Chapter
၂၀
ယုဝ်ႇသၽတ်ႉတိုၵ်းတေႃးပႄႉၼႅင်ႇမေႃႇၽတင်းဢမ်ႇမုၼ်ႇ
၁ လိုၼ်းၼၼ်ႉၵူၼ်းမဵဝ်းမေႃႇၽဢိၵ်ႇတင်းၵူၼ်းမဵဝ်းဢမ်ႇမုၼ်ႇတင်းလၢႆပႃးတင်းၵူၼ်းဢေႇတုမ်ႇၵမ်ႈၽွင်ႈသေလႄႈၶီႇသိုၵ်းမႃးႁႂ်ႈလႆႈတိုၵ်းတေႃးယုဝ်ႇသၽတ်ႉဢေႃႈ။
၂ ပိူၼ်ႈမႃးလဝ်ႈလၢတ်ႈတီႈယုဝ်ႇသၽတ်ႉလႄႈဝႃႈ၊-မူႇၽုင်မုၵ်ႉၸိူဝ်းဢၼ်ၼမ်ၼႃႇလူင်လၢင်ၼၼ်ႉဢွၼ်ၵၼ်လုၵ်ႉသေၵႃႈတီႈမိူင်းသုရိၽၢႆႇပုၼ်ႈၼမ်ႉႁွင်ႊလူင်ၼၼ်ႉမႃးၶႃႈယဝ်ႉ။
၃ မီးယူႇၵႃႈတီႈဝဵင်းႁႃႇၸၸုင်ႇတမႃႇဢၼ်မီးၸိုဝ်ဝႃႈဢႅၼ်ႇၵေႇတိၼၼ်ႉၶႃႈယဝ်ႉ၊ဝႃႈၼင်ႇၼႆလႄႈယုဝ်ႇသၽတ်ႉၵူဝ်ႁႄလႄႈဝၢင်းၸႂ်ႁႂ်ႈလႆႈႁႃထႃႇဝရႃႉၽြႃးလႄႈႁွင်ႉပၢဝ်ႇႁွင်ႉလၢတ်ႈၶိင်ႇဢၼ်တၵ်းလႆႈၵမ်တၢင်းၵိၼ်ၵႃႈၼႂ်းမိူင်းယုတတင်းမိူင်းဢေႃႈ။
၄ ၵူၼ်းမဵဝ်းယုတတင်းလၢႆၸူႉၵၼ်တုမ်ၵၼ်ႁႂ်ႈလႆႈသူးတွင်းတီႈထႃႇဝရႃႉၽြႃးလႄႈဢွၼ်ၵၼ်ဢွၵ်ႇသေၵႃႈၼႂ်းဝဵင်းယုတၵူႈတီႈၵူႈလႅၼ်ႈမႃးႁႂ်ႈလႆႈႁႃထႃႇဝရႃႉၽြႃးဢေႃႈ။
၅ ယုဝ်ႇသၽတ်ႉၼၼ်ႉလုၵ်ႈၸုၵ်းၵႃႈၼႂ်းပရိၵ်ႈသၢတ်ႈတီႈဢၼ်ၵူၼ်းမိူင်းယုတၵူၼ်းဝဵင်းယေႇရုသလႅမ်ႇၸူႉတုမ်ၵၼ်ၵႃႈတီႈၽၢႆႇၼႃႈတမ်ႇတိူင်းဢၼ်မႂ်ႇၵႃႈၼႂ်းႁိူၼ်းထႃႇဝရႃႉၽြႃးသေလႄႈသူးတွင်းဝႃႈ၊-ထႃႇဝရႃႉၽြႃးၽြႃးပဵၼ်ၸဝ်ႈပူႇမွၼ်ႇႁဝ်းၶႃႈတီႈၶႃႈ။
၆ ၸဝ်ႈႁဝ်းပဵၼ်ၽြႃးပဵၼ်ၸဝ်ႈၸဝ်ႈၽုင်ႇၵၢင်ႁၢဝ်ဢမ်ႇၸႂ်ႈတီႈၶႃႈႁိုဝ်။ၸဝ်ႈႁဝ်းဢုပ်ႉပိူင်ႇသိုင်ႇၸိုင်ႈဝၢၼ်ႈမိူင်းၵူၼ်းတၢင်ႇၸိူဝ်ႉတၢင်ႇမဵဝ်းၵႃႈမီးဢမ်ႇၸႂ်ႈၶႃႈႁိုဝ်။ၵႃႈၼႂ်းၶႅၼ်မိုဝ်းၸဝ်ႈႁဝ်းၼၼ်ႉမီးႁႅင်းတၼ်းၶူဝ်းဢၼ်ယႂ်ႇၼႃႇထၼ်ႈပေႃးၽူႈလႂ်သေၵေႃႉသေၵူၼ်းဢမ်ႇႁၢမ်ႈတပ်ႉႁႄႉၶႅၼ်ၸဝ်ႈႁဝ်းလႆႈဢမ်ႇၸႂ်ႈတီႈၶႃႈႁိုဝ်။
၇ ၽြႃးပဵၼ်ၸဝ်ႈတီႈၶႃႈ။ၸဝ်ႈႁဝ်းႁေႃႈၶဝ်ၸိူဝ်းဢၼ်ယၢမ်ႈယူႇၵႃႈၼႂ်းမိူင်းၼႆႉၸိူဝ်းၼၼ်ႉဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းၸဝ်ႈႁဝ်းမဵဝ်းဢိသရေႇလလႄႈဢဝ်မိူင်းၼႆႉပၼ်တီႈလုၵ်ႈလၢၼ်ႈဢႃႇပႁမ်ႇၵေႃႉသေႈၸဝ်ႈႁဝ်းၼၼ်ႉသေႇသေႇဢမ်ႇၸႂ်ႈတီႈၶႃႈႁိုဝ်။
၈ ၶဝ်ၼၼ်ႉတူၵ်းတီႈတူၵ်းလႅၼ်ယူႇၵႃႈၼႂ်းမၼ်းသေလႄႈဢွၼ်ၵၼ်ႁဵတ်းထႃႇၼႃႉတီႈမူတ်းၸၢင်ႇၵႃႈၼႂ်းမၼ်းပုၼ်ႈၼႃႇမႃႉၸိုဝ်သဵင်ၸဝ်ႈႁဝ်းလႄႈလဝ်ႈလၢတ်ႈဝႃႈ၊-
၉ မိူဝ်ႈဢၼ်ၽေးဢူးပၢတ်ႈဢၼ်ဝႃႈၽေးလၢပ်ႇၽေးတၢင်းဢၼ်ပၼ်တၢမ်ႇၽေးၵႃႇလႃႉႁႃႈလႅင်ႉမိူင်းၽေးတၢင်းဢၼ်ဢိုပ်းယၢၵ်ႈသေၸိူဝ်ႉသပေိူင်ႁွတ်ႈထိုင်ၵႃႈၼိူဝ်ၶႃႈၸဝ်ႈႁဝ်းၶဝ်လႄႈၶႃႈၸဝ်ႈႁဝ်းၶဝ်ဢွၼ်ၵၼ်ၸုၵ်းယူႇၵႃႈတီႈၽၢႆႇၼႃႈၸဝ်ႈႁဝ်းၵွပ်ႈပိူဝ်ႈဢၼ်ၼႃႇမႃႉၸိုဝ်ႈသဵင်ၸဝ်ႈႁဝ်းမီးယူႇၵႃႈတီႈႁိူၼ်းၸဝ်ႈၼၼ်ႉယူႇသေလႄႈထွၵ်ႈလူၺ်ႈတုၵ်ႉၶႃႉတၢင်းၽၢၼ်ၶႃႈၸဝ်ႈႁဝ်းၶဝ်သေလႄႈႁွင်ႉသႅၼ်ႇၸိုင်ၶႅၼ်းတေႃႈထွမ်ႇငိၼ်းဢဝ်လႄႈဢိတ်းလူၸွႆႈထႅမ်သေၵမ်းတီႈၶႃႈ၊ဝႃႈၼင်ႇၼႆဝႆႉတီႈၶႃႈဢေႃႈ။
၁၀ မိူဝ်ႈလဵဝ်ၼႆႉၶႅၼ်းတေႃႈလူတူၺ်းလွင်ႈဢၼ်ၵူၼ်းမဵဝ်းဢမ်ႇမုၼ်ႇၵူၼ်းမဵဝ်းမေႃႇၽ၊ၵူၼ်းလွႆၸိရဢၼ်ၸဝ်ႈႁဝ်းဢမ်ႇပၼ်ဢၶႂၢင်ႉဢမ်ႇႁႂ်ႈၵူၼ်းမဵဝ်းဢိသရေႇလၶဝ်လႆႈတိုၵ်းတေႃးယႃႉပႅတ်ႈၼႂ်းမိူဝ်ႈဢၼ်ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉလႄႈဝေႈပိူင်ႈၶဝ်ၵႂႃႇၸိူဝ်းၼၼ်ႉ
၁၁ တေႃႈလဵဝ်ႈၶဝ်ဢွၼ်ၵၼ်မႃးႁႂ်ႈလႆႈတွပ်ႇတႅၼ်းႁႂ်ႈလႆႈႁေႃႈၶႃႈၸဝ်ႈႁဝ်းၶဝ်ဢွၵ်ႇသေၵႃႈၼႂ်းလိၼ်တီႈဢၼ်ႁဝ်းလႆႈၶၢမ်ႇဢမူၺ်ႇဢၼ်ၸဝ်ႈႁဝ်းပၼ်ပိူင်ႇၼႆႉတီႈၶႃႈဢေႃႈ။
၁၂ ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ၸဝ်ႈႁဝ်းယင်းဢမ်ႇၸီႇယၢင်ႇၶဝ်လႄႈတၵ်းယူတီႈၶႃႈႁိုဝ်။ႁႂ်ႈၶႃႈၸဝ်ႈႁဝ်းၶဝ်ဢမ်ႇတတ်ႈၼိုင်ႇလႆႈႁႂ်ႈလႆႈႁၢမ်ႈတပ်ႉႁႄႉၶႅၼ်မူႇၽုင်မုၵ်ႉၸိူဝ်းလူင်ဢၼ်မႃးႁႂ်ႈလႆႈတိုၵ်းတေႃးၶႃႈၸဝ်ႈႁဝ်းၶဝ်ၼၼ်ႉတီႈၶႃႈႁိုဝ်။တၵ်းလႆႈႁဵတ်းၸိူဝ်ႉၼင်ႇႁိုဝ်ဢမ်ႇႁူႉတီႈၶႃႈ။
၁၃ တႃႈၶႃႈၸဝ်ႈႁဝ်းၶဝ်ၼႆႉဢွၼ်ၵၼ်ၸပ်းၸဝ်ႈႁဝ်းယူႇၵူၺ်းတီႈၶႃႈဢေႃႈဝႃႈၼင်ႇၼႆလႄႈ၊ၵူၼ်းမဵဝ်းယုတတင်းသဵင်ႈတင်းလူင်ဢိၵ်ႇတင်းလုၵ်ႈၶဝ်မေးၶဝ်လုၵ်ႈဢွၼ်ႇလႅင်ၶဝ်ဢွၼ်ၵၼ်ၸုၵ်းယူႇၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
၁၄ မိူဝ်ႈၼၼ်ႉဝိၺိၺ်ႇထႃႇဝရႃႉၽြႃးတူၵ်းႁွတ်ႈၵႃႈၼိူဝ်ယႁႃႇၸေႇလဢၼ်ပဵၼ်လုၵ်ႈၸၢႆးၸႃႇၶရိဢၼ်ပဵၼ်လုၵ်ႈၸၢႆးပေႇၼႃႇယဢၼ်ပဵၼ်လုၵ်ႈၸၢႆးယေႇယေႇသဢၼ်ပဵၼ်လုၵ်ႈၸၢႆးမတ်ႉတၼိမဵဝ်းလေႇဝိၸိူဝ်ႉၶိူ်ဝ်းဢႃႇသပ်ႉၼၼ်ႉၵႃႈတီႈၼႂ်းၵၢင်ႈပရိၵ်ႈသၢတ်ႈလႄႈမၼ်းလၢတ်ႈလႄႈဝႃႈ၊-
၁၅ ၶုၼ်လူင်ယုဝ်ႇသၽတ်ႉတင်းၵူၼ်းမိူင်းယုတၵူၼ်းဝဵင်းယေႇရုသလႅမ်ႇတင်းသဵင်ႈတင်းလူင်ၶဝ်ဢိူၺ်း။ဢွၼ်ၵၼ်ထွမ်ႇငိၼ်းတႃႉ။ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ယႃႇပေဢွၼ်ၵၼ်ၸႂ်လူႉၵွပ်ႈပိူဝ်ႈမူႇၽုင်မုၵ်ႉၸိူဝ်းလူင်ၼၼ်ႉ။
၁၆ ဢမူႉတိုၵ်းသိုၵ်းၼၼ်ႉပဵၼ်တႃႇသူဢမ်ႇၸႂ်ႈ။ပဵၼ်ပုၼ်ႈတႃႇၽြႃးပဵၼ်ၸဝ်ႈဢေႃႈ။ဝၼ်းမိူဝ်ႈၽုၵ်ႈဢွၼ်ၵၼ်ၶီႇသိုၵ်းလူင်းၵႂႃႇၸူးတီႈဢၼ်ၶဝ်မီးၼၼ်ႉတႃႉ။ၶဝ်ယင်းတိုၵ်ႉဢွၼ်ၵၼ်ၸွမ်းသဵၼ်ႈတၢင်းဢၼ်ၶိုၼ်ႈၸူးဝဵင်းၸိၸၼၼ်ႉယူႇလႄႈသူတၵ်းထူပ်းႁၼ်ၶဝ်ၵႃႈတီႈသူပ်းပၢင်ႇႁူၺ်ႈသိုဝ်ႈထိူၼ်ႇယေႇႁူၺ်ႇလၼၼ်ႉဢေႃႈ။
၁၇ ၵူၺ်းၵႃႈၵူၼ်းမိူင်းယုတၵူၼ်းဝဵင်းယေႇရုသလႅမ်ႇၶဝ်ဢိူၺ်း။သူဢမ်ႇမီးလွင်ႈဢၼ်တၵ်းလႆႈတိုၵ်းသိုၵ်းၼႂ်းပွႆးသိုၵ်းၼႆႉ။ဢွၼ်ၵၼ်ႁႂ်ႈတူဝ်သူတႄႇၼိမ်ၵၼ်ႈလႄႈၸုၵ်းယူႇၼိမ်ၼိမ်လီလီသေလႄႈလူတူၺ်းၵျေးၸူးတၢင်းဢၼ်ထႃႇဝရႃႉၽြႃးၵႄႇသႄႇၶျွတ်ႈဢဝ်မီးယူႇတီႈသူၼၼ်ႉတႃႉ။ယႃႇပေဢွၼ်ၵၼ်ၵူဝ်ႁႄ။ယႃႇပေဢွၼ်ၵၼ်ၸႂ်လူႉ။ဢွၼ်ၵၼ်ၶီႇသိုၵ်းၵႂႃႇၼႂ်းဝၼ်းမိူဝ်ႈၽုၵ်ႈတႃႉ။ထႃႇဝရႃႉၽြႃးတၵ်းမီးယူႇလူၺ်ႈၵၼ်တင်းသူဢေႃႈ၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆဢေႃႈ။
၁၈ ယုဝ်ႇသၽတ်ႉၼၼ်ႉၶုပ်ႉမူပ်ႇဝၢင်းႁူဝ်ၵႃႈၼိူဝ်လိၼ်လႄႈၵူၼ်းမိူင်းယုတၵူၼ်းဝဵင်းယေႇရုသလႅမ်ႇတင်းသဵင်ႈတင်းလူင်ဢွၼ်ၵၼ်ၶုပ်ႉမူပ်ႇၵႃႈတီႈၽၢႆႇၼႃႈထႃႇဝရႃႉၽြႃးလႄႈၵူဝ်းၵႂၢႆႇထႃႇဝရႃႉၽြႃးဢေႃႈ။
၁၉ ၵူၼ်းၸိူဝ်ႉၶိူဝ်းၵေႃႇႁတ်ႉဢိၵ်ႇတင်းၵူၼ်းၸိူဝ်ႉၶိူဝ်းၵေႃႇရမဵဝ်းလေႇဝိၸိူဝ်းၼၼ်ႉဢွၼ်ၵၼ်ၸုၵ်းယူႇႁႂ်ႈလႆႈႁဵတ်းတင်းသဵင်ဢၼ်ယႂ်ႇၼႃႇႁႅင်းၼႃႇလူင်လၢင်သေလႄႈယွင်ႈယေႃးထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလဢေႃႈ။
၂၀ ၼႂ်းမိူဝ်ႈၽုၵ်ႈၼၼ်ႉၶဝ်ဢွၼ်ၵၼ်လုၵ်ႉၸဝ်ႉၸဝ်ႉလႄႈၵႂႃႇၵႃႈတီႈထိူၼ်ႇတေႇၵေႃႇဢေႃႈ။ၼႂ်းမိူဝ်ႈဢၼ်ၶဝ်ယင်းတိုၵ်ႉဢွၵ်ႇၵႂႃႇယူႇၼၼ်ႉယုဝ်ႇသၽတ်ႉၸုၵ်းယူႇသေလႄႈမီးဢမိင်ႉလႄႈဝႃႈ၊-ၵူၼ်းမိူင်းယုတ၊ၵူၼ်းဝဵင်းယေႇရုသလႅမ်ႇၶဝ်ဢိူၺ်း။ဢွၼ်ၵၼ်ထွမ်ႇငိၼ်းတႃႉ။ဢွၼ်ၵၼ်ယုမ်ႇမၢတ်ႈထႃႇဝရႃႉၽြႃးၽြႃးပဵၼ်ၸဝ်ႈသူတႃႉ။ပေႃးႁဵတ်းၸိူဝ်ႉၼင်ႇၼၼ်ၸိုင်သူတၵ်းဢွၼ်ၵၼ်တႄႇၼိမ်ဢေႃႈ။ဢွၼ်ၵၼ်ယုမ်ႇမၢတ်ႈပရေႃးၽႅတ်ႈမၼ်းၸဝ်ႈတင်းလၢႆတႃႉ။ပေႃးႁဵတ်းၸိူဝ်ႉၼင်ႇၼၼ်ၸိုင်သူတၵ်းဢွၼ်ၵၼ်ႁဵတ်းလႆႈပဵၼ်လႆႈဢေႃႈဝႃႈၼင်ႇၼႆဢေႃႈ။
၂၁ မၼ်းတိူင်ႇပၢင်ႇၵၼ်တင်းၵူၼ်းတင်းလၢႆသေယဝ်ႉၶၢၼ်းဝႆႉၶဝ်ၸိူဝ်းဢၼ်ႁဵတ်းၵႂၢမ်းတီႈထႃႇဝရႃႉၽြႃးလႄႈယွင်ႈယေႃးမူၼ်ႈသရေႇတၢင်းဢၼ်မူတ်းၸၢင်ႇၸဝ်ႈၸိူဝ်းၼၼ်ႉဢွၼ်ႁူဝ်တပ်ႉၶီႇသိုၵ်းၵႂႃႇဢေႃႈ။ၶဝ်ဢွၼ်ၵၼ်ယွင်ႈယေႃးမူၼ်ႈၵျေးၸူးထႃႇဝရႃႉၽြႃးလႄႈဝႃႈ၊-ယွင်ႈယေႃးထႃႇဝရႃႉၽြႃးတႃႉ။လွင်ႈမၼ်းၸမ်းၵရူႉၼႃႇမၼ်းၸဝ်ႈတႄႇယူႇတႃႇသေႇဢမ်ႇထၢတ်ႇဢေႃႈ၊ဝႃႈၼင်ႇၼႆဢေႃႈ။
၂၂ မိူဝ်ဢၼ်ၶဝ်ဢွၼ်ၵၼ်ၸႃႉႁဵတ်းၵႂၢမ်းဢၼ်ယွင်ႈယေႃးၼၼ်ႉၸိုင်ထႃႇဝရႃႉၽြႃးႁဵတ်းတပ်ႉသိုၵ်းမူၵ်းဢၼ်လွမ်ပႂ်ႉယူႇၽၢႆႇၼိုင်ႈတင်းၵူၼ်းမဵဝ်းဢမ်ႇမုၼ်ႇ၊ၵူၼ်းမဵဝ်းမေႃႇၽ၊ၵူၼ်းလွႆၸိရဢၼ်မႃးႁႂ်ႈလႆႈတိုၵ်းတေႃးမိူင်းယုတၸိူဝ်းၼၼ်ႉလႄႈၶဝ်ၸိူဝ်းၼၼ်ႉလႆႈၶၢမ်ႇတၢင်းဢၼ်ယႃႉပႅတ်ႈဢေႃႈ။
၂၃ လွင်ႈမၼ်းၸမ်းၵူၼ်းမဵဝ်းဢမ်ႇမုၼ်ႇတင်းၵူၼ်းမဵဝ်းမေႃႇၽၸိူဝ်းၼၼ်ႉဢွၼ်ၵၼ်ၸုၵ်းယူႇၽၢႆႇၼိုင်ႈတင်းၵူၼ်းလွႆၸိရတင်းလၢႆလႄႈၶႃႈၽၼ်းဢဝ်တၢႆလႄႈယႃႉၽဵဝ်ႈပႅတ်ႈၵူၼ်းလွႆၸိရၸိူဝ်းၼၼ်ႉမူတ်းသဵင်ႈသေဢေႃႈ။လိုၼ်းၼၼ်ႉၶဝ်ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်သမ်ႉတိုၵ်းတေႃးၵၼ်လႄႈႁွတ်ႈထိုင်တၢင်းဢၼ်လူႉလႅဝ်သိင်ႈဢေႃႈ။
၂၄ မိူဝ်ႈဢၼ်ၵူၼ်းယုတတင်းလၢႆႁွတ်ႈထိုင်မႃးၵႃတီႈပၢင်ႈသိုၵ်းလႄႈမုင်ႈတူၺ်းၼၼ်ႉၸိုင်လႆႈႁၼ်ၽုင်မုၵ်ႉၸိူဝ်းၼၼ်ႉပဵၼ်တူဝ်တၢႆလႄႈလူမ်ႉသိူဝ်ႇၵႃႈၼိူဝ်လိၼ်ဝႆႉဢေႃႈ။ဢမ်ႇလွတ်ႈသေၵေႃႉသေၵူၼ်း။
၂၅ မိူဝ်ႈဢၼ်ယုဝ်ႇသၽတ်ႉဢိၵ်ႇတင်းၵူၼ်းမၼ်းၸိူဝ်းၼၼ်ႉဢွၼ်ၵၼ်မႃးႁႂ်ႈလႆႈၵဵပ်းသိမ်းဢဝ်ၶွင်ၶူဝ်းဢၼ်ႁိမ်လႆႈၸိူဝ်းၼၼ်ႉၸိုင်ၶဝ်ထူပ်းႁၼ်ၶွင်ၶူဝ်းၼမ်ၼႃႇလူင်လၢင်လႂ်တူဝ်တၢႆလႂ်ၶိူင်ႈပိူင်ဢၼ်ထိူၵ်ႈၵႃႈထိူၵ်ႈၶၼ်ဢၼ်ၶဝ်ဢွၼ်ၵၼ်ထွတ်ႇဢဝ်ထၼ်ႈပေႃးဢမ်ႇႁၢပ်ႇဢဝ်ၵႂႃႇလႆႈၸိူဝ်းၼၼ်ႉဢေႃႈ။ၵွပ်ႈပိူဝ်ႈၶွင်ၶူဝ်းဢၼ်ႁိမ်လႆႈၸိူဝ်းၼၼ်ႉၼမ်ၼႃႇလူင်လၢင်လႄႈၶဝ်ဢွၼ်ၵၼ်သိမ်းဢဝ်သၢမ်ဝၼ်းတဵမ်တဵမ်ဢေႃႈ။
၂၆ ၼႂ်းဝၼ်းၸတုၵ်ႉထၼၼ်ႉၶဝ်ၸူႉၵၼ်တုမ်ၵၼ်ၵႃႈတီႈပၢင်ႇႁူၺ်ႈပရႃႇၶလႄႈဢွၼ်ၵၼ်ယွင်ႈယေႃးပၼ်ႈတၢင်းလီတီႈထႃႇဝရႃႉၽြႃးဢေႃႈ။ၵွပ်ႈပိူဝ်ႈၼင်ႇၼၼ်လႄႈၵႃႈတီႈၼၼ်ႉလႆႈၶၢမ်ႇတၢင်းဢၼ်ႁွင်ႉႁိၵ်ႈၸိုဝ်ပၢင်ႇႁူၺ်ႈပရႃႇၶတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။
၂၇ မိူဝ်ႈၼၼ်ႉၵွပ်ႈပိူဝ်ႈဢၼ်ထႃႇဝရႃႉၽြႃးပၼ်ဢၶႂၢင်ႉတီႈၶဝ်ဢၼ်ၶဝ်လႆႈၸူမ်းသိူဝ်းၵႃႈၼိူဝ်ရၢၼ်ႇသူႇၶဝ်ၼၼ်ႉလႄႈယုဝ်ႇသၽတ်ႉၼၼ်ႉဢွၼ်ႁူဝ်လႄႈၵူၼ်းမိူင်းယုတၵူၼ်းဝဵင်းယေႇရုသလႅမ်ႇၵႃႈမီးၼၼ်ႉ
၂၈ မီးတင်းၸႂ်ဢၼ်ၸူမ်းသိူဝ်းလႄႈဢွၼ်ၵၼ်ၶိုၼ်းမိူဝ်းၵႃႈတီႈဝဵင်းယေႇရုသလႅမ်ႇလႄႈပႃးဢဝ်တင်းတိင်ႇတရေႃးၼႄးၶရႃႇသေလႄႈႁွတ်ႈထိုင်ဝဵင်းယေႇရုသလႅမ်ႇၸူးၵႃႈတီႈႁိူၼ်းၽြႃးပဵၼ်ၸဝ်ႈဢေႃႈ။
၂၉ တၢင်းဢၼ်ၵူဝ်ႁႄထႃႇဝရႃႉၽြႃးႁွတ်ႈထိုင်ၵႃႈၼိူဝ်သိုင်ႇၸိုုင်ႈဝၢၼ်ႈမိူင်းတင်းသဵင်ႈတင်းလူင်မိူဝ်ႈဢၼ်ၶဝ်ငိၼ်းလွင်ႈဢၼ်ထႃႇဝရႃႉၽြႃးတိုၵ်းတေႃးရၢၼ်ႇသူႇမဵဝ်းဢိသရေႇလၸိူဝ်းၼၼ်ႉပႅတ်ႈၼၼ်ႉဢေႃႈ။
၃၀ ၼင်ႇၼၼ်လႄႈသိုင်ႇၸိုင်ႈဝၢၼ်ႈမိူင်းယုဝ်ႇသၽတ်ႉၼၼ်ႉသႃႇယႃႇလီငၢမ်းၵွပ်ႈပိူဝ်ႈဢၼ်ၽြႃးပဵၼ်ၸဝ်ႈပၼ်ဢၶႂၢင်ႉဢၼ်လႆႈထၢတ်ႇသိုၵ်းယဵၼ်သိုၵ်းသေၵႃႈတီႈၵူႈတီႈၵူႈလႅၼ်ၼၼ်ႉဢေႃႈ။
တၢင်းဢၼ်ယုဝ်ႇသၽတ်ႉဢုပ်ႉပိူင်ႇသုတ်းတိူၵ်ႈ
၃၁ ယုဝ်ႇသၽတ်ႉဢုပ်ႉပိူင်ႇၸၢမ်ႇၸႃးမိူင်းယုတလႄႈမိူဝ်ႈဢၼ်ဢသၢၵ်ႈမၼ်းလႆႈသၢမ်သိပ်းႁႃႈပီႊၼၼ်ႉမၼ်းၸႃႉၼင်ႈႁၢင်ႈၼင်ႈႁေႃလႄႈဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်းယေႇရုသလႅမ်ႇသၢဝ်းပၢႆႁႃႈပီႊဢေႃႈ။ၸိုဝ်သဵင်မေးၸဝ်ႈၸမ်းပဵၼ်ဢၸုၽလုၵ်ႈယိင်းသိလႁိဢေႃႈ။
၃၂ မၼ်းၼၼ်ႉယင်းဢမ်ႇဝေႈပိူင်ႈသသေဵၼ်ႈတၢင်းပေႃႈမၼ်းဢႃႇသလႄႈၸွမ်းတင်းသဵင်ႈတင်းမူတ်းလႄႈႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃႈထႃႇဝရႃႉၽြႃးဢေႃႈ။
၃၃ ၼႂ်းဝႃႈၼၼ်သေၵေႃႈမၼ်းဢမ်ႇပႄႇၽဵဝ်ႈထႃႇၼႃႉတီႈသုင်တင်းလၢႆပႅတ်ႈ။လွင်ႈမၼ်းၸမ်းၵူၼ်းတင်းလၢႆယင်းဢမ်ႇပႆႇၶျႃးၸႂ်သၽေႃးႁႂ်ႈလႆႈပိူင်ဢိင်ၽြႃးပဵၼ်ၸဝ်ႈပူႇမွၼ်ႇၶဝ်ၼၼ်ႉလႄႈယူႇဢေႃႈ။
၃၄ လွင်ႈတၢင်းယုဝ်ႇသၽတ်ႉဢၼ်ယင်းၵိုတ်းယင်းၵျၢၼ်ႇဢဝ်ၸဵမ်ငဝ်ႈတေႃႇပၢႆၸိူဝ်းၼၼ်ႉတႅမ်ႈမၢႆဝႆႉမီးယူႇၵႃႈၼႂ်းၵျၢမ်းလိၵ်ႈဢၼ်ယေႇႁုလုၵ်ႈၸၢႆးႁႃႇၼၼိၸီႇယၢင်ႇသိုပ်ႇသႂ်ႇဝႆႉတီႈရႃႇၸဝၢင်ႇဢိသရေႇလၼၼ်ႉယူႇဢေႃႈ။
၃၅ လိုၼ်းၼၼ်ႉယုဝ်ႇသၽတ်ႉၶုၼ်ႁေႃၶမ်းယုတၼၼ်ႉႁဵတ်းၵေႃႉႁူမ်ႈပွင်းလူၺ်ႈၵၼ်တင်းဢႃႇၶလိၶုၼ်ႁေႃၶမ်းဢိသရေႇလဢၼ်ႁဵတ်းဢမူႉဢႃႉထမ်ႇမႃႉၼႃႇလူင်လၢင်ၼၼ်ႉဢေႃႈ။
၃၆ မၼ်းႁဵတ်းၵေႃႉႁူမ်ႈပွင်းလူၺ်ႈၵၼ်တင်းမၼ်းၼၼ်ႉၸိူဝ်ႉၼင်ႇၼၼ်ႁႂ်ႈလႆႈႁဵတ်းႁိူၼ်းသၢင်းၽေႃးတင်းလၢႆပုၼ်ႈဢၼ်တၵ်းၵႂႃႇၵႃႈတီႈဝဵင်းတႃႇသုၼၼ်ႉလႄႈၶဝ်ဢွၼ်ၵၼ်ႁဵတ်းႁိူဝ်းသၢင်းၽေႃးၸိူဝ်းၼၼ်ႉၵႃႈတီႈဝဵင်းဢေႇၸယုၼ်ႇၵႃႇပႃႇဢေႃႈ။
၃၇ မိူဝ်ႈၼၼ်ႉဢေႇလျေႇၸႃႇလုၵ်ႈၸၢႆးတေႃႇတဝႁူႇၵူၼ်းဝဵင်းမရေႇသၼၼ်ႉႁဵတ်းပရေႃးၽႅတ်ႈသေလႄႈႁေႃးလၢတ်ႈယူႇၽၢႆႇၼိုင်တင်းယုဝ်ႇသၽတ်ႉလႄႈဝႃႈ၊-ၵွပ်ႈပိူဝ်ႈဢၼ်ၸဝ်ႈၶုၼ်လူင်ႁဵတ်းၵေႃႉႁူမ်ႈပွင်းလူၺ်ႈၵၼ်တင်းဢႃႇၶၸိၼၼ်ႉလႄႈထႃႇဝရႃႉၽြႃးယႃႉဢမူႉဢၼ်ၸဝ်ႈၶုၼ်လူင်ႁဵတ်းၸိူဝ်းၼၼ်ႉပႅတ်ႈတီႈၶႃႈယဝ်ႉ၊ဝႃႈၼင်ႇၼႆလႄႈႁိူဝ်းသၢင်းၽေႃးၸိူဝ်းၼၼ်ႉဢွၼ်ၵၼ်ႁၵ်းလူႉထၼ်ႈပေႃးဢမ်ႇၵႂႃႇၵႃႈတီႈဝဵင်းတႃႇသုလႆႈဢေႃႈ။