Chapter
၆
တၵ်းလႆႈႁၵ်ႉၽြႃးပဵၼ်ၸဝ်ႈ
၁ ၼႆႉပဵၼ်ပိင်းၺၢပ်ႈထုင်းၽိင်ႈဢိၵ်ႇတင်းတြႃးဢၼ်ၸီႇယၢင်ႇဝႆႉဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူသင်ႇလၢတ်ႈဝႆႉႁႂ်ႈလႆႈသင်ႇသွၼ်ပၼ်တီႈသူပုၼ်ႈဢၼ်သူတၵ်းလႆႈၵမ်ၵျၢင်ႉၵႃႈၼႂ်းမိူင်းဢၼ်သူတၵ်းၶၢမ်ႈၵႂႃႇၸူးလႄႈၶဝ်ႈၸၢမ်ႇၸႃးၼၼ်ႉဢေႃႈ။
၂ လွင်ႈၼင်ႇႁိုဝ်လုၵ်ႈလၢၼ်သူတၵ်းရူဝ်ႇသေႇၵူဝ်ယမ်ထႃႇဝရႃႉၽြႃးၽြႃးပဵၼ်ၸဝ်ႈလႄႈပႂ်ႉၵမ်ပႂ်ႉၸွမ်းထုင်းၽိင်ႈတြႃးဢိၵ်ႇတင်းပိင်းၺၢပ်ႈတြႃးဢၼ်ၵဝ်ဢဝ်ဢၢပ်ႈပၼ်ဝႆႉတီႈသူၵႃႈမီးၼၼ်ႉၸူဝ်ႈဢသၢၵ်ႈသူဢိၵ်ႇတင်းလွင်ႈၼင်ႇႁိုဝ်တၵ်းႁႂ်ႈၸူဝ်ႈဢသၢၵ်ႈသူယိုၼ်းယၢဝ်းၼၼ်ႉၸမ်း၊-
၃ မဵဝ်းဢိသရေႇလဢူၺ်း။ဢွၼ်ၵၼ်ထွမ်ႇဢဝ်လႄႈႁဵတ်းတင်းသတိပႂ်ႉၵမ်ပႂ်ႉၸွမ်းႁႂ်ႈသူလႆႈလီလႆႈပဵၼ်လႄႈယႂ်ႇၽေၼမ်ၵိုၼ်းမႃးၼႃႇလူင်လၢင်ၵႃႈတီႈမိူင်းဢၼ်ၼမ်ႉၼူမ်းတင်းၼမ်ႉၽိုင်ႈလႆႈယူႇၸွမ်းၵႃႈၼင်ႇဢၼ်ထႃႇဝရႃႉၽြႃးၽြႃးပဵၼ်ၸဝ်ႈပူႇမွၼ်ႇသူမီးၵတိၸဝ်ႈဝႆႉၼၼ်ႉတႃႉ။
၄ မဵဝ်းဢိသရေႇလဢူၺ်း။ဢွၼ်ၵၼ်ထွမ်ႇငိၼ်းတႃႉ။ထႃႇဝရႃႉၽြႃးၽြႃးပဵၼ်ၸဝ်ႈႁဝ်းပဵၼ််ထႃႇဝရႃႉၽြႃးသူႇလဵဝ်ၵူၺ်းဢေႃႈ။
၅ ထႃႇဝရႃႉၽြႃးၽြႃးပဵၼ်ၸဝ်ႈသူၸိုင်သူတၵ်းလႆႈပႃးတင်းၸႂ်သဵင်ႈသဵင်ႈႁူဝ်ၸႂ်သဵင်ႈသဵင်ႈတၢင်းဢၼ်ၵတ်ႉဢၼ်ၶၢၼ်ၵႃႈမီးသေလႄႈႁၵ်ႉဢေႃႈ။
၆ သူတၵ်းလႆႈဢဝ်ၵႂၢမ်းဢၼ်ၵဝ်သင်လၢတ်ႈဝႆႉတီႈသူဝၼ်းမိူဝ်ႈၼႆႉၼၼ်ႉသႂၢင်းၸႂ်သူဝႆႉဢေႃႈ။
၇ ၼင်ႈယူႇၵႃႈတီႈႁိူၼ်းသေဢမ်ႇဝႃႈၵႂႃႇၵႃႈတီႈၵၢင်တၢင်းယူႇသေဢမ်ႇဝႃႈၼွၼ်းယူႇသေဢမ်ႇဝႃႈလုၵ်ႉယူႇသေဢမ်ႇဝႃႈၵႂၢမ်းၼၼ်ႉၸိုင်သူတၵ်းလႆႈၵျူဝ်းၸႃးဢဝ်သင်ႇသွၼ်ပၼ်တီႈလုၵ်ႈလၢင်းသူဢေႃႈ။
၈ ဢဝ်ၵႂၢမ်းၼၼ်ႉမတ်ႉၸပ်းဝႆႉၵႃႈတီႈမိုဝ်းသူဝႆႉၵႃႈတီႈၼႃႈၽၢၵ်ႇသူတႃႉ။
၉ ဢဝ်တႅမ်ႈသႂ်ႇဝႆႉၵႃႈၼိူဝ်သဝ်ၽၵ်းတူႁိူၼ်းသူဢိၵ်ႇတင်းၵႃႈၼိူဝ်ၽၵ်းတူဝဵင်းသူဢေႃႈ။
၁၀ မိူဝ်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈသူဢဝ်သူမႃးၵႃႈၼႂ်းမိူင်းဢၼ်မၼ်းၸဝ်ႈတိူင်ႇဝႃႈဝႆႉတီႈပူႇမွၼ်ႇသူဢႃႇပႃႉႁမ်ႇ၊ဢိၸၵ်ႉ၊ယႃႇၵုပ်ႇၸိူဝ်းၼၼ်ႉႁႂ်ႈလႆႈဢဝ်ဝဵင်းယႂ်ႇဝဵင်းမျၢတ်ႈ
၁၁ ဢၼ်သူဢမ်ႇတေႇဢမ်ႇႁဵတ်းႁိူၼ်းဢၼ်တဵမ်ဝႆႉတင်းၶိူင်ႈပိုင်ႈဢၼ်လီဢၼ်ငၢမ်းဢၼ်သူယင်းဢမ်ႇဢဝ်သႂ်ႇဢဝ်သႂၢင်းၼမ်ႉမေႃႇဢၼ်သူဢမ်ႇၶုတ်ႉဢမ်ႇႁဵတ်းသူၼ်ဢူးယိၼ်ႇၸပိတ်ႉဢိၵ်ႇတင်းတူၼ်ႈသၢၼ်ႇလုၼ်ႇ
၁၂ ဢၼ်သူဢမ်ႇၽုၵ်ႇဢမ်ႇသွမ်ႈၸိူဝ်းၼၼ်ႉပၼ်တီႈသူလႄႈသူလႆႈၵိၼ်ဢိမ်ႇၵိၼ်တဵမ်ယူႇၼၼ်ႉၸိုင်သူႁဵတ်းသတိဢမ်ႇႁႂ်ႈလႆႈလူင်လိုမ်းထႃႇဝရႃႉၽြႃးဢၼ်ၼုၵ်ႈဢဝ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတုတီႈဢၼ်သူလႆႈၶၢမ်ႇႁဵတ်းၶႃႈၼၼ်ႉမႃးၼၼ်ႉတႃႉ။
၁၃ သူတၵ်းလႆႈရူဝ်ႇသေႇၵူဝ်ယမ်ထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။သူတၵ်းလႆႈႁဵတ်းဝၢတ်ႈတီႈမၼ်းၸဝ်ႈၵူၺ်းလႄႈဢဝ်ၼႃႇမႃႉၸိုဝ်သဵင်မၼ်းၸဝ်ႈၵူၺ်းႁဵတ်းတင်းဢၼ်တိူင်ႇဝႃႈဢေႃႈ။
၁၄ သူဢမ်ႇလႆႈသုတ်းၸပ်းသုတ်းၸူးၵႃႈတီႈၽြႃးတၢင်ႇသူႇတၢင်ႇပႃး။ၽြႃးၵူၼ်းမဵဝ်းတင်းလၢႆဢၼ်ယူႇလဵပ်ႈႁွပ်ႈသူယူႇၼၼ်ႉ။
၁၅ လွင်ႈမၼ်းၸမ်းထႃႇဝရႃႉၽြႃးပဵၼ်ၽြႃးၸဝ်ႈဢၼ်ႁၵ်ႉၶႅၼ်ၼၼ်ႉဢေႃႈ။ၵူဝ်ထႃႇဝရႃႉၽြႃးတၵ်းၸႂ်မႆႈၶႆႈၸႃႉတီႈသူလႄႈပေႇၽဵဝ်ႈသူပႅတ်ႈသေၵႃႈၼိူဝ်ၼႃႈလိၼ်မိူင်းဢေႃႈ။
၁၆ သူဢမ်ႇလႆႈႁဵတ်းတၢင်းဢၼ်ၸၢမ်းတူၺ်းထႃႇဝရႃႉၽြႃးၽြႃးပဵၼ်ၸဝ်ႈသူမိူၼ်ၸိူဝ်ႉၼင်ႇဢၼ်ႁဵတ်းတၢင်းဢၼ်ၸၢမ်းတူၺ်းမၼ်းၸဝ်ႈၵႃႈတီႈမတ်သႃႇၼၼ်ႉ။
၁၇ သူတၵ်းလႆႈၵျူဝ်းၸႃးပႂ်ႉၵမ်ပႂ်ႉၸွမ်းပိင်းၺၢပ်းတြႃးထႃႇဝရႃႉၽြႃးၽြႃးပဵၼ်ၸဝ်ႈသူဢိၵ်ႇတင်းတၢင်းဢၼ်မၼ်းၸဝ်ႈၶၢမ်ႇသၢၵ်ႈသေႇတင်းထုင်းၽိင်ႈတြႃးမၼ်းၸဝ်ႈဢၼ်မၼ်းၸဝ်ႈသင်ႇလၢတ်ႈဝႆႉတီႈသူၸိူဝ်းၼၼ်ႉဢေႃႈ။
၁၈ သူတၵ်းလႆႈႁဵတ်းလွင်ႈတင်းဢၼ်သိုဝ်ႈတေႃႇထုၵ်ႇလီသိုဝ်ၼႃႈတႂ်ႈတႃထႃႇဝရႃႉၽြႃးႁႂ်ႈသူလႆႈလီလႆႈပဵၼ်ဢိၵ်ႇတင်းႁႂ်ႈသူလႆႈၶဝ်ႈၸၢမ်ႇၸႃးမိူင်းဢၼ်မျၢတ်ႈဢၼ်လီဢၼ်ထႃႇဝရႃႉၽြႃးတိူင်ႇဝႃႈဝႆႉတီႈပူမွၼ်ႇသူၸိူဝ်းၼၼ်ႉဝႃႈ၊-
၁၉ တၵ်းႁေႃႈရၢၼ်ႇသူႇသူၵႃႈမီးဢွၵ်ႇပႅတ်ႈသေၵႃႈတီႈၽၢႆႇၼႃႈသူဢေႃႈ၊ဝႃႈၼင်ႇၼႆၼၼ်ႉၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၼၼ်ႉဢေႃႈ။
၂၀ ဝၼ်းလိုၼ်းမိူဝ်းၼႃႈမိူဝ်ႈဢၼ်လုၵ်ႈၸၢႆးသူတွင်ႈထၢမ်လႄႈဝႃႈတင်းဢၼ်မၼ်းၸဝ်ႈၶၢမ်ႇသၢၵ်ႈသေႇဢိၵ်တင်းထုင်းၽိင်ႈတြႃးတင်းလွင်ႈတၢင်းဢၼ်မၼ်းၸဝ်ႈၸီႇယင်ႇဝႆႉတင်းလၢႆဢၼ်ထႃႇဝရႃႉၽြႃးၽြႃးပဵၼ်ၸဝ်ႈႁဝ်းသင်ႇလၢတ်ႈဝႆႉၼၼ်ႉၶႂ်ႈဝႃႈၸိူဝ်ႉၼင်ႇႁိုဝ်၊ဝႃႈၼင်ႇၼႆၸိုင်ႈ
၂၁ သူတၵ်းလႆႈၶိုၼ်းလၢတ်ႈတီႈလုၵ်ႈၸၢႆးသူလႄႈဝႃႈ၊-ႁဝ်းပဵၼ်ၶႃႈၶုၼ်ၽႃႇရေႃးၵႃႈတီႈမိူင်းဢေႇၵႅပ်ႉတုလႄႈထႃႇဝရႃႉၽြႃးဢဝ်တင်းမိုဝ်းဢၼ်ႁႅင်းယႂ်ႇၼႃႇၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးဢေႃႈ။
၂၂ ထႃႇဝရႃႉၽြႃးၼပျေႃးၼီႉမိၵ်ႈလၢၵ်ႈၶၼႃႇလွင်ႈတၢင်းဢၼ်လီဢမ်းဢၼ်ယႂ်ႇၼႃႇႁဝ်ႉၵႅမ်းၼႃႇတင်းလၢႆၵႃႈၼိူဝ်မိူင်းဢေႇၵႅပ်ႉတုဢိၵ်ႇတင်းၵႃႈၼိူဝ်ၶုၼ်ႁေႃၶမ်းၽႃႇရေႃးတင်းၵူၼ်းၼႂ်းႁၢင်ႈၼႂ်းႁေႃမၼ်းတင်းသဵင်ႈတင်းလူင်ၼၼ်ႉသိုဝ်ႈၼႃႈတႂ်ႈတႃႁဝ်းသေယဝ်ႉ
၂၃ ၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိူင်းၼၼ်ႉမႃးႁႂ်ႈလႆႈဢဝ်ႁဝ်းသႂၢင်းသႂ်ႇလႄႈၶျႃးတီႈယူႇၵႃႈတီႈမိူင်းဢၼ်မၼ်းၸဝ်ႈတိူင်ႇဝႃႈဝႆႉတီႈပူႇမွၼ်ႇႁဝ်းၼၼ်ႉဢေႃႈ။
၂၄ ထႃႇဝရႃႉၽြႃးသင်ႇလၢတ်ႈဝႆႉတီႈႁဝ်းႁႂ်ႈႁဝ်းၵမ်ၵျၢင်ႉပိင်းၺၢပ်ႈၼႆႉၵူႈၸိူဝ်ႉၵူႈပိူင်လႄႈရူဝ်ႇသေႇၵူဝ်ယမ်ထႃႇဝရႃႉၽြႃးၽြႃးပဵၼ်ၸဝ်ႈႁဝ်းပုၼ်ႈဢၵျူဝ်းတူဝ်ၸဝ်ႈၵဝ်ႇႁႂ်ႈမၼ်းၸဝ်ႈလႆႈပႂ်ႉဢသၢၵ်ႈႁဝ်းယူႇမိူၼ်ၸိူဝ်ႉၼင်ႇဝၼ်းမိူဝ်ႈၼႆႉၼၼ်ႉဢေႃႈ။
၂၅ ပိူဝ်ႈၼႆလႄႈပေႃးႁဝ်းႁဵတ်းသတိပႂ်ႉၵမ်ပႂ်ႉၸွမ်းပိင်းၺၢပ်ႈၵူႈၸိူဝ်ႉၵူႈပိူင်ၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈႁဝ်းၸွမ်းၵႃႈၼင်ႇဢၼ်မၼ်းၸဝ်ႈသင်ႇလၢတ်ႈဝႆႉတီႈႁဝ်းၼၼ်ႉၸိုင်တၵ်းလႆႈပဵၼ်တၢင်းသိုဝ်ႈတေႃႇပုၼ်ႈႁဝ်းဢေႃႈ။