Chapter
၂၃
၁ မိူဝ်ႈဢၼ်ထူၼ်ႈထိုင်ၸဵတ်းပီႊၼၼ်ႉယေႃႇယတႉႁႂ်ႈတူဝ်ၸဝ်ႈၵဝ်ႇမၼ်ႈၶိူင်ႇလႄႈႁဵတ်းတၢင်းဢၼ်ထုၵ်ႇၵၼ်တင်းၵူၼ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇတင်းလၢႆဢၼ်ပဵၼ်ဢႃႇၸရိလုၵ်ႈၸၢႆးယေႇရေႃႇႁမ်ႇဢိသမေႇလလုၵ်ႈၸၢႆးယေႃႇႁၼၼ်ႇ၊ဢႃႇၸရိႁုလုၵ်ႈၸၢႆးဢုဝ်ႇပိတ်ႉ၊မႃႇသေႇယလုၵ်ႈၸၢႆးဢတႃႇယ၊ဢေႇလိသၽတ်ႉလုၵ်ႈၸၢႆးၸႃႇၶရိၸိူဝ်းၼၼ်ႉဢေႃႈ။
၂ ၶဝ်ၼၼ်ႉဢွၼ်ၵၼ်လႄႇလဵပ်ႈၵႃႈၼႂ်းမိူင်းယုတသေယဝ်ႉႁႂ်ႈၵူၼ်းမဵဝ်းလေႇဝိဢိၵ်ႇတင်းၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်ပီႈၼွင်ႉၸိူဝ်ႉၶိူဝ်းပေႃႈၼႂ်းမဵဝ်းဢိသရေႇလတင်းလၢႆၸူႉၵၼ်တုမ်ၵၼ်ဢွၵ်ႇသေၵႃႈၼႂ်းဝဵင်းယုတၵႃႈမီးၼၼ်ႉလႄႈၶိုၼ်းမႃးၵႃႈတီႈဝဵင်းယေႇရုသလႅမ်ႇဢေႃႈ။
၃ မုၵ်ႉၸိူဝ်းဢၼ်ၸူႉၵၼ်တုမ်ၵၼ်ၵႃႈမီးၼၼ်ႉဢွၼ်ၵၼ်ႁဵတ်းပတိၺိၼ်ႇလူၺ်ႈၵၼ်တင်းၶုၼ်ႁေႃၶမ်းၵႃႈၼႂ်းႁိူၼ်းၽြႃးပဵၼ်ၸဝ်ႈဢေႃႈ။ယေႃႇယတၵေႃႈလၢတ်ႈတီႈၶဝ်လႄႈဝႃႈ၊-တူၺ်းလူ။လုၵ်ႈၸၢႆးၸဝ်ႈၶုၼ်ႁေႃၶမ်းတၵ်းလႆႈဢုပ်ႉပိူင်ႇၸၢမ်ႇၸႃးၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉလူၺ်ႈမဵဝ်းၸိူဝ်ႉၶိူဝ်းတႃႇဝိတ်ႉၼၼ်ႉဢေႃႈ။
၄ လွင်ႈတၢင်းဢၼ်သူတၵ်းလႆႈႁဵတ်းၸမ်းယိတ်ႈပရေႃးႁိၵ်ႈဢိၵ်ႇတင်းၵူၼ်းမဵဝ်းလေႇဝိဢၼ်ၶဝ်ႈမႃးၼႂ်းဝၼ်းၵမ်သိၼ်ၼၼ်ႉသၢမ်ပုၼ်ႊပုၼ်ႊၼိုင်ႈတၵ်းလႆႈႁဵတ်းၵူၼ်းပႂ်ႉၽၵ်းတူဢေႃႈ။သၢမ်ပုၼ်ႊပုၼ်ႊၼိုင်ႈတၵ်းလႆႈပႂ်ႉႁေႃၶမ်းဢေႃႈ။
၅ သၢမ်ပုၼ်ႊပုၼ်ႊၼိုင်ႈတၵ်းလႆႈပႂ်ႉၽၵ်းတူသုရဢေႃႈ။ၵူၼ်းတင်းသဵင်ႈတင်းလူင်တၵ်းလႆႈဢွၼ်ၵၼ်ယူႇၵႃႈၼႂ်းတမ်ႇတိူင်းႁိူၼ်းၽြႃးပဵၼ်ၸဝ်ႈဢေႃႈ။
၆ ၼွၵ်ႈသယေိတ်ႉပရေႃးႁိၵ်ႈဢိၵ်ႇတင်းၵူၼ်းမဵဝ်းလေႇဝိဢၼ်ပႂ်ႉဢမူႉၸဝ်ႈၸိူဝ်းၼၼ်ႉယႃႇပေႇႁႂ်ႈၽူႈလႂ်သေၵေႃႉသေၵူၼ်းၶဝ်ႈၵႃႈၼႂ်းႁိူၼ်းထႃႇဝရႃႉၽြႃး။ၶဝ်ၸိူဝ်းၼၼ်ႉတၵ်းလႆႈဢွၼ်ၵၼ်ၶဝ်ႈၵွပ်ႈပိူဝ်ႈဢၼ်ၶဝ်ပဵၼ်ၵေႃႉဢၼ်မူတ်းၸၢင်ႇၼၼ်ႉဢေႃႈ။ၵူၼ်းတင်းသဵင်ႈတင်းလူင်ၸမ်းတၵ်းလႆႈဢွၼ်ၵၼ်ပႂ်ႉယူႇၵႃႈၼင်ႇဢၼ်ထႃႇဝရႃႉၽြႃးမၵ်းၶၢၼ်းဝႆႉၼၼ်ႉဢေႃႈ။
၇ ၵူၼ်းမဵဝ်းလေႇဝိၸိူဝ်းၼၼ်ႉတၵ်းလႆႈယိပ်းၵမ်လၢၵ်ႈၼၢၵ်ႈၶဝ်ၵူႈၵေႃႉၵူႈၵူၼ်းသေလႄႈဢွၼ်ၵၼ်လွမ်ႉလဵပ်ႈႁွပ်ႈၶုၼ်ႁေႃၶမ်းယူႇလႄႈတၵ်းလႆႈဢဝ်တၢႆၶဝ်ၸိူဝ်းဢၼ်ၶဝ်ႈမႃးၵႃႈၼႂ်းႁိူၼ်းၸဝ်ႈၼၼ်ႉဢေႃႈ။ယၢမ်းမိူဝ်ႈဢၼ်ၶုၼ်ႁေႃၶမ်းၶဝ်ႈဢွၵ်ႇၼၼ်ႉၸိုင်သူတၵ်းလႆႈၸွမ်းလူၺ်ႈၵၼ်တင်းမၼ်းၸဝ်ႈဢေႃႈ၊ဝႃႈၼင်ႇၼႆဢေႃႈ။
၈ ၵူၼ်းမဵဝ်းလေႇဝိတင်းလၢႆဢိၵ်ႇတင်းၵူၼ်းမဵဝ်းယုတတင်းသဵင်ႈတင်းလူင်ႁဵတ်းၸွမ်းၵႃႈၼင်ႇဢၼ်ယိတ်ႉပရေႃးႁိၵ်ႈယေႃႇယတသင်ႇလၢတ်ႈဝႆႉၼၼ်ႉလႄႈၶဝ်ၸိူဝ်းၼၼ်ႉႁွင်ႉဢဝ်ၶဝ်ၸိူဝ်းဢၼ်တၵ်းလႆႈၶဝ်ႈၼႂ်းဝၼ်းၵမ်သိၼ်ဢိၵ်ႇတင်းၶဝ်ၸိူဝ်းဢၼ်တၵ်းလႆႈဢွၵ်ႇၼႂ်းဝၼ်းၵမ်သိၼ်ႁင်းၽႂ်ႁင်းမၼ်းၼၼ်ႉမႃးၵွပ်ႈပိူဝ်ႈယိတ်ႉပရေႃးႁိၵ်ႈယေႃႇယတဢမ်ႇပွႆႇမုၵ်ႉပွႆႇၸိူဝ်းၼၼ်ႉဢေႃႈ။
၉ ယိတ်ႉပရေႃးႁိၵ်ႈယေႃႇယတဢဝ်ႁွၵ်ႇဢိၵ်ႇတင်းၶိူင်ႈႁႄႉလၢၵ်ႈၼၢၵ်ႈဢၼ်လူင်ဢၼ်ဢွၼ်ႇၶုၼ်လူင်တႃႇဝိတ်ႉဢၼ်မီးၵႃႈၼႂ်းႁိူၼ်းၽြႃးပဵၼ်ၸဝ်ႈၸိူဝ်းၼၼ်ႉဢွၵ်ႇလႄႈဢၢပ်ႈပၼ်တီႈၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇၸိူဝ်းၼၼ်ႉဢေႃႈ။
၁၀ မၼ်းဢဝ်ၶဝ်ၸိူဝ်းဢၼ်ယိပ်းၵမ်လၢၵ်ႈၼၢၵ်ႈႁင်းၽႂ်ႁင်းမၼ်းတင်းသဵင်ႈတင်းလူင်ၼၼ်ႉၶျႃးတီႈယူႇဝႆႉၸွမ်းႁိမ်းယိတ်ႉပလၢင်ႇႁိူၼ်းၸဝ်ႈၼၼ်ႉဢဝ်ၵႃႈတီႈၸဵင်ႇၶႂႃႁိူၼ်းၸဝ်ႈတေႃႇထိုင်ႁွတ်ႈၸဵင်ႇသၢႆႉႁိူၼ်းၸဝ်ႈလႄႈလွမ်ႉလဵပ်ႈႁွပ်ႈၶုၼ်ႁေႃၶမ်းယူႇဢေႃႈ။
၁၁ မိူဝ်ႈၼၼ်ႉၶဝ်ဢွၼ်ၵၼ်ဢဝ်လုၵ်ႈၸၢႆးၸဝ်ႈၶုၼ်ႁေႃၶမ်းဢွၵ်ႇၵႃႈၼွၵ်ႈလႄႈဢဝ်ရႃႇၸႃႉသရၽူႇတိုဝ်းပၼ်လႄႈဢဝ်ၵျၢမ်းလိၵ်ႈပိင်းၺၢပ်ႈတိဢၢပ်ႈပၼ်သေလႄႈႁႂ်ႈမၼ်းပဵၼ်ၶုၼ်ႁေႃၶမ်းဢေႃႈ။ယေႃႇယတဢိၵ်ႇတင်းလုၵ်ႈၸၢႆးမၼ်းၸိူဝ်းၼၼ်ႉပၼ်ၽိၵ်ႈသိၵ်ႈသေလႄႈဢွၼ်ၵၼ်ႁွင်ႉပၢဝ်ႇလႄႈဝႃႈ၊-ႁႂ်ႈၶုၼ်ႁေႃၶမ်းဢသၢၵ်ႈလိပ်းယိုၼ်းယၢဝ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။
၁၂ ဢႃႇထလိငိၼ်းသဵင်ၵူၼ်းတင်းလၢႆၶုၼ်ႇ
လႅၼ်ႈယူႇႁဵတ်းသဵင်ယွင်ႈယေႃးၶုၼ်ႁေႃၶမ်းၼၼ်ႉသေယဝ်ႉမၼ်းၵႂႃႇၸူးၵႃႈတီႈၵူၼ်းတင်းလၢႆၵႃႈၼႂ်းႁိူၼ်းထႃႇဝရႃႉၽြႃးၼၼ်ႉလႄႈမုင်ႈႁၼ်ၶုၼ်ႁေႃၶမ်းၸုၵ်းၵႃႈတီႈႁိမ်းသဝ်ႁူးသူပ်းတီႈဢၼ်ၶဝ်ႈၸူးၼၼ်ႉယူႇ၊
၁၃ တပ်ႉမူးတင်းလၢႆဢိၵ်ႇတင်းၶဝ်ၸိူဝ်းဢၼ်ပဝ်ႇတိုင်ႈၼႄးၶရႃႇၸိူဝ်းၼၼ်ႉၸုၵ်းယူႇၵႃႈတီႈႁိမ်းၶုၼ်ႁေႃၶမ်းယူႇသေလႄႈၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ၸူမ်းသိူဝ်းလႄႈပဝ်ႇတိုင်ႈၼႄးၶရႃႇယူႇ၊မေႃၵႂၢမ်းတင်းလၢႆယိပ်းၵမ်တူႇရိယႃႇၵူႈၸိူဝ်ႉၵူႈမဵဝ်းလႄႈဢွၼ်ၵၼ်ႁဵတ်းၵႂၢမ်းယွင်ႈယေႃးယူႇၼၼ်ႉလႄႈဢႃႇထလိၼၼ်ႉၸၵ်ႉသိၵ်ႇၶူဝ်းၼုင်ႈမၼ်းသေလႄႈသႅၼ်ႇႁွင်ႉလႄႈဝႃႈ၊-ပဵၼ်ဢမူႉဢၼ်လုၵ်ႉၽိုၼ်ႉလူင်ပေႇ။ဢမူႉဢၼ်လုၵ်ႉၽိုၼ်ႉလူင်ပေႇ၊ဝႃႈၼင်ႇၼႆဢေႃႈ။
၁၄ ယိတ်ႉပရေႃးႁိၵ်ႈယေႃႇယတၼၼ်ႉဢဝ်ၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇဢၼ်လႆႈၶၢမ်ႇတၢင်းဢၼ်ၶၢၼ်းဝႆႉၵႃႈၼိူဝ်ပူဝ်ႇပႃႇၸိူဝ်းၼၼ်ႉဢွၵ်ႇလႄႈလၢတ်ႈတီႈၶဝ်လႄႈဝႃႈ၊-ဢွၼ်ၵၼ်ဢဝ်မၼ်းဢွၵ်ႇသေၵႃႈၼွၵ်ႈထႅဝ်ၵူၼ်းသိုၵ်းသေလႄႈဢဝ်ၶဝ်ၸိူဝ်းဢၼ်ၸွမ်းလင်မၼ်းၼၼ်ႉတၢႆတႃႉ၊ဝႃႈၼင်ႇၼႆဢေႃႈ။လွင်ႈမၼ်းၸမ်းယိတ်ႉပရေႃးႁိၵ်ႈလႆႈလၢတ်ႈလႄႈဝႃႈ၊-ယႃႇပေဢဝ်မၼ်းတၢႆၵႃႈၼႂ်းႁိူၼ်းၽြႃးပဵၼ်ၸဝ်ႈသေၵမ်း၊ဝႃႈၼင်ႇၼႆဢေႃႈ။
၁၅ ၶဝ်ၼၼ်ႉဢွၼ်ၵၼ်ငိူင်ႉဝႄႈပၼ်တၢင်းတီႈမၼ်းလႄႈမၼ်းဢွၵ်ႇၵႂႃႇၸူးၵႃႈတီႈသူပ်းတၢင်းမႃႉဢၼ်ၶဝ်ႈၸူးႁေႃၸဝ်ႈၼၼ်ႉလႄႈၶဝ်ဢွၼ်ၵၼ်ဢဝ်မၼ်းတၢႆၵႃႈတီႈၼၼ်ႉဢေႃႈ။
၁၆ ယေႃႇယတႁဵတ်းပတိၺိၼ်ႇဝူင်ႈၵၢင်မၼ်းဢိၵ်ႇတင်းၵူၼ်းတင်းသဵင်ႈတင်းလူင်တင်းၶုၼ်ႁေႃၶမ်းႁႂ်ႈၶဝ်ပဵၼ်ၵူၼ်းထႃႇဝရႃႉၽြႃးဢေႃႈ။
၁၇ ၵူၼ်းတင်းသဵင်ႈတင်းလူင်ၼၼ်ႉဢွၼ်ၵၼ်ၵႂႃႇၵႃႈတီႈၵျွင်းပႃႇလလႄႈၵိူၼ်ႇယႃႉပႅတ်ႈဢေႃႈ။ဢွၼ်ၵၼ်ႁၵ်းႁိၵ်းယိတ်ႉပလၢင်ႇလႂ်တင်းရုၵ်ႉထူႉလႂ်ပႅတ်ႈလႄႈဢဝ်တေႇသၼ်ႇဢၼ်ပဵၼ်ယိတ်ႉပရေႃးႁိၵ်ႈပႃႇလၼၼ်ႉတၢႆၵႃႈတီႈၽၢႆႇၼႃႈယိတ်ႉပလၢင်ႇၸိူဝ်းၼၼ်ႉဢေႃႈ။
၁၈ ယေႃႇယတၸီႇယၢင်ႇတၢင်းဢၼ်ၵိုတ်ႈႁၢပ်ႇဢမူႉၸဝ်ႈတင်းလၢႆၵႃႈၼႂ်းႁိူ်ၼ်းထႃႇဝရႃႉၽြႃးၼၼ်ႈသေလႄႈဢၢပ်ႈပၼ်ၵႃႈၼႂ်းမိုဝ်းယိတ်ႉပရေႃးႁိၵ်ႈၵူၼ်းမဵဝ်းလေႇဝိဢၼ်တႃႇဝိတ်ႉၽႄႈဢွၵ်ႇၶၢၼ်းဝႆႉၵႃႈၼႂ်းႁိူၼ်းထႃႇဝရႃႉၽြႃးႁႂ်ႈလႆႈပုၵ်ႉၸေႃႇယိၸ်ႉဢၼ်တုတ်ႇၽႆးတီႈထႃႇဝရႃႉၽြႃးၸွမ်းၵႃႈၼင်ႇဢၼ်ပႃးၼႂ်းၵျၢမ်းလိၵ်ႈပိင်းၺၢပ်ႈတိမုဝ်းသေႇၼၼ်ႉလႄႈႁဵတ်းတၢင်းဢၼ်သႂၢင်ႇသိူဝ်းတၢင်းဢၼ်ႁဵတ်းၵႂၢမ်းမႅၼ်ႈၸွမ်းၵႃႈၼင်ႇဢၼ်တႃႇဝိတ်ႉၸီႇယၢင်ႇဝႆႉၼၼ်ႉဢေႃႈ။
၁၉ ၶဝ်ၸိူဝ်းဢၼ်ပႂ်ႉၽၵ်းတူႁိူၼ်းၸဝ်ႈၼၼ်ႉၵေႃႈမၼ်းၶၢၼ်းဝႆႉဢမ်ႇႁႂ်ႈၵေႃႉဢၼ်မီးလၢၵ်ႈၶၼႃႇဢၼ်ဢမ်ႇမူတ်းသ်ႂသပေိူင်ႈၼၼ်ႉလႆႈၶဝ်ႈမႃးၼၼ်ႉဢေႃႈ။
၂၀ မၼ်းႁွင်ႉဢဝ်ၶဝ်ၸိူဝ်းဢၼ်ဢုပ်ႉၵႃႈၼိူဝ်ၵူၼ်းယေႈပၢၵ်ႇလႂ်၊မူးမၢတ်ႈၽွင်းမိူင်းလႂ်၊ၶဝ်ၸိူဝ်းဢၼ်ပဵၼ်ၵူၼ်းယႂ်ႇၵူၼ်းလူင်လႂ်၊ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်လႂ်သေလႄႈဢွၼ်ၵၼ်ဢဝ်ၶုၼ်ႁေႃၶမ်းလူင်းသေၵႃႈတီႈႁိူၼ်းထႃႇဝရႃႉၽြႃးမႃးသေယဝ်ႉၸွမ်းသဵၼ်ႈတၢင်းၽၵ်းတူဢၼ်သုင်ၼၼ်ႉလႄႈသူင်ႇႁွတ်ႈထိုင်ၵႃႈၼႂ်းႁေႃၸဝ်ႈသေလႄႈဢဝ်ၶုၼ်ၼၼ်ႉတၢင်ႇၵႃႈၼိူဝ်ရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းဢေႃႈ။
၂၁ ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ၸူမ်းသိူဝ်းလႄႈဝဵင်းတင်းဝဵင်းၵေႃႈမီးတၢင်းဢၼ်တဵတ်ႇလီၼိမ်လီဢေႃႈ။ၶဝ်ဢဝ်ဢထလိတၢႆလူၺ်ႈလၢပ်ႇလူၺ်ႈလႅဝ်းဢေႃႈ။