Chapter
၈
တၢင်းႁဵတ်းတၢင်းသၢင်ႈသေႃးလမုၼ်ႇ
၁ မိူဝ်ႈဢၼ်ထိုင်ႁွတ်ႈတီႈသုတ်းသၢဝ်းပီႊဢၼ်သေႃးလမုၼ်ႇလႆႈတႄႇႁဵတ်းႁိူၼ်းထႃႇဝရႃႉၽြႃးဢိၵ်ႇတင်းႁေႃၸဝ်ႈၼၼ်ႉၸိုင်
၂ သေႃးလမုၼ်ႇမႄးၵုမ်းမႄးႁဵတ်းဝဵင်းဢၼ်ႁိရမ်ႇၶိုၼ်းပၼ်တီႈသေႃးလမုၼ်ႇၸိူဝ်းၼၼ်ႉသေလႄႈႁႂ်ႈၵူၼ်းမဵဝ်းဢိသရေႇလယူႇၵႃႈတီႈၼၼ်ႉဢေႃႈ။
၃ လၢႆးသမ်ႉသေႃးလမုၼ်ႇၶီႇသိုၵ်းၵႂႃႇၸူးၵႃႈတီႈဝဵင်းႁႃႇမတ်ႉၸေႃႇၽလႄႈပေႉၼႅင်ႇဢေႃႈ။
၄ မၼ်းတႄႇႁဵတ်းဝဵင်းတႃႇမေႃႇဢၼ်မီးၵႃႈၼႂ်းထိူၼ်ႇဢိၵ်ႇတင်းဝဵင်းတီႈဢၼ်သိမ်းဝႆႉၽၼ်ႇတႃႇၸဝ်ႈၵႃႈဢၼ်မၼ်းတႄႇႁဵတ်းၵႃႈတီႈမိူင်းႁႃႇမတ်ႉၸိူဝ်းၼၼ်ႉဢေႃႈ။
၅ မၼ်းတႄႇႁဵတ်းဝဵင်းပိတ်ႉႁေႃႇရုၼ်ႇၵႃႈၼိူဝ်ဢိၵ်ႇတင်းဝဵင်းရုၼ်ႇၵႃႈတႂ်ႈဢၼ်ပဵၼ်ဝဵင်းဢၼ်မၼ်ႈၶိူင်ႇလႄႈတဵမ်ဝႆႉတင်းလမ်းဝဵင်း၊ၽၵ်းတူ၊ၵိူၼ်ႇၽၵ်းတူၸိူဝ်းၼၼ်ႉ၊ဢိၵ်ႇတင်းဝဵင်းပႃႇလတ်ႉ
၆ တင်းၵႃႈပဵၼ်ဝဵင်းတီႈဢၼ်သိမ်းဝႆႉၽၼ်ႇတႃႇၸဝ်ႈဢၼ်သေႃးလမုၼ်ႇပိူင်ႇ၊ဝဵင်းတင်းလၢႆဢၼ်လႆႈလူထိင်းလေႃႉရထႃးၸဝ်ႈဝဵင်းတင်းလၢႆဢၼ်လႆႈလဵင်ႉမႃႉၸဝ်ႈဢိၵ်ႇတင်းၵႃႈဢၼ်သေႃးလမုၼ်ႇၶၢႆႉတႄႇႁဵတ်းၵႃႈၼႂ်းဝဵင်းယေႇရုသလႅမ်ႇၵႃႈၼိူဝ်လွႆႈလေႇပၼုၼ်ႇၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၵူႈတီႈၵူႈလႅၼ်ၼၼ်ႉဢေႃႈ။
၇ ၵႃႈဢၼ်ပဵၼ်ၵူၼ်းမဵဝ်းႁိတ်ႉတိၵူၼ်းမဵဝ်းဢႃႇမေႃးရိၵူၼ်းမဵဝ်းၽေႇရၸိ၊ၵူၼ်းမဵဝ်းႁိဝိ၊ၵူၼ်းမဵဝ်းယေႇပုသိဢၼ်ဢမ်ႇၸႂ်ႈၵူၼ်းမဵဝ်းဢိသရေႇလဢၼ်ၵိုတ်းဢၼ်ၵျၢၼ်ႇတီႈမိူင်းၸဝ်ႈဢၼ်ဝႃႈလုၵ်ႈၶဝ်လၢၼ်ၶဝ်ဢၼ်ၵိုတ်ၵျၢၼ်ႇလိုၼ်းၶဝ်
၈ ၵႃႈတီႈမိူင်းၸဝ်ႈၵွပ်ႈပိူဝ်ႈဢၼ်ၵူၼ်းမဵဝ်းဢိသရေႇလတင်းလၢႆဢမ်ယႃႉၽဵဝ်ႈၶဝ်ပႅတ်ႈၸိူဝ်းၼၼ်ႉသေႃးလမုၼ်ႇၽႃႇဢဝ်ၵဵပ်းဢဝ်ႁႂ်ႈၶဝ်ၶၢမ်ႇႁဵတ်းၶႃႈတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၉ ၵူၼ်းမဵဝ်းဢိသရေႇလတင်းလၢႆၸမ်းသေႃးလမုၼ်ႇဢမ်ႇႁႂ်ႈႁဵတ်းၶႃႈ။ၶဝ်ၼၼ်ႉလႆႈပဵၼ်ႁူဝ်ႁၢၼ်ၵူၼ်းသိုၵ်းလႂ်၊မူးမၢတ်ႈလႂ်၊ၸႅတ်ႈၵၢႆးလႂ်၊ၶဝ်ၸိူဝ်းဢၼ်ဢုပ်ႉၵႃႈၼိူဝ်လေႃႉရထႃးၸဝ်ႈလႂ်၊ၶဝ်ၸိူဝ်းဢၼ်ဢုပ်ႉၵႃႈၼိူဝ်မႃႉၸဝ်ႈလႂ်ၸိူဝ်းၼၼ်ႉဢေႃႈ။
၁၀ မူးမၢတ်ႈလူင်ဢၼ်သေႃးလမုၼ်ႇၶၢၼ်းဝႆႉဢၼ်ဢုပ်ႉၵႃႈၼိူဝ်ၵူၼ်းဢၼ်ၵိုတ်ႈႁၢပ်ႇဢမူႉတင်းလၢႆၸိူဝ်းၼၼ်ႉမီးသွင်ပၢၵ်ႇပၢႆႁႃႈသိပ်းဢေႃႈ။
၁၁ သေႃးလမုၼ်ႇဢဝ်လုၵ်ႈယိင်းၶုၼ်ႁေႃၶမ်းၽႃႇရေႃးဢွၵ်ႇသေၵႃႈၼႂ်းဝဵင်းတႃႇဝိတ်ႉသေလႄႈမႃးဝႆႉၵႃႈတီႈႁေႃၸဝ်ႈဢၼ်မၼ်းႁဵတ်းဝႆႉပုၼ်ႈမၼ်းၼၼ်ႉဢေႃႈ။လွင်ႈမၼ်းၸမ်းမၼ်းဝႃႈၵွပ်ႈပိူဝ်ႈဢၼ်တီႈဢၼ်တိူၵ်ႈတႃႇထႃႇဝရႃႉၽြႃးႁွတ်ႈမႃးၼၼ်ႉမူတ်းၸၢင်ႇလႄႈမေးၵဝ်ၼႆႉဢမ်ႇထုၵ်ႇလီယူႇၵႃႈၼႂ်းႁိူၼ်းတႃႇဝိတ်ႉၶုၼ်ႁေႃၶမ်းဢိသရေႇလၼၼ်ႉဝႃႈၼင်ႇၼႆဢေႃႈ။
၁၂ သေႃးလမုၼ်ႇမီးထုင်းၸၢမ်ႇဢၼ်ယၢမ်ႈပုၵ်ႉၸေႃႇယိၸ်ႉဢၼ်တုတ်ႇၽႆးဢၼ်လႆႈပုၵ်ႉၸေႃႇယေႈဝၼ်းၵႃႈႁိုဝ်ၼၼ်ႉတီႈထႃႇဝရႃႉၽြႃးၵႃႈၼိူဝ်ယိတ်ႉပလၢင်ႇထႃႇဝရႃႉၽြႃးဢၼ်မၼ်းတႄႇႁဵတ်းဝႆႉၵႃႈတီႈၽၢႆႇၼႃႈႁိူၼ်းၸဝ်ႈၼၼ်ႉလႄႈ
၁၃ ပုၵ်ႉၸေႃႇမႅၼ်ႈၸွမ်းၵႃႈၼင်ႇဢၼ်ပိင်းၺၢပ်ႈတြႃးမုဝ်းသေႇမီးၼၼ်ႉၵူႈဝၼ်းဢိၵ်ႇတင်းဝၼ်းၵမ်သိၼ်တင်းဝၼ်းလိူၼ်မႂ်ႇတင်းပွႆးထမ်ႇမႃႉဢၼ်လႆႈၶၢမ်ႇယေႈပီႊသၢမ်ပွၵ်ႈဢၼ်ဝႃႈပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈပွႆးၸဵတ်းသတၢင်းပွႆးႁဵတ်းသုမ်ႉထဵင်ၸိူဝ်းၼၼ်ႉဢေႃႈ။
၁၄ မၼ်းၸွမ်းၵႃႈၼင်ႇဢၼ်ၸဝ်ႈပေႃႈမၼ်းတႃႇဝိတ်ႉၸီႇယၢင်ႇဝႆႉၼၼ်ႉသေလႄႈၶၢၼ်းဝႆႉယိတ်ႉပရေႃးႁိၵ်ႈတင်းလၢႆႁႂ်ႈလႆႈၵိုတ်ႈႁၢပ်ႇဢမူႉၶဝ်ပဵၼ်လႄႉပဵၼ်ၵမ်းဢိၵ်ႇတင်းၵူၼ်းမဵဝ်းလေႇဝိတင်းလၢႆႁႂ်ႈၶဝ်လႆႈပႂ်ႉတူၺ်းလုမ်းလႃးဢမူႉတၢင်းဢၼ်ႁဵတ်းထေႃးပၼႃႇ၊တၢင်းဢၼ်ပွင်ႁဵတ်းဢမူႉၵႃႈတီႈၽၢႆႇၼႃႈယိတ်ႉပရေႃးႁိၵ်ႈတင်းလၢႆၸွမ်းၵႃႈၼင်ႇဢၼ်ထုၵ်ႇလီႁဵတ်းၵူႈဝၼ်းဢိၵ်ႇတင်းၶဝ်ၸိူဝ်းဢၼ်ပႂ်ႉၽၵ်းတူႁႂ်ႈလႆႈပႂ်ႉၽၵ်းတူၵႃႈမီးပဵၼ်လႄႉပဵၼ်ၵမ်းၼၼ်ႉဢေႃႈ။လွင်ႈမၼ်းၸမ်းတႃႇဝိတ်ႉၵူၼ်းၽြႃးပဵၼ်ၸဝ်ႈၼၼ်ႉမီးဢမိင်ႉၸိူဝ်ႉၼင်ႇၼၼ်ဝႆႉဢေႃႈ။
၁၅ ၶဝ်ဢမ်ႇပႄႇဢမ်ႇပႅတ်ႈၵႂၢမ်းဢၼ်ၶုၼ်ႁေႃၶမ်းသင်ႇလၢတ်ႈဝႆႉတီႈယိတ်ႉပရေႃးႁိၵ်ႈဢိၵ်ႇတင်းၵူၼ်းမဵဝ်းလေႇဝိတင်းလၢႆလူၺ်ႈလွင်ႈဢမူႉၼၼ်ႉသေၸိူဝ်ႉသပေိူင်ဢိၵ်ႇတင်းလူၺ်ႈလွင်ႈၽၼ်ႇတႃႇၸဝ်ႈၸိူဝ်းၼၼ်ႉ။
၁၆ ပိူဝ်ႈဢၼ်လွင်ႈတၢင်းသေႃးလမုၼ်ႇတၵ်းလႆႈသၢင်ႈႁဵတ်းၵႃႈမီးၼၼ်ႉမီးဝႆႉႁႅၼ်းဝႆႉယဝ်ႉၸႃႉၸဵမ်မိူဝ်ႈဝၼ်းဢၼ်ၶျႃးငဝ်ႈႁၢၵ်ႈႁိူၼ်းထႃႇဝရႃႉၽြႃးတေႃႇထိုင်ႁွတ်ႈထၼ်ႈပေႃးယဝ်ႉတူဝ်ႈၼၼ်ႉလႄႈႁိူၼ်းထႃႇဝရႃႉၽြႃးၼၼ်ႉယဝ်ႉတူဝ်ႈလီငၢမ်းဢေႃႈ။
၁၇ လၢႆးသမ်ႉသေႃးလမုၼ်ႇၵႂႃႇၵႃႈတီႈဝဵင်းဢေႇၸယုၼ်ႇၵႃႇပႃႇတင်းဝဵင်းဢေႇလုတ်ႉဢၼ်မီးၵႃႈတီႈႁိမ်းပၢင်ႇလၢႆႇၼႂ်းမိူင်းဢေႇတုမ်ႇၼၼ်ႉဢေႃႈ။
၁၈ ႁိရမ်ႇၵေႃႈပွႆႇၸႂ်ႉၶႃႈမၼ်းၵူၼ်းမၼ်းပႃးဢဝ်ႁိူဝ်းသၢင်းၽေႃးတင်းလၢႆဢိၵ်ႇတင်းၶႃႈမၼ်းၵူၼ်းမၼ်းဢၼ်ႁူႉလွင်ႈတၢင်းဢၼ်ၶၢမ်ႈပၢင်ႇလၢႆႇၸိူဝ်းၼၼ်ႉမႃးတီႈမၼ်းလႄႈၶဝ်ၼၼ်ႉၶီႇလူၺ်ႈၵၼ်တင်းၶႃႈၶုၼ်သေႃးလမုၼ်ႇသေလႄႈၵႂႃႇၵႃႈတီႈမိူင်းဢေႃႇၽိရသေယဝ်ႉဢဝ်ၶမ်းသီႇပၢၵ်ႇပၢႆႁႃႈသိပ်းတလၢၼ်ႇတၢၼ်ႇၶိုၼ်းမႃးတီႈၶုၼ်လူင်သေႃးလမုၼ်ႇဢေႃႈ။