Chapter
၂၃
ၵႂၢမ်းပရေႃးၽႅတ်ႈပႃႇလမ်ပွၵ်ႈပထမ
၁ မိူဝ်ႈၼၼ်ႉၶုၼ်ပႃႇလမ်ႇ လၢတ်ႈတီႈၶုၼ်ပႃႇလၵ်ႉလႄႈဝႃႈ၊-တႄႇႁဵတ်းယိၸ်ႉပလၢင်ႇၸဵတ်းဢၼ်ၵႃႈတီႈၼႆႉပုၼ်ႈၵဝ်တႃႉ။ပွင်ႈႁႅၼ်းဝူဝ်းပေႃႈၸဵတ်းတူဝ်ဢိၵ်ႇတင်းသူဝ်းပေႃႈၸဵတ်းတူဝ်ပုၼ်ႈၵဝ်တႃႉ၊ ဝႃႈၼင်ႇၼႆလႄႈ၊
၂ ၶုၼ်ပႃႇလၵ်ႉၵေႃႈႁဵတ်းၸွမ်း ၵႃႈၼင်ႇဢၼ်ၶုၼ်ပႃႇလမ်ႇဝႃႈၼၼ်ႉသေယဝ်ႉ ၶုၼ်ပႃႇလၵ်ႉဢိၵ်ႇတင်းၶုၼ်ပႃႇလမ်ႇ ဢဝ်ဝူဝ်းယေႈတူဝ်သူဝ်းယေႈတူဝ်ပုၵ်ႉၸေႃႇ ၵႃႈၼိူဝ်ယိၸ်ႉပလၢင်ႇယေႈဢၼ်ဢေႃႈ။
၃ ၶုၼ်ပႃႇလမ်ႇလၢတ်ႈတီႈၶုၼ်ပႃႇလၵ်ႉလႄႈဝႃႈ၊-ၶုၼ်လူင်ၸုၵ်းယူႇၵႃႈတီႈႁိမ်းယိၸ်ႉဢၼ်တုတ်ႇၽႆးၼႆႉတႃႉ။ၵဝ်တၵ်းၵႂႃႇဢေႃႈ။ထႃႇဝရႃႉၽြႃးၸၢင်ႊတမေႃးထူပ်းႁၼ်ၵဝ်ယူႇဢေႃႈ။ၵဝ်တၵ်းၶိုၼ်းမွၵ်ႇလၢတ်ႈတီႈၶုၼ်လူင်ၵႃႈဢၼ်မၼ်းၸဝ်ႈၼႄပျႃးတီႈၵဝ်ၼၼ်ႉဢေႃႈ၊ဝႃႈၼင်ႇၼႆသေယဝ်ႉမၼ်းၶိုၼ်ႈၵႂႃႇၵႃႈၼိူဝ်လွႆဢေႃႈ။
၄ ၽြႃးပဵၼ်ၸဝ်ႈ ႁူပ်ႉထူပ်းၶုၼ်ပႃႇလမ်ႇသေယဝ်ႉၶုၼ်ပႃႇလမ်ႇလဝ်ႈလၢတ်ႈတီႈမၼ်းၸဝ်ႈလႄႈဝႃႈ၊-ၶႃႈၸဝ်ႈမႄးႁႅၼ်းယိၸ်ႉပလၢင်ႇၸဵတ်းဢၼ် သေလႄႈဢဝ်ဝူဝ်းပေႃႈယေႈတူဝ်ဢိၵ်ႇတင်း သူဝ်းပေႃႈယေႈတူဝ်ပုၵ်ႉၸေႃႇၵႃႈၼိူဝ်ယိၸ်ႉပလၢင်ႇယေႈဢၼ် တီႈၶႃႈ ယဝ်ႉဝႃႈၼင်ႇၼႆဢေႃႈ။
၅ ထႃႇဝရႃႉၽြႃးဢဝ်ၵႂၢမ်းသႂ်ႇဝႆႉၵႃႈတီႈသူပ်းၶုၼ်ပႃႇလမ်ႇသေလႄႈ မီးဢမိင်ႉလႄႈဝႃႈ၊-မႂ်းၶိုၼ်းမိူဝ်းၵႂႃႇၸူးၵႃႈတီႈၶုၼ်ပႃႇလၵ်ႉသေလႄႈ လၢတ်ႈၸိူဝ်ႉၼင်ႇၼႆတႃႉ၊ ဝႃႈၼင်ႇလႄႈ
၆ မိူဝ်ႈဢၼ်မၼ်းၶိုၼ်းမႃးၼၼ်ႉၸိုင် ထူပ်းႁၼ်ၶုၼ်လူင်ဢိၵ်ႇတင်းမူးမၢတ်ႈၽွင်းမိူင်းမေႃႇၽ တင်းသဵင်ႈတင်းလူင်ဢွၼ်ၵၼ်ၸုၵ်းယူႇၵႃႈတီႈႁိမ်း ယိၸ်ႉဢၼ်တုတ်ႇၽႆးၶုၼ်လူင်ၼၼ်ႉဢေႃႈ။
၇ မိူဝ်ႈၼၼ်ႉမၼ်းဢဝ်တင်းၵႂၢမ်းပရေႃးၽႅတ်ႈသေလႄႈဢွၵ်ႇသူပ်းဝႃႈ၊-ၶုၼ်ပႃႇလၵ်ႉႁွင်ႉဢဝ်ၵဝ်ဢွၵ်ႇသေၵႃႈၼႂ်းမိူင်းဢႃႇရမ်ႇလႄႈ ၶုၼ်ႁေႃၶမ်းမေႃႇၽ ႁွင်ႉဢဝ်ၵဝ်ဢွၵ်ႇသေၵႃႈတီႈလွႆၽၢႆႇဝၼ်းဢွၵ်ႇတင်းလၢႆလႄႈဝႃႈ၊-မႃးလႄႈၵိၼ်ႇလႃႇၵိၼ်ႇဝႃႈမဵဝ်းယႃႇၵုပ်ႉပုၼ်ႈၵဝ်သေၵမ်း။မႃႈလႄႈဢဝ်မဵဝ်းဢိသရေႇလႁွတ်ႈထိုင်တီႈတၢင်းလူႉတၢင်းလႅဝ်သေၵမ်း ဝႃႈၼင်ႇ ၼႆယဝ်ႉ။
၈ ၵဝ်တၵ်းႁဵတ်းႁိုဝ်ၵိၼ်ႇလႃႇၵိၼ်ႇဝႃႈၵေႃႉဢၼ်ၽြႃးပဵၼ်ၸဝ်ႈ ဢမ်ႇၵိၼ်ႇလႃႇဢမ်ႇၵိၼ်ႇဝႃႈၼၼ်ႉလႆႈၸိူဝ်ႉၼင်ႇႁိုဝ်။ၵဝ်တၵ်းဢဝ်ၵေႃႉဢၼ်ၽြႃးပဵၼ်ၸဝ်ႈ ဢမ်ႇဢဝ်ဢၢပ်ႈပၼ်တီႈတၢင်းလူႉတၢင်းလႅဝ်ၼၼ်ႉ ဢၢပ်ႈပၼ်တီႈတၢင်းလူႉတၢင်းလႅဝ်လႆႈ ၸိူဝ်ႉ ၼင်ႇႁိုဝ်။ၵဝ်ယူႇၵႃႈၼိူဝ်မၢၵ်ႇႁိၼ်သေလႄႈ ႁၼ်ၶဝ်ဢေႃႈ။
၉ ၵဝ်ယူႇၵႃႈတီႈၼိူဝ်လွႆသေလႄႈလူတူၺ်းၶဝ်ဢေႃႈ။ၵူၼ်းမဵဝ်းၼၼ်ႉယူႇႁင်းၵူၺ်းၶဝ်ဢေႃႈ။ၶဝ်ဢမ်ႇလေႃးလေး လူၺ်ႈၵၼ်တင်းၵူၼ်းတၢင်ႇၸိူဝ်ႉတၢင်ႇ မဵဝ်း။
၁၀ ၽူႈ လႂ်ၼပ်ႉဢၢၼ်ႇမုၼ်ႈလိၼ်မဵဝ်းယႃႇၵုပ်ႉလႆႈ။ၽူႈ လႂ်ၶပ်ႉလူၶပ်ႉတူၺ်းမဵဝ်းဢိသရေႇလ သီႇပုၼ်ႊပုၼ်ႊၼိုင်ႈလႆႈ။ႁႂ်ႈၵဝ်တၢႆမိူၼ်ၸိူဝ်ႉၼင်ႇဢၼ်ၵူၼ်းသိုဝ်ႈတေႃႇတၢႆၼၼ်ႉသေၵမ်းလူၺ်ႈ။ႁႂ်ႈတီႈသုတ်းတီႈၵွႆၵဝ်ပဵၼ်မိူၼ်ႈၸိူဝ်ႉၼင်ႇ တီႈသုတ်းတီႈၵွႆၶဝ်ၼၼ်ႉသေၵမ်း လူၺ်ႈ၊ဝႃႈၼင်ႇၼႆဢေႃႈ။
၁၁ ၶုၼ်ပႃႇလၵ်ႉၵေႃႈလၢတ်ႈတီႈၶုၼ်ပႃႇလမ်ႇလႄႈဝႃႈ၊-ၸဝ်ႈႁဵတ်းၸိူဝ်ႉၼင်ႇႁိုဝ်တီႈၵဝ်။ၵဝ်ႁွင်ႉၸဝ်ႈမႃးႁႂ်ႈၸဝ်ႈၵိၼ်ႇလႃႇၵိၼ်ႇဝႃႈ ရၢၼ်ႇသူႇၵဝ်ယဝ်ႉ။
၁၂ တူၺ်းလူႊ။ၸဝ်ႈသမ်ႉပၼ်တၢင်းလီတီႈၶဝ်လုမ်းလုမ်းယဝ်ႉလူင်ပေႇ၊ ဝႃႈၼင်ႇၼႆလႄႈ၊ၶုၼ်ပႃႇလမ်ႇၶိုၼ်းလၢတ်ႈဝႃႈ၊-ၸွင်ႇၵဝ်ဢမ်ႇလႆႈလၢတ်ႈၵႂၢမ်းဢၼ်ထႃႇဝရႃႉၽြႃး ဢဝ်သႂ်ႇဝႆႉၵႃႈတီႈသူပ်းၵဝ်ၼၼ်ႉႁိုဝ်၊ဝႃႈၼင်ႇၼႆဢေႃႈ။
ၵႂၢမ်းပရေႃးၽႅတ်ႈပႃႇလမ်ပွၵ်ႈတုတိယ
၁၃ ၶုၼ်ပႃႇလၵ်ႉလၢတ်ႈတီႈမၼ်းလႄႈဝႃႈ၊-ၸွမ်းၵဝ်ၵႂႃႇတၢင်ႇတီႈ၊တီႈဢၼ်ႁၼ်ၶဝ်လႆႈၼၼ်ႉသေၵမ်း။ၵူၺ်းၵႃႈ ဢမ်ႇလႆႈႁၼ်ၶဝ်တင်းသဵင်ႈလႄႈတၵ်းလႆႈတူၺ်းႁၼ်ပွတ်းၼိုင်ႈၵူၺ်းၼၼ်ႉဢေႃႈ။ၵိၼ်ႇလႃႇၵိၼ်ႇဝႃႈၶဝ်ၵႃႈတီႈၼၼ်ႉပုၼ်ႈၵဝ်သေၵမ်းဝႃႈၼင်ႇၼႆသေ လႄႈ
၁၄ ဢဝ်မၼ်းၵႂႃႇၵႃႈတီႈပၢင်ႇႁႆႊၸေႃႇၽိမ်ႇၵႃႈၼိူဝ်လွႆပိသၵႃႇလႄႈ တႄႇႁဵတ်းယိၸ်ႉပလၢင်ႇၸဵတ်းဢၼ်သေယဝ်ႉဢဝ်ဝူဝ်းယေႈတူဝ်ဢိၵ်ႇတင်း သူဝ်းပေႃႈယေႈတူဝ် ပုၵ်ႉၸေႃႇၵႃႈၼိူဝ်ယိၸ်ႉပလၢင်ႇယေႈဢၼ်ဢေႃႈ။
၁၅ မၼ်းလၢတ်ႈတီႈၶုၼ်ပႃႇလၵ်ႉလႄႈဝႃႈ၊-ၸုၵ်းယူႇၵႃႈတီႈၼႆႉႁိမ်းယိၸ်ႉဢၼ်တုတ်ႇၽႆးၶုၼ်လူင်ၼႆႉသေၵမ်း။ၵဝ်တၵ်းၵႂႃႇႁႂ်ႈလႆႈႁပ်ႉႁူဝ်တၢင်းထႃႇဝရႃႉၽြႃးၵႃႈ တီႈပုၼ်ႉဢေႃႈ၊ဝႃႈၼင်ႇၼႆဢေႃႈ။
၁၆ ထႃႇဝရႃႉၽြႃးထူပ်းၶုၼ်ပႃႇလမ်ႇလႄႈ ဢဝ်ၵႂၢမ်းသႂ်ႇၵႃႈတီႈသူပ်းမၼ်းသေ လႄႈမီးဢမိင်ႉဝႃႈ၊-
၁၇ ၶိုၼ်းမိူဝ်းၸူးၵႃႈတီႈၶုၼ်ပႃႇလၵ်ႉလႄႈ လၢတ်ႈၸိူဝ်ႉၼင်ၼႆတႃႉ၊ဝႃႈၼင်ႇၼႆသေယဝ်ႉ၊မိူဝ်ႈဢၼ်မၼ်းၶိုၼ်းမႃးၼၼ်ႉၸိုင်ၶုၼ်လူင်ဢိၵ်ႇတင်း မူးမၢတ်ႈၽွင်းမိူင်းမေႃႇၽတင်းလၢႆၼၼ်ႉၸုၵ်းယူႇၵႃႈတီႈႁိမ်းယိၸ်ႉဢၼ်တုတ်ႇၽႆးၼၼ်ႉဢေႃႈ။ၶုၼ်ပႃႇလၵ်ႉထၢမ်လႄႈဝႃႈ၊-ထႃႇဝရႃႉၽြႃးမီးဢမိင်ႉၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။
၁၈ မိူဝ်ႈၼၼ်ႉ မၼ်းဢဝ်တင်းၵႂၢမ်းပရေႃးၽႅတ်ႈသေလႄႈဢွၵ်ႇသူပ်းဝႃႈၸမ်း၊-ၶုၼ်ပႃႇလၵ်ႉဢိူၺ်း။လုၵ်ႉလႄႈငိၼ်းသေၵမ်း။
၁၉ လုၵ်ႈၸၢႆးၸိၽေႃႇဢိူၺ်း။ထွမ်ႇၵႂၢမ်းၵဝ်သေၵမ်း။ၽြႃးပဵၼ်ၸဝ်ႈၼၼ်ႉဢမ်ႇၸႂ်ႈၵူၼ်း၊ ဢမ်ႇလၢတ်ႈၵႂၢမ်းမူႉသႃႇ။မၼ်းၸဝ်ႈဢမ်ႇၸႂ်ႈလုၵ်ႈၵူၼ်း လႄႈဢမ်ႇမေႃလႅၵ်ႈလၢႆႈ။
၂၀ မၼ်းၸဝ်ႈမီးဢမိင်ႉသေယဝ်ႉယင်းဢမ်ႇႁဵတ်းၸွမ်းလႄႈဢမ်ႇယူႇ။မၼ်းၸဝ်ႈဝႆႉၵတိသေယဝ်ႉ ယင်းဢမ်ႇႁႂ်ႈၵတိၼၼ်ႉတႄႇၵေႃႈဢမ်ႇၸႂ်ႈ။တူၺ်းလူႊ။ၵဝ်လႆႈဢမိင်ႉႁႂ်ႈၵဝ်လႆႈပၼ်တၢင်းလီ ယဝ်ႉ။မၼ်းၸဝ်ႈပၼ်တၢင်းလီယဝ်ႉ။
၂၁ ၵဝ်ဢမ်ႇယႃႉတၢင်းလီၼၼ်ႉပႅတ်ႈလႆႈ။မၼ်းၸဝ်ႈဢမ်ႇတူၺ်းဢမ်ႇမၢတ်ႈလွင်ႈတၢင်းဢၼ်ဢမ်ႇတြႃးၵႃႈၼႂ်းမဵဝ်းယႃႇၵုပ်ႉ လွင်ႈတၢင်းဢၼ်ႁဵတ်းၶတ်းၶႅင်ႁႅင်းတႃႉ ၵႃႈၼႂ်းမဵဝ်းဢိသရေႇလၼၼ်ႉ။ထႃႇဝရႃႉၽြႃး၊ၽြႃးပဵၼ်ၸဝ်ႈမၼ်းၼၼ်ႉမီးယူႇလူၺ်ႈၵၼ်တင်းမၼ်းဢေႃႈ။သဵင်ဢၼ်ၶုၼ်ႁေႃၶမ်းႁွင်ႉပၢဝ်ႇႁွင်ႉသေႃႇၼၼ်ႉ လႆႈမီးယူႇၵႃႈၼႂ်း ၶဝ်ဢေႃႈ။
၂၂ ၽြႃးပဵၼ်ၸဝ်ႈၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးဢေႃႈ။မၼ်းၼၼ်ႉႁႅင်းယႂ်ႇၼႃႇမိူၼ်ၸိူဝ်ႉၼင်ႇၸူင်ဢၼ်ႁႅင်းယႂ်ႇၼႃႇၼၼ်ႉဢေႃႈ။ပိူဝ်ႈၼႆလႄႈဢမ်ႇဢဝ်တင်းဢတၢတ်ႈပိင်ႇၺႃႇဢၼ်လၢၵ်ႇလၢႆးၼၼ်ႉသေလႄႈ ပႄႉၼႅင်ႇမဵဝ်းယႃႇၵုပ်ႉလႆႈ။
၂၃ ဢမ်ႇဢဝ်တင်းဢတၢတ်ႈတၢင်းဢၼ်ၸေႃႉဢၼ်ႁဵတ်းၼၼ်ႉသေလႄႈ ပႄႉၼႅင်ႇမဵဝ်းဢိသရေႇလလႆႈ။တၵ်းဢွၼ်ၵၼ် ထွၵ်ႈလူၺ်ႈၶိင်ႇၵႃႇလႃႉမိူဝ်ႈလဵဝ်ၼႆႉသေလႄႈ မီးထုင်းမီးင်ႈဢၼ်ဢဝ်လွင်ႈမဵဝ်းယႃႇၵုပ်ႉမဵဝ်းဢိသရေႇလလႄႈဝႃႈ၊-ၽြႃးပဵၼ်ၸဝ်ႈႁဵတ်းၸိူဝ်ႉၼင်ႇႁိုဝ်ယဝ်ႉလူင်ပေႇ၊ဝႃႈၼင်ႇၼႆဢေႃႈ။
၂၄ ၵူၼ်းမဵဝ်းၼႆႉ တၵ်းလုၵ်ႉမိူၼ်ၸိူဝ်ႉၼင်ႇသၢင်ႇသီႈတူဝ်မေႈဢေႃႈ။တၵ်းယုၵ်ႉတူဝ်ၵွင်ႇတူဝ်မိူၼ်ၸိူဝ်ႉၼင်ႇသၢင်ႇသီႈတူဝ်ၼုမ်ဢေႃႈ။ပေႃးမၼ်းယင်းဢမ်ႇပႆႇလႆႈၵိၼ်တူဝ်ဢၼ်တီႉၺွပ်းလႆႈၼၼ်ႉလႄႈ ဢမ်ႇပႆႇလႆႈၸုပ်ႇၵိၼ်လိူတ်ႈတရိၵ်ႈသၢၼ်ႇၼၼ်ႉၸိုင် မၼ်းဢမ်ႇၶိုၼ်းမူပ်ႇၶိုၼ်း ၼွၼ်းလႃးလႃး၊ဝႃႈၼင်ႇၼႆဢေႃႈ။
၂၅ ၶုၼ်ပႃႇလၵ်ႉၵေႃႈလၢတ်ႈတီႈၶုၼ်ပႃႇလမ်ႇလႄႈဝႃႈ၊-ယႃႇပေၵိၼ်ႇလႃႇၵိၼ်ႇဝႃႈၶဝ်လႃးလႃးသေၵမ်း။တၢင်းလီၵေႃႈယႃႇပေပၼ်လႃးလႃးသေၵမ်း၊ ဝႃႈၼင်ႇၼႆသေယဝ်ႉ ၶုၼ်ပႃႇလမ်ႇၶိုၼ်းလၢတ်ႈတီႈၶုၼ်ပႃႇလၵ်ႉလႄႈဝႃႈ၊-
၂၆ ၵဝ်လႆႈလၢတ်ႈတီႈၶုၼ်လူင်ဝႆႉလႄႈဝႃႈ၊-ၵဝ်တၵ်းလႆႈႁဵတ်းၵႃႈၼင်ႇဢၼ် ထႃႇဝရႃႉၽြႃး မီးဢမိင်ႉၼၼ်ႉဢေႃႈ၊ဝႃႈၼင်ႇၼႆမႃးယဝ်ႉဢမ်ႇၸႂ်ႈႁိုဝ်၊ ဝႃႈၼင်ႇၼႆဢေႃႈ။
ၵႂၢမ်းပရေႃးၽႅတ်ႈပႃႇလမ်ပွၵ်ႈတတိယ
၂၇ ၶုၼ်ပႃႇလၵ်ႉ သမ်ႉၶိုၼ်းလၢတ်ႈတီႈၶုၼ်ပႃႇလမ်ႇလႄႈဝႃႈ၊-မႃးသေၵမ်း။ၵဝ်တၵ်းဢဝ်မႂ်းၵႂႃႇၵႃႈတီႈတၢင်ႇတီႈတၢင်ႇလႅၼ်လူးၵွၼ်ႇဢေႃႈ။
၂၈ ၽြႃးပဵၼ်ၸဝ်ႈၸၢင်ႊၶႄးမီးဢလူဝ်ႇမၼ်းၸဝ်ႈ ႁႂ်ႈမႂ်းလႆႈၵိၼ်ႇလႃႇၵိၼ်ႇဝႃႈၶဝ်ပုၼ်ႈၵဝ်ၵႃႈတီႈၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊ၶုၼ်ပႃႇလၵ်ႉ ဢဝ်ၶုၼ်ပႃႇလမ်ႇၵႂႃႇၵႃႈတီႈပၢႆၸိၵ်းလွႆပေႇၵုရ ဢၼ်ဝၢႆႇၼႃႈတေႃႇထိူၼ်ႇယေႇသိမုၼ်ႇၼၼ်ႉဢေႃႈ။
၂၉ ၶုၼ်ပႃႇလမ်ႇ ၵေႃႈလၢတ်ႈတီႈ ၶုၼ်ပႃႇလၵ်ႉလႄႈဝႃႈ၊-တႄႇႁဵတ်းယိၸ်ႉပလၢင်ႇၸဵတ်းဢၼ်ၵႃႈတီႈၼႆႉပုၼ်ႈၵဝ်တႃႉ။ပွင်ႁႅၼ်းဝူဝ်းပေႃႈၸဵတ်းတူဝ်ဢိၵ်ႇ တင်းသူဝ်းပေႃႈၸဵတ်းတူဝ်တႃႉ၊ဝႃႈၼင်ႇၼႆလႄႈ
၃၀ ၶုၼ်ပႃႇလၵ်ႉ ႁဵတ်းၸွမ်းၵႃႈၼင်ႇဢၼ်ၶုၼ်ပႃႇလမ်ႇဝႃႈၼၼ်ႉသေလႄႈ ဢဝ်ဝူဝ်းယေႈတူဝ်ဢိၵ်ႇတင်း သူဝ်းယေႈတူဝ် ပုၵ်ႉၸေႃႇၵႃႈၼိူဝ်ယိၸ်ႉပလၢင်ႇယေႈဢၼ်ဢေႃႈ။