Chapter
၃၀
ၵတိသႅတ်ႉၸႃႇ
၁ မုဝ်းသေႇ သင်ႇလၢတ်ႈတီႈၶဝ်ၸိူဝ်းဢၼ်ပဵၼ်ၵူၼ်းယႂ်ႇၵူၼ်းလူင် ၵႃႈၼိူဝ်မဵဝ်းတင်းလၢႆၵႃႈၼႂ်းၵူၼ်းမဵဝ်းဢိသရေႇလၸိူဝ်းၼၼ်ႉလႄႈဝႃႈ၊-ၵႂၢမ်းဢၼ်ထႃႇဝရႃႉၽြႃး သမ်ႉမီးဢမိင်ႉလႄႈဝႃႈၸမ်း၊-
၂ ပေႃးၵူၼ်းၸၢႆးႁဵတ်းၵတိသႅတ်ႉၸႃႇတီႈထႃႇဝရႃႉၽြႃး ဢမ်ႇၼၼ်ပေႃးမၼ်းႁဵတ်းတၢင်းဢၼ်ၵိၼ်ႇဢၼ်ဝႃႈလႄႈ မတ်ႉၽုၵ်ႇဝႆႉၼႂ်းၸႂ်မၼ်းၸိုင် မၼ်းဢမ်ႇလႆႈႁႂ်ႈၵႂၢမ်းဢၼ်မၼ်းလၢတ်ႈမၼ်းဝႃႈၼၼ်ႉလႆႈလူႉလႄႈ မၼ်းတၵ်းလႆႈႁဵတ်းၸွမ်းၵႃႈၼင်ႇဢၼ်ဢွၵ်ႇသူပ်းမၼ်းၼၼ်ႉဢေႃႈ။
၃ မိူဝ်ႈဢၼ်မေႈယိင်းဢသၢၵ်ႈယင်းလဵၵ်ႉလႄႈ ယူႇၵႃႈတီႈႁိူၼ်းပေႃႈမၼ်းယူႇၼၼ်ႉပေႃးမၼ်းႁဵတ်းၵတိသႅတ်ႉၸႃႇတီႈထႃႇဝရႃႉၽြႃးလႄႈ မတ်ႉၽုၵ်ႈဝႆႉၼႂ်းၸႂ် မၼ်းလႄႈ
၄ ပေႃးမၼ်းလႆႈငိၼ်းၵႂၢမ်းသႅတ်ႉၸႃႇၼၼ်ႉဢိၵ်ႇတင်းၵႂၢမ်းဢၼ်မတ်ႉၽုၵ်ႈၼႂ်းၸႂ်မၼ်းၼၼ်ႉလႄႈ ယူႇတဵတ်ႇတဵတ်ႇယူႇၸိုင်ၵႂၢမ်းသႅတ်ႉၸႃႇမၼ်းၵႃႈမီးၼၼ်ႉတၵ်းလႆႈတႄႇလႄႈ ၵႂၢမ်းဢၼ်မၼ်းမတ်ႉၽုၵ်ႈၼႂ်းၸႂ်မၼ်းဝႆႉၵူႈၸိူဝ်ႉၵူႈပိူင်ၼၼ်ႉ တၵ်းလႆႈတႄႇ ဢေႃႈ။
၅ ဢမ်ႇၼၼ်ၵေႃႈပေႃးပေႃႈမၼ်းႁၢမ်ႈတၢပ်ႈႁႄႉၶႅၼ်ၼႂ်းဝၼ်းဢၼ်လႆႈငိၼ်းၼၼ်ႉၸိုင် ၵႂၢမ်းသႅတ်ႉၸႃႇဢၼ် လႂ်သေဢမ်ႇဝႃႈ ၵႂၢမ်းဢၼ်မၼ်းမတ်ႉၽုၵ်ႈၼႂ်းၸႂ်မၼ်းဝႆႉဢၼ် လႂ်ၵေႃႈတၵ်းဢမ်ႇလႆႈတႄႇ။ထႃႇဝရႃႉၽြႃး တၵ်းပွႆႇလွတ်ႈၵွပ်ႈပိူဝ်ႈဢၼ်ပေႃႈမၼ်းႁၢမ်ႈတၢပ်ႈႁႄႉၶႅၼ်ၼၼ်ႉဢေႃႈ။
၆ ပေႃးမေႈယိင်းႁဵတ်းၵတိသႅတ်ႉၸႃႇ ဢမ်ႇၼၼ် ဝႃႈဢွၵ်ႇသူပ်း ႁႂ်ႈလႆႈမတ်ႉၽုၵ်ႈၼႂ်းၸႂ်မၼ်းဝႆႉသေယဝ်ႉဢဝ် ၽူဝ်လႄႈ
၇ ၽူဝ်မၼ်းၼၼ်ႉငိၼ်းလွင်ႈမၼ်းတင်းမၼ်းလႄႈ ယူႇတဵတ်ႇတဵတ်ႇယူႇၼႂ်းဝၼ်းဢၼ်လႆႈငိၼ်းၼၼ်ႉၸိုင် ၵႂၢမ်းသႅတ်ႉၸႃႇမၼ်းၼၼ်ႉတၵ်းလႆႈတႄႇလႄႈ ၵႂၢမ်းဢၼ်မၼ်းမတ်ႉၽုၵ်ႈၼႂ်းၸႂ်မၼ်းဝႆႉၼၼ်ႉ တၵ်းလႆႈတႄႇဢေႃႈ။
၈ ဢမ်ႇၼၼ်ၵေႃႈပေႃးၽူဝ်မၼ်းႁၢမ်ႈတၢပ်ႈႁႄႉၶႅၼ် ၼႂ်းဝၼ်းဢၼ်လႆႈငိၼ်းၼၼ်ႉၸိုင်ၽူဝ်မၼ်းၼၼ်ႉ တၵ်းပႄႇၵႂၢမ်းသႅတ်ႈၸႃႇမၼ်းဢိၵ်ႇတင်းၵႂၢမ်းဢၼ်မၼ်းဝႃႈဢွၵ်ႇသူပ်း ႁႂ်ႈလႆႈမတ်ႉၽုၵ်ႇၼႂ်းၸႂ်မၼ်းဝႆႉၼၼ်ႉပႅတ်ႈလႄႈ ထႃႇဝရႃႉၽြႃးတၵ်းပွႆႇလွတ်ႈဢေႃႈ။
၉ ၵတိသႅတ်ႉၸႃႇမေႈယိင်းဢၼ်ပဵၼ်မေႈမၢႆႈ ဢမ်ႇၼၼ်မေႈယိင်းဢၼ်ပဵၼ်မေႈႁၢင်ႉၼၼ်ႉ ၵႃႈဢၼ်မၼ်းမတ်ႉၽုၵ်ႈၼႂ်းၸႂ်မၼ်းဝႆႉၵူႈၸိူဝ်ႉၵူႈပိူင်ၼၼ်ႉ တၵ်းလႆႈတႄႇ ဢေႃႈ။
၁၀ မိူဝ်ႈဢၼ်မေႈယိင်း ယင်းမီးယူႇၵႃႈၼႂ်းႁိူၼ်းၽူဝ်မၼ်းယူႇၼၼ်ႉ ပေႃးမၼ်းႁဵတ်းၵတိသႅတ်ႉၸႃႇဢမ်ႇၼၼ် ပေႃးမၼ်း ဢဝ်တင်းတၢင်းဢၼ်ၵိၼ်ႇ ဢၼ်ဝႃႈလႄႈ
၁၁ မတ်ႉၽုၵ်ႇၼႂ်းၸႂ်မၼ်းဝႆႉလႄႈၽူဝ်မၼ်းငိၼ်းယူႇသေၵေႃႈ ဢမ်ႇႁၢမ်ႈတၢပ်ႈႁႄႉၶႅၼ်လႄႈယူႇတဵတ်ႇတဵတ်ႇယူႇၸိုင်ၵတိသႅတ်ႉၸႃႇမၼ်းၵႃႈ မီးၼၼ်ႉ တၵ်းလႆႈတႄႇလႄႈဢၼ်မၼ်းမတ်ႉၽုၵ်ႈၼႂ်း ၸႂ်မၼ်းဝႆႉၵႃႈမီးၼၼ်ႉ တၵ်းလႆႈတႄႇဢေႃႈ။
၁၂ ဢမ်ႇၼၼ်ၵေႃႈ ပေႃးၽူဝ်မၼ်းလႆႈပႄႇပႅတ်ႈမူတ်းမူတ်းသဵင်ႈသဵင်ႈၼႂ်းဝၼ်းဢၼ်လႆႈငိၼ်းၼၼ်ႉၸိုင် ၵႂၢမ်းဢၼ်ဝႃႈဢွၵ်ႇသူပ်းမၼ်းလႄႈ ၸၢပ်ႈသႅင်ႇၵၼ်တင်းၵတိသႅတ်ႉၸႃႇ ဢမ်ႇၼၼ်တၢင်းဢၼ်မတ်ႉၽုၵ်ႇၼႂ်းၸႂ်မၼ်းဝႆႉၼၼ်ႉၸိူဝ်းၼၼ်ႉဢၼ် လႂ်သေဢမ်ႇဝႃႈဢမ်ႇလႆႈတႄႇ။ထႃႇဝရႃႉၽြႃးတၵ်းပွႆႇလွတ်ႈၵွပ်ႈပိူဝ်ႈဢၼ်ၽူဝ်မၼ်းပႄႇပႅတ်ႈၼၼ်ႉဢေႃႈ။
၁၃ ၵတိသႅတ်ႉၸႃႇၵႃႈမီး တၢင်းၵိၼ်ႇတၢင်းဝႃႈဢၼ်မတ်ႉၽုၵ်ႈဝႆႉဢၼ်ၸၢပ်ႈသႅင်ႇၵၼ်တင်း တၢင်းဢၼ်ၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်ၼႃႇလူင်လၢင်ၵႃႈမီးၼၼ်ႉ ၽူဝ်မၼ်းမီးဢၶႂၢင်ႉဢၼ်ပိူင်ႇႁႂ်ႈတႄႇ ၽူဝ်မၼ်းမီးဢၶႂၢင်ႉဢၼ် ပိူင်ႇပႄႇပႅတ်ႈဢေႃႈ။
၁၄ ပေႃးၽူဝ်မၼ်းယူႇတဵတ်ႇတဵတ်ႇဝၼ်းၼိုင်ႈယဝ်ႉဝၼ်းၼိုင်ႈယူႇၸိုင် ၽူဝ်မၼ်းႁႂ်ႈၵတိသႅတ်ႉၸႃႇဢၼ်မၼ်းႁဵတ်း ၵႃႈမီးဢိၵ်ႇတင်းတၢင်းဢၼ်မတ်ႉၽုၵ်ႇဝႆႉ ဢၼ်မၼ်းႁဵတ်းၵႃႈမီးၼၼ်ႉတႄႇဢေႃႈ။မၼ်းၼၼ်ႉႁႂ်ႈတႄႇၵွပ်ႈပိူဝ်ႈဢၼ်တူဝ်ၸဝ်ႈၵဝ်ႇယူႇတဵတ်ႇတဵတ်ႇယူႇ ၼႂ်းဝၼ်းဢၼ်လႆႈငိၼ်းၼၼ်ႉယဝ်ႉ။
၁၅လိုၼ်းသဝေၼ်းဢၼ်ၽူဝ်မၼ်းလႆႈငိၼ်းၵႂၢမ်းၼၼ်ႉယဝ်ႉၼၼ်ႉ ပေႃးၽူဝ်မၼ်းႁဵတ်းႁႂ်ႈလႆႈပႄႇပႅတ်ႈၸိုင် ၽူဝ်မၼ်းၼၼ်ႉ တၵ်းလႆႈၶၢမ်ႇဢပျႅတ်ႈမၼ်း ဢေႃႈ၊ဝႃႈၼင်ႇၼႆယဝ်ႉ၊ဝႃႈၼင်ႇၼႆဢေႃႈ။
၁၆ ဢၼ်ၼႆႉၸမ်း ပဵၼ်ထုင်းၾိင်ႈတြႃးၵႃႈတီႈၵႄႈဝူင်ႈၵၢင်ၽူဝ်တင်းမေး ၵႃႈတီႈၵႄႈဝူင်ႈၵၢင်ပေႃႈတင်းလုၵ်ႈယိင်းဢၼ်ဢသၢၵ်ႈယင်းလဵၵ်ႉယင်းၼုမ်ႇ ၵႃႈၼႂ်းႁိူၼ်းပေႃႈမၼ်းၼၼ်ႉဢၼ်ဝႃႈ ထႃႇဝရႃႉၽြႃးသင်ႇလၢတ်ႈဝႆႉတီႈမုဝ်းသေႇၼၼ်ႉဢေႃႈ။