Chapter
၂
လႄႇလဵပ်ႈၵႃႈၼႂ်းထိူၼ်ႇ
၁ ႁဝ်းဝၢႆႇၶိုၼ်းလႄႈဢွၵ်ႇတႃပႆတၢင်းၸွမ်းသဵၼ်ႈတၢင်းပၢင်ႇလၢႆႇဢေႇတုင်ႇၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉတီႈၵဝ်ၼၼ်ႉလႄႈလဵပ်ႈလွႆၸိရယူႇမိုဝ်ႉဝၼ်းၼမ်ၼႃႇလူင်လၢင်ဢေႃႈ။
၂ ထႃႇဝရႃႉၽြႃးသင်လၢတ်ႈတီႈၵဝ်လႄႈဝႃႈ၊-သူလႄႇလဵပ်ႈလွႆၼႆႉႁိုင်ၼႃႇယဝ်ႉ။ပေႃးယဝ်ႉ။
၃ သမ်ႉဝၢႆႇၶိုၼ်ႈၵႂႃႇၽၢႆႇတၢင်းႁွင်ႇလူၵွၼ်ႇတႃႉ။သူလၢတ်ႈတီႈၵူၼ်းတၢင်းလၢႆလႄႈဝႃႈ၊-သူတၵ်းလႆႈပႆၸွမ်းၵႂႃႇၵႃႈၼႂ်းလႅၼ်လိၼ်မိူင်းပီႈၼွင်ႉသူၵူၼ်းမဵဝ်းဢေးသေႃးဢၼ်ယူႇၵႃႈၼႂ်းမိူင်းၸိရၸိူဝ်းၼၼ်ႉဢေႃႈ။
၄ ၶဝ်ၼၼ်ႉတၵ်းၵူဝ်ႁသေူဢေႃႈ။ပိူဝ်ႈၼႆလႄႈတူဝ်သူႁဵတ်းသတိတီႈတူဝ်သူတႃႉ။
၅ ယႃႇပေၽိတ်းၵၼ်တင်းၶဝ်လႃးလႃး။ၵဝ်ဢမ်ႇဢဝ်မိူင်းၶဝ်ၼၼ်ႉပၼ်တီႈသူ။လိၼ်ဢၼ်တႃႇတိၼ်တၵ်းယဵပ်ႇသေၵေႃႈၵဝ်ဢမ်ႇပၼ်တီႈသူ။လွင်ႈမၼ်းၸမ်းၵဝ်ဢဝ်လွႆၸိရပၼ်တီႈဢေးသေႃးႁႂ်ႈမၼ်းပိူင်ႇဢေႃႈ။
၆ သူတၵ်းလႆႈဢဝ်ငိုၼ်းသိုဝ်ႉဢဝ်တၢင်းၵိၼ်တၢင်းၶူပ်းတီႈၶဝ်ပုၼ်ႈဢၼ်သူတၵ်းၵိၼ်တၵ်းၶူပ်းဢိၵ်ႇတင်းၼမ်ႉဢၼ်သူတၵ်းသူတ်ႉၼၼ်ႉဢေႃႈ။
၇ ထႃႇဝရႃႉၽြႃးၽြႃးပဵၼ်ၸဝ်ႈသူၼၼ်ႉပၼ်တၢင်းလီတီႈသူၼႂ်းၵႃႈဢၼ်သူႁဵတ်းသူသၢင်ႈၼၼ်ႉယဝ်ႉ။မၼ်းၸဝ်ႈႁူႉလွင်ႈတၢင်းဢၼ်သူၵႂႃႇၵႂႃႇမႃးမႃးၵႃႈၼႂ်းထိူၼ်ႇလူင်ၼႆၼၼ်ႉယူႇဢေႃႈ။သီႇသိပ်းပီႊတဵမ်တဵမ်ထႃႇဝရႃႉၽြႃးၽြႃးပဵၼ်ၸဝ်ႈသူမီးယူႇလူၺ်ႈၵၼ်တင်းသူလႄႈသူဢမ်ႇလူဝ်ႇထႅင်ႈၵႃႈသင်လႃးလႃးဝႃႈၼင်ႇၼႆယဝ်ႉ။
၈ ႁဝ်းၵၢႆၵႂႃႇၵႃႈတီႈႁိမ်းပီႈၼွင်ႉႁဝ်းၵူၼ်းမဵဝ်းဢေးသေႃးဢၼ်ယူႇၵႃႈၼႂ်းမိူင်းၸိရၼၼ်ႉသေလႄႈၸွမ်းသဵၼ်ႈတၢင်းပၢင်ႇပဵင်းဢႃႇရၽႃႇဢၼ်လုၵ်ႉၵႃႈတီႈဝဵင်းဢေႇလတ်ႉဢိၵ်ႇတင်းဝဵင်းဢေႇၸရုၼ်ႇၵႃႇပႃႇၼၼ်ႉသေယဝ်ႉသမ်ႉဝၢႆႇၶိုၼ်ႈလႄႈၸွမ်းသဵၼ်ႈတၢင်းထိူၼ်ႇမေႃႇၽဢေႃႈ။
၉ ထႃႇဝရႃႉၽြႃးၵေႃႈမီးဢမိင်ႉတီႈၵဝ်လႄႈဝႃႈ၊-ယႃႇပေယႃႉယုင်ႈမိူင်းမေႃႇၽ။ယႃႇပေတိုၵ်းသိုၵ်းၵၼ်တင်းၶဝ်။လွင်ႈမၼ်းၸမ်းၵွပ်ႈပိူဝ်ႈဢၼ်ၵဝ်ဢဝ်မိူင်းဢႃႇရပၼ်တီႈၵူၼ်းမဵဝ်းလေႃးတႁႂ်ႈၶဝ်ပိူင်ႈယဝ်ႉလႄႈၵဝ်ဢမ်ႇဢဝ်မိူင်းၶဝ်ၼၼ်ႉပၼ်တီႈသူႁႂ်ႈသူပိူင်ႈ။
၁၀ ၵူၼ်းမဵဝ်းဢေႇမိမ်ႇဢၼ်ပဵၼ်ၵူၼ်းဢၼ်ယႂ်ႇၼႃႇၼမ်ၼႃႇသုင်ၼႃႇမိူၼ်ၸိူဝ်ႉၼင်ႇၵူၼ်းမဵဝ်းဢႃႇၼၵၼၼ်ႉယူႇၵႃႈတီႈမိူင်းၼၼ်ႉမိူဝ်ႈၵွၼ်ဢွၼ်ၼႆႉၼၼ်ႉဢေႃႈ။
၁၁ ပိူၼ်ႈမၢတ်ႈၶဝ်ၶဝ်ႈပႃးၵႃႈၼႂ်းၵူၼ်းဢၼ်ယႂ်ႇၼႃႇႁႅင်းၼႃႇမိူၼ်ၸိူဝ်ႉၼင်ႇၵူၼ်းမဵဝ်းဢႃႇၼၵၼၼ်ႉဢေႃႈ။ၼႂ်းဝႃႈၼၼ်သေၵေႃႈၵူၼ်းမိူင်းမေႃႇၽတင်းလၢႆႁွင်ႉၶဝ်ဝႃႈဢေႇမိမ်ႇဢေႃႈ။
၁၂ မိူဝ်ႈၵွၼ်ႇဢွၼ်ၼၼ်ႉၵူၼ်းႁေႃႇရိတင်းလၢႆယူႇၵႃႈၼႂ်းမိူင်းၸိရဢေႃႈ။ၵူၼ်းမဵဝ်းဢေးသေႃးတင်းလၢႆပုတ်ႉဢဝ်တီႈၶဝ်ၼၼ်ႉလႄႈပေႇၽဵဝ်ႈၶဝ်ပႅတ်ႈသေယဝ်ႉယူႇၵႃႈၼႂ်းတီႈယူႇၶဝ်ၼၼ်ႉမိူၼ်ၸိူဝ်ႉၼင်ႇဢၼ်ၵူၼ်းမဵဝ်းဢိသရေႇလတင်းလၢႆလႆႈႁဵတ်းၵႃႈတီႈမိူင်းဢၼ်ထႃႇဝရႃႉၽြႃးပၼ်ၶဝ်ပိူင်ႇၼၼ်ႉဢေႃႈ။
၁၃ တေႃႈလဵဝ်ၼႆႉလုၵ်ႉလႄႈဢွၼ်ၵၼ်ၶၢမ်ႈၼမ်ႉႁွင်ႊၸေႇရိတ်ႉတႃႉ၊ဝႃႈၼင်ၼႆလႄႈႁဝ်းဢွၼ်ၵၼ်ၶၢမ်ႈၼမ်ႉႁွင်ႊၸေႇရိတ်ႉဢေႃႈ။
၁၄ ၶိင်ႇၵႃႇလႃႉမိူဝ်ႈဝၼ်းၼၼ်ႉဢဝ်ၸႃႉၸဵမ်ဢၼ်ႁဝ်းလုၵ်ႉသေၵႃႈတီႈၵႃႇတေႇသပႃႇၼၵႂႃႇတေႃႇထိုင်ႁွတ်ႈႁဝ်းၶၢမ်ႈၼမ်ႉႁွင်ႊၸေႇရိတ်ႉတေႃႇထိုင်ႁွတ်ႈၵူၼ်းသိုၵ်းၸုမ်းဢွၼ်ႇတၢင်းလႆႈလူႉႁၢႆတၢႆၵႂႃႇၵႃႈၼႂ်းၵၢင်မုၵ်ႉၵူၼ်းၸိူဝ်းၵူၼ်းၸွမ်းၵႃႈၼင်ႇဢၼ်ထႃႇဝရႃႉၽြႃးၵိၼ်ႇဝႃႈၼၼ်ႉ၊လႆႈသၢမ်သိပ်းပႅတ်ႇပီႊဢေႃႈ။
၁၅ ထႃႇဝရႃႉၽြႃးယဵတ်ႇမိုဝ်းမၼ်းၸဝ်ႈယူႇၽၢႆႇၼိုင်ႈတင်းၶဝ်ႁႂ်ႈလႆႈပႄႇၽဵဝ်ႈၶဝ်ပႅတ်ႈသေၵႃႈၼႂ်းၵၢင်မုၵ်ႉၵူၼ်းၸိူဝ်းၵူၼ်းတေႃႇထိုင်ႁွတ်ႈထၢၼ်ႈပေႃးၶဝ်လူႉႁၢႆတၢႆၵႂႃႇၼၼ်ႉဢေႃႈ။
၁၆ ၵူၼ်းသိုၵ်းၸိူဝ်းၼၼ်ႉလူႉႁၢႆတၢႆၵႂႃႇသေၵႃႈၼႂ်းၵၢင်မုၵ်ႉၵူၼ်းၸိူဝ်ႉၵူၼ်းသေယဝ်ႉထႃႇဝရႃႉၽြႃးမီးဢမိင်ႉတီႈၵဝ်လႄႈဝႃႈ၊-
၁၇ ဝၼ်းမိူဝ်ႈၼႆႉသူတၵ်းလႆႈၶၢမ်ႈလိၼ်ဢႃႇရဢၼ်ပဵၼ်လႅၼ်လိၼ်မိူင်းမေႃႇၽၼၼ်ႉၵႂႃႇဢေႃႈ။
၁၈ မိူဝ်ႈဢၼ်သူႁွတ်ႈထိုင်ၵႃႈတီႈႁိမ်းၵူၼ်းမဵဝ်းဢမ်ႇမုၼ်ႇၸိူဝ်းၼၼ်ႉၸိုင်ယႃႇပေယႃႉယုင်ႈၶဝ်။
၁၉ ယႃႇပေၽိတ်းၵၼ်တင်းၶဝ်လႃးလႃး။ၵဝ်ဢမ်ႇဢဝ်မိူင်းၵူၼ်းမဵဝ်းဢမ်ႇမုၼ်ႇပၼ်တီႈသူႁႂ်ႈသူပိူင်ႇမိူၼ်ၼင်ႇၸိူဝ်းဢၼ်ၵဝ်ပၼ်တီႈၵူၼ်းမဵဝ်းလေႃးတႁႂ်ႈၶဝ်ပိူင်ႇၼၼ်ႉ၊ဝႃႈၼင်ႇၼႆဢေႃႈ။မိူင်းၼၼ်ႉၵေႃႈပိူၼ်ႈမၢတ်ႈပဵၼ်တီႈဢၼ်ၵူၼ်းႁႅင်းယႂ်ႇၶဝ်ယူႇၼၼ်ႉဢေႃႈ။
၂၀ ၵူၼ်းဢၼ်ႁႅင်းယႂ်ႇၸိူဝ်းၼၼ်ႉၵူၼ်းမိူင်းဢမ်ႇမုၼ်ႇၶဝ်တင်းလၢႆႁွင်ႉၶဝ်ဝႃႈၸုမ်ႇမိမ်ႇဢေႃႈ။
၂၁ ၵူၼ်းမဵဝ်းၼၼ်ႉပဵၼ်ၵူၼ်းဢၼ်ယႂ်ႇၼႃႇၼမ်ၼႃႇသုင်ၼႃႇမိူၼ်ၸိူဝ်ႉၼင်ႇၵူၼ်းမဵဝ်းဢႃႇၼၵဢေႃႈ။ၵူၺ်းၵႃႈထႃႇဝရႃႉၽြႃးယႃႉၶဝ်ပႅတ်ႈသေၵႃႈတီႈၽၢႆႇၼႃႈၶဝ်လႄႈၶဝ်ပုတ်ႉယူႇၵႃႈတီႈၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၂၂ မိူၼ်ၸိူဝ်ႉၼင်ႇမၼ်းၸဝ်ႈယႃႉၵူၼ်းႁေႃႇရိတင်းလၢႆပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်းဢေးသေႃးဢၼ်ယူႇၵႃႈတီႈမိူင်းၸိရလႄႈပုတ်ႇတီႈယူႇၶဝ်ၵႃႈတီႈၼၼ်ႉတေႃႇထိုင်ႁွတ်ႈဝၼ်းမိူဝ်ႈၼႆႉၼၼ်ႉဢေႃႈ။
၂၃ မိူၼ်ၼင်ႇၼၼ်ၵူၼ်းဢႃႇဝိမ်ႇဢၼ်ယၢမ်ႈယူႇၵႃႈၼႂ်းဝၢၼ်ႈတင်းလၢႆတေႃႇထိုင်ႁွတ်ႈဝဵင်းၵႃႇၸၸိူဝ်းၼၼ်ႉၵေႃႈၵူၼ်းမဵဝ်းၵပ်ႇတေႃႇရိမ်ႇဢၼ်ဢွၵ်ႇသေၵႃႈတီႈဝဵင်းၵပ်ႉတေႃႇၸိူဝ်းၼၼ်ႉဢွၼ်ၵၼ်ယႃႉပႅတ်ႈလႄႈယူႇၵႃႈၼႂ်းတီႈယူႇၶဝ်ၼၼ်ႉဢေႃႈ။
ၶုၼ်ႁေႃႇၶမ်းႁေႇသၽုၼ်ႇတူၵ်းသုမ်း
၂၄ မၼ်းၸဝ်ႈမီးဢမိင်ႉလႄႈဝႃႈ၊-သူဢွၼ်ၵၼ်လုၵ်ႉလႄႈဢွၵ်ႇတႃပႆတၢင်းသေလႄႈၶၢမ်ႈၼမ်ႉႁွင်ႊဢႃႇၼုၼ်ႇၵႂႃႇတႃႉ။ၵဝ်ဢဝ်လႅၼ်လိၼ်သီႇႁုၼ်ႇၵူၼ်းဢႃႇမေႃးရိဢၼ်ပဵၼ်ၶုၼ်ႁေႃၶမ်းႁေႇသၽုၼ်ႇဢိၵ်ႇတင်းလႅၼ်လိၼ်မၼ်းဢၢပ်ႈပၼ်ၵႃႈၼႂ်းမိုဝ်းသူဢေႃႈ။ဢွၼ်ၵၼ်ယႃႉသိမ်းဢဝ်လႄႈတိုၵ်းသိုၵ်းၵၼ်တင်းမၼ်းတႃႉ။
၂၅ ဝၼ်းမိူဝ်ႈၼႆႉၵဝ်တၵ်းတႄႇၸႃႉႁႂ်ႈတၢင်းဢၼ်တူၵ်းၸႂ်ၵွပ်ႈပိူဝ်ႈသူဢိၵ်ႇတင်းတၢင်းဢၼ်ၵူဝ်ႁႄသူၼၼ်ႉႁွတ်ႈထိုင်ၵႃႈၼိူဝ်ၵူၼ်းမဵဝ်းတင်းလၢႆဢၼ်မီးတႂ်ႈၽႃႉၵၢင်ႁၢင်ၵူႈတီႈၵူႈလႅၼ်တၵ်းငိၼ်းသတၢင်းသဵင်ၶၢဝ်ႇလွင်ႈသူလႄႈႁွတ်ႈထိုင်တၢင်းဢၼ်သၼ်ႇဝႆဢိၵ်ႇတင်းတၢင်းဢၼ်ယၢပ်ႇၸႂ်ၽိုတ်ႇၸႂ်ၼႃႇလူင်လၢင်ၵွပ်ႈပိူဝ်ႈသူၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၆ ၵဝ်ၵေႃႈပွႆႇၸႂ်ႉသၢၼ်ႇတမၢၼ်ႇတင်းလၢႆဢွၵ်ႇသေၵႃႈတီႈထိူၼ်ၵေႇတမုတ်ႉၵႂႃႇၵႃႈတီႈသီႇႁုၼ်ႇၶုၼ်ႁေႃၶမ်းႁေႇသၽုၼ်ႇသေလႄႈဢဝ်တင်းၵႂၢမ်းမိၵ်ႉသႁႃႇယႃႉလၢတ်ႈလႄႈဝႃႈ၊-ႁႂ်ႈႁဝ်းၶႃႈလႆႈၽႃႇလတ်းၵႃႈၼႂ်းမိူင်းၶုၼ်လူင်သေၵမ်း။
၂၇ ႁဝ်းတၵ်းၸွမ်းၶူၼ်တၢင်းလူင်ၵူၺ်းၶႃႈဢေႃႈ။ဢမ်ႇဝႄႈပိူင်ႈၵႂႃႇၵႃႈတီႈၽၢႆႇသၢႆႉၽၢႆႇၶႂႃၶႃႈ။
၂၈ ၶၢႆတၢင်းၵိၼ်တၢင်းၶူပ်းပုၼ်ႈႁဝ်းၶႃႈတၵ်းၵိၼ်ၼမ်ႉဢၼ်ႁဝ်းၶႃႈတၵ်းသူတ်းၼၼ်ႉလႄႈဢဝ်ငိုၼ်းသေၵမ်း။
၂၉ ႁႂ်ႈႁဝ်းၶႃႈလႆႈဢဝ်တိၼ်ယဵပ်ႇၵႂႃႇၵႃႈၼႂ်းမိူင်းၶုၼ်လူင်မိူၼ်ၸိူဝ်ႉၼင်ႇၵူၼ်းမဵဝ်းဢေးသေႃးဢၼ်ယူႇၵႃႈတီႈမိူင်းၸိရဢိၵ်ႇတင်းၵူၼ်းမဵဝ်းမေႃႇၽဢၼ်ယူႇၵႃႈတီႈလိၼ်ဢႃႇရၸိူဝ်းၼၼ်ႉတေႃႇထိုင်ႁွတ်ႈႁဝ်းၶႃႈၶၢမ်ႈၼမ်ႉႁွင်ႊယေႃးတၢၼ်ႇၼၼ်ႉလႄႈႁွတ်ႈထိုင်ၵႃႈၼႂ်းမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈႁဝ်းၶႃႈပၼ်ၼၼ်ႉသေၵမ်း၊ဝႃႈၼင်ႇၵေႃႈသီႇႁုၼ်ႇဢၼ်ပဵၼ်ၶုၼ်ႁေႃၶမ်းႁေႇသၽုၼ်ႇဢမ်ႇပၼ်ဢၶႂၢင်ႉတီႈႁဝ်းႁႂ်ႈႁဝ်းလႆႈၽႃႇလတ်းၵႂႃႇၵႃႈၼႂ်းမိူင်းမၼ်း။
၃၀ လွင်ႈမၼ်းၸမ်းထႃႇဝရႃႉၽြႃးၽြႃးပဵၼ်ၸဝ်ႈသူၼၼ်ႉႁဵတ်းႁႂ်ႈၸႂ်သၽေႃးမၼ်းၵႅၼ်ႇၶႅင်လႄႈႁႂ်ႈႁူဝ်ၸႂ်မၼ်းၵႅၼ်ႇၶႅင်ႁႂ်ႈလႆႈဢဝ်မၼ်းဢၢပ်ႈပၼ်ၵႃႈၼႂ်းမိုဝ်းသူၵႃႈၼင်ႇဢၼ်ပဵၼ်မႃးမီးဝႆႉယဝ်ႉဝၼ်းမိူဝ်ႈၼႆႉၼၼ်ႉဢေႃႈ။
၃၁ ထႃႇဝရႃႉၽြႃးမီးဢမိင်ႉတီႈၵဝ်လႄႈဝႃႈ၊-တူၺ်းလူ၊ၵဝ်ဢဝ်ၸႃႉၸႅမ်ႈၶုၼ်သီႇႁုၼ်ႇဢိၵ်ႇတင်းလႅၼ်လိၼ်မၼ်းဢၢပ်ႈပၼ်တီႈသူယဝ်ႉ။ၸႃႉသိမ်းဢဝ်ႁႂ်ႈလႆႈၶၢမ်ႇဢဝ်ဢမူၺ်ႇလိၼ်ၼၼ်ႉတႃႉ၊ဝႃႈၼင်ႇၼႆဢေႃႈ။
၃၂ မိူဝ်ႈၼၼ်ႉၶုၼ်သီႇႁုၼ်ႇဢိၵ်ႇတင်းၵူၼ်းမၼ်းတင်းသဵင်ႈတင်းလူင်ဢွၼ်ၵၼ်ဢွၵ်ႇမႃးႁႂ်ႈလႆႈႁပ်ႉတိုၵ်းႁဝ်းၵႃႈတီႈဝဵင်းယႃႇႁတ်ႉဢေႃႈ။
၃၃ ထႃႇဝရႃႉၽြႃးၽြႃးပဵၼ်ၸဝ်ႈႁဝ်းဢဝ်မၼ်းဢၢပ်ႈပၼ်တီႈႁဝ်းလႄႈႁဝ်းတိုၵ်းတေႃးယႃႉပႅတ်ႈၸႃႉၸဵမ်မၼ်းလုၵ်ႈၸၢႆးမၼ်းဢိၵ်ႇတင်းၵူၼ်းမၼ်းတင်းသဵင်ႈတင်းလူင်ဢေႃႈ။
၃၄ မိူဝ်ႈၼၼ်ႉႁဝ်းတိုၵ်းဢဝ်ဝဵင်းမၼ်းၵႃႈမီးလႄႈယႃႉၽဵဝ်ႈၵူၼ်းယိင်းၵူၼ်းၸၢႆးလုၵ်ႈဢွၼ်ႇတင်းသဵင်ႈတင်းလူင်ၵႃႈတီႈဝဵင်းတင်းလၢႆပႅတ်ႈမူတ်းမူတ်းသဵင်ႈသဵင်ႈတေႃႇထိုင်ႁွတ်ႈထၼ်ႈပေႃးဢမ်ႇၵိုတ်းဢမ်ႇၵျၼ်ႇဝႆႉသေၵေႃႉသေၵူၼ်းဢေႃႈ။
၃၅ ၵူၺ်းၵႃႈတရိတ်ႉသၢၼ်ႇဢိၵ်ႇတင်းဢုၵ်ႉၸႃႇဢၼ်သိမ်းလႆႈၵႃႈၼႂ်းဝၢၼ်ႈဝဵင်းဢၼ်ႁဝ်းတိုၵ်းဢဝ်ၼၼ်ႉႁဝ်းဢဝ်ပုၼ်ႈတူဝ်ၸဝ်ႈၵဝ်ႇဢေႃႈ။
၃၆ ၸႃႉၸဵမ်ဝဵင်းဢႃႇရေႃႇဢၼ်မီးၵႃႈတီႈႁိမ်းပၢင်ႇႁူၺ်ႈဢႃႇၼုၼ်ႇဢိၵ်ႇတင်းၸႃႉၸဵမ်ဝဵင်းဢႃႇရဢၼ်မီႈၵႃႈၼႂ်းပၢင်ႇႁူၺ်ႈၼၼ်ႉၵႂႃႇတေႃႇထိုင်ႁွတ်ႈမိူင်းၵိလတ်ႉၼၼ်ႉဝဵင်းဢၼ်တၢၼ်းၶူဝ်းယႂ်ႇလႄႈႁဝ်းဢမ်ႇပႄႉၼဵင်ႇလႆႈၼၼ်ႉဢမ်ႇမီးသေဝဵင်း။ထႃႇဝရႃႉၽြႃးၽြႃးပဵၼ်ၸဝ်ႈႁဝ်းဢဝ်ၵႃႈမီးဢၢပ်ႈပၼ်တီႈႁဝ်းၶႃႈဢေႃႈ။
၃၇ ၵူၺ်းၵႃႈၵႃႈၼင်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈႁဝ်းႁေႉၶဵၼ်ဝႆႉၼၼ်ႉသူဢမ်ႇလႆႈသုတ်ႉၸပ်းသုတ်ႉၸူးၵႃႈတီႈလိၼ်ဢၼ်ၶုၼ်မဵဝ်းဢမ်ႇမုၼ်ႇယူႇဢၼ်ၸွမ်းႁိမ်းၼမ်ႉႁွင်ႊယၢပ်ႇပုတ်ႇတင်းဝဵင်းဢၼ်မီႈၵႃႈၼိူဝ်လွႆၼိူဝ်ၵုင်းတင်းလၢႆၼၼ်ႉလႃးလႃး။