Chapter
၃၂
ၸိူဝ်ႉၶိူဝ်းဢၼ်ၶၢမ်ႈၼမ်ႉႁွင်ႊယေႃႇတၢၼ်ႇ
၁ မဵဝ်းရုပိၼ်ႇဢိၵ်ႇတင်း ၵူၼ်းမဵဝ်းၵတ်ႉတင်းလၢႆမၢၵ်ႈမီးတရိၵ်ႈသၢၼ်ႇၼမ်ၼႃႇလႄႈ မိူဝ်ႈဢၼ်ၶဝ်ႁၼ်မိူင်းယႃႇၸႃႇ တင်း မိူင်းၵိလတ်ႉပဵၼ်တီႈဢၼ်တရိၵ်ႈ သၢၼ်ႇတၵ်းၵိၼ်လီၼႃႇၼၼ်ႉၸိုင်
၂ ၵူၼ်းမဵဝ်းၵတ်ႉဢိၵ်ႇတင်းၵူၼ်းမဵဝ်းရုပိၼ်ႇ ၸိူဝ်းၼၼ်ႉဢွၼ်ၵၼ်မႃးၵႃႈတီႈမုဝ်းသေႇ တင်းယိတ်ႉပရေႃးႁိၵ်ႈဢေႇလႃႇၸႃႇဢိၵ်ႇတင်းၵူၼ်းယႂ်ႇၵူၼ်းလူင် ၵႃႈၼႂ်းပရိၵ်ႈသၢတ်ႈ တင်းလၢႆၼၼ်ႉလႄႈလဝ်ႊလၢတ်ႈဝႃႈ၊-
၃ ဢတရုတ်ႉ၊တိၽုၼ်ႇ၊ယႃႇၸႃႇ၊ၼိမရ၊ႁေႇသၽုၼ်ႇ၊ ဢေႇလႃႇ လေႇ၊
၄ သေႇၽမ်ႇ၊ၼေႇပေႃႇ၊ပေႃႇၼ၊ဢၼ်ပဵၼ်မိူင်းဢၼ်ထႃႇဝရႃႉၽြႃးတိုၵ်းတေႃးသိမ်းဢဝ်ၵႃႈတီႈၽၢႆႇၼႃႈပရိၵ်ႈသၢတ်ႈ ၵူၼ်းမဵဝ်းဢိသရေႇလၸိူဝ်းၼႆႉပဵၼ်ဢၼ်လီထုၵ်ႇၵၼ်တင်း တရိၵ်ႈသၢၼ်ႇၼမ်ၼႃႇတီႈၶႃႈဢေႃႈ။ၶႃႈႁဝ်းၸိူဝ်းၼႆႉၵေႃႈမီးတရိၵ်ႈသၢၼ်ႇၼမ်ၼႃႇတီႈၶႃႈဢေႃႈ၊ ဝႃႈၼင်ႇၼႆလႄႈ ၶဝ်သမ်ႉ လၢတ်ႈလႄႈဝႃႈ၊-
၅ ပေႃးၶႃႈၸဝ်ႈႁဝ်းၸိူဝ်းၼႆႉလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းၸိုင် ၶႅၼ်းတေႃႈပၼ်တီႈၶႃႈၸဝ်ႈႁဝ်းၸိူဝ်းၼႆႉ ႁႂ်ႈလႆႈပိူင်ႇသေၵမ်းတီႈၶႃႈ။ယႃႇပေဢဝ်ၶႃႈၸဝ်ႈႁဝ်းၶဝ်ၸိူဝ်းၼႆႉၶၢမ်ႈၵႂႃႇၵႃႈတီႈၽၢႆႇပုၼ်ႉၼမ်ႉႁွင်ႊယေႃႇတၢၼ်ႇ ၼၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။
၆ မုဝ်းသေႇ ၶိုၼ်းလၢတ်ႈတီႈၵူၼ်းမဵဝ်းၵတ်ႉဢိၵ်ႇတင်းၵူၼ်းမဵဝ်းရုပိၼ်ႇၸိူဝ်းၼၼ်ႉလႄႈဝႃႈ၊-ပီႈၼွင်ႉသူၸိူဝ်းၼၼ်ႉတၵ်းလႆႈၵႂႃႇတိုၵ်းသိုၵ်းလႄႈ သူတၵ်းလႆႈၵိုတ်းသဝ်းယူႇၵႃႈတီႈၼႆႉႁိုဝ်။
၇ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူယႃႉၸႂ်ၵူၼ်းမဵဝ်းဢိသရေႇလ တင်းလၢႆႁႂ်ႈၶဝ်ဢမ်ႇၶၢမ်ႈဢမ်ႇၵႂႃႇၵႃႈတီႈမိူင်းဢၼ် ထႃႇဝရႃႉၽြႃးပၼ်ၼၼ်ႉ။
၈ ပေႃႈသူၸိူဝ်းၼၼ်ႉ ႁဵတ်းၸိူဝ်ႉၼင်ႇၼႆၼႂ်းမိူဝ်ႈဢၼ်ၵဝ်ပွႆႇၸႂ်ႉၶဝ် လုၵ်ႉသေၵႃႈတီႈၵႃႇတေႇသပႃႇၼႃႇၵႂႃႇႁႂ်ႈ လႆႈလွမ်တူၺ်းမိူင်းၸဝ်ႈၼၼ်ႉဢေႃႈ။
၉ ၶဝ်ၼၼ်ႉဢွၼ်ၵၼ်ၵႂႃႇၵႃႈတီႈ ပၢင်ႇႁူၺ်ႈ ဢေႇသၵေႃႇလ လႄႈတူၺ်းႁၼ်မိူင်းသေယဝ်ႉ ယႃႉၸႂ်ၵူၼ်းမဵဝ်းဢိသရေႇလတင်းလၢႆႁႂ်ႈၶဝ်ဢမ်ႇၶႂ်ႈၵႂႃႇၵႃႈတီႈမိူင်းဢၼ် ထႃႇဝ ရႃႉၽြႃးပၼ်ၼၼ်ႉဢေႃႈ။
၁၀ မိူဝ်ႈၼၼ်ႉတၢင်းၸႂ်မႆႈၶႂ်ႈၸႃႉထႃႇဝရႃႉၽြႃးဢွၵ်ႇသေလႄႈ မၼ်းၸဝ်ႈၵိၼ်ႇလႄႈ ဝႃႈ၊-
၁၁ ၵွပ်ႈပိူဝ်ႈဢၼ်ၶဝ်ဢမ်ႇၸွမ်းလင်ၵဝ်မူတ်းမူတ်းလႄႈလိူဝ်သေၵႃႇလိပ်ႉ၊ လုၵ်ႈၸၢႆးယေႇၽုၼ်ႇၼႃႇ၊ဢၼ်ပဵၼ်ၵူၼ်းမဵဝ်းၵေႇၼိတ်ႉ၊ ဢိၵ်ႇတင်းယေႃးသု၊
၁၂ လုၵ်ႈၸၢႆးၼုၼ်ႇၸိူဝ်းၼၼ်ႉ၊ ၵႃႈၼႂ်းၶဝ်ၸိူဝ်းဢၼ်ဢွၵ်ႇသေၵႃႈၼႂ်းမိူင်း ဢေႇၵႅပ်ႉတု မႃးလႄႈဢသၢၵ်ႈလႆႈသၢဝ်းၼိုင်ႈ လိူဝ်သၢဝ်းၵႂႃႇၸိူဝ်းၼၼ်ႉၽူႈ လႂ်ၵေႃႈဢမ်ႇလႆႈႁၼ်မိူင်းဢၼ်ၵဝ်တိူင်ႇဝႃႈတီႈ ဢႃႇပႁမ်ႇ၊ဢိၸၢၵ်ႉ၊ယႃႇၵုပ်ႉၸိူဝ်းၼၼ်ႉသေၵေႃႉသေၵူၼ်း။သွင်ၶႃၸိုင်ၸွမ်းလင်ထႃႇဝရႃႉၽြႃးမူတ်းမူတ်းယဝ်ႉ၊ ဝႃႈ ၼင်ႇၼႆဢေႃႈ။
၁၃ ၼင်ႇၼၼ်လႄႈတၢင်းၸႂ်မႆႈၶႂ်ႈၸႃႉထႃႇဝရႃႉၽြႃး ဢွၵ်ႇတီႈၵူၼ်းမဵဝ်းဢိသရေႇလတင်းလၢႆလႄႈ မၼ်းၸဝ်ႈႁႂ်ႈၶဝ်လႄႇၵႂႃႇလႄႈမႃးယူႇၵႃႈၼႂ်းထိူၼ်ႇ သီႇသိပ်းပီႊတဵမ်တဵမ်တေႃႇထိုင်ႁွတ်ႈထၼ်ႈပေႃး ၵူၼ်းဢၼ်ႁဵတ်းဢမူႉဢၼ်ႁၢႆႉယုတ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးၸိူဝ်းၼၼ်ႉ လႆႈလူႉလႅဝ်ပႅတ်ႈ တင်းသဵင်ႈတင်းမူတ်းဢေႃႈ။
၁၄ တေႃႈလဵဝ်ၼႆႉသူသမ်ႉပဵၼ်ၵေႃႉဢၼ်ယိင်ႈၶႅၼ်းႁၢႆႉယုတ်ႈလႄႈ ၸုၵ်းယူႇၵႃႈတီႈဢွင်ႈပေႃႈသူၸိူဝ်းၼၼ်ႉသေယဝ်ႉ ႁဵတ်းႁႂ်ႈတၢင်းၸႂ်မႆႈၶႂ်ႈၸႃႉထႃႇဝရႃႉၽြႃး ယိင်ႈၶႅၼ်းဢွၵ်ႇတီႈၵူၼ်းမဵဝ်းဢိသရေႇလတင်းလၢႆယဝ်ႉလူင်ပေႇ။
၁၅ ပေႃးသူယင်းဢမ်ႇၸွမ်းလင်မၼ်းၸဝ်ႈလႄႈ ဝေႈပိူင်ႈၵႂႃႇၸိုင်မၼ်းၸဝ်ႈတၵ်းသမ်ႉၶိုၼ်း ၸုၼ်ႉပႅတ်ႈၵူၼ်းမဵဝ်းၼႆႉၵႃႈၼႂ်းထိူၼ်ႇလႄႈ သူတၵ်းပဵၼ်လွင်ႈတၢင်းဢၼ်လႆႈယႃႉၵူၼ်းမဵဝ်းၼႆႉတင်းသဵင်ႈတင်းလူင်ပႅတ်ႈလူင်ပေႇ၊ဝႃႈၼင်ႇၼႆ ဢေႃႈ။
၁၆ ၶဝ်သမ်ႉဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈမၼ်းသေလႄႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈႁဝ်းၶဝ်တၵ်းတႄႇႁဵတ်းၶွၵ်ႈသူဝ်းပုၼ်ႈတရိၵ်ႈသၢၼ်ႇ ဢိၵ်ႇတင်းဝဵင်း ပုၼ်ႈလုၵ်ႈလၢင်းဢွၼ်ႇၶႃႈၸဝ်ႈႁဝ်းၸိူဝ်း ၼႆႉၵႃႈတီႈၼႆႉၶႃႈဢေႃႈ။
၁၇ ၵူၺ်းၵႃႈၶႃႈၸဝ်ႈႁဝ်းၶဝ်ၸိူဝ်းၼႆႉ တၵ်းယိပ်းၵမ်ဢဝ်လၢၵ်ႈၼၢၵ်ႈသေလႄႈၵႂႃႇၽၢႆႇၼႃႈၵူၼ်းမဵဝ်းဢိသရေႇလ တင်းလၢႆတေႃႇထိုင်ႁွတ်ႈၶႃႈၸဝ်ႈႁဝ်းၸိူဝ်းၼႆႉပေႃးလႆႈဢဝ်ၶဝ်ၵႂႃႇသူင်ႇ ႁွတ်ႈထိုင်ၵႃႈတီႈတီႈယူႇၶဝ်ၼၼ်ႉၶႃႈဢေႃႈ။ၵူၼ်းဢၼ်ယင်းၵိုတ်းယင်းၵျၢၼ်ႇ မီးယူႇၵႃႈတီႈၼႂ်းမိူင်းၼႆႉၸိူဝ်းဢၼ်ပဵၼ် လုၵ်ႈဢွၼ်ႇလၢင်းဢွၼ်ၶႃႈၸဝ်ႈႁဝ်းၶဝ်တင်းလၢႆၸိူဝ်းၼၼ်ႉ တၵ်းလႆႈယူႇၵႃႈတီႈဝဵင်းဢၼ်တေႁႄႉၶႅၼ်သေၵူၼ်း ဢၼ်ယင်းၵိုတ်းယင်းၵျၼ်ႇယူႇ ၸိူဝ်းၼၼ်ႉၶႃႈဢေႃႈ။
၁၈ တေႃႇထိုင်ႁွတ်ႈၵူၼ်းမဵဝ်းဢိသရေႇလတင်းလၢႆ လႆႈၶဝ်ႈၶၢမ်ႇဢမူၺ်ႇႁင်းၽႂ်ႁင်းမၼ်းၼၼ်ႉၶႃႈၸဝ်ႈႁဝ်းၶဝ်ၸိူဝ်းၼႆႉ တၵ်းဢမ်ႇၶိုၼ်းမႃးၵႃႈ တီႈႁိူၼ်းတူဝ်ၸဝ်ႈၵဝ်ႇတီႈၶႃႈ။
၁၉ ၶႃႈၸဝ်ႈႁဝ်းၶဝ်ၸိူဝ်းၼႆႉဢမ်ႇလႆႈၶၢမ်ႇဢမူၺ်ႇ လူၺ်ႈၵၼ်တင်းၶဝ်ၵႃႈတီႈၽၢႆႇပုၼ်ႉၼမ်ႉႁွင်ႊယေႃးတၢၼ်ႇၼၼ်ႉတီႈၶႃႈ။လိၼ်ဢၼ်ၶႃႈၸဝ်ႈႁဝ်းၶဝ် လႆႈၶၢမ်ႇဢမူၺ်ႇၼၼ်ႉတူၵ်းၵႃႈတီႈၽၢႆႇဝၼ်းဢွၵ်ႇၼမ်ႉႁွင်ႊယေႃးတၢၼ်ႇ တီႈၶႃႈဢေႃႈ၊ဝႃႈၼင်ႇၼႆဢေႃႈ။
၂၀ မုဝ်းသေႇၵေႃႈလၢတ်ႈတီႈၶဝ်လႄႈဝႃႈ၊-ပေႃးသူႁဵတ်းၸိူဝ်ႉၼင်ႇၼၼ်ၸိုင် ပဵၼ်တၢင်းဢၼ်သူယိပ်းၵမ်ဢဝ်လၢၵ်ႈၼၢၵ်ႈသေလႄႈ ၵႂႃႇတိုၵ်းသိုၵ်းၽၢႆႇၼႃႈထႃႇဝ ရႃႉၽြႃးယဝ်ႉ။
၂၁ သူယိပ်းၵမ်ဢဝ်လၢၵ်ႈၼၢၵ်ႈလႄႈၶၢမ်ႈၵႂႃႇၽၢႆႇပုၼ်ႉၼမ်ႉႁွင်ႊယေႃးတၢၼ်ႇ ၵႃႈတီႈၽၢႆႇၼႃႈထႃႇဝရႃႉၽြႃးတေႃႇထိုင်ႁွတ်ႈထၢၼ်ႈပေႃးႁေႃႈရၢၼ်ႇသူႇထႃႇဝရႃႉၽြႃးတင်းလၢႆ ဢွၵ်ႇသေၵႃႈတီႈ ၽၢႆႇၼႃႈမၼ်းၸဝ်ႈလႄႈ
၂၂ သူပႄႉၼႅင်ႇမိူင်းၼၼ်ႉၵႃႈတီႈၽၢႆႇၼႃႈထႃႇဝရႃႉၽြႃးၸိုင်လိုၼ်းၼၼ်ႉ သူတၵ်းၵၢင်းလွတ်ႈတင်းဢပျႅတ်ႈ ၵႃႈတီႈၽၢႆႇၼႃႈထႃႇဝရႃႉၽြႃးဢိၵ်ႇတင်းၵူၼ်းမဵဝ်းဢိသရေႇလ တင်းလၢႆသေလႄႈၶိုၼ်းမႃးၵႃႈတီႈၼႆႉဢေႃႈ။မိူင်းၼႆႉတၵ်းလႆႈပဵၼ်တီႈဢၼ်သူပိူင်ႇ ၸွမ်းၼင်ႇဢၶႂၢင်ႉထႃႇဝရႃႇၽြႃးဢေႃႈ။
၂၃ ပေႃးသူဢမ်ႇႁဵတ်းၸိူဝ်ႉၼင်ႇၼၼ်ၸိုင်သူတၵ်းမီးတၢင်းဢၼ်ၽိတ်းပိူင်ႈထႃႇဝရႃႉၽြႃးဢေႃႈ။သူႁူႉၸႅင်ႈလွင်ႈဢၼ်ဝႃႈ ဢပျႅတ်ႈသူၼၼ်ႉ တၵ်းၸွမ်း လႄႈၶိုတ်းသူဢေႃႈ။
၂၄ ဢွၼ်ၵၼ်တႄႇႁဵတ်းဝဵင်းပုၼ်ႈလုၵ်ႈဢွၼ်ႇလၢင်းဢွၼ်ႇသူဢိၵ်ႇတင်း ၶွၵ်ႈသူဝ်းပုၼ်ႈသူဝ်းသူဝႆႉတႃႉ။ဢွၼ်ၵၼ်ႁဵတ်းၸွမ်းၵႃႈၼင်ႇဢၼ်သူပ်းသူဝႃႈၼၼ်ႉတႃႉ၊ဝႃႈၼင်ႇၼႆယဝ်ႉ။
၂၅ ၵူၼ်းမဵဝ်းၵတ်ႉ ဢိၵ်ႇတင်းၵူၼ်းမဵဝ်းရုပိၼ်ႇတင်းလၢႆလဝ်ႈလၢတ်ႈတီႈမုဝ်းသေႇလႄႈဝႃႈ၊- ၶႃႈၸဝ်ႈႁဝ်းၸိူဝ်းၼႆႉ တၵ်းႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းမီး ဢမိင်ႉၼၼ်ႉတီႈၶႃႈဢေႃႈ။
၂၆ မေးဢိၵ်ႇတင်းလုၵ်ႈဢွၼ်ႇလၢင်းဢွၼ်ႇၶႃႈႁဝ်းၶဝ်တင်းလၢႆ တင်းၽုင်သူဝ်းၽုင်ဝူဝ်းၶႃႈၸဝ်ႈႁဝ်းၶဝ်တင်းသဵင်ႈတင်းလူင် တၵ်းလႆႈ ၵိုတ်းယူႇၵႃႈၼႂ်းဝဵင်းတီႈမိူင်းၵိလတ်ႉၼႆႉၶႃႈဢေႃႈ။
၂၇ ၶႃႈၸဝ်ႈႁဝ်းၶဝ်ၸိူဝ်းၼႆႉၸမ်း ၼင်ႇၵႃႈဢၼ်ၸဝ်ႈႁဝ်းမီးဢမိင်ႉၼၼ်ႉ တၵ်းယိပ်းၵမ်လၢၵ်ႈၼၢၵ်ႈသေလႄႈၶၢမ်ႈၵႂႃႇႁႂ်ႈလႆႈတိုၵ်းသိုၵ်း ၵႃႈတီႈၽၢႆႇၼႃႈထႃႇဝရႃႉၽြႃးတီႈၶႃႈဢေႃႈ၊ဝႃႈၼင်ႇၼႆဢေႃႈ။
၂၈ ၵွပ်ႈႁွႆႈၼႆႉလႄႈ မုဝ်းသေႇဢဝ်လွင်ႈၶဝ်သင်ႇလၢတ်ႈတီႈယိတ်ႉပရေႃးႁိၵ်ႈဢေႇလႃႇၸႃႇ၊ယေႃးသု၊လုၵ်ႈၸၢႆးၼုၼ်ႇဢိၵ်ႇတင်း ၵူၼ်းယႂ်ႇၵူၼ်းလူင်မဵဝ်းပူႇမဵဝ်းပေႃႈၶဝ်ၵႃႈတီႈၼႂ်းမဵဝ်းတင်းလၢႆ ၵႃႈၼႂ်းၵူၼ်းမဵဝ်းဢိသရေႇလၸိူဝ်းၼၼ်ႉလႄႈ မုဝ်းသေႇ လၢတ်ႈလႄႈ ဝႃႈ၊-
၂၉ ၵူၼ်းမဵဝ်းၵတ်ႉဢိၵ်ႇတင်းၵူၼ်းမဵဝ်းရုပိၼ်ႇႁင်းၽႂ်ႁင်းမၼ်းယိပ်းၵမ်ဢဝ်လၢၵ်ႈၼၢၵ်ႈ ႁႂ်ႈလႆႈတိုၵ်းသိုၵ်းသေလႄႈ ဢွၼ်ၵၼ်ၶၢမ်ႈၵႂႃႇၽၢႆႇပုၼ်ႉၼမ်ႉႁွင်ႊယေႃးတၢၼ်ႇလူၺ်ႈၵၼ်တင်းသူ ၵႃႈတီႈၽၢႆႇၼႃႈထႃႇဝရႃႉၽြႃးလႄႈ သူပႄႉၼႅင်ႇမိူင်းၼၼ်ႉယဝ်ႉၸိုင်သူတၵ်းလႆႈ ဢဝ်မိူင်းၵိလတ်ႉပၼ်တီႈၶဝ်ႁႂ်ႈၶဝ်လႆႈပိူင်ႇဢေႃႈ။
၃၀ ပေႃးဢမ်ႇၼၼ် ပေႃးၶဝ်ဢမ်ႇယိပ်းၵမ်လၢၵ်ႈၼၢၵ်ႈသေလႄႈ ၶၢမ်ႈၵႂႃႇလူၺ်ႈၵၼ်တင်းသူၸိုင်ၶဝ်တၵ်းလႆႈၶၢမ်ႇဢဝ် တီႈဢၼ်တူဝ်ၸဝ်ႈၵဝ်ႇလႆႈပိူင်ႇၵႃႈၼႂ်းသူၵႃႈတီႈမိူင်းၶႃႇၼၢၼ်ႇပုၼ်ႉဢေႃႈ၊ ဝႃႈၼင်ႇၼႆဢေႃႈ။
၃၁ ၵူၼ်းမဵဝ်းၵတ်ႉဢိၵ်ႇတင်း ၵူၼ်းမဵဝ်းရုပိၼ်ႇၸိူဝ်းၼၼ်ႉဢွၼ်ၵၼ်ၶိုၼ်းလၢတ်ႈလႄႈဝႃႈ၊-ၶႃႈၸဝ်ႈႁဝ်းၸိူဝ်းၼႆႉတၵ်းႁဵတ်းၸွမ်း ၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉတီႈၶႃႈၸဝ်ႈႁဝ်းၸိူဝ်းၼႆႉၼၼ်ႉ တီႈၶႃႈဢေႃႈ။
၃၂ ၶႃႈၸဝ်ႈႁဝ်းၸိူဝ်းၼႆႉ တၵ်းယိပ်းၵမ်ဢဝ်လၢၵ်ႈၼၢၵ်ႈသေလႄႈ ၶၢမ်ႈၵႂႃႇတီႈမိူင်းၶႃႇၼၢၼ်ႇၵႃႈတီႈၽၢႆႇၼႃႈထႃႇဝရႃႉၽြႃးသေယဝ်ႉ ဢမူၺ်ႇဢၼ်ၶႃႈၸဝ်ႈႁဝ်းၶဝ်တၵ်းပိူင်ႇၼၼ်ႉ တၵ်းမီးၵႃႈတီႈၽၢႆႇပုၼ်ႉ ၼမ်ႉႁွင်ႈ ယေႃးတၢၼ်ႇတီႈၶႃႈဢေႃႈ၊ဝႃႈၼင်ႇၼႆဢေႃႈ။
၃၃ မိူဝ်ႈၼၼ်ႉမုဝ်းသေႇဢဝ်သိုင်ႇၸိုင်ႈဝၢၼ်ႈမိူင်းသိႁုၼ်ႇ၊ ၶုၼ်ႁေႃၶမ်းဢႃႇမေႃးရိ သိုင်ႇၸိုင်ႈဝၢၼ်ႈမိူင်းဢေႃႇၶ ၶုၼ်ႁေႃၶမ်းပႃႇသၼ်ႇဢၼ်ပဵၼ်လိၼ်မၼ်းဝဵင်းမၼ်းဢိၵ်ႇတင်း ဝၢၼ်ႈၼွၵ်ႈၼႃးပၢင်ႇမၼ်းတင်းလၢႆဝဵင်းဢၼ်မီးၵူႈတီႈၵူႈလႅၼ် ၼႂ်းၼမ်ႉၼႂ်းလိၼ်မၼ်းၸိူဝ်းၼၼ်ႉ ဢၢပ်ႈပၼ်တီႈၵူၼ်းမဵဝ်းၵတ်ႉဢိၵ်ႇတင်းၵူၼ်းမဵဝ်းရုပိၼ်ႇတင်းၵူၼ်းမဵဝ်းမၼႃႇသေႇ လုၵ်ႈၸၢႆးယုဝ်းသႅပ်ႉၶိုင်ႈၼိုင်ႈၼၼ်ႉဢေႃႈ။
၃၄ ၵူၼ်းမဵဝ်းၵတ်ႉ ၸိူဝ်းၼၼ်ႉဢွၼ်ၵၼ်တႄႇႁဵတ်းတီႇ ပုၼ်ႇ၊
၃၅ ဢတရုတ်ႉ၊ဢႃႇတရုတ်ႉသေႃႇၽၼ်ႇ၊ယႃႇၸႃႇယုဝ်ၽေႇႁ၊ပိတ်ႉၼိမရႃႇ၊ပေႇသႃႇရၼ်ႇ၊ ဢၼ်ပဵၼ်
၃၆ ဝဵင်းဢၼ်မၼ်ႈလီၶိူင်ႇလီၸိူဝ်းၼၼ်ႉဢိၵ်ႇတင်း ၶွၵ်ႈ သူဝ်းတင်းလၢႆဢေႃႈ။
၃၇ ၵူၼ်းမဵဝ်းရုပိၼ်ႇတင်းလၢႆဢွၼ် ၵၼ်ၶိုၼ်းတႄႇႁဵတ်းဝဵင်း ႁေႇသၽုၼ်ႇ၊
၃၈ ဢေႇလႃႇလေႇၵိရိယသိမ်ႇ၊ ၼေႇပေႃႇ၊ ပႃႇလမေႃႇၼ၊ သိပမ လေႇၸိူဝ်းၼၼ်ႉလႄႈပၼ်ၸိုဝ်မႂ်ႇဢေႃႈ။
၃၉ ၵူၼ်းမဵဝ်းမႃႇၶိရ၊ဢၼ်ပဵၼ်လုၵ်ႈၸၢႆးမၼႃႇသေႇ၊ ၸိူဝ်းၼၼ်ႉဢွၼ်ၵႂႃႇၵႃႈတီႈဝဵင်းၵိလတ်ႉလႄႈ သိမ်းဢဝ်သေယဝ်ႉႁေႃႈၵူၼ်းမဵဝ်း ဢႃႇမေႃးရိ ဢၼ်မီးယူႇၵႃႈၼႂ်းမိူင်း ၼၼ်ႉဢွၵ်ႇပႅတ်ႈသေဢေႃႈ။
၄၀ မုဝ်းသေႇဢဝ်မိူင်းၵိလတ်ႉဢၢပ်ႈပၼ်တီႈၵူၼ်းမဵဝ်းမႃႇၶိရၸိူဝ်းၼၼ်ႉလႄႈ ၶဝ် ယူႇၵႃႈတီႈၼၼ်ႉဢေႃႈ။
၄၁ ယႃႇဢိရ ၵူၼ်းမဵဝ်းမၼႃႇသေႇၼၼ်ႉၵေႃႈၵႂႃႇလႄႈ သိမ်းဢဝ်ဝၢၼ်ႈမၼ်းဝဵင်းမၼ်းတင်းလၢႆသေယဝ်ႉ ႁွင်ႉႁိၵ်ႈၸိုဝ်ႁႃႇဝုတ်ႉယႃႇဢိရဢေႃႈ။ၼေႃႇပႃႇ ၵႂႃႇလႄႈသိမ်းဢဝ်ဝဵင်းၵေႇၼတ်ႉဢိၵ်ႇတင်းဝၢၼ်ႈမၼ်းတင်းလၢႆသေယဝ်ႉ ႁွင်ႉႁိၵ်ႈၸိုဝ်ၼေႃႇပႃႇၸွမ်းၸိုဝ်သဵင်တူဝ်ၸဝ်ႈၵဝ်ႇဢေႃႈ။