Chapter
၁၄
တၢင်းၵိၼ်ဢၼ်မူတ်းၸၢင်ႇတင်းၵိၼ်ဢၼ်ဢမ်ႇမူတ်းၸၢင်ႇ
၁သူၼႆႉပဵၼ်လုၵ်ႈထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။ၵွပ်ႈပိူဝ်ၵူၼ်းတၢႆလႄႈသူဢမ်ႇလႆႈထိူဝ်လႆႈၽၼ်းၼိူဝ်ႉသူ။ဢမ်ႇလႆႈထႃၶူၼ်ႁူဝ်ဢၼ်မီးသိုဝ်ႈဝူင်ႈၵၢင်မၢၵ်ႇတႃသူ။
၂လွင်ႈမၼ်းၸမ်းသူပဵၼ်ၵူၼ်းမဵဝ်းဢၼ်မူတ်းၸၢင်ႇပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။ထႃႇဝရႃႉၽြႃးလိူၵ်ႈၵဵပ်းဢဝ်သူႁႂ်ႈသူလႆႈပဵၼ်မဵဝ်းဢၼ်မၼ်းၸဝ်ႈထိူၵ်ႈပိူင်ႇလိူဝ်တွၼ်းသေမဵဝ်းၵူၼ်းၵႃႈဢၼ်မီးၵႃႈၼိူဝ်ၼင်လိၼ်မိူင်းၼႆႉၼၼ်ႉဢေႃႈ။
၃သူဢမ်ႇလႆႈၵိၼ်ၶူပ်းဢၼ်လီႁင်ႈဢဵတ်ႇသဵတ်ႇၼၼ်ႉ။
၄တရိၵ်ႉသၢၼ်ႇဢၼ်သူလႆႈၵိၼ်ၸမ်းပဵၼ်ဝူဝ်း၊သူဝ်း၊ပေႉ၊ယိူင်း၊
၅ၵႂၢင်၊ၸၢတ်ႇၶၢႆး၊ၽၢၼ်း၊ပေႉထိူၼ်၊တိုင်၊ယီးၸိူဝ်းၼၼ်ႉဢေႃႈ။
၆ၵႃႈၼႂ်းတရိၵ်ႉသၢၼ်ႇတင်းလၢႆသူလႆႈၵိၼ်တူဝ်ၵႃႈဢၼ်ၵိပ်ႇတႅၵ်ႇသေလႄႈတိၼ်ပဵၼ်ငၢမ်ႊဝႆႉလႄႈၵဵဝ်ႉဢိူင်ႈၼၼ်ႉဢေႃႈ။
၇ၼႂ်းဝႃႈၼၼ်သေၵေႃႈတူဝ်ဢၼ်သူဢမ်ႇလႆႈၵိၼ်ၼႂ်းတူဝ်ဢၼ်ၵဵဝ်ႉဢိူင်ႈဢိၵ်ႇတင်းတူဝ်ဢၼ်တိၼ်ပဵၼ်ငၢမ်ႊဝႆႉၸိူဝ်းၼၼ်ႉၸမ်းပဵၼ်ၵလႃဢူၵ်ႉပၢင်တၢႆးပၢင်တၢႆးသၽၢၼ်းဢေႃႈ။ပိၵ်ႉသမ်ႉၵဵဝ်ႉဢိူင်ႈသေၵေႃႈပဵၼ်ဢၼ်ၵိပ်ႇဢမ်ႇတႅၵ်ႇလႄႈပဵၼ်ဢၼ်ဢမ်ႇမူတ်းသႂ်တီႈသူ။
၈မူၸိုင်ပိၵ်ႉသမ်ႉၵိပ်ႇတႅၵ်ႇသေၵေႃႈၵွပ်ႈပိူဝ်ႈဢၼ်ဢမ်ႇၵဵဝ်ႉဢိူင်ႈလႄႈပဵၼ်ဢၼ်ဢမ်ႇမူတ်းသႂ်။သူဢမ်ႇလႆႈၵိၼ်ၼိူဝ်ႉမၼ်း။တူဝ်တၢႆမၼ်းၵေႃႈသူဢမ်ႇလႆႈတိူဝ်ႉလႆႈယိပ်း။
၉တရိၵ်ႉသၢၼ်ႇဢၼ်ယူႇၼႂ်းၼမ်ႉလႄႈသူမီးဢၶႂၢင်ႉဢၼ်လႆႈၵိၼ်ၼၼ်ႉၸမ်း၊ပဵၼ်တရိၵ်ႉသၢၼ်ႇဢၼ်မီးပိၵ်ႇမီးၵဵတ်းၼၼ်ႉဢေႃႈ။
၁၀ တရိၵ်ႉသၢၼ်ႇဢၼ်ဢမ်ႇမီးပိၵ်ႇဢမ်ႇမီးၵဵတ်းၼၼ်ႉၸိုင်ႈသူဢမ်ႇလႆႈၵိၼ်။ပဵၼ်ဢၼ်ဢမ်ႇမူတ်းသႂ်တီႈသူ။
၁၁ ၼူၵ်ႉဢၼ်မူတ်းသႂ်ၵူႈၸိူဝ်ႉၵူႈမဵဝ်းၸိုင်သူမီးဢၶႂၢင်ႉဢၼ်လႆႈၵိၼ်ဢေႃႈ။
၁၂ ၼူၵ်ႉဢၼ်သူဢမ်ႇလႆႈၵိၼ်ၼၼ်ႉၸမ်းပဵၼ်လၢင်းတႃႉၶမ်း
၁၃ ႁုင်ႉလူင်လၢင်းတႃႉပၢင်ႇလၢႆႇရႁႃႇ၊မဵဝ်းႁုင်ႉ၊
၁၄ -၁၅ ယိဝ်ႉၸွၵ်ႇၵူႈမဵဝ်း၊မဵဝ်းၵႃလူင်ၵူႈမဵဝ်း၊ၼူၵ်ႉၵလႃႇဢူၵ်ႉ၊ၼူၵ်ႉႁၢႆႉ၊
၁၆ -၁၇ ၼူၵ်ႉယၢင်း၊မဵဝ်းယဵဝ်ႈၵူႈမဵဝ်း၊ၵဝ်ႉ၊တီးတုတ်ႈ၊
၁၈ ၵဝ်ႉငႅမ်ႇ၊ၼူၵ်ႉဝုၼ်ႇပူဝ်ႇ၊ၼူၵ်ႉၸဝ်ႉ၊ၵႃၸႂ်း၊ၵွၼ်ႇ၊မဵဝ်းၼူၵ်ႉယၢင်ႇလိူၼ်ၵူႈမဵဝ်းၼူၵ်ႉတွႆႇၵိုဝ်းတင်းဝိင်ႇၸိူဝ်းၼၼ်ႉဢေႃႈ။
၁၉ မႅင်းဢၼ်မီးပိၵ်ႇလႄႈၸၢင်ႊၵႂႃႇၸၢင်ႈၵၢၼ်းၸိူဝ်းၼၼ်ႉပဵၼ်ဢၼ်ဢမ်ႇမူတ်းသႂ်တီႈသူ။
၂၀ သူဢမ်ႇလႆႈၵိၼ်။ၼူၵ်ႉဢၼ်မူတ်းသႂ်ၵူႈၸိူဝ်ႉၵူႈမဵဝ်းၸိုင်၊သူမီးဢၶႂၢင်ႉဢၼ်လႆႈၵိၼ်ဢေႃႈ။
၂၁ တူဝ်ဢၼ်တၢႆႁင်းၵူၺ်းမၼ်းၼၼ်ႉသူဢမ်ႇလႆႈၵိၼ်။သူမီးဢၶႂၢင်ႉဢၼ်လႆႈဢဝ်တူဝ်တၢႆၼၼ်ႉပၼ်တီႈၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်မီးယူႇၵႃႈၼႂ်းဝဵင်းသူပုၼ်ႈဢၼ်ၶဝ်တၵ်းၵိၼ်ဢေႃႈ။ဢမ်ႇၼၼ်ၵေႃႈသူမီးဢၶႂၢင်ႉဢၼ်တူဝ်တၢႆၼၼ်ႉၶၢႆပၼ်တီႈၵူၼ်းတၢင်ႇဝၢၼ်ႈတၢင်ႇမိူင်းဢေႃႈ။သူပဵၼ်ၵူၼ်းမဵဝ်းဢၼ်မူတ်းၸၢင်ႇထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။သူဢမ်ႇလႆႈဢဝ်ပေႉဢွၼ်ႇတူမ်ႈႁုင်ၼႂ်းၼမ်ႉၼူမ်းမေႈမၼ်း။
၂၂ ၵႃႈဢၼ်ယႂ်ႇၽတေူဝ်းတွၼ်းမႃးတီႈၸိူဝ်ႉၽၼ်းသူဢၼ်ဢွၵ်ႇပဵၼ်မႃးၵႃႈၼႂ်းႁႆႊၼႂ်းၼႃးသူၵူႈပီႊၵူႈပီႊၼၼ်ႉသိပ်းပုၼ်ႊပုၼ်ႊၼိုင်ႈၼၼ်ႉသူတၵ်းလႆႈၽႄဢွၵ်ႇဝႆႉဢမၢၼ်ႇၶၼ်ပဵၼ်ဢေႃႈ။
၂၃ လွင်ႈၼင်ႇႁိုဝ်တၵ်းလႆႈရူဝ်ႇသေႇၵူဝ်ယမ်ထႃႇဝရႃႉၽြႃးၽြႃးပဵၼ်ၸဝ်ႈသူယူႇတႃႇသေၼၼ်ႉၸိုင်သူတၵ်းလႆႈၵိၼ်ၶဝ်ႈပိူၵ်ႇသူၼမ်ႉၸပိတ်ႉသူၼမ်ႉမၼ်းသူတူဝ်ပေႃႈဢွၼ်ႇဢၼ်ၵိူတ်ႇလဵင်ႉမႃးဢွၼ်တၢင်းပိူၼ်ႈၼႂ်းၽုင်သူဝ်းၽုင်ဝူဝ်းသူသိပ်းပုၼ်ႊပုၼ်ႈၼိုင်ႈၼၼ်ႉၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈသူၵႃႈၼႂ်းတီႈဢၼ်မၼ်းၸဝ်ႈလိူၵ်ႈၵဵပ်းဢဝ်ပုၼ်ႈဢၼ်တၵ်းႁႂ်ႈၼႃႇမႃႉၸိုဝ်ႈသဵင်မၼ်းၸဝ်ႈတေႇယူႇတႃႇသေႇၼၼ်ႉဢေႃႈ။
၂၄ ပေႃးသဵၼ်ႈတၢင်းယၢဝ်းၼႃႇထၢၼ်ႈပေႃးသူဢမ်ႇဢဝ်ၵႂႃႇလႆႈသိပ်းပုၼ်ႊပုၼ်ႊၼိုင်ႈၸိူဝ်းၼၼ်ႉၸိုင်ႈသူတၵ်းလႆႈၶၢမ်ႇဢုၵ်ႉၸႃႇၼၼ်ႉလႅၵ်ႈပဵၼ်ငိုၼ်းသေယဝ်ႉပူၵ်ႉႁေႃႇငိုၼ်းသႂ်ႇဝႆႉၵႃႈၼႂ်းမိုဝ်းသူသေလႄႈ
၂၅ ပႃးဢဝ်ၵႂႃႇၸူးၵႃႈတီႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူလိူၵ်ႈၵဵပ်းဢဝ်ၼၼ်ႉလႄႈသိုဝ်ႉဢဝ်ၵႃႈၼင်ႇဢၼ်သူမီးဢလူဝ်ႇဢၼ်ပဵၼ်သူဝ်း၊ဝူဝ်း၊ၼမ်ႉၸပိတ်ႉ၊ၼမ်ႉလဝ်ႈၵႃႈဢၼ်ၸႂ်သူယွၼ်းၵိၼ်ၼၼ်ႉသေယဝ်ႉ၊
၂၆ ၵိၼ်ၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈသူၵႃႈတီႈၼၼ်ႉလႄႈသူဢိၵ်ႇတင်းၵူၼ်းႁိူၼ်းၵူၼ်းယေးသူတင်းလၢႆဢွၼ်ၵၼ်ႁဵတ်းတၢင်းဢၼ်သႂၢင်ႇသိူဝ်းမူၼ်ႈပျေႃႇတႃႉ။
၂၇ ၵူၼ်းမဵဝ်းလေႇဝိဢၼ်သွၼ်ပိုင်ႈယူႇၵႃႈၼႂ်းဝဵင်းသူၼၼ်ႉၸမ်းၵွပ်ႈပိူဝ်ႈဢၼ်ၶဝ်ဢမ်ႇလႆႈပုၼ်ႈလႆႈတႃႇဢမ်ႇလႆႈၶၢမ်ႇဢမူၺ်ႇလူၺ်ႈၵၼ်တင်းသူလႄႈသူဢမ်ႇလႆႈၸုၼ်ႉလႆႈပႅတ်ႈၶဝ်။
၂၈ ၼႂ်းတီႈသုတ်းပီႊတတိယၼၼ်ႉသူတၵ်းလႆႈၽေဢွၵ်ႇဢဝ်ဢၼ်ယႂ်ႇၽတေူဝ်းတွၼ်းမႃးပီႊၼၼ်ႉသိပ်းပုၼ်ႊပုၼ်ႊၼိုင်ႈသေလႄႈသိမ်းဝႆႉၵႃႈၼႂ်းဝဵင်းဢေႃႈ။
၂၉ ၵူၼ်းမဵဝ်းလေႇဝိဢၼ်ဢမ်ႇလႆႈပုၼ်ႈလႆႈတႃႇဢမ်ႇလႆႈၶၢမ်ႇဢမူၺ်ႇလူၺ်ႈၵၼ်တင်းသူၵူၼ်းတၢင်ႇၸိူဝ်ႉတၢင်ႇၶိူဝ်းလုၵ်ႈဢွၼ်ႇဢၼ်ဢမ်ႇမီးပေႃႈမီးမေႈမေႈမုၵ်ႉမေႈမၢႆႈဢၼ်မီႈၵႃႈၼႂ်းဝဵင်းသူၸိူဝ်းၼၼ်ႉတၵ်းလႆႈမႃးလႄႈၵိၼ်ဢိမ်ႇၵိၼ်တဵမ်ႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈသူလႆႈပၼ်တၢင်းလီတီႈသူၼႂ်းၵၢၼ်တၢင်းႁဵတ်းၵႃႈဢၼ်မိုဝ်းသူႁဵတ်းၼၼ်ႉဢေႃႈ။