Chapter
၁၉
ဝဵင်းပၢႆၽေး
၁ မိူဝ်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူတီႇၽဵဝ်ႈပႅတ်ႈၵူၼ်းမဵဝ်းဢၼ်ယူႇၵႃႈတီႈမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းပၼ်တီႈသူၼၼ်ႉသေလႄႈ
၂ သူလႆႈၶဝ်ႈၸၢမ်ႇၸႃးယူႇၵႃႈၼႂ်းဝဵင်းၶဝ်ႁိူၼ်းၶဝ်ယေးၶဝ်ၼၼ်ႉၸိုင်သူတၵ်းလႆႈၽေဢဝ်ဝဵင်းသၢမ်ဝဵင်းၵႃႈတီႈၼႂ်းမိူင်း ဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈႁႂ်ႈသူလႆႈပိူင်ႇၼၼ်ႉဢေႃႈ။
၃ လွင်ႈၼင်ႇႁိုဝ်ၵေႃႉဢၼ်ဢမ်ႇသၢင်ႇတေႃႇလႄႈဢဝ်ဢသၢၵ်ႈၵူၼ်းတၢႆမႅၼ်ႈၼၼ်ႉတၵ်းလႆႈပၢႆႈၵႂႃႇသွၼ်ႈယူႇၵႃႈတီႈၼၼ်ႉလႆႈၸိုင်သူတၵ်းလႆႈႁဵတ်းၶူၼ်တၢင်းၵႂႃႇၸူးဝဵင်းသၢမ်ဝဵင်းၵႃႈၼႂ်းလႅၼ်လိၼ်မိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူပုၼ်ႈဢမူၺ်ႇသူၼၼ်ႉဢေႃႈ။
၄ လွင်ႈၵေႃႉဢၼ်ဢဝ်ဢသၢၵ်ႈၵူၼ်းတၢႆမႅၼ်ႈလႄႈတၵ်းလႆႈပၢႆႈၵႂႃႇသွၼ်ႈယူႇၵႃႈတီႈၼၼ်ႉႁႂ်ႈဢသၢၵ်ႈမၼ်းလႆႈၵတ်းယဵၼ်ၶျၢမ်းသႃႇၼၼ်ႉၸမ်းမၼ်းပဵၼ်ၵေႃႉဢၼ်ယင်းဢမ်ႇဝႆႉတၢင်းၽိတ်းတီႈၵူၼ်းႁိူၼ်းၸမ်ႈၵၼ်တင်းမၼ်းၼၼ်ႉလႄႈယင်းဢမ်ႇမီးၸႂ်လႄႈဢဝ်ၵူၼ်းႁိူၼ်းၸမ်ၵၼ်တင်းမၼ်းတၢႆမႅၼ်ႈၼၼ်ႉဢေႃႈ။
၅ မိူၼ်ၸိူဝ်ႉၼင်ႇၵူၼ်းၵေႃႉၼိုင်ႈၵႂႃႇၵႃႈၼႂ်းထိူၼ်ႇလူၺ်ႈၵၼ်တင်းတၢင်ႇၵေႃႉႁႂ်ႈလႆႈတႅပ်းၽိုၼ်းႁွၼ်းၽိုၼ်းၼၼ်ႉမိူဝ်ႈဢၼ်မၼ်းဢဝ်တႃမၢတ်ႇပွမ်ႈတူၼ်ႈမႆႉလူမ်ႉယူႇၼၼ်ႉဢမ်ႇသၢင်ႇတေႃႇလႄႈတႃမၢတ်ႇမၼ်းသွၼ်ႇၵၼ်းမၼ်းဢွၵ်ႇၵႂႃႇလႄႈတိူဝ်ႉထုၵ်ႇၵူၼ်းႁိူၼ်းၸမ်ၵၼ်တင်းမၼ်းလႄႈလႆႈတၢႆၵႂႃႇၼၼ်ႉၸိုင်မၼ်းတၵ်းလႆႈပၢႆႈၵႂႃႇၸူးၵႃႈတီႈဝဵင်းၼၼ်ႉသေလႄႈတၵ်းႁႂ်ႈဢသၢၵ်ႈမၼ်းလႆႈၵတ်းယဵၼ်ၶျၢမ်းသႃႇဢေႃႈ။
၆ ပေႃးဢမ်ႇၼၼ်ၵူဝ်ၵေႃႉဢၼ်တွပ်ႇတႅၼ်းၼၼ်ႉပႃးၸႂ်လိူတ်ႇၸႂ်မႆႈလႄႈတၵ်းလိုပ်ႈၸွမ်းလမ်းၸွမ်းသေလႄႈၶိုတ်းမၼ်းသေယဝ်ႉဢဝ်မၼ်းတၢႆၵွပ်ႈပိူဝ်ႈသဵၼ်ႈတၢင်းၵႆၼႃႇၼၼ်ႉဢေႃႈ။မၼ်းဢမ်ႇထုၵ်ႇလီလႆႈတၢႆၸိူဝ်ႉၼင်ႇၼၼ်။လွင်ႈမၼ်းၸမ်းမၼ်းဢမ်ႇမီးတၢင်းဢၼ်ဝႆႉတၢင်းၽိတ်းတီႈၵေႃႉၼၼ်ႉဢွၼ်တၢင်းလႄႈဢဝ်မၼ်းတၢႆ။
၇ ပိူဝ်ႈၼႆႉလႄႈၵဝ်သင်ႇလၢတ်ႈဝႆႉတီႈသူႁႂ်ႈသူလႆႈၽေဢဝ်ဝဵင်းသၢမ်ဝဵင်းဝႆႉဢေႃႈ၊ဝႃႈၼင်ႇၼႆဢေႃႈ။
၈ ပေႃးထႃႇဝရႃႉၽြႃးၽြႃးပဵၼ်ၸဝ်ႈသူႁဵတ်းႁႂ်ႈလႅၼ်လိၼ်မိူင်းသူယႂ်ႇၵႂၢင်ႈမႃးၸွမ်းၵႃႈၼင်ႇဢၼ်မၼ်းၸဝ်ႈတိူင်ႇဝႃႈဝႆႉတီႈပူႇမွၼ်ႇသူၼၼ်ႉလႄႈပၼ်မိူင်းၵႃႈဢၼ်မၼ်းၸဝ်ႈဝႆႉၵတိဢၼ်တၵ်းပၼ်တီႈပူႇမွၼ်ႇသူၸိူဝ်းၼၼ်ႉတီႈသူလႄႈ
၉ ပေႃးသူပႂ်ႉၸွမ်းႁႂ်ႈလႆႈၵမ်ၵျၢင်ႉပိင်းၺၢပ်ႈၸဝ်ႈဢၼ်ၵဝ်သင်ႇလၢတ်ႈဝႆႉတီႈသူဝၼ်းမိူဝ်ႈၼႆႉၼၼ်ႉလႄႈမီးၸႂ်ဢၼ်ႁၵ်ႉထႃႇဝရႃႉၽြႃးၽြႃးပဵၼ်ၸဝ်ႈသူလႄႈၸွမ်းသဵၼ်ႈတၢင်းမၼ်းၸဝ်ႈယူႇသေႇသေႇၸိုင်ၼွၵ်ႈသေဝဵင်းသၢမ်ဝဵင်းဢၼ်ဝႃႈမႃးယဝ်ႉၼၼ်ႉ
၁၀ သူတၵ်းလႆႈၽေဢဝ်ထႅင်ႈဝဵင်းဝဵင်းသၢမ်ဝဵင်းယႃႇႁႂ်ႈလိူတ်ႈၵေႃႉဢၼ်ဢမ်ႇထိူၵ်ႈလႆႈတၢႆၼၼ်ႉလႆႈတူၵ်းသႂ်ႇၵႃႈၼိူဝ်လိၼ်ၵႃႈၼႂ်းမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်ဢမူၺ်ႇတီႈသူၼၼ်ႉ။
၁၁ ပေႃးမီးၵေႃႉဢၼ်ဝႆႉတၢင်းၽိတ်းတီႈၵူၼ်းႁိူၼ်းၸမ်ၵၼ်တင်းမၼ်းသေယဝ်ႉပႂ်ႉလွမ်ပႂ်ႉၶျွင်းပေႃႉယႅၼ်ႉမၼ်းထၢၼ်ႈပေႃးတၢႆသေယဝ်ႉလႅၼ်ႈပၢႆႈၵႂႃႇၸူးၵႃႈတီႈဝဵင်းပၢႆၽေးၸိုင်ႈ
၁၂ ၵူၼ်းဢၼ်ပဵၼ်ၵေႇပဵၼ်ႁူဝ်ၵႃႈတီႈဝဵင်းၼၼ်ႉတၵ်းလႆႈပွႆႇၸႂ်ႉၵူၼ်းၵႂႃႇလႄႈဢဝ်မၼ်းဢွၵ်ႇသေၵႃႈတီႈဝဵင်းၼၼ်ႉမႃးသေယဝ်ႉဢဝ်မၼ်းဢၢပ်ႈပၼ်ၵႃႈၼႂ်းမိုဝ်းၵေႃႉဢၼ်တၵ်းတွပ်ႇတႅၼ်းဢဝ်မၼ်းတၢႆၼၼ်ႉဢေႃႈ။
၁၃ ဢမ်ႇလႆႈဢိတ်းလူမၼ်း။သူတၵ်းလႆႈပႄႇၽဵဝ်ႈပႅတ်ႈလိူတ်ႈၵေႃႉဢၼ်ထိူၵ်ႈၶၢမ်ႇတင်းတၢႆၼၼ်ႉဢွၵ်ႇသေၵႃႈၼႂ်းမဵဝ်းဢိသရေႇလႁႂ်ႈသူလႆႈလီလႆႈပဵၼ်ၵတ်းယဵၼ်ၶျၢမ်းသႃႇဢေႃႈ။
၁၄ သူတၵ်းဢမ်ႇလႆႈၶၢႆႉသဝ်မၢၵ်ႇႁိၼ်ဢၼ်ပဵၼ်တီႈမၢတ်ႈတီႈတွင်းလိၼ်ၵူၼ်းႁိူၼ်းၸမ်ၵၼ်တင်းသူဢၼ်ၵူၼ်းၵဝ်ႇမိူဝ်ႈၵွၼ်ႇၶဝ်ပၵ်းဝႆႉၵႃႈၼႂ်းလိၼ်တီႈဢၼ်သူလႆႈၶၢမ်ႇဢမူၺ်ႇၵႃႈၼႂ်းမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းပၼ်တီႈသူၼၼ်ႉ။
သၢၵ်ႈသေႇ
၁၅ ပေႃးမီးၵူၼ်းၶၢမ်ႇသၢၵ်ႈသေၵေႃႉလဵဝ်ၵူၺ်းဢၼ်ယူႇၽၢႆႇၼိုင်ႈတင်းသေၵေႃႉၵေႃႉၼႂ်းမိူဝ်ႈဢၼ်ၸႅတ်ႈထၢမ်တူႉၸရိူၵ်ႈဢပျႅတ်ႈဢၼ်မၼ်းၽိတ်းပိူင်ႈမႅၼ်ႈသေၸိူဝ်ႉသေပိူင်ၼၼ်ႉၸိုင်ၵႂၢမ်းသၢၵ်ႈသေႇၼၼ်ႉတၵ်းဢမ်ႇလႆႈတေႇ။ၵႂၢမ်းဢၼ်ၵူၼ်းၶၢမ်ႇသၢၵ်ႈသေသွင်ၵေႃႉသၢမ်ၵေႃႉလၢတ်ႈၼၼ်ႉၸမ်းတၵ်းလႆႈတေႇဢေႃႈ။
၁၆ ပေႃးၵူၼ်းၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈသေၵေႃႉၵေႃႉယူႇၽၢႆႇၼိုင်ႈတင်းပိူၼ်ႈတၢင်ႇၵေႃႉသေလႄႈၶၢမ်ႇသၢၵ်ႈတၢင်းၽိတ်းဢပျႅတ်ႈၸိုင်ႈ
၁၇ သွင်ၶႃတင်းသွင်ၵေႃႉဢၼ်ထူပ်းတြႃးၵၼ်ၼၼ်ႉတၵ်းလႆႈမႃးၸုၵ်းၵႃႈတီႈၽၢႆႇၼႃႈထႃႇဝရႃႉၽြႃးဢိၵ်ႇတင်းၵႃႈတီႈၽၢႆႇၼႃႈယိတ်ႉပရေႃးႁိၵ်ႈတင်းၵူၼ်းဢၼ်ၸီႇယင်ႇတြႃးတင်းလၢႆဢၼ်မီးယူႇၼႂ်းၸူဝ်ႈပၢၼ်ၼၼ်ႉဢေႃႈ။
၁၈ ၵူၼ်းဢၼ်ၸီႇယၢင်ႇတြႃးၸိူဝ်းၼၼ်ႉတၵ်းလႆႈၸႅတ်ႈထၢမ်ၸေးၸေးၸွတ်ႇၸွတ်ႇလႄႈပေႃးၵူၼ်းၶၢမ်ႇသၢၵ်ႈသေႇၼၼ်ႉပဵၼ်ၵူၼ်းၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈလႄႈယူႇၽၢႆႇၼိုင်ႈတင်းပီႈၼွင်ႉမၼ်းၸိုင်သူတၵ်းလႆႈႁဵတ်းတီႈမၼ်းၸွမ်းၵႃႈၼင်ႇဢၼ်မၼ်းၵျၢမ်ႇပွင်ႁႂ်ႈလႆႈႁဵတ်းတီႈပီႈၼွင်ႉမၼ်းၼၼ်ႉဢေႃႈ။
၁၉ ၼင်ႇၼၼ်လႄႈသူတၵ်းလႆႈပႄႇၽဵဝ်ႈပႅတ်ႈတူႉၸရိူၵ်ႈဢပျႅတ်ႈဢွၵ်ႇသေၵႃႈၼႂ်းသူဢေႃႈ။
၂၀ ၶဝ်ၸိူဝ်းဢၼ်ယင်းၵိုတ်းယင်းၵျၼ်ႇယူၼၼ်ႉတၵ်းငိၼ်းလႄႈတၵ်းမီးၸႂ်ဢၼ်ၵူဝ်ဢၼ်ႁယေူႇသေလႄႈၵမ်းလိုၼ်းၶဝ်ယင်းတေဢမ်ႇႁဵတ်းတူႉၸရိူၵ်ႈၸိူဝ်ႉၼင်ႇၼၼ်ဢေႃႈ။
၂၁ ယႃႇဢိတ်းလူၶဝ်။ဢသၢၵ်ႈပုၼ်ႈဢသၢၵ်ႈမၢၵ်ႇတႃပုၼ်ႈမၢၵ်ႇတႃၶဵဝ်ႈပုၼ်ႈၶဵဝ်ႈမိုဝ်းပုၼ်ႈမိုဝ်းတိၼ်ပုၼ်ႈတိၼ်တၵ်းလႆႈပၼ်တၢမ်ႇဢေႃႈ။