၃၀
ၶေႃႈၵႂၢမ်းဢႃႇၵုရ
၁ ၵႂၢမ်းဢႃႇၵုရလုၵ်ႈၸၢႆးယႃႇၵေႇ ဢၼ်မၼ်းလၢတ်ႈတီႈဢိသေႇလတင်းဢုၵလၼၼ်ႉၸမ်း၊-ၵဝ်ပဵၼ်ၵေႃႉ ဢၼ်ဢမ်ႇႁူႉသင်သေပိူၼ်ႈၼၼ်ႉဢေႃႈ။
၂ ၵဝ်ဢမ်ႇမီး တၢင်းႁူႉတၢင်းႁၼ်ၵူၼ်း။
၃ ၵဝ်ဢမ်ႇသွၼ်ဢဝ်ပိင်ႇၺႃႇ တြႃး။
၄ ၵဝ်ဢမ်ႇႁူႉၸႅင်ႈလွင်ႈတၢင်းဢၼ်မူတ်းၸၢင်ႇတင်းလၢႆ။ၽူႈ လႂ်ၶိုၼ်ႈၵႃႈၼိူဝ်ၽုင်ႇၵၢင်ႁၢဝ်သေလႄႈသမ်ႉၶိုၼ်းလူင်းမႃး။ၽူႈ လႂ်ဢဝ်မိုဝ်းတူဝ်ၸဝ်ႈၵဝ်ႇယိပ်းၵမ်ဢဝ်လူမ်း။ၽူႈ လႂ်ဢဝ်ၼမ်ႉတင်းလၢႆပုၵ်ႉႁေႃႇသႂ်ႇဝႆႉၵႃႈၼႂ်းၶူဝ်းၼုင်ႈတၢင်းမႆႊမၼ်း။ၽူႈ လႂ်ႁႂ်ႈႁိမ်းလႅၼ်သုတ်းလိၼ်မိူင်းၵႃႈမီးၼၼ်ႉတႄႇယူႇ။ပေႃးမႂ်းႁူႉၸိုဝ်သဵင်မၼ်းတင်းၸိုဝ်သဵင်လုၵ်ႈၸၢႆးမၼ်းၸိုင် လၢတ်ႈ ပၼ်ၵဝ်သေၵမ်း။
၅ ၵႂၢမ်းၽြႃးပဵၼ်ၸဝ်ႈၵႃႈမီးတင်းသဵင်ႈတင်းလူင်ပဵၼ်ဢၼ်မူတ်းသႂ်လႄႈ မၼ်းၸဝ်ႈပဵၼ်ၶိူင်ႈဢၼ်ႁႄႉလၢၵ်ႈၼၢၵ်ႈ တီႈၶဝ်ၸိူဝ်းဢၼ်ဢိင်ပိုင်ႈမၼ်း ၸဝ်ႈယူႇၼၼ်ႉဢေႃႈ။
၆ ယႃႇပေထၢပ်ႈသႂ်ႇထႅင်ႈတီႈၵႂၢမ်းမၼ်းၸဝ်ႈ။ၵူဝ်မၼ်းၸဝ်ႈတၵ်းတၢင်ႇဢပျႅတ်ႈတီႈမႂ်းလႄႈမႂ်းတၵ်းပဵၼ်ၵေႃႉဢၼ်လၢတ်ႈမူႉသႃႇဢေႃႈ။
၇ ၶႃႈၸဝ်ႈယွၼ်းဢဝ်သူးသွင်ပႃး တီႈၸဝ်ႈႁဝ်းတီႈၶႃႈဢေႃႈ။ၸူဝ်ႈဢၼ်ၶႃႈၸဝ်ႈဢမ်ႇပႆႇတၢႆၸိုင်ၶႅၼ်း တေႃႈယႃႇပေထဵင်ပႅတ်ႈသေၵမ်းတီႈၶႃႈ။
၈ ဢဝ်ဢႃႉၼတ်ႉတႃႉတင်းမူႉသႃႇ ဝႆႉၵႆၵၼ်တင်းၶႃႈၸဝ်ႈသေၵမ်းတီႈၶႃႈ။ယႃႇပေပၼ်တၢင်းဢၼ်ယၢၵ်ႈဢၼ်ၽၢၼ်ဢိၵ်ႇတင်း တၢင်းဢၼ်မၢၵ်ႈဢၼ်မီးတီႈၶႃႈၸဝ်ႈ။ၶႅၼ်းတေႃႈပၼ်တၢင်းၵိၼ်ဢၼ်တၢၼ်ႇပေႃးၵုမ်ႇ လဵင်ႉဢသၢၵ်ႈၼၼ်ႉၵူၺ်းသေၵမ်းတီႈၶႃႈ။
၉ ပေႃးဢမ်ႇၼၼ်ၵူဝ်ၶႃႈၸဝ်ႈ တၵ်းတဵမ်ထူၼ်ႈလိူင်ႇၸႂ်ၼႃႇလႄႈတၵ်းထဵင်ပႅတ်ႈၸဝ်ႈႁဝ်းလႄႈဝႃႈ၊- ထႃႇဝရႃႉၽြႃးၸမ်းပဵၼ်ၽူႈ လႂ်၊ဝႃႈၼင်ႇၼႆတီႈၶႃႈဢေႃႈ။ဢမ်ႇၼၼ်ၵေႃႈ ၵူဝ်ၶႃၸဝ်ႈတၵ်းယၢၵ်ႈတၵ်းၽၢၼ်ၼႃႇလႄႈ လၵ်ႉဢဝ်ၶွင်ၶူဝ်းပိူၼ်ႈသေလႄႈတၵ်းဢဝ်ၼႃႇမႃႉၸိုဝ်သဵင်ၽြႃးပဵၼ်ၸဝ်ႈ ဢွၵ်ႇသူပ်းဝႃႈၵႂၢမ်းမူႉသႃႇတီႈၶႃႈဢေႃႈ။
၁၀ ယႃႇပေၶႃႉၸိုဝ်ၶၢႆသဵင် ၵေႃႉဢၼ်ပဵၼ်ၶႃႈၼၼ်ႉၵႃႈတီႈၸဝ်ႈမၼ်း။ၵူဝ်ႈမၼ်းတၵ်းၵိၼ်ႇလႃႇၵိၼ်ႇဝႃႈ မႂ်းလႄႈဢပျႅတ်ႈတၵ်းႁွတ်ႈထိုင်တီႈမႂ်းဢေႃႈ။
၁၁ မီးၵူၼ်းမဵဝ်းဢၼ်ၸၢင်ႊၵိၼ်ႇလႃႇပေႃႈလႄႈ ဢမ်ႇပၼ်တၢင်း လီတီႈမေႈ။
၁၂ မီးၵူၼ်းမဵဝ်းဢၼ်ထၢင်ႇတူဝ်ၸဝ်ႈၵဝ်ႇမူတ်းသႂ်သိုဝ်ႈၼႃႈတႂ်ႈတႃတူဝ်ၸဝ်ႈၵဝ်ႇလႄႈ ယင်းဢမ်ႇပႆႇလၢင်ႉသုၵ်ႉပႅတ်ႈသေ တၢင်းဢၼ်ၵူဝ်ႈဢၼ်ၵိူၵ်ႇ တူဝ်ၸဝ်ႈၵဝ်ႇလႄႈယူႇ။
၁၃ မီးၵူၼ်းမဵဝ်းဢၼ်မိုၼ်းတႃၶဝ်သုင်ၼႃႇလူင်လၢင်လႄႈ ယုၵ်ႉယွင်ႈႁိမ်းတႃၶဝ်ဝႆႉ။
၁၄ မီးၵူၼ်းမဵဝ်းဢၼ်တဵမ်ဝႆႉတင်း ၶဵဝ်ႈဢၼ်မိူၼ်ၸိူဝ်ႉၼင်ႇမိတ်ႈ၊ ၶဵဝ်ႈလူင်ဢၼ်မိူၼ်ၸိူဝ်ႉၼင်ႇလၢပ်ႇလႅဝ်းပုၼ်ႈဢၼ်တၵ်းၶူပ်းၵိၼ် ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ပႅတ်ႈသေၵႃႈၼိူဝ်လိၼ်မိူင်း တင်းၶဝ်ၸိူဝ်းဢၼ်ၸုတ်ႈဢၼ်လုတ်ႈပႅတ်ႈသေ ၵႃႈၼႂ်းၵူၼ်းတင်းလၢႆၼၼ်ႉမဵဝ်းၼိုင်ႈဢေႃႈ။
၁၅ တူဝ်ပိင်ႇၼၼ်ႉမီးလုၵ်းယိင်းသွင်တူဝ်ဢၼ်ဝႃႈ၊-ပၼ်သေၵမ်း၊ပၼ်သေၵမ်း၊ဝႃႈၼင်ႇၼႆၼၼ်ႉဢေႃႈ။လွင်ႈတၢင်းဢၼ် ဢလူဝ်ႇသၼ်ႇတႃႉဢမ်ႇပျေႇလႆႈသၢမ်ပႃး၊ဢမ်ႇၵႃး၊လွင်ႈတၢင်းဢၼ်ဢမ်ႇၸၢင်ႊဝႃႈ၊-
၁၆ ပေႃး တႃႉ၊ဝႃႈၼင်ႇၼႆၼၼ်ႉသီႇပႃးၸမ်း၊ ပႃႇႁဵဝ်ပႃးၼိုင်ႈ၊တွင်ႉမေႈယိင်းဢၼ်မၼ်းဢမ်ႇမီးလုၵ်ႈၼၼ်ႉ ပႃးၼိုင်ႈ၊လိၼ်ဢၼ်ဢမ်ႇဢိမ်ႇၼမ်ႉလႆႈၼၼ်ႉပႃးၼိုင်ႈ၊ ၽႆးဢၼ်ဢမ်ႇၸၢင်ႊဝႃႈ၊- ပေႃးတႃႉ၊ဝႃႈၼင်ႇၼႆၼၼ်ႉပႃးၼိုင်ႈဢေႃႈ။
၁၇ မၢၵ်ႇတႃ ၵေႃႉဢၼ်ယဝ်ႉဢၼ်ယွၵ်ႇပေႃႈမၼ်းလႄႈႁဵတ်းဢမ်ႇပေႃးၼင်ႇႁိုဝ် တီႈတၢင်းဢၼ်ထွမ်ႇဢဝ်ၵႂၢမ်းမေႈမၼ်းၼၼ်ႉ၊ ၵႃလမ်လူင်ဢၼ်ၵႂႃႇမႃးယူႇၵႃႈတီႈၼႂ်းၶူင်ႈၼႂ်းႁူၺ်ႈၼၼ်ႉ တၵ်းၸၢၵ်ႈဢဝ်ဢွၵ်ႇလႄႈ လၢင်းတႃႉတင်းလၢႆတၵ်းဢွၼ်ၵၼ်ၵိၼ်ဢေႃႈ။
၁၈ လွင်ႈတၢင်းဢၼ်ၺၢၼ်ႇၵဝ်ဢမ်ႇၶိုၼ်းထိုင်လႆႈၼၼ်ႉ မီးသၢမ်ပႃးဢမ်ႇၵႃး၊ လွင်ႈတၢင်းဢၼ်ၵဝ်ဢမ်ႇႁူႉဢမ်ႇ ၸႅင်ႈလႆႈၼၼ်ႉမီးသီႇပႃးၸမ်း၊-
၁၉ ႁွႆးတၢင်းဢၼ်လၢင်းတႃႉၵႂႃႇၵႃႈၼႂ်းလူမ်းၼၼ်ႉပႃးၼိုင်ႈ၊ ႁွႆးတၢင်းဢၼ်ငူးၵႂႃႇၵႃႈၼိူဝ်မၢၵ်ႇႁိၼ်ၼၼ်ႉပႃးၼိုင်ႈ၊ ႁွႆးတၢင်းဢၼ်ႁိူဝ်းသၢင်းၽေႃးၵႂႃႇၵႃႈၼႂ်းပၢင်ႇလၢႆႇၼၼ်ႉ ပႃးၼိုင်ႈ၊ႁွႆးတၢင်းဢၼ် ၽူႈၸၢႆးၵႂႃႇလူၺ်ႈၵၼ်တင်းၽူႈသၢဝ် ၼၼ်ႉပႃးၼိုင်ႈဢေႃႈ။
၂၀ ႁွႆးတၢင်းမေႈယိင်းဢၼ်မီးၽူဝ်ယူႇလႄႈ လဵၼ်ႈၽူဝ်ၼၼ်ႉၵေႃႈမိူၼ်ၸိူဝ်ႉၼင်ႇၼၼ်ဢေႃႈ။မၼ်းၵိၼ်တၢင်းၵိၼ်တၢင်းၶူပ်းသေယဝ်ႉၸဵတ်ႉသူပ်းၸဵတ်ႉပၢၵ်ႇမၼ်းသေလႄႈဝႃႈ၊-ၵဝ်ဢမ်ႇႁဵတ်းတူႉၸရိူၵ်ႈသင်ၵူၺ်း၊ဝႃႈၼင်ႇၼႆဢေႃႈ။
၂၁ လွင်ႈတၢင်းဢၼ် သၼ်ႇဝႆၶွၼ်းၶဝ်ႇလိၼ်မိူင်းသၢမ်ပႃးဢမ်ႇၵႃး၊ လွင်ႈတၢင်းဢၼ်လိၼ်မိူင်းဢမ်ႇၶၢမ်ႇလႆႈ သီႇပႃးၸမ်း၊-
၂၂ ၶႃႈဢၼ်ႁဵတ်းၶုၼ်ၼၼ်ႉပႃးၼိုင်ႈ၊ၵူၼ်းမိူၵ်ႈ ဢၼ်လႆႈၵိၼ်ဢိမ်ႇၵိၼ်တဵမ်ၼၼ်ႉပႃးၼိုင်ႈ၊ မေႈယိင်းႁၢႆႉဢၼ်ဢဝ်ၽူဝ်ၼၼ်ႉပႃးၼိုင်ႈ၊
၂၃ ၶႃႈမေႈယိင်း ဢၼ်လႆႈၶၢမ်ႇဢဝ်ဢမူၺ်ႇၸဝ်ႈၼၢင်းမၼ်း ၼၼ်ႉပႃးၼိုင်ႈဢေႃႈ။
၂၄ လွင်ႈတၢင်းဢၼ်ပဵၼ်ဢၼ်လဵၵ်ႉဢၼ်ဢွၼ်ႇၵႃႈၼိူဝ်လိၼ်မိူင်းၼႆႉသေၵေႃႈ မီးပိင်ႇ ၺႃႇၼႃႇလူင်လၢင်ၼၼ်ႉသီႇပႃးၸမ်း၊-
၂၅ မူတ်ႉဢၼ်ပဵၼ်မဵဝ်းဢၼ်ဢမ်ႇမီးဢဵၼ်မီးႁႅင်းသေၵေႃႈ ၸၢင်ႊပွင်ႁႅၼ်းပွင်မႄးတၢင်းၵိၼ်ၶဝ်ဝႆႉ ၼႂ်းမိူဝ်ႈဢၼ်ပဵၼ်ၶိင် ႁႅင်ႈၼၼ်ႉပႃးၼိုင်ႈ၊
၂၆ ပၢင်တၢႆးသႃႇၽၢၼ်ႇဢၼ်ပဵၼ်မဵဝ်းဢၼ်ဢမ်ႇၵႅၼ်ႇဢမ်ႇၶႅင်သေၵေႃႈ ၸၢင်ႊၶျႃးတီႈ ယူႇၵႃႈတီႈမၢၵ်ႇႁိၼ်မၢၵ်ႇၽႃၼၼ်ႉပႃးၼိုင်ႈ၊
၂၇ မႅင်းၵႅင်းဢၼ်ဢမ်ႇမီးၸဝ်ႈမီးၶုၼ်သေၵေႃႈ ၸၢင်ႊႁဵတ်းတပ်ႉႁဵတ်းတႃႇသေလႄႈ ၵႂႃႇၵၢပ်ႈၵၢပ်ႈတမ်တမ်ၵၼ်ၼၼ်ႉ ပႃးၼိုင်ႈ၊
၂၈ ၸိူင်ႉႁိူၼ်းဢၼ်ဢဝ်မိုဝ်းၵွပ်ႈယိပ်းလႄႈၸၢင်ႊယူႇၵႃႈၼႂ်း ႁေႃၶုၼ်ႁေႃၶမ်းတင်းလၢႆၼၼ်ႉပႃးၼိုင်ႈဢေႃႈ။
၂၉ လွင်ႈတၢင်းဢၼ်ၵႂႃႇ လီလီငၢမ်းငၢမ်းသၢမ်ပႃးဢမ်ႇၵႃး၊ လွင်ႈတၢင်းဢၼ်ၵႂႃႇႁၢင်ႈလီႁၢင်ႈငၢမ်းသီႇပႃး ၸမ်း၊-
၃၀ သၢင်ႇသီႈဢၼ်ဢဵၼ်ႁႅင်းယႂ်ႇၼႃႇသေတရိၵ်ႉသၢၼ်ႇတင်းသဵင်ႈတင်းလူင်လႄႈ ဢမ်ႇၸၢင်ႊဝႄႈပိူင်ႈ ၼႃႈၽူႈ လႂ်ၼၼ်ႉပႃးၼိုင်ႈ၊
၃၁ မႃႉသိုၵ်းပႃးၼိုင်ႈ၊ပေႉပေႃႈပႃးၼိုင်ႈ၊ၶုၼ်ႁေႃၶမ်းဢၼ်ၽူႈ လႂ် ဢမ်ႇႁၢမ်ႈတပ်ႉႁႄႉၶႅၼ်လႆႈၼၼ်ႉပႃးၼိုင်ႈဢေႃႈ။
၃၂ ပေႃးမႂ်းယုၵ်ႉယွင်ႈတူဝ်မႂ်းသေလႄႈ ႁဵတ်းမႅၼ်ႈလွင်ႈတၢင်းဢၼ်မိူၵ်ႈ၊ ပေႃးမႂ်းၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ဢမ်ႇလီဢမ်ႇငၢမ်းၸိုင် ဢဝ်မိုဝ်းမႂ်းတူမ်းသူပ်း မႂ်းတႃႉ။
၃၃ တၢင်းဢၼ်တဝ်ႈၼမ်ႉၼူမ်းၼၼ်ႉၸၢင်ႊႁႂ်ႈထေႃးပၢတ်ႈဢွၵ်ႇလႄႈ တၢင်းဢၼ်လိမ်ႇတိုတ်ႉၶူႈလင်ၼၼ်ႉၸၢင်ႊႁႂ်ႈလိူတ်ႈဢွၵ်ႇဢေႃႈ။မိူၼ်ၼင်ႇၼၼ်တၢင်းဢၼ်တိုၵ်းယူင်းတေႃးသႃႉၼၼ်ႉ ၸၢင်ႊႁႂ်ႈတၢင်းဢၼ်ၽိတ်းၵၼ်ဢွၵ်ႇဢေႃႈ။