Chapter
၃
သေႃးလမုၼ်ႇတႄႇႁဵတ်းပိၵ်ႉမၢၼ်ႇၽြႃး
၁ လိုၼ်းသေၼၼ်ႉသေႃးလမုၼ်ႇၸႃႉတႄႇႁဵတ်းႁိူၼ်းထႃႇဝရႃႉၽြႃးၵႃႈၼႂ်းဝဵင်းယေႇရုသလႅမ်ႇၵႃႈၼိူဝ်လွႆမေႃႇရိတီႈဢၼ်ထႃႇဝရႃႉၽြႃးပေႃႇမႃးတီႈၸဝ်ႈပေႃႈမၼ်းတႃႇဝိတ်ႉတီႈဢၼ်တႃႇဝိတ်ႉပွင်ႁဵတ်းပွင်ႁႅၼ်းဝႆႉၵႃႈၼႂ်းတလၢင်းယဵပ်ႇၶဝ်ႈဢေႃႇၼၼ်ႇၵူၼ်းယေႇပုသိၼၼ်ႉဢေႃႈ။
၂ မၼ်းၸႃႉတႄႇႁဵတ်းၼႂ်းပီႊဢၼ်မၼ်းၸၢမ်ႇႁၢင်ႈၸၢမ်ႇႁေႃသီႇပီႊ၊လိူၼ်တုတိယလႆႈသွင်ဝၼ်းၼၼ်ႉဢေႃႈ။
၃ ငဝ်ႈႁၢၵ်ႈဢၼ်သေႃးလမုၼ်ႇၶျႃးဝႆႉၼႂ်းလွင်ႈတၢင်းဢၼ်တႄႇႁဵတ်းႁိူၼ်းၽြႃးပဵၼ်ၸဝ်ႈၼၼ်ႉၸမ်းၸွမ်းလူၺ်ႈသွၵ်ႇဢၼ်ၶပ်ႉဢၼ်တႅၵ်ႈမိူဝ်ႈၵွၼ်ႇဢွၼ်ၼၼ်ႉၼႃႈယၢဝ်းမၼ်းမီးႁူၵ်းသိပ်းသွၵ်ႇ၊ၼႃႈၼွႆႉမၼ်းမီးသၢဝ်းသွၵ်ႇဢေႃႈ။
၄ ႁိူၼ်းၼႃႈႁိူၼ်းၸဝ်ႈၵေႃႈၼႃႈယၢဝ်းမၼ်းမီးသၢဝ်းသွၵ်ႇထၼ်ႈပဵင်းၵၼ်တင်းၼႃႈၼွႆႉႁိူၼ်းၸဝ်ႈလႄႈဢၼ်သုင်မၼ်းမီးပၢၵ်ႇပၢႆသၢဝ်းသွၵ်ႇဢေႃႈ။
၅ မၼ်းဢဝ်ၶမ်းလွတ်ႈငၢၼ်ႇဢုမ်ႇႁေႃႇဝႆႉဢေႃႈ။ႁိူၼ်းၸဝ်ႈၽၢၵ်းဢၼ်ယိင်ႈၶႅၼ်းယႂ်ႇၼၼ်ႉၵေႃႈမၼ်းဢဝ်ပႅၼ်ႈမႆႉပႅၵ်ႇမုင်းလႄႈဢဝ်ၶမ်းလွတ်ႈငၢၼ်ႇႁေႃႇသေယဝ်ႉတွင်ႈႁဵတ်းႁၢင်ႊတူၼ်ႈထၼ်းတင်းၸိူၵ်ႈလႂ်သႂ်ႇဢေႃႈ။
၆ မၼ်းဢဝ်သႅင်လီသႅင်မျၢတ်ႈၸီႇႁၢင်ႈၶိူင်ႈသႂ်ႇႁိူၼ်းၸဝ်ႈႁႂ်ႈမီးသရေႇႁၢင်ႊလီႁၢင်ႊငၢမ်းဢေႃႈ။ၶမ်းဢၼ်ဢုမ်ႇႁေႃႇၼၼ်ႉပဵၼ်ၶမ်းပႃႇလဝိမ်ႇဢေႃႈ။
၇ မၼ်းဢဝ်ၶမ်းဢုမ်ႇႁေႃႇႁိူၼ်းၸဝ်ႈဢၼ်ဝႃႈၶိုဝ်ႇမၼ်း၊ပမေၼ်း၊ၽႃမၼ်း၊မႂ်ႊၽၵ်းတူမၼ်းၸိူဝ်းၼၼ်ႉလႄႈၵႃႈၼိူဝ်ၽႃၵေႃႈတွင်ႈႁဵတ်းႁၢင်ႈၶေႇရုၽိမ်ႇတင်းလၢႆသႂ်ႇဢေႃႈ။
၈ မၼ်းႁဵတ်းထႃႇၼႃႉၸဝ်ႈတီႈဢၼ်မူတ်းၸၢင်ႇၼႃႇသပေိူၼ်ႈလႄႈၼႃႈယၢဝ်းမၼ်းမီးသၢဝ်းသွၵ်ႇထၼ်ႈပဵင်းၵၼ်တင်းၼႃႈၼွႆႉႁိူၼ်းၸဝ်ႈလႄႈၼႃႈၼွႆႉမၼ်းမီးသၢဝ်းသွၵ်ႇသေလႄႈမၼ်းဢဝ်တင်းၶမ်းလီႁူၵ်းပၢၵ်ႇတလၢၼ်ႇတၢၼ်ႇဢုမ်ႇႁေႃႇသေဢေႃႈ။ၽၢႆႇၼႃးၶမ်းတင်းလၢႆၼမ်ႉလၵ်းမီးႁႃႈသိပ်းၵျၢပ်ႈသၶေႇလဢေႃႈ။
၉ လုၵ်းႁၢၼ်ႉၼိူဝ်တင်းလၢႆၵေႃႈမၼ်းဢဝ်ၶမ်းဢုမ်ႇႁေႃႇသေဢေႃႈ။
၁၀ ၵႃႈတီႈလုၵ်းဢၼ်မူတ်းၸၢင်ႇသပေိူၼ်ႈၼၼ်ႉမၼ်းတွင်ႈႁဵတ်းႁၢင်ႈၶေႇရုၽိမ်ႇသွင်ပႃးသႂ်ႇလႄႈဢဝ်ၶမ်းဢုမ်ႇႁေႃႇသေဢေႃႈ။
၁၁ ပိၵ်ႇၶေႇရုၽိမ်ႇၸိူဝ်းၼၼ်ႉယၢဝ်းသၢဝ်းသွၵ်ႇဢေႃႈ။
ၵႃႈတီႈၶေႇရုၽိမ်ႇပႃးၼိုင်ႈပိၵ်ႇၽၢႆႇၼိုင်ႈယၢဝ်းႁႃႈသွၵ်ႇလႄႈၶိုၼ်ႈထိုင်ၽႃႁိူၼ်းၸဝ်ႈယူႇလႄႈပိၵ်ႇၽၢႆႇၼိုင်ႈၵေႃႈယၢဝ်းႁႃႈသွၵ်ႇလႄႈတိူဝ်ႉပိၵ်ႇၶေႇရုၽိမ်ႇပႃးၼိုင်ႈယူႇဢေႃႈ။
၁၂ ၵႃႈတီႈၶေႇရုၽိမ်ႇပႃးၼိုင်ႈၼၼ်ႉၵေႃႈပိၵ်ႇၽၢႆႇၼိုင်ႈယၢဝ်းႁႃႈသွၵ်ႇလႄႈၶိုတ်ႉထိုင်ၽႃႁိူၼ်းၸဝ်ႈယူႇ၊ပိၵ်ႇၽၢႆႇၼိုင်ႈၵေႃႈယၢဝ်းႁႃႈသွၵ်ႇလႄႈတိူဝ်ႉပိၵ်ႇၶေႇရုၽိမ်ႇပထမၼၼ်ႉယူႇဢေႃႈ။
၁၃ ပိၵ်ႇၶေႇရုၽိမ်ႇၸိူဝ်းၼၼ်ႉၵီႈယူႇသေလႄႈယၢဝ်းသၢဝ်းသွၵ်ႇလႄႈၶဝ်ၸုၵ်းယူႇသေလႄႈဝၢႆႇၼႃႈၶဝ်ႈၸူးတၢင်းၼႂ်းယူႇဢေႃႈ။
၁၄ ၽႃႈၵင်ႈၵေႃႈမၼ်းဢဝ်ၶူဝ်းဢၼ်သွမ်ႇ၊ၶူဝ်းဢၼ်လႅင်ႊၵမ်ႇ၊ၶူဝ်းဢၼ်လႅင်ႊၸုင်းႁုင်းတင်းပိၵ်ႈၶျေႃးႁဵတ်းလႄႈတမ်ႇၵၢမ်းႁၢင်ႈၶိူင်ႈႁဵတ်းပုင်ႇၶေႇရုၽိမ်ႇသႂ်ႇဢေႃႈ။
၁၅ သဝ်သွင်လႅမ်ႈဢၼ်တၢင်းသုင်မၼ်းမီးသၢမ်သိပ်းပၢႆႁႃႈသွၵ်ႇၼၼ်ႉၵေႃႈမၼ်းႁဵတ်းလႄႈဢဝ်ပုၵ်းဝႆႉၵႃႈတီႈၽၢႆႇၼႃႈႁိူၼ်းၸဝ်ႈဢေႃႈ။ႁူဝ်သဝ်ဢၼ်တင်ႈဝႆႉၵႃႈၼိူ်ဝ်သဝ်ယေႈလႅမ်ႈၼၼ်ႉတၢင်းသုင်မၼ်းမီးႁႃႈသွၵ်ႇဢေႃႈ။
၁၆ ၸိူၵ်ႈတင်းလၢႆၵေႃႈမၼ်းႁဵတ်းမိူၼ်ၸိူဝ်ႉၼင်ႇဢၼ်မီးၵႃႈၼႂ်းထႃႇၼႃႉပျႃႇတိၵ်ႈၸဝ်ႈၼၼ်ႉလႄႈဢဝ်ဝႆႉၵႃႈၼိူဝ်ႁူဝ်သဝ်ဢေႃႈ။မၢၵ်ႇၸင်ႈပၢၵ်ႇႁူၺ်ႇၵေႃႈမၼ်းႁဵတ်းလႄႈဢဝ်ႁွႆႈဝႆႉၵႃႈတီႈၸိူၵ်ႈၸိူဝ်းၼၼ်ႉဢေႃႈ။
၁၇ မၼ်းဢဝ်သဝ်ၸိူဝ်းၼၼ်ႉပၵ်းဝႆႉၵႃႈတီႈၽၢႆႇၼႃႈပိၵ်ႉမၢၼ်ႇၸဝ်ႈၽၢႆႇၶႂႃလႅမ်ႈၼိုင်ႈၽၢႆႇသၢႆႉလႅမ်ႈၼိုင်ႈလႄႈတၢင်ႇပၼ်ၸိုဝ်ႁွင်ႉႁိၵ်ႈသဝ်ၽၢႆႇၶႂႃႇၼၼ်ႉဝႃႈယႃႇၶိၼ်ႇ၊သဝ်ၽၢႆႇသၢႆႉၼၼ်ႉဝႃႈပေႃႇၸဢေႃႈ။