Chapter
၃
ၵူၼ်းမဵဝ်းလေႇဝိ
၁ ဢထူၵ်ႉပၢတ်ႈတိၸိူဝ်ႉၶိူဝ်းဢႃႇရုၼ်ႇ တင်း မုဝ်းသေႇၼႂ်းမိူဝ်ႈဝၼ်းဢၼ်ထႃႇဝရႃႉၽြႃး ပၼ်ပျႃႇတိၵ်ႈတီႈ မုဝ်းသေႇၼိူဝ်လွႆသိၼႃႇၼၼ်ႉၸမ်း
၂ လုၵ်ႈၸၢႆးတူၼ်ႈဢႃႇရုၼ်ႇပဵၼ်ၼႃႇတပ်ႉဢၽိႁုဢေႇလႃႇၸႃႇ တင်း ဢိသမႃႇ ပဵၼ်လုၵ်ႈၸၢႆးဢွၼ်ႇဢေႃႈ။
၃ ၶဝ်လႆႈၶၢမ်ႇၽိၵ်ႈသိၵ်ႈလႄႈ ၶၢၼ်းဝႆႉၼႂ်းဢရႃႇယိတ်ႉပရေႃးႁိၵ်ႈႁႂ်ႈလႆႈပွင်ႁဵတ်းဢမူႉယိတ်ႉပရေႃးႁိၵ်ႈၼၼ်ႉဢေႃႈ။
၄ ၼႃႇတပ်ႉတင်းဢၽိႁုၼၼ်ႉ မိူဝ်ႈဢၼ်ၶဝ်ႁဵတ်းတၢင်းပုၵ်ႉၸေႃႇၽႆးဢၼ်ဢမ်ႇၸၢပ်ႈဢမ်ႇသႅင်ႇၼၼ်ႉ ၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉၸိုင် သွင်ၶႃတၢႆၵႃႈတီႈၽၢႆႇၼႃႈထႃႇဝရႃႉၽြႃး ၵႃႈၼႂ်းထိူၼ်ႇသိၼႃႇဢေႃႈ။သွင်ၶႃဢမ်ႇမီးလုၵ်ႈမီးလၢင်းလႄႈဢေႇလႃႇၸႃႇတင်းဢိသမႃႇ လႆႈပွင်ႁဵတ်းဢမူႉယိတ်ႉပရေႃးႁိၵ်ႈၵႃႈတီႈၽၢႆႇၼႃႈပေႃႈၶဝ်ဢႃႇရုၼ်ႇဢေႃႈ။
၅-၆ ထႃႇဝရႃႉၽြႃး မီးဢမိင်ႉတီႈမုဝ်းသေႇ လႄႈဝႃႈ၊-မႂ်းႁွင်ႉဢဝ်ၵူၼ်းမဵဝ်းလေႇဝိတင်းလၢႆမႃးသေလႄႈ ၶျႃးတီႈယူႇၶဝ်ပၼ်ၵႃႈတီႈႁိမ်းဢႃႇရုၼ်ႇ ႁႂ်ႈၶဝ်လႆႈပွင် ႁဵတ်းဢမူႉယိတ်ႉပရေႃးႁိၵ်ႈမၼ်းၼၼ်ႉတႃႉ။
၇ ၶဝ်ၼၼ်ႉတၵ်းလႆႈပႂ်ႉဢမူႉမၼ်းဢိၵ်ႇတင်း ဢမူႉပရိၵ်ႈသၢတ်ႈတင်းသဵင်ႈတင်းလူင် ၵႃႈတီႈၽၢႆႇၼႃႈသုမ်ႉထဵင်ၸဝ်ႈႁႂ်ႈလႆႈၵိုတ်းႁၢပ်ႇဢမူႉသုမ်ႉထဵင်ၸဝ်ႈဢေႃႈ။
၈ ၶဝ်တၵ်းလႆႈပွင်ႁဵတ်းဢမူႉ ဢၼ်လူတူၺ်းလုမ်းလႃးၶိူင်ႈပိူင်သုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈ ဢိၵ်ႇတင်းဢမူႉၵူၼ်းမဵဝ်းဢိသရေႇလ တင်းလၢႆႁႂ်ႈလႆႈၵိုတ်းႁၢပ်ႇဢမူႉသုမ်ႉထဵင်ၸဝ်ႈဢေႃႈ။
၉ မႂ်းတၵ်းလႆႈဢဝ်ၵူၼ်းမဵဝ်းလေႇဝိတင်းလၢႆဢၢပ်ႈပၼ်တီႈဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉဢေႃႈ။ၶဝ်ၼၼ်ႉပဵၼ်ဢၼ်ၼုၵ်ႈဢွၵ်ႇသေၵႃႈၼႂ်းၵူၼ်းမဵဝ်းဢိသရေႇလ တင်းလၢႆလႄႈပၼ် တီႈမၼ်းလုမ်းလုမ်းဢေႃႈ။
၁၀ ဢႃႇရုၼ်ႇတင်းလုၵ်ႈၸၢႆးမၼ်းၸိူဝ်းၼၼ်ႉၵေႃႈ မႂ်းတၵ်းလႆႈၶၢၼ်းဝႆႉလႄႈၶဝ်ၼၼ်ႉတၵ်းလႆႈပႂ်ႉဢမူႉယိၸ်ႉပရေႃးႁိၵ်ႈယူႇဢေႃႈ။ၵေႃႉဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းလႄႈ သုတ်ႉၸပ်းသုတ်ႉၸူးၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ၊ဝႃႈၼင်ႇၼႆဢေႃႈ။
၁၁-၁၂ ထႃႇဝရႃႉၽြႃးမီးဢမိင်ႉတီႈမုဝ်းသေႇလႄႈဝႃႈ၊-ၵွပ်ႈပိူဝ်ႈဢၼ်ၵဝ်ၼုၵ်ႈဢဝ် ၵူၼ်းမဵဝ်းလေႇဝိ ၸိူဝ်းၼၼ်ႉဢွၵ်ႇသေၵႃႈၼႂ်းၵူၼ်းမဵဝ်းဢိသရေႇလ တင်းလၢႆ ပုၼ်ႈတၢင်တူဝ်လုၵ်ႈတူၼ်ႈဢၼ်ၵိူတ်ႇလဵင်ႉမႃးဢွၼ်တၢင်းၵႃႈတီႈၵူၼ်းမဵဝ်းဢိသရေႇလ တင်းလၢႆၼၼ်ႉလႄႈ ၵူၼ်းမဵဝ်းလေႇဝိၸိူဝ်းၼၼ်ႉပဵၼ်ၵူၼ်းၵဝ် ဢေႃႈ။
၁၃ လွင်ႈမၼ်းၸမ်းလုၵ်ႈၸၢႆးတူၼ်ႈတင်းလၢႆပဵၼ်ၵူၼ်းၵဝ်ဢေႃႈ။မိူဝ်ႈဝၼ်းဢၼ်ၵဝ်ပၼ်တၢမ်ႇတီႈလုၵ်ႈၸၢႆးတူၼ်ႈၵႃႈမီး ၵႃႈၼႂ်းမိူင်းဢေႇၵႅပ်ႉတုၼၼ်ႉၸိုင်ၵႃႈၼႂ်းၵူၼ်းမဵဝ်းဢိသရေႇလ တင်းလၢႆ ပဵၼ်ၵူၼ်းၸၢႆးသေဢမ်ႇဝႃႈ ပဵၼ်တရိၵ်ႈသၢၼ်ႇသေဢမ်ႇဝႃႈ ၵဝ်ႁႂ်ႈလုၵ်ႈၸၢႆးတူၼ်ႈတင်းသဵင်ႈတင်းလူင် မူတ်းၸၢင်ႇဝႆႉပုၼ်ႈၵဝ်ဢေႃႈ။ၶဝ်ၼၼ်ႉပဵၼ်ဢုၵ်ႉၸႃႇၵဝ်ဢေႃႈ။ၵဝ်ပဵၼ်ထႃႇဝရႃႉၽြႃးဢေႃႈ၊ဝႃႈၼင်ႇၼႆဢေႃႈ။
၁၄ ထႃႇဝရႃႉၽြႃး သမ်ႉမီးဢမိင်ႉတီႈ မုဝ်းသေႇ ၵႃႈၼႂ်းထိူၼ်ႇသိၼႃႇလႄႈဝႃႈ၊-ၼပ်ႉဢၢၼ်ႇၵူၼ်းမဵဝ်းလေႇဝိတင်းလၢႆၸွမ်းလူၺ်ႈမဵဝ်းပူႇမဵဝ်းပေႃႈၶဝ် မဵဝ်းပီႈမဵဝ်း ၼွင်ႉၸိူဝ်ႉၶိူဝ်းၶဝ်ၼၼ်ႉတႃႉ။
၁၅ မႂ်းတၵ်းလႆႈၼပ်ႉဢၢၼ်ႇၵူၼ်းၸၢႆး ၵႃႈဢၼ်ဢသၢၵ်ႈလႆႈ လိူၼ်ၼိုင်ႈ လိူဝ်လိူၼ်ၼိုင်ႈၵႂႃႇၸိူဝ်းၼၼ်ႉဢေႃႈ၊ ဝႃႈၼင်ႇၼႆလႄႈ
၁၆ မုဝ်းသေႇ ၵေႃႈၸွမ်းၼင်ႇၵႂၢမ်းထႃႇဝရႃႉၽြႃးၼၼ်ႉၼပ်ႉဢၢၼ်ႇၶဝ် ၵႃႈၼင်ႇဢၼ်မၼ်းၸဝ်ႈသင်ႇလၢတ်ႈဝႆႉၼၼ်ႉဢေႃႈ။
၁၇ ၸိုဝ်ႈသဵင်လုၵ်ႈၸၢႆးလေႇဝိၸိူဝ်းၼၼ်ႉၸမ်းပဵၼ်ၵေႇရသုၼ်ႇ၊ၵေႃႇႁတ်ႉ၊မေႇရႃႇရိ၊ ဢေႃႈ။
၁၈ ၸိုဝ်သဵင်လုၵ်ႈၸၢႆးၵေႇရသုၼ်ႇ ဢၼ်ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်ၼၼ်ႉၸမ်း ပဵၼ်လိပၼိတင်း သိမိဢေႃႈ။
၁၉ ၸိုဝ်သဵင်လုၵ်ႈၸၢႆးၵေႃႇႁတ်ႉဢၼ်ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်ၼၼ်ႉၸမ်း ပဵၼ်ဢႃႇမရမ်ႇ၊ဢိၸႁႃႇ၊ႁေႇပုၼ်ႇ၊ ဢေႃႇၸေႇလဢေႃႈ။
၂၀ ၸိုဝ်သဵင်လုၵ်ႈၸၢႆးမေႇရႃႇရိ ဢၼ်ၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၼၼ်ႉၸမ်း ပဵၼ်မႁႃႇလိတင်းမုသိဢေႃႈ။ၶဝ်ၸိူဝ်းၼႆႉပဵၼ်မဵဝ်းပီႈမဵဝ်းၼွင်ႉၸိူဝ်ႉၶိူဝ်းလေႇဝိၸွမ်းလူၺ်ႈမဵဝ်းပူႇမဵဝ်းပေႃႈၶဝ်ၼၼ်ႉဢေႃႈ။
၂၁ မဵဝ်းပီႈမဵဝ်းၼွင်ႉၸိူဝ်ႉၶိူဝ်းလိပၼိ တင်းမဵဝ်းပီႈမဵဝ်းၼွင်ႉၸိူဝ်ႉၶိူဝ်းသိမိ ဢၼ်သိုပ်ႇလူင်းမႃးၵႃႈတီႈၵေႇရသုၼ်ႇ ၸိူဝ်းၼၼ်ႉ ပဵၼ်မဵဝ်းပီႈမဵဝ်းၼွင်ႉၸိူဝ်ႉၶိူဝ်းၵေႇရသုၼ်ႇဢေႃႈ။
၂၂ ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ၼပ်ႉဢၢၼ်ႇၸွမ်းလူၺ်ႈတၢင်းဢၼ်ၼပ်ႉဢၢၼ်ႇၵူၼ်းၸၢႆး ဢၼ်ဢသၢၵ်ႈလႆႈလိူၼ်ႈၼိုင်ႈလႄႈ လိူဝ်လိူၼ်ၵႂႃႇၼၼ်ႉတင်းသဵင်ႈတင်းလူင်ဢၼ်ဝႃႈၵႃႈဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၸိူဝ်းၼၼ်ႉၸမ်း မီးၸဵတ်းႁဵင်ပၢႆႁႃႈ ပၢၵ်ႇဢေႃႈ။
၂၃ မဵဝ်းပီႈမဵဝ်းၼွင်ႉၸိူဝ်ႉၶိူဝ်းၵေႇရသုၼ်ႇၼၼ်ႉတၵ်းလႆႈၶျႃးတီႈယူႇ ၽၢႆႇတၢင်းလင်သုမ်ႉထဵင်ၸဝ်ႈၵႃႈတီႈၼႃႈဝၼ်းတူၵ်းဢေႃႈ။
၂၄ ၵူၼ်းလူင်ဢၼ်ပဵၼ်ငဝ်ႈမဵဝ်းၸိူဝ်ႉၶိူဝ်းၵေႇရသုၼ်ႇ ၼၼ်ႉၸမ်း ပဵၼ်ဢေႇ လျႃႇသပ်ႉလုၵ်ႈၸၢႆးလေႇလဢေႃႈ။
၂၅ ပုၼ်ႈတႃႇဢၼ်ၵူၼ်းမဵဝ်းၵေႇရသုၼ်ႇ တင်းလၢႆ တၵ်းလႆႈလူတူၺ်းလုမ်းလႃးၵႃႈတီႈသုမ်ႉထဵင်သုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈၼၼ်ႉၸမ်း ပဵၼ်သုမ်ႉထဵင်ၸဝ်ႈဢိၵ်ႇတင်းသုမ်ႉထဵင်မၼ်း ဢၼ်ႁူမ်ႇသုမ်ႇမၼ်း ၽႃႈၵင်ႈဢၼ်ၵင်ႈၵႃႈတီႈႁူးၽၵ်းတူသုမ်ႉထဵင်ၸဝ်ႈ တီႈၸူႉတီႈ တုမ်ပရိၵ်ႈသၢတ်ႈ
၂၆ ၽႃႈၵင်ႈႁူဝ်ႉဝၢင်း တင်းၽႃႈၵင်ႈဢၼ်ၵင်ႈၵႃႈတီႈႁူးၽၵ်းတူႁူဝ်ႉဝၢင်းဢၼ်လဵပ်ႈႁွပ်ႈသုမ်ႉထဵင်ၸဝ်ႈတင်းယိၸ်ႉပလၢင်ႇၼၼ်ႉ တင်းၸိူၵ်ႈတင်းလၢႆ ပုၼ်ႈတၵ်းဢဝ်ပွင်ႁဵတ်းဢမူႉမၼ်းၵူႈၸိူဝ်ႉၵူႈပိူင်ဢေႃႈ။
၂၇ မဵဝ်းပီႈမဵဝ်းၼွင်ႉၸိူဝ်ႉၶိူဝ်းဢႃႇမရမ်ႇ ဢိၵ်ႇတင်းမဵဝ်းပီႈမဵဝ်းၼွင်ႉၸိူဝ်ႉၶိူဝ်းဢိၸႁႃႇတင်းမဵဝ်းပီႈမဵဝ်းၼွင်ႉၸိူဝ်ႉၶိူဝ်းႁေႇပုၼ်ႇ တင်းမဵဝ်းပီႈမဵဝ်းၼွင်ႉၸိူဝ်းၶိူဝ်းဢေႃႇၸေႇလ ဢၼ်သိုပ်ႇတၢမ်ႈလူင်းမႃးၵႃႈတီႈၵေႃႇႁတ်ႉၸိူဝ်းၼၼ်ႉ ပဵၼ်မဵဝ်းပီႈမဵဝ်းၼွင်ႉၸိူဝ်ႉၶိူဝ်းဢေႃႇႁတ်ႉ ဢေႃႈ။
၂၈ ၸွမ်းလူၺ်ႈတၢင်းဢၼ်ၼပ်ႉဢၢၼ်ႇၵူၼ်းၸၢႆးဢၼ်ဢသၢၵ်ႈလႆႈလိူၼ်ၼိုင်ႈလႄႈ လိူဝ်လိူၼ်ၼိုင်ႈၵႂႃႇတင်းသဵင်ႈတင်းလူင်ၼၼ်ႉသေလႄႈ ၶဝ်ၸိူဝ်းဢၼ်လႆႈလူတူၺ်းလုမ်းလႃးထႃႇၼႃႉတီႈမူတ်းၸၢင်ႇ ၸဝ်ႈၼၼ်ႉၸမ်းမီးပႅတ်ႇႁဵင်ပၢႆႁူၵ်းပၢၵ်ႇဢေႃႈ။
၂၉ မဵဝ်းပီႈမဵဝ်းၼွင်ႉၸိူဝ်ႉၶိူဝ်းၵေႃႇႁတ်ႉ ၸိူဝ်းၼၼ်ႉတၵ်းလႆႈၶျႃးတီႈယူႇၶဝ်ၵႃႈတီႈၽၢႆႇၼႃႈတၢင်းၸၢၼ်း သုမ်ႉထဵင်ၸဝ်ႈ ဢေႃႈ။
၃၀ ၵူၼ်းလူင်ဢၼ်ပဵၼ်ငဝ်ႈမဵဝ်းၸိူဝ်ႉၶိူဝ်းၵေႃႇႁတ်ႉၸမ်းပဵၼ်ဢေႇလိၸႃႇၽၼ်ႇ လုၵ်ႈၸၢႆးဢေႃႇၸေႇ လဢေႃႈ။
၃၁ ပုၼ်ႈတႃႇဢၼ်ၶဝ်တၵ်းလႆႈလူတူၺ်းလုမ်းလႃးၼၼ်ႉၸမ်းပဵၼ်တိူၵ်ႈတႃႇၸဝ်ႈ ၶူင်ႇတီႈၵိၼ်ၶူင်ႇတီႈတႆႈၽႆးယိၸ်ႉပလၢင်ႇတင်းလၢႆ ၶိူင်ႈပိူင်ထႃႇၼႃႉတီႈမူတ်းၸၢင်ႇၸဝ်ႈ ပုၼ်ႈဢၼ်တၵ်းၵိုတ်းႁၢပ်ႇဢမူႉၼၼ်ႉၸိူဝ်းၼၼ်ႉၽႃႈၵင်ႈတၢင်းၼႂ်း ၵႃႈဢၼ်ဢဝ်ပွင် ဢဝ်ႁဵတ်းဢမူႉၸိူဝ်းၼၼ်ႉဢေႃႈ။
၃၂ ဢေႇလႃႇၸႃႇဢၼ်ပဵၼ်လုၵ်ႈၸၢႆးယိတ်ႉပရေႃးႁိၵ်ႈဢႃႇရုၼ်ႇ ၼၼ်ႉတၵ်းလႆႈပဵၼ်ၵူၼ်းလူင် ဢၼ်ဢုပ်ႉၵႃႈၼိူဝ်ၵူၼ်းလူင်ဢၼ်ပဵၼ်ငဝ်ႈမဵဝ်းၸိူဝ်ႉၶိူဝ်းလေႇဝိ ၸိူဝ်းၼၼ်ႉလႄႈလူတူၺ်းၸီႇယၢင်ႇ ၶဝ်ၸိူဝ်းဢၼ်လူတူၺ်းလုမ်းလႃးထႃႇၼႃႉ တီႈမူတ်းၸၢင်ႇၸဝ်ႈဢေႃႈ။
၃၃ မဵဝ်းပီႈမဵဝ်းၼွင်ႉၸိူဝ်ႉၶိူဝ်းမႁႃႇလိတင်းမဵဝ်းပီႈမဵဝ်းၼွင်ႉၸိူဝ်ႉၶိူဝ်းမုသိ ဢၼ်သိုပ်ႇလူင်းမႃးၵႃႈတီႈမေႇရႃႇရိ ၸိူဝ်းၼၼ်ႉပဵၼ်မဵဝ်းပီႈမဵဝ်း ၼွင်ႉၸိူဝ်ႉၶိူဝ်းမေႇရႃႇရိဢေႃႈ။
၃၄ ၶဝ်ၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ၼပ်ႉဢၢၼ်ႇ ၸွမ်းလူၺ်ႈတၢင်းဢၼ်ၼပ်ႉဢၢၼ်ႇဢၼ် ၵူၼ်းၸၢႆးဢၼ်ဢသၢၵ်ႈလႆႈလိူၼ်ၼိုင်ႈလႄႈ လိူဝ်လိူၼ်ၼိုင်ႈၵႂႃႇၼၼ်ႉတင်းသဵင်ႈတင်း လူင်ၸမ်း၊မီးႁူၵ်းႁဵင်ပၢႆသွင်ပၢၵ်ႇဢေႃႈ။
၃၅ ၵူၼ်းဢၼ်ပဵၼ်ငဝ်ႈမဵဝ်းၸိူဝ်ႉၶိူဝ်းမေႇရႃႇရိၼၼ်ႉၸမ်း ပဵၼ်ၸုရေႇလလုၵ်ႈၸၢႆးဢၽိႁေႇလဢေႃႈ။ၶဝ်ၸိူဝ်းၼႆႉတၵ်းၶျႃးတီႈယူႇၶဝ်ၵႃႈတီႈၽၢႆႇၼႃႈတၢင်းႁွင်ႇ သုမ်ႉထဵင်ၸဝ်ႈ ဢေႃႈ။
၃၆ ပုၼ်ႈတႃႇၵူၼ်းမေႇရႃႇရိၸိူဝ်းၼၼ်ႉတၵ်းလႆႈပႂ်ႉလူပႂ်ႉတူၺ်းလုမ်းလႃးၼၼ်ႉၸမ်းပဵၼ်ပႅၼ်ႈသုမ်ႉထဵင်ၸဝ်ႈ လႂ်သေႊမၼ်း လႂ် သဝ်မၼ်း လႂ်တီႈသုပ်းတိၼ်မႂ်း လႂ်ၶိူင်ႈပိူင်မၼ်း လႂ် ဢၼ်ဢဝ်ပွင်ဢဝ်ႁဵတ်းဢမူႉမၼ်းၵူႈ ၸိူဝ်ႉၵူႈပိူင် လႂ်၊
၃၇ ဢိၵ်ႇတင်းသဝ်ႁူဝ်ႉဝၢင်း ဢၼ်လဵပ်ႈႁွပ်ႈၼၼ်ႉ လႂ်တီႈသုပ်းတိၼ်မၼ်း လႂ် လၵ်းမၼ်း လႂ်တင်း ၸိူၵ်ႈမၼ်း လႂ်ၸိူဝ်းၼၼ်ႉဢေႃႈ။
၃၈ ၶဝ်ၸိူဝ်းဢၼ်တၵ်းလႆႈလူတူၺ်းလုမ်းလႃးထႃႇၼႃႉတီႈမူတ်းၸၢင်ႇပုၼ်ႈဢၼ်ၵူၼ်းမဵဝ်းဢိသရေႇလ ထုၵ်ႇလီလူတူၺ်းလုမ်းလႃးၼၼ်ႉသေလႄႈ ၶျႃးတီႈယူႇၶဝ်ယူႇၵႃႈတီႈၽၢႆႇၼႃႈသုမ်ႉထဵင်ၸဝ်ႈ ၽၢႆႇၼႃႈဝၼ်းဢွၵ်ႇၵႃႈတီႈၽၢႆႇၼႃႈသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈၽၢႆႇၵၢင်ဝၼ်းဢွၵ်ႇၼၼ်ႉၸမ်း ပဵၼ်မုဝ်းသေႇ ဢိၵ်ႇတင်း ဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉဢေႃႈ။ၵေႃႉဢၼ်ပဵၼ်ၵူၼ်းတၢင်ႇၸိူဝ်ႉတၢင်ႇၶိူဝ်းလႄႈသုတ်ႉၸပ်းသုတ်ႉၸူးၼၼ်ႉ တၵ်းလႆႈၶၢမ်ႇတၢင်းဢၼ် ဢဝ်တၢႆဢေႃႈ။
၃၉ ၵူၼ်းမဵဝ်းလေႇဝိၸွမ်းလူၺ်ႈမဵဝ်းပီႈမဵဝ်းၼွင်ႉၸိူဝ်ႉၶိူဝ်းၶဝ်ၼၼ်ႉလႄႈလႆႈၶၢမ်ႇတၢင်းဢၼ် မုဝ်းသေႇတင်းဢႃႇရုၼ်ႇ ၼပ်ႉဢၢၼ်ႇၸွမ်းၵႃႈၼင်ႇဢၼ်ထႃႇဝရႃႉၽြႃး သင်ႇလၢတ်ႈဝႆႉ ဢၼ်ဝႃႈ ၵူၼ်းၸၢႆးဢၼ်ဢသၢၵ်ႈလႆႈလိူၼ်ၼိုင်ႈလႄႈ လိူဝ်လိူၼ်ၼိုင်ႈၵႂႃႇတင်းသဵင်ႈတင်းလူင်ၼၼ်ႉၸမ်း မီးသွင်မိုၼ်ႇပၢႆသွင်ႁဵင်ႈဢေႃႈ။
၄၀ ထႃႇဝရႃႉၽြႃး မီးဢမိင်ႉတီႈ မုဝ်းသေႇ လႄႈဝႃႈ၊-ၼပ်ႉဢၢၼ်ႇလုၵ်ႈၸၢႆးတူၼ်ႈ ဢၼ်ဢသၢၵ်ႈလႆႈလိူၼ်ၼိုင်ႈလႄႈ လိူဝ်လိူၼ်ၼိုင်ႈၵႂႃႇၼၼ်ႉၵႃႈၼႂ်းၵူၼ်းမဵဝ်း ဢိသရေႇလတင်းလၢႆသေလႄႈဢဝ်ၸရၢင်းတႃႉ။
၄၁ ဢဝ်ၵူၼ်းမဵဝ်းလေႇဝိ ၸိူဝ်းၼၼ်ႉ တၢင်ႈတူဝ်လုၵ်ႈၸၢႆးတူၼ်ႈၵူၼ်းမဵဝ်းဢိသရေႇလ တင်းလၢႆဢိၵ်ႇတင်းတရိၵ်ႈသၢၼ်ႇ ဢၼ်မီးၵႃႈတီႈၵူၼ်းမဵဝ်းလေႇဝိ ၸိူဝ်းၼၼ်ႉ တၢင်ႈတူဝ် လုၵ်ႈၸၢႆးတူၼ်ႈ တရိၵ်ႈသၢၼ်ႇဢၼ်မီးၵႃႈတီႈၵူၼ်းမဵဝ်းဢိသရေႇလ တင်းလၢႆၼၼ်ႉ ပုၼ်ႈၵဝ်တႃႉ။
၄၂ ၵဝ်ပဵၼ်ထႃႇဝရႃႉၽြႃးဢေႃႈ၊ဝႃႈၼင်ႇၼႆလႄႈ မုဝ်းသေႇၼပ်ႉဢၢၼ်ႇလုၵ်ႈၸၢႆးတူၼ်ႈၵူၼ်းမဵဝ်းဢိသရေႇလ တင်းလၢႆၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၼၼ်ႉလႄႈ
၄၃ ၸွမ်းၸိုဝ်ၸွမ်းသဵင်သေလႄႈ လုၵ်ႈၸၢႆးတူၼ်ႈၵႃႈဢၼ်ဢသၢၵ်ႈလႆႈလိူၼ်ၼိုင်ႈလႄႈ လိူဝ်လိူၼ်ၼိုင်ႈၵႂႃႇဢၼ်လႆႈၶၢမ်ႇတၢင်းဢၼ်ၼပ်ႉဢၢၼ်ႇၼၼ်ႉၸမ်း မီးသွင်မိုၼ်ႇသွင်ႁဵင်သွင်ပၢၵ်ႇၸဵတ်းသိပ်းပၢႆသၢမ်ဢေႃႈ။
၄၄ ထႃႇဝရႃႉၽြႃးသမ်ႉမီးဢမိင်ႉတီႈမုဝ်းသေႇလႄႈဝႃႈ၊-
၄၅ ဢဝ်ၵူၼ်းမဵဝ်းလေႇဝိ တင်းလၢႆတင်းလုၵ်ႈၸၢႆးတူၼ်ႈၵူၼ်းမဵဝ်းဢိသရေႇလ တင်းသဵင်ႈတင်းလူင်ဢိၵ်ႇတင်းတရိၵ်ႈသၢၼ်ႇဢၼ်မီးၵႃႈတီႈၵူၼ်းမဵဝ်းလေႇဝိ ၸိူဝ်းၼၼ်ႉ တင်းတူဝ်တရိၵ်ႈသၢၼ်ႇဢၼ်မီးၵႃႈတီႈၵူၼ်းမဵဝ်းဢိသရေႇလတင်းလၢႆၼၼ်ႉတႃႉ။ၵူၼ်းမဵဝ်းလေႇဝိၸိူဝ်းၼၼ်ႉတၵ်းလႆႈပဵၼ်ဢုၵ်ႉၸႃႇၵဝ်ဢေႃႈ။ၵဝ်ပဵၼ် ထႃႇဝရႃႉၽြႃးဢေႃႈ။
၄၆ လွင်ႈဢၼ်တၵ်းလႆႈထုတ်ႇဢဝ်လုၵ်ႈၸၢႆးတူၼ်ႈၵူၼ်းမဵဝ်းဢိသရေႇလ သွင်ပၢၵ်ႇၸဵတ်းသိပ်းပၢႆသၢမ်ၵေႃႉ ဢၼ်လိူဝ်တွၼ်းသေၵူၼ်းမဵဝ်းလေႇဝိၵႂႃႇၸိူဝ်းၼၼ်ႉၸမ်း မႂ်းတၵ်းလႆႈၶၢမ်ႇဢဝ်တီႈယေႈ ၵေႃႉၵျၢပ်ႈသၶေႇလႁႃႈၵျၢပ်ႈဢေႃႈ။
၄၇ ၸွမ်းလူၺ်ႈၼမ်ႉၼၵ်းငိုၼ်းၸဝ်ႈ ၵျၢပ်ႈသၶေႇလၼၼ်ႉသေလႄႈ မႂ်းတၵ်းလႆႈၶၢမ်ႇဢေႃႈ။ၵျၢပ်ႈၼိုင်ႈၼၼ်ႉၸမ်းမီးသၢဝ်း ၵေႇရဢေႃႈ။
၄၈ မႂ်းတၵ်းလႆႈဢဝ်ငိုၼ်းၵႃႈၶၼ်ဢၼ်ဢဝ်ထုတ်ႇဢဝ် ၶဝ်ၸိူဝ်းဢၼ်လိူဝ်တွၼ်းၵႂႃႇတင်းလၢႆၼၼ်ႉလႄႈ ပၼ်တီႈဢႃႇရုၼ်ႇတင်းလုၵ်ႈၸၢႆးမၼ်း ၸိူဝ်းၼၼ်ႉဢေႃႈ၊ဝႃႈၼင်ႇၼႆလႄႈ
၄၉ မုဝ်းသေႇ ဢဝ်ငိုၼ်းၵႃႈၶၼ် ဢၼ်ထုတ်ႇဢဝ် ၶဝ်ၸိူဝ်းဢၼ်လိူဝ်တွၼ်းသေ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၵူၼ်းမဵဝ်းလေႇဝိ ၸိူဝ်းၼၼ်ႉလႆႈထုတ်ႇဢဝ်ၼၼ်ႉဢေႃႈ။
၅၀ မၼ်းဢဝ်ငိုၼ်းၼၼ်ႉ တီႈလုၵ်ႈၸၢႆးတူၼ်ႈၵူၼ်းမဵဝ်းဢိသရေႇလတင်းလၢႆၸိူဝ်းၼၼ်ႉဢၼ်ဝႃႈ ၵျၢပ်ႈသၶေႇလႁဵင်ၼိုင်ႈသၢမ်ပၢၵ်ႇႁူၵ်းသိပ်းပၢႆႁႃႈၵျၢပ်ႈၸွမ်းလူၺ်ႈၼမ်ႉၼၵ်းငိုၼ်းၸဝ်ႈၵျၢပ်ႈသၶေႇလၼၼ်ႉ သေ ယဝ်ႉ
၅၁ မုဝ်းသေႇၼၼ်ႉဢဝ်ငိုၼ်းၵႃႈၶၼ် ဢၼ်ထုတ်ႇဢဝ်ၼၼ်ႉပၼ်တီႈဢႃႇရုၼ်ႇ တင်းလုၵ်ႈၸၢႆးမၼ်းၸိူဝ်းၼၼ်ႉ ၸွမ်းၼင်ႇၵႂၢမ်းထႃႇဝရႃႉၽြႃးၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၼၼ်ႉဢေႃႈ။