆလႄႈၵိူဝ်ႈႁူၵိူဝ်ႈတႃၸူးပီႈၼွင်ႉသူဢၼ်ယၢၵ်ႈၽၢၼ်ၼၼ်ႉလႄႈယင်းဢမ်ႇပၼ်ၵႃႈသင်တီႈမၼ်းလႄႈမၼ်းတၵ်းႁွင်ႉသိၼ်တီႈထႃႇဝရႃႉၽြႃးၽၢႆႇၼိုင်ႈတင်းသူလႄႈႁႂ်ႈသူႁွတ်ႈထိုင်ဢပျႅတ်ႈဢေႃႈ။
၁၀ ဢမ်ႇမီးၸႂ်ဢၼ်သလေၢႆလႄႈပၼ်တီႈမၼ်းတႃႉ။ပေႃးႁဵတ်းၸိူဝ်ႉၼႆၸိုင်ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းပၼ်တၢင်းလီတီႈသူၵႃႈၼႂ်းၵၢၼ်ငၢၼ်းသူဢိၵ်ႇတင်းၵႃႈၼႂ်းၵႃႈဢၼ်သူဢဝ်မိုဝ်းသူသၢင်ႈႁဵတ်းၼၼ်ႉဢေႃႈ။
၁၁ ၵေႃႉဢၼ်ယၢၵ်ႈၽၢၼ်တၵ်းမီးယူႇၵႃႈၼႂ်းဝၢၼ်ႈၼႂ်းမိူင်းသူယူႇဢေႃႈ။ပိူဝ်ႈၼႆလႄႈၵဝ်သင်ႇလၢတ်ႈဝႆႉတီႈသူလႄႈဝႃႈသူတၵ်းလႆႈၽုၺ်ႇမိုဝ်းသူၵႂၢင်ႈၵႂၢင်ႈပုၼ်ႈပီႈၼွင်ႉသူၵေႃႉဢၼ်ယၢၵ်ႈၽၢၼ်၊ၵေႃႉဢၼ်ၸုတ်ႈဢၼ်လုတ်ႈၵႃႈၼႂ်းမိူင်းသူၼၼ်ႉဢေႃႈ။
ပွႆႇလွတ်ႈၶႃႈ
၁၂ ပေႃးၵူၼ်းမဵဝ်းႁေႇပႄး၊ၵူၼ်းယိင်းၵူၼ်းၸၢႆးၶၢႆတူဝ်ၸဝ်ႈၵဝ်ႇႁႂ်ႈလႆႈပဵၼ်ၶႃႈသူလႄႈပေႃးလႆႈၶၢမ်ႇႁဵတ်းၶႃႈတီႈသူႁူၵ်းပီႊသေယဝ်ႉ၊မိူဝ်ႈႁွတ်ႈထိုင်ပီႊသတ်ႉထမၼၼ်ႉၸိုင်သူတၵ်းလႆႈပွႆႇမၼ်းလွတ်ႈဢေႃႈ။
၁၃ မိူဝ်ႈဢၼ်သူပွႆႇမၼ်းလွတ်ႈၼၼ်ႉၸိုင်သူတၵ်းဢမ်ႇပွႆႇမၼ်းလွတ်ႈတိၼ်လၢႆမိုဝ်းပဝ်ႇ။
၁၄ သူတၵ်းလႆႈဢဝ်ယႂ်ႇယႂ်ႇၼမ်ၼမ်ၵႃႈၼႂ်းဢၼ်ၽုင်သူဝ်းသူ၊တလၢင်ႈယဵပ်ႇၶဝ်ႈသူၶိူင်ႈတီႈၼူတ်ႈမၢၵ်ႇၸပိတ်ႉသူၼၼ်ႉသေလႄႈပၼ်မၼ်းဢေႃႈ။တၵ်းလႆႈပၼ်တီႈမၼ်းၸွမ်းၵႃႈၼင်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တၢင်းလီတီႈသူၼၼ်ႉဢေႃႈ။
၁၅ ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်သူယၢမ်ႈလႆႈၶၢမ်ႇႁဵတ်းၶႃႈၵႃႈၼႂ်းမိူင်းဢေႇၵႅပ်ႉတုဢိၵ်ႇတင်းလွင်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူထုတ်ႇၼုၵ်ႈဢဝ်သူဢွၵ်ႇမႃးၼၼ်ႉဢေႃႈ။ၵွပ်ႈၼင်ႇၼၼ်လႄႈၵဝ်ဝႆႉပိင်းၺၢပ်ႈၼႆႉတီႈသူဝၼ်းမိူဝ်ႈၼႆႉဢေႃႈ။
၁၆ ၵူၺ်းၵႃႈပေႃးမၼ်းလၢတ်ႈတီႈသူလႄႈဝႃႈ၊-ၵဝ်ၶႃႈဢမ်ႇမီးဢလူဝ်ႇၶႂ်ႈဢွၵ်ႇၶႂ်ႈၵႂႃႇၶႃႈ။ၵဝ်ၶႃႈႁၵ်ႉပႅင်းၸဝ်ႈႁဝ်းဢိၵ်ႇတင်းၵူၼ်းႁိူၼ်းၵူၼ်းယေးၸဝ်ႈႁဝ်းၶႃႈဢေႃႈ။
၁၇ ၵဝ်ၶႃႈယူႇမူၼ်ႈပျေႃႇၶႃႈဢေႃႈ၊ဝႃႈၼင်ႇၼႆၸိုင်သူတၵ်းလႆႈဢဝ်လဵၵ်းၸီးလႄႈၸီးဝၢၼ်ႁူမၼ်းၵႃႈတီႈၽၵ်းတူသေယဝ်ႉမၼ်းတၵ်းလႆႈၶၢမ်ႇႁဵတ်းၶႃႈတီႈသူတႃႇသေႇဢေႃႈ။မိူၼ်ၼင်ႇၼၼ်တီႈၶႃႈၵူၼ်းယိင်းၵေႃႈသူတၵ်းလႆႈႁဵတ်းၸိူဝ်ႉၼၼ်ဢေႃႈ။
၁၈ မိူဝ်ႈဢၼ်သူပွႆႇမၼ်းလွတ်ႈၼၼ်ႉၸိုင်သူဢမ်ႇလႆႈထၢင်ႇပဵၼ်ဢၼ်ယၢပ်ႇဢၼ်ယဵၼ်း။လွင်ႈမၼ်းၸမ်းမၼ်းၶၢမ်ႇတၢင်းၸႂ်ႉတၢင်းသွႆႁူၵ်းပီႊတဵမ်တဵမ်သေလႄႈပွင်ႁဵတ်းၵၢၼ်သွင်ပုၼ်ႊဢၼ်ၵူၼ်းၵိၼ်ၸၢင်ႈၵိၼ်ငႃႈပွင်ႁဵတ်းၼၼ်ႉယဝ်ႉ။ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းပၼ်တၢင်းလီတီႈသူၼႂ်းၵႃႈဢၼ်သူႁဵတ်းၼၼ်ႉဢေႃႈ။
တူဝ်သတ်းဢၼ်ၵိူတ်ႇဢွၼ်တၢင်းသုတ်း
၁၉ ၼႂ်းၽုင်သူဝ်းၽုင်ဝူဝ်းသူၼၼ်ႉသူတၵ်းလႆႈဢဝ်တူဝ်ပေႃႈဢၼ်ၵိူတ်ႇလဵင်ႉမႃးဢွၼ်တၢင်းပိူၼ်ႈၼၼ်ႉႁႂ်ႈမူတ်းၸၢင်ႇပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။ဝူဝ်းဢၼ်ၵိူတ်ႇလဵင်ႉမႃးဢွၼ်တၢင်းပိူၼ်ႈၼၼ်ႉသူဢမ်ႇလႆႈၸႂ်ႉႁဵတ်းၵၢၼ်။သူဝ်းဢၼ်ၵိူတ်ႇလဵင်ႉမႃးဢွၼ်တၢင်းပိူၼ်ႈၼၼ်ႉသူဢမ်ႇလႆႈၵႅတ်းႁႆးၶူၼ်မၼ်း။
၂၀ သူဢိၵ်ႇတင်းၵူၼ်းႁိူၼ်းၵူၼ်းယေးသူတၵ်းလႆႈၵိၼ်ဝူဝ်းပေႃႈသူဝ်းပေႃႈၸိူဝ်းၼၼ်ႉၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်းသူၼႂ်းတီႈဢၼ်ထႃႇဝရႃႉၽြႃးလိူၵ်ႈၵဵပ်းဢဝ်ၼၼ်ႉၵူႈပီႊဢေႃႈ။
၂၁ ပေႃးဝူဝ်းသူဝ်းၼၼ်ႉမီးဢၢင်ႇၵႃႇဢၼ်ဢမ်ႇတဵမ်ထူၼ်ႈတိၼ်ၵႅင်ႉတိၼ်ၵုၵ်ႈဢမ်ႇၼၼ်တႃမွတ်ႇတႃၵႅၵ်းတၢင်ႇၸိူဝ်ႉတၢင်ႇဢၼ်သေၸိူဝ်ႉသေပိူင်ၸိုင်သူဢမ်ႇလႆႈဢဝ်ပုၵ်ႉၸေႃႇယိၸ်ႉတီႈထႃႇဝရႃႉၽြႃးၽြႃးပဵၼ်ၸဝ်ႈသူ။
၂၂ သူတၵ်းလႆႈဢဝ်ၵိၼ်ၵႃႈၼႂ်းဝဵင်းသူဢေႃႈ။ၵေႃႉဢၼ်မူတ်းသႂ်ၵေႃႉဢၼ်ဢမ်ႇမူတ်းသႂ်တၵ်းလႆႈၵိၼ်ၼင်ႇၵၼ်မိူၼ်ၸိူင်ႉၼင်ႇဢၼ်ၵိၼ်ၵႂၢင်ၵိၼ်ယိူင်းၼၼ်ႉဢေႃႈ။
၂၃ ၵူၺ်းၵႃႈဢမ်ႇလႆႈၵိၼ်လိူတ်ႈမၼ်း။တၵ်းလႆႈဢဝ်လိူတ်ႈမၼ်းထွၵ်ႇပႅတ်ႈၵႃႈၼိူဝ်လိၼ်မိူၼ်ၸိူဝ်ႉၼင်ႇထွၵ်ႇၼမ်ႉၼၼ်ႉဢေႃႈ။