Chapter
၈
တႆႈၵွၵ်းၽႆး
၁ ထႃႇဝရႃႉၽြႃး မီးဢမိင်ႉတီႈမုဝ်းသေႇလႄႈဝႃႈၸမ်း၊- သင်ႇလၢတ်ႈတီႈဢႃႇရုၼ်ႇလႄႈဝႃႈ၊-
၂ မိူဝ်ႈဢၼ်မႂ်းတႆႈၵွၵ်းၽႆးၸိူဝ်းၼၼ်ႉၸိုင် ၵွၵ်းၽႆးၸဵတ်းလုၵ်ႈၸိူဝ်းၼၼ်ႉ တၵ်းလႆႈလႅင်းထွင်ႇၵႂႃႇသိုဝ်ႈၽၢႆႇၼႃႈၶူင်ႇတီႈတႆႈၽႆးဢေႃႈ၊ ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
၃ ဢႃႇရုၼ်ႇၵေႃႈႁဵတ်းၸွမ်းၸိူဝ်ႉၼင်ႇၼၼ်လႄႈ တႆႈၵွၵ်းၽႆးၸိူဝ်းၼၼ်ႉ ႁႂ်ႈလႅင်းထွင်ႇၵႂႃႇသိုဝ်ႈၽၢႆႇၼႃႈၶူင်ႇတီႈတႆႈၽႆး ၸွမ်းၵႃႈၼင်ႇဢၼ်ထႃႇဝရႃႉၽြႃး သင်ႇလၢတ်ႈဝႆႉတီႈမုဝ်းသေႇၼၼ်ႉဢေႃႈ။
၄ ၶူင်ႇတီႈတႆႈၽႆးၼၼ်ႉၸမ်းဢဝ်ၶမ်းတွင်ႈႁဵတ်းဢေႃႈ။ၸႃႉၸဵမ်တိၼ်မၼ်းတေႃႇထိုင်ႁွတ်ႈမွၵ်ႇမူဝ်မၼ်းၸိူဝ်းၼၼ်ႉဢဝ်တွင်ႈႁဵတ်းပဵၼ်ၼိူဝ်ႉလဵဝ်ၵၼ်ဢေႃႈ။မႅၼ်ႈၸွမ်းၵႃႈၼင်ႇပုင်ႇဢၼ်ထႃႇဝရႃႉၽြႃး ၼႄပျႃးတီႈ မုဝ်းသေႇၼၼ်ႉ မၼ်းႁဵတ်းၶူင်ႇတီႈတႆႈၽႆးၼၼ်ႉၸွမ်းၸိူဝ်ႉၼင်ႇၼၼ်ဢေႃႈ။
မႄးႁႅၼ်းလေႇဝိ
၅-၆ ထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈ၊- ၼုၵ်ႈဢဝ်ၵူၼ်းမဵဝ်းလေႇဝိၸိူဝ်းၼၼ်ႉ ဢွၵ်ႇသေၵႃႈၼႂ်းၵူၼ်းမဵဝ်းဢိသရေႇလတင်းလၢႆလႄႈ ႁႂ်ႈၶဝ်မူတ်းသႂ်တႃႉ။
၇ လွင်ႈတၢင်းဢၼ်တၵ်းလႆႈႁဵတ်းတီႈၶဝ် ႁႂ်ႈၶဝ်လႆႈမူတ်း သႂ်ၸမ်း မႂ်းတၵ်းလႆႈဢဝ်ၼမ်ႉမင်ႇၵလႃႇတၢင်းဢၼ်မူတ်းသႂ်ၼၼ်ႉၽႅတ်းသႂ်ႇၵႃႈၼိူဝ်ၶဝ်လႄႈ ႁႂ်ႈၶဝ်ႁဵတ်းတၢင်းဢၼ် ထႃၶူၼ်တင်းတူဝ်တင်းၶိင်းတင်းဢၼ်သၵ်ႉၶူဝ်းသၵ်ႉလဵင်းလႄႈ ႁႂ်ႈတူဝ်ၸဝ်ႈၵဝ်ႇမူတ်းသႂ် ဢေႃႈ။
၈ ၶဝ်တၵ်းလႆႈဢဝ်ဝူဝ်းပေႃႈဢၼ်ဢသၢၵ်ႈၼုမ်ႇဢိၵ်ႇတင်း တၢင်းပုၵ်ႉၸေႃႇၽေႃးၸဵၼ်ႇဢၼ်ပဵၼ်ၽွင်ၶဝ်ႈမုၼ်း ဢၼ်ဢဝ်ၼမ်ႉမၼ်းသႂ်ႇလေႃးၼၼ်ႉလႄႈ
၉ မႂ်းတၵ်းလႆႈဢဝ်ဝူဝ်းပေႃႈဢၼ်ဢသၢၵ်ႈၼုမ်ႇၼၼ်ႉ ထႅင်ႈတူဝ်ၼိုင်ႈပုၼ်ႈယိၸ်ႉဢၼ်ၽေႇဢပျႅတ်ႈၼၼ်ႉသေလႄႈ ႁွင်ႉဢဝ်ၵူၼ်းမဵဝ်းလေႇဝိၸိူဝ်းၼၼ်ႉမႃးၵႃႈတီႈ ၽၢႆႇၼႃႈသုမ်ႉထဵင်ၸဝ်ႈတီႈၸူႉတီႈတုမ်ပ ရိၵ်ႈသၢတ်ႈလႄႈ
၁၀ ႁႂ်ႈပရိၵ်ႈသၢတ်ႈၵူၼ်းမဵဝ်းဢိသရေႇလ တင်းသဵင်ႈတင်းလူင်ၸူႉၵၼ်တုမ်ၵၼ်သေယဝ်ႉဢဝ်ၵူၼ်းမဵဝ်းလေႇဝိၸိူဝ်းၼၼ်ႉ မႃးၵႃႈတီႈၽၢႆႇၼႃႈထႃႇဝရႃႉၽြႃးလႄႈ ၵူၼ်းမဵဝ်းဢိသရေႇလတင်းလၢႆဢွၼ်ၵၼ်ဢဝ်မိုဝ်းတၢင်ႇသေလႄႈ
၁၁ ဢႃႇရူၼ်ႇတၵ်းလႆႈဢဝ်ၵူၼ်းမဵဝ်းလေႇဝိၸိူဝ်းၼၼ်ႉသၢၵ်ႈၵၢပ်ႈတီႈထႃႇဝရႃႉၽြႃးပုၼ်ႈတၢင်းပုၵ်ႉၸေႃႇ ဢၼ်ယွင်ႊၵႂႆတၢင်ႈတူဝ်ၵူၼ်းမဵဝ်းဢိသရေႇလတင်းလၢႆ ပုၼ်ႈလွင်ႈၼင်ႇႁိုဝ်ၶဝ် တၵ်းလႆႈပွင်လႆႈႁဵတ်းဢမူႉထႃႇဝရႃႉၽြႃးဢေႃႈ။
၁၂ ၵူၼ်းမဵဝ်းလေႇဝိၸိူဝ်းၼၼ်ႉၵေႃႈ တၵ်းလႆႈဢွၼ်ၵၼ်ဢဝ်မိုဝ်းတူဝ်ၸဝ်ႈၵဝ်ႇ တၢင်ႇၵႃႈၼိူဝ်ႁူဝ်ဝူဝ်းၸိူဝ်းၼၼ်ႉလႄႈ မႂ်းတၵ်းလႆႈဢဝ်ဝူဝ်းတူဝ်ၼိုင်ႈႁဵတ်းယိၸ်ႉဢၼ်ၽေႇဢပျႅတ်ႈ ဢဝ်တူဝ်ၼိုင်ႈႁဵတ်းယိၸ်ႉဢၼ်တုတ်ႇၽႆးလႄႈ ပုၵ်ႉၸေႃႇတီႈထႃႇဝရႃႉၽြႃး ႁႂ်ႈလႆႈႁဵတ်းတၢင်းဢၼ်ၽေႇဢပျႅတ်ႈ ပုၼ်ႈၵူၼ်းမဵဝ်းလေႇဝိၸိူဝ်းၼၼ်ႉဢေႃႈ။
၁၃ မႂ်းတၵ်းလႆႈဢဝ်ၵူၼ်းမဵဝ်းလေႇဝိၸိူဝ်းၼၼ်ႉ ဝႆႉၵႃႈတီႈၽၢႆႇၼႃႈဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းတင်းလၢႆလႄႈ ႁဵတ်းတၢင်းပုၵ်ႉၸေႃႇဢၼ် ယွင်ႊၵႂႆတီႈထႃႇဝရႃႉၽြႃးဢေႃႈ။
၁၄ ၼင်ႇၼၼ်လႄႈမႂ်းတၵ်းလႆႈၽေဢဝ်ၵူၼ်းမဵဝ်းလေႇဝိ ၸိူဝ်းၼၼ်ႉၵႃႈၼႂ်းၵူၼ်းမဵဝ်းဢိသရေႇလ တင်းလၢႆလႄႈ ဝႆႉႁင်းၽႂ်ႁင်းမၼ်းသေယဝ်ႉၵူၼ်းမဵဝ်းလေႇဝိၸိူဝ်းၼၼ်ႉ တၵ်းလႆႈ ပဵၼ်ၵူၼ်းၵဝ်ဢေႃႈ။
၁၅ လိုၼ်းၼၼ်ႉၸင်ႇၵူၼ်းမဵဝ်းလေႇဝိၸိူဝ်းၼၼ်ႉ တၵ်းလႆႈၶဝ်ႈႁႂ်ႈလႆႈပွင်လႆႈႁဵတ်းဢမူႉသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈဢေႃႈ။မႂ်းတၵ်းလႆႈႁႂ်ႈၶဝ်မူတ်းသႂ်လႄႈ ဢဝ်ၶဝ်ႁဵတ်းတၢင်းပုၵ်ႉၸေႃႇ ဢၼ်ယွင်ႊၵႂႆၼၼ်ႉဢေႃႈ။
၁၆ ၶဝ်ၼၼ်ႉပဵၼ်ဢၼ်ၼုၵ်ႈဢွၵ်ႇသေၵႃႈၼႂ်းၵူၼ်းမဵဝ်းဢိသရေႇလ တင်းလၢႆလႄႈပၼ်တီႈၵဝ်လုမ်းလုမ်းဢေႃႈ။ၵဝ်သိမ်းဢဝ်ၶဝ်ပုၼ်ႈတၢင်ႈတူဝ်လုၵ်ႈၸၢႆးတူၼ်ႈဢၼ်ၵိူတ်ႇလဵင်ႉဢွၼ် တၢင်းၼႂ်းၵူၼ်းမဵဝ်းဢိသရေႇလတင်းလၢႆဢေႃႈ။
၁၇ လွင်ႈမၼ်းၸမ်းၼႂ်းၵူၼ်းမဵဝ်းဢိသရေႇလ တင်းလၢႆၼၼ်ႉပဵၼ်ၵူၼ်းသေဢမ်ႇဝႃႈ ပဵၼ်တရိၵ်ႈသၢၼ်ႇသေဢမ်ႇဝႃႈ လုၵ်ႈၸၢႆးတူၼ်ႈတင်းသဵင်ႈတင်းလူင်ပဵၼ်ဢုၵ်ႉၸႃႇၵဝ်ဢေႃႈ။ၼႂ်းဝၼ်းဢၼ်ၵဝ်ပၼ်တၢမ်ႇတီႈလုၵ်ႈၸၢႆးတူၼ်ႈတင်းလၢႆၵႃႈၼႂ်းမိူင်းဢေႇၵႅပ်ႉတု ၼၼ်ႉၵဝ် ႁႂ်ႈၶဝ်မူတ်းၸၢင်ႇပုၼ်ႈၵဝ်ဢေႃႈ။
၁၈ ၵဝ်ဢဝ်ၵူၼ်းမဵဝ်းလေႇဝိၸိူဝ်းၼၼ်ႉ ပုၼ်ႈတၢင်ႈတူဝ်လုၵ်ႈၸၢႆးတူၼ်ႈ ၵူၼ်းမဵဝ်းဢိသရေႇလတင်းသဵင်ႈတင်းလူင်ဢေႃႈ။
၁၉ ၵဝ်ဢဝ်ၵူၼ်းမဵဝ်းလေႇဝိၸိူဝ်းၼၼ်ႉ ဢွၵ်ႇသေၵႃႈၼႂ်းၵူၼ်းမဵဝ်းဢိသရေႇလ တင်းလၢႆသေယဝ်ႉ ဢၢပ်ႈပၼ်တီႈဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉ ႁႂ်ႈၶဝ်လႆႈပိူင်ႇႁႂ်ႈၶဝ်လႆႈပွင်လႆႈႁဵတ်းဢမူႉ ဢၼ်ၵူၼ်းမဵဝ်းဢိသရေႇလတင်းလၢႆ ၵႃႈတီႈသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈဢိၵ်ႇတင်း ႁႂ်ႈၶဝ်လႆႈႁဵတ်းတၢင်းဢၼ်ၽေႇဢပျႅတ်ႈပုၼ်ႈၵူၼ်းမဵဝ်းဢိသရေႇလ တင်းလၢႆႁႂ်ႈၵူၼ်းမဵဝ်းဢိသရေႇလ ၸိူဝ်းၼၼ်ႉ လႆႈၵၢင်းလွတ်ႈတင်းၽေးတၢမ်ႇ ၼႂ်းမိူဝ်ႈဢၼ်ၵူၼ်းမဵဝ်းဢိသရေႇလၸိူဝ်းၼၼ်ႉ သုတ်ႉၸပ်းသုတ်ႉၸူးၵႃႈတီႈထႃႇၼႃႉတီႈ မူတ်းၸၢင်ႇၸဝ်ႈၼၼ်ႉဢေႃႈ။
၂၀ ၼင်ႇၼၼ်လႄႈ မုဝ်းသေႇတင်းဢႃႇရုၼ်ႇဢိၵ်ႇတင်း ပရိၵ်ႈသၢတ်ႈၵူၼ်းမဵဝ်းဢိသရေႇလ တင်းသဵင်ႈတင်းလူင်ဢွၼ်ၵၼ်ႁဵတ်းတီႈၵူၼ်းမဵဝ်းလေႇဝိၸိူဝ်းၼၼ်ႉ မႅၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈ မုဝ်းသေႇလူၺ်ႈလွင်ႈဢမူႉၵူၼ်းမဵဝ်းလေႇဝိၸိူဝ်းၼၼ်ႉဢေႃႈ။
၂၁ ၵူၼ်းမဵဝ်းလေႇဝိၸိူဝ်းၼၼ်ႉ ႁဵတ်းႁႂ်ႈတူဝ်ၸဝ်ႈၵဝ်ႇမူတ်းသႂ်လႄႈသၵ်ႉလွႆးၶူဝ်းၼုင်ႈၶဝ်ဢေႃႈ။ဢႃႇရုၼ်ႇၵေႃႈဢဝ်ၶဝ်သၢၵ်ႈၵၢပ်ႈတီႈထႃႇဝရႃႉၽြႃး ပုၼ်ႈတၢင်းပုၵ်ႉၸေႃႇဢၼ်ယွင်ႊၵႂႆသေလႄႈ ႁဵတ်းတၢင်းဢၼ်ၽေႇ ဢပျႅတ်ႈပုၼ်ႈၶဝ်လႄႈႁႂ်ႈၶဝ်မူတ်းသႂ်ဢေႃႈ။
၂၂ လိုၼ်းၼၼ်ႉၸင်ႇၵူၼ်းမဵဝ်းလေႇဝိၸိူဝ်းၼၼ်ႉ ၶဝ်ႈၵႃႈၼႂ်းႁႂ်ႈလႆႈပွင်လႆႈႁဵတ်းဢမူႉ ၵႃႈၼႂ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈ ၵႃႈတီႈၽၢႆႇၼႃႈဢႃႇရုၼ်ႇဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉဢေႃႈ။မႅၼ်ႈၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈ မုဝ်းသေႇလူၺ်ႈလွင်ႈၵူၼ်းမဵဝ်းလေႇဝိ ၸိူဝ်းၼၼ်ႉၶဝ်ႁဵတ်းတီႈၶဝ်ၸိူဝ်ႉၼင်ႇၼၼ်ဢေႃႈ။
၂၃ ထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇလႄႈဝႃႈ၊- လွင်ႈတၢင်းဢၼ်ၸၢပ်ႈသႅင်ႇၵၼ်တင်း ၵူၼ်းမဵဝ်းလေႇဝိၸိူဝ်းၼၼ်ႉၸမ်း ၶဝ်ၸိူဝ်းဢၼ်ဢသၢၵ်ႈလႆႈသၢဝ်းႁႃႈလႄႈ
၂၄ ဢသၢၵ်ႈၼိူဝ်သၢဝ်းႁႃႈၵႂႃႇၼၼ်ႉတၵ်းလႆႈၶဝ်ႈၼႂ်းမုၵ်ႉၼႂ်းၸိူဝ်း ႁႂ်ႈလႆႈပွင်လႆႈႁဵတ်းဢမူႉၼႂ်းသုမ်ႉ ထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈဢေႃႈ။
၂၅ ၶဝ်ၸိူဝ်းဢၼ်ဢသၢၵ်ႈၼိူဝ်ႁႃႈသိပ်းၵႂႃႇၼၼ်ႉ တၵ်းလႆႈလွတ်ႈတင်းမုၵ်ႉတင်းၸိူဝ်းႁႂ်ႈလႆႈပွင်ႈလႆႈႁဵတ်းဢမူႉၼၼ်ႉ လႄႈ ၵမ်းလိုၼ်းဢမ်ႇလႆႈပွင်လႆႈႁဵတ်းဢမူႉ။
၂၆ ၶဝ်တၵ်းလႆႈၸွႆႈထႅမ်လူၺ်ႈၵၼ်တင်း ပီႈၼွင်ႉၶဝ်ၵႃႈၼႂ်းသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈလႄႈ ယင်းဢမ်ႇလႆႈပွင်လႆႈႁဵတ်းဢမူႉထႅင်ႈလႄႈတၵ်းလႆႈလူတူၺ်းလုမ်းလႃးယူႇဢေႃႈ။ၼင်ႇၼၼ်လႄႈမႂ်းတၵ်းလႆႈၸီႇယၢင်ႇတီႈၵူၼ်းမဵဝ်းလေႇဝိၸိူဝ်းၼၼ်ႉ လူၺ်ႈလွင်ႈဢမူႉဢၼ်ၶဝ်တၵ်းလႆႈပႂ်ႉၼၼ်ႉဢေႃႈ၊ ဝႃႈၼင်ႇၼႆဢေႃႈ။