Chapter
၂၂
ၸႃႇၶၸိပဵၼ်ၶုၼ်ႁေႃၶမ်းယုတ
၁ ၵူၼ်းဝဵင်းယေႇရုသလႅမ်ႇၸိူဝ်းၼၼ်ႉဢွၼ်ၵၼ်ဢဝ်ၸႃႇၶၸိလုၵ်ႈၸၢႆးၶုၼ်ၵေႃႉလိုၼ်းသုတ်းၼၼ်ႉႁဵတ်းၶုၼ်ႁေႃၶမ်းတၢင်တူဝ်ၸဝ်ႈပေႃႈမၼ်းၵွပ်ႈပိူဝ်ႈမုၵ်ႉၸိူဝ်းၵူၼ်းသိုၵ်းဢၼ်ၸွမ်းလူၺ်ႈၵၼ်တင်းၵူၼ်းဢႃႇရေႇပျႃႇတင်းလၢႆမႃးလႄႈၶဝ်ႈၵႃႈၼႂ်းတပ်ႉၸိူဝ်းၼၼ်ႉဢဝ်လုၵ်ႈၸၢႆးၶုၼ်ၵေႃႉယႂ်ႇၵႃႈမီးၸိူဝ်းၼၼ်ႉတၢႆယဝ်ႉၼၼ်ႉဢေႃႈ။ၼင်ႇၼၼ်လႄႈဢႃႇၶၸိလုၵ်ႈၸၢႆးယႁေႃႇရမ်ႇၶုၼ်ႁေႃၶမ်းယုတလႆႈၼင်ႈႁၢင်ႈၼင်ႈႁေႃဢေႃႈ။
၂ ဢႃႇၶၸိၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသီႇသိပ်းပၢႆသွင်ပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇပီႊၼိုင်ႈဢေႃႈ။
၃ ၸိုဝ်သဵင်မေႈၸဝ်ႈၸမ်းပဵၼ်ဢႃႇထလိ၊လၢၼ်ယိင်းဢေႃႇမရိဢေႃႈ။ၵွပ်ႈပိူဝ်ႈမေႈၸဝ်ႈၼၼ်ႉပၼ်တၢင်းၵျၢမ်ႇတၢင်းပွင်ဢၼ်ဢမ်ႇလီတီႈမၼ်းလႄႈမၼ်းၸွမ်းသဵၼ်ႈတၢင်းဢၼ်မဵဝ်းၸိူဝ်ႉၶိူဝ်းဢႃႇႁပ်ႉၸွမ်းၼၼ်ႉလႄႈႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးမိူၼ်ၸိူဝ်ႉၼင်ႇမဵဝ်းၸိူဝ်ႉၶိူဝ်းဢႃႇႁပ်ႉၼၼ်ႉဢေႃႈ။
၄ လိုၼ်းသေၸဝ်ႈပေႃႈမၼ်းတၢႆယဝ်ႉၼၼ်ႉၶဝ်ဢွၼ်ၵၼ်ပၼ်တၢင်းၵျၢမ်ႇတၢင်းပွင်ဢၼ်ဢမ်ႇလီတီႈမၼ်းႁႂ်ႈမၼ်းသုမ်းဢေႃႈ။
၅ မၼ်းထွမ်ႇဢဝ်ၸွမ်းဢဝ်ၵႂၢမ်းၶဝ်ၼၼ်ႉလႄႈမိူဝ်ႈဢၼ်ၸွမ်းလူၺ်ႈၵၼ်တင်းယုဝ်ႇရမ်ႇလုၵ်ႈၸၢႆးဢႃႇႁပ်ႉၶုၼ်ႁေႃၶမ်းဢိသရေႇလသေလႄႈၶီႇသိုၵ်းၵႂႃႇႁႂ်ႈလႆႈတိုၵ်းတေႃးႁႃႇၸေႇလၶုၼ်ႁေႃၶမ်းသုရိၵႃႈတီႈဝဵင်းရႃႇမုတ်ႉမိူင်းၵိလတ်ႉၼၼ်ႉၸိုင်ၵူၼ်းသုရိၸိူဝ်းၼၼ်ႉဢွၼ်၆ ၵၼ်တိူဝ်ႉထုၵ်ႇသႂ်ႇယုဝ်ႇရမ်ႇဢေႃႈ။
၆ မိူဝ်ႈဢၼ်မၼ်းၶိုုၼ်းမိူဝ်းၵႂႃႇၵႃႈတီႈဝဵင်းယေႇၸရေႇလႁႂ်ႈတၢင်းၸဵပ်းဢၼ်ၶဝ်တိူဝ်ႉထုၵ်ႇသႂ်ႇတီႈမၼ်းၵႃႈတီႈဝဵင်းရႃႇမၼႂ်းမိူဝ်ႈဢၼ်မၼ်းတိုၵ်းတေႃးႁႃႇၸေႇသၶုၼ်ႁေႃၶမ်းသုရိၼၼ်ႉႁၢႆၼၼ်ႉၸိုင်ဢႃႇၶၸိလုၵ်ႈၸၢႆးယႁေႃႇရမ်ႇၶုၼ်ႁေႃၶမ်းယုတၼၼ်ႉလူင်းၵႂႃႇၵႃႈတီႈဝဵင်းယေႇၸရေႇလႁႂ်ႈလႆႈလူတူၺ်းယုဝ်ႇရမ်ႇလုၵ်ႈၸၢႆးဢႃႇႁပ်ႉၼၼ်ႉၵွပ်ႈပိူဝ်ႈမၼ်းၸဵပ်းၼၼ်ႉဢေႃႈ။
၇ လွင်ႈတၢင်းဢၼ်ဢႃႇၶၸိသုမ်းၸွမ်းဢၼ်ၽြႃးပဵၼ်ၸဝ်ႈၸီႇယၢင်ႇၼႂ်းလွင်ႈတၢင်းဢၼ်မၼ်းၵႂႃႇၸူးၵႃႈတီႈယုဝ်ႇရမ်ႇၼၼ်ႉၸမ်းမၼ်းႁွတ်ႈထိုင်သေယဝ်ႉၸွမ်းလူၺ်ႈၵၼ်တင်းယုဝ်ႇရမ်ႇလႄႈဢွၵ်ႇၵႂႃႇႁႂ်ႈလႆႈႁႄႉႁပ်ႉယေႇႁုလုၵ်ႈၸၢႆးၼိမ်ႇသိဢၼ်ထႃႇဝရႃႉၽြႃးပၼ်ၽိၵ်ႈသိၵ်ႈႁႂ်ႈလႆႈတီႇၽဵဝ်ႈမဵဝ်းၸိူဝ်ႉၶိူဝ်းဢႃႇႁပ်ႉပႅတ်ႈၼၼ်ႉဢေႃႈ။
၈ ယေႇႁုၼၼ်ႉမိူဝ်ႈဢၼ်မၼ်းၸီႇယၢင်ႇတြႃးတီႈမဵဝ်းၸိူဝ်ႉၶိူဝ်းဢႃႇႁပ်ႉၼၼ်ႉၸိုင်ထူပ်းႁၼ်မူးမၢတ်ႈၽွင်းမိူင်းယုတဢိၵ်ႇတင်းၶဝ်ၸိူဝ်းဢၼ်ပဵၼ်လုၵ်ႈၸၢႆးလၢၼ်ၸၢႆးၼွင်ႉၸၢႆးဢႃႇၶၸိဢၼ်ၶႃးၸႃးတီႈဢႃႇၶၸိၸိူဝ်းၼၼ်ႉလႄႈဢဝ်ၶဝ်ၼၼ်ႉတၢႆဢေႃႈ။
၉ မၼ်းႁႃဢဝ်ဢႃႇၶၸိဢၼ်တဵတ်ႇမႅပ်းယူႇၵႃႈၼႂ်းမိူင်းသမႃႇရိၼၼ်ႉလႄႈထူပ်းႁၼ်သေယဝ်ႉဢွၼ်ၵၼ်ဢဝ်မႃးၸူးတီႈယေႇႁုလႄႈဢဝ်တၢႆသေလႄႈသၢင်းၵျူဝ်ႇသေဢေႃႈ။လွင်ႈမၼ်းၸမ်းၶဝ်ဝႃႈမၼ်းပဵၼ်လုၵ်ႈလၢၼ်ယုဝ်ႇသၽတ်ႉဢၼ်ပႃးႁူဝ်ၸႂ်သဵင်ႈသဵင်ႈသေလႄႈႁႃထႃႇဝရႃႉၽြႃးၼၼ်ႉဢေႃႈ၊ဝႃႈၼင်ႇၼႆဢေႃႈ။ၼင်ႇၼၼ်လႄႈမဵဝ်းၸိူဝ်ႉၶိူဝ်းဢႃႇၶၸိၼၼ်ႉဢမ်ႇတတ်ႈၼိုင်ႇလႆႈႁႂ်ႈလႆႈဢုပ်ႉပိူင်ႇသိုင်ႇၸိုင်ႈဝၢၼ်ႈမိူင်းၸဝ်ႈ။
ဢႃႇထလိတင်းယေႃႇသ
၁၀ ဢႃႇထလိဢၼ်ပဵၼ်မေႈဢႃႇၶၸိၼၼ်ႉႁူႉႁၼ်လွင်ႈဢၼ်လုၵ်ႈၸၢႆးမၼ်းတၢႆၼၼ်ႉသေယဝ်ႉလုၵ်ႉလႄႈယႃႉၽဵဝ်ႈၸိူဝ်ႉၸဝ်ႈၶိူဝ်းၶုၼ်မိူင်းယုတၵႃႈမီးၼၼ်ႉပႅတ်ႈဢေႃႈ။
၁၁ ၵူၺ်းၵႃႈယေႃႇသေၽလုၵ်ႈယိင်းၶုၼ်ႁေႃၶမ်းၼၼ်ႉလၵ်ႉဢဝ်ယေႃႇသလုၵ်ႈၸၢႆးဢႃႇၶၸိသေၵႃႈၼႂ်းလုၵ်ႈၸၢႆးၸဝ်ႈၶုၼ်ႁေႃၶမ်းဢၼ်လႆႈၶၢမ်ႇတၢႆၸိူဝ်းၼၼ်ႉလႄႈဢဝ်မၼ်းတင်းမေႈၸဝ်ႈၼုမ်းမၼ်းၼၼ်ႉသႂ်ႇဝႆႉၵႃႈၼႂ်းလုၵ်းတီႈၼွၼ်းတၢင်းၼႂ်းဢေႃႈ။ၼင်ႇၼၼ်လႄႈယေႃႇသေႇၽၼွင်ႉယိင်းဢႃႇၶၸိဢၼ်ပဵၼ်လုၵ်ႈယိင်းၶုၼ်လူင်ယႁေႃႇရမ်ႇမေးယိတ်ႉပရေႃးႁိၵ်ႈယေႃႇယတၼၼ်ႉဢဝ်မၼ်းသိူင်ႇမႅပ်းဝႆႉသေၵႃႈၼႂ်းမိူင်းဢႃႇထလိထၼ်ႈပေႃးမၼ်းဢမ်ႇလႆႈတၢႆဢေႃႈ။
၁၂ ႁူၵ်းပီႊတဵမ်တဵမ်မၼ်းလႆႈၶၢမ်ႇတၢင်းဢၼ်တဵတ်ႇမႅပ်းယူႇလူၺ်ႈၵၼ်တင်းၶဝ်ၵႃႈၼႂ်းႁိူၼ်းၽြႃးပဵၼ်ၸဝ်ႈလႄႈဢႃႇထလိၼၼ်ႉဢုပ်ႉပိူင်ႇၸၢမ်ႇၸႃးမိူင်းၸဝ်ႈယူႇဢေႃႈ။