Chapter
၁၈
မိၵ်ႉၶႃႇႁေႃးလၢတ်ႈလွင်ႈဢႃႇႁပ်ႉ
၁ ယုဝ်ႇသၽတ်ႉၼၼ်ႉမီးၸေးၸိမ်ႇဢုၵ်ႉၸႃႇမူၼ်ႈၵုင်ႇသရေႇယႂ်ႇၼမ်ၼႃႇလႄႈသိုပ်ႇၸၢပ်ႈၵၼ်တင်းၸိူဝ်ႉၶိူဝ်းဢႃႇႁပ်ႉဢေႃႈ။
၂ ပီႊပူၼ်ႉၵႂႃႇၵမ်ႈၽွင်ႈသေယဝ်ႉတူဝ်မၼ်းလူင်းၸူးၵႃႈတီႈဢႃႇႁပ်ႉၵႃႈတီႈဝဵင်းသမႃႇရိလႄႈဢႃႇႁပ်ႉၼၼ်ႉဢဝ်သူဝ်းဝူဝ်းၼမ်ၼႃႇတၢႆပုၼ်ႈမၼ်းဢိၵ်ႇတင်းပုၼ်ႈၵူၼ်းဢၼ်ပႃးလူၺ်ႈၵၼ်တင်းမၼ်းၸိူဝ်းၼၼ်ႉလႄႈၸူဝ်းဢဝ်မၼ်းႁႂ်ႈမၼ်းၸွမ်းၵႂႃႇၵႃႈတီႈဝဵင်းရႃႇမုတ်ႉမိူင်းၵိလတ်ႉဢေႃႈ။
၃ ဢႃႇႁပ်ႉၶုၼ်ႁေႃၶမ်းဢိသရေႇလထၢမ်တီႈယုဝ်ႇသၽတ်ႉၶုၼ်ႁေႃၶမ်းယုတၼၼ်ႉလႄႈဝႃႈ၊-ၸဝ်ႈတၵ်းၸွမ်းလူၺ်ႈၵၼ်တင်းၵဝ်ၶႃႈၵႂႃႇၵႃႈတီႈဝဵင်းရႃႇမုတ်ႉမိူင်းၵိလတ်ႉပုၼ်ႉႁိုဝ်၊ဝႃႈၼင်ႇၼႆလႄႈမၼ်းၵေႃႈၶိုၼ်းလၢတ်ႈလႄႈဝႃႈ၊-ၵဝ်ၶႃႈၼႆႉပဵၼ်မိူၼ်ၸိူဝ်ႉၼင်ႇၸဝ်ႈယူႇ၊ၵူၼ်းၵဝ်ၶႃႈၸိူဝ်းၼႆႉၵေႃႈပဵၼ်မိူၼ်ၸိူဝ်ႉၼင်ႇၵူၼ်းၸဝ်ႈၸိူဝ်းၼၼ်ႉယူႇလႄႈတၵ်းၽွမ်ႉၵၼ်ၸွႆႈထႅမ်လွင်ႈဢမူႉသိုၵ်းဢေႃႈ၊ဝႃႈၼင်ႇၼႆဢေႃႈ။
၄ လၢႆးသမ်ႉယုဝ်ႇသၽတ်ႉလၢတ်ႈတီႈၶုၼ်ႁေႃၶမ်းဢိသရေႇလလႄႈဝႃႈ၊-တွင်ႉထၢမ်ၼုၵ်ႈၵပၢတ်ႈထႃႇဝရႃႉၽြႃးဝၼ်းမိူဝ်ႈၼႆႉသေၵမ်း၊မိူဝ်ႈဢၼ်ဝႃႈၼင်ႇၼႆၸိုင်ၶုၼ်ႁေႃၶမ်းဢိသရေႇလၼၼ်ႉႁႂ်ႈပရေႃးၽႅတ်ႈသီႇပၢၵ်ႇၸူႉၵၼ်တုမ်ၵၼ်သေယဝ်ႉထၢမ်လႄႈဝႃႈ၊-
၅ ႁဝ်းထုၵ်ႇလီၶီႇသိုၵ်းၵႂႃႇၵႃႈတီႈဝဵင်းရႃႇမုတ်ႉမိူင်းၵိလတ်ႉၼၼ်ႉႁိုဝ်။ဢမ်ႇၼၼ်ၵဝ်ယင်းဢမ်ႇၶီႇသိုၵ်းၵႂႃႇလႄႈထုၵ်ႇလီယူႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ဢွၼ်ၵၼ်လဝ်ႈလၢတ်ႈလႄႈဝႃႈ၊-ၶီႇသိုၵ်းၵႂႃႇသေၵမ်းၶႃႈ။ၽြႃးပဵၼ်ၸဝ်ႈတၵ်းဢဝ်ဢၢပ်ႈပၼ်ၵႃႈၼႂ်းမိုဝ်းၸဝ်ႈၶုၼ်လူင်တီႈၶႃႈဢေႃႈ၊ဝႃႈၼင်ႇၼႆဢေႃႈ။
၆ ယုဝ်ႇသၽတ်ႉသမ်ႉထၢမ်လႄႈဝႃႈ၊-ပုၼ်ႈဢၼ်ၸဝ်ႈႁဝ်းတၵ်းလႆႈတွင်ႉထၢမ်ၸိုင်ၵႃႈတီႈၼႆႉဢမ်ႇမီးပရေႃးၽႅတ်ႈထႃႇဝရႃႉၽြႃးသပေႃးၶႃးႁိုဝ်၊မိူဝ်ႈဢၼ်ဝႃႈၼင်ႇၼႆၸိုုင်ၶုၼ်ႁေႃၶမ်းဢိသရေႇလၶိုၼ်းလၢတ်ႈတီႈယုဝ်ႇသၽတ်ႉလႄႈဝႃႈ၊-ၵေႃႉဢၼ်တွင်ႉထၢမ်တီႈထႃႇဝရႃႉၽြႃးလႆႈၼၼ်ႉယင်းမီးၵေႃႉၼိုင်ႈဢေႃႈ။
၇ ၼႂ်းဝႃႈၼၼ်သေၵေႃႈၵဝ်ၶႃႈၸင်းမၼ်းၵွပ်ႈပိူဝ်ႈမၼ်းဢမ်ႇႁေႃးလၢတ်ႈၵႂၢမ်းမၢင်ႇၵလႃႇလူၺ်ႈလွင်ႈၵဝ်လႄႈၸၢင်ႊႁေႃးလၢတ်ႈၵႂၢမ်းဢႃႉမၢင်ႇၵလႃႇသေႇသေႇၵူၺ်းၼၼ်ႉဢေႃႈ။ၵေႃႉၼၼ်ႉၸမ်းပဵၼ်မိၵ်ႉၶႃႇ၊လုၵ်ႈၸၢႆးဢိမလဢေႃႈ၊ဝႃႈၼင်ႇၼႆသေယဝ်ႉယုဝ်ႇသၽတ်ႉၶိုၼ်းလၢတ်ႈလႄႈဝႃႈ၊-ၶုၼ်လူင်ယႃႇပလေၢတ်ႈၸိူဝ်ႉၼင်ႇၼၼ်သေၵမ်း၊ဝႃႈၼင်ႇၼႆဢေႃႈ။
၈ မိူဝ်ႈၼၼ်ႉၶုၼ်ႁေႃၶမ်းဢိသရေႇလႁွင်ႉဢဝ်ၵေႃႉဢၼ်မီးဢရႃႇၵေႃႉၼိုင်ႈလႄႈမီးဢမိင်ႉဝႃႈ၊-ႁွင်ႉဢဝ်မိၵ်ႉၶႃလုၵ်ႈၸၢႆးဢိမလၼၼ်ႉမႃးၶၼ်ၶၼ်ၽႂ်းၽႂ်းတႃႉ၊ဝႃႈၼင်ႇၼႆဢေႃႈ။
၉ မိူဝ်ႈၶိင်ႇၼၼ်ႉၶုၼ်ႁေႃၶမ်းဢိသရေႇလဢိၵ်ႇတင်းယုဝ်ႇသၽတ်ႉၶုၼ်ႁေႃၶမ်းယုတၼၼ်ႉၼုင်ႈမႆႊႁၢင်ႈၶိူင်ႈၶူဝ်းၼုင်ႈၶူဝ်းမႆၶုၼ်ယူႇသေလႄႈၼင်ႈယူႇၵႃႈၼိူဝ်ရႃႇၸႃႉပလၢင်ႇႁင်းၽႂ်ႁင်းမၼ်းၼႂ်းတီႈဢၼ်ပၢင်ႇလီပဵင်းလီၵႃႈတီႈၽၢႆႇၼႃႈႁူးၽၵ်းတူဝဵင်းသမႃႇရိၼၼ်ႉယူႇလႄႈပရေႃးၽႅတ်ႈၵႃႈမီးၸိူဝ်းၼၼ်ႉဢွၼ်ၵၼ်ႁေႃးလၢတ်ႈၵႃႈတီႈၽၢႆႇၼႃႈၸဝ်ႈယူႇဢေႃႈ။
၁၀ ၸေႇတၵိလုၵ်ႈၸၢႆးၶေႇၼႃႇၼႃႇၼၼ်ႉႁဵတ်းၶဝ်လႅမ်လဵၵ်းသေလႄႈႁေႃးလၢတ်ႈလႄႈဝႃႈ၊-ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၸဝ်ႈႁဝ်းတၵ်းလႆႈဢဝ်ၶဝ်လႅမ်ၸိူဝ်းၼႆႉတႅင်းၵူၼ်းမိူင်းသုရိတေႃႇထိုင်ႁွတ်ႈၶဝ်ထၼ်ႈပေႃးလူႉပေႃးလႅဝ်ဢေႃႈ၊ဝႃႈၼင်ႇၼႆဝႆႉတီႈၶႃႈယဝ်ႉ၊ဝႃႈၼင်ႇၼႆဢေႃႈ။
၁၁ ပရေႃးၽႅတ်ႈၵႃႈမီးၸိူဝ်းၼၼ်ႉၵေႃႈဢွၼ်ၵၼ်ႁဵတ်းပရေႃးၽႅတ်ႈသေလႄႈႁေႃးလၢတ်ႈလႄႈဝႃႈ၊-ၸဝ်ႈႁဝ်းၶီႇသိုၵ်းၶိုၼ်ႈၸူးၵႃႈတီႈဝဵင်းရႃႇမုတ်ႉမိူင်းၵိလတ်ႉလႄႈႁႂ်ႈပေႉၼႅင်ႇသေၵမ်းတီႈၶႃႈ။ထႃႇဝရႃႉၽြႃးတၵ်းဢဝ်ဢၢပ်ႈပၼ်ၵႃႈၼႂ်းမိုဝ်းၸဝ်ႈၶုၼ်လူင်တီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၂ တမၢၼ်ႇၵူၼ်းၵူၼ်းၸႂ်ႉဢၼ်ႁႂ်ႈၵႂႃႇလႆႈႁွင်ႉမိၵ်ႉၶႃႇၼၼ်ႉလၢတ်ႈတီႈမၼ်းလႄႈဝႃႈ၊-ပရေႃးၽႅတ်ႈၸိူဝ်းၼၼ်ႉၽွမ်ႉၵၼ်ႁေႃးလၢတ်ႈၵႂၢမ်းမၢင်ႇၵလႃႇၵူၺ်းတီႈၶုၼ်ႁေႃၶမ်းၶႃႈဢေႃႈ။ၸဝ်ႈႁဝ်းၵေႃႈၶႅၼ်းတေႃႈႁႂ်ႈၵႂၢမ်းၸဝ်ႈႁဝ်းပဵၼ်ၸိူဝ်ႉၼင်ႇၵႂၢမ်းၶဝ်ၸိူဝ်းၼၼ်ႉလႄႈႁေႃးလၢတ်ႈၵႂၢမ်းမၢင်ႇၵလႃႇသေၵမ်းၶႃႈ၊ဝႃႈၼင်ႇၼႆဢေႃႈ။
၁၃ မိၵ်ႉၶႃႇၶိုၼ်းလၢတ်ႈလႄႈဝႃႈ၊-ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉၵဝ်တၵ်းလႆႈၶိုၼ်းလၢတ်ႈၵႂၢမ်းဢၼ်ၽြႃးပဵၼ်ၸဝ်ႈၵဝ်မီးဢမိင်ႉၼၼ်ႉၵူၺ်းဢေႃႈ၊ဝႃႈၼင်ႇၼႆဢေႃႈ။
၁၄ မိူဝ်ႈဢၼ်မၼ်းႁွတ်ႈထိုင်ၵႃႈတီႈၶုၼ်ႁေႃၶမ်းၼၼ်ႉၸိုင်ၶုၼ်ႁေႃၶမ်းထၢမ်တီႈမၼ်းလႄႈဝႃႈ၊-မိၵ်ႉၶႃႇဢိူၺ်း။ႁဝ်းထုၵ်ႇလီၶီႇသိုၵ်းၵႂႃႇၵႃႈတီႈဝဵင်းရႃႇမုတ်ႉမိူင်းၵိလတ်ႉၼၼ်ႉႁိုဝ်။ဢမ်ႇၼၼ်ၵဝ်ယင်းဢမ်ႇၶီႇသိုၵ်းၵႂႃႇလႄႈထုၵ်ႇလီယူႇႁိုဝ်၊ဝႃႈၼင်ႇၼႆလႄႈမိၵ်ႉၶႃႇလဝ်ႈလၢတ်ႈလႄႈဝႃႈ၊-ၸဝ်ႈႁဝ်းၶဝ်ၶီႇသိုၵ်းၶိုၼ်ႈၸူးလႄႈႁႂ်ႈပေႉၼႅင်ႇသေၵမ်းတီႈၶႃႈ။ၶဝ်ၼၼ်ႉတၵ်းလႆႈၶၢမ်ႇတၢင်းဢၼ်ဢဝ်ဢၢပ်ႈပၼ်ၵႃႈၼႂ်းမိုဝ်းၸဝ်ႈႁဝ်းၶဝ်တီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၅ ၶုၼ်ႁေႃၶမ်းၵေႃႈထၢမ်လႄႈဝႃႈ၊-လိူဝ်သေၵႂၢမ်းဢၼ်မၢၼ်ႇဢၼ်မႅၼ်ႈၼၼ်ႉလွင်ႈၼင်ႇႁိုဝ်မႂ်းတၵ်းဢမ်ႇဢဝ်တင်းဢၶႂၢင်ႉထႃႇဝရႃႉၽြႃးသေလႄႈႁေႃးလၢတ်ႈၵႂၢမ်းတၢင်ႇၸိူဝ်ႉတၢင်ႇဢၼ်တီႈၵဝ်ၸိုင်ၵဝ်တၵ်းလႆႈပၼ်တၢင်းၵိၼ်ႇတၢင်းဝႃႈတီႈမႂ်းတေႃႇထိုင်ႁွတ်ႈလၢႆပွၵ်ႈလၢႆၽဝ်ႇလူးၵွၼ်ႇ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၵေႃႈသမ်ႉလဝ်ႈလၢတ်ႈလႄႈဝႃႈ၊-
၁၆ ၶႃႈၸဝ်ႈလႆႈႁၼ်ၵူၼ်းမဵဝ်းဢိသရေႇလတင်းသဵင်ႈတင်းလူင်မီးတၢင်းဢၼ်ၽၢတ်ႇၽႄၵၼ်ယူႇၵႃႈၼိူဝ်လွႆၼိူဝ်ၵုင်းတင်းလၢႆမိူၼ်ၸိူဝ်ႉၼင်ႇသူဝ်းဢၼ်ဢမ်ႇမီးၵေႃႉဢၼ်လဵင်ႉဢၼ်ထိင်းၼၼ်ႉတီႈၶႃႈယဝ်ႉ။ထႃႇဝရႃႉၽြႃးမီးဢမိင်ႉလႄႈဝႃႈၸမ်း၊-ၵွပ်ႈပိူဝ်ႈဢၼ်ၶဝ်ၸိူဝ်းၼႆႉဢမ်ႇမီးၸဝ်ႈမီးၸွမ်လႄႈႁႂ်ႈၶဝ်ၶိုၼ်းမိူဝ်းၵႂႃႇၵႃႈတီႈႁိူၼ်းတီႈဢၼ်ၶဝ်ယူႇၼၼ်ႉႁင်းၽႂ်ႁင်းမၼ်းသေ၊ဝႃႈၼင်ႇၼႆတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၇ ၶုၼ်ႁေႃၶမ်းဢိသရေႇလလၢတ်ႈတီႈယုဝ်ႇသၽတ်ႉလႄႈဝႃႈ၊-ၸွင်ႇၵဝ်ၶႃႈဢမ်ႇလၢတ်ႈတီႈၸဝ်ႈလႄႈဝႃႈ၊မၼ်းၼႆႉဢမ်ႇႁေႃးၵႂၢမ်းမၢင်ႇၵလႃႇလူၺ်ႈလွင်ႈၵဝ်ၶႃႈ၊ၸၢင်ႊႁေႃးလၢတ်ႈၵႂၢမ်းဢႃႉမၢင်ႇၵလႃႇၵူၺ်းဢေႃႈ၊ဝႃႈၼင်ႇၼႆဝႆႉယဝ်ႉဢမ်ႇၸႂ်ႈႁိုဝ်ဝႃႈၼင်ႇၼႆဢေႃႈ။
၁၈ မၼ်းၼၼ်ႉၵေႃႈသမ်ႉႁေႃးလၢတ်ႈလႄႈဝႃႈ၊-ပိူဝ်ႈဢၼ်ပဵၼ်ၼင်ႇၼႆလႄႈၶႅၼ်းတေႃႈထွမ်ႇငိၼ်းဢမိင်ႉထႃႇဝရႃႉၽြႃးသေၵမ်းတီႈၶႃႈ။ၶႃႈၸဝ်ႈႁၼ်ထႃႇဝရႃႉၽြႃးၼင်ႈယူႇၵႃႈၼိူဝ်ပလၢင်ႇၸဝ်ႈသေလႄႈပူဝ်ႇပႃႇၵၢင်ႁၢဝ်တင်းသဵင်ႈတင်းလူင်ဢွၼ်ၵၼ်ၸုၵ်းယူႇၵႃႈတီႈၽၢႆႇၶႂႃၸဝ်ႈၵႃႈတီႈၽၢႆႇသၢႆႉၸဝ်ႈၼၼ်ႉတီႈၶႃႈယဝ်ႉ။
၁၉ ထႃႇဝရႃႉၽြႃးၵေႃႈထၢမ်လႄႈဝႃႈ၊-ၽူႈလႂ်တၵ်းတိုၵ်းယူင်းၸူဝ်းဢဝ်ဢႃႇႁပ်ႉၶုၼ်ႁေႃၶမ်းဢိသေရႇလႁႂ်ႈမၼ်းၶီႇသိုၵ်းၶိုၼ်ႈၸူးၵႃႈတီႈဝဵင်းရႃႇမုတ်ႉမိူင်းၵိလတ်ႉလႄႈသုမ်းၸွမ်းၼၼ်ႉ၊ဝႃႈၼင်ႇၼႆသေယဝ်ႉၶဝ်ၼၼ်ႉဢွၼ်ၵၼ်ၶိုၼ်းလဝ်ႈလၢတ်ႈယေႈၵေႃႉယေႈၸိူဝ်းယေႈၵေႃႉယေႈၼႄးဢေႃႈ။
၂၀ လၢႆးသမ်ႉဝိၺိၺ်ႇပႃးၼိုင်ႈမႃးလႄႈၸုၵ်းယူႇၵႃႈတီႈၽၢႆႇၼႃႈထႃႇဝရႃႉၽြႃးယူႇသေလႄႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈတၵ်းတိုၵ်းယူင်းၸူဝ်းဢဝ်တီႈၶႃႈဢေႃႈ၊ဝႃႈၼင်ႇၼႆသေယဝ်ႉထႃႇဝရႃႉၽြႃးထၢမ်လႄႈဝႃႈ၊-တၵ်းႁဵတ်းၸိူဝ်ႉၼင်ႇႁိုဝ်သေလႄႈတိုၵ်းယူင်းၸူဝ်းဢဝ်၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၵေႃႈလဝ်ႈလၢတ်ႈလႄႈဝႃႈ၊-
၂၁ ၶႃႈၸဝ်ႈတၵ်းၵႂႃႇလႄႈပဵၼ်ၸႂ်ဝိၺိၺ်ႇဢၼ်ၸၢင်ႊလၢတ်ႈၵႂၢမ်းမူႉသႃႇၵႃႈၼႂ်းသူပ်းပရေႃးႁိၵ်ႈၶုၼ်လူင်ၵႃႈမီးၼၼ်ႉတီႈၶႃႈဢေႃႈ၊ဝႃႈၼင်ႇၼႆသေယဝ်ႉမၼ်းၸဝ်ႈမီးဢမိင်ႉလႄႈဝႃႈ၊-မႂ်းတၵ်းတိုၵ်းယူင်းၸူဝ်းဢဝ်မၼ်းလႄႈပေႉၼႅင်ႇဢေႃႈ။ၵႂႃႇလႄႈႁဵတ်းၸိူဝ်ႉၼင်ႇၼၼ်တႃႉ၊ဝႃႈၼင်ႇၼႆဢေႃႈ။
၂၂ ပိူဝ်ႈဢၼ်ပဵၼ်ၼင်ႇၼႆလႄႈထႃႇဝရႃႉၽြႃးဢဝ်ဝိၺိၺ်ႇဢၼ်ၸၢင်ႊလၢတ်ႈၵႂၢမ်းမူႉသႃႇၼၼ်ႉသႂၢင်းသႂ်ႇပၼ်ၵႃႈၼႂ်းသူပ်းပရေႃးၽႅတ်ႈၶုၼ်လူင်ၸိူဝ်းၼႆႉတီႈၶႃႈယဝ်ႉ။
၂၃ ထႃႇဝရႃႉၽြႃးလၢတ်ႈၵႂၢမ်းဢႃႉမၢင်ႇၵလႃႇလူၺ်ႈလွင်ႈၸဝ်ႈၶုၼ်လူင်တီႈၶႃႈယဝ်ႉ၊ဝႃႈၼင်ႇၼႆဢေႃႈ။
၂၄ မိူဝ်ႈၼၼ်ႉၸေႇတၵိလုၵ်ႈၸၢႆးၶေႇၼႃႇၼႃႇၼၼ်ႉသုတ်ႉၸပ်းသုတ်ႉၸူးလႄႈတူပ်းသႂ်ႇၵႅမ်ႈမိၵ်ႉၶႃႇသေလႄႈထၢမ်ဝႃႈ၊-ဝိၺိၺ်ႇထႃႇဝရႃႉၽြႃးဢွၵ်ႇသေႇၵႃႈၼႂ်းၵဝ်ၵႂႃႇတၢင်းသဵၼ်ႈလႂ်ႁႂ်ႈလႆႈတၵ်ႉလၢတ်ႈမႂ်း၊ဝႃႈၼင်ႇၼႆသေယဝ်ႉ၊မိၵ်ႉၶႃႇၵေႃႈလၢတ်ႈလႄႈဝႃႈ၊-မႂ်းတၵ်းလႆႈႁၼ်ၼႂ်းမိုဝ်ႉဝၼ်းဢၼ်မႂ်းတၵ်းၶဝ်ႈၵႃႈၼႂ်းလုၵ်းတၢင်းၼႂ်းႁႂ်ႈလႆႈတဵတ်ႇမႅပ်းယူႇၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၅ မိူဝ်ႈၼၼ်ႉၶုၼ်ႁေႃၶမ်းဢိသရေႇလၸီႇယၢင်ႇလႄႈဝႃႈ၊-ဢဝ်မိၵ်ႉၶႃႇၶိုၼ်းမိူဝ်းၵႂႃႇၸူးၵႃႈတီႈၶုၼ်မဵဝ်ႉဝုၼ်ႇဢမ်ႇမုၼ်ႇတင်းလုၵ်ႈၸၢႆးၸဝ်ႈယေႃႇသၼၼ်ႉလႄႈ၊သင်ႇလၢတ်ႈဝႆႉလႄႈဝႃႈ၊-
၂၆ ၶုၼ်ႁေႃၶမ်းမီးဢမိင်ႉလႄႈဝႃႈၸမ်း၊-ဢွၼ်ၵၼ်ဢဝ်ၵေႃႉၼႆႉၶင်ဝႆႉၵႃႈၼႂ်းထွင်ႇလႄႈႁႂ်ႈမၼ်းၵိၼ်ၶူပ်းၶဝ်ႈမုၼ်းတုၵ်ႉၶႃႉတၢင်းဢၼ်ၶၢၼ်ၸႂ်လႄႈသူတ်ႉၵိၼ်ၼမ်ႉတုၵ်ႉၶႃႉတၢင်းဢၼ်ၶၢၼ်ၸႂ်ယူႇတေႃႇထိုင်ႁွတ်ႈၵဝ်လႆႈၶိုၼ်းမႃးၼိမ်ၼိမ်လီလီၼၼ်ႉတႃႉ၊ဝႃႈၼင်ႇၼႆဢေႃႈ။
၂၇ မိၵ်ႉၶႃႇၵေႃႈၶိုၼ်းလဝ်ႈလၢတ်ႈလႄႈဝႃႈ၊-ပေႃးၸဝ်ႈၶုၼ်လူင်လႆႈၶိုၼ်းမႃးၼိမ်ၼိမ်လီလီၸိုင်ထႃႇဝရႃႉၽြႃးဢမ်ႇဢဝ်ၶႃႈၸဝ်ႈမီးဢမိင်ႉဝႆႉတီႈၶႃႈ။ၵူၼ်းၵႃႈမီးတင်းသဵင်ႈတင်းလူင်ၶဝ်ဢိူၺ်း၊ဢွၼ်ၵၼ်မၢတ်ႈမၢႆၵႂၢမ်းၵဝ်တႃႉ၊ဝႃႈၼင်ႇၼႆဢေႃႈ။
ၶုၼ်ႁေႃၶမ်းဢိသရေႇလတၢႆ
၂၈ ၼင်ႇၼၼ်လႄႈၶုၼ်ႁေႃၶမ်းဢိသရေႇလတင်းယုဝ်ႇသၽတ်ႉၶုၼ်ႁေႃၶမ်းယုတၼၼ်ႉဢွၼ်ၵၼ်ၶီႇသိုၵ်းၶိုၼ်ႈၸူးၵႃႈတီႈဝဵင်းရႃႇမုတ်ႉမိူင်းၵိလတ်ႉဢေႃႈ။
၂၉ ၶုၼ်ႁေႃၶမ်းဢိသရေႇလလၢတ်ႈတီႈယုဝ်ႇသၽတ်ႉလႄႈဝႃႈ၊-ၵဝ်တၵ်းယႃႉႁၢင်ႊယႃႉၽၢင်ၵဝ်သေလႄႈၶဝ်ႈၵႃႈၼႂ်းပွႆးသိုၵ်းဢေႃႈ။ၸဝ်ႈၸမ်းၼုင်ႈမႆႊႁၢင်ႈၶိူင်ႈၶူဝ်းၼုင်ႈၶူဝ်းမႆႊၶုၼ်သေၵမ်း၊ဝႃႈၼင်ႇၼႆသေယဝ်ႉၶုၼ်ႁေႃၶမ်းဢိသရေႇလၼၼ်ႉယႃႉႁၢင်ႊယႃႉၽၢင်မၼ်းသေလႄႈၶဝ်ႈၵႃႈၼႂ်းပွႆးသိုၵ်းဢေႃႈ။
၃၀ ၵွပ်ႈပိူဝ်ႈဢၼ်ၶုၼ်ႁေႃၶမ်းသုရိသင်ႇလၢတ်ႈဝႆႉတီႈၶုၼ်ပူဝ်ႇဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးၸိူဝ်းၼၼ်ႉဝႆႉလႄႈဝႃႈ၊-
၃၁ ၼွၵ်ႈသေၶုၼ်ႁေႃၶမ်းဢိသရေႇလၼၼ်ႉယႃႇပတေိုၵ်းတေႃးၵူၼ်းလူင်ၵူၼ်းဢွၼ်ႇသေၵေႃႉသေၵူၼ်း၊ဝႃႈၼင်ႇၼႆဝႆႉၼၼ်ႉလႄႈ၊မိူဝ်ႈဢၼ်ၶုၼ်ပူဝ်ႇဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးၸိူဝ်းၼၼ်ႉႁၼ်ယုဝ်ႇသၽတ်ႉၼၼ်ႉၸိုင်ၶဝ်လၢတ်ႈၵၼ်လႄႈဝႃႈ၊-ၵေႃႉၼၼ်ႉတၵ်းပဵၼ်ၶုၼ်ႁေႃၶမ်းဢိသရေႇလဢေႃႈ၊ဝႃႈၼင်ႇၼႆသေလႄႈဢွၼ်ၵၼ်ဢုမ်ႇမႃးႁႂ်ႈလႆႈတိုၵ်းတေႃးမၼ်းလႄႈယုဝ်ႇသၽတ်ႉၵေႃႈႁွင်ႉသႅၼ်ႇဢေႃႈ။ထႃႇဝရႃႉၽြႃးၸွႆႈထႅမ်မၼ်းလႄႈၽြႃးပဵၼ်ၸဝ်ႈတိုၵ်းယူင်းႁႂ်ႈၶဝ်ၼၼ်ႉဝေႈပိူင်ႈမၼ်းသေဢေႃႈ။
၃၂ မိူဝ်ႈဢၼ်ၶုၼ်ပူဝ်ႇဢၼ်ဢုပ်ႉၵႃႈၼိူဝ်ႁူဝ်ႁၢၼ်ၵူၼ်းသိုၵ်းၶီႇလေႃႉရထႃးၸိူဝ်းၼၼ်ႉႁူႉႁၼ်လွင်ႈဢၼ်ဢမ်ႇၸႂ်ႈၶုၼ်ႁေႃၶမ်းဢိသရေႇလၼၼ်ႉၸိုင်ၶဝ်ယင်းဢမ်ႇဢုမ်ႇၸွမ်းမၼ်းလႄႈဢွၼ်ၵၼ်ဝေႈပိူင်ႈမၼ်းသေဢေႃႈ။
၃၃ ၵူၼ်းၵေႃႉၼိုင်ႈယင်းဢမ်ႇယိင်ႈၸူးလႄႈဢဝ်ၵၢင်ႇမၼ်းယိုဝ်းလႄႈထုၵ်ႇမႅၼ်ႈသႂ်ႇၵႃႈတီႈၵႄႈပွင်ႈသိူဝ်ႈၶႅပ်းလဵၵ်းၶုၼ်ႁေႃၶမ်းဢိသရေႇလၼၼ်ႉသေယဝ်ႉမၼ်းလၢတ်ႈတီႈၵေႃႉဢၼ်ထိင်းလေႃႉရထႃးမၼ်းလႄႈဝႃႈ၊-ဢဝ်ၵဝ်ဝၢႆႇၶိုၼ်းလႄႈဢွၵ်ႇသေၵႃႈၼႂ်းပွႆးသိုၵ်းတႃႉ။ၵဝ်ၸဵပ်းၼႃႇလူင်လၢင်ယဝ်ႉ၊ဝႃႈၼင်ႇၼႆဢေႃႈ။
၃၄ ၼႂ်းဝၼ်းၼၼ်ႉတၢင်းဢၼ်တိုၵ်းၵၼ်တေႃးၵၼ်ယိင်ႈၶႅၼ်းယႂ်ႇမႃးတူဝ်းမႃးယူႇဢေႃႈ။ၶုၼ်ႁေႃၶမ်းဢိသရေႇလၼၼ်ႉဢိင်ၵႃႈၼႂ်းလေႃႉရထႃးၸဝ်ႈသေလႄႈတေႃႇၼႃႈၵၼ်တင်းၵူၼ်းသုရိၸိူဝ်းၼၼ်ႉတေႃႇထိုင်ႁွတ်ႈၶိင်ႇႁူဝ်ၶမ်ႈဢေႃႈ။ယၢမ်းမိူဝ်ႈဢၼ်ၵၢင်ဝၼ်းၸမ်တၵ်းတူၵ်းၼၼ်ႉဢသၢၵ်ႈမၼ်းသဵင်ႈသေဢေႃႈ။