Chapter
၂၁
၁ ယုဝ်ႇသၽတ်ႉၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶၢမ်ႇတၢင်းဢၼ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းတင်းလၢႆၵႃႈၼႂ်းဝဵင်းတႃႇဝိတ်ႉၼၼ်ႉဢေႃႈ။ယႁေႃႇရမ်ႇလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
၂ ၼွင်ႉၸၢႆးယႁေႃႇရမ်ႇဢၼ်ပဵၼ်လုၵ်ႈၸၢႆးယုဝ်ႇသၽတ်ႉၼၼ်ႉၸမ်းပဵၼ်ဢႃႇၸရိ၊ယေႇယေႇလ၊ၸႃႇၶရိ၊ဢႃႇၸရိႁု၊မိၵ်ႉၶေႇလတင်းသေႇပတိဢေႃႈ။ၶဝ်ၵႃႈမီးၼႆႉပဵၼ်လုၵ်ႈၸၢႆးယုဝ်ႇသၽတ်ႉၶုၼ်ႁေႃၶမ်းဢိသရေႇလၼၼ်ႉဢေႃႈ။
၃ ၸဝ်ႈပေႃႈၶဝ်ၼၼ်ႉဢဝ်သူးလၢပ်ႈၼမ်ၼႃႇလူင်လၢင်ဢၼ်ပဵၼ်ငိုၼ်းၶမ်းဢုၵ်ႉၸႃႇရတၼႃႇဢိၵ်ႇတင်းဝဵင်းဢၼ်မၼ်ႈၶိူင်ႇၵႃႈၼႂ်းမိူင်းယုတတင်းလၢႆပၼ်တီႈၶဝ်ဢေႃႈ။သိုင်ႇၸိုင်ႈဝၢၼ်ႈမိူင်းၸမ်းမၼ်းပၼ်တီႈယႁေႃႇရမ်ႇၵွပ်ႈပိူဝ်ႈဢၼ်မၼ်းပဵၼ်လုၵ်ႈၸၢႆးတူၼ်ႈမၼ်းၼၼ်ႉဢေႃႈ။
ယႁုဝ်ရမ်ႇပဵၼ်ၶုၼ်ႁေႃၶမ်းမိူင်းယုတ
၄ ယႁေႃႇရမ်ႇၼၼ်ႉဢုပ်ႉထိင်းသိုင်ႇၸိုင်ႈဝၢၼ်ႈမိူင်းၸဝ်ႈပေႃႈမၼ်းတဵတ်ႇလီၼိမ်လီလႄႈႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇသေယဝ်ႉမၼ်းဢဝ်ၼွင်ႉၸၢႆးၸဝ်ႈတင်းသဵင်ႈတင်းလူင်တင်းမူးမၢတ်ႈဢိသရေႇလၵမ်ႈၽွင်ႈတၢႆလူၺ်ႈလၢပ်ႇလူၺ်ႈလႅဝ်းဢေႃႈ။
၅ မိူဝ်ႈဢၼ်ယႁေႃႇရမ်ႇၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသၢမ်သိပ်းပၢႆသွင်ပီႊလႄႈမၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်းယေႇရုသလႅမ်ႇပႅတ်ႇပီႊဢေႃႈ။
၆ ပိူဝ်ႈဢၼ်မၼ်းပဵၼ်ၵူပ်းပဵၼ်ၵူႈလူၺ်ႈၵၼ်တင်းလုၵ်ႈယိင်းဢႃႇႁပ်ႉၼၼ်ႉလႄႈမၼ်းၸွမ်းသဵၼ်ႈတၢင်းဢၼ်ၶုၼ်ႁေႃၶမ်းဢိသရေႇလမိူၼ်ၸိူဝ်ႉၼင်ႇမဵဝ်းၸိူဝ်ႉၶိူဝ်းဢႃႇႁပ်ႉၼၼ်ႉလႄႈႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးဢေႃႈ။
၇ ၵူၺ်းၵႃႈထႃႇဝရႃႉၽြႃးဢမ်ႇမီးဢလူဝ်ႇၶႂ်ႈယႃႉပႅတ်ႈမဵဝ်းၸိူဝ်ႉၶိူဝ်းတႃႇဝိတ်ႉၵွပ်ႈပိူဝ်ႈဢၼ်မၼ်းၸဝ်ႈလႆႈႁဵတ်းပတိၺိၼ်ႇလူၺ်ႈၵၼ်တင်းတႃႇဝိတ်ႉလႄႈလႆႈမီးၵတိဝႆႉလူၺ်ႈလွင်ႈဢၼ်မၼ်းၸဝ်ႈတၵ်းပၼ်ဝၢၼ်ႇၽႆးတဵၼ်းဢၼ်ႁိူဝ်ႈလႅင်းတီႈမၼ်းဢိၵ်ႇတင်းလုၵ်ႈလၢၼ်ႇမၼ်းတႃႇသေႇၼၼ်ႉဢေႃႈ။
၈ ၼႂ်းၸူဝ်ႈပၢၼ်မၼ်းၼၼ်ႉမိူင်းဢေႇတုမ်ႇလုၵ်ႉၽိုၼ်ႉၶုၼ်ႁေႃၶမ်းယုတသေလႄႈယုၵ်ႉယွင်ႈၵူၼ်းၵေႃႉၼိုင်ႈႁဵတ်းၶုၼ်ႁေႃၶမ်းၶဝ်ဢေႃႈ။
၉ ယႁေႃႇရမ်ႇၼၼ်ႉပႃးဢဝ်ပူဝ်ႇသိုၵ်းမၼ်းတင်းလၢႆဢိၵ်ႇတင်းၵူၼ်းသိုၵ်းလႄႈၶီႇလေႃႉရထႃးတင်းသဵင်ႈတင်းလူင်ၶီႇသိုၵ်းၵႂႃႇလႄႈလုၵ်ႉၶိင်ႇၵၢင်ၶိုၼ်းသေလႄႈယႃႉပႅတ်ႈၵူၼ်းဢေႇတုမ်ႇဢၼ်လွမ်ႉႁွပ်ႈမၼ်းဢိၵ်ႇတင်းပူဝ်ႇဢၼ်ဢုပ်ႉၵႃႈၼိူဝ်လေႃႉရထႃးၸိူဝ်းၼၼ်ႉဢေႃႈ။
၁၀ ၼင်ႇၼၼ်လႄႈမိူင်းဢေႇတုမ်ႇၼၼ်ႉလုၵ်ႉၽိုၼ်ႉၶုၼ်ႁေႃၶမ်းယုတတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။မိူဝ်ႈၶိင်ႇၼၼ်ႉမိူင်းလိပၼၵေႃႈလုၵ်ႉၽိုၼ်ႉဢေႃႈ။
၁၁ လွင်ႈမၼ်းၸမ်းမၼ်းၸုၼ်ႉပႅတ်ႈထႃႇဝရႃႉၽြႃးၽြႃးပဵၼ်ၸဝ်ႈပူႇမၼ်းမွၼ်ႇမၼ်းၼၼ်ႉလႄႈတႄႇႁဵတ်းထႃႇၼႃႉတီႈဢၼ်သုင်တင်းလၢႆၵႃႈၼိူဝ်လွႆယုတၸိူဝ်းၼၼ်ႉသေယဝ်ႉႁဵတ်းပႄႉႁဵတ်းၼႅင်ႇႁႂ်ႈၵူၼ်းဝဵင်းယေႇရုသလႅမ်ႇတင်းလၢႆဢွၼ်ၵၼ်ၽိတ်းပိူင်ႈလူၺ်ႈၵၼ်တင်းၽြႃးတၢင်ႇသူႇတၢင်ႇပႃးလႄႈႁႂ်ႈယုတတင်းလၢႆဢွၼ်ၵၼ်ၽိတ်းတၢင်းပိူင်ႈတၢင်းၵႂႃႇဢေႃႈ။
၁၂ လိၵ်ႈဢၼ်ပရေႃးၽႅတ်ႈဢေးလိယပၼ်ၵႂႃႇၼၼ်ႉႁွတ်ႈထိုင်တီႈယႁေႃႇရမ်ႇလႄႈဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈပေႃႈမႂ်းတႃႇဝိတ်ႉမီးဢမိင်ႉၸမ်းၵွပ်ႈပိူဝ်ႈမႂ်းဢမ်ႇၸွမ်းသဵၼ်ႈတၢင်းပေႃႈမႂ်းယုဝ်ႇသၽတ်ႉဢိၵ်ႇတင်းသဵၼ်ႈတၢင်းဢႃႇသၶုၼ်ႁေႃၶမ်းယုတၼၼ်ႉလႄႈ
၁၃ သမ်ႉၸွမ်းသဵၼ်ႈတၢင်းၶုၼ်ႁေႃၶမ်းဢိသရေႇလတင်းလၢႆသေလႄႈႁဵတ်းႁႂ်ႈၵူၼ်းမိူင်းယုတတင်းၵူၼ်းဝဵင်းယေႇရုသလႅမ်ႇၸိူဝ်းၼၼ်ႉၽိတ်းပိူင်ႈလူၺ်ႈၵၼ်တင်းၽြႃးတၢင်ႇသူႇတၢင်ႇပႃးမိုၼ်ၸိူဝ်ႉၼင်ႇဢၼ်မဵဝ်းၸိူဝ်ႉၶိူဝ်းဢႃႇႁပ်ႉၽိတ်းပိူင်ႈၼၼ်ႉဢိၵ်ႇတင်းၵွပ်ႈပိူဝ်ႈဢၼ်မႂ်းဢဝ်ၼွင်ႉၸၢႆးဢွၵ်ႇမႂ်းဢၼ်ယိင်ႈၶႅၼ်းလီၼႃႇသေမႂ်းၸိူဝ်းၼၼ်ႉတၢႆလႄႈ
၁၄ ထႃႇဝရႃႉၽြႃးတၵ်းဢဝ်ၽေးဢၼ်ယႂ်ႇၼႃႇလူင်လၢင်ပၼ်တၢမ်ႇတီႈၵူၼ်းမႂ်းတင်းလၢႆလုၵ်ႈလၢင်းမႂ်းတၢင်းလၢႆ၊မေးမႂ်းတင်းလၢႆတင်းၶွင်ၶူဝ်းမႂ်းၵႃႈမီးၼၼ်ႉဢေႃႈ။
၁၅ တၢင်းၶႆႈတၢင်းပဵၼ်တၵ်းၸပ်းၵႃႈၼႂ်းတွင်ႉၼႂ်းပုမ်မႂ်းထၼ်ႈပေႃးတေႃႇထိုင်ႁွတ်ႈသႆႈမႂ်းဢွၵ်ႇဢွၵ်ႇသပေုမ်မႂ်းမႃးၵွပ်ႈပိူဝ်ႈတၢင်းၶႆႈတၢင်းပဵၼ်ၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၆ လိုၼ်းၼၼ်ႉထႃႇဝရႃႉၽြႃးတိုၵ်းယူင်းၵူၼ်းၽိလိတ်ႉတိတင်းၵူၼ်းဢႃႇရေႇပျႃႇဢၼ်ယူႇၸမ်ၵၼ်တင်းမိူင်းၵုသၸိူဝ်းၼၼ်ႉ
၁၇ ႁႂ်ႈယူႇၽၢႆႇၼိုင်ႈတင်းယႁေႃႇရမ်ႇလႄႈၶဝ်ၼၼ်ႉၶီႇသိုၵ်းၶိုၼ်ႈၸူးမိူင်းယုတလႄႈဢွၼ်ၵၼ်ယဵပ်ႇၶဝ်ႈၽၢင်ႈၶဝ်ႈသေလႄႈသိမ်းဢဝ်ၶွင်ႇၶူဝ်းၵႃႈဢၼ်ထူပ်းႁၼ်ၵႃႈၼႂ်းႁေႃၸဝ်ႈဢိၵ်ႇတင်းလုၵ်ႈၸၢႆးၸဝ်ႈမေးၸဝ်ႈၸိူဝ်းၼၼ်ႉဢေႃႈ။လိူဝ်သေ ယေႇႁေႃႇႁတ်ႉဢၼ်ပဵၼ်လုၵ်ႈၸၢႆးၵေႃႉလိုၼ်းသုတ်းၼၼ်ႉဢမ်ႇၵိုတ်းဢမ်ႇၵျၢၼ်ႇဝႆႉလုၵ်ႈၸၢႆးၸဝ်ႈသေၵေႃႉသေၵူၼ်း။
၁၈ လိုၼ်းၼၼ်ႉထႃႇဝရႃႉၽြႃးဢဝ်တွင်ႉၸဵပ်းဢၼ်ဢမ်ႇႁၢႆလႆႈၼၼ်ႉပၼ်တၢမ်ႇတီႈမၼ်းဢေႃႈ။မိူဝ်ႈဢၼ်ပူၼ်ႉၶိင်ႇႁိုင်ၼႃႇလႄႈၸေးသွင်ပီႊယဝ်ႉၼၼ်ႉသႆႈမၼ်းဢွၵ်ႇမႃးၵွပ်ႈပိူဝ်ႈတၢင်းၶႆႈတၢင်းပဵၼ်မၼ်းၼၼ်ႉလႄႈၶျုၵ်ႈဢသၢၵ်ႈမၼ်းတၢႆၵွပ်ႈပိူဝ်ႈတၢင်းၶႆႈတၢင်းပဵၼ်ဢၼ်ႁႅင်းၼႃႇလူင်လၢင်ၸိူဝ်းၼၼ်ႉဢေႃႈ။
၁၉ ၵူၼ်းဝၢၼ်ႈၵူၼ်းမိူင်းတင်းလၢႆဢမ်ႇႁဵတ်းတၢင်းဢၼ်တုတ်ႇၽႆးပုၼ်ႈမၼ်းမိူၼ်ၸိူဝ်ႉၼင်ႇဢၼ်ယၢမ်ႈႁဵတ်းပုၼ်ႈပူႇၸဝ်ႈမွၼ်ႇၸဝ်ႈၸိူဝ်းၼၼ်ႉ။
၂၀ ယႁေႃႇရမ်ႇၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသၢမ်သိပ်းပၢႆသွင်ပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇပႅတ်ႇပီႊသေယဝ်ႉတၢႆဢေႃႈ။ၽူႈလႂ်သေၵေႃႉသေၵူၼ်းယင်းဢမ်ႇသလေၢႆမၼ်း။ပိၵ်ႉသမ်ႉၶဝ်ဢဝ်မၼ်းသၢင်းၵျူဝ်ႇၵႃႈၼႂ်းဝဵင်းတႃႇဝိတ်ႉသေၵေႃႈဢမ်ႇဢွၼ်ၵၼ်ဢဝ်သၢင်းၵျူဝ်ႇၵႃႈၼႂ်းပႃႇႁဵဝ်ႈသၢင်းၶႅင်းၶုၼ်ႁေႃၶမ်းၸိူဝ်းၼၼ်ႉ။