Chapter
၂၂
ပႃႇလမ်ႇႁွင်ႉပၢင်းပႃႇလၵ်ႉ
၁ ၵူၼ်းမဵဝ်းဢိသရေႇလတင်းလၢႆ သမ်ႉဢွၵ်ႇတႃပႆတၢင်းလႄႈၶျႃးပၢင်ၵႃႈၼႂ်းပၢင်ႇပဵင်းမေႃႇၽ ဢၼ်မီးႁိမ်းၼမ်ႉႁွင်ႊယေႃႇတၢၼ်ႇ သိုဝ်ႈဝဵင်းယေႇရိၶုဝ်း ၼၼ်ႉဢေႃႈ။
၂ ၶုၼ်ပႃႇလၵ်ႉလုၵ်ႈၸၢႆးၸိၽေႃႇ ႁူႉႁၼ်လွင်ႈၵူၼ်းမဵဝ်းဢိသရေႇလတင်းလၢႆ ႁဵတ်းတီႈၵူၼ်းမဵဝ်းဢႃႇမေႃးရိၸိူဝ်းၼၼ်ႉ ၵူႈၸိူဝ်ႉၵူႈပိူင်ၼၼ်ႉသေယဝ်ႉ၊ၵွပ်ႈပိူဝ်ႈဢၼ်ၵူၼ်းမဵဝ်းဢိသရေႇလ ၶဝ်ၼမ်ၼႃႇလူင်လၢင်လႄႈမိူင်း မေႃႇၽၵူဝ်ႁႄၼႃႇလူင်လၢင်ဢေႃႈ။
၃ ၵွပ်ႈပိူဝ်ႈၵူၼ်းမဵဝ်းဢိသရေႇလတင်းလၢႆၼၼ်ႉလႄႈ မိူင်းမေႃႇၽၼၼ်ႉယၢပ်ႇၸႂ်ယုင်ႈၸႂ်ၼႃႇလႄႈ လၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်မိူင်းမိတျၢၼ်ႇတင်းလၢႆလႄႈဝႃႈ၊-
၄ ၽုင်ၵူၼ်းၸိူဝ်းၼႆႉ တၵ်းယိုၼ်းၵိၼ်ၵႃႈဢၼ်မီးလဵပ်ႈႁွပ်ႈႁိမ်းႁွမ်းႁဝ်း မိူၼ်ၸိူဝ်ႉၼင်ႇဝူဝ်းၵိၼ်ယိူဝ်ႈၼၼ်ႉယဝ်ႉဝႃႈၼင်ႇၼႆဢေႃႈ။မိူဝ်ႈၼၼ်ႉၶုၼ်ပႃႇလၵ်ႉလုၵ်ႈၸၢႆး ၸိၽေႃႇပဵၼ်ၶုၼ်ႁေႃၶမ်းမေႃႇၽဢေႃႈ။
၅ မၼ်းပွႆႇၸႂ်ႉသၢၼ်ႇတမၢၼ်ႇတင်းလၢႆၵႂႃႇၸူးၵႃႈတီႈၶုၼ်ပႃႇလမ်ႇလုၵ်ႈၸၢႆးပေႃႇရ ၵႃႈတီႈဝဵင်းပေႇသေႃႇဢၼ်မီးၵႃႈတီႈႁိမ်းၼမ်ႉႁွင်ႊၼၼ်ႉ ႁႂ်ႈလႆႈႁွင်ႉပၢင်းဢဝ်မၼ်းမႃးသေလႄႈလၢတ်ႈဝႃႈ၊-တူၺ်းလူ။ၵူၼ်းမဵဝ်းဢၼ်လုၵ်ႉသေၵႃႈတီႈမိူင်းဢေႇၵႅပ်ႉတု ႁွတ်ႈထိုင်မႃးၸိူဝ်းၼၼ်ႉႁူမ်ႇသုမ်ႇၼႃႈလိၼ်လႄႈ ၶျႃးတီႈယူႇၶဝ်ယူႇၽၢႆႇၼိုင်ႈ တင်းၵဝ်ယဝ်ႉ။
၆ ၸဝ်ႈႁဝ်းမႃးလႄႈၵိၼ်ႇလႃႇၵိၼ်ဝႃႈၵူၼ်းမဵဝ်းၼႆႉပုၼ်ႈၵဝ်သေၵမ်း။ၶဝ်ႁႅင်းယႂ်ႇလိူဝ်တွၼ်းၼႃႇသေၵဝ်ဢေႃႈ။ပေႃးၵိၼ်ႇလႃႇၶဝ်ၸင်ႇၵဝ်တၵ်းတိုၵ်းတေႃးယႃႉပႅတ်ႈၶဝ်လႆႈလႄႈႁေႃႈၶဝ်ဢွၵ်ႇသေၵႃႈၼႂ်းမိူင်းၵဝ်ၼႆႉၵႂႃႇဢေႃႈ။ၵဝ်ႁူႉလွင်ႈဢၼ်ၵေႃႉဢၼ်ၸဝ်ႈႁဝ်းပၼ်တၢင်းလီၼၼ်ႉ လႆႈၶၢမ်ႇတၢင်းလီမင်ႇၵလႃႇလႄႈၵေႃႉဢၼ်ၸဝ်ႈႁဝ်းၵိၼ်ႇလႃႇၵိၼ်ႇဝႃႈၼၼ်ႉ ပဵၼ်ၵေႃႉဢၼ်ထုၵ်ႇတၢင်းဢၼ်ၵိၼ်ႇလႃႇၵိၼ်ႇ ဝႃႈဢေႃႈ၊ဝႃႈၼင်ႇၼႆဢေႃႈ။
၇ ၼင်ႇၼၼ်လႄႈၵူၼ်းဢၼ်ပဵၼ်ၵႄႇပဵၼ်ႁူဝ်မိူင်းမေႃႇၽ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်မိူင်းမိတျၢၼ်ႇ ၶဝ်ဢွၼ်ၵၼ်ပႃးဢဝ်လၢၵ်ႈသွင်ႇ တၢင်းဢၼ်ႁဵတ်းဢတၢတ်ႈတင်းလၢႆၼၼ်ႉသေလႄႈ ၵႂႃႇႁွတ်ႈထိုင်ၵႃႈတီႈၶုၼ်ပႃႇလမ်ႇသေယဝ်ႉ ဢဝ်ၵႂၢမ်းၶုၼ်ပႃႇလၵ်ႉၼၼ်ႉလၢတ်ႈပၼ်တီႈ မၼ်းဢေႃႈ။
၈ ၶုၼ်ပႃႇလမ်လၢတ်ႈတီႈၶဝ်လႄႈဝႃႈ၊-ၶိုၼ်းၼႆႉသူယူႇၵႃႈတီႈၼႆႉလူးၵွၼ်ႇတႃႉ။ၵဝ်တၵ်းၶိုၼ်းလၢတ်ႈတီႈသူ ၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉတီႈၵဝ်ၼၼ်ႉဢေႃႈ၊ဝႃႈၼင်ႇၼႆလႄႈမူးမၢတ်ႈၽွင်းမိူင်းမေႃႇၽၸိူဝ်းၼၼ်ႉၵေႃႈ ယူႇၵႃႈတီႈၶုၼ်ပႃႇလမ်ႇ ၼၼ်ႉဢေႃႈ။
၉ ၽြႃးပဵၼ်ၸဝ်ႈ မႃးတီႈၶုၼ်ပႃႇလမ်ႇလႄႈထၢမ်ဝႃႈ၊-ၵူၼ်းဢၼ်မီးယူႇၵႃႈတီႈမႂ်းၸိူဝ်းၼႆႉပဵၼ်ၽူႈ လႂ်၊ဝႃႈၼင်ႇၼႆသေယဝ်ႉ၊ ၶုၼ်ပႃႇလမ်ႇလဝ်ႈ လၢတ်ႈတီႈၽြႃးပဵၼ်ၸဝ်ႈလႄႈဝႃႈ၊-
၁၀ ၶုၼ်ပႃႇလၵ်ႉလုၵ်ႈၸၢႆးၸိၽေႃႇ ဢၼ်ပဵၼ်ၶုၼ်ႁေႃၶမ်းမေႃႇၽ ၼၼ်ႉပွႆႇၸႂ်ႉၵူၼ်းမႃးၵႃႈတီႈၶႃႈၸဝ်ႈလႄႈဝႃႈ၊-
၁၁ ၵူၼ်းဢၼ်လုၵ်ႉသေၵႃႈတီႈမိူင်းဢေႇၵႅပ်ႉတုႁွတ်ႈမႃးၸိူဝ်းၼၼ်ႉႁူမ်ႇသုမ်ႇၼႃႈလိၼ်ဝႆႉယဝ်ႉ။ပိူဝ်ႈၼႆလႄႈမႃးလႄႈၵိၼ်ႇလႃႇၵိၼ်ႇဝႃႈၶဝ်ပုၼ်ႈၵဝ်သေၵမ်း။ပေႃးႁဵတ်းၸိူဝ်ႉၼင်ႇၼၼ်ၸင်ႇ ၵဝ်တၵ်းတိုၵ်းတေႃးယႃႉပႅတ်ႈၶဝ်လႄႈ ႁေႃႈၶဝ်ဢွၵ်ႇသေၵႃႈၼႂ်းမိူင်းၵဝ်ၼႆႉဢေႃႈ၊ဝႃႈ ၼင်ႇၼႆတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၂ ၽြႃးပဵၼ်ၸဝ်ႈမီးဢမိင်ႉတီႈၶုၼ်ပႃႇလမ်ႇလႄႈဝႃႈ၊-မႂ်းဢမ်ႇလႆႈပႃးၸွမ်းၵၼ်တင်းၶဝ်။မႂ်းဢမ်ႇလႆႈၵိၼ်ႇလႃႇၵိၼ်ႇဝႃႈၵူၼ်းမဵဝ်းၼၼ်ႉ။ၶဝ်ပဵၼ်ၵူၼ်းမဵဝ်းဢၼ်လႆႈၶၢမ်ႇတၢင်းလီမင်ႇၵလႃႇဢေႃႈ၊ဝႃႈၼင်ႇၼႆဢေႃႈ။
၁၃ ၶိင်ႇၵၢင်ၼႂ် ၶုၼ်ပႃႇလမ်ႇလုၵ်ႉလႄႈၶိုၼ်းလၢတ်ႈတီႈမူးမၢတ်ႈၽွင်းမိူင်းၶုၼ်ပႃႇလၵ်ႉ ၸိူဝ်းၼၼ်ႉလႄႈဝႃႈ၊-သူၶိုၼ်းမိူဝ်းၵႂႃႇၵႃႈတီႈမိူင်းသူသေၵမ်းတႃႉ။ထႃႇဝရႃႉၽြႃး ဢမ်ႇပၼ်ဢၶႂၢင်ႉၵဝ်ႁႂ်ႈလႆႈၸွမ်းလူၺ်ႈၵၼ် တင်းသူၼၼ်ႉဝႃႈၼင်ႇၼႆဢေႃႈ။
၁၄ မူးမၢတ်ႈၽွင်းမိူင်းမေႃႇၽၸိူဝ်းၼၼ်ႉၵေႃႈ ၶိုၼ်းမိူဝ်းၵႂႃႇၵႃႈတီႈၶုၼ်ပႃႇလၵ်ႉလႄႈလဝ်ႈလၢတ်ႈလႄႈဝႃႈ၊-ၶုၼ်ပႃႇလမ်ႇၼၼ်ႉဢမ်ႇမီးဢလူဝ်ႇ ၶႂ်ႈၸွမ်းမႃးလူၺ်ႈၵၼ်တင်းၶႃႈႁဝ်း ၶႃႈၸိူဝ်းၼႆႉၶႃႈ၊ဝႃႈၼင်ႇၼႆဢေႃႈ။
၁၅ ၶုၼ်ပႃႇလၵ်ႉၼၼ်ႉသမ်ႉပွႆႇၸႂ်ႉသၢၼ်ႇတမၢၼ်ႇ ဢၼ်ယိင်ႈၶႅၼ်းၼမ်ၼႃႇဢၼ်ဢရႃႇ ယိင်ႈၶႅၼ်းယႂ်ႇၼႃႇသေၸိူဝ်းဢွၼ်တၢင်း ၼၼ်ႉၵႂႃႇဢေႃႈ။
၁၆ ၶဝ်ႁွတ်ႈထိုင်ၵႃႈတီႈၶုၼ်ပႃႇလမ်ႇလႄႈဢွၼ်ၵၼ်ၶိုၼ်းလၢတ်ႈတီႈမၼ်းလႄႈဝႃႈ၊- ၶုၼ်ပႃႇလၵ်ႉ လုၵ်ႈၸၢႆးၸိၽေႃႇ မီးဢမိင်ႉလႄႈဝႃႈၸမ်း၊- ယႃႇပေႁႂ်ႈဢၼ် လႂ်ႁႄႉၶႅၼ်ၸဝ်ႈႁဝ်းထၼ်ႈပေႃးဢမ်ႇမႃးတီႈၵဝ်ၶႃႈလႆႈၼၼ်ႉသေၵမ်း။ၵဝ်ၶႃႈတၵ်းယုၵ်ႉယွင်ႈၸဝ်ႈဝႆႉၵႃႈၼႂ်းမုၼ်ၽုင်းဢၼ်ယႂ်ႇ ၼႃႇဢေႃႈ။
၁၇ တၵ်းၶႃႈတၵ်းပၼ်ၵႃႈဢၼ်ၸဝ်ႈယွၼ်းၼၼ်ႉဢေႃႈ။ပိူဝ်ႈၼႆလႄႈမႃးလႄႈၵိၼ်ႇလႃႇၵိၼ်ႇဝႃႈၵူၼ်းမဵဝ်းၼႆႉပုၼ်ႈၵဝ်ၶႃႈသေၵမ်း၊ ဝႃႈၼင်ႇၼႆဢေႃႈ။ၶုၼ်ပႃႇလမ်ႇၵေႃႈ ၶိုၼ်းလၢတ်ႈတီႈၶႃႈၵူၼ်းၶုၼ်ပႃႇ လၵ်ႉၸိူဝ်းၼၼ်ႉလႄႈဝႃႈ၊-
၁၈ ပိၵ်ႉသမ်ႉၶုၼ်ပႃႇလၵ်ႉဢဝ်ႁေႃႇမၼ်းၸဝ်ႈ ဢၼ်တဵမ်ဝႆႉတင်းငိုၼ်းၶမ်းၼၼ်ႉပၼ်တီႈၵဝ်သေၵေႃႈ ၵဝ်ဢမ်ႇပူၼ်ႉဢမ်ႇလိူဝ်ၵႂၢမ်းထႃႇဝရႃႉၽြႃးၽြႃးပဵၼ်ၸဝ်ႈၵဝ်ၼၼ်ႉသေလႄႈ ႁဵတ်းလွင်ႈတၢင်းဢၼ်လဵၵ်ႉဢၼ်ယႂ်ႇ သေၸိူဝ်ႉသေပိူင်လႃးလႃး။
၁၉ ၼႂ်းဝႃႈၼၼ်သေၵေႃႈ လွင်ႈၼင်ႇႁိုဝ်ၵဝ်တၵ်းႁူႉလွင်ႈဢၼ်ထႃႇဝရႃႉၽြႃးတၵ်းထၢပ်ႈထႅင်ႈလႄႈမီးဢမိင်ႉတီႈၵဝ်ၸိူဝ်ႉၼင်ႇႁိုဝ်ၼၼ်ႉၸိုင် ၶိုၼ်းၼႆႉသူယူႇၵႃႈတီႈၼႆႉလူးၵွၼ်ႇတႃႉ၊ဝႃႈၼင်ႇၼႆဢေႃႈ။
၂၀ ၶိင်ႇၵၢင်ၶိုၼ်းၽြႃးပဵၼ်ၸဝ်ႈ မႃးတီႈ ၶုၼ်ပႃႇလမ်ႇလႄႈမီးဢမိင်ႉလႄႈဝႃႈ၊- ပေႃးၵူၼ်းၸိူဝ်းၼၼ်ႉမႃးႁႂ်ႈလႆႈႁွင်ႉမႂ်းၸိုင်လုၵ်ႉလႄႈ ၸွမ်းၵႂႃႇလူၺ်ႈၵၼ်တင်းၶဝ်တႃႉ။ၵူၺ်းၵႃႈမႂ်းတၵ်းလႆႈႁဵတ်းၵႃႈဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉၵူၺ်းဢေႃႈ၊ ဝႃႈၼင်ႇၼႆဢေႃႈ။
မႃႉလီႈၶုၼ်ပႃႇလမ်ႇ
၂၁ ၶိင်ႇၵၢင်ၼႂ်ၶုၼ်ပႃႇလမ်ႇ လုၵ်ႉလႄႈ ဢဝ်ၵွပ်းမႃႉလီႈမၼ်း တၢင်ႇသေယဝ်ႉၸွမ်းလူၺ်ႈၵၼ်တင်းမူးမၢတ်ႈ ၽွင်းမိူင်းမေႃႇၽၸိူဝ်းၼၼ်ႉၵႂႃႇဢေႃႈ။
၂၂ ၵွပ်ႈပိူဝ်ႈဢၼ်မၼ်းၸွမ်းၵႂႃႇၸိူဝ်ႉၼင်ႇၼၼ်လႄႈ တၢင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈဢွၵ်ႇလႄႈ တမၢၼ်ႇၵၢင်ႁၢဝ်ထႃႇဝရႃႉၽြႃး ၸုၵ်းယူႇၵႃႈတီႈသဵၼ်ႈတၢင်းမၼ်းႁႂ်ႈလႆႈႁၢမ်ႈ တပ်ႉႁႄႉၶႅၼ်မၼ်းဢေႃႈ။
၂၃ မိူဝ်ႈၼၼ်ႉၼႂ်းမိူဝ်ႈဢၼ်မၼ်းၶီႇမႃႉလီႈမၼ်းသေလႄႈပႃးဢဝ်ၵူၼ်းဢွၼ်ႇမၼ်းသွင်ၵေႃႉၵႂႃႇယူႇၼၼ်ႉၸိုင် မႃႉလီႈမၼ်းႁၼ်တမၢၼ်ႇၵၢင်ႁၢဝ်ထႃႇဝရႃႉၽြႃး ဢဝ်လၢပ်ႇမုင်းလႄႈၸုၵ်းယူႇၵႃႈတီႈသဵၼ်ႈတၢင်းၼၼ်ႉလႄႈ မႃႉလီႈၼၼ်ႉငႅၵ်းဢွၵ်ႇသဵၼ်ႈတၢင်းလႄႈ ၶဝ်ႈၵႂႃႇၵႃႈၼႂ်းပၢင်ႇတူင်ႈႁႆႊတူင်ႈၼႃးသေဢေႃႈ။ၶုၼ်ပႃႇလမ်ႇၵေႃႈပေႃႉယႅၼ်ႉမႃႉလီႈမၼ်းႁႂ်ႈၶိုၼ်းမႃးၸူးၵႃႈတီႈၶူၼ်တၢင်းဢေႃႈ။
၂၄ တမၢၼ်ႇၵၢင်ႁၢဝ်ထႃႇဝရႃႉၽြႃး သမ်ႉပေႃႇမႃးၸုၵ်းယူႇၵႃႈတီႈၶူၼ်တၢင်းတီႈ ဢၼ်ၵိဝ်ႇဢၼ်ၵႅပ်ႈၵႃႈၼႂ်းဝူင်ႈၵၢင်သူၼ်ဢူးယဵၼ်ႇမၢၵ်ႇၸပိတ်ႉ ဢၼ်မီးႁူဝ်ႉသွင်ၽၢႆႇ ၼၼ်ႉဢေႃႈ။
၂၅ မႃႉလီႈၼၼ်ႉသမ်ႉၶိုၼ်းႁၼ်တမၢၼ်ႇၵၢင်ႁၢဝ်ထႃႇဝရႃႉၽြႃးထႅင်ႈလႄႈ တိူဝ်ႉသႂ်ႇၵႃႈတီႈႁူဝ်ႉၽၢႆႇၼိုင်ႈလႄႈ ႁိပ်ႇတိၼ်ၶုၼ်ပႃႇလမ်ႇ ၸပ်းႁူဝ်ႉၼၼ်ႉ ဢေႃႈ။
၂၆ ၶုၼ်ပႃႇလမ်ႇၵေႃႈသမ်ႉပေႃႉယႅၼ်ႉမႃႉလီႈထႅင်ႈဢေႃႈ။တမၢၼ်ႇၵၢင်ႁၢဝ်ထႃႇဝရႃႉၽြႃးၵေႃႈပူၼ်ႉၵႂႃႇလႄႈ ၸုၵ်းယူႇၵႃႈတီႈဢၼ်ၵိတ်ႇဢၼ်ၵႅပ်ႈတီႈဢၼ်ဢမ်ႇငႅၵ်းဢွၵ်ႇ သဵၼ်ႈတၢင်းၽၢႆႇၶႂႃၽၢႆႇသၢႆႉလႆႈလႃး လႃးၼၼ်ႉဢေႃႈ။
၂၇ မႃႉလီႈၼၼ်ႉသမ်ႉၶိုၼ်းႁၼ်တမၢၼ်ႇၵၢင်ႁၢဝ်ထႃႇဝရႃႉၽြႃးထႅင်ႈသေယဝ်ႉ ၼွၼ်းမူပ်ႇယူႇၵႃႈတီႈတႂ်ႈၶုၼ်ပႃႇလမ်ႇဢေႃႈ။ၶုၼ်ပႃႇလမ်ႇၼၼ်ႉၸႂ်မႆႈၶႂ်ႈၸႃႉၼႃႇလူင်လၢင်လႄႈ ဢဝ်ၶွၼ်ႉတဝ်ႉမၼ်းပေႃႉ ယႅၼ်ႉမႃႉလီႈၼၼ်ႉဢေႃႈ။
၂၈ မိူဝ်ႈၼၼ်ႉထႃႇဝရႃႉၽြႃးၽုၺ်ႇသူပ်းမႃႉလီႈၼၼ်ႉလႄႈ မႃႉလီႈၼၼ်ႉလၢတ်ႈၵႂၢမ်းထၢမ်တီႈၶုၼ်ပႃႇလမ်ႇလႄႈဝႃႈ၊-ၵဝ်ႁဵတ်းၸိူဝ်ႉၼင်ႇႁိုဝ်တီႈမႂ်း ႁႂ်ႈမႂ်းလႆႈပေႃႉယႅၼ်ႉၵဝ်တေႃႇထိုင်ႁွတ်ႈသၢမ်ပွၵ်ႈ ဝႃႈၼင်ႇၼႆလႄႈ ၶုၼ်ပႃႇလၢမ်ႇလၢတ်ႈတီႈမႃႉလီႈၼၼ်ႉလႄႈဝႃႈ၊-
၂၉ မႂ်းယဝ်ႉယွၵ်ႇၵဝ်လူင်ပေႇ။ၶႂ်ႈႁႂ်ႈလၢပ်ႇမီးၵႃႈၼႂ်းမိုဝ်းၵဝ်ၵူၺ်းယဝ်ႉ။ပေႃးမီးၸိုင်တေႃႈလဵဝ်ၼႆႉၵဝ်တၵ်းဢဝ်မႂ်းတၢႆၵမ်းလဵဝ်ယဝ်ႉ၊ဝႃႈၼင်ႇ ၼႆဢေႃႈ။
၃၀ မႃႉလီႈၼၼ်ႉၵေႃႈထၢမ်တီႈၶုၼ်ပႃႇလမ်ႇလႄႈဝႃႈ၊-ၵဝ်ပဵၼ်မႃႉလီႈမႂ်းဢၼ်လႆႈၶၢမ်ႇတၢင်းဢၼ်မႂ်းၶီႇတေႃႇထိုင်ႁွတ်ႈဝၼ်းမိူဝ်ႈၼႆႉဢမ်ႇၸႂ်ႈႁိုဝ်။ၵဝ်ယၢမ်ႈတွၼ်ႉႁဵတ်းၸိူဝ်ႉၼင်ႇၼႆတီႈမႂ်းသပွေၵ်ႈႁိုဝ်၊ ဝႃႈၼင်ႇၼႆလႄႈ၊ မၼ်းၶိုၼ်းလၢတ်ႈဝႃႈ၊-ဢမ်ႇတွၼ်ႉ ႁဵတ်း၊ ဝႃႈၼႆဢေႃႈ။
၃၁ မိူဝ်ႈၼၼ်ႉထႃႇဝရႃႉၽြႃးၽုၺ်ႇမၢၵ်ႇတႃၶုၼ်ပႃႇလမ်ႇလႄႈ ၶုၼ်ပႃႇလမ်ႇ ႁၼ်တမၢၼ်ႇၵၢင်ႁၢဝ်ထႃႇဝရႃႉၽြႃး ဢဝ်လၢပ်ႇမုင်းသေလႄႈၸုၵ်းယူႇၵႃႈတီႈသဵၼ်ႈတၢင်းၼၼ်ႉလႄႈ မၼ်းၵူမ်ႈႁူဝ် ၵွမ်းႁူဝ်သေလႄႈမူပ်ႇတဵတ်ႇဢေႃႈ။
၃၂ တမၢၼ်ႇၵၢင်ႁၢဝ်ထႃႇဝရႃႉၽြႃးၵေႃႈလၢတ်ႈတီႈမၼ်းလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းပေႃႉယႅၼ်ႉမႃႉလီႈမႂ်း တေႃႇထိုင်ႁွတ်ႈသၢမ်ပွၵ်ႈ။ၵွပ်ႈပိူဝ်ႈသဵၼ်ႈတၢင်းဢၼ်မႂ်းၵႂႃႇယူႇၼၼ်ႉပဵၼ်ဢၼ်ၶတ်းၵၼ်တင်းၵဝ်လႄႈ ၵဝ်ၸင်ႇ ဢွၵ်ႇမႃးႁႂ်ႈလႆႈႁႄႉၶႅၼ်မႂ်းယဝ်ႉ။
၃၃ မႃႉလီႈႁၼ်ၵဝ်လႄႈဝေႈပိူင်ႈသေၵႃႈတီႈၽၢႆႇၼႃႈၵဝ် တေႃႇထိုင်ႁွတ်ႈသၢမ်ပွၵ်ႈယဝ်ႉ။သင်ဢမ်ႇဝေႈပိူင်ႈၸိုင်ၵဝ်ပေႃးလႆႈဢဝ်မႂ်းတၢႆဢမၢၼ်ႇၶၢၼ်ပဵၼ်ယဝ်ႉလႄႈ မႃႉလီႈၵူၺ်းတၵ်းလႆႈၵတ်းယဵၼ်ၶျၢမ်းသႃႇယဝ်ႉ၊ဝႃႈၼင်ႇၼႆဢေႃႈ။
၃၄ ၶုၼ်ပႃႇလမ်ႇ ၵေႃႈလၢတ်ႈတီႈတမၢၼ်ႇၵၢင်ႁၢဝ်လႄႈဝႃႈ၊-ၵဝ်ၶႃႈၽိတ်းပိူင်ႈၶႃႈယဝ်ႉ။ၵဝ်ၶႃႈဢမ်ႇႁူႉလွင်ႈဢၼ်ၸဝ်ႈႁဝ်းၶႂၢင်ႁႄႉၵဝ်ၶႃႈယူႇ ၵႃႈတီႈသဵၼ်ႈတၢင်းၼၼ်ႉၶႃႈ။မိူဝ်ႈလဵဝ်ၼႆႉပေႃးဢလူဝ်ႇၸဝ်ႈႁဝ်းဢမ်ႇမီးၸိုင်ၵဝ်ၶႃႈတၵ်းၶိုၼ်းမိူဝ်းၶႃႈဢေႃႈ၊ဝႃႈၼင်ႇၼႆ ဢေႃႈ။
၃၅ တမၢၼ်ႇၵၢင်ႁၢဝ်ထႃႇဝရႃႉၽြႃးမီးဢမိင်ႉတီႈၶုၼ်ပႃႇလမ်ႇလႄႈဝႃႈ၊-ၸွမ်းလူၺ်ႈၵၼ်တင်းၵူၼ်းၸိူဝ်းၼၼ်ႉၵႂႃႇတႃႉ။ၵူၺ်းၵႃႈမႂ်းတၵ်းလႆႈလၢတ်ႈၵႂၢမ်းဢၼ်ၵဝ်သင်ႇလၢတ်ႈဝႆႉၼၼ်ႉၵူၺ်းဢေႃႈ၊ ဝႃႈၼင်ႇၼႆလႄႈ ၶုၼ်ပႃႇလမ်ႇၵေႃႈၸွမ်းၵႂႃႇလူၺ်ႈၵၼ်တင်းမူး မၢတ်ႈၽွင်းမိူင်းၶုၼ်ပႃႇလၵ်ႉၸိူဝ်းၼၼ်ႉဢေႃႈ။
၃၆ မိူဝ်ႈဢၼ်ၶုၼ်ပႃႇလၵ်ႉ ငိၼ်းလွင်ႈဢၼ် ၶုၼ်ပႃႇလမ်ႇႁွတ်ႈထိုင်ၼၼ်ႉၸိုင် မၼ်းၵႂႃႇၸူးၵႃႈတီႈဝဵင်းမေႃႇၽဝဵင်းၼိုင်ႈဢၼ်မီးၵႃႈႁိမ်းၼမ်ႉႁွင်ႊဢႃႇၼုၼ်ႇ ဢၼ်ပဵၼ်ၶွပ်ႇၼမ်ႉလႅၼ်လိၼ်ၼၼ်ႉႁႂ်ႈလႆႈႁပ်ႉႁူဝ်တၢင်း မၼ်းဢေႃႈ။
၃၇ ၶုၼ်ပႃႇလၵ်ႉ ၵေႃႈလၢတ်ႈတီႈၶုၼ်ပႃႇလမ်ႇလႄႈဝႃႈ၊- ၵဝ်ပွႆႇၸႂ်ႉၵႂႃႇၶိူဝ်းၶိူဝ်းယႂ်းယႂ်းႁႂ်ႈလႆႈႁွင်ႉပၢင်းဢဝ်ၸဝ်ႈမႃးဢမ်ႇၸႂ်ႈႁိုဝ်။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈဢမ်ႇမႃး။ၵဝ်ယုၵ်ႉယွင်ႈၸဝ်ႈဝႆႉၵႃႈၼႂ်းမုၼ်ၽုင်းၼႆႉဢမ်ႇၸႂ်ႈႁိုဝ် ဝႃႈၼင်ႇၼႆသေယဝ်ႉ ၶုၼ်ပႃႇ လမ်ႇၶိုၼ်းလၢတ်ႈတီႈၶုၼ်ပႃႇလၵ်ႉလႄႈဝႃႈ၊-
၃၈ တူၺ်းလူ။ၵဝ်မႃးၸူးၵႃႈတီႈၶုၼ်လူင်ယဝ်ႉ။ၵူၺ်းၵႃႈၵဝ်ပိူင်ႇလၢတ်ႈၵႂၢမ်းသေၶေႃႈသေၵမ်းႁိုဝ်။ၵဝ်တၵ်းလၢတ်ႈၵႂၢမ်းဢၼ်ၽြႃးပဵၼ်ၸဝ်ႈ ဢဝ်သႂ်ႇဝႆႉၵႃႈၼႂ်းသူပ်းၵဝ်ၼၼ်ႉ ၵူၺ်းဢေႃႈ၊
၃၉ ဝႃႈၼင်ႇၼႆသေလႄႈၶုၼ်ပႃႇလမ်ႇၼၼ်ႉၸွမ်းလူၺ်ႈၵၼ်တင်းၶုၼ်ပႃႇလၵ်ႉလႄႈ ႁွတ်ႈထိုင်ၵႃႈ တီႈဝဵင်းၵိရယတ်ႉႁုၸုတ်ႉဢေႃႈ။
၄၀ ၶုၼ်ပႃႇလၵ်ႉၵေႃႈဢဝ်ဝူဝ်း လႂ်သူဝ်း လႂ်ပုၵ်ႉၸေႃႇလႄႈ ပၼ်ၵႂႃႇၵႃႈတီႈၶုၼ်ပႃႇလမ်ႇဢိၵ်ႇတင်း မူးမၢတ်ႈၽွင်းမိူင်းဢၼ်မီးယူႇလူၺ်ႈ ၵၼ်တင်းမၼ်းၸိူဝ်းၼၼ်ႉဢေႃႈ။
၄၁ ဝၼ်းမိူဝ်ႈၽုၵ်ႈၶုၼ်ပႃႇလၵ်ႉႁွင်ႉဢဝ်ၶုၼ်ပႃႇလမ်ႇလႄႈ ႁွတ်ႈထိုင်ၵႃႈတီႈၼိူဝ်သၼ်လွႆပႃႇမုတ်ႉပႃႇလၼၼ်ႉလႄႈ ႁႂ်ႈမၼ်းလႆႈမုင်ႈႁၼ်ၵူၼ်းမဵဝ်းဢိသရေႇလ တင်းသဵင်ႈတင်းမူတ်းၼၼ်ႉဢေႃႈ။