Chapter
၁၈
တၢင်းပုၼ်ႉၸေႃႇပုၼ်ႈယိတ်ႉပရေႃးႁိၵ်ႈၵူၼ်းမဵဝ်းလေႇဝိ
၁ ယိတ်ႉပရေႃးႁိၵ်ႈၵူၼ်းမဵဝ်းလေႇဝိတင်းသဵင်ႈတင်းလူင်ဢမ်ႇလႆႈမီးပုၼ်ႈမီးတႃႇၵႃႈၼႂ်းၵူၼ်းမဵဝ်းဢိသရေႇလ။ၶဝ်တၵ်းလႆႈၵိၼ်ၶိူင်ႈပုၵ်ႉၸေႃႇဢၼ်ဢဝတင်းၽႆးႁဵတ်းၼၼ်ႉဢေႃႈ။
၂ ၼႆႉပဵၼ်ဢမူၺ်ႇဢၼ်ၶဝ်လႆႈၶၢမ်ႇၼၼ်ႉဢေႃႈ။ၶဝ်တၵ်းဢမ်ႇလႆႈၶၢမ်ႇဢမူၺ်ႇၵႃႈၼႂ်းပီႈၼႂ်းၼွင်ႉၶဝ်။ထႃႇဝရႃႉၽြႃးပဵၼ်ဢမူၺ်ႇၶဝ်ၸွမ်ႈၵႃႈၼင်ႇဢၼ်မၼ်းၸဝ်ႈမီးဢမိင်ႉဝႆႉတီႈၶဝ်ၼၼ်ႉဢေႃႈ။
၃ ပဵၼ်ဝူဝ်းသေဢမ်ႇဝႃႈ၊ပဵၼ်သူဝ်းသေဢမ်ႇဝႃႈ၊မိူဝ်ႈဢၼ်ၵူၼ်းတင်းလၢႆဢဝ်ႁဵတ်းယိၸ်ႉပုၵ်ႉၸေႃႇၼၼ်ႉတၵ်းလႆႈဢဝ်ႁူဝ်မႃႇမၼ်းၽၢၵ်ႇၼိုင်ႈၵႅမ်ႈမၼ်းသွင်ၽၢၵ်ႇၶူင်းၼႂ်းမၼ်းပၼ်ပုၼ်ႈယိတ်ႉပရေႃးႁိၵ်ႈၶဝ်ဢေႃႈ။
၄ ၶဝ်ႈပိူၵ်ႇ၊ၼမ်ႉၸပိတ်ႉ၊ၼမ်ႉမၼ်း၊ၶူၼ်သူဝ်းဢၼ်သိမ်းဢဝ်ဢွၼ်တၢင်းၼၼ်ႉၵေႃႈသူတၵ်းလႆႈဢဝ်လူႇဢဝ်တၢၼ်းပၼ်ၶဝ်ဢေႃႈ။
၅ လွင်ႈမၼ်းၸမ်းထႃႇဝရႃႉၽြႃးၽြႃးပဵၼ်ၸဝ်ႈသူလိူၵ်ႈၵဵပ်းဢဝ်ၶဝ်ၵႃႈၼႂ်းၵူၼ်းမဵဝ်းသူတင်းသဵင်ႈတင်းလူင်လႄႈႁႂ်ႈၶဝ်ဢိၵ်ႇတင်းလုၵ်ႈလၢင်းၶဝ်သိုပ်ႇသိုပ်ႇတၢမ်တၢမ်လႆႈၸုၵ်းယူႇႁႂ်ႈလႆႈပႂ်ႉဢမူႉၸဝ်ႈၼႂ်းၼႃႇမႃႉၸိုဝ်သဵင်ထႃႇဝရႃႉၽြႃးယူႇတႃႇသေႇဢေႃႈ။
၆ ပေႃးၵူၼ်းမဵဝ်းလေႇဝိသေၵေႃႉၵေႃႉလုၵ်ႉသေၵႃႈတီႈဝဵင်းသေဝဵင်းဝဵင်းၼႂ်းမိူင်းဢိသရေႇလဢၼ်မၼ်းသွၼ်ပိုင်ႈယူႇၼၼ်ႉသေလႄႈပႃးၸႂ်ၸေႇတၼႃႇႁႅင်းယႂ်ႇၼႃႇသေလႄႈမႃးႁွတ်ႈမႃးထိုင်ၵႃႈတီႈဢၼ်ထႃႇဝရႃႉၽြႃးလိူၵ်ႈၵဵပ်းဢဝ်ၼၼ်ႉၸိုင်
၇ မၼ်းတၵ်းလႆႈပွင်ႁဵတ်းဢမူႉၸဝ်ႈၼႂ်းၼႃႇမႃႉၸိုဝ်သဵင်ထႃႇဝရႃႉၽြႃးၽြႃးပဵၼ်ၸဝ်ႈမၼ်းမိူၼ်ၸိူဝ်ႉၼင်ႇဢၼ်ပီႈၼွင်ႉမၼ်းၵူၼ်းမဵဝ်းလေႇဝိဢၼ်ၸုၵ်းယူႇၵႃႈတီႈၽၢႆႇၼႃႈထႃႇဝရႃႉၽြႃးၵႃႈတီႈၼၼ်ႉဢေႃႈ။
၈ ၼွၵ်ႈသေဢၼ်မၼ်းလႆႈၼႂ်းဢမူၺ်ႇမၼ်းၼၼ်ႉမၼ်းဢိၵ်ႇတင်းၶဝ်ၸိူဝ်းၼၼ်ႉတၵ်းလႆႈၶၢမ်ႇဢဝ်ပုၼ်ႈဢဝ်တႃႇတၢၼ်ႇပဵင်းၵၼ်ဢေႃႈ။
တၢင်းႁဵတ်းဢၼ်လီႁင်ႈဢဵတ်ႇသဵတ်ႇ
၉ မိူဝ်ႈဢၼ်သူႁွတ်ႈထိုင်ၵႃႈၼႂ်းမိူင်းဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူပၼ်တီႈသူၼၼ်ႉၸိုင်သူဢမ်ႇလႆႈသွၼ်ဢဝ်ယိူင်ႈဢဝ်တၢင်းဢၼ်ၵူၼ်းၸိူဝ်းၼၼ်ႉႁဵတ်းဢၼ်ပဵၼ်တၢင်းဢၼ်လီႁင်ႈဢဵတ်ႇသဵတ်ႇၼၼ်ႉ။
၁၀ ၼႂ်းသူၼၼ်ႉယႃႇပေႁႂ်ႈလႆႈမီးၵေႃႉဢၼ်ဢဝ်လုၵ်ၸၢႆးလုၵ်ႈယိင်းၸဝ်ႈၵဝ်ႇၸုတ်ႇၽႆးလႄႈပုၵ်ႉၸေႃႇၵေႃႉဢၼ်ဢဝ်တင်းၺၢၼ်ႇမၼ်းလႄႈႁေႃးလၢတ်ႈလွင်းတၢင်းဢၼ်တၵ်းပဵၼ်မႃးၵေႃႉဢၼ်တူၺ်းပေႇတၢင်ႇၶိင်ႇၵႃႇလႃႉၵေႃႉဢၼ်ႁဵတ်းဢတၢတ်ႈၽီမေႃႇၵေႃႉဢၼ်မီးၽိူဝ်ႉလႄႈ
၁၁ ၸၢင်ႊႁဵတ်းတေႃႇပိူၼ်ႈၵေႃႉဢၼ်ၸၢင်ႊႁဵတ်းတီႈပိူၼ်ႈၵေႃႉဢၼ်ပွင်ၵၼ်လူၺ်ႈၵၼ်းတင်းၽီႁၢႆႉၵေႃႉဢၼ်ပွင်ႁဵတ်းဢတၢတ်ႈဝိၵ်ႉၸႃႇၵေႃႉဢၼ်တွင်ႈထၢမ်ၵူၼ်းဢၼ်တၢႆယဝ်ႉၼၼ်ႉ။
၁၂ ၵေႃႉဢၼ်ႁဵတ်းလွင်ႈတၢင်းၸိူဝ်းၼၼ်ႉပဵၼ်ဢၼ်လီႁင်ႈဢဵတ်ႇသဵတ်ႇတီႈထႃႇဝရႃႉၽြႃးဢေႃႈ။ၵွပ်ႈပိူဝ်ႈတၢင်းဢၼ်လီႁင်ႈဢဵတ်ႇသဵတ်ႇၼၼ်ႉထႃႇဝရႃႉၽြႃးၽြႃးပဵၼ်ၸဝ်ႈသူတၵ်းႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈသူဢေႃႈ။
၁၃ သူတၵ်းလႆႈမီးတၢင်းဢၼ်ၸေးၸုမ်ႇၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။
ပရေႃးၽႅတ်ႈ
၁၄ ၵူၼ်းမဵဝ်းဢၼ်သူတၵ်းလႆႈၵႂႃႇဢုပ်ႉပိူင်ႇၸိူဝ်းၼၼ်ႉၸၢင်ႊထွမ်ႇဢဝ်ၵႂၢမ်းၵေႃႉဢၼ်တူၺ်းပေႇတၢင်ႇၵႃႇလႃႉၵေႃႉဢၼ်ဢဝ်တင်းၺၢၼ်ႇလႄႈႁေႃးလၢတ်ႈလွင်ႈတၢင်းဢၼ်တၵ်းပဵၼ်မႃးၸိူဝ်းၼၼ်ႉဢေႃႈ။သူၸမ်းထႃႇဝရႃႉၽြႃးၽြႃးပဵၼ်ၸဝ်ႈသူဢမ်ႇပၼ်ဢၶႂၢင်ႉႁႂ်ႈလႆႈႁဵတ်းၸိူဝ်ႉၼင်ႇၼၼ်။
၁၅ ထႃႇဝရႃႉၽြႃးၽြႃးပဵၼ်ၸဝ်ႈသူတၵ်းႁႂ်ႈယိတ်ႉပရေႃးႁိၵ်ႈၵေႃႉၼိုင်ႈဢၼ်မိူၼ်ၸိူဝ်ႉၼင်ႇၵဝ်ၼႆႉပေႃႇဢွၵ်ႇမႃးၵႃႈၼႂ်းသူၵႃႈၼႂ်းပီႈၼွင်ႉၸိူဝ်ႉၶိူဝ်းသူပုၼ်ႈသူဢေႃႈ။သူတၵ်းလႆႈထွမ်ႇဢဝ်ၵႂၢမ်းမၼ်းဢေႃႈ။
၁၆ ၸွမ်းၵႃႈၼင်ႇဢၼ်သူတွင်းပၢၼ်ႇတီႈထႃႇဝရႃႉၽြႃးၽြႃးပဵၼ်ၸဝ်ႈသူၵႃႈတီႈႁေႃႇရၢပ်ႉၼႂ်းဝၼ်းဢၼ်ၸူႉတုမ်ၵၼ်ၼၼ်ႉလႄႈဝႃႈ၊ၵမ်းလိုၼ်းယႃႇႁႂ်ႈႁဝ်းၶႃႈလႆႈငိၼ်းသဵင်ၵႂၢမ်းထႃႇဝရႃႉၽြႃးၽြႃးပဵၼ်ၸဝ်ႈယႃႇႁႂ်ႈႁဝ်းၶႃႈလႆႈႁၼႆ်းဢၼ်ယႂ်ႇထႅင်ႈၶႃႈယဝ်ႉ။ႁဝ်းၶႃႈၵူဝ်တၵ်းတၢႆၶႃႈဢေႃႈ၊ဝႃႈၼင်ႇၼႆလႄႈထႃႇဝရႃႉၽြႃးမီးဢမိင်ႉတီႈၵဝ်လႄႈဝႃႈ၊-
၁၇ ၵႂၢမ်းဢၼ်ၶဝ်လဝ်ဝႃႈၼၼ်ႉပဵၼ်ဢၼ်ထုၵ်ႇဢၼ်လီဢေႃႈ။
၁၈ ၵဝ်တၵ်းႁႂ်ႈပရေႃးၽိတ်ႈဢၼ်မိူၼ်ၸိူဝ်ႉၼင်ႇမႂ်းၼၼ်ႉၵေႃႉၼိုင်ႈပေႃႇဢွၵ်ႇမႃးၵႃႈၼႂ်းပီႈၼွင်ႉၸိူဝ်ႉၶိူဝ်းၶဝ်ပုၼ်ႈၶဝ်လႄႈၵဝ်တၵ်းဢဝ်ၵႂၢမ်းၵဝ်သႂ်ပၼ်ၵႃႈၼႂ်းသူပ်းမၼ်းသေယဝ်ႉမၼ်းတၵ်းလႆႈဢဝ်ၵႃႈဢၼ်ၵဝ်သင်ႇလၢတ်ႈဝႆႉတီႈမၼ်းၼၼ်ႉမွၵ်ႇလၢတ်ႈတီႈၶဝ်ဢေႃႈ။
၁၉ ၽူႈလႂ်သေဢမ်ႇဝႃႈ၊ၵေႃႉဢၼ်ဢမ်ႇထွမ်ႇဢမ်ႇဢဝ်ၵႂၢမ်းၵဝ်ဢၼ်မၼ်းတၵ်းႁေႃးလၢတ်ႈၼႂ်းၼႃႇမႃႉၸိုဝ်သဵင်ၵဝ်ၼၼ်ႉၵဝ်တၵ်းၸႅတ်ႈထၢမ်မၼ်းဢေႃႈ။
၂၀ ပရေႃးၽႅတ်ႈဢၼ်ႁေႃးလၢတ်ႈၵႂၢမ်းၼႂ်းၼႃႇမႃႉၸိုဝ်သဵင်ၵဝ်ဢၼ်ၵဝ်ဢမ်ႇသင်ႇလၢတ်ႈဝႆႉႁႂ်ႈမၼ်းလၢတ်ႈၼၼ်ႉဢမ်ႇၼၼ်ႁေႃးလၢတ်ႈၼႂ်းၼႃႇမႃႉၸိုဝ်သဵင်ၽြႃးတၢင်ႇသူတၢင်ႇပႃးၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ၊ဝႃႈၼင်ႇၼႆဢေႃႈ။
၂၁ သူတေလၢတ်ႈၼႂ်းၸႂ်ဝႃႈ၊-ႁဝ်းတၵ်းႁဵတ်းႁိုဝ်ႁူႉလွင်ႈဢၼ်ဝႃႈဢမိင်ႉၼၼ်ႉဢမ်ႇၸႂ်ႈဢမိင်ႉထႃႇဝရႃႉၽြႃးဝႃႈၼႆၸိုင်ႈ
၂၂ ပေႃးလွင်ႈတၢင်းဢၼ်ပရေႃးၽိတ်ႈႁေႃးၼၼ်ႉဢမ်ႇပေႃႇဢမ်ႇပဵၼ်ဢမ်ႇတဵမ်ထူၼ်ႈၸိုင်လွင်ႈတၢင်းၼၼ်ႉဢမ်ႇၸႂ်ႈဢမိင်ႉထႃႇဝရႃႉၽြႃး။ပဵၼ်တၢင်းဢၼ်ပရေႃးၽိတ်ႈထၢင်ႇလႄႈလၢတ်ႈၵူၺ်းဢေႃႈ။သူတၵ်းဢမ်ႇလႆႈၵူဝ်လႆႈႁေမၼ်း။