Chapter
၃၀
ႁေၸၵိႁဵတ်းပွႆးပႃသၶႃႇ
၁ လၢႆးသမ်ႉႁေႇၸၵိသူင်ႇၵႂၢမ်းၵႂႃႇတီႈမဵဝ်းဢိသရေႇလဢိၵ်ႇတင်းမဵဝ်းယုတတင်းသဵင်ႈတင်းလူင်လႄႈတီႈမဵဝ်းဢေႇၽရိမ်ႇတင်းမဵဝ်းမၼႃႇသေႇၵေႃႈမၼ်းတႅမ်ႈလိၵ်ႈႁွင်ႉထိုင်ၵႂႃႇႁႂ်ႈၶဝ်မႃးၵႃႈတီႈႁိူၼ်းထႃႇဝရႃႉၽြႃးၵႃႈၼႂ်းဝဵင်းယေႇရုသလႅမ်ႇလႄႈၶၢမ်ႇပွႆးပႃသၶႃႇတီႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလၼၼ်ႉဢေႃႈ။
၂ လွင်ႈမၼ်းၸမ်းၶုၼ်ႁေႃၶမ်းတိူင်ႇပၢင်ႇလႄႈမူးမၢတ်ႈၽွင်းမိူင်းတင်းလၢႆဢိၵ်ႇတင်းပရိၵ်ႈသၢတ်ႈဢၼ်မီးၵႃႈၼႂ်းဝဵင်းယေႇရုသလႅမ်ႇတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်ၸီႇယၢင်ႇႁႂ်ႈလႆႈၶၢမ်ႇပွႆးပႃသၶႃႇၼႂ်းလိူၼ်တုတိယၼၼ်ႉဢေႃႈ။
၃ ၼႂ်းလိူၼ်ဢၼ်ပူၼ်ႉမႃးယဝ်ႉၼၼ်ႉၵွပ်ႈပိူဝ်ႈယိတ်ႉပရေႃးႁိၵ်ႈတင်းလၢႆဢမ်ႇပႆႇႁႂ်ႈတူဝ်ၸဝ်ႈၵဝ်ႇမူတ်းၸၢင်ႇႁႂ်ႈပေႃးၵုမ်ႇႁႂ်ႈလႆႈႁဵတ်းဢမူႉၸဝ်ႈဢိၵ်ႇတင်းၵွပ်ႈပိူဝ်ႈဢၼ်ၵူၼ်းဝၢၼ်ႈၵူၼ်းမိူင်းတင်းလၢႆဢမ်ႇပႆႇၸူႉၵၼ်တုမ်ၵၼ်ၵႃႈတီႈဝဵင်းယေႇရုသလႅမ်ႇၼၼ်ႉလႄႈဢမ်ႇပႆႇၶၢမ်ႇပွႆးၼၼ်ႉလႆႈ။
၄ ၵွပ်ႈပိူဝ်ႈလွင်ႈတၢင်းၼၼ်ႉပဵၼ်ဢၼ်လီထုၵ်ႇတႃႇၶုၼ်ႁေႃၶမ်းဢိၵ်ႇတင်းပရိၵ်ႈသၢတ်ႈတင်းသဵင်ႈတင်းလူင်လႄႈၶဝ်ဢွၼ်ၵၼ်ၸီႇယၢင်ႇႁဵတ်းဢမိင်ႉၵျေႃႇၺႃႇပၼ်ငိၼ်းၵႂႃႇတီႈမိူင်းဢိသရေႇလတင်းသဵင်ႈတင်းမူတ်းၵႃႈတီႈဝဵင်းပေႇရသေႇၽတေႃႇထိုင်ႁွတ်ႈဝဵင်းတၼ်ႇလႄႈႁႂ်ႈၶဝ်ဢွၼ်ၵၼ်လုၵ်ႉလႄႈၶၢမ်ႇပွႆးပႃသၶႃႇတီႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလၵႃႈၼႂ်းဝဵင်းယေႇရုသလႅမ်ႇဢေႃႈ။
၅ လွင်ႈမၼ်းၸမ်းၶဝ်ဢမ်ႇလႆႈၶၢမ်ႇပွႆးပႃသၶႃႇဢၼ်ၸွမ်းၵႃႈၼင်ႇဢၼ်တႅမ်ႈဝႆႉၼႂ်းၵျၢမ်းလိၵ်ႈၼၼ်ႉလႄႈယူႇၶိင်ႇၵႃႇလႃႉႁိုင်ၼႃႇလူင်လၢင်ယဝ်ႉ။
၆ လိၵ်ႈဢၼ်ၶုၼ်ႁေႃၶမ်းဢိၵ်ႇတင်းမူးမၢတ်ႈၽွင်းမိူင်းၸိူဝ်းၼၼ်ႉပၼ်ၼၼ်ႉၵူၼ်းဢွၼ်ႇဢၼ်ၶုၼ်ႇလႅၼ်ႈသူင်လိၵ်ႈတင်းလၢႆဢွၼ်ၵၼ်ပႃးဢဝ်လႄႈၵႂႃႇၵႃႈတီႈမိူင်းဢိသရေႇလတင်းမိူင်းယုတတင်းသဵင်ႈတင်းမူတ်းၸွမ်းၵႃႈၼင်ႇဢၼ်ဢမိင်ႉၶုၼ်ႁေႃၶမ်းမီးၼၼ်ႉဢေႃႈ။ၵႂၢမ်းဢၼ်ပႃးၼႂ်းလိၵ်ႈၸိူဝ်းၼၼ်ႉၸမ်း၊-ၵူၼ်းမဵဝ်းဢိသရေႇလၶဝ်ဢိူၺ်း။ဢွၼ်ၵၼ်ၶိုၼ်းမႃးၸူးတီႈထႃႇဝရႃႉၽြႃးၽြႃးပဵၼ်ၸဝ်ႈဢႃႇပႁမ်ႇ၊ဢိၸၵ်ႉ၊ယႃႇၵုပ်ႉၼၼ်ႉႁႂ်ႈမၼ်းၸဝ်ႈၶိုၼ်းမႃးၸူးၵႃႈတီႈၶဝ်ၸိူဝ်းဢၼ်လွတ်ႈသေၵႃႈၼႂ်းမိုဝ်းၶုၼ်ႁေႃၶမ်းဢႃႇသုရိလႄႈယင်းၵိုတ်းယင်းၵျၢၼ်ႇယူႇၸိူဝ်းၼႆႉတႃႉ။
၇ ယႃႇပေဢွၼ်ၵၼ်ႁဵတ်းၸိူဝ်ႉၼင်ႇပူႇသူပေႃႈသူဢိၵ်ႇတင်းပီႈသူၼွင်ႉသူဢၼ်ၽိတ်းပိူင်ႈထႃႇဝရႃႉၽြႃးလႄႈႁႂ်ႈမၼ်းၸဝ်ႈထၼ်ႈပေႃးလႆႈဢဝ်ၶဝ်ဢၢပ်ႈပၼ်ၵႃႈတီႈတၢင်းဢၼ်ယႃႉၽဵဝ်ႈပႅတ်ႈမူတ်းမူတ်းသဵင်ႈသဵင်ႈၵႃႈၼင်ႇဢၼ်သူလႆႈႁၼ်ၼၼ်ႉသေၵမ်း။
၈ ယႃႇပေဢွၼ်ၵၼ်မီးလမ်းၶေႃးဢၼ်ၵႅၼ်ႇၶႅင်မိူၼ်ၸိူဝ်ႉၼင်ႇပူႇသူပေႃႈသူၸိူဝ်းၼၼ်ႉ။ဢွၼ်ၵၼ်ဢဝ်တူဝ်ၸဝ်ႈၵဝ်ႇဢၢပ်ႈပၼ်တီႈထႃႇဝရႃႉၽြႃးတႃႉ။
၉ ဢွၼ်ၵၼ်ၶဝ်ႈၵႃႈၼႂ်းထႃႇၼႃႉတီႈမူတ်းၸၢင်ႇၸဝ်ႈဢၼ်မၼ်းၸဝ်ႈႁႂ်ႈမူတ်းၸၢင်ႇယူႇတႃႇသေႇၼၼ်ႉလႄႈပႂ်ႉဢမူႉထႃႇဝရႃႉၽြႃးၽြႃးပဵၼ်ၸဝ်ႈႁႂ်ႈတၢင်းၸႂ်မႆႈၶႆႈၸႃႉၸဝ်ႈဢၼ်ႁႅင်းယႂ်ႇၼႃႇၼၼ်ႉလႆႈဝႄႈပိူင်ႈသေၵႃႈတီႈသူၵႂႃႇတႃႉ။ပေႃးသူၶိုၼ်းမႃးၸူးတီႈထႃႇဝရႃႉၽြႃးၸိုင်ပီႈသူၼွင်ႉသူလုၵ်ႈလၢင်းသူၸိူဝ်းၼၼ်ႉတၵ်းလႆႈထူပ်းၸႂ်ၵရူႉၼႃႇၵႃႈတီႈၽၢႆႇၼႃႈၶဝ်ၸိူဝ်းဢၼ်တီႉလႆႈသိမ်းဢဝ်ၶဝ်ၵႂႃႇၸိူဝ်းၼၼ်ႉလႄႈလႆႈၶိုၼ်းမႃးၸူးၵႃႈတီႈမိူင်းၼႆႉဢေႃႈ။လွင်ႈမၼ်းၸမ်းပေႃးသူၶိုၼ်းမႃးၸိုင်ထႃႇဝရႃႉၽြႃးၽြႃးပဵၼ်ၸဝ်ႈသူၼၼ်ႉမီးသၽေႃးဢၼ်ၶႂ်ႈႁဵတ်းၵျေးၸူးသၽေႃးဢၼ်ၸၢင်ႊဢိတ်းလူလႄႈမၼ်းၸဝ်ႈဢမ်ႇဝၢႆႇၼႃႈမၼ်းၸဝ်ႈပဵတ်ႈသူၵူၺ်း၊ဝႃႈၼင်ႇၼႆဢေႃႈ။
၁၀ ၼင်ႇၼၼ်လႄႈၵူၼ်းဢွၼ်ႇဢၼ်ၶုၼ်ႇလႅၼ်ႈသူင်ႇလိၵ်ႈၸိူဝ်းၼၼ်ႉဢွၼ်ၵၼ်ၵႂႃႇၵႃႈတီႈဝဵင်းၼိုင်ႈယဝ်ႉဝဵင်းၼိုင်ႈၼႂ်းလႅၼ်လိၼ်ဢေႇၽရိမ်ႇ၊လႅၼ်လိၼ်မၼႃႇသေႇတင်းသဵင်ႈတင်းမူတ်းတေႃႇထိုင်ႁွတ်ႈလႅၼ်လိၼ်ၸေႇပုလုၼ်ႇဢေႃႈ။ၵူၺ်းၵႃႈၶဝ်ၸိူဝ်းၼၼ်ႉဢွၼ်ၵၼ်ႁဵတ်းပျၢၵ်ႈႁဵတ်းၶူဝ်ၶဝ်သေလႄႈသေႉသွမ်းဢေႃႈ။
၁၁ ၼႂ်းဝႃႈၼၼ်သေၵေႃႈၵူၼ်းမဵဝ်းဢႃႇသ၊ၵူၼ်းမဵဝ်းမၼႃႇသေႇ၊ၵူၼ်းမဵဝ်းၸေႇပုလုၼ်ႇၵမ်ႈၽွင်ႈၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇလႄႈဢွၼ်ၵၼ်မႃးၵႃႈတီႈဝဵင်းယေႇရုသလႅမ်ႇဢေႃႈ။
၁၂ ၵႃႈၼႂ်းၵူၼ်းမဵဝ်းယုတၸိူဝ်းၼၼ်ႉၵေႃႈမိုဝ်းၽြႃးပဵၼ်ၸဝ်ႈမီးယူႇလူၺ်ႈၵၼ်တင်းၶဝ်ႁႂ်ႈၶဝ်လႆႈၸႂ်ၸေႇတၼႃႇဢၼ်ၶႂ်ႈၽွမ်ႉၵၼ်ႁဵတ်းၸွမ်းၵႃႈၼင်ႇဢၼ်ၶုၼ်ႁေႃၶမ်းဢိၵ်ႇတင်းမူးမၢတ်ႈၽွင်းမိူင်းတင်းလၢႆဢဝ်ဢမိင်ႉထႃႇဝရႃႉ၁၃ ၽြႃးၸီႇယၢင်ႇဝႆႉၼၼ်ႉဢေႃႈ။ၵူၼ်းၼမ်ႇၼႃႇလူင်လၢင်ဢွၼ်ၵၼ်မႃးၸူႉၵၼ်တုမ်ၵၼ်ၵႃႈတီႈဝဵင်းယေႇရုသလႅမ်ႇႁႂ်ႈလႆႈၶၢမ်ႇပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼႂ်းလိူၼ်တုတိယၼၼ်ႉလႄႈပဵၼ်ပရိၵ်ႈသၢတ်ႈဢၼ်ယႂ်ႇၼႃႇလူင်လၢင်ဢေႃႈ။
၁၄ ၶဝ်ၼၼ်ႉဢွၼ်ၵၼ်လုၵ်ႉလႄႈပႄႇၽဵဝ်ႈယိတ်ႉပလၢင်ႇဢၼ်မီးၵႃႈတီႈဝဵင်းယေႇရုသလႅမ်ႇၸိူဝ်းၼၼ်ႉပႅတ်ႈလႄႈပႄႇၽဵဝ်ႈယိတ်ႉပလၢင်ႇဢၼ်ဢဝ်ၼၢမ်ႇသႃႇတုတ်ႇၽႆးၵႃႈမီးၼၼ်ႉပႅတ်ႈလႄႈဢဝ်ထႅမ်ႈတူၵ်းပႅတ်ႈၵႃႈၼႂ်းၼမ်ႉႁွင်ႊၵိတြုၼ်ႇဢေႃႈ။
၁၅ ၼႂ်းလိူၼ်တုတိယသိပ်းသီႇဝၼ်းၼၼ်ႉၶဝ်ၼၼ်ႉဢွၼ်ၵၼ်ဢဝ်သူဝ်းဢွၼ်ႇပႃသၶႃႇတၢႆဢေႃႈ။ယိတ်ႉပရေႃးႁိၵ်ႈလႂ်ဢိၵ်ႇတင်းၵူၼ်းမဵဝ်းလေႇဝိလႂ်ၸိူဝ်းၼၼ်ႉငိၼ်းဢူၵ်းငိၼ်းဢၢႆလႄႈဢွၼ်ၵၼ်ႁႂ်ႈတူဝ်ၸဝ်ႈၵဝ်ႇမူတ်းၸၢင်ႇသေလႄႈဢဝ်ယိၸ်ႉဢၼ်တုတ်ႇၽႆးတင်းလၢႆသႂၢင်းၶဝ်ႈၵႃႈၼႂ်းႁိူၼ်းထႃႇဝရႃႉၽြႃးဢေႃႈ။
၁၆ ၶဝ်ဢွၼ်ၵၼ်ၸုၵ်းယူႇၵႃႈၼႂ်းတီႈယူႇၽႂ်တီႈယူႇမၼ်းၸွမ်းၵႃႈၼင်ႇဢၼ်ထုင်းၸၢမ်ႇဢၼ်ၸီႇယၢင်ႇဝႆႉၵႃႈၼႂ်းပိင်းၺၢပ်ႈတြႃးမုဝ်းသေႇၵူၼ်းၽြႃးပဵၼ်ၸဝ်ႈၼၼ်ႉလႄႈယိတ်ႉပရေႃးႁိၵ်ႈၸိူဝ်းၼၼ်ႉဢွၼ်ၵၼ်ဢဝ်လိူတ်ႈၵႃႈတီႈမိုဝ်းၵူၼ်းမဵဝ်းလေႇဝိတင်းလၢႆသေလႄႈၽႅတ်းသႂ်ႇဢေႃႈ။
၁၇ ၵွပ်ႈပိူဝ်ႈဢၼ်ၶဝ်ၸိူဝ်းဢၼ်ဢမ်ႇႁႂ်ႈတူဝ်ၸဝ်ႈၵဝ်ႇမူတ်းၸၢင်ႇၼၼ်ႉပႃးၵႃႈၼႂ်းပရိၵ်ႈသၢတ်ႈၼမ်ၼႃႇလႄႈၵူၼ်းမဵဝ်းလေႇဝိတင်းလၢႆဢွၼ်ၵၼ်ပႂ်ႉဢမူႉတၢင်းဢၼ်ဢဝ်သူဝ်းဢွၼ်ႇပႃသၶႃႇၸိူဝ်းၼၼ်ႉတၢႆပုၼ်ႈၶဝ်ၵႃႈဢၼ်ဢမ်ႇမူတ်းၸၢင်ႇၼၼ်ႉႁႂ်ႈၶဝ်လႆႈမူတ်းၸၢင်ႇပုၼ်ႈထႃႇဝရႃႉၽြႃးဢေႃႈ။
၁၈ ၶဝ်ၸိူဝ်းဢၼ်ၼမ်ၼႃႇဢၼ်ဝႃႈၵူၼ်းမဵဝ်းဢေႇၽရိမ်ႇ၊ၵူၼ်းမဵဝ်းမၼႃႇသေႇ၊ၵူၼ်းမဵဝ်းဢိသၶႃႇ၊ၵူၼ်းမဵဝ်းၸေႇပုလုၼ်ႇၵမ်ႈၽွင်ႈၸိူဝ်းၼၼ်ႉယင်းဢမ်ႇႁႂ်ႈတူဝ်ၸဝ်ႈၵဝ်ႇမူတ်းၸၢင်ႇလႄႈဢွၼ်ၵၼ်ၵိၼ်သူဝ်းပႃႇသၶႃႇဢမ်ႇမႅၼ်ႈၸွမ်းၵႃႈၼင်ႇဢၼ်တႅမ်ႈဝႆႉၵႃႈၼႂ်းၵျၢမ်းလိၵ်ႈၼၼ်ႉဢေႃႈ။လွင်ႈမၼ်းၸမ်းႁေႇၸၵိသူးတွင်းပုၼ်ႈၶဝ်ၼၼ်ႉလႄႈဝႃႈ၊-
၁၉ ပိၵ်ႉသမ်ႉၶဝ်ဢမ်ႇမီးတၢင်းဢၼ်မူတ်းၸၢင်ႇၸွမ်းၵႃႈၼင်ႇထုင်းၸၢမ်ႇထႃႇၼႃႉတီႈမူတ်းၸၢင်ႇၸဝ်ႈၼၼ်ႉသေၵေႃႈထႃႇဝရႃႉၽြႃးဢၼ်မျၢတ်ႈလီၼၼ်ႉတီႈၶႃႈ၊ၶႅၼ်းတေႃႈပွႆႇလွတ်ႈဢပျႅတ်ႈၶဝ်ၵႃႈၼင်ႇဢၼ်ၶဝ်တုၵ်းၵၢင်ၸႂ်ႁႂ်ႈလႆႈႁႃဢဝ်ထႃႇဝရႃႉၽြႃးၽြႃးပဵၼ်ၸဝ်ႈပူႇၶဝ်မွၼ်ႇၶဝ်ၼၼ်ႉသေၵမ်းတီႈၶႃႈ၊ဝႃႈၼင်ႇၼႆလႄႈထႃႇဝရႃႉၽြႃးထွမ်ႇဢဝ်ၵႂၢမ်းႁေႇၸၵိၼၼ်ႉသေယဝ်ႉပၼ်ၵတ်းယဵၼ်ၶျၢမ်းသႃႇတီႈၵူၼ်းတင်းလၢႆဢေႃႈ။
၂၀ ၵူၼ်းမဵဝ်းဢိသရေႇလဢၼ်ၸူႉၵၼ်တုမ်ၵၼ်ၵႃႈတီႈဝဵင်းယေႇရုသလႅမ်ႇၸိူဝ်းၼၼ်ႉဢွၼ်ၵၼ်မီးၸႂ်ၸေႇတၼႃႇၶၢမ်ႇပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉၸဵတ်းဝၼ်းတဵမ်တဵမ်လႄႈ
၂၁ ယိတ်ႉပရေႃးႁိၵ်ႈလႂ်တင်းၵူၼ်းမဵဝ်းလေႇဝိလႂ်ၸိူဝ်းၼၼ်ႉဢွၼ်ၵၼ်ပႃးဢဝ်မဵဝ်းတူႇရီႉယႃႇဢၼ်သဵင်ယႂ်ႇသဵင်ႁႅင်းၼၼ်ႉသေလႄႈဝၼ်းၼိုင်ႈယဝ်ႉဝၼ်းၼိုင်ႈႁဵတ်းၵႂၢမ်းထေႃးပၼႃႇတီႈထႃႇဝရႃႉၽြႃးဢေႃႈ။
၂၂ ႁေႇၸၵိလၢတ်ႈၵႂၢမ်းဢၼ်ပၼ်ႁႅင်းတီႈၵူၼ်းမဵဝ်းလေႇဝိၵႃႈဢၼ်ၸၢင်ႊမေႃလူၺ်ႈလွင်ႈဢၼ်ၵိုတ်ႈႁၢပ်ႇဢမူႉထႃႇဝရႃႉၽြႃးၸိူဝ်းၼၼ်ႉလႄႈၶဝ်ၼၼ်ႉၼႂ်းၸူဝ်ႈဢၼ်ယင်းတိုၵ်ႉၶၢမ်ႇပွႆးၸဵတ်းဝၼ်းတဵမ်တဵမ်ယူႇၼၼ်ႉၸိုင်ဢွၼ်ၵၼ်ၵိၼ်ၶူပ်းယူႇ၊ပုၵ်ႉၸေႃႇယိၸ်ႉမိၵ်ႉသႁႃႇယႃႉယူႇ၊တွင်းပၢၼ်ႇတီႈထႃႇဝရႃႉၽြႃးၽြႃးပဵၼ်ၸဝ်ႈပူႇၶဝ်မွၼ်ႇၶဝ်ၼၼ်ႉယူႇဢေႃႈ။
၂၃ ပရိၵ်ႈသၢတ်ႈတင်းသဵင်ႈတင်းလူင်တိူင်ႇပၢင်ႇၵၼ်ႁႂ်ႈလႆႈထၢပ်ႈထႅင်ႈၸဵတ်းဝၼ်းသေလႄႈၶၢမ်ႇပွႆးလႄႈဢွၼ်ၵၼ်မီးတင်းၸႂ်ဢၼ်သႂၢင်ႇသိူဝ်းသေလႄႈၶၢမ်ႇပွႆးထႅင်ႈၸဵတ်းဝၼ်းဢေႃႈ။
၂၄ ႁေႇၸၵိၶုၼ်ႁေႃၶမ်းယုတၼၼ်ႉဢဝ်ဝူဝ်းႁဵင်ၼိုင်ႈ၊သူဝ်းၸဵတ်းႁႅင်ပၼ်တီႈပရိၵ်ႈသၢတ်ႈတင်းလၢႆႁႂ်ႈလႆႈႁဵတ်းတၢင်းဢၼ်ပုၵ်ႉၸေႃႇလႄႈမူးမၢတ်ႈၽွင်းမိူင်းတင်းလၢႆၵေႃႈဢွၼ်ၵၼ်ဢဝ်ဝူဝ်းႁဵင်ၼိုင်ႈတင်းသူဝ်းမိုၼ်ႇၼိုင်ႈပၼ်တီႈပရိၵ်ႈသၢတ်ႈတင်းလၢႆဢေႃႈ။ယိတ်ႉပရေႃးႁိၵ်ႈၼမ်ၼႃႇလူင်လၢင်ဢွၼ်ၵၼ်ႁႂ်ႈတူဝ်ၸဝ်ႈၵဝ်ႇမူတ်းၸၢင်ႇဢေႃႈ။
၂၅ ပရိၵ်ႈသၢတ်ႈယုတတင်းသဵင်ႈတင်းလူင်တင်းယိတ်ႉပရေႃးႁိၵ်ႈလႂ်၊တင်းၵူၼ်းမဵဝ်းလေႇဝိလႂ်ဢိၵ်ႇတင်းပရိၵ်ႈသၢတ်ႈဢၼ်လုၵ်ႉသေၵႃႈၼႂ်းမိူင်းဢိသရေႇလမႃးတင်းသဵင်ႈတင်းလူင်တင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်လုၵ်ႉသေၵႃႈၼႂ်းမိူင်းဢိသရေႇလမႃးလႄႈယူႇၵႃႈၼႂ်းမိူင်းယုတၸိူဝ်းၼၼ်ႉဢွၼ်ၵၼ်မီးတၢင်းဢၼ်ၸူမ်းသိူဝ်းဢေႃႈ။
၂၆ ၼင်ႇၼၼ်လႄႈၵႃႈၼႂ်းဝဵင်းယေႇရုသလႅမ်ႇၼၼ်ႉမီးတၢင်းဢၼ်ၸူမ်းဢၼ်သိူဝ်းဢၼ်ယႂ်ႇၼႃႇလူင်လၢင်ဢေႃႈ။ဢဝ်ၵႃႈတီႈၸႃႉၸဵမ်ၸူဝ်ႈပၢၼ်သေႃးလမုၼ်ႇလုၵ်ႈၸၢႆးတႃႇဝိတ်ႉၶုၼ်ႁေႃၶမ်းဢိသရေႇလၼၼ်ႉမႃးၼၼ်ႉၵႃႈၼႂ်းဝဵင်းယေႇရုသလႅမ်ႇၼၼ်ႉဢမ်ႇမီးတၢင်းဢၼ်ၸူမ်းသိူဝ်းဢၼ်ယႂ်ႇၼႃႇလူင်လၢင်ထၢၼ်ႇၼၼ်ႉ။
၂၇ မိူဝ်ႈၼၼ်ႉယိတ်ႉပရေႃးႁိၵ်ႈလႂ်တင်းၵူၼ်းမဵဝ်းလေႇဝိလႂ်ၸိူဝ်းၼၼ်ႉဢွၼ်ၵၼ်လုၵ်ႉလႄႈပၼ်တၢင်းလီတီႈၵူၼ်းတင်းလၢႆဢေႃႈ။သဵင်ၵႂၢမ်းၶဝ်ၼၼ်ႉၸိုင်မၼ်းၸဝ်ႈငိၼ်းလႄႈသဵင်ၵႂၢမ်းပထၼႃႇၶဝ်ၼၼ်ႉၶိုၼ်ႈၵႂႃႇႁွတ်ႈထိုင်ၵႃႈတီႈဢၼ်မၼ်းၸဝ်ႈၵိင်းဝပ်ႈယူႇဢၼ်မူတ်းၸၢင်ႇဢၼ်ဝႃႈၽုုင်ႇၵၢင်ႁၢဝ်ၼၼ်ႉဢေႃႈ။