၂၈
၁ ၵေႃႉဢၼ်ဢမ်ႇတြႃးၼၼ်ႉ ပိၵ်ႉသမ်ႉဢမ်ႇမီးၵေႃႉဢၼ်လိုပ်ႈၸွမ်းလမ်းၸွမ်းသေၵေႃႈတၵ်းပၢႆႈလႄႈၵေႃႉဢၼ်သိုဝ်ႈတေႃႇၸမ်းၸၢင်ႊႁတ်းႁၢၼ်မိူၼ်ၸိူဝ်ႉ ၼင်ႇသၢင်ႇသီႈဢေႃႈ။
၂ ၵွပ်ႈပိူဝ်ႈဢပျႅတ်ႈၵူၼ်းဝၢၼ်ႈၵူၼ်းမိူင်းလႄႈၸင်ႇမီးၶုၼ်ၼမ်ၼႃႇဢေႃႈ။ၵွပ်ႈပိူဝ်ႈၵေႃႉဢၼ်မီးၺၢၼ်ႇတင်းပိင်ႇၺႃႇတၢင်းဢၼ်ႁူႉ ဢၼ်ၸႅင်ႈၼၼ်ႉမၢၼ်ႈမိူင်းၵတ်းယဵၼ်ဢေႃႈ။
၃ ၸဝ်ႈၶုၼ်ဢၼ်ၼိၵ်ႈၸၢၵ်ႈငႅၼ်းသေး ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉ ပဵၼ်မိူၼ်ၸိူဝ်ႉၼင်ႇၼမ်ႉၽူၼ်ၶူမ်ဢၼ်ဢမ်ႇႁႂ်ႈတၢင်းၵိၼ် လႆႈၵိုတ်းၵျၢၼ်ႇလႃးလႃး လႄႈၽဵဝ်ႈၵႂႃႇမူတ်းမူတ်းသဵင်ႈသဵင်ႈၼၼ်ႉဢေႃႈ။
၄ ၶဝ်ၸိူဝ်းဢၼ်ၸုၼ်ႉပႅတ်ႈတြႃးၼၼ်ႉ ၸၢင်ႊယွင်ႈယေႃးၶဝ်ၸိူဝ်းဢၼ်ဢမ်ႇတြႃးၼၼ်ႉလႄႈ ၶဝ်ၸိူဝ်းဢၼ်ပႂ်ႉၸွမ်းတြႃးယူႇၼၼ်ႉၸမ်း ၸၢင်ႊႁဵတ်းၶတ်းၵၼ်တင်း ၶဝ်ၼၼ်ႉဢေႃႈ။
၅ ၶဝ်ၸိူဝ်းဢၼ်ဢမ်ႇတြႃးၼၼ်ႉဢမ်ႇ ၸၢင်ႊႁူႉတၢင်းဢၼ်ၸီႇယၢင်ႇၸွမ်းၼင်ႇတြႃး။ၶဝ်ၸိူဝ်းဢၼ်ႁႃဢဝ်ထႃႇဝရႃႉၽြႃးၼၼ်ႉၸမ်း ၸၢင်ႊႁူႉ တၢင်းဢၼ်ၸီႇယၢင်ႇၵူႈၸိူဝ်ႉၵူႈပိူင်ဢေႃႈ။
၆ တၢင်းဢၼ်ယၢၵ်ႈၽၢၼ် ၵွပ်ႈပိူဝ်ႈဢၼ်ၸွမ်းသဵၼ်ႈတၢင်းဢၼ်ၸေးၸုမ်ႇၼၼ်ႉ ယိင်ႈၶႅၼ်းလီမျၢတ်ႈၼႃႇသေတၢင်းဢၼ်ၸၢင်ႊမၢၵ်ႈၸၢင်ႊမီး ၼႂ်းတၢင်းဢၼ်ၸွမ်းသဵၼ်ႈ တၢင်းဢၼ်ၵူတ်ႉဢၼ်ငေႃးၼၼ်ႉဢေႃႈ။
၇ ၵေႃႉဢၼ်ပႂ်ႉတြႃးယူႇၼၼ်ႉပဵၼ်လုၵ်ႈၸၢႆး ဢၼ်မီးပိင်ႇၺႃႇလႄႈၵေႃႉဢၼ်ႁဵတ်းၵေႃႉႁဵတ်းသေႈလူၺ်ႈၵၼ်တင်းၶဝ်ၸိူဝ်းဢၼ်ၵိၼ်ပူၼ်ႉၵိၼ်လိူဝ်ၼၼ်ႉၸမ်းၸၢင်ႊႁႂ်ႈ ပေႃႈမၼ်းဢူၵ်းဢၢႆဢေႃႈ။
၈ ၵေႃႉဢၼ်ဢဝ်ဢတူဝ်းဢမႅတ်ႈၶီႈငိုၼ်းဢၼ်ဢမ်ႇတြႃးလႄႈ ႁႂ်ႈၶွင်ၶူဝ်းယႂ်ႇၽႄႈတူဝ်းတွၼ်းမႃးၼၼ်ႉ ပဵၼ်တၢင်းဢၼ်ၸူႉႁွမ်ႇဝႆႉပုၼ်ႈပိူၼ်ႈတၢင်ႇၵေႃႉဢၼ်မေႃဢိတ်းလူၶဝ်ၸိူဝ်း ဢၼ်ယၢၵ်ႈဢၼ်ၽၢၼ်ၼၼ်ႉဢေႃႈ။
၉ ၵေႃႉဢၼ်ဝၢႆႇႁူမၼ်းပႅတ်ႈသတြေႃးၼၼ်ႉ ပိၵ်ႉသမ်ႉမၼ်းသူးတွင်းသေၵေႃႈၵႂၢမ်းပထၼႃႇမၼ်းၼၼ်ႉ ပဵၼ်ဢၼ်လီႁင်ႈ ဢဵတ်ႇသဵတ်ႇဢေႃႈ။
၁၀ ၵေႃႉဢၼ်ႁဵတ်းႁႂ်ႈၶဝ်ၸိူဝ်းဢၼ်သိုဝ်ႈလီရူဝ်းလီလႆႈဝႄႈပိူင်ႈၵႂႃႇၸွမ်းသဵၼ်ႈတၢင်းဢၼ်ဢမ်ႇလီၼၼ်ႉတၵ်းတူၵ်းသႂ်ႇၵႃႈၼႂ်းၶုမ်ၼႂ်းလုၵ်းဢၼ်မၼ်းၶုတ်ႉၼၼ်ႉဢေႃႈ။ၶဝ်ၸိူဝ်းဢၼ်သၽေႃးၸေးၸုမ်ႇၼၼ်ႉၸမ်း တၵ်းလႆႈၶၢမ်ႇဢမူၺ်ႇလွင်ႈတၢင်းဢၼ်လီဢေႃႈ။
၁၁ ၵေႃႉဢၼ်ၸၢင်ႊမၢၵ်ႈၸၢင်ႊမီးၼၼ်ႉ ၸၢင်ႊထၢင်ႇမၼ်းမီးၺၢၼ်ႇသိုဝ်ႈၼႃႈတႂ်ႈတႃမၼ်းလႄႈ ၵေႃႉဢၼ်ယၢၵ်ႈဢၼ်ၽၢၼ်ဢၼ်ၺၢၼ်ႇလီၼၼ်ႉၸမ်း ၸၢင်ႊၸႅတ်ႈထၢမ်ၸႅတ်ႈ တူၺ်းမၼ်းဢေႃႈ။
၁၂ မိူဝ်ႈဢၼ်ၶဝ်ၸိူဝ်းဢၼ်သိုဝ်ႈတေႃႇၼၼ်ႉပႄႉၼႅင်ႇၼၼ်ႉၸိုင် မီးတၢင်းဢၼ်သိူဝ်းၸူမ်းၼမ်ၼႃႇလႄႈ မိူဝ်ႈဢၼ်ၶဝ်ၸိူဝ်းဢၼ်ဢမ်ႇတြႃးၼၼ်ႉ ႁွတ်ႈထိုင်တၢင်းဢၼ်ဢုပ်ႉပိူင်ႇၼၼ်ႉၸမ်း ၵူၼ်းတင်းလၢႆလႆႈပၢႆတဵတ်ႇပၢႆမႅပ်းယူႇဢေႃႈ။
၁၃ ၵေႃႉဢၼ်သိူင်ႇမႅပ်းဢပျႅတ်ႈမၼ်းဝႆႉၼၼ်ႉ ဢမ်ႇလႆႈလီလႆႈပဵၼ်လႄႈၵေႃႉဢၼ်ၽုၺ်ႇဢွၵ်ႇၼႄပျႃးဢပျႅတ်ႈမၼ်းလႄႈၸုၼ်ႉပႅတ်ႈၼၼ်ႉၸမ်း တၵ်းလႆႈၶၢမ်ႇၵရူႉ ၼႃႇၸဝ်ႈဢေႃႈ။
၁၄ ၵေႃႉဢၼ်ၵူဝ်ႁႄထႃႇဝရႃႉၽြႃးယူႇတႃႇသေႇၼၼ်ႉမီးမႇင်ႇၵလႃႇလႄႈ ၵေႃႉဢၼ်ႁႂ်ႈႁူဝ်ၸႂ်မၼ်းၵႅၼ်ႇၶႅင် ၼၼ်ႉၸမ်းတၵ်းထူပ်းၽေးဢူးပၢတ်ႈ ဢေႃႈ။
၁၅ ၶုၼ်ဢႃႉထမ်ႇမႃႉဢၼ်ဢုပ်ႉပိူင်ႇၵူၼ်းမိူင်းဢၼ်ယၢၵ်ႈဢၼ်ၽၢၼ်ၸိူဝ်းၼၼ်ႉပဵၼ်မိူၼ်ၸိူဝ်ႉၼင်ႇသၢင်ႇသီႈ ဢၼ်ႁွင်ႉၶၢင်းဢိၵ်ႇတင်းမီဢၼ်လႄႇၵႂႃႇ ယူႇၼၼ်ႉဢေႃႈ။
၁၆ ၶုၼ်ဢၼ်ဢမ်ႇမီးၺၢၼ်ႇၼၼ်ႉပဵၼ်ၵေႃႉဢၼ်ၸၢင်ႊ ၼိၵ်ႈၸၢၵ်ႈငႅၼ်းသေးၼႃႇလူင်လၢင်လႄႈ ၶုၼ်ဢၼ်ၸင်းလေႃးၽႃႉၼၼ်ႉၸမ်းၸူဝ်ႈဢ သၢၵ်ႈမၼ်းတၵ်းယၢဝ်းယိုၼ်းဢေႃႈ။
၁၇ ၵေႃႉဢၼ်လႆႈၶၢမ်ႇၵွပ်ႈဢဝ်ဢသၢၵ်ႈပိူၼ်ႈတၢႆၼၼ်ႉ တၵ်းလႆႈၶုၼ်ႇလႅၼ်ႈၸူးၶုမ်ပႃႇႁဵဝ်ႈဢေႃႈ။ၽူႈ လႂ်ယႃႇပေႁႄႉပေၶႅၼ် မၼ်း။
၁၈ ၵေႃႉဢၼ်ၸွမ်းသဵၼ်ႈတၢင်းဢၼ်သိုဝ်ႈလီရူဝ်းလီၼၼ်ႉ တၵ်းလွတ်ႈၽေးလႄႈၵေႃႉဢၼ်ၸႂ်ၵူတ်ႉၸႂ်ငေႃးၼၼ်ႉၸမ်း တၵ်းလႆႈလူမ်ႉတူၵ်းသႂ်ႇၵႃႈၼႂ်းသဵၼ်ႈ တၢင်းၼၼ်ႉဢေႃႈ။
၁၉ ၵေႃႉဢၼ်ႁဵတ်းႁႆႊႁဵတ်းၼႃးၼၼ်ႉတၵ်းမီးတၢင်းၵိၼ်တၢင်းၶူပ်း လိူင်ႇၼႃႇလႄႈ ၵေႃႉဢၼ်ၸွမ်းလင် ၶဝ်ၸိူဝ်းဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉၸမ်း တၵ်းဢိမ်ႇတဵမ်ဝႆႉတင်းတၢင်းဢၼ် ယၢၵ်ႈဢၼ်ၽၢၼ်ဢေႃႈ။
၂၀ ၵေႃႉဢၼ်ပႂ်ႉသႅတ်ႉၸႃႇယူႇၼႃႇလူင်လၢင်ၼၼ်ႉ တၵ်းမၢၵ်ႈမီးလိူင်ႇတဵမ်ဝႆႉတင်းတၢင်းလီမၢင်ႇၵလႃႇလႄႈ ၵေႃႉဢၼ်ႁိပ်ႈၼႅတ်ႈႁဵတ်းႁႂ်ႈၸၢင်ႊမၢၵ်ႈၸၢင်ႊမီးၼၼ်ႉၸမ်း ဢမ်ႇၵၢင်းလွတ်ႈတင်းတၢင်းဢၼ်တၢင်ႇဢပျႅတ်ႈ။
၂၁ တၢင်းဢၼ်ထွၵ်ႈလူၺ်ႈၼႃႈၵူၼ်းၼၼ်ႉဢမ်ႇထုၵ်ႇဢမ်ႇလီ။လွင်ႈမၼ်းၸမ်း ၵူၼ်းၸၢင်ႊႁဵတ်းတူႉၸရိူၵ်ႈ ႁႂ်ႈလႆႈၶဝ်ႈမုၼ်းဢွၼ်ႇၽၢၵ်ႇၼိုင်ႈပွတ်းၼိုင်ႈၼၼ်ႉဢေႃႈ။
၂၂ ၵေႃႉဢၼ်ႁိပ်ႈၼႅတ်ႈႁႂ်ႈမၢၵ်ႈႁႂ်ႈမီးၼၼ်ႉ ၸၢင်ႊမီးတႃဢၼ်ႁၢႆႉဢၼ်မိူၵ်ႈလႄႈ ဢမ်ႇၸၢင်ႊႁူႉလွင်ႈဢၼ်ၵမ်းလိုၼ်းတၵ်းႁွတ်ႈထိုင် တၢင်းဢၼ်ယၢၵ်ႈဢၼ်ၽၢၼ် ၼၼ်ႉဢေႃႈ။
၂၃ ၵေႃႉဢၼ်သင်ႇသွၼ်သုင်းမႃႉတၢင်ႇဢပျႅတ်ႈၼၼ်ႉၵမ်းလိုၼ်း ယိင်ႈၶႅၼ်းတၵ်းလႆႈၶၢမ်ႇၵျေးၸူးၼႃႇသေ ၵေႃႉဢၼ်ဢဝ်လိၼ်ႉမၼ်းလႄႈ ၶျေႃး ဝွၼ်းပိူၼ်ႈၼၼ်ႉဢေႃႈ။
၂၄ ၵေႃႉဢၼ်ႁိမ်ဢဝ်ႁူင်ႇဢဝ်ၶွင်ၶူဝ်းပေႃႈမေႈမၼ်းလႄႈ သမ်ႉဝႃႈဢမ်ႇမီးဢပျႅတ်ႈၵူၺ်းဝႃႈၼင်ႇၼႆၼၼ်ႉ ပဵၼ်ၵေႃႉသေႈၵၼ်တင်းၵေႃႉဢၼ် ယႃႉၽဵဝ်ႈပႅတ်ႈၼၼ်ႉဢေႃႈ။
၂၅ ၵေႃႉဢၼ်ၼမ်ႇမၢၵ်ႈလေႃးၽႃႉၼၼ်ႉ ၸၢင်ႊႁဵတ်းတၢင်းဢၼ်ၽိတ်းၵၼ်လႄႈၵေႃႉဢၼ် ဢိင်ပိုင်ႈထႃႇဝရႃႉၽြႃးယူႇၼၼ်ႉၸမ်းၸၢင်ႊ ၶိုၼ်ႈယႂ်ႇလိူင်ၸႂ်ဢေႃႈ။
၂၆ ၵေႃႉဢၼ်ဢိင်ပိုင်ႈႁူဝ်ၸႂ်တူဝ်ၸဝ်ႈၵဝ်ႇယူႇၼၼ်ႉပဵၼ်ၵေႃႉဢၼ်မိူၵ်ႈလႄႈ ၵေႃႉဢၼ်ပႃးတင်း ပိင်ႇၺႃႇသတိၵမ်ၵျၢင်ႉၼၼ်ႉၸမ်း ၸၢင်ႊ လွတ်ႈၽေးဢေႃႈ။
၂၇ ၵေႃႉဢၼ်ၽႄႈၸွၼ်ယိုၼ်ႈမႅင်ႇတီႈၵူၼ်းယၢၵ်ႈၵူၼ်းၽၢၼ်ၼၼ်ႉတၵ်းဢမ်ႇလူဝ်ႇထႅင်ႈသေၸိူဝ်ႉသေပိူင်။ၵေႃႉဢၼ်ဝၢႆႇၼႃႈဝႄႈပိူင်ႈၵူၼ်းယၢၵ်ႈၵူၼ်းၽၢၼ်ၼၼ်ႉၸမ်း တၵ်းလႆႈၶၢမ်ႇတၢင်း ဢၼ်ၵိၼ်ႇဝႃႈၼမ်ၼႃႇဢေႃႈ။
၂၈ မိူဝ်ႈဢၼ်ၶဝ်ၸိူဝ်းဢၼ်ဢမ်ႇတြႃး ႁွတ်ႈထိုင်တၢင်းဢၼ်လႆႈဢုပ်ႉပိူင်ႇၼၼ်ႉၸိုင် ၵူၼ်းတင်းလၢႆလႆႈပၢႆတဵတ်ႇပၢႆမႅပ်းယူႇလႄႈမိူဝ်ႈဢၼ်ၶဝ်ႁွတ်ႈထိုင် တၢင်းဢၼ်လူႉလႅဝ်ၼၼ်ႉၸမ်းၶဝ်ၸိူဝ်းဢၼ်သိုဝ်ႈတေႃႇၼၼ်ႉ ယႂ်ႇၽႄႈၼမ်ၵိုၼ်းမႃးဢေႃႈ။