Chapter
၂၇
ၶဵင်ႇတၢင်းလူႇၼိူဝ်လွႆဢေႇပလ
၁ မုဝ်းသေႇဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၵူၼ်းမဵဝ်းဢိသရေႇလတင်းလၢႆဢွၼ်ၵၼ်သင်ႇလၢတ်ႈဝႆႉတီႈၵူၼ်းတင်းလၢႆလႄႈဝႃႈၸမ်း၊-ပႂ်ႉၵမ်ပႂ်ႉၸွမ်းပိင်းၺၢပ်ႈၵႃႈဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၸိူဝ်းၼၼ်ႉတႃႉ။
၂ မိူဝ်ႈဢၼ်သူၶၢမ်ႈၼမ်ႉႁွင်ႊယေႃးတၢၼ်ႇလႄႈႁွတ်ႈထိုင်ၵႃႈၼႂ်းမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူၼၼ်ႉၸိုင်သူတၵ်းလႆႈဢဝ်မၢၵ်ႇႁိၼ်ဢၼ်ယႂ်ႇၼႃႇတင်းလၢႆပူၵ်းတင်ႈဝႆႉသေလႄႈဢဝ်ဢၢင်းၵတေႇႁၢင်ႈၶိူင်ႈတႃးဝႆႉဢေႃႈ။
၃ လွင်ႈၼင်ႇႁိုဝ်သူတၵ်းလႆႈၶဝ်ႈၸၢမ်ႇၸႃးမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းပၼ်တီႈသူမိူင်းဢၼ်ၼမ်ႉၼူမ်းတင်းၼမ်ႉၽိုင်ႈၸၢင်ႊလႆႈယူႇၼၼ်ႉၸိုင်သူၶၢမ်ႇၵႂႃႇသေယဝ်ႉ၊တၵ်းလႆႈတႅမ်ႈၵႂၢမ်းတြႃးၼႆႉၵူႈၸိူဝ်ႉၵူႈပိူင်ဝႆႉၵႃႈၼိူဝ်မၢၵ်ႇႁိၼ်ၸိူဝ်းၼၼ်ႉဢေႃႈ။
၄ သူၶၢမ်ႈၼမ်ႉႁွင်ႊယေႃးတၢၼ်ႇၵႂႃႇသေယဝ်ႉတၵ်းလႆႈဢဝ်မၢၵ်ႇႁိၼ်ဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၸိူဝ်းၼၼ်ႉပူၵ်းတင်ႈဝႆႉၵႃႈၼိူဝ်လွႆဢေႇပလလႄႈဢဝ်ဢၢင်းၵတေႇႁၢင်ႈၶိူင်ႈတႃးဝႆႉဢေႃႈ။
၅ ၵႃႈတီႈၼၼ်ႉသူတၵ်းလႆႈတႄႇႁဵတ်းယိၸ်ႉပလၢင်ႇပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈသူဢၼ်ဝႃႈယိၸ်ႉပလၢင်ႇမၢၵ်ႇႁိၼ်ဢေႃႈ။သူဢမ်ႇလႆႈဢဝ်ၶိူင်ႈလဵၵ်းယုၵ်ႈသႂ်ႇၵႃႈၼႂ်းမၼ်း။
၆ သူတၵ်းလႆႈဢဝ်တင်းမၢၵ်ႇႁိၼ်ဢၼ်ဢမ်ႇထၢၵ်ႇဢမ်ႇမႄးၼၼ်ႉတေႇႁဵတ်းယိၸ်ႉပလင်ထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။သူတၵ်းလႆႈဢဝ်ယိၸ်ႉဢၼ်ၸုတ်ႇၽႆးပုၵ်ႉၸေႃႇတီႈထႃႇဝရႃႉၽြႃးၽြႃးပဵၼ်ၸဝ်ႈသူၵႃႈၼိူဝ်ယိၸ်ႉပလၢင်ႇၼၼ်ႉဢေႃႈ။
၇ ယိၸ်ႉမိၵ်ႉသႁႃယႃႉၵေႃႈသူတၵ်းလႆႈဢဝ်ပုၵ်ႉၸေႃႇလႄႈၵိၼ်ၶူပ်းယူႇၵႃႈတီႈၼၼ်ႉယူႇသေလႄႈႁဵတ်းတၢင်းဢၼ်သိူဝ်းၸူမ်းမူၼ်ႈပျေႃႇၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။
၈ သူတၵ်းလႆႈဢဝ်ၵႂၢမ်းတြႃးၼႆႉၵူႈၸိူဝ်ႉၵူႈပိူင်တႅမ်ႈသႂ်ႇဝႆႉၵႃႈၼိူဝ်မၢၵ်ႇႁိၼ်ၸိူဝ်းၼၼ်ႉသေႇသေႇၶျႃႇၶျႃႇလီလီငၢမ်းငၢမ်းဢေႃႈ၊ဝႃႈၼင်ႇၼႆဢေႃႈ။
တၢင်းဢၼ်ၵိၼ်ႇဝႃႈလွႆဢေႇပလ
၉ မုဝ်းသေႇဢိၵ်ႇတင်းယိတ်ႉပရေႃးႁိၵ်ႈၵူၼ်းမဵဝ်းလေႇဝိတင်းလၢႆသမ်ႉလၢတ်ႈတီႈၵူၼ်းမဵဝ်းဢိသရေႇလတင်းသဵင်ႈတင်းလူင်လႄႈဝႃႈ၊-မဵဝ်းဢိသရေႇလဢူၺ်း။ဢွၼ်ၵၼ်ယူႇတဵတ်ႇတဵတ်ႇသေထွမ်ႇငိၼ်းတႃႉ။ဝၼ်းမိူဝ်ႈၼႆႉသူပဵၼ်မဵဝ်းၵူၼ်းထႃႇဝရႃႉၽြႃးၽြႃးပဵၼ်ၸဝ်ႈသူယဝ်ႉ။
၁၀ ပိူဝ်ႈၼႆလႄႈသူတၵ်းလႆႈထွမ်ႇဢဝ်ၵႂၢမ်းထႃႇဝရႃႉၽြႃးၽြႃးပဵၼ်ၸဝ်ႈသူလႄႈၵမ်ၵျၢင်ႉပိင်းၺၢပ်ႈမၼ်းၸဝ်ႈဢိၵ်ႇတင်းထုင်းၽိင်ႈတြႃးၸဝ်ႈဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၸိူဝ်းၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၁ ၼႂ်းဝၼ်းၼၼ်ႉမုဝ်းသေႇသမ်ႉသင်ႇလၢတ်ႈဝႆႉတီႈၵူၼ်းတင်းလၢႆလႄႈဝႃႈ၊-လိုၼ်းသေသူၶၢမ်ႈၼမ်ႉႁွင်ႊယေႃးတၢၼ်ႇၵႂႃႇယဝ်ႉၼၼ်ႉ
၁၂ ၶဝ်ၸိူဝ်းဢၼ်တၵ်းလႆႈၸုၵ်းယူႇၵႃႈၼိူဝ်လွႆၵေႇရႃႉၸိမ်ႇလႄႈႁႂ်ႈလႆႈပၼ်တၢင်းလီတီႈၵူၼ်းတၢင်းလၢႆၸမ်းပဵၼ်သိမုၼ်၊လေႇဝိ၊ယုတ၊ဢိသၶႃႇ၊ယုဝ်းသႅပ်ႉတင်းပိၼ်ႇယႃႇမိၼ်ႇဢေႃႈ။
၁၃ ၶဝ်ၸိူဝ်းဢၼ်တၵ်းလႆႈၸုၵ်းယူႇၵႃႈၼိူဝ်လွႆဢေႇပလႁႂ်ႈလႆႈၵိၼ်ႇဝႃႈၸမ်း၊ပဵၼ်ရူႇပိၼ်ႇ၊ၵၢတ်ႉ၊ဢႃႇသႃႇ၊ၸေႇပုလုၼ်ႇ၊တၢၼ်ႇတင်းၼပ်ႉထလိဢေႃႈ။
၁၄ မိူဝ်ႈၼၼ်ႉၵႂၢမ်းဢၼ်ၵူၼ်းမဵဝ်းလေႇဝိတၵ်းလႆႈႁဵတ်းသဵင်ဢၼ်ယႂ်ႇၼႃႇသေလႄႈႁွင်ႉမွၵ်ႇႁွင်ႉလၢတ်ႈတီႈၵူၼ်းမဵဝ်းဢိသရေႇလတင်းလၢႆၼၼ်ႉၸမ်း၊-
၁၅ ႁႂ်ႈၵေႃႉဢၼ်ႁဵတ်းရူၵ်ႉတူႉသၢင်းတူႉဢၼ်တွင်ႈႁဵတ်းၶႅၵ်းႁဵတ်းရူၵ်ႉတူႉသၢင်းတူႉဢၼ်သွၼ်းႁဵတ်းလေႃႇႁဵတ်းဢၼ်ပဵၼ်ၶိူင်ႈပိူင်ႈဢၼ်လီႁင်ႈဢဵတ်ႇသဵတ်ႇတီႈထႃႇဝရႃႉၽြႃးဢၼ်ၵူၼ်းၸၢင်ႊၵူၼ်းမေႃၶဝ်ဢဝ်မိုဝ်းႁဵတ်းၼၼ်ႉလႄႈဝႆႉၵႃႈတီႈဢၼ်လပ်ႉဢၼ်သိူင်ႇၼၼ်ႉမီးဢႃႉမင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆသေယဝ်ႉၵူၼ်းတင်းလၢႆတၵ်းလႆႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊-
၁၆ ဢႃႇမိၼ်ႇဝႃႈၼင်ႇၼႆဢေႃႈ။ႁႂ်ႈၵေႃႉဢၼ်ႁဵတ်းဢမ်ႇပေႃးၼင်ႇႁိုဝ်တီႈပေႃႈတီႈမေႈမၼ်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆသေယဝ်ႉ၊ၵူၼ်းတင်းလၢႆတၵ်းလႆႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊-
၁၇ ဢႃႇမိၼ်ႇဝႃႈၼင်ႇၼႆဢေႃႈ။ႁႂ်ႈၵေႃႉဢၼ်ၶၢႆႉသဝ်တီႈမၢတ်ႈတီႈတွင်းလႅၼ်ၵူၼ်းႁိူၼ်းၸမ်ၵၼ်ၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆသေယဝ်ႉ၊ၵူၼ်းတင်းလၢႆတၵ်းလႆႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊-
၁၈ ဢႃႇမိၼ်ႇဝႃႈၼင်ႇၼႆဢေႃႈ။ႁႂ်ႈၵေႃႉဢၼ်ႁႂ်ႈၵူၼ်းတႃႈမွတ်ႇၽိတ်းတၢင်းပိူင်ႈတၢင်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆသေယဝ်ႉၵူၼ်းတင်းလၢႆတၵ်းလႆႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊-
၁၉ ဢႃႇမိၼ်ႇဝႃႈၼင်ႇၼႆဢေႃႈ။ႁႂ်ႈၵေႃႉဢၼ်ဢမ်ႇၸွမ်းသဵၼ်ႈတၢင်းတြႃးသေလႄႈၸီႇယၢင်ႇတီႈၵူၼ်းတၢင်ႇၸိူဝ်ႉတၢင်ႇၶိူဝ်း၊ၵေႃႉဢၼ်ၽၢၼ်ပေႃႈၽၢၼ်မေႈ၊မေႈမုၵ်ႉမေႈမၢႆႈၸိူဝ်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈဝႃႈၼင်ႇၼႆသေယဝ်ႉၵူၼ်းတင်းလၢႆတၵ်းလႆႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊-
၂၀ ဢႃႇမိၼ်ႇဝႃႈၼင်ႇၼႆဢေႃႈ။ႁႂ်ႈၵေႃႉဢၼ်ႁဵတ်းၵႃႇမႃႉသိူၵ်ႈသမ်ႇမေးပေႃႈမၼ်းၼၼ်ႉမီးဢႃႉမၢင်ႇၵလႃႇၵွပ်ႈပိူဝ်ႈဢၼ်မၼ်းႁဵတ်းတၢင်းဢၼ်လူႈလၢႆၽႃႈၼွၼ်းပေႃႈမၼ်းၼၼ်ႉဢေႃႈ၊ဝႃႈၼင်ႇၼႆသေယဝ်ႉ၊ၵူၼ်းတင်းလၢႆတၵ်းလႆႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊-
၂၁ ဢႃႇမိၼ်ႇဝႃႈၼင်ႇၼႆဢေႃႈ။ႁႂ်ႈၵေႃႉဢၼ်ၵႃႉမႃႉသိူၵ်ႈသမ်ႇလူၺ်ႈတရိၵ်ႉသၢၼ်ႇသေၸိူဝ်ႉသေမဵဝ်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆသေယဝ်ႉ၊ၵူၼ်းတင်းလၢႆတၵ်းလႆႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊-ဢႃႇမိၼ်ႇဝႃႈၼင်ႇၼႆဢေႃႈ။
၂၂ ႁႂ်ႈၵေႃႉဢၼ်ၵႃႉမႃႉသိူၵ်ႈသမ်ႇလူၺ်ႈပီႈၼၢင်းၼွင်ႉယိင်းမၼ်းဢၼ်ဝႃႈလုၵ်ႈယိင်းပေႃႈမၼ်းလုၵ်ႈယိင်းမေႈမၼ်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆသေယဝ်ႉ၊ၵူၼ်းတင်းလၢႆတၵ်းလႆႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊-
၂၃ ဢႃႇမိၼ်ႇ၊ဝႃႈၼင်ႇၼႆဢေႃႈ။ႁႂ်ႈၵေႃႉဢၼ်ၵႃႉမႃႉသိူၵ်ႈသမ်ႇလူၺ်ႈဢွၵ်ႇၼၢႆးမၼ်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆသေယဝ်ႉ၊ၵူၼ်းတင်းလၢႆတၵ်းလႆႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊-ဢႃႇမိၼ်ႇ၊ဝႃႈၼင်ႇၼႆဢေႃႈ။
၂၄ ႁႂ်ႈၵေႃႉဢၼ်လွမ်တဵတ်ႇလွမ်မႅပ်းသေလႄႈပေႃႉယႅၼ်ႉၵူၼ်းႁိူၼ်းၸမ်ၵၼ်တင်းမၼ်းၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆသေယဝ်ႉၵူၼ်းတင်းလၢႆတၵ်းလႆႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊-
၂၅ ဢႃႇမိၼ်ႇဝႃႈၼင်ႇၼႆဢေႃႈ။ႁႂ်ႈၵေႃႉဢၼ်ၵိၼ်ၸၢင်ႈႁႂ်ႈလႆႈဢဝ်ဢသၢၵ်ႈၵူၼ်းဢၼ်ဢမ်ႇမီးဢပျႅတ်ႈတၢႆၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆသေယဝ်ႉ၊ၵူၼ်းတင်းလၢႆတၵ်းလႆႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊-
၂၆ ဢႃမိၼ်ႇ၊ဝႃႈၼင်ႇၼႆဢေႃႈ။ႁႂ်ႈၵေႃႉဢၼ်ဢမ်ႇၵမ်ဢမ်ႇၵျၢင်ႉဢမ်ႇႁဵတ်းၸွမ်းၵႂၢမ်းပိင်းၺၢပ်ႈတြႃးၸိူဝ်းၼႆႉမၼ်ႈမၼ်ႈၶိူင်ႇၶိူင်ႇၼၼ်ႉမီးဢႃႉမၢင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆသေယဝ်ႉၵူၼ်းတင်းလၢႆတၵ်းလႆႈဢွၼ်ၵၼ်ႁပ်ႉတုင်းဢဝ်လႄႈဝႃႈ၊-ဢႃႇမိၼ်ႇ၊ဝႃႈၼင်ႇၼႆဢေႃႈ။