၂
ၺၢၼ်ႇဢၼ်ပၼ်ဢၵျူဝ်းတူၼ်ႈၸႂ်ၵူၼ်း
၁ လုၵ်ႈၸၢႆးၵဝ်ဢိူၺ်း။ပေႃးမႂ်းႁပ်ႉတုင်းဢဝ်ၵႂၢမ်းၵဝ်လႄႈဢဝ်ပိင်းၺၢပ်ႈၵဝ်တင်းလၢႆ
၂ သႂၢင်းသႂ်ႇဝႆႉၵႃႈၼႂ်းမႂ်းတေႃႇထိုင်ႁွတ်ႈထၼ်ႈပေႃး ဝၢႆႇႁူႁႄႈႁူၸူးၺၢၼ်ႇ လႄႈပႃးတင်းၸႂ်ႁႃဢဝ်ပိင်ႇၺႃႇလႄႈ
၃ ပေႃးမႂ်းႁွင်ႉႁႃၺၢၼ်ႇဢၼ်ၸၢၵ်ၽႄ ၵိဝ်ႇသဵင်မႂ်းပုၼ်ႈတၢင်းႁူႉႁၼ်
၄ ပေႃးမႂ်းႁႃဢဝ်မၼ်း မိူၼ်ၸိူဝ်ႉၼင်ႇႁႃငိုၼ်းၼၼ်ႉလႄႈသွၵ်ႈႁႃမၼ်း မိူၼ်ၸိူဝ်ႉၼင်ႇသွၵ်ႈႁႃၽၼ်ႇတႃႇဢၼ်သိူင်ႇဝႆႉလပ်ႉဝႆႉၼၼ်ႉၸိုင်
၅ မႂ်းတၵ်းႁူႉၸႅင်ႈသၽေႃးဢၼ်ၵူဝ်ႁႄထႃႇဝရႃႉၽြႃးလႄႈတဵမ်ဝႆႉတင်းၺၢၼ်ႇဢၼ်ႁူႉၸၵ်းၽြႃးပဵၼ်ၸဝ်ႈဢေႃႈ။
၆ လွင်ႈမၼ်းၸမ်းထႃႇဝရႃႉၽြႃး ၸၢင်ႊပၼ်ပိင်ႇၺႃႇလႄႈၺၢၼ်ႇဢိၵ်ႇတင်းဢၼ်ႁူႉလႆႈၸႅင်ႊလႆႈၼၼ်ႉ ႁႂ်ႈဢွၵ်ႇပဵၼ်မႃးၵႃႈၼႂ်းသူပ်းမၼ်းၸဝ်ႈဢေႃႈ။
၇ မၼ်းၸဝ်ႈသိမ်းဝႆႉတၢင်းဢၼ်ၸွႆႈထႅမ်ၵမ်ႉထွၵ်ႈၼၼ်ႉဝႆႉပုၼ်ႈၶဝ်ၸိူဝ်းဢၼ်သိုဝ်ႈဢၼ်ရူဝ်းၼၼ်ႉလႄႈ မၼ်းၸဝ်ႈပဵၼ်ၶိူင်ႈဢၼ်ႁႄႉလၢၵ်ႈၼၢၵ်ႈတီႈၶဝ်ၸိူဝ်းဢၼ် ၸွမ်းလူၺ်ႈတြႃးသေ လႄႈၵႂႃႇမႃးယူႇၼၼ်ႉဢေႃႈ။
၈ မၼ်းၸဝ်ႈတၵ်းပႂ်ႉတူၺ်းလူတူၺ်းသဵၼ်ႈတၢင်းတြႃးယူႇလႄႈ ႁႄႉပၼ်ၵင်ႈပၼ်သဵၼ်ႈတၢင်း ၶဝ်ၸိူဝ်းဢၼ်မၼ်းၸဝ်ႈႁၵ်ႉပႅင်းၼၼ်ႉ ဢေႃႈ။
၉ ၵမ်းၼၼ်ႉမႂ်းတၵ်းႁူႉၸႅင်ႈတၢင်းဢၼ်ၵမ်ၵျၢင်ႉဢၼ်သိုဝ်ႈတေႃႇ တၢင်းဢၼ်ၸီႇယၢင်ႇၸွမ်းၼင်ႇတြႃး တၢင်းဢၼ်တႅပ်းတတ်းသို်ဝ်ႈသိုဝ်ႈတေႃႇတေႃႇဢိၵ်ႇတင်းသဵၼ်ႈတၢင်းဢၼ်လီဢၼ်ငၢမ်းၵႃႈမီးၼၼ်ႉ ဢေႃႈ။
၁၀ ၺၢၼ်ႇတၵ်းၶဝ်ႈၵႃႈၼႂ်းႁူဝ်ၸႂ်မႂ်းလႄႈ တၢင်းဢၼ်ႁူႉဢၼ်ၸႅင်ႈ တၵ်းပဵၼ်တၢင်းဢၼ်မူၼ်ႈဢၼ်ပျေႃႇတီႈႁူဝ်ၸႂ်မႂ်းဢေႃႈ။
၁၁ သမ်ႇမႃႇသတိတၵ်းပႂ်ႉထိင်းမႂ်းယူႇလႄႈတၢင်းဢၼ်ႁူႉႁၼ်ၵေႃႈတၵ်းပႂ်ႉတူၺ်းမႂ်းယူႇဢေႃႈ။
၁၂ ၺၢၼ်ႇတၵ်းၵႄႇသႄႇၼုၵ်ႈဢဝ်မႂ်း လွတ်ႈသေၵႃႈၼႂ်းသဵၼ်ႈတၢင်းဢၼ်ႁၢႆႉ ၵႃႈၼႂ်းမိုဝ်းၶဝ်ၸိူဝ်းဢၼ်ၸၢင်ႊ လၢတ်ႈၵႂၢမ်းဢၼ်ၵူတ်ႉဢၼ်ငွၵ်း၊
၁၃ ၶဝ်ၸိူဝ်းဢၼ်ဝႄႈပိူင်ႈသဵၼ်ႈတၢင်းဢၼ်သိုဝ်ႈရူဝ်းလႄႈၸွမ်းသဵၼ်ႈ တၢင်းဢၼ်လပ်းသိင်ႇ
၁၄ ၶဝ်ၸိူဝ်းဢၼ်မူၼ်ႈပျေႃႇယူႇၼႂ်းတူႉၸရိူၵ်ႈလႄႈသႂၢင်ႇသိူဝ်းယူႇ ၼႂ်းတၢင်းဢၼ် ၵူတ်ႉဢၼ်ငေႃး
၁၅ ဢၼ်ႁုၵ်းဢၼ်ႁၢႆႉၶဝ်ၸိူဝ်းဢၼ်ၸွမ်းသဵၼ်ႈတၢင်းဢၼ်ဢမ်ႇသိုဝ်ႈလႄႈ ၸွမ်းသဵၼ်ႈတၢင်း ဢၼ်ၵူတ်ႉဢၼ်ငွၵ်း
၁၆ ဢိၵ်ႇတင်းႁႂ်ႈလႆႈၵႄႇသႄႇၼုၵ်ႈဢဝ်မႂ်းလွတ်ႈသေၵႃႈၼႂ်းမိုဝ်း မေႈယိင်းလေႃႉမေႈမွၵ်ႇ ယႃႈဢၼ်ဢဝ်သူပ်းၸၢင်ႊၶျေႃးဝွၼ်း
၁၇ မေႈယိင်းဢၼ်ၸုၼ်ႉပႅတ်ႈၵေႃႉသေႈမၼ်း ဢၼ်သင်ႇသွၼ်ပၼ်မၼ်းၸဵမ်မိူဝ်ႈမၼ်းယင်းလဵၵ်ႉယင်းၼုမ်ႇ ၼၼ်ႉသေလႄႈလူင်လိုမ်းပတိၺိၼ်ႇတြႃး ၽြႃးပဵၼ်ၸဝ်ႈမၼ်းၼၼ်ႉ ဢေႃႈ။
၁၈ ႁိူၼ်းမၼ်းၼၼ်ႉၸၢပ်ႈသႅင်ႇၵၼ်တင်းတၢင်းတၢႆလႄႈ သဵၼ်ႈတၢင်းဢၼ်မၼ်းၸွမ်းၸိူဝ်းၼၼ်ႉ ၸၢပ်ႈသႅင်ႇၵၼ်ဝိၺိၺ်ႇတၢင်းတၢႆဢေႃႈ။
၁၉ ၶဝ်ၸိူဝ်းဢၼ်ႁွတ်ႈထိုင်တီႈမၼ်းၼၼ်ႉ ဢမ်ႇလႆႈၶိုၼ်းဢွၵ်ႇၶိုၼ်းမႃးသေၵေႃႉသေၵူၼ်း။ဢမ်ႇလႆႈၶိုတ်းလႆႈထိုင် သဵၼ်ႈတၢင်းဢသၢၵ်ႈ။
၂၀ ပိူဝ်ႈၼႆလႄႈမႂ်းတၵ်းလႆႈၵႂႃႇမႃးယူႇၼႂ်းသဵၼ်ႈတၢင်း ၶဝ်ၸိူဝ်းဢၼ်လီဢၼ်ငၢမ်းၼၼ်ႉလႄႈပႂ်ႉၸွမ်း သဵၼ်ႈတၢင်းၶဝ်ၸိူဝ်းဢၼ်သိုဝ်ႈ ဢၼ်တေႃႇၼၼ်ႉယူႇတိၵ်းတိၵ်းဢေႃႈ။
၂၁ ၶဝ်ၸိူဝ်းဢၼ်သိုဝ်ႈလီရူဝ်းလီၼၼ်ႉတၵ်းယူႇ ၵႃႈၼႂ်းမိူင်းၸဝ်ႈလႄႈၶဝ်ၸိူဝ်းဢၼ်ၸေးၸုမ်ႇၼၼ်ႉ တၵ်းတူၵ်းတီႈယူႇတီႈ သဝ်းၵႃႈၼႂ်းၼၼ်ႉဢေႃႈ။
၂၂ ၶဝ်ၸိူဝ်းဢၼ်ဢမ်ႇတြႃးၼၼ်ႉၸမ်း တၵ်းလႆႈၶၢမ်ႇတၢင်းဢၼ်ပႄႇပႅတ်ႈၵႃႈၼႂ်းမိူင်းၸဝ်ႈလႄႈ ၶဝ်ၸိူဝ်းဢၼ်ႁဵတ်းတၢင်းဢၼ်
ၽႅတ်ႉဢၼ်လႅၼ်ၼၼ်ႉတၵ်းလႆႈၶၢမ်ႇတၢင်းဢၼ်ထွတ်ႇထူၺ်ႈပႅတ်ႈဢေႃႈ။