Chapter
၄
တၵ်းလႆႈထွမ်ႇဢဝ်
၁ တေႃႈလဵဝ်ၼႆႉၵူၼ်းမဵဝ်းဢိသရေႇလၶဝ်ဢူၺ်း၊လွင်ႈၼင်ႇႁိုဝ်သူတၵ်းဢသၢၵ်ႈလိပ်းသေလႄႈၶဝ်ႈၸၢမ်ႇၸႃးမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈပူႇပေႃႈသူၼၼ်ႉတၵ်းပၼ်တီႈသူၼၼ်ၸိုင်ဢွၼ်ၵၼ်ထွမ်ႇဢဝ်ထုင်းၽိင်ႈတြႃးဢိၵ်ႇတင်းလွင်းတၢင်းဢၼ်ၸီႇယၢင်ႇဝႆႉဢၼ်ၵဝ်သွၼ်ပၼ်ပုၼ်ႈဢၼ်သူတၵ်းၵမ်ၵျၢင်ႉၼၼ်ႉတႃႉ။
၂ သူဢမ်ႇလႆႈဢဝ်သႂ်ႇထႅင်ႈတီႈၵႂၢမ်းဢၼ်ၵဝ်သင်ႇလၢတ်ႈဝႆႉၼၼ်ႉ။သူဢမ်ႇလႆႈၼုၵ်ႈဢဝ်ဢွၵ်ႇပႅတ်ႈလႃးလႃး။သူတၵ်းလႆႈပႂ်ႉၵမ်ပႂ်ႉၸွမ်းပိင်းၺၢပ်ႈထႃႇဝရႃႉၽြႃးၽြႃးပဵၼ်ၸဝ်ႈသူဢၼ်ၵဝ်သင်ႇလၢတ်ႈဝႆႉတီႈသူၸိူဝ်းၼၼ်ႉဢေႃႈ။
၃ မၢၵ်ႇတႃသူလႆႈႁၼ်လွင်ႈတၢင်းဢၼ်ထႃႇဝရႃႉၽြႃးႁဵတ်းတေႃႇပႃႇလပေႇၵုလၼၼ်ႉယဝ်ႉ။
၄ ထႃႇဝရႃႉၽြႃးၽြႃးပဵၼ်ၸဝ်ႈသူပေႇၽဵဝ်ႈပႅတ်ႈသေၵႃႈၼႂ်းသူၵူၼ်းဢၼ်ၸွမ်းလင်ပႃႇလပေႇၵုလတင်းသဵင်ႈတင်းလူင်ယဝ်ႉ။သူၸိူဝ်းဢၼ်ဢိင်ပိုင်ႈထႃႇဝရႃႉၽြႃးၽြႃးပဵၼ်ၸဝ်ႈၸိူဝ်းၼႆႉၸမ်းဢသၢၵ်ႈလိပ်းယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၅ ၸွမ်းၵႃႈၼင်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈၵဝ်သင်ႇလၢတ်ႈဝႆႉတီႈၵဝ်ၼၼ်ႉၵဝ်သင်ႇသွၼ်ပၼ်ထုင်းၽိင်ႈတြႃးဢိၵ်ႇတင်းလွင်ႈတၢင်းဢၼ်ၸီႇယၢင်ႇတင်းလၢႆတီႈသူပုၼ်ႈဢၼ်သူတၵ်းလႆႈၵမ်ၵျၢင်ႉၵႃႈၼႂ်းမိူင်းဢၼ်သူတၵ်းၶဝ်ႈလႄႈၸၢမ်ႇၸႃးၼၼ်ႉယဝ်ႉ။
၆ ပိူဝ်ႈၼႆႉလႄႈဢွၼ်ၵၼ်ပႂ်ႉလႄႈၵမ်ၵျၢင်ႉၸွမ်းတႃႉ။ပေႃးႁဵတ်းၸိူဝ်ႉၼင်ႇၼၼ်ၸိုင်ၺၢၼ်ႇပိင်ႇၺႃႇသူတၵ်းထၢင်ႇသႃးသိုဝ်ႈၼႃႈသိုဝ်ႈတႃၵူၼ်းမဵဝ်းၼၢမ်ၼႃႇဢၼ်တၵ်းလႆႈငိၼ်းထုင်းၽိင်ႈတြႃးၵႃႈမီးၸိူဝ်းၼႆႉသေယဝ်ႉလၢတ်ႈဝႃႈ၊-ၵူၼ်းမဵဝ်းဢၼ်ယႂ်ႇမျတ်ႈၼႃႇၼႆႉပဵၼ်မဵဝ်းဢၼ်တဵမ်ဝႆႉတင်းၺၢၼ်ႇပိင်ႇၺႃႇဢမၢၼ်ႇၶၼ်ပဵၼ်ဢေႃႈ၊ဝႃႈၼင်ႇၼႆၸိူဝ်ႉၼၼ်ဢေႃႈ။
၇ မီးၵူၼ်းမဵဝ်းယႂ်ႇမဵဝ်းလူင်ဢၼ်လႂ်ဢၼ်မီးၽြႃးဢၼ်မီးၸပ်းမီးၸမ်တီႈၶဝ်မိူၼ်ၸိူဝ်ႉၼင်ႇထႃႇဝရႃႉၽြႃးၽြႃးပဵၼ်ၸဝ်ႈႁဝ်းမီးၸပ်းမီးၸမ်ႁဝ်းယူႇၼႂ်းမိူဝ်ႈဢၼ်ႁဝ်းသူးတွင်းလဝ်ယွၼ်းတီႈမၼ်းၸဝ်ႈၼၼ်ႉ။
၈ မီးၵူၼ်းမဵဝ်းယႂ်ႇမဵဝ်းလူင်ဢၼ်လႂ်ဢၼ်လႆႈၶၢမ်ႇဢဝ်ထုင်းၽိင်ႈတြႃးဢိၵ်ႇတင်းလွင်းတၢင်းဢၼ်ၸီႇယင်ႇဝႆႉတၢင်းလၢႆဢၼ်သိုဝ်ႈတေႃႇတၢၼ်ႇပဵင်းၵၼ်တင်းတြႃးတင်းသဵင်ႈတင်းလူင်ဢၼ်ၵဝ်ဝႆႉၵႃႈတီႈသူဝၼ်းမိူဝ်ႈၼႆႉၼၼ်ႉ။
၉ လွင်ႈၼင်ႇႁိုဝ်သူတၵ်းဢမ်ႇလႆႈလူင်ႉလႆႈလိုမ်းလွင်ႈတၢင်းဢၼ်မၢၵ်ႇတႃသူလႆႈႁၼ်ယၢမ်းမိုဝ်ႉဝၼ်းဢၼ်သူၸုၵ်းယူႇၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈသူၵႃႈတီႈႁေႃႇရပ်ႉၼၼ်ႉလႄႈဢမ်ႇလႆႈႁႂ်ႈၽၢတ်ႇယၢၼ်ၵၼ်တင်းႁူဝ်ၸႂ်သူၸူဝ်းဢသၢၵ်ႈသူၵူၺ်းဢမ်ႇၵႃးတၵ်းလႆႈဢဝ်လွင်ႈတၢင်းၸိူဝ်းၼၼ်ႉသင်ႇသွၼ်ပၼ်တီႈလုၵ်ႈသူလၢၼ်သူတင်းလၢႆၸိုင်တူဝ်သူႁဵတ်းသတိတီႈတူဝ်သူလႄႈၵျူဝ်းၸႃးပႂ်ႉႁူဝ်ၸႂ်သူယူႇတႃႉ။
၁၀ ဝၼ်းမိူဝ်ႈၼၼ်ႉထႃႇဝရႃႉၽြႃးမီးဢမိင်ႉတီႈၵဝ်လႄႈဝႃႈ၊-ႁႂ်ႈၵူၼ်းတင်းလၢႆၸူႉၵၼ်တုမ်ၵၼ်တႃႉ။ၵဝ်တၵ်းႁႂ်ႈၶဝ်ငိၼ်းၵႂၢမ်းၵဝ်ႁႂ်ႈၶဝ်လႆႈသွၼ်ဢဝ်လွင်ႈဢၼ်တၵ်းလႆႈရူဝ်ႇသေႇၵူဝ်ယမ်ၵဝ်ယူႇၶိင်ႇၵႃႇလႃႉၵႃႈဢၼ်ၶဝ်ဢသၢၵ်ႈယင်းလိပ်းယူႇၵႃႈၼိူဝ်လိၼ်မိူင်းၼႆႉလႄႈဢဝ်သင်ႇပၼ်သွၼ်ပၼ်တီႈလုၵ်ႈလၢင်းၶဝ်ဢေႃႈ၊ဝႃႈၼင်ႇၼႆသေယဝ်ႉ
၁၁ သူဢွၼ်ၵၼ်သုတ်ႉၸပ်းသုတ်းၸူးလႄႈၸုၵ်းယူႇၵႃႈတီႈတိၼ်လွႆၼၼ်ႉဢေႃႈ။လွႆၼၼ်ႉမီးတင်းဢၼ်မႆႈၽႆးလုၵ်ႉၶိုၼ်ၵႃႈၼႂ်းၶိုင်ႈၵၢင်ၽႃႉၵၢင်ႁၢဝ်ယူႇသေလႄႈတဵမ်ဝႆႉတင်းၵွၼ်းဢၼ်လမ်ၽႃႉၽူၼ်ဢၼ်လပ်းသိင်ႇဢၼ်ၼႃတၼ်ႈၼႃႇလူင်လၢင်ဢေႃႈ။
၁၂ ထႃႇဝရႃႉၽြႃးၵေႃႈမီးဢမိင်ႉဢွၵ်ႇသေၵႃႈတီႈၼႂ်းၽႆးၼၼ်ႉၸူးတီႈသူဢေႃႈ။သူလႆႈငိၼ်းသဵင်ၵႂၢမ်းၸဝ်ႈဢေႃႈ။သူဢမ်ႇလႆႈႁၼ်ပုင်ႇႁၢင်ႊလႆႈငိၼ်းသဵင်ၵူၺ်းဢေႃႈ။
၁၃ မၼ်းၸဝ်ႈမီးဢမိင်ႉမွၵ်ႇလၢတ်ႈပတိၺိၼ်ႇတြႃးဢၼ်မၼ်းၸဝ်ႈသင်ႇလၢတ်ႈဝႆႉပုၼ်ႈဢၼ်သူတၵ်းၵမ်တၵ်းၵျၢင်ႉဢၼ်ဝႃႈပိင်းၺၢပ်ႈသိပ်းပိူင်ၸိူဝ်းၼၼ်ႉတီႈသူလႄႈတႅမ်ႈဝႆႉၵႃႈၼိူဝ်ၶႅပ်းမၢၵ်ႇႁိၼ်သွင်ၽႅၼ်ႇဢေႃႈ။
၁၄ မိူဝ်ႈၼၼ်ႉထႃႇဝရႃႉၽြႃးသင်ႇလၢတ်ႈဝႆႉတီႈၵဝ်ႁႂ်ႈၵဝ်လႆႈသင်ႇသွၼ်ပၼ်ထုင်းၽိင်ႈတြႃးဢိၵ်ႇတင်းလွင်ႈတၢင်းဢၼ်ၸီႇယင်ႇဝႆႉတင်းလၢႆပုၼ်ႈဢၼ်သူတၵ်းၵမ်တၵ်းၵျၢင်ႉၼႂ်းမိူင်းဢၼ်သူတၵ်းၶၢမ်ႈၵႂႃႇလႄႈၸၢမ်ႇၸႃးၼၼ်ႉဢေႃႈ။
ဢမ်ႇလႆႈႁဵတ်းဝၢတ်ႈရူၵ်ႉထူႉ
၁၅ ၵွပ်ႈပိူဝ်ႈဢၼ်သူဢမ်ႇလႆႈႁၼ်ပုင်ႇႁၢင်ႊၵႃႈသင်သေၸိုဝ်ႉသေပိူင်ၼႂ်းဝၼ်းဢၼ်ထႃႇဝႃႉရၽြႃးမီးဢမိင်ႉဢွၵ်ႇသေၵႃႈတီႈၼႂ်းၽႆးၼၼ်ႉလႄႈ
၁၆ လွင်ႈၼင်ႇႁိုဝ်သူတၵ်းဢမ်ႇလႆႈၽွၵ်ႈပျၼ်ႇၶိုၼ်းလႄႈႁဵတ်းရုၵ်ႉထုဢၼ်မီးပုင်ႇႁၢင်ႊသေၸိူဝ်ႉသေပိူင်ဢၼ်ဝႃႈပုင်ႇႁၢင်ႊၵူၼ်းယိင်းၵုၼ်းၸၢႆး
၁၇ ပုင်ႇႁၢင်ႊတရိၵ်ႉသၢၼ်ႇဢၼ်မီးၵႃႈၼိူဝ်လိၼ်မိူင်းပုင်ႇႁၢင်ႊၼူၵ်ႉဢၼ်ၸၢင်ႈမိၼ်ၵႃႈၼိူဝ်ၽႃႉၵၢင်ႁၢဝ်ပုင်ႇႁၢင်ႊတရိၵ်ႉသၢၼ်ႇဢၼ်ၸၢင်ႊၵႂႃႇၸၢင်ႊၵၢၼ်းၵႃႈၼိူဝ်လိၼ်ပုင်ႇႁၢင်ႊ
၁၈ ပႃဢၼ်ယူႇၵႃႈၼႂ်းၼမ်ႉၵႃႈတီႈတႂ်ႈတီႈတႅမ်ႇၸိူဝ်းၼၼ်ႉဢိၵ်ႇတင်းလွင်ႈၼင်ႇႁိုဝ်သူႁႅၼ်တူၺ်းၽႃႉၵၢင်ႁၢဝ်လႄႈႁၼ်ၵၢင်ဝၼ်းလိူၼ်လၢဝ်တင်းလၢႆဢၼ်ပဵၼ်ၶိုင်ပိုင်ႈၽႃႉၵၢင်ႁၢဝ်ၸိူဝ်းၼၼ်ႉသေယဝ်ႉ
၁၉ တၵ်းဢမ်ႇပႃးၸွမ်းတၢင်းဢၼ်ပိူၼ်ႈတိုၵ်းယုင်းၸူဝ်းဢဝ်သူလႄႈႁဵတ်းဝၢတ်ႈတီႈၶိုင်ပိုင်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူၽေမႅင်ႇပၼ်တီႈၵုၼ်းမဵဝ်းၵႃႈဢၼ်မီးၵႃႈတႂ်ႈၽႃႉၵၢင်ႁၢဝ်ၸိူဝ်းၼၼ်ႉၸိုင်တူဝ်သူႁဵတ်းသတိတီႈတူဝ်သူတႃႉ။
၂၀ ထႃႇဝႃႉရၽြႃးၼုၵ်ႈဢဝ်သူဢွၵ်ႇသေၵႃႈၼႂ်းမုၵ်ႉၽႆးလဵၵ်းဢၼ်ဝႃႈမိူင်းဢေႇၵႅပ်ႉတုၼၼ်ႉမႃးႁႂ်ႈသူလႆႈပဵၼ်ၵူၼ်းမဵဝ်းဢၼ်ထိူၵ်ႈၶၢမ်ႇဢမူၺ်ႇတီႈမၼ်းၸဝ်ႈၵႃႈၼင်ႇဢၼ်သူပဵၼ်ဝၼ်းမိူဝ်ႈၼႆႉယဝ်ႉ။
၂၁ လိူဝ်သေၼၼ်ႉထႃႇဝရႃႉၽြႃးၸႂ်မႆႈၶႂ်ႈၸႃႉတီႈၵဝ်ၵွပ်ႈပိူဝ်ႈသူလႄႈၵိၼ်ႇဝႃႈႁႂ်ႈၵဝ်ဢမ်ႇလႆႈၶၢမ်ႈၼမ်ႉႁွင်ႊယေႃးတၢၼ်ႇၵႂႃႇဢိၵ်ႇတင်းႁႂ်ႈၵဝ်ဢမ်ႇလႆႈၶဝ်ႈၵႃႈၼႂ်းမိူင်းဢၼ်လီမျတ်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူပုၼ်ႈဢၼ်သူတၵ်းလႆႈၶၢမ်ႇဢမူၺ်ႇၼၼ်ႉဢေႃႈ။
၂၂ ပိူဝ်ႈဢၼ်ပဵၼ်ၼင်ႇၼႆလႄႈၵဝ်တၵ်းလႆႈတၢႆၵႃႈတီႈမိူင်းၼႆႉဢေႃႈ။ၵဝ်ဢမ်ႇလႆႈၶၢမ်ႈၼမ်ႉႁွင်ႊယေႃးတၢၼ်ႇ။သူၸမ်းတၵ်းၶဝ်ႈၵႂႃႇလႄႈၸၢမ်ႇၸႃးမိူင်းဢၼ်လီမျတ်ႈၼႃႇၼၼ်ႉဢေႃႈ။
၂၃ လွင်ႈၼင်ႇႁိုဝ်သူတၵ်းဢမ်ႇလူင်လိုမ်းပတိၺိၼ်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူဝႆႉၵႃႈတီႈသူၼၼ်ႉသေလႄႈႁဵတ်းရုၵ်ႉထူႉဢၼ်မီးပုင်ႇႁၢင်ႊၶိူင်ႈပိူင်ဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူႁၢမ်ႈတပ်ႉႁေႉၶဵၼ်ၼၼ်ႉၸိုင်တူဝ်သူႁဵတ်းသတိတီႈတူဝ်သူတႃႉ။
၂၄ လွင်ႈမၼ်းၸမ်းထႃႇဝရႃႉၽြႃးၽြႃးပဵၼ်ၸဝ်ႈသူၼၼ်ႉပဵၼႆ်းဢၼ်မႆႈပဵၼ်ၽြႃးဢၼ်ႁၵ်ႉၶႅၼ်ၼၼ်ႉဢေႃႈ။
၂၅ မိူဝ်ႈဢၼ်သူမီးလုၵ်ႈလၢၼ်လႄႈယူႇၵႃႈတီႈမိူင်းၼၼ်ႉႁိုင်ၼႃႇလူင်လၢင်ယဝ်ႉၼၼ်ႉပေႃးသူသမ်ႉၽွၵ်ႈပျၼ်ႇၶိုၼ်းသေလႄႈႁဵတ်းရူၵ်ႉထူႉပုင်ႇႁၢင်ႊသေၸိူဝ်ႉသေပိူင်သိုဝ်ႈၼႃႈသိုဝ်ႈတႃထႃႇဝရႃႉၽြႃးၽြႃးပဵၼ်ၸဝ်ႈသူလႄႈႁဵတ်းတၢင်းဢၼ်တိုၵ်းယုင်းၸႂ်မႆႈၶႂ်ႈၸႃႉမၼ်းၸဝ်ႈၸိုင်ႈဝၼ်းမိူဝ်ႈၼႆႉၵဝ်ဢဝ်ၵၢင်ႁၢဝ်တင်းလိၼ်မိူင်းႁဵတ်းသၢၵ်ႈသေႇယူႇၽၢႆႇၼိုင်ႈတင်းသူၸမ်းဢမ်ႇပေႃးႁိုင်ပေႃးၼၢၼ်းသူတၵ်းလႆႈလူႉႁၢႆသေၵႃႈတီႈမိူင်းဢၼ်သူၶၢမ်ႈၼမ်ႉႁွင်ႊယေႃးတၢၼ်ႇၵႂႃႇလႄႈၶဝ်ႈၸၢမ်ႇၸႃးၼၼ်ႉဢမၢၼ်ႇၶၢၼ်ပဵၼ်ဢေႃႈ။
၂၆ ဢသၢၵ်ႈသူဢမ်ႇလႆႈယၢဝ်းလႆႈယိုၼ်းၵႃႈတီႈမိူင်းၼၼ်ႉ။သူတၵ်းလႆႈႁွတ်ႈထိုင်တၢင်းလူႉတၢင်းလႅဝ်မူတ်းမူတ်းသဵင်ႈသဵင်ႈဢေႃႈ။
၂၇ ထႃႇဝရႃႉၽြႃးၵေႃႈတၵ်းႁႂ်ႈသူၽၢတ်ႇၽေၵၼ်ၵႂႃႇၵႃႈၼႂ်းၵူၼ်းမဵဝ်းတင်းလၢႆၵူႈတီႈၵူႈလႅၼ်လႄႈသူတၵ်းလႆႈၵိုတ်းၵျၼ်ႇဝႆႉၵေႇၵေႇၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတီႈဢၼ်မၼ်းၸဝ်ႈတၵ်းႁေႃႈသူဢွၵ်ႇပႅတ်ႈၼၼ်ႉဢေႃႈ။
၂၈ ၵႃႈတီႈၼၼ်ႉၸိုင်ႈသူတၵ်းႁဵတ်းဝၢတ်ႈၽြႃးဢၼ်ဢဝ်မိုဝ်းၵူၼ်းႁဵတ်းဢၼ်ပဵၼ်ၽြႃးမႆႉၽြႃးမၢၵ်ႇႁိၼ်ဢၼ်ဢမ်ႇႁၼ်လႆႈဢမ်ႇငိၼ်းလႆႈဢမ်ႇၵိၼ်လႆႈဢမ်ႇၼူမ်လႆႈၸိူဝ်းၼၼ်ႉဢေႃႈ။
၂၉ ၵူၺ်းၵႃႈမိူဝ်ႈဢၼ်သူယူႇၵႃႈတီႈၼၼ်ႉလႄႈသမ်ႉမီးဢလူဝ်ႇၶႂ်ႈႁႃထႃႇဝရႃႉၽြႃးၽြႃးပဵၼ်ၸဝ်ႈသူလႄႈပႃးတင်းႁူဝ်ၸႂ်သဵင်ႈသဵင်ႈႁႃၸိုင်သူတၵ်းလႆႈထူပ်းဢေႃႈ။
၃၀ မိူဝ်ႈဢၼ်သူလႆႈၶၢမ်ႇတုၵ်ႉၶႃႉတၢင်းၽၢၼ်လႄႈလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼၼ်ႉတူၵ်းႁွတ်ႈၵႃႈၼိူဝ်သူၼၼ်ႉပေႃးသူၶိုၼ်းမႃးၸူးၵႃႈတီႈထႃႇဝရႃႉၽြႃးၽြႃးပဵၼ်ၸဝ်ႈသူမိူဝ်ႈၶိင်ႇၵႃႇလႃႉၵမ်းလိုၼ်းလႄႈထွမ်ႇဢဝ်ၵႂၢမ်းမၼ်းၸဝ်ႈၸိုင်ၵွပ်ႈပိူဝ်ႈထႃႇဝရႃႉၽြႃးၽြႃးပဵၼ်ၸဝ်ႈသူ
၃၁ ပဵၼ်ၽြႃးဢၼ်ၸၢင်ႊဢိတ်းလူလႄႈမၼ်းၸဝ်ႈတၵ်းဢမ်ႇၸုၼ်ႉသူပႅတ်ႈဢမ်ႇလူင်ႈလိုမ်းပတိၺိၼ်ႇတြႃးပူႇမွၼ်ႇသူဢၼ်မၼ်းၸဝ်ႈတိူင်ႇဝႃႈဝႆႉတီႈၶဝ်ၸိူဝ်းၼၼ်ႉ။
ၽြႃးပဵၼ်ၸဝ်ႈ
၃၂ သူးတွင်းထၢမ်တူၺ်ႈလွင်ႈၶိင်ႇၵႃႇလႃႉမိူဝ်ႉဝၼ်းဢၼ်ပူၼ်ႉမႃးၸူဝ်ႈဢၼ်သူဢမ်ႇပႆႇပဵၼ်ပႆႇမီးမိူဝ်ႈဢၼ်ၽြႃးပဵၼ်ၸဝ်ႈၽၢၼ်ႇသၢင်ႈႁဵတ်းပဵၼ်ၵူၼ်းၵႃႈၼိူဝ်လိၼ်မိူင်းၼႆႉၼၼ်ႉဢိၵ်ႇတင်းၵႃႈတီႈၽႃႉၵၢင်ႁၢဝ်ဢဝ်ၸဵမ်ၵႃႈတီႈၽၢႆႇၼိုင်ႈတေႃႇထိုင်ၽၢႆႇၼိုင်ႈလွင်ႈဢၼ်ဝႃႈဢမူႉဢၼ်ယႂ်ႇၼႃႇထၢၼ်ႇၼႆႉယၢမ်ႈတွၼ်ႉလႆႈပဵၼ်ႁိုဝ်ဢမ်ႇၼၼ်ယၢမ်ႈတွၼ်ႉလႆႈငိၼ်းႁိုဝ်ၼၼ်ႉတႃႉ။
၃၃ ၸွင်ႇမီးၵူၼ်းသေၸိူဝ်ႉသေမဵဝ်းဢၼ်ယၢမ်ႈတွၼ်ႉလႆႈငိၼ်းသဵင်ၽြႃးပဵၼ်ၸဝ်ႈမီးဢမိင်ႉဢွၵ်ႇသေၵႃႈၼႂ်းၽႆးမိူၼ်ၸိူဝ်ႉၼင်ႇဢၼ်သူလႆႈငိၼ်းၼၼ်ႉလႄႈဢသၢၵ်ႈလႆႈၵတ်းယဵၼ်ၶျၢမ်းသႃႇႁိုဝ်။
၃၄ ၸွင်ႇမီးၽြႃးပဵၼ်ၸဝ်ႈဢၼ်ယၢမ်ႈလႆႈဢဝ်တင်းတၢင်းဢၼ်ၸၢမ်းတူၺ်းတၢင်းဢၼ်ၼပျေႃးၼီႉမိၵ်ႈလၵ်ႈၶၼႃႇတင်းလွင်ႈတၢင်းဢၼ်လီဢၢမ်းတင်းဢၼ်ႁႂ်ႈဢမူႉသိုၵ်းႁွတ်ႈထိုင်တၢင်းဢၼ်ဢဝ်မိုဝ်ႈၸဝ်ႈဢၼ်ႁႅင်းယႂ်ႇႁဵတ်းတၢင်းဢၼ်ယဵတ်ႇၶႅၼ်ယဵတ်ႇမိုဝ်းၸဝ်ႈတၢင်းဢၼ်ၼပျေႃးရူႇပႃႇရုင်ႇဢၼ်လီၵူဝ်လီႁေၸိူဝ်းၼၼ်ႉသေလႄႈၼုၵ်ႈဢဝ်ၵူၼ်းသေၸိူဝ်ႉသေမဵဝ်းဢွၵ်ႇသေၵႃႈၼႂ်းၵူၼ်းသေၸိူဝ်ႉသေမဵဝ်းပုၼ်ႈမၼ်းၸဝ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူႁဵတ်းတီႈသူသိုဝ်ႈၼႃႈသိုဝ်ႈတႃသူၵႃႈၼႂ်းမိူင်းဢေႇၵႅပ်ႉတုၼၼ်ႉႁိုဝ်။
၃၅ သူလႆႈၶၢမ်ႇတၢင်းဢၼ်မၼ်းၸဝ်ႈၼပျေႃးႁႂ်ႈသူလႆႈႁူႉလွင်ႈဢၼ်ဝႃႈထႃႇဝရႃႉၽြႃးပဵၼ်ၽြႃးပဵၼ်ၸဝ်ႈလိူဝ်သမေၼ်းၸဝ်ႈၼၼ်ႉဢမ်ႇမီးၽြႃးတၢင်ႇသူႇတၢင်ႇပႃးၼၼ်ႉဢေႃႈ။
၃၆ မၼ်းၸဝ်ႈႁႂ်ႈသူလႆႈငိၼ်းသဵင်ၸဝ်ႈဢွၵ်ႇသေၵႃႈၼႂ်းၵၢင်ႁၢဝ်ႁႂ်ႈလႆႈသင်ႇသွၼ်ပၼ်သူယဝ်ႉ။ၵႃႈၼိူဝ်လိၼ်မိူင်းၼႆႉၵေႃႈမၼ်းၸဝ်ႈၼပျေႃးၽၢႆႇမၼ်းၸဝ်ႈဢၼ်ယႂ်ႇၼႃႇတီႈသူလႄႈသူလႆႈငိၼ်းသဵင်မၼ်းၸဝ်ႈဢွၵ်ႇသေၵႃႈၼႂ်းၽႆးၼၼ်ႉယဝ်ႉ။
၃၇ ၵွပ်ႈပိူဝ်ႈမၼ်းၸဝ်ႈႁၵ်ႉပူႇမွၼ်ႇသူၸိူဝ်းၼၼ်ႉလႄႈမၼ်းၸဝ်ႈလိူၵ်ႈၵဵပ်းဢဝ်မဵဝ်းၸိူဝ်ႉၶိူဝ်းၶဝ်လိုၼ်းၶဝ်ၼၼ်ႉလႄႈမၼ်းၸဝ်ႈဢဝ်တင်းမႁႃႇတၼ်ႇၶူဝ်းၼုၵ်ႈဢဝ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးႁႂ်ႈလႆႈႁေႃႈပႅတ်ႈၵူၼ်းမဵဝ်းဢၼ်ၼမ်ၵိုၼ်းလႄႈ
၃၈ ႁႅင်းယႂ်ႇၼႃႇသေသူၸိူဝ်းၼၼ်ႉဢွၵ်ႇသေၵႃႈတီႈၽၢႆႇၼႃႈသူၵႂႃႇလႄႈဢဝ်သူသႂၢင်းသႂ်ႇပၼ်ၵႃႈၼႂ်းလိၼ်ၶဝ်လႄႈႁႂ်ႈၶဝ်ၶၢမ်ႇဢမူၺ်ႇမိူၼ်ၸိူဝ်ႉၼင်ႇဝၼ်းမိူဝ်ႈၼႆႉၼၼ်ႉယဝ်ႉ။
၃၉ ပိူဝ်ႈၼႆလႄႈလွင်ဢၼ်ထႃႇဝရႃႉၽြႃးပဵၼ်ၽြႃးပဵၼ်ၸဝ်ႈၵႃႈၼိူဝ်တီႈၵၢင်ႁၢဝ်ၵႃႈတႂ်ႈတီႈလိၼ်မိူင်းၼႆလႄႈဢမ်ႇမီးၽြႃးတၢင်ႇသူႇတၢင်ႇပႃးၼၼ်ႉၸိုင်ဝၼ်းမိူဝ်ႈၼႆႉႁူႉမၢတ်ႈလႄႈသႂၢင်းသႂ်ႇဝႆႉၵႃႈၼႂ်းႁူဝ်ၸႂ်သူတႃႉ။
၄၀ သူတၵ်းလႆႈပႂ်ႉၵမ်ပႂ်ႉၸွမ်းထုင်းၽိင်ႈတြႃးတင်းလၢႆဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၼၼ်ႉႁႂ်ႈသူဢိၵ်ႇလူၺ်ႈၵၼ်တင်းလုၵ်ႈလၢင်းသူလိုၼ်းသူၸိူဝ်းၼၼ်ႉလႆႈၵတ်းယဵၼ်ၶျၢမ်းသႃႇႁႂ်ႈဢသၢၵ်ႈသူလႆႈယၢဝ်းယိုၼ်းယူႇတႃႇသေၵႃႈတီႈမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်ၼၼ်ႉဢေႃႈ၊ဝႃႈၼင်ႇၼႆဢေႃႈ။
ဝဵင်းပၢႆၽေး
၄၁ မိူဝ်ႈၼၼ်ႉမုဝ်းသေႇၽေဢဝ်ဝဵင်းသၢမ်ဝဵင်းၵႃႈတီႈၽၢႆႇတၢင်းဝၼ်းဢွၵ်ႇၼမ်ႉႁွင်ႊယေႃးတၢၼ်ႇၼင်ႇႁိုဝ်တၵ်းႁႂ်ႈၵေႃႉဢၼ်ဢမ်ႇသၢင်ႇတေႃႇလႄႈ
၄၂ ဢဝ်မႅၼ်ႈၵူၼ်းႁိူၼ်းၸမ်ၵၼ်တၢႆၼၼ်ႉတၵ်းလႆႈဢၶႂၢင်ႉပၢႆၵႂႃႇသွၼ်ယူႇၵႃႈတီႈၼၼ်ႉလႄႈလႆႈဢသၢၵ်ႈၵတ်းယဵၼ်ၶျၢမ်းသႃႇၼၼ်ႉဢေႃႈ။
၄၃ ဝဵင်းၸိူဝ်းၼၼ်ႉၸမ်းပဵၼ်ဝဵင်းပေႇၸႃႇၵႃႇတီႈထိူၼ်ၵႃႈၼႂ်းပၢင်ႇပဵင်းတီႈယူႇၵူၼ်းမဵဝ်းရူႇပိၼ်ႇဝဵင်းရႃႇမုတ်ႉၵႃႈၼႂ်းမိူင်းၵိလတ်ႉတီႈယူႇၵူၼ်းမဵဝ်းၵတ်ႉဝဵင်းၵေႃႇလၢၼ်ႇၵႃႈၼႂ်းမိူင်းပႃႇသၼ်ႇတီႈယူႇၵူၼ်းမဵဝ်းမၼႃႇသေႇၼၼ်ႉဢေႃႈ။
၄၄ ဢၼ်ၼႆႉၸမ်းပဵၼ်တြႃးဢၼ်မုဝ်းသေႇဝႆႉၵႃႈတီႈၽၢႆႇၼႃႈၵူၼ်းမဵဝ်းဢိသရေႇလတင်းလၢႆဢေႃႈ။
၄၅ ပဵၼ်ၵႂၢမ်းသၢၵ်ႈသေႇထုင်းၽိင်ႈတြႃးလွင်ႈတၢင်းဢၼ်ၸီႇယင်ႇဝႆႉဢၼ်မုဝ်းသေႇႁေႃးလၢတ်ႈတီႈၵူၼ်းမဵဝ်းဢိသရေႇလတင်းလၢႆ
၄၆ လိုၼ်းဢၼ်ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးမီးယူႇၵႃႈတီႈၽၢႆႇပုၼ်ႉၼမ်ႉႁွင်ႊယေႃးတၢၼ်ႇၵႃႈၼႂ်းပၢင်ႇႁူၺ်ႈသိုဝ်ႈဝဵင်းပိတ်ႉပေႇၵုရၵႃႈၼႂ်း
မိူင်းသီႇႁုၢၼ်ႇၶုၼ်ႁေႃၶမ်းဢႃႇမေႃးရိဢၼ်ယူႇၵႃတီႈဝဵင်းႁေႇသၽုၼ်ႇဢၼ်မုဝ်းသေႇဢိၵ်ႇတင်းၵူၼ်းမဵဝ်းဢိသရေႇလတင်းလၢႆတိုၵ်းတေႃးယႃႉပႅတ်ႈဝၢႆးသေဢၼ်ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉဢေႃႈ။
၄၇ ၶဝ်သမ်ႉဢဝ်လိၼ်ဢၼ်မၼ်းပိူင်ႇဢိၵ်ႇတင်းလိၼ်ဢေႃႇၶၶုၼ်ႁေႃၶမ်းမိူင်းပႃႇသၼ်ႇဢၼ်ဝႃႈၶုၼ်ႁေႃၶမ်းဢႃႇမေႃးရိတင်းသွင်ပႃးဢၼ်မီးၵႃႈတီႈၽၢႆႇပုၼ်ႉၼမ်ႉႁွင်ႊယေႃးတၢၼ်ႇၽၢႆႇတၢင်းဢၼ်ၵၢင်ဝၼ်းဢွၵ်ႇၼၼ်ႉ။
၄၈ ဢဝ်ၸႃႉၸဵမ်ဝဵင်းဢႃႇရေႃႇဢၼ်မီးၵႃႈႁိမ်းပၢင်ႇႁူၺ်ႈဢႃႇၼုၼ်ႇတေႃႇထိုင်ႁွတ်ႈလွႆၸိဢုၼ်ႇဢၼ်ဝႃႈလွႆႁေႇရမုၼ်ႇၼၼ်ႉ။
၄၉ ဢိၵ်ႇတင်းဢဝ်ၵႃႈတီႈပၢင်ႇပဵင်းဢႃႇရႃႇၽႃႇဢၼ်မီႈၵႃႈတီႈၽၢႆႇပုၼ်ႉၼမ်ႉႁွင်ႊယေႃးတၢၼ်ႇၽၢႆႇဝၼ်းဢွၵ်ႇၼၼ်ႉတင်းသဵင်ႈတင်းလူင်တေႃႇထိုင်ႁွတ်ႈၼွင်ပၢင်ႇပဵင်းဢႃႇရႃႇၽႃႇၵႃႈတီႈပဵမ်ႉလွႆပိသၵႃႇၼၼ်ႉဢေႃႈ။