Chapter
၂၈
တၢင်းလီမၢင်ႇၵလႃႇဢၼ်ထွမ်ႇၵႂၢမ်း
၁ ပေႃးသူထွမ်ႇဢဝ်ၵႂၢမ်းထႃႇဝရႃႉၽြႃးၽြႃးပဵၼ်ၸဝ်ႈသူၸေးၸေးၸွတ်ႇၸွတ်ႇႁႂ်ႈလႆႈပႂ်ႉၵမ်ပႂ်ႉၸွမ်းပိင်းၺၢပ်ႈၸဝ်ႈ
၂ ဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉတင်းသဵင်ႈတင်းလူင်ၼၼ်ႉၸိုင်ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းယုၵ်ႉယွင်ႈသူလိူဝ်တွၼ်းၼႃႇသေၵူၼ်းမဵဝ်းၵႃႈၼိူဝ်လိၼ်မိူင်းတင်းသဵင်ႈတင်းလူင်ဢေႃႈ။
၃ ပေႃးသူတၵ်းထွမ်ႇဢဝ်ၵႂၢမ်းထႃႇဝရႃႉၽြႃးၽြႃးပဵၼ်ၸဝ်ႈသူၼၼ်ႉၸိုင်တၢင်းလီမၢင်ႇၵလႃႇၵူႈၸိူဝ်ႉၵူႈပိူင်ဢၼ်တၵ်းတူၵ်းႁွတ်ႈၽႅဝ်ထိုင်ၵႃႈၼိူဝ်သူၵႃႈတီႈသူၸမ်းသူတၵ်းမီးမၢင်ႇၵလႃႇၼႂ်းဝၢၼ်ႈၼႂ်းဝဵင်းဢေႃႈ။
၄ တၵ်းမီးမၢင်ႇၵလႃႇၼႂ်းႁႆႊၼႂ်းၼႃးဢေႃႈ။တၵ်းမီးမၢင်ႇၵလႃႇတီႈမၢၵ်ႇတွင်ႉတူဝ်ၶၼ်ႇထႃႇသူတီႈမၢၵ်ႇလိၼ်ႁူင်းလိၼ်သူတီႈမၢၵ်ႇတွင်ႉတရိၵ်ႉသၢၼ်ႇသူတီႈတၢင်းဢၼ်ယႂ်ႇၽတေူဝ်းတွၼ်းမႃးတီႈဝူဝ်းသူ၊တီႈတူဝ်ဢွၼ်ႇၽုင်သူဝ်းၽုင်ပေႉသူဢေႃႈ။
၅ တၵ်းမီးမၢင်ႇၵလႃႇတီႈပဵတ်ႈသူၵူၺ်သူတီႈၵွၵ်းဢၼ်ၼူတ်ႈၶဝ်ႈမုၼ်းသူၼၼ်ႉဢေႃႈ။
၆ တၵ်းမီးမၢင်ႇၵလႃႇမိူဝ်ႈဢၼ်သူၶဝ်ႈၵႃႈၼႂ်းႁိူၼ်းသူဢေႃႈ။တၵ်းမီးမၢင်ႇၵလႃႇမိူဝ်ႈဢၼ်သူဢွၵ်ႇၵႃႈၼွၵ်ႈဢေႃႈ။
၇ ထႃႇဝရႃႉၽြႃးတၵ်းႁႂ်ႈရၢၼ်ႇသူႇသူဢၼ်လုၵ်ႉယူႇၽၢႆႇၼိုင်ႈၵၼ်တင်းသူၸိူဝ်းၼၼ်ႉလႆႈၶၢမ်ႇတၢင်းဢၼ်တိုၵ်းတေႃးယႃႉပႅတ်ႈသိုဝ်ႈၼႃႈတႂ်ႈတႃသူဢေႃႈ။ၶဝ်ၸွမ်းသဵၼ်ႈတၢင်းသဵၼ်ႈလဵဝ်ၵူၺ်းမႃးႁႂ်ႈလႆႈတိုၵ်းတေႃးသူလႄႈတၵ်းလႆႈဢွၵ်ႇပၢႆႈၸွမ်းသဵၼ်ႈတၢင်းၸဵတ်းသဵၼ်ႈၵႃႈတီႈၽၢႆႇၼႃႈသူၵႂႃႇဢေႃႈ။
၈ ထႃႇဝရႃႉၽြႃးတၵ်းမီးဢမိင်ႉႁႂ်ႈမၢင်ႇၵလႃႇလႆႈႁွတ်ႈထိုင်ၵႃႈၼိူဝ်သူတီႈတိူၵ်ႈၽၼ်ႇတႃႇသူဢိၵ်ႇတင်းတီႈလွင်ႈဢၼ်သူဢဝ်မိုဝ်းႁဵတ်းၼၼ်ႉဢေႃႈ။မၼ်းၸဝ်းတၵ်းပၼ်တၢင်းလီမၢင်ႇၵလႃႇတီႈသူၵႃႈၼႂ်းမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူၼၼ်ႉဢေႃႈ။
၉ ပေႃးသူပႂ်ႉၵမ်ပႂ်ႉၵျၢင်ႉပိင်းၺၢပ်ႈထႃႇဝရႃႉၽြႃးၽြႃးပဵၼ်ၸဝ်ႈသူတင်းလၢႆလႄႈၸွမ်းသဵၼ်ႈတၢင်းမၼ်းၸဝ်ႈၸိုင်ထႃႇဝရႃႉၽြႃးတၵ်းႁႂ်ႈသူပဵၼ်ၵူၼ်းမဵဝ်းဢၼ်မူတ်းၸၢင်ႇပုၼ်ႈမၼ်းၸဝ်ႈၸွမ်းၵႃႈၼင်ႇဢၼ်မၼ်းၸဝ်ႈတိူင်ႇဝႃႈဝႆႉတီႈသူၼၼ်ႉဢေႃႈ။
၁၀ ၵူၼ်းမဵဝ်းၵႃႈၼိူဝ်လိၼ်မိူင်းတင်းသဵင်ႈတင်းလူင်တၵ်းႁူႉႁၼ်လွင်ႈဢၼ်ဝႃႈသူလႆႈၶၢမ်ႇတၢင်းဢၼ်ႁွင်ႉႁိၵ်ႈၵႃႈၼႂ်းၼႃႇမႃႉၸိုဝ်သဵင်ထႃႇဝရႃႉၽြႃးၼၼ်ႉလႄႈၶဝ်တၵ်းၵူဝ်ႁႄသူဢေႃႈ။
၁၁ ထႃႇဝရႃႉၽြႃးတၵ်းႁႂ်ႈသူမီးတဵမ်ထူၼ်ႈလႄႈလႆႈလီလႆႈပဵၼ်ဝႆႉတင်းမၢၵ်ႇတွင်ႉတူဝ်ၶၼ်ႇထႃႇသူ၊မၢၵ်ႇတွင်ႉတရိၵ်ႉသၢၼ်ႇသူမၢၵ်ႇလိၼ်ႁူင်းလိၼ်သူၸိူဝ်းၼၼ်ႉၵႃႈၼႂ်းမိူင်းဢၼ်ထႃႇဝရႃႉၽြႃးတိူင်ႇဝႃႈဝႆႉတီႈပူႇမွၼ်ႇသူႁႂ်ႈလႆႈပၼ်တီႈသူၼၼ်ႉဢေႃႈ။
၁၂ ထႃႇဝႃႉရၽြႃးတၵ်းၽုၺ်ႇတိူၵ်ႈၽၼ်ႇတႃႇမၼ်းၸဝ်ႈဢၼ်ဝႃႈၽႃႉၵၢင်ႁၢဝ်ၼၼ်ႉလႄႈႁႂ်ႈၽူၼ်တူၵ်းလူင်းၵႃႈၼိူဝ်မိူင်းသူမိူဝ်ႈဢၼ်ၶိင်ႇမၼ်းထုၵ်ႇၼၼ်ႉဢိၵ်ႇတင်းႁႂ်ႈလႆႈပၼ်တၢင်းလီတီႈလွင်ႈတၢင်းၵႃႈဢၼ်သူဢဝ်မိုဝ်းႁဵတ်းၼၼ်ႉဢေႃႈ။သူတၵ်းမီးဢၶႂၢင်ႉဢၼ်လႆႈပၼ်ၵူႈပၼ်ယိမ်တီႈၵူၼ်းမဵဝ်းၼမ်ၼႃႇၼၼ်ႉလႄႈတၵ်းဢမ်ႇမီးလွင်ႈတၢင်းဢၼ်ၵူႈဢမ်ႇယိမ်ဢဝ်။
၁၃ ထႃႇဝရႃႉၽြႃးယင်းဢမ်ႇႁႂ်ႈသူပဵၼ်ႁၢင်လႄႈတၵ်းႁႂ်ႈသူပဵၼ်ႁူဝ်ဢေႃႈ။ပေႃးသူထွမ်ႇဢဝ်ပိင်းၺၢပ်ႈထႃႇဝရႃႉၽြႃးၽြႃးပဵၼ်ၸဝ်ႈသူဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၸိူဝ်းၼၼ်ႉလႄႈပႂ်ႉၵမ်ပႂ်ႉၵျၢင်ႉယူႇၸိုင်သူတၵ်းဢမ်ႇလႆႈယူႇၵႃႈတႂ်ႈပိူၼ်ႈလႄႈတၵ်းမီးဢၶႂၢင်ႉဢၼ်လႆႈယူႇၵႃႈၼိူဝ်ၵူၺ်းဢေႃႈ။
၁၄ ယႃႇပေဝႄႈပိူင်ႈသေၵႃႈၼႂ်းသဵၼ်ႈတၢင်းၵႂၢမ်းဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၼၼ်ႉသေယဝ်ႉဝၢႆႇၵႂႃႇၵႃႈတီႈၽၢႆႇသၢႆႉၽၢႆႇၶႂႃႇၸွမ်းလင်ၽြႃးတၢင်ႇသူႇတၢင်ႇပႃးလႄႈႁဵတ်းဝၢတ်ႈ။
တၢင်းဢၼ်ၵိၼ်ႇဝႃႈဢၼ်ဢမ်ႇထွမ်ႇၵႂၢမ်း
၁၅ ပေႃးသူဢမ်ႇထွမ်ႇဢမ်ဢဝ်ၵႂၢမ်းထႃႇဝရႃႉၽြႃးၽြႃးပဵၼ်ၸဝ်ႈသူႁႂ်ႈလႆႈပႂ်ႉၸွမ်းပႂ်ႉၵျၢင်ႉပိင်းၺၢပ်ႈမၼ်းၸဝ်ႈဢိၵ်ႇတင်းထုင်းၽိင်ႈတြႃးမၼ်းၸဝ်ႈၵႃႈဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၼၼ်ႉၸိုင်ဢႃႉမၢင်ႇၵလႃႇတၢင်းဢၼ်ၵိၼ်ႇဝႃႈဢၼ်တၵ်းတူၵ်းႁွတ်ႈၽႅဝ်ထိုင်ၵႃႈၼိူဝ်သူၼၼ်ႉၸမ်းသူတၵ်းမီးဢႃႉမၢင်ႇၵလႃႇၵႃႈၼႂ်းဝၢၼ်ႈၼႂ်းဝဵင်းဢေႃႈ။
၁၆ တၵ်းမီးဢႃႉမၢင်ႇၵလႃႇၵႃႈၼႂ်းႁႆႊၼႂ်းၼႃးဢေႃႈ။
၁၇ တၵ်းမီးဢႃႉမၢင်ႇၵလႃႇတီႈပဵတ်ႈတီႈၵူၺ်သူတီႈၵွၵ်းဢၼ်ၼူတ်ႈၶဝ်ႈမုၼ်းသူၼၼ်ႉဢေႃႈ။
၁၈ တၵ်းမီးဢႃႉမၢင်ႇၵလႃႇတီႈမၢၵ်ႇတွင်ႉတူဝ်ၶၼ်ႇထႃႇသူတီႈမၢၵ်ႇလိၼ်ႁူင်းလိၼ်သူတီႈတၢင်းဢၼ်ယႂ်ႇၽတေူဝ်းတွၼ်းတီႈဝူဝ်းသူတီႈတူဝ်ဢွၼ်ႇၽုင်သူဝ်းၽုင်ပေႉသူဢေႃႈ။
၁၉ တၵ်းမီးဢႃႉမၢင်ႇၵလႃႇမိူဝ်ႈဢၼ်သူၶဝ်ႈၵႃႈၼႂ်းႁိူၼ်းသူဢေႃႈ။တၵ်းမီးဢႃႉမၢင်ႇၵလႃႇမိူဝ်ႈဢၼ်သူဢွၵ်ႇၵႃႈၼွၵ်ႈဢေႃႈ။
၂၀ ထႃႇဝရႃႉၽြႃးတၵ်းႁႂ်ႈတၢင်းဢၼ်ၵိၼ်ႇလႃႇတၢင်းဢၼ်ယႃႉဢၼ်ယၢၵ်ႈတၢင်းဢၼ်သေႉဢၼ်သွမ်းတူၵ်းႁွတ်ႈၵႃႈၼိူဝ်သူၼႂ်းလွင်ႈတၢင်းၵႃႈဢၼ်သူဢဝ်မိုဝ်းႁဵတ်းၼၼ်ႉတေႃႇထိုင်ႁွတ်ႈသူထၢၼ်ႈပေႃးႁွတ်ႈထိုင်တၢင်းဢၼ်လူႉလႅဝ်လႄႈသုမ်းၸွမ်းၶၼ်ၶၼ်ၽႂ်းၽႂ်းၵွပ်ႈပိူဝ်ႈဢပျႅတ်ႈတူႉၸရိူၵ်ႈဢၼ်သူႁဵတ်းမႅၼ်ႈလႄႈၸုၼ်ႉပႅတ်ႈၵဝ်ၼၼ်ႉဢေႃႈ။
၂၁ ထႃႇဝရႃႉၽြႃးတၵ်းႁႂ်ႈၵႃႇလႃႉႁႃႇလႅင်ႉမိူင်းၸပ်းတီႈသူတေႃႇထိုင်ႁွတ်ႈထၢၼ်ႈပေႃးမၼ်းၸဝ်ႈပေႇၽဵဝ်ႈသူပႅတ်ႈသေၵႃႈၼႂ်းမိူင်းဢၼ်သူၵႂႃႇလႄႈၶဝ်ႈၸၢမ်ႇၸႃးၼၼ်ႉဢေႃႈ။
၂၂ ထႃႇဝရႃႉၽြႃးတၵ်းဢဝ်တူႇလႃႇတၢင်းဢၼ်ၶႆႈၼၢဝ်တၢင်းၶႆႈတၢင်းပဵၼ်ဢၼ်မႆႈဢၼ်ႁွၼ်ႈတၢင်းၶႆႈတၢင်းပဵၼ်ဢၼ်မိူၼ်ၼင်ႇၽႆးမႆႈၽေးဢၼ်လူမ်းတိူဝ်ႉထုၵ်ႇသႂ်ႇလႄႈမၢၵ်ႇမၼ်းႁူင်းမၼ်းလိပ်းၵႂႃႇၽင်ႉၵႂႃႇၽေးဢၼ်မၢၵ်ႇမၼ်းႁူင်းမၼ်းသႃးၵႂႃႇၼဝ်ႈၵႂႃႇၸိူဝ်းၼၼ်ႉပၼ်တၢမ်ႇတီႈသူလႄႈတေႃႇထိုင်ႁွတ်ႈသူထၢၼ်ႈပေႃးလူႉလႅဝ်ဢေႃႈ။
၂၃ ၽႃႉၵၢင်ႁၢဝ်ဢၼ်မီးယူႇၵႃႈၼိူဝ်ႁူဝ်သူၼၼ်ႉတၵ်းပဵၼ်တွင်းလိူင်လႄႈလိၼ်ဢၼ်မီးယူႇၵႃႈတႂ်ႈတိၼ်သူၼၼ်ႉတၵ်းပဵၼ်လဵၵ်းဢေႃႈ။
၂၄ ထႃႇဝရႃႉၽြႃးတၵ်းႁႂ်ႈၼမ်ႉၽူၼ်ဢၼ်တူၵ်းသႂ်ႇၵႃႈၼိူဝ်မိူင်းသူၼၼ်ႉပဵၼ်မုၼ်ႈလိၼ်ပဵၼ်ၽုၼ်ႇမုၵ်ႉသေလႄႈတၵ်းတူၵ်းသႂ်ႇၵႃႈၼိူဝ်သူတေႃႇထိုင်ႁွတ်ႈထၢၼ်ႈပေႃးသူလူႉလႅဝ်ဢေႃႈ။
၂၅ ထႃႇဝရႃႉၽြႃးတၵ်းပၼ်ႁႂ်ႈသူလႆႈၶၢမ်ႇတၢင်းဢၼ်တိုၵ်းတေႃးယႃႉပႅတ်ႈၵႃႈတီႈၽၢႆႇၼႃႈရၢၼ်ႇသူႇသူဢေႃႈ။သူတၵ်းၸွမ်းသဵၼ်ႈတၢင်းသဵၼ်ႈလဵဝ်ၵူၺ်းၵႂႃႇႁႂ်ႈလႆႈတိုၵ်းတေႃးၶဝ်လႄႈတၵ်းၸွမ်းသဵၼ်ႈတၢင်းၸဵတ်းသဵၼ်ႈသေလႄႈဢွၵ်ႇပၢႆႈသေၵႃႈတီႈၽၢႆႇၼႃႈၶဝ်လႄႈပိဝ်သဵၼ်ၵႂႃႇပိဝ်သဵၼ်မႃးယူႇၵႃႈၼႂ်းၵူႈသိူင်ႇၵူႈမိူင်းဢၼ်မီးၵႃႈၼိူဝ်လိၼ်မိူင်းၼၼ်ႉဢေႃႈ။
၂၆ တူဝ်တၢႆသူၼၼ်ႉတၵ်းလႆႈပဵၼ်ပုၼ်ႈၼူၵ်ႉၵၢင်ႁၢဝ်တင်းတူဝ်ထိူၼ်ႇႁၢႆႉတင်းလၢႆတၵ်းၵိၼ်တၵ်းၶူပ်းဢေႃႈ။တၵ်းဢမ်ႇမီးၵေႃႉဢၼ်တၵ်းႁေႃႈတရိၵ်ႉသၢၼ်ႇၸိူဝ်းၼၼ်ႉပႅတ်ႈသေၵေႃႉသေၵူၼ်း။
၂၇ ထႃႇဝရႃႉၽြႃးတၵ်းဢဝ်တုမ်ႇၸဵပ်းတုမ်ႇၽီမိူင်းဢေႇၵႅပ်ႉတုတၢင်းပဵၼ်မႅင်းသရိူၵ်ႈတၢင်းပဵၼ်ႁိတ်းတၢင်းပဵၼ်ႁဝ်ႈဢၼ်ဢမ်ႇႁၢႆလႆႈၸိူဝ်းၼၼ်ႉပၼ်တၢမ်ႇတီႈသူဢေႃႈ။
၂၈ ထႃႇဝရႃႉၽြႃးတၵ်းဢဝ်တၢင်းပဵၼ်ဢၼ်ယွင်ႇဢၼ်မႃႈတၢင်းပဵၼ်တႃမွတ်ႇတၢင်းပဵၼ်ဢၼ်ၵႂင်ၸႂ်ယုင်ႈၸႂ်ၸိူဝ်းၼၼ်ႉပၼ်တၢမ်ႇတီႈသူဢေႃႈ။
၂၉ သူတၵ်းလႆႈၵုမ်းၵီႈၵုမ်းၵမ်းၼႂ်းၶိင်ႇၵၢင်ဝၼ်းတဵင်ႈမိူၼ်ၸိူဝ်ႉၼင်ႇၵေႃႉဢၼ်တႃမွတ်ႇလႆႈၵုမ်းၵီႈၵုမ်းၵမ်းၵႃႈၼႂ်းလပ်းသိင်ႇၼၼ်ႉဢေႃႈ။သူဢမ်ႇလႆႈလီလႆႈပဵၼ်ၼႂ်းသဵၼ်ႈတၢင်းဢၼ်သူၵႂႃႇၸိူဝ်းၼၼ်ႉ။သူတၵ်းလႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသေးႁိမ်ႁုင်ႇယူႇတႃႇသေႇဢေႃႈ။ဢမ်ႇမီးသေၵေႃႉသေၵူၼ်းဢၼ်တၵ်းၵႄႇသႄႇၶျွတ်ႈဢဝ်သူ။
၃၀ သူတၵ်းမၢႆၵၼ်ဝႆႉတင်းမေႈယိင်းသေၵေႃႈပိူၼ်ႈတၢင်ႇၵေႃႉတၵ်းႁဵတ်းဢႃႉထမၼွၼ်းလူၺ်ႈမၼ်းဢေႃႈ။သူႁဵတ်းႁိူၼ်းလႄႈသူဢမ်ႇလႆႈယူႇ။သူၽုၵ်ႇသူၼ်ဢူးယဵၼ်ႇၸပိတ်ႉလႄႈသူဢမ်ႇလႆႈပိတ်းလႆႈၵိၼ်မၢၵ်ႇမၼ်း။
၃၁ ပိူၼ်ႈဢဝ်ဝူဝ်းသူတၢႆသိုဝ်ႈၼႃႈတႂ်ႈတႃသူလႄႈသူဢမ်ႇလႆႈၵိၼ်ၼိူဝ်ႉမၼ်း။ပိူၼ်ႈႁဵတ်းပႄႉႁဵတ်းၼႅင်ႇဢဝ်မႃႉလီႈသူၵႂႃႇၵႃႈတီႈၽၢႆႇၼႃႈသူလႄႈၵမ်းလိုၼ်းဢမ်ႇလႆႈၶိုၼ်း။သူဝ်းသူတင်းလၢႆလႆႈၶၢမ်ႇတၢင်းဢၼ်ဢၢပ်ႈပၼ်တီႈရၢၼ်ႇသူႇသူလႄႈၵေႃႉဢၼ်ၵႄႇသႄႇၼုၵ်ႈဢဝ်သူၼၼ်ႉဢမ်ႇမီးသေၵေႃႉသေၵူၼ်း။
၃၂ လုၵ်ႈၸၢႆးလုၵ်ႈယိင်းသူလႆႈၶၢမ်ႇဢၢပ်ႈပၼ်တီႈၵူၼ်းတၢင်ႇၸိူဝ်ႉတၢင်ႇမဵဝ်းလႄႈမၢၵ်ႇတႃသူတၵ်းမုင်ႈတူၺ်းယူႇသေလႄႈႁႅင်းတၵ်းဢူၼ်ႈၵႂႃႇယွမ်းၵႂႃႇၵွပ်ႈပိူဝ်ႈၶဝ်ယူႇတၢင်ႇဝၢၼ်ႈတၢင်ႇမိူင်းၼၼ်ႉဢေႃႈ။
၃၃ မိုဝ်းသူၵေႃႈဢမ်ႇမီးႁႅင်း။ၵူၼ်းမဵဝ်းဢၼ်သူဢမ်ႇႁူႉၸၵ်းမိုတ်ႈၵိုဝ်းၵၼ်ၼၼ်ႉတၵ်းၵိၼ်မၢၵ်ႇလိၼ်ႁူင်းလိၼ်သူဢိၵ်ႇတင်းဢုၵ်ႉၸႃႇဢၼ်သူသၢင်ႈႁဵတ်းလႄႈလႆႈမႃးၼၼ်ႉဢေႃႈ။သူတၵ်းလႆႈၶၢမ်ႇတၢင်းဢၼ်ၼိၵ်ႈၸၢၵ်ႈငိၼ်းသေးတင်းဢၼ်ၶိုတ်ႈလႅဝ်ၼူတ်ႈလႅဝ်ယူႇတႃႇသေႇဢေႃႈ။
၃၄ ၼင်ႇၼၼ်လႄႈသူတၵ်းလႆႈပဵၼ်ဢၼ်ယွင်ႇဢၼ်မႃႈၵႂႃႇၵွပ်ႈပိူဝ်ႈလွင်ႈတၢင်းဢၼ်မၢၵ်ႇတႃသူလႆႈထူပ်းလႆႈႁၼ်ၼၼ်ႉဢေႃႈ။
၃၅ ထႃႇဝရႃႉၽြႃးတၵ်းဢဝ်တုမ်ႇၸဵပ်းတုမ်ႇၽီဢၼ်ဢမ်ႇႁၢႆလႆႈၼၼ်ႉပၼ်တၢမ်ႇတီႈႁူဝ်ၶဝ်ႇသူတင်းတီႈတိၼ်သူၵူၺ်းဢမ်ႇၵႃးတၵ်းပၼ်တီႈၸႃႉၸဵမ်ၽႃႇတိၼ်သူတေႃႇထိုင်ႁွတ်ႈၸိၵ်းႁူဝ်သူဢေႃႈ။
၃၆ ထႃႇဝရႃႉၽြႃးတၵ်းဢဝ်သူဢိၵ်ႇတင်းၶုၼ်ႁေႃၶမ်းဢၼ်သူယုၵ်ႉယွင်ႈဝႆႉၼၼ်ႉၵႂႃႇၵႃႈတီႈၵူၼ်းမဵဝ်းဢၼ်သူဢိၵ်ႇတင်းပူႇမွၼ်ႇသူတင်းလၢႆဢမ်ႇႁူႉၸၵ်းမိုတ်ႈၵိုဝ်းၼၼ်ႉဢေႃႈ။ၵႃႈတီႈၼၼ်ႉသူတၵ်းႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃ၊ၽြႃးမႆႉၽြႃးမၢၵ်ႇႁိၼ်ၸိူဝ်းၼၼ်ႉဢေႃႈ။
၃၇ သူတၵ်းပဵၼ်တၢင်းဢၼ်လီၵူဝ်တၢင်းဢၼ်သမ်ႇမုၵ်ႉသေႉသွမ်းၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းၵႃႈတီႈဢၼ်ထႃႇဝရႃႉၽြႃးဢဝ်သူၵႂႃႇၼၼ်ႉဢေႃႈ။
၃၈ သူတၵ်းဢဝ်ၸိူဝ်ႉၽၼ်းၼမ်ၼႃႇၵႂႃႇဝၢၼ်ႇတီႈႁႆႈတီႈၼႃးလႄႈတၵ်းလႆႈသိမ်းဢဝ်ၵေႇၼႃႇၵွပ်ႈပိူဝ်ႈမႅင်းၵႅင်းၶူပ်းၵိၼ်ၼၼ်ႉဢေႃႈ။
၃၉ သူတၵ်းၽုၵ်ႇသူၼ်ဢူးယဵၼ်ႇၸပိတ်ႉလႄႈလုမ်းလႃးသေၵေႃႈသူဢမ်ႇလႆႈၵိၼ်မၢၵ်ႇမၼ်းၼမ်ႉမၼ်းၵွပ်ႈပိူဝ်ႈမူင်ႈၶူပ်းၵိၼ်ပႅတ်ႈဢေႃႈ။
၄၀ သူမီးတူၼ်ႈသၢၼ်ႇလုၼ်ႇတီႈဢၼ်သူယူႇၼၼ်ႉၵူႈတီႈၵူႈလႅၼ်ၵေႃႈသူဢမ်ႇလႆႈဢဝ်ၼမ်ႉမၼ်းသၢၼ်ႇလုၼ်ႇတႃးတူဝ်သူၵွပ်ႈပိူဝ်ႈဢၼ်မၢၵ်ႇမၼ်းဢမ်ႇတၼ်းသုၵ်းလႄႈႁူင်ႈတူၵ်းဢေႃႈ။
၄၁ သူၵိူတ်ႇလဵင်ႉလုၵ်ႈၸၢႆးလုၵ်ႈယိင်းလႄႈဢမ်ႇလႆႈမူၼ်ႈလႆႈပျေႃႇလူၺ်ႈတင်းၶဝ်။ၶဝ်တၵ်းလႆႈၶၢမ်ႇတၢင်းဢၼ်ရၢၼ်ႇသူႇသိမ်းဢဝ်ၵႂႃႇဢေႃႈ။
၄၂ မႅင်းၵႅင်းတင်းလၢႆတၵ်းၶူပ်းတၵ်းယႃႉတူၼ်ႈမႆႉတူၼ်ႈတွၵ်ႇၵႃႈမီးဢိၵ်ႇတင်းမၢၵ်ႇလိၼ်ႁူင်းလိၼ်သူၵႃႈမီးၼၼ်ႉဢေႃး။
၄၃ ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယူႇၵႃႈၼႂ်းသူၼၼ်ႉတၵ်းယႂ်ႇမႃးသုင်မႃးၵႃႈၼိူဝ်မိူင်းသူယူႇၼၼ်ႉလႄႈသူၸမ်းတၵ်းလႆႈတႅမ်ႇၵႂႃႇယေႃႈၵႂႃႇယူႇဢေႃႈ။
၄၄ မၼ်းတၵ်းမီးဢၶႂၢင်ႉဢၼ်လႆႈပၼ်ၵူႈပၼ်ယိမ်တီႈသူဢေႃႈ။သူၸမ်းဢမ်ႇလႆႈပၼ်ၵူႈပၼ်ယိမ်တီႈမၼ်း။မၼ်းၼၼ်ႉတၵ်းပဵၼ်ႁူဝ်လႄႈသူၸမ်းတၵ်းပဵၼ်ႁၢင်ဢေႃႈ။
၄၅ ဢႃႉမၢင်ႇၵလႃႇတၢင်းဢၼ်ၵိၼ်ႇဢၼ်ဝႃႈၵႃႈမီးၸိူဝ်းၼႆႉတၵ်းတူၵ်းႁွတ်ႈၵႃႈၼိူဝ်သူယူႇလိုပ်ႈၸွမ်းလမ်းၸွမ်းသူယူႇသေႇသေႇလႄႈၶိုတ်းသူတေႃႇထိုင်ႁွတ်ႈထၢၼ်ႈပေႃးသူလူႉလႅဝ်ၵွပ်ႈပိူဝ်ႈဢၼ်သူဢမ်ႇထွမ်ႇဢမ်ႇဢဝ်ၵႂၢမ်းထႃႇဝရႃႉၽြႃးၽြႃးပဵၼ်ၸဝ်ႈသူႁႂ်ႈလႆႈပႂ်ႉၸွမ်းပိင်းၺၢပ်ႈၸဝ်ႈဢိၵ်ႇတင်းထုင်းၽိင်ႈတြႃးဢၼ်မၼ်းၸဝ်ႈသင်ႇလၢတ်ႈဝႆႉတီႈသူၸိူဝ်းၼၼ်ႉဢေႃႈ။
၄၆ တၵ်းပဵၼ်ၼီႉမိၵ်ႈလၢၵ်ႈၶၼႃႇဢိၵ်ႇတင်းလွင်ႈတၢင်းဢၼ်လီဢၢမ်းယူႇၵႃႈၼိူဝ်သူဢိၵ်ႇတင်းၵႃႈၼိူဝ်ၸိူဝ်ႉၶိူဝ်းသူယူႇတႃႇသေႇဢမ်ႇထၢတ်ႇဢေႃႈ။
၄၇ ၵွပ်ႈပိူဝ်ဢၼ်သူဢမ်ႇပႃးၸႂ်ဢၼ်ၸူမ်းသိူဝ်း၊ၸႂ်ဢၼ်မူၼ်ႈပျေႃႇသေလႄႈပွင်ႁဵတ်းဢမူႉၽြႃးပဵၼ်ၸဝ်ႈမိူဝ်ႈဢၼ်သူမၢၵ်ႈမီးပျေႉၸုမ်ႇၼၼ်ႉလႄႈ
၄၈ သူတၵ်းလႆႈမီးတၢင်းဢၼ်တွင်ႉမႆႈသႆႈလိူတ်ႇတင်းဢၼ်ယၢၵ်ႈၼမ်ႉတၢင်းဢၼ်ဢမ်ႇမီးၶူဝ်းၼုင်ႈယူတူဝ်ပူၺ်ႇတၢင်းဢၼ်ယၢၵ်ႈၽၢၼ်ၼႂ်းလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼၼ်ႉသေလႄႈထၢမ်းၵၼ်ဢမူႉရၢၼ်ႇသူႇသူတင်းလၢႆဢၼ်ထႃႇဝရႃႉၽြႃးပွႆႇၸႂ်ႉမႃးတိုၵ်းတေႃးသူၼၼ်ႉဢေႃႈ။မၼ်းၸဝ်ႈတၵ်းဢဝ်ၵၢၼ်းလဵၵ်းတၢင်ႇသႂ်ႇၵႃႈၼိူဝ်ၶေႃးသူတေႃႇထိုင်ႁွတ်ႈထၼ်ႈပေႃးမၼ်းၸဝ်ႈယႃႉၽဵဝ်ႈသူပႅတ်ႈၼၼ်ႉဢေႃႈ။
၄၉ ထႃႇဝရႃႉၽြႃးတၵ်းဢဝ်ၵူၼ်းမဵဝ်းဢၼ်ၶၼ်ၽႂ်းမိူၼ်ၸိူဝ်ႉၼင်ႇဢၼ်ႁုင်ႉလူင်ၸၢင်ႈမိၼ်ၵူၼ်းမဵဝ်းဢၼ်သူဢမ်ႇႁူႉၵႂၢမ်းၶဝ်
၅၀ ၵူၼ်းမဵဝ်းဢၼ်မီးၼႃႈဢၼ်လိူင်းဢၼ်ၵျၢမ်းၼႃႇဢၼ်ဢမ်ႇမေႃရူဝ်ႇသေႇၵူဝ်ယမ်ၵေႃႉဢၼ်ဢသၢၵ်ႈယႂ်ႇဢမ်ႇၸၢင်ႈဢိတ်းလူၵေႃႉဢၼ်ဢသၢၵ်ႈလဵၵ်ႉဢၼ်ယူႇၵႃႈတီႈႁိမ်းလႅၼ်သုတ်းလိၼ်မိူင်းတီႈဢၼ်ၵႆပုၼ်ႉၼၼ်ႉမႃးတိုၵ်းတေႃးသူဢေႃႈ။
၅၁ ၵူၼ်းမဵဝ်းၼၼ်ႉတၵ်းလႆႈၵိၼ်မၢၵ်ႇတွင်ႉတရိၵ်ႈသၢၼ်ႇသူမၢၵ်ႇလိၼ်ႁူင်းလိၼ်သူတေႃႇထိုင်ႁွတ်ႈထၼ်ႈပေႃးလူႉလႅဝ်တင်းမူတ်းဢေႃႈ။ၶဝ်ႈပိူၵ်ႇၶဝ်ႈသၢၼ်၊ၼမ်ႉၸပိတ်ႉၼမ်ႉမၼ်းတူဝ်လဵၵ်ႉတူဝ်ဢွၼ်ႇတီႈဝူဝ်းသူၽုင်သူဝ်းၽုင်ပေႉသူတၵ်းဢမ်ႇၵိုတ်းဢမ်ႇၵျၢၼ်ႇတေႃႇထိုင်ႁွတ်ႈထၢၼ်ႈပေႃးမၼ်းၸဝ်ႈႁႂ်ႈသူလူႉလႅဝ်ဢေႃႈ။
၅၂ ၶဝ်တၵ်းလွမ်ႉႁွပ်ႈဝဵင်းသူၵႃႈမီးၸိူဝ်းၼၼ်ႉတေႃႇထိုင်ႁွတ်ႈထၼ်ႈပေႃးလမ်းဝဵင်းဢၼ်သုင်ၼႃႇလႄႈမၼ်ႈၶိူင်ႇဢၼ်သူဢိင်ပိုင်ႈယူႇၵႃႈၼႂ်းမိူင်းသူၼၼ်ႉၵိူၼ်ႇတူၵ်းပင်းတူၵ်းဢေႃႈ။ၶဝ်တၵ်းလွမ်ႉႁွပ်ႈသူဝႆႉၵႃႈၼႂ်းဝဵင်းသူၵႃႈမီးတင်းသဵင်ႈတင်းမူတ်းၵႃႈၼႂ်းမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူၼၼ်ႉဢေႃႈ။
၅၃ မိူဝ်ႈဢၼ်လွမ်ႉႁွပ်ႈဝႆႉၼင်ႇၼၼ်ၸိုင်သူၵိတ်ႇၸႂ်ၵိၼ်းၸႂ်ၵွပ်ႈရၢၼ်ႇသူႇသူၼၼ်ႉလႄႈသူတၵ်းၵိၼ်မၢၵ်ႇတူဝ်ၶၼ်ႇထႃႇသူဢၼ်ပဵၼ်ၼိူဝ်ႉလုၵ်ႈၸၢႆးသူၼိူဝ်ႉလုၵ်ႈယိင်းသူဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူၼၼ်ႉဢေႃႈ။
၅၄ မိူဝ်ႈၼၼ်ႉပဵၵ်ႉသမ်ႉမီးၵူၼ်းဢၼ်ယိၼ်ႇငႄႈဢူၼ်ႈဢွၼ်ႇၵႃႈၼႂ်းသူသေၵေႃႈၶဝ်တၵ်းဢမ်ႇမီးၸႂ်ဢၼ်ဢိတ်းလူၵႃႈၼိူဝ်ပီႈၼွင်ႉမၼ်းမေးမၼ်းလုၵ်ႈဢွၼ်ႇၼႂ်းဝၢင်ႈႁူဝ်ဢူၵ်းမၼ်းၼၼ်ႉလႄႈမၼ်းတၵ်းဢမ်ႇၽမေႅင်ႇပၼ်တီႈၶဝ်ၼိူဝ်ႉလုၵ်ႈလၢင်းမၼ်းဢၼ်မၼ်းၵိၼ်ယူႇၼၼ်ႉ။
၅၅ ၼႆႉပဵၼ်တၢင်းၵိၼ်တၢင်းၶူပ်းဢၼ်ၵိုတ်းဢၼ်ၵျၢၼ်ႇတီႈမၼ်းတီႈသုတ်းတီႈတိူၵ်ႉၼၼ်ႉဢေႃႈ။
၅၆ မိူဝ်ႈဢၼ်လွမ်ႉႁွပ်ႈဝႆႉၼင်ႇၼၼ်ၸိုင်မေႈယိင်းဢၼ်ယိၼ်ႇငႄႇဢူၼ်ႈဢွၼ်ႇဢၼ်ဢမ်ႇႁတ်းယဵပ်ႇႁတ်းတမ်းတိၼ်ၼိူဝ်လိၼ်ၼၼ်ႉတၵ်းမီးၸႂ်ဢၼ်သီႇၵေႉႁေႈတႃတီႈၽူဝ်မၼ်းလုၵ်ႈၸၢႆးလုၵ်ႈယိင်းမၼ်း
၅၇ လုၵ်ႈဢွၼ်ႇဢၼ်မၼ်းၵိူတ်ႇလဵင်ႉမႃး၊ႁမေၼ်း၊ၸိူဝ်းၼၼ်ႉမၼ်းလွမ်ၵိၼ်တဵတ်ႇတဵတ်ႇၵူၺ်းမၼ်းၵွပ်ႈပိူဝ်ႈဢၼ်ဢမ်ႇမီးတၢင်းၵိၼ်တၢင်းၶူပ်းသေၸိူဝ်ႉသေပိူင်လႃးလႃးၼၼ်ႉဢေႃႈ။
၅၈ ပေႃးသူယင်းဢမ်ႇပႂ်ႉၸွမ်းပႂ်ႉၵမ်ၵျၢင်ႉတြႃးၼႆႉၵူႈၸိူဝ်ႉၵူႈပိူင်ဢၼ်တႅမ်ႈသႂ်ႇဝႆႉၵႃႈၼႂ်းၵျၢမ်းလိၵ်ႈႁႂ်ႈလႆႈရူဝ်ႇသေႇၵူဝ်ယမ်ၼႃႇမႃႉၸိုဝ်သဵင်ဢၼ်မုၼ်ႈယႂ်ႇထႃႇဝရႃႉၽြႃးၽြႃးပဵၼ်ၸဝ်ႈသူၸိုင်
၅၉ ထႃႇဝရႃႉၽြႃးတၵ်းႁႂ်ႈၽေးဢၼ်သူလႆႈၶၢမ်ႇၽေးဢၼ်ၸိူဝ်ႉၶိူဝ်းသူလႆႈၶၢမ်ႇၸိူဝ်းၼၼ်ႉပဵၼ်ၽေးဢၼ်လီဢၢမ်းၽေးဢၼ်ယႂ်ႇၼႃႇလႄႈမၼ်ႈၶိူင်ႇဝူၺ်ႇတၼႃႇတၢင်းၶႆႈတၢင်းပဵၼ်ဢၼ်ႁႅင်းယႂ်ႇၼႃႇလႄႈမၼ်ႈၶိူင်ႇဢေႃႈ။
၆၀ လိူဝ်သေၼၼ်ႉမၼ်းၸဝ်ႈတၵ်းႁႂ်ႈတၢင်းၶႆႈတၢင်းပဵၼ်မိူင်းဢေႇၵႅပ်ႉတုဢၼ်သူၸၢင်ႈၵူဝ်ၸၢင်ႈႁေၵႃႈမီးၸိူဝ်းၼၼ်ႉတူၵ်းႁွတ်ႈၵႃႈၼိူဝ်သူသေလႄႈတၢင်းၶႆႈတၢင်းပဵၼ်သူၸိူဝ်းၼၼ်ႉတၵ်းၸပ်းၸွႆးယူႇတီႈသူဢေႃႈ။
၆၁ လိူဝ်သေၼၼ်ႉထႃႇဝရႃႉၽြႃးတၵ်းႁႂ်ႈတၢင်းၶႆႈတၢင်းပဵၼ်ၽေးဢူးပၢတ်ႈဢၼ်ဢမ်ႇတႅမ်ႈသႂ်ႇဝႆႉၵႃႈတီႈၵျၢမ်းပိင်းၺၢပ်ႈတိၼႆႉၸိူဝ်းၼၼ်ႉတူၵ်းႁွတ်ႈၵႃႈၼိူဝ်သူတေႃႇထိုင်ႁွတ်ႈထၢၼ်ႈပေႃးလူႉလႅဝ်ဢေႃႈ။
၆၂ ပိၵ်ႉသမ်ႉသူလႆႈၼမ်ၵိုၼ်းမိူၼ်ၸိူဝ်ႉၼင်ႇလၢဝ်ၵၢင်ႁၢဝ်သေၵေႃႈတၵ်းလႆႈပဵၼ်ဢၼ်လဵၵ်ႉဢၼ်ၵေႇၵွပ်ႈပိူဝ်ႈဢၼ်သူဢမ်ႇထွမ်ႇဢမ်ႇဢဝ်ၵႂၢမ်းထႃႇဝရႃႉၽြႃးၽြႃးပဵၼ်ၸဝ်ႈသူၼၼ်ႉဢေႃႈ။
၆၃ မိူၼ်ၸိူဝ်ႉၼင်ႇဢၼ်ႁဵတ်းႁႂ်ႈထႃႇဝရႃႉၽြႃးၸူမ်းသိူဝ်းၵႃႈၼႂ်းလွင်ႈတၢင်းဢၼ်သူယႂ်ႇၽေၼမ်ၵိုၼ်းၼၼ်ႉပဵၼ်တၢင်းဢၼ်ႁဵတ်းႁႂ်ႈထႃႇဝရႃႉၽြႃးၸူမ်းသိူဝ်းၼႂ်းလွင်ႈတၢင်းဢၼ်ယႃႉၽဵဝ်ႈသူပႅတ်ႈၼၼ်ႉဢေႃႈ။သူတၵ်းႁွတ်ႈထိုင်တၢင်းဢၼ်ၼုၵ်ႈဢွၵ်ႇပႅတ်ႈသေၵႃႈၼႂ်းမိူင်းဢၼ်သူတၵ်းၵႂႃႇၶဝ်ႈၸၢမ်ႇၸႃးၼၼ်ႉဢေႃႈ။
၆၄ ထႃႇဝရႃႉၽြႃးတၵ်းဢဝ်သူၸၢတ်ႇပိုၼ်ပႅတ်ႈသေၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းၸႃႉၸဵမ်လႅၼ်သုတ်းလိၼ်မိူင်းၽၢၵ်ႇၼိုင်ႈတေႃႇထိုင်ႁွတ်ႈလႅၼ်သုတ်းလိၼ်မိူင်းၽၢၵ်ႇၼိုင်ႈၼၼ်ႉသေလႄႈသူတၵ်းလႆႈႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃးဢၼ်သူဢိၵ်ႇတင်းပူႇမွၼ်ႇသူတင်းလၢႆဢမ်ႇတွၼ်ႉႁူႉဢၼ်ဝႃႈၽြႃးမႆႉၽြႃးမၢၵ်ႇႁိၼ်ၸိူဝ်းၼၼ်ႉဢေႃႈ။
၆၅ ၵႃႈၼႂ်းၵူၼ်းမဵဝ်းၸိူဝ်းၼၼ်ႉသူတၵ်းဢမ်ႇလႆႈမီးတၢင်းဢၼ်သၢၵ်ႈသႃႇ။ဢမ်ႇလႆႈမီးတီႈဢၼ်ၽႃႇတိၼ်သူတၵ်းယဵပ်ႇတၵ်းတမ်း။ထႃႇဝရႃႉၽြႃးတၵ်းႁဵတ်းႁႂ်ႈႁူဝ်ၸႂ်သူသၼ်ႇဝႆမၢၵ်ႇတႃသူမုင်ႈတူၺ်းလႄႈႁႅင်းသဵင်ႈၵႂႃႇတၢင်းဢၼ်ငိၼ်းၽၢၼ်ထိုင်ၸႂ်ၸိူဝ်းၼၼ်ႉသေလႄႈ
၆၆ ဢသၢၵ်ႈသူတၵ်းလႆႈႁွႆႈယွၼ်ႇဝႆႉၵႃႈတီႈၽၢႆႇၼႃႈသူယူႇတၵ်းမႆႈၸႂ်ၵူဝ်ယူႇတင်းဝၼ်းတင်းၶိုၼ်းလႄႈယင်းဢမ်ႇႁူႉလွင်ႈဢၼ်တၵ်းၵင်းလွတ်ႈတင်းၽေးတၢႆႁိုဝ်ဢမ်ႇၵင်းလွတ်ႈႁိုဝ်ၼၼ်ႉဢေႃႈ။
၆၇ ၶိင်ႇၵၢင်ၼႂ်ၼၼ်ႉသူတၵ်းလၢတ်ႈလႄႈဝႃႈ၊-ႁႂ်ႈႁွတ်ႈထိုင်ၶိင်ႇၵၢင်ၶမ်ႈသေၵမ်းလူၺ်ႈ၊ဝႃႈၼင်ႇၼႆၵွပ်ႈပိူဝ်ႈလွင်ႈတၢင်းဢၼ်ႁူဝ်ၸႂ်သူၵူဝ်ႁေဢၼ်သူလႆႈၵူဝ်ႁေၼၼ်ႉဢိၵ်ႇတင်းၵွပ်ႈပိူဝ်ႈလွင်ႈတၢင်းဢၼ်မၢၵ်ႇတႃႇသူလႆႈႁၼ်ၼၼ်ႉဢေႃႈ။
၆၈ ထႃႇဝရႃႉၽြႃးသမ်ႉတၵ်းဢဝ်ႁိူဝ်းသၢင်းၽေႃးဢဝ်သူၵႂႃႇသူင်ႇၵႃႈတီႈမိူင်းဢေႇၵႅပ်ႉတုၸွမ်းသဵၼ်ႈတၢင်းဢၼ်မၼ်းၸဝ်ႈမီးဢမိင်ႉတီႈသူလႄႈဝႃႈ၊-သဵၼ်ႈတၢင်းၼၼ်ႉၸိုင်ၵမ်းလိုၼ်းသူဢမ်ႇလႆႈႁၼ်၊ဝႃႈၼင်ႇၼႆၼၼ်ႉ၊သူတၵ်းလႆႈၶၢမ်ႇတၢင်းဢၼ်ၶၢႆပၼ်တီႈရၢၼ်ႇသူႇသူႁႂ်ႈလႆႈပဵၼ်ၶႃႈၵူၼ်းၸၢႆးၶႃႈၵူၼ်းယိင်းၵႃႈၼႂ်းမိူင်းၼၼ်ႉသေၵေႃႈၽူႈလႂ်သေၵေႃႉသေၵူၼ်းတၵ်းဢမ်ႇမီးဢလူဝ်ႇၶႂ်ႈသိုဝ်ႉဢဝ်သူ၊ဝႃႈၼင်ႇၼႆဢေႃႈ။