Chapter
၁၇
ယုဝ်ႇသၽတ်ႉပဵၼ်ၶုၼ်ႁေႃၶမ်းယုတ
၁ ယုဝ်ႇသၽတ်ႉလုၵ်ႈၸၢႆးဢႃႇသၼင်ႈႁၢင်ႈၼင်ႈႁေႃတၢင်တူဝ်မၼ်းလႄႈႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇယူႇၽၢႆႇၼိုင်ႈတင်းမိူင်းဢိသရေႇလဢေႃႈ။
၂ မၼ်းဢဝ်ၵူၼ်းတပ်ႉၵူၼ်းသိုၵ်းတင်းလၢႆဝႆႉၵႃႈတီႈဝဵင်းဢၼ်မၼ်ႈၶိူင်ႇၵႃႈဢၼ်မီးၵႃႈၼႂ်းမိူင်းယုတၸိူဝ်းၼၼ်ႉလႄႈၶၢၼ်းတပ်ႉပႂ်ႉဝဵင်းဝႆႉၵႃႈၼႂ်းမိူင်းယုတၵူႈတီႈၵူႈလႅၼ်ဢိၵ်ႇတင်းၵႃႈၼႂ်းဝဵင်းဢၼ်မီးၵႃႈၼႂ်းမိူင်းဢေႇၽရိမ်ႇဢၼ်ဢႃႇသၸဝ်ႈပေႃႈမၼ်းတိုၵ်းဢဝ်လႆႈၼၼ်ႉၸိူဝ်းၼၼ်ႉဢေႃႈ။
၃ ထႃႇဝရႃႉၽြႃးမီးယူႇလူၺ်ႈၵၼ်တင်းယုဝ်ႇသၽတ်ႉၵွပ်ႈပိူဝ်ႈဢၼ်မၼ်းၸွမ်းသဵၼ်ႈတၢင်းဢၼ်ၸဝ်ႈပေႃႈမၼ်းတႃႇဝိတ်ႉၸွမ်းမိူဝ်ႈဢွၼ်တၢင်းၼၼ်ႉလႄႈဢမ်ႇသွၼ်ႈပိုင်ႈၽြႃးပႃႇလ၊
၄ မၼ်းသွၼ်ႈပိုင်ႈၽြႃးပဵၼ်ၸဝ်ႈၸဝ်ႈပေႃႈမၼ်းၵူၺ်းလႄႈယင်းဢမ်ႇၵႂႃႇမႃးၸွမ်းၵႃႈၼင်ႇဢၼ်မဵဝ်းဢိသရေႇလၵမ်ၵျၢင်ႉသၢင်ႈႁဵတ်းၼၼ်ႉလႄႈၵႂႃႇမႃးၸွမ်းပိင်းၺၢပ်ႈမၼ်းၸဝ်ႈတင်းလၢႆၵူၺ်းၼၼ်ႉဢေႃႈ။
၅ ပိူဝ်ႈၼႆလႄႈထႃႇဝရႃႉၽြႃးႁႂ်ႈသိုင်ႇၸိုင်ႈဝၢၼ်ႈမိူင်းၸဝ်ႈတႄႇယူႇၵႃႈၼႂ်းမိုဝ်းမၼ်းလႄႈၵူၼ်းမဵဝ်းယုတတင်းသဵင်ႈတင်းလူင်ဢွၼ်ၵၼ်သၢၵ်ႈလၢၵ်ႈသွင်ႇတီႈယုဝ်ႇသၽတ်ႉဢေႃႈ။
၆ ပိၵ်ႉသမ်ႉၸေးၸိမ်ႇဢုၵ်ႉၸႃႇမူၼ်ၵုင်ႇသရေႇယႂ်ႇၼမ်ၼႃႇသေၵေႃႈမၼ်းမီးၸႂ်ဢၼ်ၸပ်းၸွႆးသဵၼ်ႈတၢင်းထႃႇဝရႃႉၽြႃးလႄႈပႄႇၽဵဝ်ႈပႅတ်ႈထႃႇၼႃႉတီႈသုင်ဢိၵ်ႇတင်းတူၼ်ႈဢႃႇသရတင်းလၢႆသေၵႃႈၼႂ်းမိူင်းယုတဢေႃႈ။
၇ ၼႂ်းပီႊဢၼ်မၼ်းၼင်ႈႁၢင်ႈၼင်ႈႁေႃသၢမ်ပီႊၼၼ်ႉမၼ်းပွႆႇၸႂ်ႉႁေႇလ၊ဢေႃႇပတိ၊ၸႃႇၶရိ၊ၼႃႇသၼေႇလ၊မိၵ်ႉၶႃႇယဢၼ်ပဵၼ်မူးမၢတ်ႈၽွင်းမိူင်းၸိူဝ်းၼၼ်ႉဢိၵ်ႇတင်းသေႇမႃႇယ၊ၼေႇသၼိ၊ၸေႇပတိ၊
၈ ဢႃႇသႁေႇလသေႇမိရမုတ်ႉယေႃးၼသၼ်ႇဢတေႃႇၼိယ၊တေႃႇၽိယ၊တေႃႇပဢတေႃႇၼိယဢၼ်ပဵၼ်ၵူၼ်းမဵဝ်းလေႇဝိၸိူဝ်းၼၼ်ႉဢိၵ်ႇတင်းဢေႇလိသမႃႇတင်းယေႃႇရမ်ႇဢၼ်ပဵၼ်ယိတ်ႉပရေႃးႁိၵ်ႈၸိူဝ်းၼၼ်ႉၵႂႃႇႁႂ်ႈလႆႈပၼ်ဢေႃးဝႃႇတႃႉၵႃႈၼႂ်းဝၢၼ်ႈၼႂ်းဝဵင်းယုတဢေႃႈ။
၉ ၶဝ်ၼၼ်ႉပႃးဢဝ်ၵျၢမ်းလိၵ်ႈပိင်းၺၢပ်ႈတိထႃႇဝရႃႉၽြႃးယူႇသေလႄႈပၼ်ဢေႃးဝႃႇတႃႉၵႃႈၼႂ်းမိူင်းယုတလႄႈဢွၼ်ၵၼ်လႄႇလဵပ်ႈၵႂႃႇၵႃႈၼႂ်းဝဵင်းယုတၵႃႈမီးၼၼ်ႉလႄႈပၼ်ဢေႃးဝႃႇတႃႉတီႈၵူၼ်းဝၢၼ်ႈၵူၼ်းမိူင်းတၢင်းလၢႆဢေႃႈ။
၁၀ တၢင်းဢၼ်ၵူဝ်ႁႄထႃႇဝရႃႉၽြႃးတူၵ်းႁွတ်ႈၵႃႈၼိူဝ်သိုင်ႇၸိုင်ႈဝၢၼ်ႈမိူင်းဢၼ်လဵပ်ႈႁွပ်ႈမိူင်းယုတၵႃႈမီးၸိူဝ်းၼၼ်ႉထၼ်ႈပေႃးၶဝ်ယင်းဢမ်ႇႁတ်းႁဵတ်းတၢင်းဢၼ်တိုၵ်းတေႃးယုဝ်ႇသၽတ်ႉလႄႈယူႇဢေႃႈ။
၁၁ ၵူၼ်းၽိလိတ်ႉတိၵမ်ႈၽွင်ႈဢွၼ်ၵၼ်ဢဝ်လၢၵ်ႈသွင်ႇတင်းငိုၼ်းၶွၼ်ႇၸဝ်ႈသၢၵ်ႈပၼ်တီႈယုဝ်ႇသၽတ်ႉလႄႈၵူၼ်းမဵဝ်းဢႃႇရေႇပျႃႇတင်းလၢႆၵေႃႈဢွၼ်ၵၼ်ဢဝ်ၽုင်သူဝ်းၽုင်ပႄႉဢၼ်ဝႃႈသူဝ်းပေႃႈၸဵတ်းႁဵင်ပၢႆၸဵတ်းပၢၵ်ႇဢိၵ်ႇတင်းပႄႉပေႃႈၸဵတ်းႁဵင်ပၢႆၸဵတ်းပၢၵ်ႇမႃးဢေႃႈ။
၁၂ ယုဝ်ႇသၽတ်ႉၼၼ်ႉမီးႁႅင်းယႂ်ႇၽႄႈတူဝ်းတွၼ်းမႃးၼႃႇလူင်လၢင်လႄႈတႄႇႁဵတ်းတိူၵ်ႈတီႈတိုၵ်းသိုၵ်းလႂ်ဢိၵ်ႇတင်းဝဵင်းတီႈဢၼ်သိမ်းဝႆႉၽၼ်ႇတႃႇၸဝ်ႈလႂ်ၵႃႈၼႂ်းမိူင်းယုတဢေႃႈ။
၁၃ ၵႃႈၼႂ်းဝဵင်းယုတၸိူဝ်းၼၼ်ႉမီးဢမူႉၸဝ်ႈၼမ်ၼႃႇလႄႈႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇတင်းလၢႆဢွၼ်ၵၼ်မီးယူႇၵႃႈၼႂ်းဝဵင်းယေႇရုသလႅမ်ႇဢေႃႈ။
၁၄ ၸရၢင်းႁူဝ်ႁၢၼ်ၵူၼ်းသိုၵ်းဢၼ်ၸွမ်းလူၺ်ႈမဵဝ်းၸိူဝ်ႉၶိူဝ်းပေႃႈၶဝ်ၼၼ်ႉၸမ်းၵႃႈၼႂ်းမဵဝ်းယုတဢၼ်ပဵၼ်ပူဝ်ႇလူင်ဢၼ်ဢုပ်ႉၵႃႈၼိူဝ်ၵူၼ်းပဵၼ်ႁဵင်ပဵၼ်ႁဵင်ၼၼ်ႉမီးၶုၼ်ပူဝ်ႇၶျုၵ်ႈဢႃႇတၼဢိၵ်ႇတင်းႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇသၢမ်သႅၼ်၊တႂ်ႈမၼ်းၼၼ်ႉ
၁၅ မီးယေႃးႁၼၼ်ႇဢိၵ်ႇတင်းႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇသွင်သႅၼ်ပၢႆပႅတ်ႇ
၁၆ မိုၼ်တႂ်ႈမၼ်းၼၼ်ႉမီးဢႃႇမသိလုၵ်ႈၸၢႆးၸိၶရိဢၼ်မီးၸႂ်ၸေႇတၼႃႇသေလႄႈဢဝ်တူဝ်ၸဝ်ႈၵဝ်ႇပုၵ်ႉၸေႃႇတီႈထႃႇဝရႃႉၽြႃးၼၼ်ႉဢိၵ်ႇတင်းႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇသွင်သႅၼ်၊
၁၇ ၵႃႈၼႂ်းမဵဝ်းပိၼ်ႇယႃႇမိၼ်ႇၼၼ်ႉမီးဢေႇလျႃႇတဢၼ်ႁႅင်းယႂ်ႇၼႃႇဢိၵ်ႇတင်းၶဝ်ၸိူဝ်းဢၼ်ယိပ်းၵမ်ၵၢင်ႇတင်းၶိူင်ႁႄႉလၢၵ်ႈၼၢၵ်ႈၼၼ်ႉသွင်သႅၼ်၊
၁၈ တႂ်ႈမၼ်းၼၼ်ႉယေႃႇၸပတ်ႉဢိၵ်ႇတင်းၶဝ်ၸိူဝ်းဢၼ်မႄးႁႅၼ်းဝႆႉပုၼ်ႈဢၼ်တၵ်းတိုၵ်းသိုၵ်းၼၼ်ႉသႅၼ်ပၢႆပႅတ်ႇမိုၼ်ႇဢေႃႈ။
၁၉ ၶဝ်ၸိူဝ်းၼႆႉပဵၼ်ၶဝ်ၸိူဝ်းဢၼ်ဢွၼ်ၵၼ်ၵိုတ်ႈႁၢပ်ႇဢမူႉၶုၼ်ႁေႃၶမ်းၼွၵ်ႈသေၶဝ်ၸိူဝ်းဢၼ်ၶုၼ်ႁေႃၶမ်းဢဝ်ဝႆႉၵႃႈၼႂ်းဝဵင်းဢၼ်မၼ်ႈၶိူင်ႇၵႃႈၼႂ်းမိူင်းယုတၵူႈတီႈၵူႈလႅၼ်ၼၼ်ႉဢေႃႈ။