Chapter
၂၈
ဢႃႇၶတ်ႉပဵၼ်ၶုၼ်ႁေႃၶမ်းယုတ
၁ ဢႃႇၶတ်ႉၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသၢဝ်းပီႊလႄႈမၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်းယေႇရုသလႅမ်ႇသိပ်းပၢႆႁူၵ်းပီႊဢေႃႈ။မၼ်းဢမ်ႇႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးမိူၼ်ၸိူဝ်ႉၼင်ႇၸဝ်ႈပေႃႈမၼ်းတႃႇဝဵတ်ႉႁဵတ်းၼၼ်ႉ။
၂ မၼ်းၸွမ်းသဵၼ်ႈတၢင်းဢၼ်ၶုၼ်ႁေႃၶမ်းဢိသရေႇလၸွမ်းၸိူဝ်းၼၼ်ႉလႄႈလေႃႇသွၼ်းႁဵတ်းရုၵ်ႉထူႉသၢင်းထူႉပုၼ်ႈၽြႃးပႃႇလတင်းလၢႆဢေႃႈ။
၃ မၼ်းဢဝ်ၼၢမ်ႇသႃႇတုတ်ႇၽႆးၵႃႈၼႂ်းၶူင်ႈႁူၺ်ႈလုၵ်ႈၸၢႆးႁိၼ်ႇၼုမ်ႇလႄႈဢဝ်လုၵ်ႈလၢင်းမၼ်းတုတ်ႇၽႆးပုၵ်ႉၸေႃႇၸွမ်းၵႃႈၼင်ႇထုင်းၸၢမ်ႇဢၼ်လီႁင်ႈဢဵတ်ႇသဵတ်ႇၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ထႃႇဝရႃႉၽြႃးႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်းဢိသရေႇလတင်းလၢႆၸိူဝ်းၼၼ်ႉဢေႃႈ။
၄ မၼ်းပုၵ်ႉၸေႃႇယိၸ်ႉလႄႈဢဝ်ၼၢမ်ႇသႃႇတုတ်ႇၽႆးၵႃႈၼိူဝ်ထႃႇၼႃႉတီႈသုင်လႂ်၊ၵႃႈၼိူဝ်ၵုင်းလႂ်၊ၵႃႈတႂ်ႈတူၼ်ႈမႆႉဢၼ်ၶဵဝ်လႂ်ဢေႃႈ။
၅ ပိူဝ်ႈဢၼ်ပဵၼ်ၼင်ႇၼႆလႄႈထႃႇဝရႃႉၽြႃးၽြႃးပဵၼ်ၸဝ်ႈဢဝ်မၼ်းဢၢပ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်းသုရိလႄႈၶဝ်ၼၼ်ႉဢွၼ်ၵၼ်တိုၵ်းတေႃးယႃႉပႅတ်ႈမၼ််းလႄႈသိမ်းဢဝ်ၵူၼ်းဢၼ်တီႉလႆႈၼမ်ၼႃႇၸိူဝ်းၼၼ်ႉသေလႄႈဢဝ်ၵႂႃႇၵႃႈတီႈဝဵင်းထမ်ႇမသႅတ်ႉဢေႃႈ။မၼ်းယင်းလႆႈၶၢမ်ႇတၢင်းဢၼ်ဢဝ်ဢၢပ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်းဢိသရေႇလဢၼ်ႁဵတ်းတၢင်းဢၼ်ၶႃႈၽၼ်းဢဝ်တၢႆယႂ်ႇၼႃႇၼၼ်ႉသေလႄႈတိုၵ်းတေႃးယႃႉပႅတ်ႈမၼ်းဢေႃႈ။
၆ ၼႂ်းဝၼ်းလဵဝ်ၵူၺ်းပေႇၵႃႇလုၵ်ႈၸၢႆးရေႇမလိၼၼ်ႉဢဝ်ၵူၼ်းမဵဝ်းယုတဢၼ်ႁတ်းႁၢၼ်ၼၼ်ႉတၢႆသႅၼ်ပၢႆသွင်မိုၼ်ႇဢေႃႈ။လွင်ႈမၼ်းၸမ်းၶဝ်ဢွၼ်ၵၼ်ၸုၼ်ႉပႅတ်ႈထႃႇဝရႃႉၽြႃးၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉဢေႃႈ။
၇ ၸိၶရိၵူၼ်းဢေႇၽရိမ်ႇဢၼ်ႁႅင်းယႂ်ႇၼႃႇၼၼ်ႉဢဝ်မႃႇသေႇယလုၵ်ႈၸၢႆးၶုၼ်ႁေႃၶမ်းဢႃႇၸရိၵမ်ႇၵေႃႉဢၼ်ဢုပ်ႉၵႃႈၼိူဝ်ႁေႃၸဝ်ႈဢေႇလၵႃႇၼၶုၼ်တုတိယတႂ်ႈၶုၼ်ႁေႃၶမ်းၸိူဝ်းၼၼ်ႉတၢႆဢေႃႈ။
၈ ၵူၼ်းမဵဝ်းဢိသရေႇလၸိူဝ်းၼၼ်ႉၵေႃႈဢွၼ်ၵၼ်တီႉဢဝ်သိမ်းဢဝ်ၵူၼ်းၸၢႆးၵူၼ်းယိင်းလုၵ်ႈၸၢႆးလုၵ်ႈယိင်းသွင်သႅၼ်ဢၼ်ပဵၼ်ပီႈၼွင်ႉၸိူဝ်ႉၶိူဝ်းၶဝ်ၼၼ်ႉၵႂႃႇလႄႈဢွၼ်ၵၼ်ႁိမ်ႁူင်ႇဢဝ်ဢုၵ်ႉၸႃႇဢၼ်ၼမ်ၼႃႇၸိူဝ်းၼၼ်ႉၵႂႃႇၵႃႈတီႈဝဵင်းသမႃႇရိဢေႃႈ။
၉ မိူဝ်ႈၼၼ်ႉမီးပရေႃးၽိတ်ႈထႃႇဝရႃႉၽြႃးဢၼ်လႆႈၸိုဝ်ဢုဝ်ႇတိတ်ႉၼၼ်ႉပႃးၼိုင်ႈၵႃႈတီႈၼၼ်ႉလႄႈမၼ်းၼၼ်ႉဢွၵ်ႇႁပ်ႉႉႁူဝ်တၢင်းတပ်ႉဢၼ်ၶိုၼ်းမႃးၸူးၵႃႈတီႈဝဵင်းသမႃႇရိၼၼ်ႉလႄႈဝႃႈ၊-တူၺ်းလူ။ၵွပ်ႈပိူဝ်ႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈပူႇမွၼ်ႇသူၸႂ်မႆႈၶႆႈၸႃႉတီႈမိူ်င်းယုတလႄႈမၼ်းၸဝ်ႈဢဝ်ၶဝ်ၼၼ်ႉဢၢပ်ႈပၼ်ၵႃႈၼႂ်းမိုဝ်းသူလႄႈသူဢွၼ်ၵၼ်ပႃးတင်းဢၢႆႁႅင်းတေႃးသႃႉတၢင်းၸႂ်မႆႈၶႆႈၸႃႉဢၼ်ၶိုတ်းထိုင်ႁွတ်ႈၵႃႈတီႃႈႉၵၢင်ႁၢဝ်ၼၼ်ႉသေလႄႈဢဝ်ၶဝ်တၢႆယဝ်ႉလူင်ပေႇ။
၁၀ မိူဝ်ႈလဵဝ်ၼႆႉၵေႃႈသူဢွၼ်ၵၼ်မီးတၢင်းၵျၢမ်ႇတၢင်းပွင်တၵ်းဢဝ်ၵူၼ်းမိူင်းယုတတင်းၵူၼ်းဝဵင်းယေႇရုသလႅမ်ႇတင်းလၢႆႁဵတ်းၶႃႈၵူၼ်းၸၢႆးၶႃႈၵူၼ်းယိင်းတီႈသူလႄႈၼိၵ်ႈၸၢၵ်ႈငႅၼ်းသေးၶဝ်လူင်ပေႇ။သူယင်းမီးဢပျႅတ်ႈဢၼ်သူလႆႈၽိတ်းပိူင်ႈထႃႇဝရႃႉၽြႃးၽြႃးပဵၼ်ၸဝ်ႈသူၼၼ်ႉယူႇဢမ်ႇၸႂ်ႈႁိုဝ်။
၁၁ သူဢွၼ်ၵၼ်ထွမ်ႇဢဝ်ၵႂၢမ်းၵဝ်လႄႈပွႆႇပီႈသူၼွင်ႉသူဢၼ်သူတီႉၵမ်သိမ်းဢဝ်မႃးၸိူဝ်းၼႆႉၶိုၼ်းမိူဝ်းၵႂႃႇသတေႃႉ။လွင်ႈမၼ်းၸမ်းတၢင်းၸႂ်မႆႈၶႆႈၸႃႉထႃႇဝရႃႉၽြႃးဢၼ်ႁႅင်းယႂ်ႇၼႃႇၼၼ်ႉတၵ်းတူၵ်းႁွတ်ႈၵႃႈၼိူဝ်သူဢေႃႈ၊ဝႃႈၼင်ႇၼႆဢေႃႈ။
၁၂ မိူဝ်ႈၼၼ်ႉၶဝ်ၸိူဝ်းဢၼ်ပဵၼ်တူၼ်ႈပဵၼ်ငဝ်ႈၼႂ်းမဵဝ်းၵူၼ်းဢေႇၽရိမ်ႇဢၼ်ဝႃႈဢႃႇၸရိလုၵ်ႈၸၢႆးယေႃႇႁၼၼ်ႇ၊ပေႇရၶိလုၵ်ႈၸၢႆးမေႇသိလမုတ်ႉ၊ႁေႇၸၵိလုၵ်ႈၸၢႆးသႃႇလုမ်ႇ၊ဢႃႇမသႃႇလုၵ်ႈၸၢႆးႁႃႇတလႆၸိူဝ်းၼၼ်ႉႁၢမ်ႈတပ်ႉႁႄႉၶႅၼ်ဢဝ်ၸိူဝ်းဢၼ်လုၵ်ႉသေၵႃႈတီႈဢၼ်တိုၵ်းသိုၵ်းမႃးၼၼ်ႉလႄႈဝႃႈ၊-သူဢမ်ႇလႆႈဢဝ်ၶဝ်ၸိူဝ်းဢၼ်သူတီႉလႆႈသိမ်းဢဝ်မႃးၼၼ်ႉသႂၢင်းၶဝ်ႈၵႃႈၼႂ်းဝဵင်းၼႆႉ။
၁၃ သူဢွၼ်ၵၼ်ၵျၢမ်ႇပွင်ႁႂ်ႈလွင်ႈတၢင်းဢၼ်ၽိတ်းပိူင်ႈထႃႇဝရႃႉၽြႃးႁွတ်ႈထိုင်ၵႃႈၼိူဝ်ႁဝ်းလႄႈဢဝ်ထၢပ်ႈသႂ်ႇထႅင်ႈၵႃႈၼိူ်ဝ်ဢပျႅတ်ႈႁဝ်းဢိၵ်ႇတင်းတၢင်းဢၼ်ႁဝ်းလႆႈၽိတ်းပိူင်ႈၸိူဝ်းၼၼ်ႉလူင်ပေႇ။မိူဝ်ႈလဵဝ်ၼႆႉဢပျႅတ်ႈႁဝ်းယႂ်ႇၼႃႇလူင်လၢင်လႄႈတၢင်းၸႂ်မႆႈၶႆႈၸႃႉၸဝ်ႈဢၼ်ႁႅင်းယႂ်ႇၼႃႇၼၼ်ႉယင်းတိုၵ်ႉဢွၵ်ႇၸူးၵႃႈတီႈမဵဝ်းဢိသရေႇလယူႇဢေႃႈ၊ဝႃႈၼင်ႇၼႆဢေႃႈ။
၁၄ ပိူဝ်ႈၼႆလႄႈႁူဝ်ႁၢၼ်ၵူၼ်းသိုၵ်းၸိူဝ်းၼၼ်ႉဢွၼ်ၵၼ်ဢဝ်ၶဝ်ၸိူ်ဝ်းဢၼ်တီႉလႆႈသိမ်းဢဝ်မႃးဢိၵ်ႇတင်းၶွင်ၶူဝ်းဢၼ်သိမ်းဢဝ်မႃးၸိူဝ်းၼၼ်ႉဝႆႉၵႃႈတီႈၽၢႆႇၼႃႈၶုၼ်တင်းလၢႆဢိၵ်ႇတင်းပရိၵ်ႈသၢတ်ႈတင်းသဵင်ႈတင်းလူင်ၼၼ်ႉဢေႃႈ။
၁၅ ၵႃႈၼင်ႇဢၼ်ဢဝ်ၸိုဝ်သဵင်လႄႈမၵ်းၶၢၼ်းဝႆႉၸိူဝ်းၼၼ်ႉၶဝ်ဢွၼ်ၵၼ်လုၵ်ႉလႄႈႁွင်ႉဢဝ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်တီႉလႆႈသိမ်းဢဝ်မႃးၸိူဝ်းၼၼ်ႉမႃးသေလႄႈဢဝ်ၶွင်ၶူဝ်းဢၼ်သိမ်းဢဝ်မႃးၸိူဝ်းၼၼ်ႉပၼ်တီႈၶဝ်ၸိူဝ်းဢၼ်ဢမ်ႇမီးၶူဝ်းၼုင်ႈၼၼ်ႉၼုင်ႈမႆႊဢေႃႈ။ဢွၼ်ၵၼ်ႁႂ်ႈၶဝ်တိုဝ်းၶႅပ်းတိၼ်လႄႈပၼ်ပုၼ်ႈဢၼ်ၶဝ်တၵ်းၵိၼ်တၵ်းၶူပ်းဢေႃႈ။ဢွၼ်ၵၼ်ဢဝ်ၼမ်ႉမၼ်းတႃးပၼ်ၶဝ်လႄႈဢဝ်ၶဝ်ၵႃႈဢၼ်ဢမ်ႇမီးဢဵၼ်မီးႁႅင်းၸိူဝ်းၼၼ်ႉတၢင်ႇၵႃႈၼိူဝ်လီႈသေလႄႈဢဝ်သူင်ႇၵႂႃႇၵႃႈတီႈဝဵင်းတူၼ်ႈထၼ်းဢၼ်ဝႃႈဝဵင်းယေႇရိၶုဝ်းတီႈဢၼ်ပီႈၶဝ်ၼွင်ႉၶဝ်မီးၼၼ်ႉသေယဝ်ႉၶဝ်ၼၼ်ႉဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈဝဵင်းသမႃႇရိဢေႃႈ။
၁၆ မိူဝ်ႈၼၼ်ႉၶုၼ်လူင်ဢႃႇၶတ်ႉပွႆႇၸႂ်ႉၸူးၵႃႈတီႈၶုၼ်ႁေႃၶမ်းဢႃႇသုရိႁႂ်ႈမႃးၸွႆႈမႃးထႅမ်မၼ်းဢေႃႈ။
၁၇ လွင်ႈမၼ်းၸမ်းၵူၼ်းဢေႇတုမ်ႇတင်းလၢႆသမ်ႉၶိုၼ်းမႃးသေယဝ်ႉတိုၵ်းတေႃးယႃႉပႅတ်ႈမိူင်းယုတသေလႄႈတိုၵ်းတေႃးယႃႉပႅတ်ႈမိူင်းယုတသေယဝ်ႉဢဝ်ၶဝ်ၸိူဝ်းဢၼ်တီႉၵမ်သိမ်းဢဝ်လႆႈမႃးၸိူဝ်းၼၼ်ႉၵႂႃႇဢေႃႈ။
၁၈ ၵူၼ်းၽိလိတ်ႉတိတင်းလၢႆၵေႃႈဢွၼ်ၵၼ်ၶီႇသိုၵ်းၸူးၵႃႈတီႈဝဵင်းဢၼ်မီးၵႃႈတႂ်ႈတီႈပၢင်ႇပဵင်းဢိၵ်ႇတင်းၵႃႈတီႈလိၼ်ပွတ်းတၢင်းၸၢၼ်းမိူင်းယုတၸိူဝ်းၼၼ်ႉသေယဝ်ႉသိမ်းဢဝ်ဝဵင်းသေႇမတ်ႉ၊ဝဵင်းဢႃႇၸလုၼ်ႇ၊ဝဵင်းၵေႇတရုၼ်ႇ၊ဝဵင်းသေႃႇၶေႃႇဢိၵ်ႇတင်းဝၢၼ်ႈမၼ်းတင်းလၢႆဝဵင်းၵိမၸေႃႇဢိၵ်ႇတင်းဝၢၼ်ႈမၼ်းတင်းလၢႆသေလႄႈၶျႃးတီႈယူႇၶဝ်ယူႇၵႃႈတီႈၼၼ်ႉဢေႃႈ။
၁၉ ၵွပ်ႈပိူဝ်ႈဢႃႇၶတ်ႉၶုၼ်ႁေႃၶမ်းဢိသရေႇလၼၼ်ႉလႄႈထႃႇဝရႃႉၽြႃးၶျႃးမိူင်းယုတတူၵ်းတီႈတႅမ်ႇၼႃႇလူင်လၢင်ဢေႃႈ။မၼ်းၼၼ်ႉထွတ်ႇၶူဝ်းၼုင်ႈတၢင်းမႆႊမိူင်းယုတပႅတ်ႈလႄႈၽိတ်းပိူင်ႈထႃႇဝရႃႉၽြႃးၵျၢမ်းထၢမ်းၼႃႇလူင်လၢင်ဢေႃႈ။
၂၀ ပိၵ်ႉသမ်ႉတိၵလတ်ႉပိလေႇသႃႇၶုၼ်ႁေႃၶမ်းဢႃႇသုရိမႃးတီႈမၼ်းလႄႈႁႂ်ႈမၼ်းမီးတုၵ်ႉၶႃႉတၢင်းဢၼ်ၶၢၼ်ၸႂ်ၵွပ်ႈသေၵေႃႈဢမ်ႇပၼ်ႁႅင်းတီႈမၼ်း။
၂၁ လွင်ႈမၼ်းၸမ်းပိၵ်ႉသမ်ႉဢႃႇၶတ်ႉဢဝ်ၵႃႈၼႂ်းၽၼ်ႇတႃႇႁိူၼ်းထႃႇဝရႃႉၽြႃးဢိၵ်ႇတင်းၵႃႈၼႂ်းၽၼ်ႇတႃႇႁေႃၸဝ်ႈတင်းၵႃႈၼႂ်းၶွင်ၶူဝ်းမူးမၢတ်ႈၽွင်းမိူင်းတင်းလၢႆၸိူဝ်းၼၼ်ႉသေလႄႈပၼ်တီႈၶုၼ်ႁေႃၶမ်းဢႃႇသုရိသေၵေႃႈမၼ်းၼၼ်ႉဢမ်ႇၸွႆႈထႅမ်မၼ်း။
၂၂ ၶုၼ်လူင်ဢႃႇၶတ်ႉၼၼ်ႉၼႂ်းမိူဝ်ႈဢၼ်မၼ်းလႆႈၶၢမ်ႇတုၵ်ႉၶႃႉတၢင်းဢၼ်ၶၢၼ်ၸႂ်ၼၼ်ႉၸိုင်မၼ်းယိင်ႈၶႅၼ်းၽိတ်းပိူင်ႈထႃႇဝရႃႉၽြႃးဢေႃႈ။
၂၃ မၼ်းပုၵ်ႉၸေႃႇယိၸ်ႉတီႈၽြႃးဝဵင်းထမ်ႇမသႅတ်ႉဢၼ်ယႃႉမၼ်းပႅတ်ႈၸိူဝ်းၼၼ်ႉလႄႈဝႃႈ၊-ၵွပ်ႈပိူဝ်ႈဢၼ်ၽြႃးဢၼ်ၶုၼ်ႁေႃၶမ်းသုရိတင်းလၢႆၵူဝ်းၵႂၢႆႇၸိူဝ်းၼၼ်ႉၸၢင်ႊၸွႆႈထႅမ်ၶဝ်ၼၼ်ႉလႄႈၵဝ်တၵ်းပုၵ်ႉၸေႃႇယိၸ်ႉတီႈၶဝ်ႁႂ်ႈၶဝ်ၸွႆႈထႅမ်ၵဝ်ဢေႃႈ၊ဝႃႈၼင်ႇၼႆသေၵေႃႈၽြႃးၸိူဝ်းၼၼ်ႉပဵၼ်လွင်ႈဢၼ်မၼ်းဢိၵ်ႇတင်းမဵဝ်းဢိသရေႇလတင်းသဵင်ႈတင်းလူင်လႆႈလူႉလႆႈသုမ်းဢေႃႈ။
၂၄ မီးၽဝ်ႇၼိုင်ႈဢႃႇၶတ်ႉဢဝ်ၶိူင်ႈပိူင်ႁိူၼ်းၽြႃးပဵၼ်ၸဝ်ႈၸူႉၵၼ်ၶွၼ်ႈၵၼ်ဝႆႉလႄႈႁၵ်းႁိၵ်းပဵၼ်ပွတ်းပဵၼ်တွၼ်ႈသေယဝ်ႉဢိုတ်းႁပ်းၽၵ်းတူႁိူၼ်းထႃႇဝရႃႉၽြႃးၸိူဝ်းၼၼ်ႉဝႆႉသေဢေႃႈ။မၼ်းတႄႇႁဵတ်းယိတ်ႉပလၢင်ႇၵႃႈၼႂ်းၸဵင်ႇဝဵင်းယေႇရုသလႅမ်ႇၵူႈၸဵင်ႇဢေႃႈ။
၂၅ မၼ်းတႄႇႁဵတ်းထႃႇၼႃႉတီႈသုင်ၵႃႈၼႂ်းဝဵင်းယုတၵူႈဝဵင်းႁင်းၽႂ်ႁင်းမၼ်းပုၼ်ႈဢၼ်တၵ်းဢဝ်ၼၢမ်ႇသႃႇတုတ်ႇၽႆးတီႈၽြႃးတၢင်ႇသူႇတၢင်ႇပႃးတင်းလၢႆလႄႈတိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃးၽြႃးပဵၼ်ၸဝ်ႈပူႇမွၼ်ႇမၼ်းၼၼ်ႉဢေႃႈ။
၂၆ လွင်ႈတၢင်းဢႃႇၶတ်ႉဢၼ်ယင်းၵိုတ်းယင်းၵျၢၼ်ႇသဵၼ်ႈတၢင်းၵႃႈဢၼ်မၼ်းၸွမ်းဢဝ်ၸဵမ်ငဝ်ႈတေႃႇပၢႆၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇယုတရႃႇၸဝၢင်ႇဢိသရေႇလဢေႃႈ။
၂၇ ဢႃႇၶတ်ႉၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈပိၵ်ႉသမ်ႉၶဝ်ဢဝ်မၼ်းသၢင်းၵျူဝ်ႇၵႃႈၼႂ်းဝဵင်းၸဝ်ႈဢၼ်ဝႃႈဝဵင်းယေႇရုသလႅမ်ႇသေၵေႃႈၶဝ်ဢမ်ႇဢဝ်သၢင်းၵျူဝ်ႇၵႃႈၼႂ်းသၢင်းၶႅင်းၶုၼ်ႁေႃၶမ်းဢိသရေႇလၸိူဝ်းၼၼ်ႉ။ႁေႇၸၵိလုၵ်ႈၸၢႆးၸဝ်ႈၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။