Chapter
၂၃
ၼုၵ်ႉဢွၵ်ႇပႅတ်ႈသေၼႂ်းၽုင်မူႇၸုမ်း
၁ ၵေႃႉဢၼ်ၶႆႇႁမ်လူႉလႅဝ်ၵွပ်ႈပိူဝ်ႈပိူၼ်ႈတွၼ်ႇပႅတ်ႈဢမ်ႇၼၼ်ႇပိူၼ်ႈဢဝ်လူႉပႅတ်ႈၼၼ်ႉဢမ်ႇလႆႈၶဝ်ႈပႃးၵႃႈၼႂ်းပရိၵ်ႈသၢတ်ႈဢၼ်ၸူႉတုမ်ႈၵႃႈတီႈထႃႇဝရႃႉၽြႃးၼၼ်ႉ။
၂ လုၵ်ႈမၢၼ်းတၢင်းၼၼ်ႉဢမ်ႇလႆႈၶဝ်ႈလႆႈပႃးၵႃႈၼႂ်းပရိၵ်ႈသၢတ်ႈဢၼ်ၸူႉတုမ်ႈၵႃႈတီႈထႃႇဝရႃႉၽြႃးတေႃႇထူၼ်ႈထိုင်ၸူဝ်လုၵ်ႈပၢၼ်လၢၼ်သိပ်းသိုပ်ႇ။
၃ ၵူၼ်းမဵဝ်းဢမ်ႇမုၼ်ႇဢိၵ်ႇတင်းၵူၼ်းမဵဝ်းမေႃႇၽဢမ်ႇလႆႈၶဝ်ႈပႃးၵႃႈၼႂ်းပရိၵ်ႈသၢတ်ႈဢၼ်ၸူႉတုမ်ႈၵႃႈတီႈထႃႇဝရႃႉၽြႃးၼၼ်ႉတေႃႇထူၼ်ႈထိုင်ၸူဝ်လုၵ်ႈပၢၼ်လၢၼ်သိပ်းသိုပ်ႇ။
၄ လွင်ႈမၼ်းၸမ်းၵူၼ်းမဵဝ်းၸိူဝ်းၼၼ်ႉမိူဝ်ႈဢၼ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉၶဝ်ဢမ်ႇဢဝ်ၶဝ်ႈမုၼ်းတင်းၼမ်ႉႁပ်ႉႁူဝ်တၢင်းသူ။ၶဝ်ၸၢင်ႈဢဝ်ငႃးဢဝ်ပႃႇလမ်ႇ၊လုၵ်ႈၸၢႆးပေႃႇရ၊ဢၼ်ယူႇၵႃႈတီႈဝဵင်းပေႇသေႃႇမိူင်းမေႇသေႃႇပေႃးတႃႇမိၼၼ်ႉမႃးႁႂ်ႈလႆႈၵိၼ်ႇဝႃႈသူဢေႃႈ။
၅ ၼႂ်းဝႃႈၼၼ်သေၵေႃႈထႃႇဝရႃႉၽြႃးၽြႃးပဵၼ်ၸဝ်ႈသူဢမ်ႇထွမ်ႇဢမ်ဢဝ်ၵႂၢမ်းပႃႇလမ်ႇၼၼ်ႉ။ၵွပ်ႈပိူဝ်ႈဝႃႈထႃႇဝရႃႉၽြႃးၽြႃးပဵၼ်ၸဝ်ႈႁၵ်ႉသူလႄႈထႃႇဝရႃႉၽြႃးၽြႃးပဵၼ်ၸဝ်ႈသူႁႂ်ႈတၢင်းဢၼ်ၵိၼ်ႇဝႃႈၼၼ်ႉပဵၼ်တၢင်းလီမင်ႇၵလႃႇတီႈသူဢေႃႈ။
၆ ၸူဝ်ႈတႃႇဢသၢၵ်ႈသူတၵ်းဢမ်ႇလႆႈႁႃဢဝ်တၢင်းဢၼ်ႁဵတ်းၵေႃႉႁဵတ်းသေႈလူၺ်ႈၵၼ်တင်းၶဝ်လႃးလႃး။
၇ ၵူၼ်းမဵဝ်းဢေႇတုမ်ႇၸမ်း၊သူဢမ်ႇလႆႈၸင်း။ၶဝ်ပဵၼ်ပီႈၼွင်ႉသူဢေႃႈ။ၵူၼ်းမဵဝ်းဢေႇၵႅပ်ႉတုၵေႃႈသူဢမ်ႇလႆႈၸင်း။သူယၢမ်ႈလႆႈပဵၼ်ၶႅၵ်ႇဢႃႇၵၼ်ႇတူႉၵႃႈၼႂ်းမိူင်းၶဝ်ၼၼ်ႉမႃးယဝ်ႉ။
၈ လုၵ်ႈလၢၼ်ၶဝ်တေႃႇထိုင်ႁွတ်ႈသၢမ်သိုပ်ႇၼၼ်ႉမီးဢၶႂၢင်ႉဢၼ်လႆႈၶဝ်ႈလႆႈပႃးၵႃႈၼႂ်းပရိၵ်ႈသၢတ်ႈဢၼ်ၸူႉတုမ်ၵႃႈတီႈထႃႇဝရႃႉၽြႃးၼၼ်ႉဢေႃႈ။
တၢင်းဢၼ်ဢမ်ႇမူတ်းၸၢင်ႇၼႂ်းသုမ်ႉထဵင်
၉ မိူဝ်ႈဢၼ်သူႁဵတ်းတပ်ႉလႄႈဢွၵ်ႇၸူးႁႂ်ႈလႆႈတိုၵ်းသိုၵ်းၵၼ်တင်းရၢၼ်ႇသူႇသူၼၼ်ႉၸိုင်ဝႄႈပႅတ်ႈလွင်ႈတၢင်းဢၼ်ဢမ်ႇတြႃးၵႃႈမီးတႃႉ။
၁၀ ၼႂ်းသူၼၼ်ႉပေႃးမီးၵူၼ်းၸၢႆးၵေႃႉဢၼ်ဢမ်ႇမူတ်းသႂ်ၵွပ်ႈပိူဝ်ႈၼမ်ႉသုၵ်ႉၸိုမ်းဢွၵ်ႇၼႂ်းၶိင်ႇၵၢင်ၶိုၼ်းၼၼ်ႉၸိုင်မၼ်းတၵ်းလႆႈဢွၵ်ႇသေၵႃႈတီႈၼွၵ်ႈတပ်ႉဢေႃႈ။
၁၁ ဢမ်ႇလႆႈၶဝ်ႈၵႃႈၼႂ်းတပ်ႉ။မိူဝ်ႈဢၼ်ဝၼ်းၶမ်ႈၸိုင်မၼ်းတၵ်းလႆႈဢၢပ်ႇၼမ်ႉလႄႈပေႃးဝၼ်းတူၵ်းယဝ်ႉၸင်ႇမၼ်းလႆႈၶဝ်ၼႂ်းတပ်ႉဢေႃႈ။
၁၂ ႁႃဢွင်ႈတီႈၵႃႈတီႈၼွၵ်ႈတပ်ႉတီႈဢၼ်သူတၵ်းလႆႈၵႂႃႇဢွၵ်ႇၽၢႆႈလူင်ၼၼ်ႉဢေႃႈ။
၁၃ ၼႂ်းၶိူင်ႈတိုဝ်းသူၼၼ်ႉတၵ်းလႆႈပႃးၶိူင်ႈၶုတ်ႉလိၼ်လႄႈမိူဝ်ႈဢၼ်ၵႂႃႇဢွၵ်ႇၽႆႈလူင်ယဝ်ႉၸိုင်သူတၵ်းလႆႈၶုတ်ႉလိၼ်လႄႈၶိုၼ်းထိူမ်ၽၢႆႈလူင်ဢၼ်ဢွၵ်ႇၵႃႈၼႂ်းသူၼၼ်ႉဢေႃႈ။
၁၄ လွင်ႈမၼ်းၸမ်းထႃႇဝရႃႉၽြႃးၽြႃးပဵၼ်ၸဝ်ႈသူၼၼ်ႉၵႂႃႇၵႂႃႇမႃးမႃးယူႇၵႃႈၼႂ်းတပ်ႉသူႁႂ်ႈလႆႈၵႄႇသႄႇၶျွတ်ႈဢဝ်သူလႄႈဢဝ်ရၢၼ်ႇသူႇသူဢၢပ်ႈပၼ်ၵႃႈၼႂ်းမိုဝ်းသူဢေႃႈ။ပိူဝ်ႈၼႆႉလႄႈလွင်ႈၼင်ႇႁိုဝ်မၼ်းၸဝ်ႈတၵ်းဢမ်ႇႁၼ်လွင်ႈတၢင်းဢၼ်ဢမ်ႇမူတ်းသႂ်သေၸိူဝ်ႉသေပိူင်ၵႃႈၼႂ်းသူလႄႈဝေႈပႅတ်ႈသေၵႃႈတီႈသူၵႂႃႇၸိုင်တပ်ႉသူတၵ်းလႆႈမူတ်းၸၢင်ႇဢေႃႈ။
ပိင်းၺၢပ်ႈၵူႈမဵဝ်းမဵဝ်း
၁၅ ၶႃႈဢၼ်ပၢႆဢွၵ်ႇသေၵႃႈတီႈၸဝ်ႈမၼ်းလႄႈမႃးသွၼ်ႈပိုင်ႈၵႃႈတီႈသူၼၼ်ႉသူတၵ်းဢမ်ႇလႆႈဢဝ်မၼ်းၶိုၼ်းဢၢပ်ႈၶိုၼ်းပၼ်တီႈၸဝ်ႈမၼ်း။
၁၆ မၼ်းမီးဢၶႂၢင်ႉဢၼ်ဢၼ်လႆႈယူႇလူၺ်ႈၵၼ်တင်းသူၵႃႈၼႂ်းသူၵႃႈတီႈဢၼ်မၼ်းလိူၵ်ႈဢဝ်ၵႃႈၼႂ်းဝဵင်းသူသေဝဵင်းဝဵင်းၵႃႈဢၼ်မၼ်းထုၵ်ႇၸႂ်ၵျိူၵ်ႈၸႂ်ၼၼ်ႉဢေႃႈ။သူဢမ်ႇလႆႈၼိၵ်ႈၸၢၵ်ႈငႅၼ်းသေးမၼ်း။
၁၇ ၵႃးၼႂ်းၵူၼ်းယိင်းမဵဝ်းဢိသရေႇလတင်းလၢႆဢမ်ႇလႆႈမီးမေႈမွၵ်ႇယႃႈ။ၵႃႈၼႂ်းၵူၼ်းၸၢႆးမဵဝ်းဢိသရေႇလတင်းလၢႆဢမ်ႇလႆႈမီးပေႃႈမွၵ်ႇယႃႈ။
၁၈ ငိုၼ်းဢၼ်ႁဵတ်းမေႈမွၵ်ႇယႃႈပေႃႈမွၵ်ႇယႃႈသေလႄႈလႆႈမႃးၼၼ်ႉသူတၵ်းဢမ်ႇလႆႈဢဝ်သႂၢင်းၶဝ်ႈၵႃႈၼႂ်းႁိူၼ်းထႃႇဝရႃႉၽြႃးၽြႃးပဵၼ်ၸဝ်ႈသူႁႂ်ႈလႆႈၽေႇၵတိသႅတ်ႈၸႃႇ။သွင်ၸိူဝ်ႉသွင်ပိူင်ၼၼ်ႉပဵၼ်ဢၼ်လီႁင်ႈဢဵတ်ႇသဵတ်ႇတီႈထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။
၁၉ သူဢမ်ႇလႆႈပၼ်ၵူႈပၼ်ယိမ်တီႈပီႈၼွင်ႉၸိူဝ်ႉၶိူဝ်းသူသေလႄႈဢဝ်ဢတူဝ်းၶီႈမၼ်းဢၼ်ဝႃႈၶီႈငိုၼ်း၊ၶီႈတၢင်းၵိၼ်တၢင်းၶူပ်း၊ၶီႈၵႃႈဢၼ်ပၼ်ၵူႈပၼ်ယိမ်ၼၼ်ႉ။
၂၀ တီႈၵူၼ်းတၢင်ႇၸိူဝ်ႉၼၼ်ႉၸိုင်သူပၼ်ၵူႈပၼ်ယိမ်သေလႄႈဢဝ်ဢတူဝ်းၶီႈမၼ်းလႆႈယူႇဢေႃႈ။လွင်ႈၼင်ႇႁိုဝ်ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းပၼ်တၢင်းလီတီႈလွင်ႈတၢင်းဢၼ်သူဢဝ်မိုဝ်းႁဵတ်းၵူႈၸိူဝ်ႉၵူႈပိူင်ၼၼ်ႉၵႃႈၼႂ်းမိူင်းဢၼ်သူတၵ်းၵႂႃႇလႄႈၶဝ်ႈၸၢမ်ႇၸႃးၼၼ်ႉၸိုင်သူဢမ်ႇလႆႈပၼ်ၵူႈပၼ်ယိမ်သေလႄႈဢဝ်ဢတူဝ်းၶီႈမၼ်းတီႈပီႈၼွင်ႉၸိူဝ်ႉၶိူဝ်းသူၼၼ်ႉ။
၂၁ ပေႃးသူဝႆႉၵတိသႅတ်ႈၸႃႇတီႈထႃႇဝရႃႉၽြႃးၽြႃးပဵၼ်ၸဝ်ႈသူၸိုင်သူဢမ်ႇလႆႈႁဵတ်းထိူင်းႁဵတ်းၼၼ်းတလေႆႈပၼ်ၽြႃးပဵၼ်ၸဝ်ႈၼၼ်ႉ။လွင်ႈမၼ်းၸမ်းထႃႇဝရႃႉၽြႃးၽြႃးပဵၼ်ၸဝ်ႈသူတၵ်းယွၼ်းဢဝ်တီႈသူဢမၢၼ်ႇၶၼ်ႇပဵၼ်လႄႈတၵ်းပဵၼ်ဢပျႅတ်ႈတီႈသူဢေႃႈ။
၂၂ ပေႃးသူဢမ်ႇလႆႈဝႆႉၵတိသႅတ်ႈၸႃႇၸိုင်ဢမ်ႇပဵၼ်ဢပျႅတ်ႈတီႈသူ။ၵႂၢမ်းဢၼ်သူဝႃႈဢွၵ်ႇသူပ်းသူယဝ်ႉၼၼ်ႉသူတၵ်းလႆႈပႂ်ႉၸွမ်းလႄႈႁဵတ်းၸွမ်းဢေႃႈ။
၂၃ လွင်ႈမၼ်းၸမ်းသူၸွမ်းဢလူဝ်ႇတူဝ်ၸဝ်ႈၵဝ်ႇသေလႄႈႁဵတ်းဢဝ်တင်းသူပ်းသူဝႆႉၵတိသႅတ်ႈၸႃႇတီႈထႃႇဝရႃႉၽြႃးၽြႃးပဵၼ်ၸဝ်ႈသူယဝ်ႉ။
၂၄ မိူဝ်ႈဢၼ်သူၶဝ်ႈၵႃၼႂ်းသူၼ်ဢူးယဵၼ်ႇၸပိတ်ႉၵူၼ်းႁိူၼ်းၸမ်ၵၼ်တင်းသူၼၼ်ႉၸိုင်သူမီးဢၶႂၢင်ႉဢၼ်လႆႈၵိၼ်မၢၵ်ႇၸပိတ်ႉဢိမ်ႇဢိမ်ႇတဵမ်တဵမ်ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇသေၵေႃႈဢမ်ႇလႆႈသိမ်းသႂ်ႇၵႃႈၼႂ်းသွင်းမိူဝ်ႈဢၼ်သူၶဝ်ႈၵႃႈၼႂ်းၼႃးၵူၼ်းႁိူၼ်းၸမ်ၵၼ်တင်းသူၼၼ်ႉၸိုင်
၂၅ သူမီးဢၶႂၢင်ႉဢၼ်လႆႈဢဝ်မိုဝ်းသူယၵ်းႁူင်းၶဝ်သေၵေႃႈသူဢမ်ႇလႆႈဢဝ်ၶဵဝ်းပၢတ်ႇဢဝ်။