Chapter
၂၄
၁ မိူဝ်ႈဢၼ်သေၵေႃႉသေၵူၼ်းဢဝ်မေးလႄႈယူႇၸွမ်းၼွၼ်းၸွမ်းသေယဝ်ႉပေႃးမၼ်းသမ်ႉဢမ်ႇထုၵ်ႇၸႂ်ၵျိူၵ်ႈၸႂ်မေႈယိင်းၼၼ်ႉၵွပ်ႈပိူဝ်ႈဢၼ်မၼ်းထူပ်းႁၼ်လွင်ႈဢၼ်တၵ်းလႆႈတၢင်ႇဢပျႅတ်ႈၼၼ်ႉၸိုင်မၼ်းတၵ်းလႆႈတႅမ်ႈလိၵ်ႈဢၼ်ပုတ်းဢၼ်ၶၢတ်ႇသေလႄႈပၼ်ၵႃႈတီႈမေးမၼ်းၼၼ်ႉသေယဝ်ႉပွႆႇမၼ်းဢွၵ်ႇသေၵႃႈၼႂ်းႁိူၼ်းမၼ်းၵႂႃႇဢေႃႈ။
၂ မေႈယိင်းၼၼ်ႉလိုၼ်းသေဢၼ်ဢွၵ်ႇသေၵႃႈၼႂ်းႁိူၼ်းၽူဝ်မၼ်းၵႂႃႇယဝ်ႉမၼ်းမီးဢၶႂၢင်ႉဢၼ်လႆႈပဵၼ်မေးၵူၼ်းတၢင်ႇၵေႃႉဢေႃႈ။
၃ ပေႃးၽူဝ်ဢၼ်ဢဝ်လိုၼ်းၼၼ်ႉသမ်ႉၸင်းမၼ်းလႄႈတႅမ်ႈလိၵ်ႈဢၼ်ပုတ်းဢၼ်ၶၢတ်ႇပၼ်ၵႃႈၼႂ်းမိုဝ်းမၼ်းသေယဝ်ႉပွႆႇမၼ်းဢွၵ်ႇသေၵႃႈၼႂ်းႁိူၼ်းမၼ်းၵႂႃႇ၊
၄ ဢမ်ႇၼၼ်ပေႃးၽူဝ်မၼ်းတၢႆၸိုင်ၽူဝ်ၵဝ်ႇမၼ်းဢၼ်ပွႆႇမၼ်းလွတ်ႈဢွၼ်တၢင်းၼၼ်ႉဢမ်ႇလႆႈၶိုၼ်းသိမ်းဢဝ်မၼ်းၵွပ်ႈပိူဝ်ႈဢၼ်မၼ်းလႆႈၶၢမ်ႇတၢင်းဢၼ်ၵူဝ်ႈၵိူၵ်ႇယဝ်ႉလႄႈပဵၼ်ဢၼ်လီႁၢင်ႈဢဵတ်ႇသဵတ်ႇၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။သူဢမ်ႇလႆႈႁဵတ်းႁႂ်ႈဢပျႅတ်ႈတူၵ်းႁွတ်ႈထိုင်ၵႃႈတီႈမိူင်းဢၼ်ထႃႇဝရႃႉၽြႃးပဵၼ်ၸဝ်ႈသူပၼ်ပုၼ်ႈဢၼ်သူတၵ်းၶၢမ်ႇဢမူၺ်ႇၼၼ်ႉ။
၅ ပေႃးသေၵေႃႉသေၵူၼ်းတႄႇၸႃႉဢဝ်မေးၸိုင်ဢမ်ႇႁႂ်ႈမၼ်းလႆႈၵႂႃႇတိုၵ်းသိုၵ်းဢမ်ႇလႆႈပွင်ထၢမ်းဢမူႉတၢင်ႇၸိူဝ်ႉတၢင်ႇမဵဝ်း။မၼ်းတၵ်းလႆႈယူႇၵႃႈတီႈႁိူၼ်းမၼ်းတင်းပီႊလႄႈႁဵတ်းႁႂ်ႈမေးမၼ်းလႆႈပျေႃႇၸႂ်မူၼ်ႈၸႂ်ဢေႃႈ။
၆ သူဢမ်ႇလႆႈဢဝ်ၶႅပ်းမၢၵ်ႇႁိၼ်လုၺ်၊ၶႅပ်းၼိူဝ်ဢမ်ႇၼၼ်ၶႅပ်းတႂ်ႈႁႂ်ႈပဵၼ်ဢၼ်ပွင်ႇပုၼ်ႈၼီႈဢၼ်ထုၵ်ႇၼၼ်ႉ။လွင်ႈမၼ်းၸမ်းပဵၼ်တၢင်းဢၼ်ဢဝ်ဢသၢၵ်ႈၵူၼ်းပဵၼ်ဢၼ်ပွင်ႇမၼ်းဢေႃႈ။
၇ ပေႃးတီႉၺွပ်းလႆႈသေၵေႃႉသေၵူၼ်းဢၼ်ႁိမ်ဢဝ်ၵူၼ်းၼႂ်းပီႈၼွင်ႉၸိူဝ်ႉၶိူဝ်းမၼ်းၵူၼ်းမဵဝ်းဢိသရေႇလၵႂႃႇသေလႄႈဢဝ်ၵႂႃႇၶၢမ်ႇႁဵတ်းၶႃႈမၼ်းသေဢမ်ႇဝႃႈ၊ၶၢႆမၼ်းပႅတ်ႈသေဢမ်ႇဝႃႈ၊ၽူႈႁိမ်ၵူၼ်းၼၼ်ႉတၵ်းလႆႈၶၢမ်ႇတင်းဢၼ်ဢဝ်တၢႆဢေႃႈ။ၼင်ႇၼၼ်လႄႈသူတၵ်းလႆႈပႄႇၽဵဝ်ႈပႅတ်ႈတူႉၸရိူၵ်ႈဢပျႅတ်ႈသေၵႃႈၼႂ်းသူဢေႃႈ။
၈ ယၢမ်းမိူဝ်ႈဢၼ်ၽေးတၢင်းပဵၼ်တုတ်ႈႁွတ်ႈထိုင်ၼၼ်ႉၸိုင်ႁဵတ်းသတိလႄႈပႂ်ႉၸွမ်းၸေးၸေးၸွတ်ႇၸွတ်ႇၵႃႈၼင်ႇဢၼ်ယိတ်ႉပရေႃးႁိၵ်ႈၵူၼ်းမဵဝ်းလေႇဝိတင်းလၢႆသင်ႇသွၼ်ပၼ်တီႈသူၼၼ်ႉတႃႉ။သူတၵ်းလႆႈၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈၶဝ်ၼၼ်ႉဢေႃႈ။
၉ ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူႁဵတ်းတီႈမိရိဢမ်ႇမိူဝ်ႈဢၼ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးလႄႈယင်းတိုၵ်ႉၸွမ်းတၢင်းယူႇၼၼ်ႉတႃႉ။
၁၀ ပေႃးသူပၼ်ၵူႈပၼ်ယိမ်သေၸိူဝ်ႉသေပိူင်တီႈၵူၼ်းႁိူၼ်းၸမ်ၵၼ်တင်းသူၸိုင်သူဢမ်ႇလႆႈၶဝ်ႈၵႃႈၼႂ်းႁိူၼ်းမၼ်းလႄႈဢဝ်ဢုၵ်ႉၸႃႇၶူဝ်းလဵင်းဢၼ်မၼ်းတၵ်းပွင်ႇဝႆႉတီႈသူၼၼ်ႉ။
၁၁ သူတၵ်းလႆႈၸုၵ်းယူႇၵႃႈတီႈၼွၵ်ႈႁိူၼ်းလႄႈမၼ်းတၵ်းလႆႈဢဝ်ဢုၵ်ႉၸႃႇဢၼ်မၼ်းတၵ်းပွင်ႇၼၼ်ႉဢွၵ်ႇမႃးၵႃႈတီႈၼွၵ်ႈၸူးတီႈဢၼ်သူမီးၼၼ်ႉဢေႃႈ။
၁၂ ပေႃးၵေႃႉၼၼ်ႉပဵၼ်ၵူၼ်းယၢၵ်ႈၵူၼ်းၽၢၼ်ၸိုင်သူဢမ်ႇလႆႈဢဝ်ဢုၵ်ႉၸႃႇၶူဝ်းလဵင်းဢၼ်မၼ်းပွင်ႇၼၼ်ႉဝႆႉၵႃႈတီႈသူမိူဝ်ႈသူၼွၼ်း။
၁၃ လွင်ႈၼင်ႇႁိုဝ်မၼ်းတၵ်းလႆႈဢဝ်ၶူဝ်းလဵင်းမၼ်းႁူမ်ႇမႆႊလႄႈၼွၼ်းၼၼ်ႉၸိုင်မိူဝ်ႈဢၼ်ၵၢင်ဝၼ်းတူၵ်းၼၼ်ႉသူတၵ်းလႆႈဢဝ်ဢုၵ်ႉၸႃႇၶူဝ်းလဵင်းဢၼ်မၼ်းပွင်ႇဝႆႉၼၼ်ႉၶိုၼ်းပၼ်မၼ်းဢေႃႈ။မၼ်းတၵ်းတၢင်ႇၵျေးၸူးမႂ်းလႄႈတၵ်းပဵၼ်လွင်ႈတၢင်းဢၼ်သိုဝ်ႈတေႃႇၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။
၁၄ ၵူၼ်းၵိၼ်ၸၢင်ႈၵိၼ်ငႃးဢၼ်ယၢၵ်ႈဢၼ်ၽၢၼ်ဢၼ်ၸုတ်ႈဢၼ်လုတ်ႈၼၼ်ႉပဵၼ်ပီႈပဵၼ်ၼွင်ႉၸိူဝ်းၶိူဝ်းလဵဝ်ၵၼ်တင်းသူသေဢမ်ႇဝႃႈပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ပိုင်ႈယူႇၵႃႈတီႈမိူင်းသူၵႃႈၼႂ်းဝဵင်းသူၼၼ်ႉသေဢမ်ႇဝႃႈ၊သူဢမ်ႇလႆႈၼိၵ်ႈၸၢၵ်ႈငိၼ်းသေးၶဝ်။
၁၅ သူတၵ်းလႆႈပၼ်ၵႃႈၸၢင်ႈၶၼ်ငႃးမၼ်းၵူႈဝၼ်းဢေႃႈ။ယင်းဢမ်ႇပၼ်လႄႈယႃႇပေႁႂ်ႈၵၢင်ဝၼ်းတၼ်းတူၵ်း။ၵွပ်ႈပိူဝ်ႈဢၼ်မၼ်းယၢၵ်ႈၽၢၼ်လႄႈမၼ်းမီးတၢင်းဢၼ်ၸႂ်ၸပ်းၸႂ်ၸွႆးၵႃႈၶၼ်မၼ်းယူႇဢေႃႈ။ပေႃးဢမ်ႇၼၼ်၊ၵူဝ်မၼ်းတၵ်းတၢင်ႇဢပျႅတ်ႈလႄႈႁွင်ႉသႅၼ်ႇတီႈထႃႇဝရႃႉၽြႃးလႄႈဢပျႅတ်ႈတၵ်းႁွတ်ႈထိုင်ၵႃႈတီႈသူဢေႃႈ။
၁၆ ဢမ်ႇလႆႈဢဝ်ပေႃႈတၢႆတၢင်တူဝ်လုၵ်ႈလၢင်း။ဢမ်ႇလႆႈဢဝ်လုၵ်ႈလၢင်းတၢႆတၢင်တူဝ်ပေႃႈ။ၵူႈၵေႃႉၵူႈၵူၼ်းႁင်းၽႂ်ႁင်းမၼ်းတၵ်းလႆႈတၢႆၵွပ်ႈပိူဝ်ႈဢပျႅတ်ႈတူဝ်ၸဝ်ႈၵဝ်ႇၵူၺ်းဢေႃႈ။
၁၇ ၼႂ်းဢမူႉဢၼ်ထူပ်းတြႃးၵၼ်ၼၼ်ႉသူဢမ်ႇလႆႈဝေႈပိူင်ႈသဵၼ်တၢင်းတြႃးသေလႄႈၸီႇယၢင်ႇတီႈၵူၼ်းတၢင်ႇမဵဝ်းဢိၵ်ႇတင်းၵေႃႉဢၼ်ၽၢၼ်ပေႃႈၽၢၼ်မေႈၼၼ်ႉ။ၶူဝ်းၼုင်ႈတၢင်းမႆႊမေႈမုၵ်ႉမေႈမၢႆႈၼၼ်ႉသူဢမ်ႇလႆႈၶၢမ်ႇဢဝ်ႁႂ်ႈပဵၼ်ပွင်ႇၼီႈ။
၁၈ သူတၵ်းလႆႈၶုပ်းၸႂ်လႆႈၶႆႈၸႂ်ထူပ်းလွင်ႈဢၼ်သူယၢမ်ႈလႆႈၶၢမ်ႇႁဵတ်းၶႃႈၵႃႈၼႂ်းမိူင်းဢေႇၵႅပ်ႉတုမႃးဢိၵ်ႇတင်းလွင်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူၵႄႇသႄႇၼုၵ်ႈဢဝ်သူဢွၵ်ႇသေၵႃႈတီႈၼၼ်ႉမႃးၼၼ်ႉဢေႃႈ။ပိူဝ်ႈၼႆလႄႈၵဝ်ၸင်ႇဝႆႉပိင်ႈၺၢပ်ႈတီႈသူပုၼ်ႈဢၼ်သူတၵ်းလႆႈႁဵတ်းလႆႈၸွမ်းၼၼ်ႉဢေႃႈ။
၁၉ မိူဝ်ႈဢၼ်သူပၢတ်ႇဢဝ်မၢၵ်ႇဢဝ်ႁူင်းၵႃႈတီႈႁႆႊတီႈၼႃးသူလႄႈလူင်လိုမ်းလိုၼ်ႈၶဝ်သလေိုၼ်ႈလိုၼ်ႈဝႆႉၸိုင်ယႃႇပေၶိုၼ်းၵႂႃႇဢဝ်။လွင်ႈၼင်ႇႁိုဝ်ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းပၼ်တၢင်းလီတီႈသူၼႂ်းလွင်ႈတၢင်းၵႃႈဢၼ်သူဢဝ်မိုဝ်းႁဵတ်းၼၼ်ႉၸိုင်လိုၼ်ႈၶဝ်ၼၼ်ႉတၵ်းလႆႈဝႆႉပုၼ်ႈၵူၼ်းတၢင်ႇၸိူဝ်ႉတၢင်ႇမဵဝ်းၵေႃႉဢၼ်ၽၢၼ်ပေႃႈၽၢၼ်မေႈဢိၵ်ႇတင်းမေႈမုၵ်ႉမေႈမၢႆႈဢေႃႈ။
၂၀ မိူဝ်ႈဢၼ်သူပေႃႉၽတ်ႉဢဝ်မၢၵ်ႇတူၼ်ႈသၼ်ႇလုၼ်ႇၼၼ်ႉၸိုင်သူဢမ်ႇလႆႈသမ်ႉၶိုၼ်ႈပေႃႉၽတ်ႉၵိင်ႇမၼ်းၶႃႊမၼ်းထႅင်ႈ။တၵ်းလႆႈဝႆႉပုၼ်ႈၵူၼ်းတၢင်ႇၸိူဝ်ႉတၢင်ႇမဵဝ်း၊ၵေႃႉဢၼ်ၽၢၼ်ပေႃႈၽၢၼ်မေႈဢိၵ်ႇတင်းမေႈမုၵ်ႉမေႈမၢႆႈဢေႃႈ။
၂၁ မိူဝ်ႈဢၼ်သူပိတ်းဢဝ်မၢၵ်ႇၸပိတ်ႉၵႃႈတီႈသူၼ်ဢူးယဵၼ်ႇၸပိတ်ႉသူၼၼ်ႉၸိုင်ယႃႇပေၶိုၼ်ႈၵႂႃႇလႄႈၵဵပ်းဢဝ်သိမ်းဢဝ်မၢၵ်ႇမၼ်းထႅင်ႈ။တၵ်းလႆႈဝႆႉပုၼ်ႈၵူၼ်းတၢင်ႇၸိူဝ်ႉတၢင်ႇမဵဝ်းၵေႃႉဢၼ်ၽၢၼ်ပေႃႈၽၢၼ်မေႈဢိၵ်ႇတင်းမေႈမုၵ်ႉမေႈမၢႆႈဢေႃႈ။
၂၂ သူတၵ်းလႆႈၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်သူယၢမ်ႈလႆႈၶၢမ်ႇႁဵတ်းၶႃႈမႃးၵႃႈၼႂ်းမိူင်းဢေၵႅပ်ႉတုၼၼ်ႉဢေႃႈ။
၂၃ ပိူဝ်ႈၼၼ်လႄႈၵဝ်ၸင်ႇဝႆႉပိင်းၺၢပ်ႈတီႈသူပုၼ်ႈဢၼ်သူတၵ်းလႆႈႁဵတ်းလႆႈၸွမ်းၼၼ်ႉဢေႃႈ။