Chapter
၃၂
သၼႃႇၶရိပ်ႉလွၵ်ႇၶိုတ်ႈဝဵင်းယေႇရုသလႅမ်ႇ
၁ လိုၼ်းသေဢၼ်ႁဵတ်းၸိူဝ်းၼၼ်ႉယဝ်ႉသေလႄႈပႂ်ႉၸွမ်းသႅတ်ႈၸႃႇၸဝ်ႈယဝ်ႉၼၼ်ႉသၼႃႇၶရိပ်ႉၶုၼ်ႁေႃၶမ်းဢႃႇသုရိၶီႇသိုၵ်းမႃးၸူးမိူင်းယုတလႄႈလွမ်ႉဝဵင်းဢၼ်မၼ်ႈၶိူင်ႇတင်းလၢႆဝႆႉသေယဝ်ႉဢဝ်ႁႅင်းဢွၵ်ႇႁႂ်ႈလႆႈတိုၵ်းဢဝ်ဢေႃႈ။
၂ ႁေႇၸၵိႁူႉႁၼ်လွင်ႈဢၼ်သၼႃႇၶရိပ်ႉမႃးလႄႈမီးတၢင်းၵျၢမ်ႇတၢင်းပွင်တၵ်းတိုၵ်းတေႃးဝဵင်းယေႇရုသလႅမ်ႇၼၼ်ႉလႄႈ
၃ မၼ်းတိူင်ႇပၢင်ႇၵၼ်တင်းမူးမၢတ်ႈၽွင်းမိူင်းမၼ်းပူဝ်ႇႁူဝ်သိုၵ်းမၼ်းတင်းလၢႆႁႂ်ႈလႆႈတဵင်လႆႈဢိုတ်းၼမ်ႉဢွၵ်ႇႁူးဢၼ်မီးၵႃႈတီႈၼွၵ်ႈဝဵင်းၼၼ်ႉလႄႈၶဝ်ၼၼ်ႉၽွမ်ႉၵၼ်ၸွႆႈထႅမ်မၼ်းဢေႃႈ။
၄ ၼင်ႇၼၼ်လႄႈၵူၼ်းၼမ်ႇၼႃႇၸူႉၵၼ်တုမ်ၵၼ်သေလႄႈဢွၼ်ၵၼ်တဵင်ဢိုတ်းႁူးၼမ်ႉဢွၵ်ႇႁူးၵႃႈမီးဢိၵ်ႇတင်းၼမ်ႉႁွင်ႊဢၼ်လႆၵႂႃႇၵႃႈၼႂ်းၵၢင်မိူင်းၼၼ်ႉလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၶုၼ်ႁေႃၶမ်းဢႃႇသုရိၸိူဝ်းၼၼ်ႉတၵ်းမႃးလႄႈလႆႈထူပ်းၼမ်ႉဢၼ်ၼမ်ၼႃႇၼႆႉ၊ဝႃႈၼင်ႇၼႆဢေႃႈ။
၅ မၼ်းႁဵတ်းႁႂ်ႈၸႂ်မၼ်းမၼ်ႈၶိူင်ႇလႄႈမႄးၵုမ်းမႄးႁဵတ်းလမ်းဝဵင်းၵႃႈဢၼ်ၵိူၼ်ႇပင်းလူႉလႅဝ်ၼၼ်ႉလႄႈတႄႇႁဵတ်းႁႂ်ႈသုင်ပဵင်းၵၼ်တင်းတိူၵ်ႈတီႈတိုၵ်းသိုၵ်းဢေႃႈ။လမ်းဝဵင်းၵုးၼွၵ်ႈၵေႃႈမၼ်းတႄႇႁဵတ်းဢေႃႈ။တီႈမိလေႃႇၵႃႈၼႂ်းဝဵင်းတႃႇဝိတ်ႉၵေႃႈမၼ်းမႄးၵုမ်းမႄးႁဵတ်းလႄႈႁဵတ်းလၢၵ်ႈၼၢၵ်ႈႁွၵ်ႇလႂ်၊ၶိူင်ႈႁႄႉလၢၵ်ႈၼၢၵ်ႈဢၼ်ၼမ်ၼႃႇလူင်လၢင်လႂ်ဝႆႉဢေႃႈ။
၆ မၼ်းၶၢၼ်းတပ်ႉမူးတင်းလၢႆဝႆႉၵႃႈၼိူဝ်ၵူၼ်းတင်းလၢႆလႄႈႁႂ်ႈၶဝ်ၸူႉၵၼ်တုမ်ၵၼ်ၵႃႈတီႈပၢင်ႇလူင်ႁိမ်းၽၵ်းတူဝဵင်းသေယဝ်ႉလၢတ်ႈၵႂၢမ်းဢၼ်ပၼ်ႁႅင်းတီႈၶဝ်သေလႄႈဝႃႈ၊-ဢွၼ်ၵၼ်ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။
၇ ယႃႇပေၵူဝ်ပေႁႄလႄႈၸႂ်လူႉၵွပ်ႈပိူဝ်ႈၶုၼ်ႁေႃၶမ်းဢႃႇသုရိတင်းမူႇၽုင်မုၵ်ႉၸိူဝ်းဢၼ်ပႃးတီႈမၼ်းၵႃႈမီးၸိူဝ်းၼၼ်ႉ။ၶဝ်ၸိူဝ်းဢၼ်ယူႇၽၢႆႇႁဝ်းၼႆႉယိင်ႈၶႅၼ်းၼမ်ၼႃႇသေၶဝ်ၸိူဝ်းဢၼ်ယူႇၽၢႆႇမၼ်းၼၼ်ႉဢေႃႈ။
၈ ၽၢႆႇမၼ်းၼၼ်ႉမီးၶႅၼ်မိုဝ်းဢၼ်ပဵၼ်ၼိူဝ်ႉၵူၺ်းဢေႃႈ။ၽၢႆႇႁဝ်းၼႆႉၸမ်းမီးထႃႇဝရႃႉၽြႃးၽြႃးပဵၼ်ၸဝ်ႈႁဝ်းဢၼ်ၵမ်ႉထွၵ်ႈႁဝ်းလႄႈၸွႆႈသိုၵ်းထႅမ်သိုၵ်းတီႈႁဝ်းၼၼ်ႉယူႇဢေႃႈဝႃႈၼင်ႇၼႆလႄႈၵူၼ်းတင်းလၢႆဢွၼ်ၵၼ်ၸႂ်လီလူၺ်ႈၵႂၢမ်းႁေႇၸၵိၶုၼ်ႁေႃၶမ်းယုတၼၼ်ႉဢေႃႈ။
၉ လိုၼ်းၼၼ်ႉသၼႃႇၶရိပ်ႉၶုၼ်ႁေႃၶမ်းဢႃႇသုရိၼၼ်ႉၼႂ်းမိူဝ်ႈဢၼ်ယင်းတိုၵ်ႉပႃးတင်းပူဝ်ႇပႃႇမၼ်းတင်းသဵင်ႈတင်းလူင်တိုၵ်းတေႃးလွမ်ႉႁွပ်ႈဝဵင်းလႃႇၶိသဝႆႉယူႇၼၼ်ႉၸိုင်ပွႆႇၸႂ်ႉၶႃႈမၼ်းၵူၼ်းမၼ်းၵမ်ႈၽွင်ႈၵႂႃႇၸူးၵႃႈတီႈႁေႇၸၵိၶုၼ်ႁေႃၶမ်းယုတဢိၵ်ႇတင်းၵႃႈတီႈၵူၼ်းမဵဝ်းယုတၵႃႈဢၼ်မီးၵႃႈၼႂ်းဝဵင်းယေႇရုသလႅမ်ႇၸိူဝ်းၼၼ်ႉလႄႈဝႃႈ၊-
၁၀ သၼႃႇၶရိပ်ႉၶုၼ်ႁေႃၶမ်းဢႃႇသုရိမီးဢမိင်ႉလႄႈဝႃႈၸမ်းသူဢိင်ပိူင်ႈၵႃႈသင်ယူႇႁႂ်ႈသူလႆႈၶၢမ်ႇတၢင်းဢၼ်လွမ်ႉဝႆႉၵႃႈၼႂ်းဝဵင်းယေႇရုသလႅမ်ႇၼၼ်ႉ။
၁၁ ႁေႇၸၵိၸူဝ်းဢဝ်သူႁႂ်ႈလႆႈၸုၼ်ႉပႅတ်ႈသူႁႂ်ႈသူလႆႈတၢႆလူၺ်ႈတၢင်းဢၼ်တွင်ႉမႆႈသႆႈလိူတ်ႇတၢင်းဢၼ်ယၢၵ်ႈၼမ်ႉၼၼ်ႉလႄႈဝႃႈထႃႇဝရႃႉၽြႃးၽြႃးပဵၼ်ၸဝ်ႈႁဝ်းတၵ်းၵႄႇသႄႇဢဝ်ႁဝ်းလွတ်ႈသေၵႃႈၼႂ်းမိုဝ်းၶုၼ်ႁေႃၶမ်းဢႃႇသုရိဢေႃႈ၊ဝႃႈၼင်ႇၼႆဢမ်ႇၸႂ်ႈႁိုဝ်။
၁၂ ႁေႇၸၵိၼၼ်ႉပႄႇၽဵဝ်ႈထႃႇၼႃႉတီႈသုင်မၼ်းလႂ်တင်းယိတ်ႉပလၢင်ႇမၼ်းလႂ်ၸိူဝ်းၼၼ်ႉပႅတ်ႈလႄႈမီးဢမိင်ႉတီႈၵူၼ်းမိူင်းယုတ၊ၵူၼ်းဝဵင်းယေႇရုသလႅမ်ႇတင်းလၢႆလႄႈဝႃႈ၊-သူတၵ်းလႆႈၵူဝ်းၵႂၢႆႇၵႃႈတီႈၽၢႆႇၼႃႈယိတ်ႉပလၢင်ႇဢၼ်လဵဝ်ၵူၺ်း။တၵ်းလႆႈဢဝ်ၼမ်ႇသႃႇတုတ်ႇၽႆးၵႃႈၼိူဝ်ယိတ်ႉပလၢင်ႇၼၼ်ႉၵူၺ်းဢေႃႈ၊ဝႃႈၼင်ႇၼႆဝႆႉဢမ်ႇၸႂ်ႈႁိုဝ်။
၁၃ သူဢမ်ႇႁူႉလွင်ႈဢၼ်ၵဝ်ဢိၵ်ႇတင်းပူႇၵဝ်မွၼ်ႇၵဝ်ႁဵတ်းၸိူဝ်ႉၼင်ႇႁိုဝ်တီႈၵူၼ်းၵူႈသိုင်ႇၵူႈမိူင်းၸိူဝ်းၼၼ်ႉ။ၽြႃးၵူၼ်းမဵဝ်းၵႃႈၼႂ်းမိူင်းၸိူဝ်းၼၼ်ႉတတ်ႈၼိုင်ႇလႆႈႁႂ်ႈလႆႈၵႄႇသႄႇဢဝ်မိူင်းၶဝ်လွတ်ႈသေၵႃႈၼႂ်းမိုဝ်းၵဝ်ႁိုဝ်။
၁၄ ၼႂ်းၽြႃးၵူၼ်းၵူႈၸိူဝ်ႉၵူႈမဵဝ်းဢၼ်ပူႇၵဝ်မွၼ်ႇၵဝ်ယႃႉပႅတ်ႈမူတ်းမူတ်းၸိူဝ်းၼၼ်ႉၽြႃးသူႇလႂ်ပႃးလႂ်ယၢမ်ႈတွၼ်ႉၵႄႇသႄႇၼုၵ်ႈဢဝ်ၶဝ်လွတ်ႈသေၵႃႈၼႂ်းမိုဝ်းၵဝ်လႆႈ။ၽြႃးသူတၵ်းၵႄႇသႄႇၼုၵ်ႈဢဝ်သူလွတ်ႈသေၵႃႈၼႂ်းမိုဝ်းၵဝ်ၼႆႉ။
၁၅ ပိူဝ်ႈဢၼ်ပဵၼ်ၼင်ႇၼင်ႇၼႆလႄႈယႃႇပေႁႂ်ႈႁေႇၸၵိၽႅတ်ႉလႅၼ်သူလႄႈၸူဝ်းဢဝ်သူၸိူဝ်ႉၼင်ႇၼၼ်သေၵမ်း။ယႃႇပေဢွၼ်ၵၼ်ယုမ်ႇၵႂၢမ်းမၼ်း။ၽြႃးၵူၼ်းတၢင်ႇၸိူဝ်ႉတၢင်ႇမဵဝ်းၽြႃးသိုင်ႇၸိုင်ႈဝၢၼ်ႈမိူင်းတၢင်ႇတီႈတၢင်ႇလႅၼ်ၸိူဝ်းၼၼ်ႉဢမ်ႇၵႄႇသႄႇၼုၵ်ႉဢဝ်ၵူၼ်းမၼ်းတင်းလၢႆလွတ်ႈသေၵႃႈၼႂ်းမိုဝ်းၵဝ်ဢိၵ်ႇတင်းၵႃႈၼႂ်းမိုဝ်းပူႇၵဝ်မွၼ်ႇၵဝ်ၼၼ်ႉလႆႈ။ၽြႃးသူၼႆႉယိင်ႈၶႅၼ်းတၵ်းဢမ်ႇၵႄႇသႄႇၼုၵ်ႈဢဝ်သူလွတ်ႈသေၵႃႈၼႂႂ်းမိုဝ်းၵဝ်လႆႈ၊ဝႃႈၼင်ႇၼႆဢေႃႈ။
၁၆ ၶႃႈမၼ်းၵူၼ်းမၼ်းၸိူဝ်းၼၼ်ႉယိင်ႈၶႅၼ်းဢွၼ်ၵၼ်လၢတ်ႈယူႇၽၢႆႇၼိုင်ႈတင်းထႃႇဝရႃႉၽြႃးၽြႃးပဵၼ်ၸဝ်ႈဢိၵ်ႇတင်းၽၢႆႇၼိုင်ႈတင်းႁေႇၸၵိၶႃႈမၼ်းၸဝ်ႈၼၼ်ႉဢေႃႈ။
၁၇ လိူဝ်သေၼၼ်ႉမၼ်းတႅမ်ႈလိၵ်ႈဢၼ်သေႉသွမ်းတၢင်ႇဢပျႅတ်ႈတီႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလလႄႈလၢတ်ႈၶတ်းၵၼ်တင်းမၼ်းၸဝ်ႈလႄႈဝႃႈ၊-မိူၼ်ၸိူဝ်ႉၼင်ႇဢၼ်ၽြႃးၵူၼ်းၵူႈၸိူဝ်ႉၵူႈမဵဝ်းၵႃႈၼႂ်းသိုင်ႇၸိုင်ႈဝၢၼ်ႈမိူင်းတၢင်ႇတီႈတၢင်ႇလႅၼ်ၸိူဝ်းၼၼ်ႉဢမ်ႇၵႄႇသႄႇၼုၵ်ႈဢဝ်ၵူၼ်းၶဝ်တင်းလၢႆလွတ်ႈသေၵႃႈၼႂ်းမိုဝ်းၵဝ်လႆႈၼၼ်ႉၽြႃးဢၼ်ႁေႇၸၵိၵူဝ်းၵႂၢႆႇၼၼ်ႉတၵ်းဢမ်ႇၵႄႇသႄႇၼုၵ်ႈဢဝ်ၵူၼ်းမၼ်းတင်းလၢႆလွတ်ႈသေၵႃႈၼႂ်းမိုဝ်းၵဝ်လႆႈ၊ဝႃႈၼင်ႇၼႆဢေႃႈ။
၁၈ လၢႆးသမ်ႉၶဝ်ဢဝ်တင်းၵႂၢမ်းၽႃႇသႃႇယုတႁဵတ်းသဵင်ဢၼ်ႁႅင်းယႂ်ႇၼႃႇႁွင်ႉပၢဝ်ႇလၢတ်ႈတီႈၵူၼ်းဝဵင်းယေႇရုသလႅမ်ႇဢၼ်မီးၵႃႈၼိူဝ်လမ်းဝဵင်းၸိူဝ်းၼၼ်ႉႁႂ်ႈလႆႈလွၵ်ႇငိူတ်ႈၶဝ်လႄႈယႃႉယူၵ်ႉၶဝ်ႁႂ်ႈထၼ်ႈပေႃးတိုၵ်းဢဝ်ဝဵင်းလႆႈဢေႃႈ။
၁၉ ၶဝ်ဢွၼ်ၵၼ်သေႉသွမ်းၽြႃးပဵၼ်ၸဝ်ႈဝဵင်းယေႇရုသလႅမ်ႇမိူၼ်ၸိူဝ်ႉၼင်ႇမၼ်းၸဝ်ႈပဵၼ်ၽြႃးဢၼ်ၵူၼ်းလိၼ်မိူင်းတင်းလၢႆၵူဝ်းၵႂၢႆႇဢၼ်ပဵၼ်ၽြႃးဢၼ်မိုဝ်းၵူၼ်းႁဵတ်းပဵၼ်ၸိူဝ်းၼၼ်ႉၵူၺ်းဢေႃႈ။
၂၀ ၶုၼ်လူင်ႁေႇၸၵိဢိၵ်ႇတင်းပရေႃးၽိတ်ႈဢိသႃႇယလုၵ်ႈၸၢႆးဢႃႇမုတ်ႉၼၼ်ႉသူးတွင်းၵွပ်ႈပိူဝ်ႈလွင်ႈၼၼ်ႉသေလႄႈႁွင်ႉသႅၼ်ႇၸူးၵႃႈၼိူဝ်ၽုင်ႇၵၢင်ႁၢဝ်လႄႈထႃႇဝရႃႉၽြႃးပွႆႇၸႂ်ႉမႃးတမၢၼ်ႇၵၢင်ႁၢဝ်လႄႈပႄႇၽဵဝ်ႈႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇဢိၵ်ႇတင်းပူဝ်ႇတင်းတပ်ႉမူးတင်းလၢႆၸိူဝ်းၼၼ်ႉပႅတ်ႈသေၵႃႈၼႂ်းတပ်ႉၶုၼ်ႁေႃၶမ်းဢႃႇသုရိၼၼ်ႉဢေႃႈ။
၂၁ ပိူဝ်ႈၼႆလႄႈမၼ်းၼၼ်ႉၼႃႈလူႉသေလႄႈၶိုၼ်းမိူဝ်းၵႂႃႇၸူးၵႃႈတီႈမိူင်းမၼ်းသေဢေႃႈ။မိူဝ်ႈဢၼ်မၼ်းႁွတ်ႈထိုင်ၵႃႈတီႈပိၵ်ႉမၢၼ်ႇၽြႃးမၼ်းၼၼ်ႉၸိုင်လုၵ်ႈၸၢႆမၼ်းၵမ်ႈၽွင်ႈၸိူဝ်းၼၼ်ႉဢဝ်မၼ်းတၢႆလူၺ်ႈလၢပ်ႇလူၺ်ႈလႅဝ်းၵႃႈတီႈၼၼ်ႉဢေႃႈ။
၂၂ ၼင်ႇၼၼ်လႄႈထႃႇဝရႃႉၽြႃးၵႄႇသႄႇၼုၵ်ႈဢဝ်ႁေႇၸၵိဢိၵ်ႇတင်းၵူၼ်းဝဵင်းယေႇရုသလႅမ်ႇတင်းလၢႆလွတ်ႈသေၵႃႈၼႂ်းမိုဝ်းၶုၼ်ႁေႃၶမ်းဢႃႇသုရိဢိၵ်ႇတင်းၵႃႈၼႂ်းမိုဝ်းရၢၼ်ႇသူႇတၢင်ႇတီႈတၢင်ႇလႅၼ်လႄႈပႂ်ႉၸွႆႈပႂ်ႉထႅမ်ၶဝ်ယူႇၵူႈၽၢႆႇၵူႈပႃႈဢေႃႈ။
၂၃ ၵူၼ်းၼမ်ၼႃႇဢွၼ်ၵၼ်ဢဝ်ၶိူင်ႈပုၵ်ႉၸေႃႇပုၼ်ႈထႃႇဝရႃႉၽြႃးမႃးတီႈဝဵင်းယေႇရုသလႅမ်ႇသေလႄႈဢဝ်လၢၵ်ႈသွင်ႇပၼ်ႇၼႃႇဢၼ်ထိူၵ်ႈၵႃႈထိူၵ်ႈၶၼ်မႃးၵႃႈတီႈႁေႇၸၵိၶုၼ်ႁေႃၶမ်းယုတသေယဝ်ႉႁႂ်ႈမၼ်းမီးမုၼ်မီးၽုင်းဢၼ်ယႂ်ႇၼႃႇသိုဝ်ႈၼႃႈတႂ်ႈတႃႇၵူၼ်းၵူႈၸိူဝ်ႉၵူႈမဵဝ်းၸႃႉၸဵမ်ၶိင်ႇၵႃႇလႃႉၼၼ်ႉၵႂႃႇဢေႃႈ။
တၢင်းၸႂ်ၽႅၼ်သုင်တၢင်းဢွင်ႇမႅင်ႇလႄႈတၢင်းတၢႆႁေႇၸၵိ
၂၄ ၼႂ်းၶိင်ႇမိူဝ်ႈၼၼ်ႉႁေႇၸၵိပဵၼ်တၢင်းၶႆႈတၢင်းပဵၼ်လႄႈၸမ်တၵ်းတၢႆၼၼ်ႉမၼ်းသူးတွင်းတီႈထႃႇဝရႃႉၽြႃးလႄႈမၼ်းၸဝ်ႈပၼ်ပျႃႇတိၵ်ႈဢိၵ်ႇတင်းၼီႈမိၵ်ႈလၢၵ်ႈၶၼႃႇတီႈမၼ်းဢေႃႈ။
၂၅ ၵူၺ်းၵႃႈႁေႇၸၵိဢမ်ႇၵမ်ၵျၢင်ႉၸွမ်းၵႃႈၼင်ႇဢၼ်ၵိူင်ႇတၢၼ်ႇတင်းၵျေးၸူးၸဝ်ႈဢၼ်မၼ်းလႆႈၶၢမ်ႇၼၼ်ႉလႄႈမီးၸႂ်ဢၼ်ပူၵ်းပႅၼ်မူင်မႅၼ်ဢေႃႈ။ပိူဝ်ႈဢၼ်ပဵၼ်ၼင်ႇၼၼ်လႄႈတၢင်းၸႂ်မႆႈၶႆႈၸႃႉၽြႃးပဵၼ်ၸဝ်ႈဢွၵ်ႇၸူးတီႈမၼ်းဢိၵ်ႇတင်းမိူင်းယုတတင်းဝဵင်းယေႇရုသလႅမ်ႇဢေႃႈ။
၂၆ ၼႂ်းဝႃႈၼၼ်သေၵေႃႈၵွပ်ႈပိူဝ်ႈဢၼ်ႁေႇၸၵိတင်းၵူၼ်းဝဵင်းယေႇရုသလႅမ်ႇတင်းလၢႆဢွၼ်ၵၼ်ၶျႃးတူဝ်ၸဝ်ႈၵဝ်ႇတူၵ်းတႅမ်ႇၼႂ်းတၢင်းဢၼ်ႁူဝ်ၸႂ်ၶဝ်ၽႅၼ်သုင်ၼၼ်ႉလႄႈတၢင်းၸႂ်မႆႈၶႆႈၸႃႉထႃႇဝရႃႉၽြႃးဢမ်ႇတူၵ်းဢမ်ႇႁွတ်ႈၵႃႈၼိူဝ်ၶဝ်ၼႂ်းၸူဝ်ႈပၢၼ်ႁေႇၸၵိၼၼ်ႉ။
၂၇ ႁေႇၸၵိမီးၸေးၸိမ်ႇၶွင်ၶူဝ်းတင်းမူၼ်သရေႇၼမ်ၼႃႇလူင်လၢင်ဢေႃႈ။မၼ်းတႄႇႁဵတ်းတိူၵ်ႈၽၼ်ႇတႃႇတီႈဢၼ်သိမ်းဝႆႉၶမ်းငိုၼ်းသႅင်းမျၢတ်မဵဝ်းၼၢမ်ႇသႃႇ
၂၈ ၶိူင်ႈႁႄႉလၢၵ်ႈၼၢၵ်ႈၶိူင်ႈပိူင်ဢၼ်လီဢၼ်ငၢမ်းၸိူဝ်းၼၼ်ႉဢိၵ်ႇတင်းယွင်ၶဝ်ႈယေးၶဝ်ႈတိူၵ်ႈတီႈဢၼ်သိမ်းဝႆႉၼမ်ႉမၼ်းၼမ်ႉၸပိတ်ႈသိုင်ႇတရိၵ်ႈသၢၼ်ႇၵူႈၸိူဝ်ႉၵူႈမဵဝ်းၶွၵ်ႈသူဝ်းဢၼ်ပဵၼ်ၽုင်ပဵၼ်ၸိူဝ်းၼၼ်ႉဢေႃႈ။
၂၉ မၼ်းတႄႇႁဵတ်းဝဵင်းတင်းလၢႆပုၼ်ႈတူဝ်ၸဝ်ႈၵဝ်ႇလႄႈၵဵပ်းႁွမ်သူဝ်းဝူဝ်းဝႆႉၼမ်ၼႃႇလူင်လၢင်ဢေႃႈ။ၽြႃးပဵၼ်ၸဝ်ႈဢိတ်းလူပၼ်ဢုၵ်ႉၸႃႇဢၼ်ၼမ်မႃႇလူင်လၢင်ၼၼ်ႉတီႈမၼ်းဢေႃႈ။
၃၀ ႁေႇၸၵိၼၼ်ႉတဵင်ဢိုတ်းၼမ်ႉဢွၵ်ႇႁူးၵိႁုၼ်ႇလႄႈႁႂ်ႈၼမ်ႉလႆၵႂႃႇၽၢႆႇတၢင်းတူၵ်းဝဵင်းတႃႇဝိတ်ႉသိုဝ်ႈသိုဝ်ႈသေဢေႃႈ။ၼင်ႇၼၼ်လႄႈႁေႇၸၵိၼၼ်ႉႁဵတ်းလႆႈပဵၼ်လႆႈၵႃႈၼင်ႇဢၼ်မၼ်းၵျၢမ်ႇပွင်သၢင်ႈႁဵတ်းၼၼ်ႉဢေႃႈ။
၃၁ ၼႂ်းဝႃႈၼၼ်သေၵေႃႈမိူဝ်ႈဢၼ်ၶုၼ်ပႃႇပုလုၼ်ႇပွႆႇၸႂ်ႉၵူၼ်းမၼ်းမႃးႁႂ်ႈလႆႈတွင်ႈထၢမ်တူၺ်းၵႃႈတီႈမၼ်းလွင်ႈတၢင်းဢၼ်လီဢၢမ်းဢၼ်ပဵၼ်ၵႃႈတီႈမိူင်းၸဝ်ႈၼၼ်ႉၸိုင်ၽြႃးပဵၼ်ၸဝ်ႈၽၢတ်ႇယၢၼ်ၵၼ်တင်းမၼ်းႁႂ်ႈလႆႈၸၢမ်းတူၺ်းၸႂ်သၽေႃးဢၼ်မီးၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။
၃၂ လွင်ႈတၢင်းႁေႇၸၵိဢၼ်ယင်းၵိုတ်းယင်းၵျၢၼ်ႇဢိၵ်ႇတင်းလွင်ႈတၢင်းဢၼ်မၼ်းႁဵတ်းၵျေးၸူးတင်းလၢႆၸိူဝ်းၼၼ်ႉၸိုင်တႅမ်ႈဝႆႉမီးယူႇၵႃႈၼႂ်းၵျၢမ်းလိၵ်ႈရူႇပႃႇရူင်ႇပရေႃးၽိတ်ႈဢိသႃႇယလုၵ်ႈၸၢႆးဢႃႇမုတ်ႉဢိၵ်ႇတင်းၵႃႈၼႂ်းရႃႇၸဝၢင်ႇယုတတင်းရႃႇၸဝၢင်ႇဢိသရေႇလၼၼ်ႉဢေႃႈ။
၃၃ ႁေႇၸၵိၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶဝ်ဢွၼ်ၵၼ်ဢဝ်မၼ်းသၢင်းၵျူဝ်ႇၵႃႈတီႈသဵၼ်ႈတၢင်းဢၼ်ၶိုၼ်ႈၸူးၵႃႈတီႈသၢင်းၶႅင်းလုၵ်ႈၸဝ်ႈလၢၼ်ၸဝ်ႈတႃႇဝိတ်ႉၸိူဝ်းၼၼ်ႉဢေႃႈ။ၵူၼ်းမိူင်းယုတၵူၼ်းဝဵင်းယေႇရုသလႅမ်ႇတင်းသဵင်ႈတင်းလူင်ဢွၼ်ၵၼ်ယုၵ်ႉယွင်ႈမုၼ်ၵုင်ႇသရေႇႁေႇၸၵိၼႂ်းမိူဝ်ႈဢၼ်မၼ်းႁွတ်ႈဢၼိၵ်ႉၸႃႉၼၼ်ႉဢေႃႈ။မၼႃႇသေႇလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃၵႃႈတီႈဢရႃႇပေႃႈၸဝ်ႈဢေႃႈ။