Chapter
၃၃
မၼႃႇသေႇပဵၼ်ၶုၼ်ႁေႃၶမ်းမိူင်းယုတ
၁ မၼႃႇသေႇၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသိပ်းသွင်ပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇႁႃႈသိပ်းပၢႆႁႃႈပီႊဢေႃႈ။
၂ မၼ်းႁဵတ်းတူႉၸရိူၵ်ႈဢပျႅတ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးၸွမ်းၼင်ႇထုင်းၸၢမ်ႇဢၼ်လီႁင်ႈဢဵတ်ႇသဵတ်ႇၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ထႃႇဝရႃႉၽြႃးႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်းဢိသရေႇလတင်းလၢႆၸိူဝ်းၼၼ်ႉဢေႃႈ။
၃ မၼ်းမႄးၵုမ်းမႄးႁဵတ်းထႃႇၼႃႉတီႈသုင်ဢၼ်ၸဝ်ႈပေႃႈမၼ်းႁေႇၸၵိယႃႉပႅတ်ႈၼၼ်ႉလႄႈတႄႇႁဵတ်းယိတ်ႉပလၢင်ႇပုၼ်ႈၽြႃးပႃႇလလႂ်ႁဵတ်းတူၼ်ႈဢႃႇသရလႂ်သေလႄႈႁဵတ်းဝၢတ်ႈတီႈၶိူင်ႈပိူင်ႃႉၵၢင်ႁၢဝ်ၵႃႈမီးလႄႈၵူဝ်းၵႂၢႆႇဢေႃႈ။
၄ ၵႃႈၼႂ်းႁိူၼ်းထႃႇဝရႃႉၽြႃးဢၼ်ထႃႇဝရႃႉၽြႃးမီးဢမိင်ႉလႄႈဝႃႈ၊-ၼႃႇမႃႉၸိုဝ်သဵင်ၵဝ်တၵ်းလႆႈတႄႇယူႇၵႃႈၼႂ်းဝဵင်းယေႇရုသလႅမ်ႇသေႇသေႇဝႃႈၼင်ႇၼႆၼၼ်ႉၵေႃႈမၼ်းတႄႇႁဵတ်းယိတ်ႉပလၢင်ႇတင်းလၢႆဢေႃႈ။
၅ မၼ်းတႄႇႁဵတ်းယိတ်ႉပလၢင်ႇပုၼ်ႈၶိူင်ႈပိူငႃ်ႉၵၢင်ႁၢဝ်ၵႃႈမီးၼၼ်ႉၵႃႈၼႂ်းတမ်ႇတိူင်းႁိူၼ်းထႃႇဝရႃႉၽြႃးတင်းသွင်ထၢပ်ႈဢေႃႈ။
၆ မၼ်းႁႂ်ႈလုၵ်ႈလၢင်းမၼ်းလႆႈၶၢမ်ႇတၢင်းဢၼ်ဢဝႆ်းပုၵ်ႉၸေႃႇၵႃႈၼႂ်းၶူင်ႇႁူၺ်ႈႁိၼ်ၼုမ်ႇဢေႃႈ။မၼ်းၸၢင်ႊတူၺ်းပေႇတၢင်ႇၵႃႇလႃးလႄႈသုင်းတိုဝ်းဢတၢတ်ႈဢၼ်ၸၢင်ႊၸေႃႉၸၢင်ႊႁဵတ်းၼၼ်ႉသေလႄႈႁဵတ်းဢတၢတ်ႈၽီဝိၵ်ႉၸႃႇလႄႈပၼ်ဢၶႂၢင်ႉတီႈၽိူဝ်ႉၶဝ်ၽီၶဝ်ဢေႃႈ။မၼ်းႁဵတ်းတူႉၸရိူၵ်ႈၼမ်ၼႃႇသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈတိုၵ်းယူင်းတၢင်းၸႂ်မႆႈၶႆႈၸႃႉမၼ်းၸဝ်ႈဢေႃႈ။
၇ မၼ်းဢဝ်ရုၵ်ႉထူႉဢၼ်ႁဵတ်းႁႂ်ႈမိူၼ်ၵၼ်တင်းရုၵ်ႉထူႉဢၼ်လုမ်းလႃးမႄးႁဵတ်းၼၼ်ႉသေလႄႈတၢင်ႇဝႆႉၵႃႈၼိူဝ်ႁိူၼ်းၽြႃးပဵၼ်ၸဝ်ႈဢၼ်ၽြႃးပဵၼ်ၸဝ်ႈမီးဢမိင်ႉတီႈတႃႇဝိတ်ႉဢိၵ်ႇတင်းလုၵ်ႈၸၢႆးမၼ်းသေႃးလမုၼ်ႇလႄႈဝႃႈ၊-ၵဝ်တၵ်းႁႂ်ႈၼႃႇမႃႉၸိုဝ်သဵင်ၵဝ်တႄႇယူႇၵႃႈၼႂ်းႁိူၼ်းၸဝ်ႈၼႆႉဢိၵ်ႇတင်းဝဵင်းယေႇရုသလႅမ်ႇဢၼ်ၵဝ်လိူၵ်ႈၵဵပ်းဢဝ်ၵႃႈၼႂ်းမဵဝ်းဢိသရေႇလၵူႈမဵဝ်းၼၼ်ႉတႃႇသေႇဢေႃႈ၊ဝႃႈၼင်ႇၼႆ၈ ဢေႃႈ။
၈ ပိၵ်ႉသမ်ႉမၼ်းၸဝ်ႈမီးဢမိင်ႉဝႃႈ၊-ပေႃးၵူၼ်းမဵဝ်းဢိသရေႇလတင်းလၢႆပႂ်ႉၵမ်ပႂ်ႉၸွမ်းႁႂ်ႈလႆႈၵမ်ၵျၢင်ႉၸွမ်းၵႃႈဢၼ်ၵဝ်သင်ႇလၢတ်ႈဝႆႉဢၼ်ဝႃႈတြႃးၸဝ်ႈထုင်းိင်ႈတြႃး၊လွင်ႈတၢင်းဢၼ်ၸီႇယၢင်ႇဝႆႉတင်းလၢႆဢၼ်ဢဝ်တင်းမုဝ်းသေႇမီးဢမိင်ႉဝႆႉၸိူဝ်းၼၼ်ႉၸိုင်ၵမ်းလိုၼ်းၵဝ်တၵ်းဢမ်ႇႁႂ်ႈတိၼ်ၶဝ်လႆႈၶဝ်ႈလႆႈဢွၵ်ႇသေၵႃႈၼႂ်းမိူင်းဢၼ်ၵဝ်ပၼ်တီႈပူႇသူမွၼ်ႇသူၼၼ်ႉဝႃႈၼင်ႇၼႆသေၵေႃႈ၊
၉ မၼႃႇသေႇၼၼ်ႉႁႂ်ႈၵူၼ်းမိူင်းယုတၵူၼ်းဝဵင်းယေႇရုသလႅမ်ႇတင်းလၢႆၽိတ်းတၢင်းပိူင်ႈတၢင်းထၼ်ႈပေႃးၶဝ်လႆႈႁဵတ်းလွင်ႈတၢင်းဢၼ်ယိင်ႈၶႅၼ်းႁၢႆႉမိူၵ်ႈၼႃႇသလွငေ်ႈတၢင်းဢၼ်ၵူၼ်းၵူႈၸိူဝ်ႉၵူႈမဵဝ်းဢၼ်ထႃႇဝရႃႉၽြႃးယႃႉၽဵဝ်ႈပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်းဢိသရေႇလတင်းလၢႆႁဵတ်းၸိူဝ်းၼၼ်ႉဢေႃႈ။
၁၀ ထႃႇဝရႃႉၽြႃးမီးဢမိင်ႉတီႈမၼႃႇသေႇဢိၵ်ႇတင်းၵူၼ်းမၼ်းတင်းလၢႆသေၵေႃႈၶဝ်ဢမ်ႇထွမ်ႇဢမ်ဢဝ်။
၁၁ ပိူဝ်ႈၼႆလႄႈထႃႇဝရႃႉၽြႃးႁႂ်ႈၶုၼ်ပူဝ်ႇၶုၼ်ႁေႃၶမ်းဢႃႇသုရိၶီႇသိုၵ်းမႃးလႄႈတီႉၵမ်ဢဝ်ဢဝ်ၸိူၵ်ႈလဵၵ်းမတ်ႉမၼႃႇသေႇသေယဝ်ႉဢဝ်ဝႅၼ်လဵၵ်းသႂ်ႇသေလႄႈဢဝ်ၵႂႃႇၵႃႈတီႈဝဵင်းပႃႇပုလုၼ်ႇဢေႃႈ။
၁၂ မၼႃႇသေႇၼၼ်ႉၼႂ်းမိူဝ်ႈဢၼ်မၼ်းလႆႈၶၢမ်ႇတုၵ်ႉၶႃႉတၢင်းၽၼ်ၸိူဝ်ႉၼင်ႇၼၼ်ၼၼ်ႉၸိုင်မၼ်းတွင်းပၢၼ်ႇတီႈထႃႇဝရႃႉၽြႃးၽြႃးပဵၼ်ၸဝ်ႈလႄႈၶျႃးတူဝ်ၸဝ်ႈၵဝ်ႇတူၵ်းတႅမ်ႇၼႃႇလူင်လၢင်ၵႃႈတီႈၽၢႆႇၼႃႈၽြႃးပဵၼ်ၸဝ်ႈပူႇမၼ်းမွၼ်ႇမၼ်းၼၼ်ႉသေယဝ်ႉသူးတွင်းတီႈမၼ်းၸဝ်ႈဢေႃႈ။
၁၃ မၼ်းၸဝ်ႈထွမ်ႇဢဝ်လႄႈႁပ်ႉတုင်းဢဝ်ၵႂၢမ်းဢၼ်မၼ်းႁဵတ်းသူးတွင်းပထၼႃႇၼၼ်ႉသေယဝ်ႉသမ်ႉၶိုၼ်းဢဝ်မၼ်းမႃးသူင်ႇၵႃႈတီႈဝဵင်းယေႇရုသလႅမ်ႇသိုင်ႇၸိုင်ႈဝၢၼ်ႈမိူင်းဢၼ်မၼ်းဢုပ်ႉပိူင်ႇယူႇၵဝ်ႇၵဝ်ႇၼၼ်ႉဢေႃႈ။မိူဝ်ႈၼၼ်ႉမၼႃႇသေႇလႆႈႁူႉလွင်ႈဢၼ်ထႃႇဝရႃႉၽြႃးပဵၼ်ၽြႃးပဵၼ်ၸဝ်ႈၼၼ်ႉဢေႃႈ။
၁၄ လိုၼ်းၼၼ်ႉမၼ်းတႄႇႁဵတ်းလမ်းဝဵင်းထၢပ်ႈၼွၵ်ႈၵႃႈတီႈဝဵင်းတႃႇဝိတ်ႉၵႃႈၼႂ်းၶူင်ႇႁူၺ်ႈၽၢႆႇဝၼ်းတူၵ်းတီႈၵိႁုၼ်ႇၼၼ်ႉတေႃႇႁွတ်ႈထိုင်ႁူးၽၵ်းတူဢၼ်လဵပ်ႈႁွပ်ႈၸွမ်းႁိမ်းတိူၵ်ႈတီႈတိုၵ်းသိုၵ်းဢေႃႇၽေႇလၼၼ်ႉသေလႄႈႁႂ်ႈသုင်ၼႃႇလူင်လၢင်ဢေႃႈ။မၼ်းၶၢၼ်းတပ်ႉမူးတင်းလၢႆဝႆႉၵႃႈၼႂ်းဝဵင်းဢၼ်မၼ်ႈၶိူင်ႇၵႃႈဢၼ်မီးၵႃႈၼႂ်းမိူင်းယုတၸိူဝ်းၼၼ်ႉဢေႃႈ။
၁၅ မၼ်းပႄႇၽဵဝ်ႈပႅတ်ႈၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆရုၵ်ႉထူႉဢၼ်မီးၵႃႈၼႂ်းႁိူၼ်းထႃႇဝရႃႉၽြႃး၊ယိတ်ႉပလၢင်ႇဢၼ်တႄႇႁဵတ်းဝႆႉၵႃႈၼိူဝ်လွႆႁိူၼ်းထႃႇဝရႃႉၽြႃးၵႃႈၼႂ်းဝဵင်းယေႇရုသလႅမ်ႇၸိူဝ်းၼၼ်ႉသေလႄႈဢဝ်ဢွၵ်ႇပႅတ်ႈၵႃႈၼွၵ်ႈဝဵင်းဢေႃႈ။
၁၆ မၼ်းမႄးၵုမ်းမႄးႁဵတ်းယိတ်ႉပလၢင်ႇထႃႇဝရႃႉၽြႃးလႄႈပုၵ်ႉၸေႃႇယိၸ်ႉမိၵ်ႉသႁႃႇယႃႉတင်းယိၸ်ႉဢၼ်ႁပ်ႉတုင်းဢဝ်ၵျေးၸူးၸဝ်ႈၵႃႈၼိူဝ်ၼၼ်ႉဢေႃႈ။မၼ်းသင်ႇလၢတ်ႈတီႈၵူၼ်းမိူင်းယုတတင်းလၢႆလွင်ႈဢၼ်ၶဝ်တၵ်းလႆႈႁဵတ်းဝၢတ်ႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလၼၼ်ႉဢေႃႈ။
၁၇ ၼႂ်းဝႃႈၼၼ်သေၵေႃႈၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉယင်းပုၵ်ႉၸေႃႇယိၸ်ႉၵႃႈၼိူဝ်ထႃႇၼႃႉတီႈသုင်တင်းလၢႆၼၼ်ႉပုၼ်ႈဢၼ်ၵူဝ်းၵႂၢႆႇထႃႇဝရႃႉၽြႃးၽြႃးပဵၼ်ၸဝ်ႈၶဝ်ၵူၺ်းၼၼ်ႉဢေႃႈ။
၁၈ လွင်ႈတၢင်းမၼႃႇသေႇဢၼ်ယင်းၵိုတ်းယင်းၵျၢၼ်ႇ၊လွင်ႈတၢင်းဢၼ်မၼ်းသူးတွင်းတီႈၽြႃးပဵၼ်ၸဝ်ႈမၼ်းဢိၵ်ႇတင်းၵႂၢမ်းဢၼ်ၶဝ်ၸိူဝ်းဢၼ်ႁူပွင်ႇတႃလႅင်းၶဝ်ဢိင်ၼႃႇမႃႉၸိုဝ်သဵင်ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလသေလႄႈႁေႃးလၢတ်ႈတီႈမၼ်းၸိူဝ်းၼၼ်ႉၸိုင်တႅမ်ႈမီးယူႇၵႃႈၼႂ်းရႃႇၸဝၢင်ႇဢိသရေႇလဢေႃႈ။
၁၉ လွင်ႈတၢင်းဢၼ်မၼ်းသူးတွင်း၊လွင်ႈတၢင်းဢၼ်ၽြႃးပဵၼ်ၸဝ်ႈထွမ်ႇဢဝ်ၵႂၢမ်းမၼ်းလွင်ႈတၢင်းဢၼ်မၼ်းၽိတ်းပိူင်ႈပူၼ်ႉလိူဝ်လွင်ႈတၢင်းဢၼ်မၼ်းတႄႇႁဵတ်းထႃႇၼႃႉတီႈသုင်တင်းလၢႆလႄႈပူၵ်းတင်ႈတူၼ်ႈဢႃႇသရလႂ်ဢိၵ်ႇတင်းရုၵ်ႉထူႉသၢင်းထူႉလႂ်ၸူဝ်ႈဢၼ်မၼ်းဢမ်ႇပႆႇၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၼၼ်ႉ၊တႅမ်ႈဝႆႉမီးယူႇၵႃႈတီႈၵႂၢမ်းၵျၢမ်းလိၵ်ႈႁုဝ်ႇသေႇဢေႃႈ။
၂၀ မၼႃႇသေႇၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈၶဝ်ဢွၼ်ၵၼ်ဢဝ်မၼ်းသၢင်းၵျူဝ်ႇၵႃႈၼႂ်းႁေႃမၼ်းဢေႃႈ။ဢႃႇမုၼ်ႇလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။
ဢႃႇမုၼ်ႇပဵၼ်ၶုၼ်ႁေႃၶမ်းမိူင်းယုတ
၂၁ ဢႃႇမုၼ်ႇၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသၢဝ်းသွင်ပီႊလႄႈမၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်းယေႇရုသလႅမ်ႇသွင်ပီႊဢေႃႈ။
၂၂ မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးမိူၼ်ၸိူဝ်ႉၼင်ႇဢၼ်ၸဝ်ႈပေႃႈမၼ်းမၼႃႇသေႇႁဵတ်းၼၼ်ႉဢေႃႈ။ဢႃႇမုၼ်ႇၼၼ်ႉပုၵ်ႉၸေႃႇယိၸ်ႉတီႈရုၵ်ႉထူႉသၢင်းထူႉဢၼ်ၸဝ်ႈပေႃႈမၼ်းႁဵတ်းၵႃႈမီးၼၼ်ႉလႄႈႁဵတ်းဝၢတ်ႈဢေႃႈ။
၂၃ မၼ်းယင်းဢမ်ႇၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၵႃႈတီႈၽၢႆႇၼႃႈထႃႇဝရႃႉၽြႃးမိူၼ်ၸိူဝ်ႉၼင်ႇဢၼ်ၸဝ်ႈပေႃႈမၼ်းမၼႃႇသေႇၶျႃးတူဝ်ၸဝ်ႈၵဝ်ႇတူၵ်းတႅမ်ႇၼၼ်ႉလႄႈဢႃႇမုၼ်ႇၼၼ်ႉယိင်ႈၶႅၼ်းၽိတ်းပိူင်ႈၼႃႇလူင်လၢင်ဢေႃႈ။
၂၄ ၶႃႈမၼ်းၵူၼ်းမၼ်းတင်းလၢႆဢွၼ်ၵၼ်လွမ်ႁဵတ်းမုၵ်ႉႁဵတ်းၸိူဝ်းလႄႈဢဝ်မၼ်းတၢႆၵႃႈၼႂ်းႁေႃၸဝ်ႈဢေႃႈ။
၂၅ ၵူၼ်းဝၢၼ်ႈၵူၼ်းမိူင်းတင်းလၢႆဢွၼ်ၵၼ်ၶႃႈၽၼ်းၶဝ်ၸိူဝ်းဢၼ်လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းၶုၼ်လူင်ဢႃႇမုၼ်ႇၼၼ်ႉသေယဝ်ႉၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉဢဝ်ယုဝ်ႇသိယလုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။