Chapter
၁၀
ဢိသရေႇလလုၵ်ႉၽိုၼ်ႉရူဝ်ႇပုမ်ႇ
၁ မိူဝ်ႈၼၼ်ႉရူဝ်ႇပုမ်ႇၵႂႃႇၵႃႈတီႈဝဵင်းသေႇၶိမ်ႇဢေႃႈ။လွင်ႈမၼ်းၸမ်းၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ၵႂႃႇၵႃႈတီႈဝဵင်းသေႇၶိမ်ႇႁႂ်ႈလႆႈယုၵ်ႉယွင်ႈမၼ်းဝႆႉၵႃႈၼႂ်းဢရႃႇၶုၼ်ႁေႃၶမ်းဢေႃႈ။
၂ မိူဝ်ႈဢၼ်ယေႇရုဝ်းပုမ်ႇလုၵ်ႈၸၢႆးၼေႇပတ်ႈဢၼ်ဢွၵ်ႇပၢႆႈသေၵႃႈတီႈၶုၼ်လူင်သေႃးလမုၼ်ႇၵႂႃႇၵႃႈတီႈမိူင်းဢေႇၵႅပ်ႉတုၼၼ်ႉငိၼ်းလွင်ႈတၢင်းၼၼ်ႉၸိုင်ယေႇရုဝ်းပုမ်ႇၼၼ်ႉလုၵ်ႉသေၵႃႈတီႈမိူင်းဢေႇၵႅပ်ႉတုၶိုၼ်းမႃးဢေႃႈ။
၃ ၶဝ်ပွႆႇၸႂ်ႉၵႂႃႇႁွင်ႉဢဝ်မၼ်းမႃးသေယဝ်ႉယေႇရုဝ်းပုမ်ႇဢိၵ်ႇတင်းၵူၼ်းတင်းသဵင်ႈတင်းလူင်ဢွၼ်ၵၼ်ၶဝ်ႈၸူးၵႃႈတီႈရူဝ်ႇပုမ်ႇသေလႄႈလဝ်ႈလၢတ်ႈလႄႈဝႃႈ၊-ၸဝ်ႈပေႃႈၸဝ်ႈႁဝ်းၼၼ်ႉဢဝ်ၵၢၼ်းဢၼ်ၼၵ်းၼႃတၢင်ႇသႂ်ႇၵႃႈၼိူဝ်ႁဝ်းၶႃႈတင်းလၢႆၶႃႈယဝ်ႉ။
၄ ၸဝ်ႈႁဝ်းၶႅၼ်းတေႃႈႁႂ်ႈဢမူႉတၢင်းဢၼ်လႆႈၵိုတ်ႈႁၢပ်ႇယၢပ်ႇၸႂ်ၼႃႇလူင်လၢင်ဢိၵ်ႇတင်းၵၢၼ်းႁၢပ်ႇဢၼ်ၼၵ်းၼႃလူင်လၢင်ဢၼ်ၸဝ်ႈပေႃႈၸဝ်ႈႁဝ်းတၢင်ႇသႂ်ႇၵႃႈၼိူဝ်ႁဝ်းၶႃႈၼၼ်ႉႁႂ်ႈမဝ်မႃးသေၵမ်းၶႃႈ။ပေႃးႁဵတ်းၸိူဝ်ႉၼင်ႇၼၼ်ၸိုင်ႁဝ်းၶႃႈတင်းလၢႆတၵ်းဢွၼ်ၵၼ်ၵိုတ်ႈႁၢပ်ႇဢမူႉၸဝ်ႈႁဝ်းတီႈၶႃႈဢေႃႈ၊ဝႃႈၼင်ႇၼႆဢေႃႈ။
၅ မၼ်းၵေႃႈမီးဢမိင်ႉလႄႈဝႃႈ၊-ပူၼ်ႉသၢမ်ဝၼ်းယဝ်ႉၸင်ႇၶိုၼ်းမႃးလူးၵွၼ်ႇတႃႉ၊ဝႃႈၼင်ႇၼႆသေယဝ်ႉၵူၼ်းတင်းလၢႆဢွၼ်ၵၼ်ဢွၵ်ႇၵႂႃႇသေဢေႃႈ။
၆ မိူဝ်ႈၼၼ်ႉၶုၼ်လူင်ရူဝ်ႇပုမ်ႇတိူင်ႇပၢင်ႇၵၼ်တင်းၶဝ်ၸိူဝ်းဢၼ်ဢသၢၵ်ႈယႂ်ႇဢၼ်ၶႃးၸႃးတီႈၸဝ်ႈပေႃႈမၼ်းသေႃးလမုၼ်ႇမိူဝ်ႈဢၼ်မၼ်းယင်းဢသၢၵ်ႈလိပ်းယူႇၸိူဝ်းၼၼ်ႉလႄႈထၢမ်ဝႃႈ၊-သူတၵ်းပၼ်တၢင်းၵျၢမ်ႇတၢင်းပွင်ၸိူဝ်ႉၼင်ႇႁိုဝ်တီႈၵဝ်၊ႁႂ်ႈၵဝ်လႆႈၶိုၼ်းလၢတ်ႈတီႈၵူၼ်းတင်းလၢႆၸိူဝ်းၼႆႉဝႃႈၼင်ႇၼႆလႄႈၶဝ်ၵေႃႈဢွၼ်ၵၼ်လဝ်ႈလၢတ်ႈလႄႈဝႃႈ၊-
၇ ပေႃႈၸဝ်ႈႁဝ်းႁဵတ်းၵျေးၸူးတီႈၵူၼ်းတင်းလၢႆၼႆႉသေလႄႈႁဵတ်းႁႂ်ႈထုၵ်ႇၸႂ်ၵျိူၵ်ႈၸႂ်ၶဝ်လႄႈၶိုၼ်းလၢတ်ႈၵႂၢမ်းဢၼ်လီဢၼ်ငၢမ်းတေႃႇၶဝ်ၸိုင်ၶဝ်တၵ်းဢွၼ်ၵၼ်ၶၢမ်ႇႁဵတ်းၶႃႈၸဝ်ႈႁဝ်းယူႇသေႇသေႇတီႈၶႃႈဢေႃႈ၊ဝႃႈၼင်ႇၼႆဢေႃႈ။
၈ ၵူၺ်းၵႃႈမၼ်းဢမ်ႇၸွမ်းတၢင်းၵျၢမ်ႇတၢင်းပွင်ဢၼ်ၶဝ်ၸိူဝ်းဢၼ်ဢသၢၵ်ႈယႂ်ႇၸိူဝ်းၼၼ်ႉပၼ်ၼၼ်ႉလႄႈသမ်ႉတိူင်ႇပၢင်ႇတွင်ႉထၢမ်ၵၼ်တင်းၵူၼ်းၼုမ်ႇၵူၼ်းၵမ်ဢၼ်ပဵၼ်ၵေႃႉသေႈမၼ်းလႄႈၶႃးၸႃးယူႇၵႃႈတီႈၽၢႆႇၼႃႈမၼ်းသေႇသေႇၸိူဝ်းၼၼ်ႉလႄႈဝႃႈ၊-
၉ သူတၵ်းပၼ်တၢင်းၵျၢမ်ႇတၢင်းပွင်ၸိူဝ်ႉၼင်ႇႁိုဝ်ႁႂ်ႈႁဝ်းလႆႈၶိုၼ်းလၢတ်ႈတီႈၵူၼ်းတင်းလၢႆဢၼ်လဝ်ႈလၢတ်ႈတီႈၵဝ်လႄႈဝႃႈ၊-ၸဝ်ႈႁဝ်းၶႅၼ်းတေႃႈႁႂ်ႈၵၢၼ်းႁၢပ်ႇဢၼ်ၸဝ်ႈပေႃႈၸဝ်ႈႁဝ်းတၢင်ႇသႂ်ႇဝႆႉတီႈႁဝ်းၶႃႈတင်းလၢႆၼၼ်ႉမဝ်မႃးသေၵမ်းၶႃႈ၊ဝႃႈၼင်ႇၼႆၼၼ်ႉမိူဝ်ႈဢၼ်ဝႃႈၼင်ႇၼႆၸိုင်
၁၀ ၵူၼ်းၼုမ်ႇၵူၼ်းၵမ်ၸိူဝ်းၼၼ်ႉဢွၼ်ၵၼ်ၶိုၼ်းလဝ်ႈလၢတ်ႈလႄႈဝႃႈ၊-ၸဝ်ႈႁဝ်းၶႅၼ်းတေႃႈၶိုၼ်းလၢတ်ႈတီႈၵူၼ်းတင်းလၢႆဢၼ်လဝ်ႈလၢတ်ႈတီႈၸဝ်ႈႁဝ်းၼၼ်ႉလႄႈဝႃႈ၊-ၼိဝ်ႉၵွႆႈၵဝ်ၼႆႉယိင်ႈၶႅၼ်းတၵ်းယႂ်ႇၼႃႇသေဢႅဝ်ၸဝ်ႈပေႃႈၵဝ်ဢေႃႈ။
၁၁ ၸဝ်ႈပေႃႈၵဝ်ၼၼ်ႉဢဝ်ၵၢၼ်းႁၢပ်ႇဢၼ်ၼၵ်းၼႃတၢင်ႇသႂ်ႇၵႃႈၼိူဝ်သူယဝ်ႉ။ၵဝ်ၵေႃႈတၵ်းထၢပ်ႈလႄႈတၢင်ႇသႂ်ႇထႅင်ႈဢေႃႈ။ၸဝ်ႈပေႃႈၵဝ်ၼၼ်ႉဢဝ်တင်းၶွၼ်ႉဝၢႆပေႃႉယႅၼ်ႉသူယဝ်ႉ။ၵဝ်ၵေႃႈတၵ်းဢဝ်တင်းမႅင်းၵူၼ်ႈငေႃးလႄႈပေႃႉယႅၼ်ႉသူထႅင်ႈဢေႃႈ၊ဝႃႈၼင်ႇၼႆသေၵမ်းၶႃႈ၊ဝႃႈၼင်ႇၼႆဢေႃႈ။
၁၂ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉယေႇရူဝ်ႇပုမ်ႇဢိၵ်ႇတင်းၵူၼ်းတင်းသဵင်ႈတင်းလူင်ဢွၼ်ၵၼ်ႁွတ်ႈမႃးတီႈရူဝ်ႇပုမ်ႇၸွမ်းၵႃႈၼင်ႇဢၼ်ၶုၼ်ႁေႃၶမ်းမၵ်းၶိၼ်းဝႆႉၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉသမ်ႉဢွၼ်ၵၼ်ၶိုၼ်းမႃးထႅင်ႈလူးၵွၼ်ႇတႃႉ၊ဝႃႈၼင်ႇၼႆၼၼ်ႉဢေႃႈ။
၁၃ မိူဝ်ႈၼၼ်ႉၶုၼ်ႁေႃၶမ်းလၢတ်ႈႁၢဝ်ႈၵျၢမ်းၼႃႇလူင်လၢင်တီႈၶဝ်ဢေႃႈ။ၶုၼ်လူင်ရူဝ်ႇပုမ်ႇၼၼ်ႉပႄႇပႅတ်ႈတၢင်းၵျၢမ်ႇတၢင်းပွင်ဢၼ်ၶဝ်ၸိူဝ်းဢၼ်ဢသၢၵ်ႈယႂ်ႇၸိူဝ်းၼၼ်ႉပၼ်ၼၼ်ႉသေလႄႈ၊
၁၄ ၸွမ်းဢဝ်တၢင်းၵျၢမ်ႇတၢင်းပွင်ဢၼ်ၵူၼ်းၼုမ်ႇၵူၼ်းၵမ်ၸိူဝ်းၼၼ်ႉပၼ်ၼၼ်ႉလႄႈၶိုၼ်းလၢတ်ႈႁၢဝ်ႈၵျၢမ်းၼႃႇလူင်လၢင်လႄႈဝႃႈ၊-ၸဝ်ႈပေႃႈၵဝ်ၼၼ်ႉဢဝ်ၵၢၼ်းႁၢပ်ႇဢၼ်ၼၵ်းၼႃတၢင်ႇသႂ်ႇၵႃႈၼိူဝ်သူယဝ်ႉ။ၵဝ်ၵေႃႈတၵ်းထၢပ်ႈလႄႈတၢင်ႇသႂ်ႇထႅင်ႈဢေႃႈ။ၸဝ်ႈပေႃႈၵဝ်ၼၼ်ႉဢဝ်တင်းၶွၼ်ႉဝၢႆပေႃႉယႅၼ်ႉသူယဝ်ႉ။ၵဝ်ၵေႃႈတၵ်းဢဝ်တင်းမႅင်းၵူၼ်ႈငေႃးလႄႈပေႃႉယႅၼ်ႉသူဢေႃႈ၊ဝႃႈၼင်ႇၼႆဢေႃႈ။
၁၅ လွင်ႈဢၼ်ၶုၼ်ႁေႃၶမ်းဢမ်ႇထွမ်ႇဢမ်ႇဢဝ်ၵႂႂၢမ်းၵူၼ်းတင်းလၢႆၼၼ်ႉၸမ်းပဵၼ်တၢင်းဢၼ်ဢွၵ်ႇသေၵႃႈတီႈၽြႃးပဵၼ်ၸဝ်ႈမႃးလွင်ႈၼင်ႇႁိုဝ်ထႃႇဝရႃႉၽြႃးတၵ်းႁႂ်ႈၵႂၢမ်းဢၼ်မၼ်းၸဝ်ႈဢဝ်ဢႁိယၵူၼ်းဝဵင်းသိလေႃႇလႄႈမီးဢမိင်ႉဝႆႉတီႈယေႇရူဝ်းပုမ်ႇလုၵ်ႈၸၢႆးၼေႇပတ်ႈၼၼ်ႉတၵ်းလႆႈတဵမ်ထူၼ်ႈၵူၺ်းဢေႃႈ။
၁၆ ၵူၼ်းမဵဝ်းဢိသရေႇလတင်းသဵင်ႈတင်းလူင်ႁူႉႁၼ်လွင်ႈဢၼ်ၶုၼ်ႁေႃၶမ်းဢမ်ႇထွမ်ႇဢမ်ႇဢဝ်ၵႂၢမ်းၶဝ်ၼၼ်ႉလႄႈၵူၼ်းတင်းလၢႆဢွၼ်ၵၼ်ၶိုၼ်းလၢတ်ႈတီႈၶုၼ်ႁေႃၶမ်းလႄႈဝႃႈ၊-ႁဝ်းၼႆႉၸၢပ်ႈသႅင်ႇၵၼ်တင်းတႃႇဝိတ်ႉၸိူဝ်ႉၼင်ႇႁိုဝ်။ႁဝ်းဢမ်ႇၶၢမ်ႇဢမူၺ်ႇလူၺ်ႈၵၼ်တင်းလုၵ်ႈၸၢႆးယေႇသေႇၵူၺ်း။မဵဝ်းဢိသရေႇလဢိူၺ်း။ဢွၼ်ၵၼ်ၵႂႃႇၸူးၵႃႈတီႈသုမ်ႉထဵင်တီႈယူႇသူၼၼ်ႉႁင်းၽႂ်ႁင်းမၼ်းတႃႉ။တႃႇဝိတ်ႉဢိူၺ်း။လူတူၺ်းႁိူၼ်းမႂ်းတႃႉ၊ဝႃႈၼင်ႇၼႆသေလႄႈၵူၼ်းမဵဝ်းဢိသရေႇလတင်းသဵင်ႈတင်းလူင်ဢွၼ်ၵၼ်ၶိုၼ်းမိူဝ်းၵႂႃႇၸူးသုမ်ႉထဵင်တီႈယူႇၶဝ်သေဢေႃႈ။
၁၇ ၵူၺ်းၵႃႈၵူၼ်းမဵဝ်းဢိသရေႇလဢၼ်ယူႇၵႃႈတီႈဝၢၼ်ႈဝဵင်းယုတၸိူဝ်းၼၼ်ႉၸိုင်ရူဝ်ႇပုမ်ႇယင်းလႆႈဢုပ်ႉပိူင်ႇယူႇဢေႃႈ။မိူဝ်ႈၼၼ်ႉၶုၼ်လူင်ရူဝ်ႇပုမ်ႇပွႆႇၸႂ်ႉႁတေႃႇရမ်ႇဢၼ်ပဵၼ်ဝုၼ်ႇၵဵပ်းၶွၼ်ႇၼၼ်ႉၵႂႃႇဢေႃႈ။
၁၈ ၵူၼ်းမဵဝ်းဢိသရေႇလတင်းလၢႆဢွၼ်ၵၼ်ဢဝ်မၢၵ်ႇႁိၼ်ထႅမ်ႈမၼ်းတၢႆဢေႃႈ။ၶုၼ်လူင်ရူဝ်ႇပုမ်ႇၼၼ်ႉႁိပ်ႈၼႅတ်ႈၶိုၼ်ႈၶီႇလေႃႉရထႃးၸဝ်ႈသေလႄႈပၢႆႈၸူးၵႃႈတီႈဝဵင်းယေႇရုသလႅမ်ႇဢေႃႈ။
၁၉ ၼင်ႇၼၼ်လႄႈမဵဝ်းဢိသရေႇလလုၵ်ႉၽိုၼ်ႉမဵဝ်းၸိူဝ်ႉၶိူဝ်းၶုၼ်တႃႇဝိတ်ႉတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။