Chapter
၃၁
ယေႃးသုတၵ်းလႆႈၶၢမ်ႇဢရႃႇမုဝ်းသေႇ
၁ မုဝ်းသေႇသမ်ႉၵႂႃႇလႄႈႁေႃးလၢတ်ႈၸိူဝ်ႉၼႆတီႈၵူၼ်းမဵဝ်းဢိသရေႇလတင်းသဵင်ႈတင်းလူင်လႄႈဝႃႈၸမ်း၊-ၵဝ်ၼႆႉဢသၢၵ်ႈတဵမ်ပၢၵ်ႇပၢႆသၢဝ်းပီႊဝၼ်းမိူဝ်ႈၼႆႉယဝ်ႉ။
၂ ၵမ်းလိုၼ်းၵဝ်ဢမ်ႇတတ်ႈၼိုင်ႇလႆႈဢွၼ်ႁူဝ်သူယဝ်ႉ။ထႃႇဝရႃႉၽြႃးၵေႃႈမီးဢမိင်ႉတီႈၵဝ်လႄႈဝႃႈ၊-မႂ်းဢမ်ႇလႆႈၶၢမ်ႈၼမ်ႉႁွင်ႊယေႃးတၢၼ်ႇၼႆႉ၊ဝႃႈၼင်ႇၼႆဝႆႉယဝ်ႉ။
၃ ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းဢွၼ်ႁူဝ်သူၶၢမ်ႈၵႂႃႇလႄႈယႃႉၵူၼ်းၵူႈၸိူဝ်ႉၵူႈမဵဝ်းၸိူဝ်းၼၼ်ႉပႅတ်ႈသေယဝ်ႉသူတၵ်းလႆႈၶဝ်ႈၸၢမ်ႇၸႃးတီႈယူႇၶဝ်ဢေႃႈ။ယေႃးသုတၵ်းလႆႈဢွၼ်ႇႁူဝ်သူၵႂႃႇၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉၼၼ်ႉဢေႃႈ။
၄ ထႃႇဝရႃႉၽြႃးတၵ်းႁဵတ်းတီႈၶဝ်မိူၼ်ၸိူဝ်ႉၼင်ႇဢၼ်မၼ်းၸဝ်ႈႁဵတ်းတီႈသီႇႁုၼ်ႇတင်းဢေႃႇၶၶုၼ်ႁေႃၶမ်းဢႃႇမေႃးရိၸိူဝ်းၼၼ်ႉဢိၵ်ႇတင်းမိူင်းၶဝ်ဢၼ်မၼ်းၸဝ်ႈယႃႉပႅတ်ႈၼၼ်ႉဢေႃႈ။
၅ ထႃႇဝရႃႉၽြႃးတၵ်းဢဝ်ၶဝ်ဢၢပ်ႈပၼ်တီႈသူလႄႈသူတၵ်းလႆႈႁဵတ်းတီႈၶဝ်ၸွမ်းၵႃႈၼင်ႇပိင်းၺၢပ်ႈၵႃႈဢၼ်ၵဝ်သင်ႇလၢတ်ႈဝႆႉတီႈသူၼၼ်ႉဢေႃႈ။
၆ ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။ယႃႇပမေႆႈၸႂ်။ယႃႇပေၵူဝ်ႁေၶဝ်။တူဝ်ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းၵႂႃႇလူၺ်ႈၵၼ်တင်းသူဢေႃႈ။မၼ်းၸဝ်ႈတၵ်းဢမ်ႇၸုၼ်ႉသူပႅတ်ႈ၊တၵ်းဢမ်ႇပႅတ်ႈသူဝႆႉ၊ဝႃႈၼင်ႇၼႆဢေႃႈ။
၇ မုဝ်းသေႇသမ်ႉႁွင်ႉဢဝ်ယေႃးသုသေလႄႈလၢတ်ႈတီႈမၼ်းသိုဝ်ၼႃႈတႂ်ႈတႃၵူၼ်းမဵဝ်းဢိသရေႇလတင်းသဵင်ႈတင်းလူင်လႄႈဝႃႈ၊-ဢွၼ်ၵၼ်ဢဝ်ႁႅင်းလႄႈမီးတၢင်းဢၼ်ႁတ်းႁၼ်တႃႉ။လွင်ႈမၼ်းၸမ်းသူတၵ်းလႆႈၵႂႃႇလူၺ်ႈၵၼ်တင်းၵူၼ်းတင်းလၢႆၸိူဝ်းၼႆႉၶဝ်ႈၵႃႈၼႂ်းမိူင်းဢၼ်ထႃႇဝရႃႉၽြႃးတိူင်ႇဝႃႈဝႆႉတီႈပူႇမွၼ်ႇၶဝ်ဝႃႈတၵ်းပၼ်တီႈၶဝ်ႁႂ်ႈၶဝ်လႆႈၶၢမ်ႇဢမူၺ်ႇၼၼ်ႉဢေႃႈ။
၈ တူဝ်ထႃႇဝရႃႉၽြႃးတၵ်းဢွၼ်ႁူဝ်သူၵႂႃႇလႄႈမီးယူႇလူၺ်ႈၵၼ်တင်းသူဢေႃႈ။မၼ်းၸဝ်ႈတၵ်းဢမ်ႇၸုၼ်ႉသူပႅတ်ႈတၵ်းဢမ်ႇပႅတ်ႈသူဝႆႉ။ယႃႇပမေႆႈၸႂ်။ယႃႇပေၸႂ်လူႉ၊ဝႃႈၼင်ႇၼႆဢေႃႈ။
တၢင်းဢၼ်ၽတ်းပိင်းၺၢပ်ႈ
၉ မုဝ်းသေႇတႅမ်ႈပိင်းၺၢပ်ႈတြႃးၼႆႉဝႆႉလႄႈဢဝ်ဢၢပ်ႈပၼ်တီႈယိတ်ႉပရေႃးႁိၵ်ႈၵူၼ်းမဵဝ်းလေႇဝိဢၼ်ႁၢပ်ႇတိူၵ်ႈပတိၺိၼ်ႇထႃႇဝရႃႉၽြႃးၸိူဝ်းၼၼ်ႉဢိၵ်ႇတင်းတီႈၵႃႈပဵၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢိသရေႇလတင်းလၢႆၸိူဝ်းၼၼ်ႉသေလႄႈမုဝ်းသေႇသင်ႇလၢတ်ႈဝႆႉလႄႈဝႃႈၸမ်း၊-
၁၀ ၼႂ်းတီႈသုတ်းၸဵတ်းပီႊမိူဝ်ႈဢၼ်ႁွတ်ႈထိုင်ပီႊဢၼ်ၶၢၼ်းဝႆႉႁႂ်ႈလႆႈပွႆႇၶႃႈလွတ်ႈၶိင်ႇဢၼ်ၶၢမ်ႇပွႆးသုမ်ႉထဵင်ၼၼ်ႉမိူဝ်ႈဢၼ်ၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်မႃး
၁၁ ႁႂ်ႈလႆႈၼပျေႃႉတူဝ်ၸဝ်ႈၵဝ်ႇၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈသူၼႂ်းတီႈဢၼ်မၼ်းၸဝ်ႈတၵ်းလိူၵ်ႈၵဵပ်းဢဝ်ၼၼ်ႉၸိုင်သူတၵ်းလႆႈၽတ်းပိင်းၺၢပ်ႈတြႃးၼႆႉၵႃႈတီႈၽၢႆႇၼႃႈၵူၼ်းမဵဝ်းဢိသရေႇလတင်းသဵင်ႈတင်းလူင်ႁႂ်ႈၶဝ်လႆႈငိၼ်းဢေႃႈ။
၁၂ ႁႂ်ႈၵူၼ်းတင်းလၢႆဢၼ်ပဵၼ်ၵူၼ်းၸၢႆးၵူၼ်းယိင်းလုၵ်ႈဢွၼ်ႇၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈယူႇၵႃႈၼႂ်းဝဵင်းသူၸိူဝ်းၼၼ်ႉတင်းသဵင်ႈၸူႉၵၼ်တုမ်ၵၼ်ႁႂ်ႈၶဝ်လႆႈငိၼ်းလႄႈသွၼ်ဢဝ်သေယဝ်ႉႁႂ်ႈလႆႈရူဝ်ႇသေႇၵုဝ်ယမ်ထႃႇဝရႃႉၽြႃးၽြႃးပဵၼ်ၸဝ်ႈသူလႄႈပႂ်ႉၸွမ်းၵမ်ၵျၢင်ႉၵႂၢမ်းပိင်းၺၢပ်ႈတြႃးၼႆႉတင်းသဵင်ႈတင်းမူတ်း
၁၃ ဢိၵ်ႇတင်းႁႂ်ႈလုၵ်ႈဢွၼ်ႇၶဝ်ဢၼ်ဢမ်ႇပႆႇႁူႉပႆႇၸႅင်ႈၸိူဝ်းၼၼ်ႉလႆႈငိၼ်းလႄႈသွၼ်ဢဝ်ႁႂ်ႈလႆႈၵူဝ်လႆႈႁေထႃႇဝရႃႉၽြႃးၽြႃးပဵၼ်ၸဝ်ႈသူၸူဝ်ဢၼ်သူယင်းယူႇၵႃႈတီႈမိူင်းဢၼ်သူတၵ်းၶၢမ်ႈၼမ်ႉႁွင်ႊယေႃးတၢၼ်ႇသေလႄႈၶဝ်ႈၸၢမ်ႇၸႃးၼၼ်ႉတႃႉ၊ဝႃႈၼင်ႇၼႆဢေႃႈ။
ႁေႃးလၢတ်ႈဝႆႉလွင်ႈဢိသရေႇလၶဝ်တၵ်းတွပ်ႇထဵင်
၁၄ ထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇလႄႈဝႃႈ၊-ၶိင်ႇမိူဝ်ႈဝၼ်းဢၼ်မႂ်းတၵ်းလႆႈတၢႆၼၼ်ႉၸမ်မႃးယဝ်ႉ။ႁွင်ႉဢဝ်ယေႃးသုလႄႈဢွၼ်ၵၼ်မႃးၵႃႈတီႈသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉႁႂ်ႈၵဝ်လႆႈသင်ႇလၢတ်ႈဝႆႉတီႈမၼ်းတႃႉဝႃႈၼင်ႇၼႆလႄႈမုဝ်းသေႇတင်းယေႃးသုဢွၼ်ၵၼ်ၶဝ်ႈၵႃႈၼႂ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉဢေႃႈ။
၁၅ ထႃႇဝရႃႉၽြႃးဢဝ်သဝ်မွၵ်ႇၵုမ်ႈထၢင်ႇသႃးမႃးၵႃႈၼႂ်းသုမ်ႉထဵင်ၸဝ်ႈလႄႈသဝ်မွၵ်ႇၵုမ်ႈၼၼ်ႉတႄႇယူႇၵႃႈၼိူဝ်ၽၵ်းတူသုမ်ႉထဵင်ၸဝ်ႈဢေႃႈ။
၁၆ ထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇလႄႈဝႃႈ၊-မႂ်းတၵ်းလႆႈၼွၼ်းလပ်းလူၺ်ႈၵၼ်တင်းပူႇမွၼ်ႇမႂ်းၸိူဝ်းၼၼ်ႉဢေႃႈ။ၵူၼ်းမဵဝ်းၼႆႉတၵ်းႁဵတ်းၽိတ်းပိူင်ႈၸွမ်းၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းၵႃႈတီႈမိူင်းဢၼ်ၶဝ်တၵ်းၵႂႃႇႁႂ်ႈလႆႈယူႇလူၺ်ႈၵၼ်တင်းၶဝ်ၼၼ်ႉၸိူဝ်းၼၼ်ႉလႄႈၶဝ်တၵ်းၸုၼ်ႉၵဝ်ပႅတ်ႈသေလႄႈယႃႉပတိၺိၼ်ႇတြႃးဢၼ်ၵဝ်ႁဵတ်းလူၺ်ႈၵၼ်တင်းၶဝ်ဝႆႉၼၼ်ႉဢေႃႈ။
၁၇ မိူဝ်ႈၼၼ်ႉတၢင်းၸႂ်မႆႈၶႂ်ႈၸႃႉၵဝ်တၵ်းဢွၵ်ႇလႄႈၵဝ်တၵ်းၸုၼ်ႉပႅတ်ႈၶဝ်ဢေႃႈ။ၵဝ်တၵ်းဝၢႆႇၼႃႈပႅတ်ႈၶဝ်လႄႈၶဝ်တၵ်းလူႉလႅဝ်ဢေႃႈ။ၽေးတၢမ်ႇၼမ်ၼႃႇတၵ်းတူၵ်းႁွတ်းၵႃႈၼိူဝ်ၶဝ်ဢေႃႈ။ဝၼ်းမိူဝ်ႈၼၼ်ႉၶဝ်တၵ်းလၢတ်ႈလႄႈဝႃႈ၊-
၁၈ ၵွပ်ႈပိူဝ်ႈၽြႃးပဵၼ်ၸဝ်ႈႁဝ်းဢမ်ႇမီးၵႃႈၼႂ်းႁဝ်းလႄႈၽေးတၢမ်ႇၸိူဝ်းၼႆႉႁွတ်းထိုင်ၵႃႈၼိူဝ်ႁဝ်းဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။ၵွပ်ႈပိူဝ်ႈတူႉၸရိူၵ်ႈဢၼ်ၶဝ်ႁဵတ်းလႄႈဝေႈပိူင်ႈၵႂႃႇၸွမ်းလင်ၽြႃးတၢင်ႇသူႇတၢင်ႇပႃးၼၼ်ႉဝၼ်းမိူဝ်ႈၼၼ်ႉၵဝ်တၵ်းဝၢႆႇၼႃႈၵဝ်ပႅတ်ႈဢမၢၼ်ႇၶၼ်ႇပဵၼ်ဢေႃႈ။
၁၉ တေႃႈလဵဝ်ၼႆႉတႅမ်ႈတၢင်းဢၼ်ႁဵတ်းၵႂၢမ်းထမ်ႇမႃႉၼႆႉဝႆႉပုၼ်ႈသူလႄႈဢဝ်သွၼ်ပၼ်တီႈၵူၼ်းမဵဝ်းဢိသရေႇလတင်းလၢႆတႃႉ။ၵႂၢမ်းဢၼ်ႁဵတ်းၼႆႉၼၼ်ႉၸိုင်ႁႂ်ႈၶဝ်ဢူမ်သူပ်းဝႆႉႁႂ်ႈလႆႈပဵၼ်သၢၵ်ႈသေႇပုၼ်ႈၵဝ်ၽၢႆႇၼိုင်ႈတင်းၵူၼ်းမဵဝ်းဢိသရေႇလတင်းလၢႆတႃႉ။
၂၀ လွင်ႈမၼ်းၸမ်းမိူဝ်ႈဢၼ်ၵဝ်ဢဝ်ၶဝ်သႂၢင်းၶဝ်ႈၵႃႈၼႂ်းမိူင်းဢၼ်ၵဝ်တိူင်ႇဝႃႈဝႆႉတီႈပူႇမွၼ်ႇၶဝ်ဢၼ်ၼမ်ႉၼူမ်းတင်းၼမ်ႉၽိုင်ႈလႆယူႇၼၼ်ႉသေလႄႈၶဝ်လႆႈၵိၼ်ဢိမ်ႇၵိၼ်တဵမ်သေယဝ်ႉ၊ပီးမၼ်းမႃးၼၼ်ႉၸိုင်ၶဝ်တၵ်းဝေႈပိူင်ႈၵႂႃႇၸူးၽြႃးတၢင်ႇသူႇတၢင်ႇပႃးလႄႈႁဵတ်းဝၢတ်ႈၵူဝ်းၵႂၢႆႇဢေႃႈ။တၵ်းႁဵတ်းဢမ်ႇပေႃးၼင်ႇႁိုဝ်တီႈၵဝ်လႄႈယႃႉပတိၺိၼ်ႇတြႃးၵဝ်ပႅတ်ႈဢေႃႈ။
၂၁ မိူဝ်ႈဢၼ်ၽေးတၢမ်ႇၼမ်ၼႃႇတူၵ်းႁွတ်ႈၵႃႈၼိူဝ်ၶဝ်ၼၼ်ႉၸိုင်ၵႂၢမ်းဢၼ်ႁဵတ်းၼၼ်ႉတၵ်းၶၢမ်ႇသၢၵ်ႈသေႇယူႇၵႃႈတီႈၽၢႆႇၼႃႈၶဝ်ဢေႃႈ။ၸိူဝ်ႉၶိူဝ်းၶဝ်ၼၼ်ႉဢမ်ႇလႆႈလူင်လႆႈလိုမ်းတၢင်းဢၼ်ဢူမ်သူပ်းဝႆႉၼၼ်ႉ။တေႃႈလဵဝ်ၼႆႉၸဵမ်မိူဝ်ႈၸူဝ်ႈဢၼ်ၵဝ်ဢမ်ႇပႆႇဢဝ်ၶဝ်သႂၢင်းၶဝ်ႈၵႃႈၼႂ်းမိူင်းဢၼ်ၵဝ်တိူင်ႇဝႃႈဝႆႉၼၼ်ႉၸိုင်ၵဝ်ႁူႉတၢင်းၵျၢမ်ႇတၢင်းပွင်ဢၼ်ၶဝ်ၵျၢမ်ႇပွင်ၼၼ်ႉယူႇဢေႃႈ၊ဝႃႈၼင်ႇၼႆဢေႃႈ။
၂၂ ၼင်ႇၼၼ်လႄႈမုဝ်းသေႇတႅမ်ႈတၢင်းဢၼ်ႁဵတ်းၵႂၢမ်းထမ်ႇမႃႉၼႆႉဝႆႉၼႂ်းဝၼ်းၼၼ်ႉၵမ်းလဵဝ်သေလႄႈသွၼ်ပၼ်တီႈၵူၼ်းမဵဝ်းဢိသရေႇလတင်းလၢႆဢေႃႈ။မၼ်းၸဝ်ႈသမ်ႉသင်ႇလၢတ်ႈဝႆႉတီႈယေႃးသုလုၵ်ႈၸၢႆးၼုၼ်ႇၼၼ်ႉလႄႈဝႃႈ၊-
၂၃ ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။မႂ်းတၵ်းလႆႈဢဝ်ၵူၼ်းမဵဝ်းဢိသရေႇလတင်းလၢႆသႂၢင်းၶဝ်ႈၵႃႈၼႂ်းမိူင်းဢၼ်ၵဝ်တိူင်ႇဝႃႈဝႆႉၼၼ်ႉဢေႃႈ။ၵဝ်တၵ်းမီးယူႇလူၺ်ႈၵၼ်တင်းမႂ်းဢေႃႈ၊ဝႃႈၼင်ႇၼႆဢေႃႈ။
၂၄ မိူဝ်ႈဢၼ်မုဝ်းသေႇတႅမ်ႈၵႂၢမ်းပိင်းၺၢပ်ႈတြႃးၼႆႉၵႃႈၼႂ်းလိၵ်ႈယဝ်ႉတူဝ်ႈယဝ်ႉၼၼ်ႉၸိုင်
၂၅ မုဝ်းသေႇသင်ႇလၢတ်ႈဝႆႉတီႈၵူၼ်းမဵဝ်းလေႇဝိဢၼ်ႁၢပ်ႇတိူၵ်ႈပတိၺိၼ်ႇထႃႇဝရႃႉၽြႃးၼၼ်ႉလႄႈဝႃႈ၊-
၂၆ ဢဝ်ၵျၢမ်းလိၵ်ႈပိင်းၺၢပ်ႈတိၼႆႉတၢင်ႇဝႆႉၵႃႈႁိမ်းတိူၵ်ႈပတိၺိၼ်ႇထႃႇဝရႃႉၽြႃးၽြႃးပဵၼ်ၸဝ်ႈသူႁႂ်ႈပဵၼ်သၢၵ်ႈသေႇယူႇၽၢႆႇၼိုင်ႈတင်းသူတႃႉ။
၂၇ ၵဝ်ႁူႉလွင်ႈဢၼ်သူမီးသၽေႃးဢၼ်ၸၢင်ႊလုၵ်ႉၽိုၼ်ႉလမ်းၶေႃးဢၼ်ၵႅၼ်ႇၶႅင်ၼၼ်ႉဢေႃႈ။တူၺ်းလူ။တေႃႈၵႃႈၼႂ်းမိူဝ်ႈဢၼ်ၵဝ်ယင်းတိုၵ်ႉဢသၢၵ်ႈလိပ်းလႄႈယူႇလူၺ်ႈၵၼ်တင်းသူႇယူႇဝၼ်းမိူဝ်ႈၼႆႉသူလုၵ်ႉၽိုၼ်ႉပုင်ႇၵၢၼ်ႇထႃႇဝရႃႉၽြႃးယဝ်ႉ။လိုၼ်းဢၼ်ၵဝ်တၢႆယဝ်ႉသူတၵ်းယိင်ႈၶႅၼ်းႁဵတ်းလိူဝ်တွၼ်းၼႃႇသေၼၼ်ႉလူးၵွၼ်ႇဢေႃႈ။
၂၈ ႁႂ်ႈၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းမဵဝ်းသူၵူႈမဵဝ်းဢိၵ်ႇတင်းၶုၼ်ဢယႃႇသိသူတင်းသဵင်ႈတင်းလူင်ၸူႉၵၼ်တုမ်ၵၼ်ၵႃႈတီႈၵဝ်ႁႂ်ႈၵဝ်လႆႈဢဝ်ၵႂၢမ်းၸိူဝ်းၼႆႉႁေႃးလၢတ်ႈထိုင်ႁူၶဝ်လႄႈႁႂ်ႈၵၢင်ႁၢဝ်တင်းလိၼ်မိူင်းပဵၼ်သၢၵ်ႈသေႇယူႇၽၢႆႇၼိုင်ႈတင်းၶဝ်တႃႉ။
၂၉ လွင်ႈမၼ်းၸမ်းၵဝ်ႁူႉလွင်ႈဢၼ်လိုၼ်းသေဢၼ်ၵဝ်တၢႆယဝ်ႉၼၼ်ႉသူတၵ်းၽွၵ်ႈပျၢၼ်ႇၵႂႃႇတႄႉတႄႉဝႃႈဝႃႈလႄႈဝေႈပိူင်ႈသသေဵၼ်ႈတၢင်းဢၼ်ၵဝ်သင်ႇလၢတ်ႈဝႆႉတီႈသူၼၼ်ႉဢေႃႈ။ၼႂ်းၶိင်ႇၵႃႇလႃႉမိူဝ်ႈဝၼ်းၵမ်းလိုၼ်းၼၼ်ႉၽေးဢူးပၢတ်ႈတၵ်းတူၵ်းႁွတ်ႈၵႃႈၼိူဝ်သူၵွပ်ႈပိူဝ်ႈဢၼ်သူႁဵတ်းတူႉၸရိူၵ်ႈဢပျႅတ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈဢဝ်လွင်ႈတၢင်းဢၼ်သူဢဝ်မိုဝ်းႁဵတ်းၼၼ်ႉတိုၵ်းယုင်းတင်းၸႂ်မႆႈၶႂ်းၸႃႉမၼ်းၸဝ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။
ၵႂၢမ်းဢၼ်မုဝ်းသေႇႁွင်ႉ
၃၀ မုဝ်းသေႇဢဝ်ၵႂၢမ်းတၢင်းဢၼ်ႁဵတ်းၵႂၢမ်းၼႆႉၼၼ်ႉလၢတ်ႈထိုင်ႁူပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင်ယဝ်ႉတူဝ်ႈဢေႃႈ။ၵႂၢမ်းဢၼ်ဝႃႈၼင်ႇၼႆၸမ်း၊-